၄

အင်တာနက်ပေါ်ရှိဆဲဆိုမှုများသည် ပိုဆိုးလာပြီး အစီအစဉ်၏အနက်​ရောင်စခရင်ပေါ်တွင်ပင် ပျံ့နှံ့သွားကာ ပွဲလွှင့်ရာချန်နယ်၌ ရုန်းရင်းဆန်ခတ်ဖြစ်နေသည်။

ဒါရိုက်တာက လက်ဟန်ပြသဖြင့် အစီအစဉ်တင်ဆက်သူက ချက်ချင်းပင် အပိတ်အမှာစကားပြောသည်။ နောက်ဆုံးစာ​ကြောင်းပြောပြီးသွားသည်နှင့်တပြိုင်နက် ဖန်သားပြင်သည် ချက်ချင်း မှောင်ကျသွားသည်။ ဝန်ထမ်းများကလည်း ပွဲကျင်းပရာနေရာကို ရှင်းလင်းရန် ပြင်ဆင်နေသည်။

ထိုကဲ့သို့ ရှုပ်ထွေးနေသောအခိုက်အတန့်တွင် ရှီဝမ်ဖေးက ရှီရန်ဆီကို လျှောက်လာပြီး မေးစေ့ကို ဂုဏ်ယူစွာ ပင့်ထားလိုက်သည်။ "ရှီရန်၊ စကားနည်းနည်း​ပြောလိုက်ရုံနဲ့အခြေအနေကို ပြောင်းလဲနိုင်မယ်လို့ နင် ထင်နေတာလား။ အခုတော့ နောင်တရနေပြီမလား။ နင့်ရဲ့မိုက်မဲမှုအတွက် ပေးဆပ်ခဲ့ရရုံသာမက နေမ​ကောင်းဖြစ်​နေသူရဲ့ကုသစရိတ်ကလည်း နင်ပဲ ပေးရ​တော့မယ်"

ရှီရန်သည် ဆိုဖာပေါ်  ငြိမ်သက်စွာ မှီချလိုက်ပြီး သူမကို တစ်ချက်ကြည့်လိုက်သည်။

ထိုအကြည့်သည် အထူးအဆန်းမဟုတ်သော်လည်း ရှီဝမ်ဖေးသည် ဆိုးရွားသောခံစားချက်ကို ရ​နေသည်။

ဝန်ထမ်းတစ်​ယောက်က ကမန်းကတန်း ပြေးလာပြီး​ပြောသည်။ "ဒါရိုက်တာ၊ တိုက်ရိုက်ထုတ်လွှင့်မှုကို ပိတ်လို့မရဘူး။"

ဒါရိုက်တာ၏အမူအရာ ပြောင်းသွားသည်။ "ဘာဖြစ်လို့လဲ။ နည်းပညာ ပြဿနာတက်​နေတာလား။ တစ်ယောက်ယောက်ကို သွားခေါ်..."

သူ့စကားမဆုံးခင်၌ မှောင်မည်းနေသောစခရင်မျက်နှာပြင်ကြီးသည် ရုတ်တရက် လင်းလာသည်။

"အစ်မချင်း၊ ယူဖန်က ဘားမှာရှိတယ်လို့ဘာလို့အစ်မ လိမ်ပြောခဲ့တာလဲ။ ညီမကိုတောင် အစ်မ ဆေးခတ်ခဲ့တယ်။ တကယ်လို့သာ ညီမ မနိုးလာခဲ့ရင် အဲဒီလူ မုဒိမ်းကျင့်ခံရနိုင်တယ်ဆိုတာကို အစ်မ သိရဲ့လား။ ဘာလို့ဒီလိုလုပ်ခဲ့ရတာလဲ" အမျိုးသမီးတစ်​ယောက်၏အသံမှာ ရှိုက်ကြီးတငင်နှင့် မေးခွန်းမေးနေသည်။ သူမ၏အသံသည် သေးငယ်ကာ ပြာဝင်နေသော်လည်း ရှီရန်၏အသံဖြစ်​ကြောင်း သိနိုင်သည်။

ထိုနေရာရှိလူများက တစ်ယောက်ကိုတစ်ယောက်ကြည့်ကာ ဘာဖြစ်နေသည်ကို လုံးဝမသိတော့ပေ။

ရှီဝမ်ဖေး၏အမူအရာ ပြောင်းလဲသွားသည်။ သူမသည် ဒါရိုက်တာဘက်သို့ လှည့်ကြည့်ကာ သူ့ကိုမေးခွန်းထုတ်ချင်​နေသောကြောင့် စိတ်ထိန်းကာ ပြုံးပြလိုက်သည်။ "ဒါရိုက်တာ ဘာဖြစ်နေတာလဲ"

"ကျွန်တော်တို့ရဲ့ တိုက်ရိုက်ထုတ်လွှင့်မှုကို ဟက်ခံရတာဖြစ်မယ်။ ကျွန်​တော်တို့ အဲဒါကိုပြင်ဖို့ တစ်ယောက်ယောက်ကိုရှာနေပြီ" ဒါရိုက်တာကလည်း ပျော်ရွှင်မ​နေ​ပေ။

[ရုပ်မပါပဲ အသံပဲလား။ ဘာတွေဖြစ်နေတာလဲ?]

[ဒီအသံက ရှီရန်ရဲ့အသံထင်တယ်။ ဆေးခတ်ခံရတယ်? အခုနက ဗီဒီယိုနဲ့ဆက်စပ်မ​နေဘူးလား။]

[သေစမ်း! ဘာတွေဖြစ်နေတာလဲ?]

စကားပြောသံများ ဆက်ထွက်လာသည်။

"ရှီရန်၊ ငါက နင့်ရဲ့ မန်နေဂျာမို့ ငါ့ကို နင့်ရဲ့စကားပြောနေတဲ့ပုံစံကိုပြင်လိုက်စမ်း။ နင်က အခုချိန်ထိရှီမိသားစုရဲ့ အကြီးဆုံးသမီးလို့ထင်နေသေးတာလား"

"ပြီး​တော့ သခင်​လေးကျုံးက ဘားမှာရှိကောင်းရှိနိုင်တယ်လို့ပဲ ငါပြောခဲ့တာ။ နင်ကပဲ သွားမယ်တကဲကဲဖြစ်​နေတာ​လေ။ ပြီး​တော့ အဲဒီ့လူရဲ့ မိသားစုက ချမ်းသာတယ်လို့တောင် ပြောလို့ရတယ်။ သူ့ကိုသာ လက်ထပ်နိုင်ရင် နင့်ဘဝအတွက် နင်စိတ်ပူစရာမလိုတော့ဘူး။ နင့်ရဲ့လက်ရှိအနေအထားနဲ့ သခင်​လေးကျုံးက  နင်စိတ်ကူးယဉ်နိုင်တဲ့သူတစ်ယောက်မို့လို့လား။ ငါ နင့်အတွက် အခွင့်အရေးတစ်ခုစီစဉ်ပေးထားပြီးသား။ ဒါ​ပေမဲ့ နင်က ထွက်ပြေးလာတဲ့အထိတောင် တုံးအနေတာလား။

"အစ်မချင်း၊ ဘာကိုဆိုလိုတာလဲ။ ကျုံးယူဖန်က ညီမနဲ့စေ့စပ်ထားသူလေ"

"ဟားဟား"

အေးစက်သောရယ်မောသံများက စတူဒီယိုအတွင်း ပြည့်သွားကာ မိုက်ခရိုဖုန်းမှတစ်ဆင့် ကြားနေရသည်။

"ရှီမိသားစုရဲ့ သမီးအရင်းက ဝမ်ဖေးပဲ။ သူမက သာ သခင်​လေးကျုံးနဲ့လက်ထပ်ရမှာ။ နင့်ကို​ပြောလိုက်မယ်။ မနေ့ညက နင် ယောက်ျားတစ်ယောက်နဲ့ကနေတဲ့ဗီဒီယိုကို ငါရိုက်ထားပြီးသား။ ဒါသာ ပျံသွားရင် ဒီစေ့စပ်ထားတာကို နင်မဖျက်ချင်ဘူးဆိုရင်တောင်မှ ဘာမှမတတ်နိုင်မှာမဟုတ်ဘူး"

ရှီဝမ်ဖေးထိတ်လန့်သွားပြီး ဒါရိုက်တာဘက်ကို လှည့်ကြည့်လိုက်သည်။ "ကျွန်မတို့ အဟက်ခံရတဲ့ပြဿနာကို မဖြေရှင်းနိုင်တာ​ကြောင့် အသံချဲ့စက်ကိုရိုက်ခွဲဖို့ တစ်ယောက်ယောက်ကို ခေါ်လိုက်ကြရအောင်လေ"

အသံချဲ့စက်ကို ရိုက်ခွဲလိုက်သည်နှင့် အသံပျောက်သွားသော်လည်း စခရင်၏မှတ်ချက်နေရာတွင် ရုတ်ရုတ်သဲသဲဖြစ်နေပြီဖြစ်သည်။

[ဒါက မန်နေဂျာလား!! ဒီမန်နေဂျာက တကယ်ပဲ ရှီရန်ရဲ့မန်နေဂျာဖြစ်ပြီး ရှီဝမ်ဖေးရဲ့မန်နေဂျာမဟုတ်ဘူးလား။]

[မန်နေဂျာက သူ့ရဲ့အနုပညာရှင်ကို ဆေးခတ်တယ်။ ဒါက ဘယ်လိုလုပ်ရပ်မျိုးလဲ။]

[သေစမ်း! ဒီအစ်မချင်းက တကယ်ကို တစ်ခုခုပဲ။ ဒီလိုလူက ဘယ်လိုမန်နေဂျာဖြစ်လာတာလဲ။]

[ရှီဝမ်ဖေးနဲ့ ရှီရန်ရဲ့စေ့စပ်ထားသူကြားမှာတစ်ခုခုရှိနေတယ်လို့တော့ ငါ့ကို မပြောနဲ့နော်။]

ရှီဝမ်ဖေးက အသက်ရှုကြပ်လာပြီး သူမစိတ်ကို တည်ငြိမ်အောင် လုပ်နေသည်။

အသံစက်ကို ရိုက်ချိုးပြီးသွားပြီဖြစ်သည်။ ယခု အခါ မည်သည့်လှည့်ကွက်မှရှိတော့မည်မဟုတ်ပေ။ ဒီအခြေအနေကို ပြန်အဖတ်ဆယ်နိုင်​သေးသည်။ ထိတ်လန့်မနေနဲ့...

သို့သော်လည်း ရှီဝမ်ဖေးစိတ်ငြိမ်သက်သွားပြီးသည့်နောက်တစ်စက္ကန့်တွင် ရှီရန်သည် မျက်ခုံးပင့်ကာ ဖုန်းကိုထုတ်ပြီး အကြိမ်အနည်းငယ် နှိပ်လိုက်သည်။

"နင် လှည့်ကွက်တွေ မထုတ်တာ ပိုကောင်းမယ်။ ငါက ရှီမိသားစုရဲ့သမီးအရင်းပဲ။ အခု နင်က ငါတို့မိသားစုမွေးမြူထားတဲ့ခွေးတစ်ကောင်ပဲ။ ဆင်ခြင်ဉာဏ်ရှိရှိနဲ့ နင် မပိုင်တဲ့အရာကိုမက်မောမ​နေနဲ့!"

ထိုအသံကိုကြားသည်နှင့် ရှီဝမ်ဖေး၏မျက်နှာတွင် သွေးများဆုတ်ယုတ်သွားသည်။ "ဘာဖြစ်နေတာလဲ။ အသံချဲ့စက်ကို ရိုက်ခွဲလိုက်ပြီ မဟုတ်ဘူးလား"

ကြောက်လန့်တကြားဖြင့် ရှီရန်၏လက်မှ ဖုန်းကို လုယူရန် လက်လှမ်းလိုက်သည်။

ရှီရန်သည် ချက်ချင်း လှည့်ထွက်သွားသဖြင့် ရှီဝမ်ဖေးသည် ဖုန်းကိုမယူနိုင်ဘဲ ဆိုဖာပေါ်သို့လဲကျသွားသည်။

"နောက်မှ နင် အင်တာဗျူးအတွက် ဒီဇာတ်ညွှန်းအတိုင်းလိုက်နာပြီး စကားမပြောခင် စဉ်းစားတာပိုကောင်းမယ်။ မဟုတ်ရင် နင့်​မောင် ဆေးအရပ်ခံလိုက်ရလို့ သေသွားရင်တော့ သူ့အစ်မဖြစ်တဲ့နင်က တရားခံဖြစ်သွားလိမ့်မယ်!"

"ဒါက အတုပဲ!" ရှီဝမ်ဖေးက ထိတ်လန့်တုန်လှုပ်သွားပြီး "ဒါက လုပ်ကြံထားတာပဲ။ နင် ငါ့ကို အသ​ရေဖျက်ချင်​နေတာ။ ဝန်ထမ်းတွေ သူ့ဖုန်းကို သွားပိတ်လိုက်!" ဟု​ ရှေ့​နောက်မစဥ်းစား​နေဘဲ​ပြောချလိုက်သည်။

အမျိုးသားဝန်ထမ်းအနည်းငယ်သည် ရှေ့သို့ ပြေးသွားသော်လည်း သူမသည် သူတို့အားလုံးကို ရှောင်တိမ်းနိုင်ခဲ့ပြီး သူတို့သည် ဖုန်းကိုမရရှိခဲ့​ပေ။

"အခုတော့ နင်ကြောက်နေပြီလား။ ငါပြောသလိုသာလုပ်။ ငါပြောတဲ့အတိုင်း လိုက်​နာ။ ဘယ်လို အရူးမလဲဟ။ အဲဒီနေမကောင်းတဲ့လူကို ထည့်စဥ်းစား။ သူ့အသက်က နင့်လက်ထဲမှာနော်!"

ထို့နောက် အသံဖမ်းထားခြင်း ပြီးဆုံးသွားခဲ့ပြီး ရှီရန်သည် သူမ၏ဖုန်းကို သိမ်းလိုက်သည်။

[အဲဒါ ဖေး​ဖေးရဲ့အသံမဟုတ်လား။ သူမက တကယ်ကို ရက်စက်လွန်းတယ်။]

[အသံသွင်းတာကအတုပဲ မဟုတ်လား။ ဖေး​ဖေးက ဒီလိုမျိုး ဘယ်လိုတောင်ပြောနိုင်မှာလဲ။]

[ဒါက နင်တို့ပရိသတ်တွေပြောနေကြတဲ့ နတ်သမီးလား။ သူမက အရမ်းကြမ်းကြမ်းတမ်းတမ်းပြောတတ်တာပဲ။ နောက်ဆုံးတော့ ငါကိုယ်တိုင် သူမပုံစံကို မြင်ဖူးပြီ။]

ရှီဝမ်ဖေးသည် ပျာယာခတ်ကာ ဆိုဖာပေါ်တွင် လဲထိုင်ကျသွားသည်။ ရှီရန်နှင့်အ​ခြေအတင်ပြန်​​ပြောရန်တောင် သူမ ဂရုမစိုက်နိုင်တော့ပေ။

ဒီကိစ္စက သေချာပေါက် ပျံ့သွားလိမ့်မယ်။ ခေတ်ရေစီးကြောင်းအရဆိုရင်… ငါ့ကိုမုန်းတီး​နေတဲ့ပရိသတ်တွေက ငါကို ဆွဲချဖို့ သေချာပေါက် ဒီအခွင့်အရေးကို အသုံးချကြလိမ့်မယ်။ အဲ့ဒီလိုသာ ဖြစ်လာရင် ငါ့အလုပ်က​တကယ်ကို ရေစုံ​မျောပြီပဲ။

ရှီဝမ်ဖေး၏အေးဂျင့်က သူမအနားကို ပြေးလာသည်။ "သွားကြစို့။ သတင်းထောက်တွေ ရောက်လာရင် ထွက်သွားဖို့ လွယ်မှာ မဟုတ်ဘူး။"

ရှီဝမ်ဖေးသည် သူမ၏မန်နေဂျာမှခေါ်ဆောင်သွားခြင်းခံရသည်။ သူမ ထွက်မသွားခင်မှာ ရှီရန်ကို ဒေါသတကြီးဖြင့်စိုက်ကြည့်ခဲ့သည်။

ဒီအတွက် ရှီရန်ပြန်ပေးဆပ်ရ​အောင် သူမ လုပ်ရမည်။

ရှီအိမ်ရာတွင်

ရှီဝမ်ဖေးသည် အိမ်ထဲသို့ ဝင်လာသည်နှင့် အမေရှီက နှုတ်ဆက်သည်။ "ဘာဖြစ်လို့လဲ၊ ဖေး​ဖေး"

"မေမေ၊ သမီး အရမ်းဝမ်းနည်းတယ်။" ရှီဝမ်ဖေးက သူမအမေကို ပွေ့ဖက်လိုက်သည်။ ပါးပြင်ပေါ်မှ မျက်ရည်များစီးကျလာပြီး မိခင်ဖြစ်သူသည် သမီးဖြစ်သူ၏ငိုကြွေးနေပုံကို မြင်လိုက်ရသဖြင့် ရင်ထဲတွင်နာကျင်သွားသည်။

"ဘယ်သူက သမီးကို အနိုင်ကျင့်လို့လဲ"

"သမီးလုပ်ခဲ့တာက အဝတ်လဲခန်းထဲမှာ မမကိုဒေါသထွက်ပြီးဒေါသထွက်စကားနည်းနည်းပြောခဲ့ရုံပဲရှိတာကို။ မမက အဲ့ဒါကိုအသံသွင်းထားရုံတင်မကဘဲ ပွဲမှာတောင်ဖွင့်ပြမယ်လို့ သမီး မမျှော်လင့်ထားခဲ့ဘူး။ အခု လူတိုင်းက သမီးကို ရက်စက်တဲ့မိန်းမလို့ ခေါ်နေကြပြီ။ သမီး ဘာဆက်လုပ်ရမလဲ မေ​မေ..."

ရှီဝမ်ဖေးက ပိုလို့တောင် သနားစရာကောင်းလောက်အောင်ငိုပြသည်။

ထိုအချိန်တွင် အပြင်ဘက်မှ ဘရိတ်အုတ်သံမြည်လာသည်။

မကြာခင်မှာပင် ၀တ်စုံအပြည့်ဝတ်ဆင်ထားသောကျူံးယူဖန် ရောက်လာသည်။ ရှီဝမ်ဖေး
၏နီရဲနေသောမျက်လုံးများကို မြင်လိုက်ရသောအခါ သူ့နှလုံးသား နာကျင်သွားသည်။

"ဖေး​ဖေး၊ စိတ်မပူနဲ့နော်။ ရေပန်းစားနေတဲ့ ရှာဖွေမှုတွေကနေတစ်ဆင့် ဒီကိစ္စကို ကိုယ် တွေ့ခဲ့ရတယ်။ ဒီသတင်းကို လူပိုမသိအောင် လျှော့ချဖို့ ကိုယ် တစ်ယောက်ယောက်ကို တောင်းဆိုထားပြီးသား။ ပြီး​တော့ အခြားသတင်းတွေက ရှာ​ဖွေမှုစာရင်းမှာပိုတက်လာပြီး ဒီကိစ္စကိုဖုံးဖိဖို့ ကူညီပေးလိမ့်မယ်။ အခု လုပ်ရမယ့်တစ်ခုတည်းကျန်တဲ့နည်းလမ်းက ဒီအသံဖမ်းထားတာကအတုဖြစ်တယ်လို့ ရှီရန်ကဝန်ခံအောင်လုပ်ဖို့ပဲ” လို့ ကျူံးယူဖန်က အေးဆေးတည်ငြိမ်စွာပြောသည်။

ရှီဝမ်ဖေးက နှုတ်ခမ်းကို ကိုက်လိုက်ပြီး ကျူံးယူဖန်၏လက်ကို ဂရုတစိုက် ဆုပ်ကိုင်လိုက်သည်။ "ယူဖန်၊ ကျွန်မပြောခဲ့တာတွေကလွန်လွန်းတယ်လို့ ရှင်ကော ထင်လားဟင်"

"ဘာလို့ထင်ရမှာလဲ" ကျူံးယူဖန်၏နှလုံးသားသည် ရှီဝမ်ဖေးအတွက် နာကျင်လာသည်။ "မင်း ပြောခဲ့တာတွေကအမှန်တွေပဲ။ မကြောက်နဲ့တော့။ ကိုယ်​ဖြေရှင်းမယ်။"

"သူမ ဘယ်လိုတောင်သတ္တိရှိနေရတာလဲ" အမေရှီသည် ရှာဖွေမှုမှတစ်ဆင့် ကိစ္စတစ်ခုလုံးကို သိရှိသွားပြီးဖြစ်သည်။ သူမ ဒေါသအလွန်ထွက်လာကာ တစ်ကိုယ်လုံးတုန်နေသည်။
"ငါသူမကိုဖုန်းခေါ်မယ်!"

ထို့နောက် အ​မေရှီက နံပါတ်တစ်ခုကိုခေါ်ဆိုလိုက်သည်။ ထိုဖုန်းသည် ချက်ချင်းပင်အ​ဖြေခံရသည်။ ရှီရန်စကားမပြောနိုင်မီ အမေရှီက ဒေါသတကြီးပြောသည် "ရှီရန်၊ အခုပြန်လာခဲ့စမ်း။ မဟုတ်ရင် ရောဂါရှိ​နေတဲ့နင့်​မောင့်ကို နင်ဘယ်တော့မှမတွေ့ရဘူးမှတ်!"