Ch 15

🌹Chapter 15

စိတ်တိုနေသော ပါပါးစုန့်

ဤသို့တွေးမိသည်နှင့် စုန့်ယွီက နောက်ထပ် မက်ဆေ့ချ်တစ်စောင် ပို့လိုက်သည်။

[စုန့်ယွီ: မင်း ဘာကိုဆိုလိုတာလဲ…မင်း ငါ့ကို လှောင်နေသလိုပဲ ဘာလို့ခံစားနေရတာလဲ…]

သူ အကြာကြီး စောင့်ပြီးမှသာ ရှဲ့ဆွေ့ထံမှ အဖြေပြန်ရခဲ့သည်။

[ရှဲ့ဆွေ့: အိုး…အဲ့ဒါက ‘သလိုပဲ’ မဟုတ်ဘူး…]

စုန့်ယွီ: "......"

သေစမ်း…ရင်းနှီးလာတာ ခဏကြာလာပြီဆိုတော့ သူ့ရဲ့ ပင်ကိုယ်စရိုက်က ဒီလိုဖြစ်လာတာလား…ငါ အရင်တုန်းက သနားစရာ ကောင်လေးကိုပဲ ပိုသဘောကျတယ်…

အခြားတစ်ဖက်တွင် ရှဲ့ဆွေ့က ပြုံးနေရင်း ဖုန်းပိတ်လိုက်ပြီဖြစ်သည်။

‘တိီ’ ဆိုသည့် အသံနှင့်အတူ မီးတစ်ချက် လင်းသွားခဲ့သည်။ ထို့နောက် သူ့ကွန်ပျူတာတွင် အီးမေးလ်တစ်ခု ပေါ်လာခဲ့သည်။ ပို့သူ၏ အမည်က ‘ရှုရှီးအန်း’ ဖြစ်သည်။

သူ့အကြည့်က အီးမေးလ်ပေါ်သို့ ကျရောက်သွားပြီးနောက် အပြုံးက မပျောက်သွားသော်လည်း အေးစက်မှုလေးတစ်ခု ပါနေခဲ့သည်။

[ရှုရှီးအန်း: အားဆွေ့… သား အဒေါ်နဲ့ အဆက်အသွယ်လုပ်ဖို့ ဆန္ဒရှိတာကို အဒေါ် တကယ်ပျော်ပါတယ်… မင်းအမေ ဖြစ်ခဲ့တာက အဒေါ်တို့မိသားစုတစ်ခုလုံးကို အရမ်းဝမ်းနည်းစေခဲ့ပေမဲ့ အချိန်က တော်တော်ကြာနေပြီ…. ဒါ့ကြောင့် အဲ့ဒီအကြောင်းပြောဖို့ အရမ်း နောက်ကျနေပြီ…အဒေါ်တို့ အားလုံး မင်းကို အရမ်းသတိရကြပါတယ်… မင်း အခု ဘယ်မှာလဲ… မင်းအဒေါ်က တစ်ယောက်ယောက်ကို ချက်ချင်းလွှတ်ပြီး မင်းကို မြို့တော် A ကို ခေါ်လာခိုင်းမယ်…]

ရှဲ့ဆွေ့က အောက်သို့ ငုံ့ကြည့်ပြီး ညင်သာစွာ ရယ်လိုက်သည်။

သူတို့က ငါ့ကို သတိရတာလား… အရင်တုန်းက ရှုမိသားစုက ငါ့ အမေကို သူတို့မိသားစုအတွက် အရှက်ရစရာလို့ သဘောထားပြီးတော့ မိသားစုဆက်ဆံရေးကို တိုက်ရိုက်ဖြတ်တောက်ခဲ့ပြီး သူ့(အမေ)ကိုတစ်ယောက်တည်း မောင်းထုတ်ခဲ့တာ… ငါ့ အမေ ဘယ်ချိန်သေသွားမှန်းတောင် သူတို့ မသိခဲ့ကြဘူး… အခုကျမှ ငါ့ကို ပြန်ခေါ်ချင်နေကြတယ်… 

အကြောင်းမူကား သူမ လိုက်ပြေးသွားခဲ့သော  အမျိုးသားက ယခု ရှဲ့မိသားစု၏ ခေါင်းဆောင်ဖြစ်နေကြောင်းကို သူတို့ သိသွားသောကြောင့် ဖြစ်နိုင်သည်။

ဘယ်လောက်တောင် လှောင်ပြောင်ချင်စရာ ကောင်းလိုက်သလဲ….

[ရှဲ့ဆွေ့: ကျေးဇူးတင်ပါတယ် အဒေါ်… ဒါပေမဲ့ အခုလောလောဆယ် ကျွန်တော့်အကြောင်း အဖွားကို မပြောပြစေချင်ပါဘူး… အရွယ်ရောက်မှ ပြန်လာပါ့မယ်…]

သူ့ကို မြို့တော် A  ပြန်သွားခိုင်းရန်အတွက်သာ သူမက ဆက်သွယ်ခဲ့ခြင်း မဟုတ်ပေ။

ရှုရှီးအန်းက အလွန်လျင်မြန်စွာ ပြန်ဖြေလာခဲ့သည်။

[ဘာလို့လဲ…မင်းရဲ့ အဖိုး၊အဖွားတွေသိရင် အရမ်းပျော်ကြမှာပါ… အားဆွေ့က အခု ၁၅ နှစ်ရှိပြီ….သား ပြန်လာရင် အဒေါ်က မင်းကို မြို့တော် A ရဲ့ အကောင်းဆုံး အထက်တန်းကျောင်းမှာ ကျောင်းတက်ဖို့ စီစဉ်ပေးမယ်…]

ဘာကို ပျော်ကြမှာလဲ… ရှဲ့မိသားစုနဲ့ နီးစပ်ဖို့အတွက် အသုံးဝင်တဲ့ စစ်တုရင်အပိုင်းအစတစ်ခု ရလို့ ပျော်ကြတာလား…

ရှဲ့ဆွေ့က အမူအရာမဲ့နေခဲ့သည်။ သူ၏ မက်မွန်ပွင့်မျက်လုံးများက နက်ရှိုင်းပြီး မှေးစင်းနေသည်။

[အဒေါ်၊ ကျွန်တော်...ကျွန်တော် နည်းနည်းကြောက်တယ်… ပြန်မသွားခင် နည်းနည်း အရွယ်ရောက်အောင် စောင့်ချင်သေးတယ်…]

အခြားတစ်ဖက်တွင် ရှုရှီးအန်းက သူ၏ သတိပေးစကားကြောင့် တစ်ခုခုကို ရုတ်တရက် သဘောပေါက်သွားခဲ့သည်။ ရှဲ့ဆွေ့ အတွက်မူကား အလွန်စောလျင်စွာ ပြန်လာခြင်းက အမှတ်တကယ်ပင် မလုံခြုံပေ။ အဘယ်ကြောင့်ဆိုသော် တတိယသခင်လေး ရှဲ့တွင် လက်ရှိဇနီး ရှိနေဆဲဖြစ်သောကြောင့် ဖြစ်သည်။ ထိုမိန်းမ၏ ရက်စက်သည့် နည်းလမ်းများကို သူမ စဉ်းစားမိသောအခါ ရှုရှီးအန်းက အတည်ပြုသော အဖြေတစ်ခု ပေးလိုက်သည်။

[ဒါဆိုရင် အဒေါ်  မင်းရဲ့ သဘောထားကို လေးစားပါ့မယ်… အားဆွေ့ စာကြိုးစားပါ… သားရဲ့ ဘဏ်ကတ်နံပါတ် အဒေါ့်ကို ပေးလိုက်ပါ…အဒေါ် သားကို ပိုက်ဆံ အရင်လွှဲပေးပါ့မယ်… သား ဘာလိုအပ်လဲဆိုတာ အဒေါ်ကို ပြောလို့ရပါတယ်…]

ရှဲ့ဆွေ့က ဤအကြောင်းအရာနှင့်ပတ်သက်၍ ယဉ်ကျေးစွာ ပြောဆိုနေမည်မဟုတ်သော်လည်း ဤအဒေါ်ဖြစ်သူက သူ့ကို ဆက်သွယ်ခဲ့သည်မှာ ဤမျှလောက်အတွက်သာ မဟုတ်ပေ။ ဤဘဝတွင် သူက ရှဲ့မိသားစုသို့ အစောပိုင်းကတည်းက ပြန်ရောက်နိုင်ဖွယ်ရှိသော်လည်း ထိုမတိုင်မီ ရှဲ့မိသားစုကို လက်ဆောင်တစ်ခု ပေးချင်နေခဲ့သည်။

[အဒေါ်၊ ကျွန်တော် မနက်ဖြန် တစ်ခုခု ပို့ပေးပါ့မယ်… အမေ့ရဲ့ ဒိုင်ယာရီပါ…]

ရှုရှီးအန်းက မှင်သက်သွားခဲ့သည်။

ရှဲ့ဆွေ့၏ နှုတ်ခမ်းများက အေးစက်စွာ ကွေးညွှတ်သွားသည်။

[ချန်နန်ကလပ်၊ လွန်ခဲ့တဲ့ဆယ်နှစ်လောက် ဖြစ်ရပ်ပါ… အဒေါ် သေချာ စုံစမ်းပြီး အမေ့အတွက် တရားမျှတမှု ရယူပေးနိုင်လိမ့်မယ်လို့ မျှော်လင့်ပါတယ်…]

ပြောရမည်ဆိုလျှင် သူ့အမေက ရှဲ့စစ်နျန်နှင့် တွေ့ဆုံပြီး အကြာကြီး အရူးလုပ်ခံခဲ့ရသည့် ကိစ္စတွင် ဤအဒေါ်က အစအဆုံး မရှိမဖြစ် ပါဝင်ခဲ့သူဖြစ်သည်။ ရှုရှီးအန်းက ရူးသွပ်ပြီး အဆိပ်ပြင်းကာ သူ၏ ဂုဏ်ပုဒ်ရှိနေလျှင်ပင် ယခုမှ နိုင်ငံကို ပြန်ရောက်လာသည့် ရှဲ့စစ်နျန်ကို မမှတ်မိခဲ့ပေ။ ထိုအချိန်တွင် သူမက အိမ်ထောင်သည်တစ်ယောက်က သူ့အမေကို ပျက်စီးအောင်လုပ်ရန် ကူညီပေးချင်သောစိတ်သာ ရှိခဲ့လိမ့်မည်ဖြစ်သည်။ သို့သော် ဤလူက မြို့တော် A တွင် နာမည်ကြီးသော တတိယသခင်လေးရှဲ့ ဖြစ်နေလိမ့်မည်ဟု သူမ ဘယ်သောအခါမှ မမျှော်လင့်ခဲ့ပေ။ ရှုရှီးအန်း၏ ဉာဏ်ရည်ဉာဏ်စွမ်းအရဆိုလျှင် သူ့အမေက ပို၍ အမြတ်ရသွားခဲ့သည်ဟုပင် သူမ ခံစားလိမ့်မည်ဖြစ်သည်။

စကားဝိုင်း၏ တစ်ဖက်တွင် ရှုရှီးအန်း၏  မျက်လုံးများက လင်းလက်သွားခဲ့သည်။ သူမ စိတ်ထဲတွင် ခန့်မှန်းချက်တစ်ခု ရှိနေခဲ့သော်လည်း အတည်ပြုရန် မရဲဘဲ အချက်အလက်များကို ထပ်မံ စုံစမ်းမေးမြန်းနေခဲ့သည်။

[အားဆွေ့ မင်း အဲ့ဒီအကြောင်းကို ပြောနေတာလား...]

ရှဲ့ဆွေ့က သူမကို ထပ်မံ ပြန်ဖြေရန် ပျင်းရိနေခဲ့သည်။

[မနက်ဖြန် သိရလိမ့်မယ်…]

ချန်နန်ကလပ်။ ထိုအချိန်တွင် ချင်းချိုးယွင်က လူများကို သူ့အမေအား ပြန်ပေးဆွဲရန် ထိုနေရာတွင် ခိုင်းခဲ့ခြင်းဖြစ်ပြီး၊ ထိုနေရာက သူ့အမေအတွက် အိပ်မက်ဆိုးတစ်ခု ဖြစ်လာခဲ့သည်။

သူ၏ ယခင်ဘဝ၌ ချင်းချိုးယွင်ကို ထောင်ထဲသို့ သူ(ရှဲ့ဆွေ့) ကိုယ်တိုင် ပို့ခဲ့သည်။ ယခင်က မြင်ကွင်းကို သူ ယခုအချိန်ထိ သတိရနေဆဲဖြစ်ပြီး ထိုအချိန်တွင် အသိတရားဝင်လာခဲ့သော အမျိုးသမီးက အဆုံးတွင် သူ့ကားရှေ့သို့ ရပ်သွားပြီး သူ့လမ်းကို ပိတ်ဆို့ကာ ရှိုက်ကြီးတငင် ငိုကြွေးပြီး အသနားခံကာ ဒူးထောက်ခဲ့သည်။ ရှဲ့ဆွေ့က သူ့လက်ကောက်ဝတ်ကို ထိလိုက်ပြီး သူ့မျက်လုံးထဲတွင် ဒေါသများဖြင့် လင်းလက်နေခဲ့သည်။

တကယ်တော့ အဲ့ဒီအချိန်တုန်းက... ငါ ကားကို မောင်းပြီး သူ့ကို တိုက်ရိုက် ဝင်တိုက်ပစ်ချင်ခဲ့တာ…

သို့သော် ယခုအချိန် ပြန်လည်မွေးဖွားလာပြီးနောက် ချင်းချိုးယွင်အပေါ် သူ၏ မုန်းတီးမှုက ယခင်ကဲ့သို့ မနက်ရှိုင်းတော့ပေ။

သူတို့ အချင်းချင်း ခွေးများကဲ့သို့ ကိုက်ခဲနေကြသည်ကိုသာ သူ ကြည့်ချင်ခဲ့သည်။

*

အဖွားမုန့်၏ ဥယျာဉ်ထဲတွင် စံပယ်ပင်များစွာ ရှိသည်။ မေလမှ ဩဂုတ်လကြားတွင် သူတို့က ပွင့်ကြပြီး၊ စိမ်းလန်းသော အရွက်များနှင့် ဖြူဖွေးနေသည့် ပန်းပွင့်လေးများက မိုးတစ်ကြိမ် ရွာပြီးနောက်တွင် ပို၍ လတ်ဆတ်လှပနေပုံရ၏။

စုန့်ယွီက ဥယျာဉ်မှူးထံမှ ကတ်ကြေးတစ်စုံကို ယူပြီး ပန်းများကို အကြိမ်ပေါင်းများစွာ ဖြတ်ရန် ကြိုးစားခဲ့သော်လည်း သူ့ကို ကြည့်နေသည့် ဥယျာဉ်မှူးဦးလေးကို နှလုံးရောဂါဖြစ်စေလုနီးပါး ဖြစ်စေခဲ့သဖြင့် အဆုံးတွင် ကတ်ကြေးကို တိတ်ဆိတ်စွာ ပြန်ပေးခဲ့သည်။

သူ မူလနေရာသို့ ပြန်သွားထိုင်ပြီး သူ့ရှေ့ရှိ စာမေးပွဲစာရွက်ကို စိတ်မသက်မသာနှင့် ကြည့်နေခဲ့သည်။

အခြားသူများက ချစ်စရာကောင်းသော ဥယျာဉ်ထဲတွင် နေ့လယ်ပိုင်း လက်ဖက်ရည်သောက်နေစဉ် စုန့်ယွီမူကား သင်္ချာ၊ ရူပဗေဒ၊ ဓာတုဗေဒတို့နှင့် တစ်ယောက်တည်းသာ ဆွေးနွေးပွဲလုပ်နေရလေသည်။

အမှန်တွင် စုန့်ယွီက ဤမျှလောက် ကြိုးစားချင်ခဲ့သော သူ မဟုတ်ပေ။ 

ဤအရာများအားလုံးက ယမန်နေ့က ကိစ္စကြောင့်သာဖြစ်သည်။ သူ၏ စိတ်တိုတတ်သည့် ပါပါးစုန့်က အဆုံးတွင် သူ ကျောင်းပြောင်းရွှေ့သည့်အကြောင်းကို သိသွားခဲ့သည်။ သူက အလွန် ဒေါသထွက်နေပြီး မြို့တော်  A မှ သူ့ကို တိုက်ရိုက်ဖုန်းခေါ်ကာ သူ့ကို အပြင်းအထန် ဆူပူကြိမ်းမောင်းခဲ့သည်။

ထိုအချိန်တွင် စုန့်ယွီက ခုတင်ပေါ်တွင် လှဲလျောင်းပြီး သူ့ဖုန်းနှင့် ကစားနေဆဲဖြစ်ကာ ရုတ်တရက် သူ့အစ်မထံမှ မက်ဆေ့ချ်တစ်ခု ရောက်လာခဲ့သည်။

[စုန့်ဝမ်ရင်း: နင်တော့ သွားပြီ…ပါး သိသွားပြီ…]

[စုန့်ဝမ်ရင်း: မားက နင် ကျောင်းဝင်ခွင့်ရတဲ့အထိ ပါးကို မပြောဘဲ ဖုံးကွယ်ထားချင်ခဲ့တာ… ဒါပေမဲ့ ပါးက မမျှော်လင့်ဘဲ စောစောစီးစီး ပြည်ပကနေ ပြန်ရောက်လာတယ်…]

[စုန့်ဝမ်ရင်း: [ဖယောင်းတိုင်မီးထွန်း][ဖယောင်းတိုင်မီးထွန်း]

စုန့်ယွီ ပြန်မဖြေမီမှာပင် သူ့ဖုန်းက မြည်လာခဲ့သည်။

ခေါ်ဆိုသူက သူ့အဖေဖြစ်သည်။

"......"

စုန့်ယွီ…

ဖုန်းခေါ်ဆိုမှုကို လက်ခံလိုက်သောအခါ စိတ်တိုတတ်သည့် ဥက္ကဌစုန့်ထံမှ ဆူပူကြိမ်းမောင်းသံများ အလုံးစုံ ထွက်လာခဲ့သည်။

 "စုန့်ယွီ၊ မင်း တော်တော်သတ္တိရှိနေတာပဲ… ဟမ်းး… မင်း အတောင်ပံတွေ အပြည့်ပေါက်နေပြီလား… ဟုတ်လား… မင်း ဆေးရုံကနေ အခုမှ ထွက်လာပြီး ကျင်းမြို့တော်ကို ပြောင်းသွားတယ်ပေါ့… မင်း ကိုယ့်ခန္ဓာကိုယ်အခြေအနေကို မသိဘူးလား…"

စုန့်ယွီ: "......"

"တောင်းပန်ပါတယ် ပါး…သား တကယ်မသိခဲ့ဘူး… ခေတ်သစ်ဆေးပညာတောင် မဖော်ထုတ်နိုင်တဲ့ ဆေးဘက်ဆိုင်ရာ ပြဿနာ မဟုတ်ဘူးလား…"

ဥက္ကဌစုန့်: "ပြီးတော့ မင်းက ငါ့ကို လိမ်ဖို့အတွက် မင်းရဲ့ မားနဲ့ အစ်မကိုတောင် ဆွဲဆောင်ခဲ့တယ်ပေါ့…မင်းတို့အားလုံးက ငါ့ကို ဒီမိသားစုရဲ့ ခေါင်းဆောင်တစ်ယောက်အနေနဲ့ အရေးမထားကြတော့ဘူးလား…"

စုန့်ယွီက ဘာမှပြောစရာမရှိပေ။

 ဒီ 'မိသားစုခေါင်းဆောင်' ဆိုတဲ့ ဘွဲ့က သူ့ဘာသာသူ ပေးထားတဲ့ ဘွဲ့ပဲကို...

ဥက္ကဌစုန့်: "ငါ အခု ခဏနေရင် မင်းအဖွားနဲ့ အခြေအနေကို ရှင်းလင်းအောင်လုပ်မယ်…မင်း ပစ္စည်းတွေ ထုပ်ပိုးပြီး မနက်ဖြန် မြို့တော်  A ကို ပြန်လာခဲ့…."

စုန့်ယွီက စိုးရိမ်တကြီး ပြောလိုက်သည်။

"မလုပ်ပါနဲ့… ပါး…"

ဥက္ကဌစုန့်: "ငါ့ကို တောင်းပန်နေလည်း အပိုပဲ… မင်း စကားတစ်ခွန်းမှမပြောဘဲ ကျင်းမြို့တော်ကို သွားကတည်းက ဒီလိုဖြစ်လာမယ်ဆိုတာ စဉ်းစားသင့်တာ…"

စုန့်ယွီက ဤစိတ်ဓာတ်မမှန်သောလူကြီးနှင့် စကားပြော၍ မရတော့ပေ။ နေ့ဘက်က သူလုပ်ခဲ့သည့် စာမေးပွဲစာရွက်ကို သတိရလိုက်သောအခါ ရုတ်တရက် အတွေးတစ်ခု ရလာခဲ့သည်။ သူ ခဏတာ တိတ်ဆိတ်သွားပြီးနောက် နက်ရှိုင်းသောလေသံနှင့် ပြောလိုက်သည်။

“ပါး၊ တကယ်တော့ သား ကျင်းမြို့ကို စာပိုကြိုးစားဖို့အတွက် လာခဲ့တာပါ…”

ဥက္ကဌစုန့်: "???"

ဖုန်းတစ်ဖက်မှ မုန်တိုင်းမတိုက်မီ ကြားရတတ်သည့် တိတ်ဆိတ်မှုမျိုး ထွက်ပေါ်လာသည်။

သူ ဒေါသထွက်မလာမီ စုန့်ယွီက အလျင်အမြန် ဆက်ပြောသည်။

"သား မြို့တော် A မှာ ရှိနေရင် လူတိုင်းက သားကို ဘယ်အချိန်မဆို ကွဲသွားနိုင်တဲ့ ရွှံ့ရုပ်တုလို သဘောထားကြတယ်… ကျောင်းက သားကို ကိုယ်လက်လှုပ်ရှားမှု သင်တန်းတွေ မတက်ခိုင်းဘူး… ကိုယ်လက်လှုပ်ရှားမှုနဲ့ ခွန်အားလိုတဲ့ ကိစ္စမှန်သမျှ သားက ပစ်ပယ်ခံရတယ်… မိန်းကလေးကျောင်းသူတွေရှေ့မှာလည်း မျက်နှာပျက်ရတယ်… ဒါက သားရဲ့ စိတ်ခံစားချက်ကို ပြင်းပြင်းထန်ထန် ထိခိုက်စေလို့…ဒါကြောင့် သင်ယူမှု စွမ်းဆောင်ရည်ကိုပါ ထိခိုက်စေတယ်…"

ဥက္ကဌစုန့်: "......"

စုန့်ယွီ: "ပါးတို့က မြို့တော် A မှာရှိနေပြီးတော့၊ အဒေါ်တွေ၊ ဦးလေးတွေ ထောင်နဲ့ချီလည်း ရှိတယ်… သားလုပ်သမျှ အရာအားလုံးကို စောင့်ကြည့်ခံရတယ်… အသက်တူ မိန်းကလေးကျောင်းသူတွေနဲ့ ခံစားချက်နဲ့ သူငယ်ချင်းဆက်ဆံရေးတွေ တည်ဆောက်ဖို့အတွက်လည်း အခွင့်အရေး မရဘူး… လွတ်လွတ်လပ်လပ် သွားလာလှုပ်ရှားခွင့်လည်း ဆုံးရှုံးခဲ့ရတာ… စာကြည့်တိုက် သွားချင်တာတောင် စောင့်ကြည့်ခံရတယ်… ဒါက စာသင်ယူရတာကို ကြိုက်တဲ့ ၁၅ နှစ်သား ဆယ်ကျော်သက်တစ်ယောက်အတွက် အရမ်း ရက်စက်တဲ့ ကိစ္စပါ…"

ဥက္ကဌစုန့်က သူ့ဒေါသကို ဖိနှိပ်လိုက်သည်။

"မင်းပြောသမျှ အရာအားလုံးက သင်ယူမှုနဲ့ ဆက်စပ်နေတာပဲ… မင်း စာသင်ရတာကို ဒီလောက် သဘောကျတာလား…"

စုန့်ယွီက သူ့အဖေ စိတ်ပြောင်းလဲစပြုနေပြီဆိုသည်ကို သိလိုက်သည်။ သူ၏ မကျေနပ်ချက်များအပေါ် ငိုကြွေးပြခြင်းက အသုံးဝင်နေဆဲပင် ဖြစ်သည်။ သူ ခဏလောက် စိတ်ခံစားချက်များကို မီးစွဲနေစေပြီး၊ သူ့ဖုန်းကို ဆုပ်ကိုင်ကာ တိုးတိုးလေး ပြောလိုက်သည်။

"ဟုတ်ကဲ့၊ စာသင်ရတာက သားကို ပျော်ရွှင်စေပါတယ်… ပြီးတော့ သား ကျင်းမြို့ကိုလာတာ ဆယ်ရက်ပဲ ရှိသေးတာ… ဒါပေမဲ့ အရမ်းကောင်းတဲ့ သူငယ်ချင်းတစ်ယောက်နဲ့ တွေ့ခဲ့ပြီးပြီ… ဒါက သားဘဝမှာ ပထမဆုံးရတဲ့ သူငယ်ချင်းပဲ… သူက စာတော်သလို စိတ်ဓာတ်လည်း ကောင်းတယ်… သားတို့ အတူတူ သင်ယူပြီး တိုးတက်နိုင်ပါတယ်…"

ဆယ်ကျော်သက်လေး၏ အသံက ကြည်လင်တောက်ပပြီး လယ်ကွင်းများပေါ် နေရောင်ခြည် ထိုးကျနေသကဲ့သို့ပင်။

ဥက္ကဌစုန့်က အချိန်အကြာကြီး တိတ်ဆိတ်နေခဲ့သည်။

လျှပ်စစ်ဆူညံသံများက တရှဲရှဲထွက်ပေါ်နေသည်ကိုသာ အချိန်အကြာကြီး ကြားနေရသည်။

သူ့ ဂုဏ်သိက္ခာကို အခိုင်အမာ ထိန်းသိမ်းလိုသည့် ဥက္ကဌစုန့်က လှောင်ပြောင်ပြီး ပြောလိုက်သည်။

 "မင်း စာလေ့လာရတာကို ဒီလောက် သဘောကျရင် မြို့တော်  A က အလယ်တန်းကျောင်း စာမေးပွဲမှာ အမှတ်အပြည့် ၈၅၀ မှာ ၃၅၀ ပဲ ရခဲ့တုန်းကရော စာလုပ်ဖို့ နည်းနည်းလေးတောင် မစဉ်းစားခဲ့ဘူးလား…"

စုန့်ယွီ: "......"

စာညံ့သူတစ်ယောက်က စာလုပ်ရတာ မကြိုက်လာနိုင်ဘူးလား….ငါ စာညံ့ပေမဲ့ စာလုပ်ရတာကို တစ်ချိန်တည်းမှာ ကြိုက်လို့ မရဘူးလား…အဲ့ဒီ ၃၅၀ဆိုတဲ့ အမှတ်တွေက အမှတ်မဟုတ်ဘူးလား…

ဥက္ကဌစုန့်က လူဆိုးတစ်ယောက်ကဲ့သို့ ဆက်ပြီး လှောင်ပြောင်နေလေသည်။

"မင်း စာလုပ်ရတာကို ဒီလောက်တောင် ကြိုက်လား…ကောင်းပြီ၊ ကျင်းချန် အမှတ် (၁) ရဲ့ လစဉ်စာမေးပွဲမှာ ထိပ်ဆုံးအဆင့် ၁၀၀ ထဲ မပါဘူးဆိုရင် မင်း ဒီကို ပြန်လာရလိမ့်မယ်…"

"တီ—––"

စုန့်ယွီ: "???!!!!"

ဘာတွေဖြစ်နေတာလဲ…

စုန့်ယွီ: "ပါး၊ ပါး၊ ပါး––"

သို့သော် သူ ပြန်ရခဲ့သည့်အဖြေမှာ ဥက္ကဌစုန့်က ဖုန်းကို ရက်ရက်စက်စက် ချသွားသည့် အသံပင်ဖြစ်သည်။

စုန့်ယွီက စိတ်ပူပန်မှုများနှင့် ပြန်ခေါ်သော်လည်း သူ၏ ဖုန်းခေါ်ဆိုမှုများက အကြိမ်ကြိမ် ပယ်ချခံခဲ့ရသည်။

"တောင်းပန်ပါတယ်၊ လူကြီးမင်းခေါ်ဆိုသည့် နံပါတ်က လတ်တလောတွင် ဖုန်းမဖြေကြားနိုင်သေးပါ…"

"တောင်းပန်ပါတယ်၊ လူကြီးမင်းခေါ်ဆိုသည့် နံပါတ်က လတ်တလောတွင် ဖုန်းမဖြေကြားနိုင်သေးပါ…"

နောက်ဆုံးတွင် ထိုအရာက….

"တောင်းပန်ပါတယ်၊ လူကြီးမင်းခေါ်ဆိုသည့် နံပါတ်က ဖုန်းစက်ပိတ်ထားပါတယ်…"

စုန့်ယွီ: "......"

ငါ့ရဲ့  စိတ်အခြေအနေက တကယ်ကို ဆိုးရွားသွားပြီ…

ဤသို့နှင့် သူ့အဖေက လစဉ်စာမေးပွဲ ရလဒ်များအတွက် တစ်ဖက်သတ် သဘောတူညီချက် တစ်ခုကို ချမှတ်ခဲ့သည်။

သေစမ်း….

အစပိုင်းတွင် စုန့်ယွီက စာမေးပွဲစာရွက်များကို ပေါ့ပေါ့ဆဆ လုပ်နေခဲ့သော်လည်း ယခုတွင် သူက ဥယျာဉ်ထဲသို့ အထူးတလည် ပြောင်းလာပြီး စာလုပ်နေခဲ့သည်။ ဤသည်က ပင်ပန်းဆင်းရဲစွာနှင့် ကြိုးစားအားထုတ်နေခြင်းဟုပင် ပြောနိုင်သည်။ သို့သော် ဤသို့ အချိန်ကြာမြင့်စွာ ပစ်ထားခဲ့သော အသိပညာများအား စိတ်တိုင်းကျ ပြန်ကောက်ယူ၍ မရပေ။ Function များ မပါဝင်လာမီမှာပင် ပိုက်သာဂိုရပ်စ် သီအိုရမ်က သူ့အား ခေါင်းကိုက်နေစေခဲ့ပြီး ဖြစ်သည်။

စုန့်ယွီက သူ့ဘောပင်ကို ချလိုက်သည်။

သူ၏ စိတ်အခြေအနေက 'sin, cos, tan, & cot' ဆိုသည့် ညီအစ်ကို လေးယောက်ကြောင့် လုံးဝပျက်စီးသွားခဲ့သဖြင့် ကျင်းချန် အမှတ် (၁) ကျောင်းဖိုရမ်တွင် သူ့ဒေါသကို ဖောက်ထုတ်ရန် ဆုံးဖြတ်လိုက်သည်။

သူ့ဖုန်းကို ထုတ်ပြီးနောက် လော့အင်(log in) ဝင်ကာ ဖိုရမ်ထဲသို့ ဝင်လိုက်သည်။

ကျောင်းစတင်ဖွင့်တော့မည့်အချိန် နီးလာပြီဖြစ်သောကြောင့် ပို့စ်များက အလွန်လျင်မြန်စွာ တက်နေသည်။ 

လစဉ်စာမေးပွဲအတွက် ပါပါးစုန့်နှင့် သဘောတူညီမှု အတင်းအကြပ် လုပ်ခံခဲ့ရရုံတင်မကပဲ၊ တစ်နေ့တာ၏ နေ့တစ်ဝက်လောက်ကို အသုံးမကျသည့် သင်္ချာများနှင့် နှိပ်စက်ခံခဲ့ရသောကြောင့် စုန့်ယွီက ဒေါသများ ပြည့်နေသည့် လမ်းလျှောက်နေသော တင့်ကားတစ်စီးကဲ့သို့ ဖြစ်နေပြီး ကစားကွင်းမှ သတ္တုချောင်းကြီးတစ်ချောင်း ပြန်ဝင်စားထားသကဲ့သို့ ဖြစ်နေခဲ့သည်။

ယနေ့တွင် အမှတ် (၁) ကျောင်း၏ ဖိုရမ်များက လူတစ်ယောက်တည်းကြောင့် ဖျက်ဆီးခံလိုက်ရသည်။

*

[အထက်တန်းကျောင်းတက်တော့မှာ… ဘယ်စီးကရက်အမျိုးအစားက ပိုပြီး ဂုဏ်ရှိစေနိုင်လဲ…]

12L: မင်းရဲ့ယောက်ျား ယွီကော: ကျောင်းအုပ်ကြီးရဲ့ စီးကရက်ကို လုပြီး သူ့ရှေ့မှာ ဖွာလိုက်ရင် ဂုဏ်အရှိဆုံးပဲ…

13L: ???

14L: ဟားဟားဟားဟားဟား

×××××

[ငါ အထက်တန်းဝင်ခွင့် စာမေးပွဲမှာ အမှတ် ၂၈၇ ပဲ ရခဲ့တာ၊ ငါ့ ရုပ်ရည်နဲ့ မင်းတို့ကျောင်းကို ဝင်နိုင်လောက်လား…]

12L: မင်းရဲ့ယောက်ျား ယွီကော: မရဘူး… အဲ့ဒီတုန်းက ငါ စာမေးပွဲစာရွက်ကို ဘာမှမဖြေဘဲ အလွတ်ပြန်ပေးခဲ့ပြီးတော့ ကျောင်းအုပ်ကြီးကို ငါ့ရဲ့ ရဲရင့်မှုနဲ့ ဆွဲဆောင်ခဲ့တာ… မင်း လုပ်နိုင်လား အမှိုက်ကောင်…

3L: အပေါ်ကလူ၊ ငါတို့ အရင်က တွေ့ဖူးလား…

4L: အမှတ် (၁) ကျောင်းကို ရဲရင့်မှုနဲ့ ဝင်နေရတာဆိုရင် ညီအစ်ကိုရေ၊ နောက်တစ်နှစ် ကျောင်းပြန်တက်လိုက်ဦး….

×××××

[မင်း ငါ့ကို မချစ်တော့ဘူးလား…. ငါတို့ တစ်ယောက်နဲ့တစ်ယောက် နတ်သားလေးတွေ ဖြစ်ပေးဖို့ သဘောတူခဲ့ကြတာ မဟုတ်ဘူးလား…ဘာလို့ ထားခဲ့တာလဲ…]

3L: မင်းရဲ့ယောက်ျား ယွီကော: မင်းရဲ့ဘဝအမြင်တွေက မတူဘူး… ငါက 'tian' ဖြစ်ချင်တာ၊ ဒါပေမဲ့ မင်းက 'shi' ဖြစ်ဖို့ ဆန္ဒမရှိဘူး…

{T/N: Tian shi - "Tian shi (天使)" ဆိုတဲ့စကားလုံးက တရုတ်ဘာသာစကားမှာ ပိုပြီးရယ်စရာကောင်းပါတယ်။ "ကောင်းကင်တမန်" လို့ အဓိပ္ပာယ်ရတဲ့ Tian shi က စာလုံးနှစ်လုံးပေါင်းစပ်ထားတာပါ။ ပထမစာလုံး tian (天) က "ကောင်းကင်" (ဒါမှမဟုတ် "ဘုရားသခင်") လို့ အဓိပ္ပာယ်ရပြီး၊ ဒုတိယစာလုံး shi (使) ကတော့ "စေတမန်" (ဒါမှမဟုတ် "သံတမန်") လို့ အဓိပ္ပာယ်ရပါတယ်။ ဒါပေမဲ့ shi (屎) ဆိုတဲ့ အသံထွက်တူတဲ့ နောက်ထပ်စာလုံးတစ်လုံးလည်း ရှိပါသေးတယ်။ အဲဒီ shi (屎) ကတော့ "အညစ်အကြေး" (ဒါမှမဟုတ် "ချီး") လို့ အဓိပ္ပာယ်ရပါတယ်။ ဒါကြောင့် သူက "ငါက ကောင်းကင် (tian) ဖြစ်ဖို့ ဆန္ဒရှိပေမဲ့ မင်းက အညစ်အကြေး (shi) ဖြစ်ဖို့ ဆန္ဒမရှိဘူး..." လို့ ပြောလိုက်တာပါ။ ဒီလို အဓိပ္ပာယ်နှစ်မျိုးထွက်နေတာကြောင့် တရုတ်ဘာသာစကားမှာ ပိုပြီးရယ်စရာဖြစ်သွားတာပါ။}

4L: ယွီကော ဘာလို့ မင်းပဲ ဖြစ်နေပြန်တာလဲ….

5L: LOL၊ shi ကို အွန်လိုင်းကနေ စောင့်နေတယ်….

×××××

[ညီအစ်ကိုတို့၊ ငါ Moyo ကို ညီမလေးတစ်ယောက် သွားရှာဖို့ ဆုံးဖြတ်လိုက်ပြီ… ဓာတ်ပုံတွေအရဆိုရင် သူက ငါအကြိုက်ဆုံး ပုံစံမျိုးပဲ….ခဏနေရင် သူငယ်ချင်းဖြစ်ခွင့် တောင်းဆိုဖို့ ဆုံးဖြတ်လိုက်ပြီ…

ငါ တောင်းဆိုချက် ပို့သင့်တယ်လို့ မင်းတို့ထင်လား…ကိုယ့်ကိုယ်ကိုယ် အရင်မိတ်ဆက်သင့်လား…

ငါ့အခြေအနေလေး နည်းနည်းရှင်းပြပါရစေ: အရပ်အမြင့် အသင့်အတင့်… ရုပ်ရည်ကောင်းမွန်… စာတော်တယ်…ဘတ်စကတ်ဘော နည်းနည်းကစားနိုင်တယ်…ဂစ်တာ နည်းနည်းတီးနိုင်တယ်…စန္ဒယား နည်းနည်းတီးနိုင်တယ်… လက်ရေးမဆိုးဘူး…ပန်းချီလည်း ဆွဲနိုင်တယ်…

ဒါဆို သူငယ်ချင်းတောင်းဖို့အတွက် ဘာအကြောင်းပြချက် ရေးသင့်လဲ….]

39L: မင်းရဲ့ယောက်ျား ယွီကော: အွန်လိုင်းဒိတ်လုပ်တာလား…ငါ 'ငွေ ပေးရတာကို ကြိုက်တယ်' လို့ ပြောလိုက်…

40L: ယွီကော ပြောတာကို နားထောင်ကြ…

41L: ယွီကော ပြောတာ နားထောင်ကြ +၁

42L: ယွီကောကို ငါ့ရဲ့ ယောက်ျားလေးနတ်ဘုရားအသစ်အဖြစ် ကြေညာလိုက်ပြီ…

43L: မိန်းကလေးတစ်ယောက်အနေနဲ့ ပြောချင်တာက ဒီလို တောင်းဆိုချက်မျိုးက ငါ့ရင်ထဲကို တော်တော်ထိစေတယ်… ပိုက်ဆံရှိတာ မရှိတာက အရေးမကြီးပါဘူး… အွန်လိုင်းဆက်ဆံရေးဆိုတဲ့ ခံစားချက်ကိုပဲ ခံစားချင်လို့ပါ [ခွေးခေါင်းရုပ်]

×××××

စာရေးသူ၏ အတွေး:

ယွီကောက အတော်ဆုံး keyboard စစ်သည်တော်ပဲ... သူ့ရဲ့ ကီးဘုတ်တစ်ချက်တည်းနဲ့ မင်းရဲ့ စကားလုံးတွေကို ပြန်မြိုချပြီး ဒူးထောက်မိသွားလိမ့်မယ်…

🌹🌹🌹🌹