ရှန်လင်းသည် သမီးအစစ်နှင့်အတုအယောင်အကြောင်း ရေးသားထားသည့် ဝတ္ထုတစ်ပုဒ်အတွင်းသို့ ကူးပြောင်းရောက်ရှိသွားခဲ့ပြီး ယုတ်မာရက်စက်သော ဇာတ်ပို့အမျိုးသမီးတစ်ဦး ဖြစ်လာခဲ့သည်။
ထိုဝတ္ထုထဲတွင် ဇာတ်ပို့ဇာတ်ဆောင်သည် ရိုင်းစိုင်းယုတ်မာသူတစ်ဦးဖြစ်ကာ ဇာတ်လိုက်မင်းသမီးအား အစဉ်တစိုက် အကောက်ကြံ နှိပ်စက်ခဲ့ပြီး နောက်ဆုံး၌ နိဂုံးမလှသော ကံကြမ္မာဆိုးနှင့်သာ အဆုံးသတ်ခဲ့ရလေသည်။
ဤဆိုးရွားလှသော ကံကြမ္မာဆိုးမှ လွတ်မြောက်ရန်အတွက် ရှန်လင်းသည် နန်းတွင်းသို့ဝင်ရန် ပြတ်ပြတ်သားသား ဆုံးဖြတ်ခဲ့လေသည်။ ထိုနန်းတော်အတွင်း၌ ရက်စက်ကြမ်းကြုတ်လှသော မင်းဆိုးမင်းညစ်တစ်ပါး စံမြန်းနေသည်ဆိုသော်ငြား သူမဘက်ကသာ အစစအရာရာ ဆင်ခြင်ကာ အေးအေးဆေးဆေး နေထိုင်သွားမည်ဆိုလျှင် ထိုမင်းဆိုးက သူမကို ခေါင်းမဖြတ်လောက်ပေ။
ထိုသို့မဟုတ်ဘဲ သူမသည် ကိုယ်လုပ်တော်အဆင့်မှ ကြင်ယာတော်၊ ထိုမှတစ်ဆင့် နောက်ဆုံးတွင် ဧကရီမိဖုရားခေါင်ကြီးအဖြစ်သို့ပင် အဆင့်ဆင့် တိုးမြှင့်မြှောက်စားခြင်း ခံခဲ့ရလေသည်။
ရှန်လင်း- "နေပါဦး... အဲ့ဒီမင်းဆိုးမင်းညစ်က ဇာတ်ညွှန်းမှားများ ယူလာမိတာလား။"
.....
ရှဲ့ယွမ်ရွှင်းသည် အလွန်တရာ ကြောက်မက်ဖွယ်ကောင်းပြီး စိတ်ခက်ထန်ကာ သွေးဆာတတ်သည့် ရက်စက်လှသော မင်းဆိုးမင်းညစ်တစ်ဦး ဖြစ်လေသည်။
လူတိုင်းက သူ့ကို ကြောက်ရွံ့ကြ၏။ လူတိုင်းက သူ့ကို တုန်လှုပ်ချောက်ချားကြ၏။
နန်းတွင်းကိုယ်လုပ်တော်ရွေးချယ်သည့်နေ့တွင် နုနယ်လှပသော မိန်းမပျိုတစ်သိုက်ကို မြင်လိုက်ရချိန်၌ သူသည် တစ်စုံတစ်ယောက်အား သတ်ဖြတ်ရန် ရည်ရွယ်လျက် ဓားကို မြှောက်လိုက်မိသော်လည်း ထိုခဏ၌ပင် ရှန့်လင်း၏ အတွင်းစိတ်အသံများကို သူ ရုတ်တရက် ကြားလိုက်ရလေတော့သည်။
အခြားအမျိုးသမီးများ ထိတ်လန့်တကြား ငိုကြွေးနေကြစဉ် ရှန်လင်းသည်လည်း တစ်ကိုယ်လုံး တုန်တုန်ယင်ယင်ဖြင့် သူတို့နှင့်အတူ လိုက်ပါကာ ရှိုက်ကြီးတငင် ငိုကြွေးနေလေသည်။
ထိုမင်းဆိုးသည် ရှန်လင်း၏ လည်တိုင်သို့ ဓားသွားကို တိုက်တိုက်ဆိုင်ဆိုင်ပင် တေ့ထားလိုက်ပြီးနောက် သူမအား သတ်ဖြတ်မည်ကို ကြောက်ရွံ့ခြင်း ရှိ၊ မရှိ မေးမြန်းလိုက်လေသည်။
ရှန်လင်သည် မျက်ရည်များ တဖြိုင်ဖြိုင် စီးကျနေရင်းမှပင် သူမ မကြောက်ပါဟု ဆိုလိုက်သော်လည်း စိတ်ထဲ၌မူ -
" နင်ရူးနေတာလား  ကြောက်တာပေါ့လို့! နင်သာ အဲ့ဒါကြီးကို ဝှေ့ယမ်းလိုက်ရင် ပုခုံးပေါ်က ခေါင်း အရင်ဆုံး ပြုတ်မယ့်သူကငါပဲ! ငါ့နှယ်... တကယ်ကို ကံဆိုးလိုက်တာ... နင်အဲ့လောက်တောင် စွမ်းနေတယ်ဆိုရင်လည်း ငါ့ကို အဲ့ဒီဓားပေးပြီး စမ်းခိုင်းကြည့်ပါလား!"
သူ၏ သတ်ဖြတ်လိုသော အရှိန်အဝါမှာ ချက်ချင်းပင် ပျောက်ကွယ်သွားလေသည်။
အာဏာရှင်က "စိတ်ဝင်စားစရာပဲ" ဟု တွေးလိုက်မိသည်။
.....
စိတ်ပိုင်းဆိုင်ရာ မတည်ငြိမ် အလိုလိုက်ခံရတဲ့ တိုက်ခိုက်ရေးခွေး ဧကရာဇ် xရှင်သန်ဖို့ပဲ လိုလားတဲ့ ငါးဆားနယ်ဧကရီ