၃၂

ရှီရန်က ချောကလက်ကို တစ်ချက်ကြည့်လိုက်ပြီး 'နည်းနည်းပေါ့' လို့ ဖြေလိုက်သည်။

"အိုး" ကျူယီ​ဖေးက သူ့နှုတ်ခမ်းကို ဖိလိုက်ရင်း သူ့အကြည့်က ချောကလက်ပေါ်ကို ရောက်နေသည်။

[ဟားဟားဟားဟား၊ ကလေးလေး၊ နင့်ရဲ့အကြည့်တွေက ဒီထက်ပိုသိသာနိုင်​တော့လို့လား။]

[ သနားစရာ​​ကောင်းတဲ့ကလေးငယ်တွေနှင့် သူတို့တားမြစ်ခံထားရတဲ့အချိုစာ​တွေ]

[ကျွန်မတို့ကလေးတွေကို နည်းနည်းပေးစားခိုင်းပါဦး။]

[ယီ​ဖေးနဲ့ရှီရန်တို့ ပထမဆုံးစကားပြောတာက ချောကလက်ကြောင့်ဆိုတာကို ငါ ယုံတောင်မယုံနိုင်ဘူး။]

[ငါတို့ကလေးက များသောအားဖြင့် စကားများပါတယ်။ သူဘာလို့ ရှီရန်နဲ့ စကားမပြောတာလဲ။]

[ယီ​ဖေးက ရှီရန်ကိုမကြိုက်လို့​​လေ။ စုံစမ်းစစ်ဆေးမှုပြီးပြီ။]

ရှီရန်နှင့်ကျူယီ​ဖေးတို့သည် ငွေရှင်းပြီး​သော ပထမဆုံးအတွဲဖြစ်သည်။ ကူကျားနှင့်ပိုင်ကျင်းထျန်တို့ကို စူပါမားကတ်အဝင်ဝတွင် သူတို့ စောင့်ဆိုင်းနေကြသည်။

ကျူယီ​ဖေးက Mask ဝတ်ထားပြီး သူ့လက်ထဲက သရေစာအိတ်ကို ရံဖန်ရံခါ စိုက်ကြည့်နေသည်။

တစ်စက္ကန့်အကြာတွင် သူ့အင်္ကျီထောင့်တွင် လှုပ်ရှားမှုတစ်ခုကို သတိပြုမိလာသည်။

သူ အောက်ကိုငုံ့ကြည့်လိုက်သောအခါတွင် ရှီရန်၏မျက်လုံးကို တွေ့လိုက်ရသည်။

'လှလိုက်တဲ့မျက်လုံးတွေ'

ကျူယီ​ဖေးက သူ့ပထမဆုံးတုံ့ပြန်မှုကို သဘောပေါက်သွားပြီး သူ့ကိုယ်သူ ပါးရိုက်လုနီးပါးဖြစ်သွားသည်။

ရှီရန်သည် ကျူယီ​ဖေး၏အိတ်ကပ်ကို လက်ညိုးထိုးပြသည်။

ကျူယီ​ဖေးသည် သူ့အိတ်ကပ်ထဲသို့ သံသယဖြင့် နှိုက်လိုက်သည်။ အကျွမ်းတဝင်ရှိသော ချောကလက်ကို ခံစားလိုက်ရသောအခါ သူ့မျက်လုံးများ တောက်ပလာသည်။

သူက ရှီရန်ကို ရုတ်တရက်ကြည့်လိုက်ပြီး မောက်မာစွာနဲ့ ပြောသည်။ "မင်း ငါ့ကို ကျေနပ်အောင်လုပ်တယ်ဆိုရင်တောင် မင်းအပေါ်ထားတဲ့ငါ့အမြင်ကို ပြောင်းလဲမှာမဟုတ်ဘူး"

'ငါက ချောကလက်တစ်တုံးနဲ့အလွယ်ဝယ်လို့ရတဲ့သူ မဟုတ်ဘူးကွ'

ရှီရန်က အငြင်းမပွားဘဲ ရယ်မောလိုက်သည်။

သူမသည် နံနက်ခင်းကလုပ်ဆောင်ခဲ့​​သော  ကျူယီ​ဖေးအပြုအမူအတွက် သူ့ကို ကျေးဇူးတင်၍ ယခုလိုပြုလုပ်ခဲ့ခြင်းဖြစ်သည်။

ကျူယီ​ဖေးသည် ရှိုးပွဲကြည့်ရန် ဤ​နေရာမှာရှိနေသော်လည်း လူအများ နှုတ်ဆိတ်နေချိန်တွင် သူမကို ကူညီပေးခဲ့သည်။

သူတို့လေးယောက်က ပစ္စည်းများဝယ်ပြီး အိမ်ကိုပြန်လာကြသည်။

"အနံ့ မွှေးလိုက်တာ"ကျူယီ​ဖေးက ရနံ့ ရှူရှိုက်ရင်း ရနံ့နောက်ကိုလိုက်သွားသည်။

ရှီဝန်ဖေးက ဟင်းချက်နေသည်။ ထမင်းစားပွဲပေါ်တွင် ဟင်းနှစ်ပွဲ ရှိနေပြီဖြစ်သည်။ သူတို့  ၎င်းကို မြင်ပြီးအနံ့ခံ၍ စားကြည့်​သောအခါအရသာရှိသည်။

ကျူယီ​ဖေး အသက်ပြင်းပြင်းရှူလိုက်သည်။ "ဝန်ဖေးက ဟင်းချက်တာ အရမ်းကောင်းတယ်"

ရှီဝန်ဖေးက ရှက်ရွံ့စွာ ပြုံးလိုက်သည်။ "ကျွန်မက ဟင်းချက်နည်းတွေကို စူးစမ်းလေ့လာရတာကို ကြိုက်တယ်လေ။"

ရှိုးပွဲအတွက် သူမသည် ကျွမ်းကျင်စားဖိုမှူးတစ်ယောက်နဲ့ ချက်ပြုတ်နည်း သင်ယူရန် အချိန်သပ်သပ်​ပေးခဲ့သည်။ ယခုမူ ရလဒ်က ထူးခြားကောင်းမွန်ပုံပေါ်သည်။

ကျုံးယူဖန်သည် နံဘေးတွင် အသီးအရွက်လှီးဖြတ်ရန်တာဝန်ယူသည်။ တစ်ယောက်က ဟင်းချက်နေတုန်း တစ်ယောက်က အသီးအရွက် လှီးနေသည်။ ထိုမြင်ကွင်းသည် မ​ဖော်ပြနိုင်လောက်အောင် လိုက်ဖက်ညီလှသည်။

[ CEO နဲ့ဖေး​ဖေးက တကယ်ကို လိုက်ဖက်တယ် !! ]

[အကြောင်းပြချက်တစ်ခုခုကြောင့် ရှီရန်ဟာတတိယလူလို့ ငါ ခံစားရတယ်။]

[ဒီနှစ်ယောက်က တကယ်ချိုမြိန်တာပဲဟယ်။ သူတို့နှစ်ယောက်က တွဲ​နေတာမဟုတ်တာသေချာလို့လား]

[ ခြယ်လှယ်လွန်းတဲ့ CEO နဲ့ သူ့ဇနီးလေး။ ငါ့ရဲ့ အချစ်ဇာတ်လမ်းဇာတ်ကောင်​တွေက မျက်နှာသာရနေပြီ။]

ထမင်းစားနေစဉ်တွင် လူတိုင်းက မြိန်ရေရှက်ရေစားကြပြီး ညစာစားပြီးနောက် ဧည့်ခန်းပတ်လည်တွင် ထိုင်ကြသည်။

ဒါရိုက်တာဝမ်၏အသံထွက်လာသည်။ "ကျွန်​တော်တို့ရှိုးက အရင်အချစ်ရသမျိုးစုံရှိုးတွေနဲ့ မတူဘူးဆိုတာကို ရောက်မလာခင်ကတည်းက လူတိုင်းသိပြီးသားဖြစ်မယ်လို့ ယုံကြည်ပါတယ်။ ဒီတစ်ခါတော့ ဖယ်ရှားရေးစနစ်ကို အသုံးပြုသွားမှာပါ"

"နောက်ရက်တွေမှာ အစီအစဉ်အဖွဲ့က လူတိုင်းကို တစ်ဦးချင်းတိုက်ရိုက်ထုတ်လွှင့်မှုကို အခါအားလျော်စွာ စတင်ခွင့်ပြုပါမယ်။ လူတိုင်းမှာ သီးခြားတိုက်ရိုက်ထုတ်လွှင့်မှုရှိရပါမယ်။"

"နေ့စဉ်တိုက်ရိုက်ထုတ်လွှင့်မှုအဆုံးမှာ ကျွန်တော်တို့က လူတိုင်းရဲ့တိုက်ရိုက်ထုတ်လွှင့်မှုဒေတာကို အပ်ဒိတ်လုပ်ပြီး တစ်နေ့တာမှာ ကြည့်ရှုသူဦးရေအများဆုံးရှိသူကို ရွေးချယ်ပါမယ်။"

“တစ်ပတ်တာကာလအတွင်း ကြည့်ရှုသူ တစ်သန်းအောက်သာ ရတဲ့သူတွေက ဖယ်ရှားခံရပါမယ်။"

"ဒါရိုက်တာဝမ်" လျန်ပု့က "ဘယ်သူကမှ ကြည့်ရှုသူတစ်သန်းထက် မနည်းရင် ဘယ်လိုလုပ်မလဲ။" မေးသည်။

"ပြီး​တော့ တောင်းဆိုထားတဲ့အတိုင်း သူတို့ရဲ့ တိုက်ရိုက်ထုတ်လွှင့်မှုကို မဖွင့်ရင် ဘယ်လိုလုပ်မလဲ။" ကူကျားက မေးသည်။

"ပရိုဂရမ်အဖွဲ့ကတိုက်ရိုက်ထုတ်လွှင့်ဖို့ကို အသိပေးပြီးနောက် ဘယ်သူကမှ မလွှင့်ရင် အစီအစဉ်အဖွဲ့က နာရီဝက်အတွင်း တိုက်ရိုက်ထုတ်လွှင့်မှုကို အတင်းအကျပ်ဖွင့်မှာပါ။"

"လူတိုင်းက ကြည့်ရှုသူတစ်သန်းကျော်ရင် ဘယ်သူကိုမှ ဖယ်ထုတ်မှာ မဟုတ်ပါဘူး။ ဆန့်ကျင်ဘက်အနေနဲ့ မရတဲ့သူတွေကို ဖယ်ထုတ်ပစ်ပါမယ်။"

"သေချာတာက​​တော့ အောင်မြင်သွားတဲ့ဧည့်သည်တွေကို ဆုလက်ဆောင်တွေလည်း ပေးအပ်သွားမှာပါ။ အခု ကိုယ့်အခန်းတွေကို ပြန်သွားပေးကြပါ။ တိုက်ရိုက်ထုတ်လွှင့်မှုဆိုင်ရာ စက်ပစ္စည်းတွေက လူတိုင်းအတွက် အဆင်သင့်ဖြစ်နေပါပြီ။"

[ဒါက တကယ်ပဲ အချစ်ရသမျိုးစုံရှိုးပွဲလား။ ပြိုင်​ပွဲ​မဟုတ်​ဘူးလား?]

[အဲဒါက အချစ်ရသရှိုးအတွက် ဖိအားတွေ အများကြီးပဲ။]

[ ဘယ်လောက်တောင်စိတ်လှုပ်ရှားစရာကောင်းလဲ။ ထုတ်လုပ်ရေးအဖွဲ့က ဘယ်လိုကစားရမယ်ဆိုတာ သေချာသိတယ်။]

[တစ်နည်းအားဖြင့်ပြောရမယ်ဆိုရင် ရှီရန်ကို ဖယ်ထုတ်ချင်ရင် သူမရဲ့ တိုက်ရိုက်ထုတ်လွှင့်မှုကို မကြည့်တာက ပိုကောင်းမှာပဲမလား။]

[ ရှီရန်ရဲ့ တိုက်ရိုက်ထုတ်လွှင့်မှုကို မကြည့်ဖို့ ငါ ဆုံးဖြတ်ထားတယ်။ သူမက ဖယ်ရှားခံရဖို့ အသင့်​တော်ဆုံးပဲ။]

စည်းမျဥ်းများဖတ်ပြီးသည်နှင့် အားလုံးက သူတို့အခန်းကို ပြန်သွားကြသည်။

အခန်းထဲတွင် တိုက်ရိုက်ထုတ်လွှင့်သည့် စက်ကိရိယာများနှင့် ဖုန်းများ တပ်ဆင်ထားပြီးဖြစ်သည်။

ထို့နောက် ၎င်းတို့ရှစ်ဦးသည် စတင်တိုက်ရိုက်ထုတ်လွှင့်ကြသည်။

ခေတ်စားနေသောရှာဖွေမှုများဆိုင်ရာသတင်းကို ပရိသတ်ကမြင်သောအခါ တိုက်ရိုက်ထုတ်လွှင့်မှုအခန်းများထဲသို့ ပြေးဝင်သွားကြသည်။

ရှီရန်မှလွဲ၍ တိုက်ရိုက်ထုတ်လွှင့်မှုအခန်းတိုင်း ရေပန်းစားကြသည်...

ကြည့်ရှုသူနှစ်​ယောက်တည်းရှိရာသူမ၏တိုက်ရိုက်ထုတ်လွှင့်မှုအခန်းကိုကြည့်ကာ ရှီရန်သည် တမင်တကာလှောင်ပြောင်ခံနေရသည်ဟု ခံစားမိသည်။

ထိုအချိန်တွင် ဂျီဝမ်ဖုန်းလည်း စိတ်ပူသွားသည်။

စည်းကမ်းကိုသိရသောအခါ တစ်ခုခုမှားနေပြီဟု သူသိသည်။

ပရိုဂရမ်အဖွဲ့သည် ယခင်က ဖယ်ရှားရေး စည်းမျဉ်းများကို ကောင်းစွာ ဖုံးကွယ်ထားသောကြောင့် သူဘာမှ ရှာမတွေ့ခဲ့ပေ။ဤအရာက အကြောင်းပြချက်ဖြစ်ရန် သူ မမျှော်လင့်ထားပေ။

"အစ်ကိုဖုန်း၊ ညီမတို့ ဘာလုပ်သင့်လဲ။ အစ်မရန်ရဲ့ တိုက်ရိုက်ထုတ်လွှင့်မှုမှာ ညီမတို့ကလွဲလို့ တခြားလူတစ်ယောက်ပဲ ရှိတယ်။ ကြည့်ရှုသူ ပိုဝယ်သင့်တယ်လို့ အစ်ကိုထင်လား။" ဖန်တုံတုံ ရုတ်တရက် အကြံပြုလိုက်သည်။

ဂျီဝမ်ဖုန်းခေါင်းယမ်းလိုက်သည်။ "ဒါက ပိုဆိုးသွားလိမ့်မယ်။"

“ဒါဆို ညီမတို့ ဘာလုပ်သင့်လဲ။ တစ်ပတ်အတွင်း လူတစ်သန်းမပြည့်ရင်
အစ်မရန်ကို ဖယ်ထုတ်ပစ်ကြလိမ့်မယ်" ဖန်တုံတုံက စိုးရိမ်တကြီးနဲ့ပြောသည်။

"စိတ်မပူပါနဲ့။  ငါ အကြံဥာဏ်ရှာလိုက်မယ်။ ငါ  မရှိတုံး ကိစ္စတွေ အဆင်​ပြေ​အောင်စောင့်ကြည့်ထား။"

....

ထိုအချိန်တွင် ရှီဝန်ဖေးသည် မှတ်ချက်များကို တုံ့ပြန်နေသည်။

သူမသည် စခရင်ပေါ်ရှိ မေးခွန်းအားလုံးနီးပါးကို ဖြေခဲ့ပြီး ဘေးအိမ်ကညီမလေးတစ်ယောက်လို ညင်သာစွာဖြေကာ ပိုများသောပရိသတ်ကို ချက်ချင်းဆွဲဆောင်မိသည်။

[ဖေး​ဖေးက အရမ်းနူးညံ့ညင်သာတယ်။ ကိုယ်ကြိုက်တယ်!!]

[ဖေး​ဖေးအနီးကပ်ကြည့်ရတာ ပိုလို့တောင်လှတယ်!!]

[ ငါ ရှီရန်ရဲ့ တိုက်ရိုက်ထုတ်လွှင့်မှုအခန်းကို သွားကြည့်ခဲ့သေးတယ်။ လူနှစ်ယောက်ပဲရှိတယ်။ ဟားဟား]

[ဟားဟားဟားဟား၊ ရှီရန်ရဲ့ တိုက်ရိုက်ထုတ်လွှင့်မှုက တကယ်ကိုသွားပါပြီ။]

[ဒီနှစ် အင်တာနက်သုံးစွဲသူတွေ မထင်မှတ်ပဲ စည်းလုံးနေကြတယ်]

ရှီဝန်ဖေးသည် မှတ်ချက်များကို မြင်သောအခါ ဘဝင်တက်သွားသည်။

'နှစ်ယောက်? သနားစရာ​ကောင်းလိုက်တာ'

တစ်ပတ်အတွင်း ကြည့်ရှုသူတစ်သန်းက ရှီရန်အတွက် စိတ်ကူးတောင်မယဉ်နိုင်တဲ့အရာပဲ

ယခုတစ်ကြိမ်တွင် ရှီရန်သည် တိုက်ရိုက်ထုတ်လွှင့်မှုအခန်းတွင် ကြာရှည်စွာနေနိုင်မည်ဟု သူမ မယုံပေ။

၎င်းကို စိတ်ထဲထည့်ကာ ဖုန်းကောက်ကိုင်လိုက်ပြီး မန်နေဂျာဆီကို ချက်ချင်း မက်ဆေ့ချ် ပို့လိုက်သည်။

[ရှီဝန်ဖေး]- Jဂျီဝမ်ဖုန်းရဲ့ လှုပ်ရှားမှုတွေကို စောင့်ကြည့်ဦး။ ကြည့်ရှုသူတွေကို ဝယ်ရင် ချက်ချင်း ဖော်ထုတ်လိုက်။

ထိုသို့ပြုလုပ်ပြီးနောက် ရှီဝန်ဖေးသည် ပို၍ပင် ယုံကြည်မှုရှိလာပြီး မေးခွန်းများကို ပို၍ ညင်သာစွာ ဆက်လက်ဖြေဆိုသည်။

သို့သော် ယခုတစ်ကြိမ်တွင် သူမသည် ရှီရန်အခြေအနေနှင့်ပတ်သက်သည့် မေးခွန်းအားလုံးကို တမင်တကာ ကျော်သွားသည်။

သူမသည် ထိုခွေးမအား လူအများ၏အာရုံထဲတွင်မထားချင်ပေ။

တစ်ဖက်တွင် ရှီရန်သည် သူမအခန်းထဲတွင် နာရီဝက်ကြာ အနားယူပြီးနောက် ချက်ခြင်းထွက်လာသည်။

ဒီတစ်ကြိမ်တွင် သူမသည် တိုက်ရိုက်ထုတ်လွှင့်သည့်ပစ္စည်းများကို မယူခဲ့ပေ။ ၎င်းအစား သူမသည် ဒရုန်းများကို ရွေးချယ်ခဲ့သည်။

ဒရုန်းနှစ်စင်းက သူမနောက်ကို လိုက်လာသည်။

သူမသည် စူပါမားကတ်ဆီသို့ ဦးတည်သွားသည်။

ယခုတစ်ကြိမ်တွင် သူမသည် ရိုက်ကွင်းကို အလျင်အမြန်ရောက်လာခဲ့ပြီး သူမနဲ့အတူ နေ့စဉ်သုံးပစ္စည်းများကို မယူလာခဲ့ရသဖြင့် စူပါမားကတ်ကို ၎င်းတို့အား ဝယ်ရန်သွားသည်။

သူမ စူပါမားကတ်ထဲသို့ ဝင်သွားသည်နှင့် မနီးမဝေးတွင် အဆိပ်ပြင်းမြွေတစ်ကောင်လို မျက်လုံးများက သူမ၏နောက်ကျောကို စိုက်ကြည့်နေသည့် အရိပ်အယောင်တစ်ခု ရုတ်တရက်ပေါ်လာသည်။

ထိုအမျိုးသားသည် ရွှေရောင်ဆံပင်ကို ဆေးဆိုးထားပြီး အရိုးစုကဲ့သို့အလွန်ပိန်လှသည်။

သူ အံကြိတ်ကာ ရက်စက်စွာ ပြုံးပြလိုက်သည်။ "ရှီရန်၊ နောက်ဆုံးတော့ မင်းကို ငါ ဖမ်းမိပြီ။ မင်း သေပြီသာမှတ်လိုက်​တော့"

ရှီရန်သာ ထိုနေရာတွင် ရှိနေခဲ့ပါက သူသည် လောင်ဖန်း၏လက်ပါးစေဖြစ်သော Jade Hunter နိုက်ကလပ်မှာ​တွေ့ခဲ့​သောရွှေရောင်ဆံပင်ရှိလူရမ်းကားဖြစ်ကြောင်း တစ်ချက်ကြည့်ရုံဖြင့် သူမ သေချာပေါက် မှတ်မိနိုင်မည်ဖြစ်သည်။