၄၄

လောင်ဖန်းက "ထင်ထားတဲ့အတိုင်းပဲ" ဆိုသည့် အမူအရာကို ထုတ်ဖော်ပြ​နေသည်။ "ခုနက ပြိုင်ခဲ့တဲ့သူက မင်းမဟုတ်ဘဲ သူဌေး မလား။ မင်း ကားမောင်းပြို​င်ဖို့ သတ္တိရှိနေတာ မဆန်းပါဘူး။ အစကတည်းက မင်းသူဌေးကို အသုံးပြုဖို့ စိတ်ကူးထားပြီးသားပဲ။"

"သူမက ညစ်ပတ်တဲ့နည်းလမ်းအသုံးပြုခဲ့တာဖြစ်ရမယ်။ သူမသာ အခုမှသင်ယူခဲ့မယ်ဆိုရင် ဘယ်လိုလုပ်ပြီး ကောင်းကောင်းမောင်းနိုင်မှာလဲ!"

"သူဌေး မတရားဘူး"

လောင်ဖန်း၏သူငယ်ချင်းများက ဝင်ပြောလာကြသည်။

[မြင်ကွင်းက အရမ်းမိုက်ပြီး ရှက်စရာကောင်းပေမယ့် အခုမှ သင်လာတဲ့သူတစ်ယောက်အတွက်ကတော့ မောင်းနိုင်တာ တကယ်မဖြစ်နိုင်ဘူး။]

[သူတို့က ကင်မရာကို ကားထဲပါ ထည့်သွားရမှာ။]

[ညစ်ပတ်ပြီးအနိုင်ယူတာက အရှက်မရှိတာပဲ။]

[ပြိုင်ပွဲမှာ​ပေါ်​ပေါ်တင်တင် လှည့်စားရဲတယ်။ ဘယ်လောက်တောင်ရှက်စရာကောင်းလိုက်သလဲ။]

[ဒီလူက လူကောင်းမဟုတ်ပေမယ့် ရှီရန်ကသာ ညစ်ပတ်ရင် သူမလည်း မကောင်းတဲ့သူပဲ။]

ဆဲဆိုမှုများ စတင်ထွက်လာသည်။

"နောက်တစ်ပွဲမောင်းပြိုင်ကြရအောင်။ ဒီတစ်ခါတော့ သူဌေးက ကားထဲမှာ မနေရဘူး။ ငါတို့နှစ်ယောက်တည်း မောင်းပြိုင်မယ်" ဟု လောင်ဖန်းက အခိုင်အမာပြောသည်။ "ရှုံးတဲ့သူက ပြစ်ဒဏ်ကို ခံယူရမယ်။"

ရှီရန်သည် ယခုတစ်ကြိမ် လှည့်ကွက်များ ထုတ်သုံးနိုင်မည်ဟု သူ မယုံပေ။

ရှီရန်က သူ့ကို မျက်စိ​မှေးကြည့်သည်။ "အို​ကေ"

အမှန်တရားကိုသိသော သူဌေးက လောင်ဖန်းကို စာနာစိတ်ဖြင့် ကြည့်ကာ လက်ကိုဖြန့်ပြလိုက်သည်။ "ကျွန်တော်မှာ ကန့်ကွက်စရာမရှိပါဘူး။"

[ထပ်ပြီး​တော့လား? သူမ ဘယ်လိုတောင်သတ္တိရှိနေရတာလဲ။]

[နင် ရူးနေပြီလား???]

[ငါ့ကို ဒေါသထွက်​စေတယ်​နော်!!]

[ငါသာဆိုရင် အရှက်ရပြီး ငါ့စကားကို ပြန်ရုတ်သိမ်းမိလိမ့်မယ်။ နောက်တစ်ကြိမ်ထပ်ပြိုင်ဖို့ သူမ ဘယ်လိုတောင်သဘောတူရဲတာလဲ??]

[ဒီတစ်ခါ သူဌေးမပါဘဲ အောင်နိုင်မယ်လို့ သူမ တကယ်ထင်နေတာလား??]

စခရင်မျက်နှာပြင်တွင် ဆူပူမှုများဖြင့် ပြည့်နှက်နေသည်။

သတင်းသည် တောမီးကဲ့သို့ ပျံ့နှံ့သွားပြီး လျှင်မြန်စွာ ရေပန်းစားလာသည်။

# လှည့်ဖြားကား​မောင်းပြိုင်ခြင်း

#ရှီရန်ကျဆုံးချိန်

အင်တာနက်သုံးစွဲသူအများအပြားသည် ရုပ်သံထုတ်လွှင့်မှုကို ထပ်မံဝင်ရောက်လာပြီး ပြိုင်ကားဝါသနာအိုးအုပ်စုတစ်စုကိုပင် ဆွဲဆောင်လာသည်။

တိုက်ရိုက်ထုတ်လွှင့်မှုတွင် ကြည့်ရှုသူဦးရေ ဆယ်သန်း ထပ်မံရောက်ရှိလာသည်။

"မမယု​ဖေး၊ ရှီရန်က ခေတ်စားနေတဲ့ရှာဖွေမှုမှာ ထပ်​ရောက်လာပြန်ပြီ။ သူမက ဆိုးဆိုးရွားရွားအဆူခံ​နေရတယ်။" လက်ထောက်က ခေတ်စားနေသောရှာဖွေမှုများကို ကြည့်ရှုပြီး ဝမ်းသာအားရ ပြောသည်။

ဝမ်ယု​ဖေးသည် ဖန်သားပြင်ပေါ်ရှိ မှတ်ချက်များကို ကြည့်ပြီး ပြုံးလိုက်သည်။ "သူမ​နေရာမှာ အစ်မသာဆိုရင် အစ်မ ထပ်ပြိုင်မှာမဟုတ်တော့ဘူး"

"သူမက မမယု​ဖေးနဲ့ ဘယ်လို ယှဉ်နိုင်မှာလဲ။ မမယု​ဖေးသာဖြစ်ခဲ့မယ်ဆိုရင် တတိယမြောက်သခင်​လေးက မမကို သူတို့နဲ့ ပြိုင်ခွင့်ပြုမှာ​တောင် မဟုတ်ဘူး"

တိုက်ဆိုင်စွာပင်၊ ကင်မရာသည် ချူးကျင်းချန်းကို ရိုက်ကူးလာသည်။

ဝမ်ယု​ဖေးသည် သူမ နှစ်ပေါင်းများစွာ ချစ်လာရသောမျက်နှာကို ကြည့်ပြီး ချိုသာစွာ ပြုံးလိုက်သည်။ "ကျင်းချန်းနဲ့အစ်မကြားက ဆက်ဆံရေးက တကယ့်ကို ထူးခြားတယ်။"

"ဟုတ်တာ​ပေါ့။ မမယု​ဖေး စောင့်ကြည့်လိုက်ပါဦး။ သူမ ရှုံးသွားတဲ့အခါ တတိယသခင်​လေးက သူမကို လိမ်လည်လှည့်စားတာအတွက်အပြစ်တင်ရုံတင်မကဘဲ သူမရဲ့အရှက်ကွဲခံရတာကိုလည်း သူမြင်လိမ့်မယ်။ နောင်အနာဂတ်မှာ သူမကို သခင်​လေး ထပ်တောင်လှည့်မကြည့်တော့ဘူးလို့ ညီမ အာမခံတယ်။"

"သူမရဲ့မိသားစုငယ်လေးက ချူးမိသားစုရဲ့အာရုံကို ဖမ်းစားနိုင်မှာ မဟုတ်ဘူး။" ဝမ်ယုဖေး၏ နှုတ်ခမ်းသည် ယုံကြည်ချက်ရှိသောအပြုံးတစ်ခုအဖြစ် ကွေးကောက်သွားသည်။

ရှီရန်ဘက်တွင် သူမနှင့်လောင်ဖန်းတို့သည် သက်ဆိုင်ရာ ကားဆီသို့ ပြန်သွားကြသည်။

ကားက စတင်ရမည့်မျဥ်း​ကြောင်းတွင် ရပ်သွားနေသည်။ ဤတစ်ကြိမ်တွင် သူတို့နှစ်ယောက်လုံးမှာ လိုက်ပါသူအဖော်မရှိပေ။

"အခြေအနေဘယ်လိုလဲ?"

ကျူးယို့ဟန်နှင့် ဂျီဝမ်ဖုန်းတို့သည် နောက်ကျမှရောက်လာကြပြီး ချူးကျင်းချန်းနှင့်ဆန့်ကျင်ဘက်ရှိ ထိုင်ခုံပေါ်တွင် ထိုင်သည်။

တိုက်ရိုက်ထုတ်လွှင့်မှုတွင် လောင်ဖန်းကိုတွေ့သောအခါ သူတို့ အပြေးလာကြသည်။

သူတို့သည် ကားပြိုင်ပွဲ၏တိုက်ရိုက်ထုတ်လွှင့်မှုကို ကြည့်ရှုခဲ့ကြသည်။

"လောင်ဖန်းက ရှီရန်ကို အလွှတ်မ​ပေးဖို့ ဘယ်လိုတောင်သတ္တိရှိနေတုန်းလဲဟ"ကျူးယို့ဟန်ကျိန်ဆဲလိုက်သည်။

ကျိန်ဆဲပြီးသောနောက်ပိုင်းတွင် သူ စိတ်ပူစပြုလာတော့သည်။ "ရှီရန်ရှုံးသွားရင် သူမတကယ်... ရှီရန် ဒီတစ်ခါတော့ နည်းနည်းတဇွတ်ထိုးဆန်လွန်းတယ်"

ဂျီဝမ်ဖုန်းသည် လက်သီးဆုပ်ထားသည်။ "ဘာပဲဖြစ်ဖြစ်၊ ငါ သူမကို ထိခိုက်ခွင့်မပြုတာတော့ သေချာတယ်။ လောင်ဖန်းက သူမကို ထိချင်တယ်ဆိုရင် သူက စိတ်ကူး​တောင်မယဥ်နိုင်စေရဘူး"

သူတို့၏သတိရှိ​နေ​သောပုံစံနဲ့ ယှဉ်ပါက ချူးကျင်းချန်းက ပိုပေါ့ပေါ့ပါးပါးဖြစ်နေပုံ ပေါ်သည်။ သူက နှုတ်ခမ်းကို ပျင်းရိစွာ ကွေးလိုက်သည်။ "သူမ ယုံကြည်ချက်မရှိတဲ့အရာကို သူမ လုပ်မှာမဟုတ်ဘူး။"

နံပါတ်ရေတွက်ခြင်း စတင်လာသည်။

လူတိုင်း၏အာရုံစူးစိုက်မှုမှာ အစမှတ်ရှိ ပြိုင်ကားနှစ်စီးပေါ်ကို ရောက်​နေသည်။

"ဒင်-"

"ဗူး-"

အချက်ပြမီးပွင့်လာချိန်တွင် အနီရောင်ကားသည် လျင်မြန်စွာ အရှိန်ဖြင့်မောင်းထွက်သွားသဖြင့် ဒရုန်းတောင် တုံ့ပြန်ရန် အချိန်ပင်မရှိခဲ့ပေ။

လူတိုင်းသည် မယုံကြည်နိုင်လောက်အောင် တုန်လှုပ်ချောက်ချားပြီး ထိုင်ခုံမှထကြသည်။

လောင်ဖန်းက အလျင်အမြန် လိုက်လာသော်လည်း အနီရောင်ကား၏အမြီးကိုတောင် မမြင်နိုင်​ပေ။

မျဉ်းကွေးကို ဖြတ်ကျော်ပြီး ရှီရန်သည် ကားကွင်းပထမပတ်ပေါ်၌ ရှိနေဆဲဖြစ်သော လောင်ဖန်းကို ကျော်တက်သွားသည်။

လောင်ဖန်းသည် လီဗာကို နင်းထားသော်လည်း ရှီရန်ကား၏အိတ်ဇောကိုပင် မမြင်ရသေးပေ။

သူက နောက်ကြည့်မှန်ထဲကနေ သူ့ကားနားကို ထပ်နီးကပ်လာ​သောကားကို လှမ်းကြည့်လိုက်ပြီး အံကြိတ်လိုက်သည်။

သူက ဘီးကို အမြန်လှည့်ပြီး သူမ၏ကား ကျော်မတတ်နိုင်အောင် တားဆီးရန် ကြံရွယ်ပြီး ကားလမ်းကြောင်းပေါ်၌ ဖြတ်ရပ်ထားသည်။

[ဒါက လွန်လွန်းတယ်!!!]

[သူ မနိုင်တော့လို့ သူ့စကားကိုပြန်ရုတ်သိမ်း​နေတာလား???]

[ချီးပဲ။ မာစတာရန် သူ့ကိုသတ်ပစ်လိုက်!!]

သူ့ကားကိုယ်ထည်အများစုသည် ကားလမ်းတစ်လျှောက်တွင် ကန့်လန့်ရှိနေပြီး တစ်ဖက်တစ်ချက်စီတွင် ကားတစ်စီးစာ၏တစ်ဝက်ခန့်သာ နေရာလွတ်ရှိ​နေသည်။

ကားတစ်စီးစာလမ်းကြောင်း လုံးဝမရှိပေ။

အားလုံးက သူမ၏ကားကို အရှိန်လျှော့ပြီး ရပ်တန့်ရန် မျှော်လင့်နေကြသည်။

မမျှော်လင့်ဘဲ အနီရောင်ပြိုင်ကားသည် အရှိန်လျှော့ရန် ရည်ရွယ်ချက်မရှိဘဲ အရှိန်ပြင်းပြင်းဖြင့် မောင်းလာသည်။

"ရှီရန် ဘာလုပ်နေတာလဲ" ဂျီဝမ်ဖုန်းက ထိတ်လန့်တုန်လှုပ်စွာဖြင့် ထိုင်ခုံမှထကာ ကွင်းပြင်အခြေအနေကို စိုးရိမ်တကြီး စိုက်ကြည့်နေသည်။

လောင်ဖန်းက ၎င်းကို မမျှော်လင့်ထားပေ။

ကားက သူ့ကို ဝင်တိုက်တော့မည်ကို မြင်လိုက်​သောအခါ ယခုသူမ၏ကားအရှိန်ကြောင့် သူ ဒဏ်ရာအပြင်းအထန်ရမည်ဆိုသည်ကို သူ သေချာသိသည်။

သူ ဦးတည်ရာကို အလျင်အမြန် ပြောင်းလိုက်ပြီး အနည်းငယ် နောက်ပြန်ဆုတ်လိုက်သည်။

ကား၏အသံက အနီးကပ်ရောက်လာ​သောအခါ သူ့မျက်နှာက ဖြူဖျော့ဖျော့နဲ့ ထိတ်လန့်တကြားကြည့်နေမိသည်။

အလွန်နောက်ကျသွားပြီဖြစ်သည်။

အနီကားက လောင်ဖန်းကို ဝင်တိုက်တော့မည်ကို မြင်လိုက်ရသောအခါတွင် လူအားလုံး၏မျက်နှာတွင် အမူအရာတစ်ခုသာ ရှိတော့သည်။

၎င်းသည် ကြောက်လန့်ခြင်းအမူအရာဖြစ်သည်။

တချို့လူက မကြည့်ဝံ့ကြပေ။

တိုက်မိခါနီးတွင် အနီရောင်ကားသည် ရုတ်တရက် ကိုးဆယ်ဒီဂရီ ညာဘက်သို့ ကွေ့ပြီး
ဖြတ်​သန်းသွားသည်။

"ဘမ်-"

ကားသည် နောက်တစ်ကြိမ် လမ်း​ပေါ်ပြန်တက်လာကာ အရှိန်ပြင်းပြင်းဖြင့် လမ်းကြောင်းအတိုင်း ဆက်လက် မောင်းနှင်သွားသည်။

သူမ အဆုံးသတ်မျဥ်း​ကြောင်းထိ မရောက်မချင်း မည်သူကမှတုံ့ပြန်မှု မရှိကြ​ပေ။ အခြားတစ်ဖက်တွင် လောင်ဖန်း၏ကားသည် လမ်းကြောင်းပေါ်တွင် ထို​နေရာ၌သာ ရပ်တန့်နေသည်။

ထိုမြင်ကွင်းက လူတိုင်းကို ထိတ်လန့်စေသည်။

[-ီး!! ဘယ်လောက်တော်လိုက်သလဲ!!!]

[ခုနကဟာက တကယ်ဖြစ်သွားတာလား။ တကယ် ဖြစ်နိုင်လို့လား???]

[CGI ကသာ ဒီလိုဇာတ်ကွက်မျိုးကို ဖန်တီးနိုင်မယ်လို့ ငါ အမြဲထင်ခဲ့တာ။ လက်တွေ့ဘဝဘဝမှာလည်း အဲ့လိုလုပ်နိုင်တာပဲ။]

[အံ့ဩသွားပြီ​​ဟေ့!!!]

[အနီကားကို မာစတာရန်က တကယ်မောင်းတာလား???]

"အနီကားက  လောင်ဖန်းပိုင်တာ ဟုတ်တယ်မလား?" လောင်ဖန်း၏ သူငယ်ချင်းက မှင်တက်ကာမေးသည်။

"လောင်ဖန်းရဲ့ကားက အနက်ရောင်ဖြစ်တဲ့ပုံပဲ။"

"ကားကို ပြောင်းလိုက်တာလား"

အနီရောင် ကားတံခါး ပွင့်လာပြီး အဖြူရောင် ပြိုင်ကားဝတ်စုံဝတ်ထားသော ရှီရန်ကထွက်လာသည်။

သူမ ဦးထုပ်ကို ဆွဲချွတ်လိုက်သည်။ သူမ၏ နက်မှောင်သောဆံပင်များက လှပသောမျက်နှာပေါ်၌ ကျ​နေကာ ယုံကြည်မှုရှိစွာ ပြုံးပြလိုက်သည်။

နေရောင် ဖြာကျနေကာ ကင်မရာက အနီးကပ်ရိုက်လာသည်။

ထိုအချိန်တွင် သူမသည် အလွန်လှပ​နေသည်။

[F*ck,f*ck,f*ck!! တကယ့်ကို မာစတာရန်ပဲ !!!]

[အား!!! အရမ်းမိုက်တယ်!!!]

[မာစတာရန်တော်တယ်!!! အတော်ဆုံးပဲ!!!]

[ငါ ခုနကပြောခဲ့တာတွေအတွက် တောင်းပန်ပါတယ်!! ငါ့မာစတာက အတော်ဆုံးပဲ!]

[ဒါဆို ပထမတစ်​ခေါက်ပြိုင်တုံးကလည်း မာစတာရန်ပဲ​မောင်းခဲ့တာ​ပေါ့။ ဒီလူကသာ အရှုံးကို လက်မခံနိုင်တာ။]

[ကျွန်တော်က ပရော်ဖက်ရှင်နယ် ပြိုင်ကားသမား တစ်ယောက်ပါ။ သူမက တကယ်ကို ထူးချွန်တယ်လို့ ကျွန်​တော် ဝန်ခံရမယ်။]

[ဒါကို သူမက ခုနကမှသင်ယူခဲ့တာဆိုရင် သူမရဲ့ အရည်အချင်းက သြချစရာပဲမဟုတ်ဘူးလား]

[ငါ သူမရဲ့ပရိတ်သတ်ဖြစ်​သွားပြီ။ မာစတာရန်ဆီမှာ ပုံ​အောလိုက်တာက အမှန်တကယ်ဆုံးရှုံးတောင်မရှိဘူး။]

"မောင်းတဲ့သူက တကယ် ရှီရန်လား?!" ကျူးယို့ဟန်အံ့အားသင့်စွာ မတ်တပ်ထရပ်ပြီး ဂျီဝမ်ဖုန်းကို ကြည့်လိုက်သည်။ "သူမ က ဘယ်လိုကားမောင်းပြိုင်ရမလဲသိတယ်လား?"

"ငါ မသိဘူး"  ဂျီဝမ်ဖုန်းသူ့လက်ကို ဖြန့်လိုက်သည်။ သူလည်း အံ့သြမိသည်။

"ကျင်းချန်း မင်းသိပြီးသားလား"  ကျူးယို့ဟန်သည် ငြိမ်သက်နေသော ချူးကျင်းချန်းကို ကြည့်လိုက်သည်။

"ငါ မသိဘူး" ချူးကျင်းချန်းက တည်ငြိမ်စွာပြောသည်။

သူသည် သူ့မေးစေ့ကို လက်ပေါ်တွင်တင်ထားပြီး သူ၏အနက်ရောင်မျက်လုံးများက လမ်းပေါ်ရှိတခုတည်းသောပုံရိပ်ကို ကြည့်နေသည်။ ​လေ​ပြေ​အေး​လေးက သူမ၏ဆံပင်​​ကို ​တိုက်​ခတ်​သွားသည်။

ချူးကျင်းချန်းသည် မျက်လုံးများကို မှေးပြီး ပြုံးလိုက်သည်။

၎င်းသည် လှပလွန်းသည်။

ထိုအခိုက်အတန့်တွင် ချူးကျင်းချန်း၏အမူအရာကို ကင်မရာက အမိအရရိုက်ကူးထားသည်။

ဝမ်ယု​ဖေး၏မျက်အိမ်များသည် ကျဉ်းမြောင်းလာပြီး သူမ၏မျက်နှာပေါ်ရှိ ယုံကြည်မှုရှိ​နေ​သောအမူအရာ ပျောက်ကွယ်သွားသည်။

ကျင်းချန်းကို ယခုလိုပုံစံမျိုး သူမ မမြင်ဖူးပေ။

"ဒါက တကယ်သူမပဲ။ ဒါကို တမင်စီစဉ်ခဲ့တာပဲ ဖြစ်မယ်" လက်ထောက်သည် ရလဒ်ကို လက်မခံလိုဘဲ သ​​ရော်သည်။

"ဆယ်ဗင်းရေ၊ အစ်မ ရှီရန်ရဲ့ ပတ်သတ်တဲ့အချက်အလက်အားလုံးကို လိုချင်တယ်။" ဝမ်ယု​ဖေးက မျက်နှာသေနဲ့ ပြောလိုက်သည်။

ဤကဲ့သို့ ကြောက်မက်ဖွယ်ကောင်းသော ဝမ်ယု​ဖေးကို လက်ထောက်က ပထမဆုံးအကြိမ် မြင်ဖူးခြင်းဖြစ်သည်။ သူမ အမြန် သဘောတူလိုက်သည်။

လောင်ဖန်းသည် ရုတ်တရတ် သဘောပေါက်သွားသည့်အခြေအနေတွင် ကားထဲ၌ ထိုင်နေ၏။

ငါ တကယ်​​ရှုံးသွားတာလား?

ဒါက ဘယ်လိုဖြစ်နိုင်မှာလဲ?!

ရှီရန်က ငါ့ကို ဘယ်လို အနိုင်ယူနိုင်ခဲ့တာလဲ။

သူ အ​တွေးလွှင့်​မျော​နေပြီး ကားတံခါးပွင့်လာ​သောအခါ သူ့မျက်အိမ်ထဲတွင် သူမ၏အပြုံးတစ်ဝက်က ရောင်ပြန်​ဟပ်လာသည်။

လောင်ဖန်း၏အမူအရာသည် ချက်ချင်းပင် မည်းမှောင်သွားသည်။ "မင်း လိမ်လည်လှည့်စားခဲ့တာ မဟုတ်လား"

"ရှင့်စကားကို ပြန်ရုတ်သိမ်းချင်လို့လား" ရှီရန်က လှောင်လိုက်သည်။

"မင်း ငါ့ကို အနိုင်ယူနိုင်စရာ အ​ကြောင်းကိုမရှိဘူး၊ ငါမယုံဘူး!"  လောင်ဖန်းက ရူးမိုက်စွာပြောလိုက်သည်။

ရှီရန်က ကားတံခါးပေါ် လက်တစ်ဖက်တင်ပြီး "ရှင် ကိုယ်တိုင် ချွတ်ချင်တာလား ဒါမှမဟုတ် ကျွန်မ ချွတ်​ပေးရမှာလား" လို့ ပေါ့ပေါ့ပါးပါးနဲ့ ပြောလိုက်သည်။