အပိုင်း ၁၈၉ ( Rich Second Generation 13 )

အတိတ်ကာလတွင် ဆေးကုသမှုနှင့်ဆိုင်သော အကြောင်းအရင်းများအတွက်မှလွဲ၍ နောက်ကျခြင်း သို့မဟုတ် စောစောအလုပ်ဆင်းခြင်း တစ်ခါမှ မလုပ်ခဲ့ဖူးသည့် လုကျင်းရှိူ့သည် အလုပ်ပြေးပြီး ယန်ကျင်းဇီနှင့်အတူ အိမ်သွားကြည့်လေသည်။ 

ထိုအိမ်ခြံမြေတွင် အိမ်အများအပြား မကျန်တော့ချေ။ ယန်ကျင်းဇီ သဘောကျသော အိမ်ကို မရောင်းရသေးသည်မှာ စုစုပေါင်းဈေးနှုန်းက မြင့်လွန်းအားကြီးသောကြောင့် ဖြစ်သည်။

ယန်ကျင်းဇီသည် သူ သိကျွမ်းသော အရောင်းဌာနမှ မန်နေဂျာကို ကြိုတင်ခေါ်ထားခဲ့သည်။ သူတို့ ရောက်သွားသောအခါ မန်နေဂျာက တံခါးဝတွင် စောင့်နေပြီးဖြစ်သည်။

ဤမန်နေဂျာသည် အသက်လေးကျော် ရှိပြီဖြစ်ပြီး အနည်းငယ် ပြည့်ဖောင်းကာ အလွန်ဖော်ရွေပုံပေါ်သည်။ သူသည် ယန်ကျင်းဇီကိုသာမက လုကျင်းရှိူ့ကိုလည်း သိပြီး သူတို့နှစ်ဦးကို မြင်ရသည်နှင့်တပြိုင်နက် သူသည် သူတို့ကို ချက်ချင်း နှုတ်ဆက်သည်။

“ ငါတို့ ရေကန်ပါတဲ့ မိုးထိတိုက်ခန်းကို ကြည့်ချင်တယ်။ ” ယန်ကျင်းဇီက ဆိုသည်။

“ အိမ်က အိမ်ရာရဲ့အလယ်၊ အဆောက်အဦးရဲ့ ထိပ်ဆုံးအထပ်မှာ ရှိတာပါ။ ငါ အခုပဲ မင်းတို့ကို ခေါ်သွားမယ်။ ” မန်နေဂျာက ပြုံးကာ သူတို့နှစ်ဦးကို အိမ်ကြည့်ရန် ခေါ်သွားသည်။

ဤနေရာများရှိ အိမ်များဟာ ကောင်းမွန်စွာ အလှဆင်ထားပြီး ပရိဘောဂများလည်း ပါရှိကာ အလှဆင်ပုံစံက အတော်လေး ကောင်းမွန်သည်။

ယန်ကျင်းဇီသည် မန်နေဂျာနောက်မှ အပေါ်ထပ်သို့ တက်သွားပြီး အိမ်ကို မြင်မြင်ချင်း နှစ်သက်သွားသည်။

အိမ်တွင် အလွန်မြင့်သော အထပ်အမြင့် ရှိပြီး အလွန်ကျယ်ဝန်းသော လသာဆောင်လည်း ရှိကာ အလှဆင်ယင်မှုပုံစံမှာလည်း ယန်ကျင်းဇီ သဘောကျသော ပုံစံမျိုး ဖြစ်သည်။ မာစတာအိပ်ခန်းက အထူးကောင်းမွန်သည် — ၎င်းက အလွန်ကျယ်ဝန်းရုံသာမက ကြီးမားသော လသာဆောင်လည်း ရှိသေးသည်။ ဒီမှာ နေတာက လုမိသားစုဗီလာမှာ နေတာထက် အများကြီးပိုပြီး သက်တောင့်သက်သာရှိမှာ သေချာတယ်!

“ ကျင်းရှိူ့၊ ဒီအိမ်ကို ဘယ်လိုထင်လဲ? ” ယန်ကျင်းဇီက မေးသည်။

“ မင်း ကြိုက်ရင် ဝယ်လိုက်။ ” လုကျင်းရှိူ့က တုံ့ဆိုင်းမနေပေ။

သူ့တွင် အိမ်အတွက် မြင့်မြင့်မားမား လိုအပ်ချက်များ မရှိသော်ငြား ကိစ္စတစ်ခုကတော့ သေချာသည် — ယန်ကျင်းဇီက သူတို့နှစ်ဦးစလုံး ပိုင်ဆိုင်သည့် အိမ်တစ်လုံးကို ဝယ်ယူရေးကို စဉ်းစားနေသည်အား တွေ့ရသော် သူသည် ပျော်ရွှင်ပြီး အိမ်ဝယ်ရန် မစောင့်နိုင်တော့ပေ။ 

လုကျင်းရှိူ့၏အမူအရာက အတော်လေး လေးနက်နေသည်။ ယန်ကျင်းဇီ ရယ်မောလိုက်သည် : “ ဒါဆို ဝယ်ကြမယ်။ ”

ယန်ကျင်းဇီနှင့် လုကျင်းရှိူ့တို့သည် အိမ်ဝယ်ယူခြင်းကို အလျင်အမြန် အဆုံးသတ်ခဲ့ကြသော်လည်း သူတို့နောက်လိုက်သော မန်နေဂျာသည် အနည်းငယ် စိတ်ရှုပ်ထွေးနေသည်။

အိမ်ဝယ်ရန် အတူလာသော ဤနှစ်ဦးကို မတွေ့ရမီ သူသည် သူတို့ထဲမှတစ်ဦးက အိမ်ဝယ်ချင်သည်ဟု ထင်ခဲ့သော်ငြား ယခုမူ... သူတို့နှစ်ယောက်ကို ကြည့်လိုက်တော့ ဘာလို့ သူတို့ကြည့်ရတာ အိမ်အတူဝယ်ချင်သလိုဖြစ်နေတာလဲ? ဒါမှမဟုတ် ဥက္ကဌလုက ဒုတိယသခင်လေးယန်အတွက် ဝယ်ပေးမှာလား?

ဒါ့အပြင် ဒုတိယသခင်လေးက ဥက္ကဌလုကို ဘယ်လိုခေါ်လိုက်တာလဲ?

ကျင်းရှိူ့?

မန်နေဂျာ ဆွံ့အသွားသည်။

ဤအခိုက်အတန့်တွင် ယန်ကျင်းဇီက ပြန်ဖြေသည် : “ ငါတို့ ဒီအိမ်ကို ဝယ်ပြီး ငါတို့နှစ်ယောက်ရဲ့နာမည်တွေ ရေးထားတယ်... ဒီကိစ္စကို လျှို့ဝှက်ထားရမယ်၊ မင်း သိလား? ”

ယန်ကျင်းဇီသည် မန်နေဂျာကို ခြိမ်းခြောက်လိုစွာ ကြည့်သည်။

မန်နေဂျာ : “ ... ” သူ တစ်ခုခုအံ့ဩစရာကို သိလိုက်ရတဲ့ပုံပဲ!

ဒုတိယသခင်လေးယန်နဲ့ ဥက္ကဌလုတို့က အတူတူ အိမ်လာကြည့်ရုံတင်မဟုတ်ဘဲ အိမ်ဝယ်တဲ့အခါမှာလည်း လူနှစ်ယောက်ရဲ့နာမည်တွေကိုတောင် သူတို့က အတူတူ ရေးကြသေးတယ်!

အများအားဖြင့် အတွဲများ သို့မဟုတ် လက်ထပ်ရန် စီစဉ်သည့် လူနှစ်ဦးတို့ကသာ ဤသို့ပြုမူလေ့ရှိသည်...

ဒါပေမယ့် သူ သိထားသလောက်ကတော့ ဒုတိယသခင်လေးယန်မှာ ဥက္ကဌလုရဲ့တူနဲ့ လက်ထပ်စာချုပ် ရှိတယ်မလား?

လူချမ်းသာတွေ... သူတို့အကုန်လုံး အရမ်းရှုပ်ထွေးကြသလား?

မန်နေဂျာသည် ရှော့ခ်ရသွားပြီး သူ မော့ကြည့်လိုက်သောအခါ လုကျင်းရှိူ့၏ အေးစက်ပြီး သုန်မှုန်နေသော အကြည့်နှင့် ချက်ချင်း ဆုံလိုက်ရသည်။

လုကျင်းရှိူ့က တုတ်ကောက်တစ်ချောင်းနှင့် ရပ်နေကာ သုန်မှုန်နေသည်။

မန်နေဂျာသည် မသိစိတ်ထဲမှပင် ခိုက်ခိုက်တုန်သွားရသည်။

လုကျင်းရှိူ့သည် သူ့ကို ဤကဲ့သို့တွေ့ရသည်အား ကျေနပ်ပြီး အလေးထားပြောခဲ့သည် : “ ငါတို့ အိမ်ဝယ်တဲ့ သတင်းကို အပြင်မထုတ်ရဘူး။ ”

လုကျင်းရှိူ့သည် မူလက ယန်ကျင်းဇီအတွက် အိမ်ဝယ်ပေးရန် ရည်ရွယ်ခဲ့၏။ ထို့ကြောင့် သူသည် ယန်ကျင်းဇီကို ငွေတိုက်ရိုက်ပေးခဲ့ခြင်းဖြစ်သည်။

ယန်ကျင်းဇီက သူတို့နာမည်နှစ်ခုစလုံးကို ရေးချင်လိမ့်မည်ဟု သူ မထင်ထားခဲ့ပေ။

သူသည် အလွန်ပျော်မိကြောင်း ဝန်ခံသော်ငြား ပျော်နေစဉ်တွင် သူသည် ဤကိစ္စမှာ လတ်တလော၌ အပြင်သို့ ပေါက်ကြား၍မဖြစ်မှန်းကိုလည်း သဘောပေါက်မိသည်။

ယန်ကျင်းဇီနှင့် လုရွေ့ချွင်တို့ကြားရှိ လက်ထပ်စာချုပ်က ရှိနေဆဲဖြစ်ပြီး ဤဖြစ်ရပ်၏ သတင်းပျံ့မှုက ယန်ကျင်းဇီအတွက် ကောင်းလိမ့်မည်မဟုတ်ချေ။

ဤသို့တွေးရင်း လုကျင်းရှိူ့၏မျက်ခုံးများ တွန့်ချိုးသွားရသည် — မကြာခင်ပဲ ဒီနှစ်ယောက် သူတို့ရဲ့စေ့စပ်ထားတာကို ဖျက်သိမ်းနိုင်မယ့် နည်းလမ်း မရှိဘူးလား?

သူ ယန်ကျင်းဇီကို ဒီအကြောင်း မေးသင့်သလား?

ဒါပေမယ့် သူ မေးလိုက်ရင် သူက နည်းနည်းလေး စိတ်အားထက်သန်လွန်းနေသလို အထင်ခံရမလား?

နောက်ဆုံးတွင် လုကျင်းရှိူ့သည် ဘာကိုမှ မပြောခဲ့ပေ။

အိမ်တစ်ခုလုံးဟာ သန်း ၅၀ ထက် နည်းနည်းကျော်သည်။

ယန်ကျင်းဇီသည် ပမာဏအပြည့်ကို အမြန်ပေးချေပြီး လုကျင်းရှိူ့နှင့်အတူ အချက်အလက်အားလုံးကို ဖြည့်သွင်းခဲ့သည်။ ဖြည့်ပြီးနောက် သူတို့နှစ်ဦးစလုံးသည် အလွန်ပျော်နေကြသည် — သူတို့တွင် အိမ်ရှိပြီ။

ယန်ကျင်းဇီသည် လုကျင်းရှိူ့၏ဘယ်လက်ကို ဆုပ်ကိုင်ပြီး လက်‌တစ်ချောင်းချင်းစီကို ပွတ်သပ်နေသည်။

လုကျင်းရှိူ့သည် သူ့ဘယ်လက်ကို ကြည့်ကာ ၎င်းက အလွန်ရုပ်မဆိုးဟု ရုတ်တရက် ခံစားလိုက်ရသည်။

သူတို့နှစ်ဦး၏မျက်နှာချင်းဆိုင်တွင် မန်နေဂျာခမျာ ဆွံ့အနေရှာသည်။

ဥက္ကဌလုနဲ့ ဒုတိယသခင်လေးယန်တို့မှာ တကယ်ကြီး ဒီလိုဆက်ဆံရေးရှိတယ်!

သူသည် အခြားလူများနှင့် အထူးတလည် အတင်းစကား ဝေမျှချင်သော်လည်း သူ မပြောနိုင်သည်မှာ စိတ်မကောင်းစရာပင်။

သူသည် ဤမြို့တွင် နေထိုင်ပြီး အလုပ်လုပ်ချင်သေးရာ သူ ဘာကိုမှ မပြောနိုင်ပေ။

အိမ်တစ်လုံး ဝယ်ပြီးနောက် ယန်ကျင်းဇီသည် သူနှင့် လုကျင်းရှိူ့တို့ အနည်းငယ် ပိုရင်းနှီးလာသည်ဟု ခံစားရသည်။

တရားဝင် အိမ်ခြံမြေ အထောက်အထားစာကို ရရှိရန်မှာ အချိန်အနည်းငယ် ကြာသော်ငြား သူတို့သည် ငွေချေပြီးနောက် အိမ်သော့များကို ရရှိခဲ့သည်။ ထို့နောက် သူတို့ အချိန်မဖြုန်းပေ။ နောက်တစ်နေ့တွင် သူတို့သည် ဒီဇိုင်းနာတစ်ဦးကို ရှာပြီး အိမ်ကို စတင်အလှဆင်သည်။

သူသည် ပစ္စည်းအချို့ကို လွှင့်ပစ်ပြီး ပစ္စည်းအချို့ကို အသစ်ထပ်ထည့်ရမည်ဖြစ်သည်။ ဤသို့ကြောင့် အိမ်ဟာ ဟိုးယခင်ကတည်းက အလှဆင်ပြီးဖြစ်သော်ငြား ပြောင်းရွှေ့နေထိုင်ရန်မှာ အနည်းဆုံး လဝက်ခန့်ကြာလိမ့်မည်။ 

လုကျင်းရှိူ့နှင့်အတူရှိနေရခြင်းကြောင့် ယန်ကျင်းဇီသည် အချိန်ကုန်ဆုံးခြင်းမှာ အလွန့်အလွန် မြန်ဆန်သည်ဟု ခံစားရသည်။ မျက်စိတမှိတ်အတွင်း သူ ဤကမ္ဘာသို့ ကူးပြောင်းလာသည်မှာ တစ်လကျော်ကြာပြီဖြစ်သည်။

ကောင်းပြီ၊ မျက်စိတမှိတ်အတွင်းဟုတော့ သူ မပြောနိုင်ပေ။ သူသည် ဤလတွင် ကိစ္စများစွာကို တွေ့ကြုံခဲ့ရပြီး အလှလေးကိုပင် ပွေ့ဖက်ပြီးဖြစ်၏။

ယန်ကျင်းဇီသည် သူ၏ လတ်တလောဘဝမှာ အထူးအထူး ပျော်စရာကောင်းသည်ဟု ခံစားရပြီး လုကျင်းရှိူ့သည်လည်း အတူတူပင် ခံစားရသည် — သူသည် ကိုယ်အလေးချိန် ငါးကီလိုဂရမ် တက်လာခဲ့ပြီး သူ့မျက်နှာပါ ပို၍ပင် သွေးရောင်သမ်းလာခဲ့သည်။ 

သို့သော် ရုံးခွဲသို့ သွားသော လုရွေ့ချွင်သည် အထူးကံမကောင်းဖြစ်နေသည်။

သူသည် ဤနေရာတွင် ဘာကိုမှ မသင်ယူနိုင်ပေ။ လွန်ခဲ့သော ရက်အနည်းငယ်အတွင်းတွင် သူ လုပ်ထားသည့် ရင်းနှီးမြှုပ်နှံမှုကလည်း တစ်ခုခုမှားသွားသည်ကိုပင် ထည့်မပြောနှင့်။

လုရွေ့ချွင်ကို အကြောက်စေဆုံးမှာ သူသည် လူတစ်ယောက်က သူ့နောက်လိုက်နေသည်ကို ရှာတွေ့ထားသည့် ကိစ္စပင်။ ဒါ... လုကျင်းရှိူ့က သူ့ကို တစ်ခုခုလုပ်တော့မှာလား?

သူနှင့်ရင်းနှီးသော လုမှ လူများစွာဟာ ဤအချိန်ကာလအတောအတွင်း ပြောင်းရွှေ့ခံခဲ့ကြရသည်။ သူတို့က ယခင်အရေးပါသော ရာထူးမှ မရှိလျှင်လည်း ဖြစ်သော ရာထူးသို့ အရွှေ့ခံကြရသည်။ ထို့အပြင် ကုမ္ပဏီ၏အရေးများကို စိတ်ဝင်စားခြင်း ပိုပိုနည်းပါးလာသည့် လုကျင်းရှိူ့က ယခုမူ ကုမ္ပဏီ၏ အမျိုးမျိုးသော အရေးကိစ္စများကို ထိန်းချုပ်ပြီးဖြစ်သည်။

လူအများအပြားဟာ လုကျင်းရှိူ့က သူ့ကို အမွေဆက်ခံသူအဖြစ် လေ့ကျင့်ပေးနေသည်ဟု ထင်ကြသည်။

သို့ရာတွင် လုရွေ့ချွင်သည် ၎င်းကို အစမှအဆုံးအထိ မယုံကြည်ခဲ့ပေ။

သူသာ လုကျင်းရှိူ့ဆိုရင် သူ့ကို မမုန်းရင်တောင်မှ သူ့ကို အမွေဆက်ခံသူအဖြစ် သဘောထားမယ်လား? အဲ့ဒါ ဘယ်လိုလုပ်ဖြစ်နိုင်မှာလဲ!

သူသည် လုကျင်းရှိူ့ကို အလွန်သတိထားသော်ငြား လုကျင်းရှိူ့အောက် အသက်ဆယ်နှစ် ပိုငယ်နေသည်။ ဆယ်နှစ်ဟူသော ကွာဟချက်က သူ့ကို လုကျင်းရှိူ့နှင့် ယှဉ်ပြိုင်ရာတွင် ခက်ခဲစေ၏။ 

လွန်ခဲ့သော နှစ်အနည်းငယ်အတွင်းတွင် သူသည် အောင်မြင်မှုအချို့ကို အမြဲလုပ်ချင်ခဲ့သော်လည်း စိတ်မရှည်လွန်းသောကြောင့် ဖြစ်နိုင်သည်၊ အဆုံးတွင် သူ ဘာကိုမှ မရရှိခဲ့ပေ။

ဆန့်ကျင်ဘက်အားဖြင့် လုကျင်းရှိူ့က သူနှင့် မျက်နှာဖုံးခွာရန် စီစဉ်နေလောက်ပြီပင်။

လုရွေ့ချွင်သည် စဉ်းစားမိလေ၊ ပိုမိုစိုးရိမ်ပူပန်လေ ဖြစ်လာပြီး နောက်တစ်ကြိမ် ထပ်မံ၍ သူနှင့် လုကျင်းရှိူ့ မဟုတ်သည့် အခြားသော လုရှယ်ယာရှင်များကို ဆက်သွယ်ပြန်သည်။

သူသာ ရှယ်ယာအချို့ကို ဝယ်နိုင်ပြီး လု၏ အကြီးဆုံးရှယ်ယာရှင် ဖြစ်လာနိုင်လျှင် သူ လုကျင်းရှိူ့ကို ကြောက်စရာမလိုတော့ပေ။ သေချာတာပေါ့၊ သူ ရှယ်ယာများကို ဝယ်၍မရလျှင်လည်း ထိုရှယ်ယာရှင်များ၏ ထောက်ခံမှုကို အနိုင်ရရန် နည်းလမ်းရှာခြင်းမှာ ကောင်းမွန်သည်ပင်။

ထိုရှယ်ယာရှင်များ၏ ထောက်ခံမှုကို ရရှိရန် နည်းလမ်းအတွက်မှာမူ... သူ့တွင် လုကျင်းရှိူ့၏ ဆေးမှတ်တမ်း ရှိသည်။

လုကျင်းရှိူ့ရဲ့ ခန္ဓာကိုယ်အခြေအနေနဲ့ဆိုရင် ကုမ္ပဏီကို အုပ်ချုပ်ဖို့ မသင့်တော်ဘူး!

ယနေ့ဟာ သောကြာနေ့ ဖြစ်သည်။

လုကျင်းရှိူ့၏ အိပ်ပျော်နှုန်းမှာ ယခု အလွန်ကောင်းနေပြီဖြစ်ပြီး သူ၏ အလုပ်လုပ်နိုင်စွမ်းမှာ ပိုပိုပြီး မြင့်သထက် မြင့်မားလာသည်။ ထို့ကြောင့် သူသည် ပိုမိုအရေးကြီးသော လုပ်ငန်းတာဝန်များကို စောစောလုပ်ပြီးသွားခဲ့ပြီး သိပ်အရေးမကြီးသော လုပ်ငန်းတာဝန်များကို လုပ်ဆောင်နေစဉ်တွင် သူသည် tablet နှင့် ဝတ္ထုများ ဖတ်နေသည့် မလှမ်းမကမ်း၌ ထိုင်နေသော ယန်ကျင်းဇီကို ရံဖန်ရံခါ လှမ်းကြည့်မိသည်။

ယန်ကျင်းဇီသည် လုကျင်းရှိူ့ထံမှ တစ်ကြိမ်ထက်ပိုစွာ အကြည့်ခံရသောအခါ ဆိုဖာပေါ်တွင် ဆက်မလှဲတော့ဘဲ ခုံတစ်ခုံ ရွှေ့ကာ လုကျင်းရှိူ့ဘေးတွင် ဝင်ထိုင်လိုက်သည် : “ အလုပ်ပြီးပြီလား? ”

“ ပြီးတော့မယ် ” လုကျင်းရှိူ့က ပြန်ဖြေသည်။

“ ဒါဆို ကိုယ်တို့အိမ်အကြောင်း ပြောကြမလား? ” ယန်ကျင်းဇီက ရယ်မောလေသည်။

သူသည် tablet ကို ထုတ်ယူပြီး လုကျင်းရှိူ့ကို ပြရန် ပုံအချို့ကို ရှာတွေ့ခဲ့သည် : “ ကိုယ်တို့ရဲ့အိမ်ကို ကြိုတင်စီစဉ်ပြီးပြီ။ မာစတာအိပ်ခန်းထဲက ခုတင်က ဒီလိုမျိုး။ မင်း ဘယ်လိုထင်လဲ? ”

မာစတာအိပ်ခန်းထဲရှိ ခုတင်က အလွန်ကြီးပြီး ပထမဆုံးအမြင်၌ပင်... ၎င်းက အိပ်မောကျရန် အလွန်သက်တောင့်သက်သာရှိမည့်ပုံပေါ်သည်။

“ အခု မင်းအခန်းထဲက ခုတင်က နည်းနည်းသေးတယ်။ ဒီခုတင်က အရမ်းကြီးတယ်၊ ကိုယ်တို့ အိပ်ရာပေါ်မှာ လူးလှိမ့်လို့ရတယ်။ ” ယန်ကျင်းဇီက ပြုံးလျက် လုကျင်းရှိူ့ကို ကြည့်သည်။

လုကျင်းရှိူ့ : “ … ”

“ ဒါနဲ့ ဒုတိယထပ်က မူရင်းအိပ်ခန်းကို gym နဲ့ အပန်းဖြေခန်းအဖြစ် ကိုယ် ပြောင်းလိုက်တယ်။ ” ယန်ကျင်းဇီက ထပ်ပြောလာသည်။

ဤသည်မှာ သူနှင့် လုကျင်းရှိူ့၏ အိမ် ဖြစ်သည်။ သူသည် စကားပြောရသည်ကိုပင် အမှန်တကယ် မငြီးငွေ့နိုင်ပေ။

လုကျင်းရှိူ့ကလည်း ဂရုတစိုက် နားထောင်နေပြီး မည်မျှပင် ကြာပါစေ၊ နားထောင်ရခြင်းကို မပျင်းရိခဲ့ချေ။

စကားပြောနေစဉ် ယန်ကျင်းဇီ၏ဖုန်းမှ ဖုန်းသံမြည်လာခဲ့သည်။

ယန်ကျင်းဇီသည် တစ်ချက်ကြည့်ကာ ခေါ်နေသူမှာ သူ့အစ်ကိုဖြစ်ကြောင်း တွေ့သွားသည်။

“ ကိုယ် ဖုန်းသွားဖြေလိုက်ဦးမယ်။ ” ယန်ကျင်းဇီသည် လုကျင်းရှိူ့ကို ပြုံးပြပြီး သူ့‌ဘေးရှိ ဖုန်းကို ယူကာ သွားဖြေသည်။

ယန်ကျင်းဇီသည် ဝေးဝေးမသွားဘဲ ရုံးခန်းထဲတွင်ပင် ဖုန်းဖြေလေသည်။ လုကျင်းရှိူ့သည် သူနှင့် သူ့အစ်ကိုတို့ စကားပြောသည်ကို နားထောင်နေစဉ် tablet ပေါ်မှ ဓာတ်ပုံများကို ကြည့်ရှုနေသည်။

ကြည့်နေရင်း လုကျင်းရှိူ့သည် မတော်တဆ နှိပ်မိပြီး ယခင်က ယန်ကျင်းဇီ ဖတ်နေသော ပရိုဂရမ်ကို တွေ့လိုက်ရသည်။

ယန်ကျင်းဇီ အချိန်ရှိတိုင်း ဖတ်ဖတ်နေတဲ့ ဝတ္ထုတွေက ဘာတွေလဲ?

လုကျင်းရှိူ့သည် ၎င်းကို နှိပ်ပြီးနောက် အံ့အားသင့်သွားရသည်။

ယန်ကျင်းဇီက ဝတ္ထုဖတ်နေခြင်း လုံးဝ မဟုတ်ဘဲ.... ဆေးနှင့် ဆေးဝါးများဆိုင်ရာ ပရော်ဖက်ရှင်နယ် စာအုပ်တစ်အုပ်ကို ဖတ်ရှုနေခြင်းဖြစ်သည်။

စာအုပ်တွင် အထူး ပရော်ဖက်ရှင်နယ် အချက်အလက်များနှင့် သိပ်သည်းစွာ ပြည့်နှက်နေပြီး သူသည် ၎င်းကို လုံးဝ နားမလည်နိုင်သော်ငြား ဤစာအုပ်ထဲတွင် ဆေးဝါးများစွာ၏ ရှင်းပြချက်များ ပါရှိပြီး ဤဆေးဝါးများ၏ အာနိသင်များကို သုံးသပ်လေ့လာထားသည်ကို သူ တွေ့ရသည်။  

ယန်ကျင်းဇီက ဒီလိုဟာတွေကို ဘယ်လိုကြည့်နိုင်တာလဲ?

ဤလူ၊ ယန်ကျင်းဇီကို သူ ကောင်းကောင်းသိသည်။

ယန်ကျင်းဇီဟာ ကလေးဘ၀ကတည်းက ညံ့ဖျင်းသော အမှတ်များသာ ရရှိခဲ့ပြီး သူက စာမတတ်ဟု အပြောခံရသည်။ သူက အတန်းထဲတွင် အမြဲအိပ်နေသည်ဟုလည်း ‌ပြောကြသည်။ ဘာလို့ သူလိုလူက ဒီလိုစာအုပ်မျိုးကို ရုတ်တရက်ကြီး ဖတ်နေတာလဲ? 

လုကျင်းရှိူ့သည် အနည်းငယ် ပဟေဠိဖြစ်သွားသော်လည်း ကြာကြာသံသယမဖြစ်လိုက်ပေ — ယန်ကျင်းဇီက ဖုန်းပြောပြီးပြီဖြစ်သည်။

လုကျင်းရှိူ့သည် သူ့လက်ထဲရှိ ပရိုဂရမ်ကို အေးအေးလူလူ ပိတ်လိုက်သည်။ 

ယန်ကျင်းဇီသည် လုကျင်းရှိူ့ ဘာမြင်သွားမှန်းကို မသိပေ။ သူသည် လုကျင်းရှိူ့ရှေ့တွင် ထိုင်ချပြီးနောက် လူနှစ်ဦး၏အိမ်အကြောင်းကို စတင်ပြောဆိုကာ နောက်ဆုံးတွင် ဆိုသည် : “ ကျင်းရှိူ့၊ ကိုယ်တို့ မနက်ဖြန် ပြောင်းပြီး ညဘက် အိမ်အသစ်မှာ နေကြမလား? ”

“ မင်း သဘောပဲ။ ” လုကျင်းရှိူ့က ဖြေသည်။

“ ဒါဆို အတည်ပြုလိုက်ပြီ။ ” ယန်ကျင်းဇီက ရယ်လေသည်။

ထိုနေ့ အိမ်ပြန်ရောက်ပြီးနောက် ယန်ကျင်းဇီသည် ပစ္စည်းများကို စတင်ထုပ်ပိုးပြီး မနက်ဖြန်တွင် ပြောင်းရွှေ့ရန် စီစဉ်သည်။ သို့သော် သူ ထုပ်ပိုးနေစဉ် လူတစ်ဦးက သူ့ကို ဖုန်းထပ်ခေါ်ပြန်သည်။

ဤအကြိမ်မှာတော့ ခေါ်သူဟာ လုရွေ့ချွင် ဖြစ်သည်။

ယခုတလော လုရွေ့ချွင်က သူ့ကို လုကျင်းရှိူ့၏ ကိုယ်ခန္ဓာအခြေအနေအကြောင်း အမြဲမေးနေခဲ့ပြီး သတင်းအချို့ကို ပြောပြခဲ့သည် — လုရွေ့ချွင်က လုကျင်းရှိူ့အပေါ် အကွက်ရွှေ့ချင်နေသည်။

အတိအကျပင် ဤအကြောင်းကြောင့်သာ ယန်ကျင်းဇီသည် လုရွေ့ချွင်ကို အပြီးအပိုင် မ‌ဘလော့ခြင်း ဖြစ်သည်။

ကံမကောင်းစွာဖြင့် သူသည် လုရွေ့ချွင်ထံမှ ဘာသတင်းမှ မရရှိပေ။

လုရွေ့ချွင်က ပိုမိုသတိထားနေသေးပြီး သူသည်လည်း လုရွေ့ချွင်ကို ချော့မော့ရန် စိတ်မရှည်ရာ သဘာဝကျစွာပင် အများအပြား သိရှိဖို့ရန်မှာ မဖြစ်နိုင်တော့ချေ။ 

သေချာတာပေါ့၊ လုရွေ့ချွင်က သူ့ကို ဘာမှမပြောပြရသည့် ပိုမိုကြီးမားသော အကြောင်းပြချက်မှာ သူက ဘာမှနားမလည်ဘဲ မကူညီနိုင်ဟု လုရွေ့ချွင်က ခံစားရသဖြင့် သူ့ကို မပြောပြချင်ခြင်းကြောင့်ဟု သူ ထင်မိသည်။

ယန်ကျင်းဇီသည် ချောချောမွေ့မွေ့ဖြင့် ဖုန်းဖြေလိုက်သည်။

ရလဒ်ကမူ လုရွေ့ချွင်က ဖုန်းထဲမှ ဆိုသည် : “ ကျင်းဇီ၊ မင်း ငါ့ကို ပိုက်ဆံချေးလို့ရမလား? ”

“ မင်း ဘာလုပ်ချင်လို့လဲ? ” ယန်ကျင်းဇီက မေးသည်။

လုရွေ့ချွင်က ပြန်ဖြေသည် : “ လုရှယ်ယာရှင်တွေထဲက တစ်ယောက်က ရှယ်ယာရောင်းချင်တယ်လို့ ငါ သတင်းရထားတယ်။ ငါ သူ့ရှယ်ယာတွေကို ဝယ်ချင်တယ်။ ”

“ ဘယ်သူလဲ? ” ယန်ကျင်းဇီက ဆက်မေးသည်။

လုရွေ့ချွင်က နာမည်တစ်ခုကို ပြောခဲ့သည်။

ဤရှယ်ယာရှင်မှာ လုသခင်အိုကြီးနှင့်အတူ အလုပ်ကြိုးစားလုပ်ခဲ့သော လူများထဲမှ တစ်ဦး ဖြစ်သည်။ သူသည် လုရှယ်ယာများ၏ ၃% ကို လက်ဝယ်ပိုင်ဆိုင်ထားပြီး လုကျင်းရှိူ့နှင့် အဆင်မပြေချေ။

မည်သို့မျှ မတည့်နိုင်... လုကျင်းရှိူ့ဟာ ကုမ္ပဏီကို စစရောက်ချင်းတွင် လူအချို့ကို ရှင်းလင်းပစ်ခဲ့သည်။ ထိုလူများအနက် ဤလူ၏ ဆွေမျိုးများနှင့် မိတ်ဆွေများ အများအပြား ပါဝင်ခဲ့၏။

ယခု ဤလူက ရှယ်ယာများကို ရောင်းချင်ခြင်းမှာ သူ့သားက အားကိုးမရဘဲ အကြွေးများစွာ တင်ထားသောကြောင့် ဖြစ်သည်။ အသည်းအသန်ဖြင့် သူက ရှယ်ယာများကိုသာ ရောင်းချနိုင်သည်။

လုရွေ့ချွင်က ဤလူ၏ ရှယ်ယာများကို ဝယ်ချင်သော်ငြား သူ့တွင် ငွေမရှိသဖြင့် ယန်ကျင်းဇီကို တွေးမိခဲ့သည်။

ယန်ကျင်းဇီက ဆိုသည် : “ ငါ စဉ်းစားကြည့်ဦးမယ်။ ”

ယန်ကျင်းဇီသည် စကားပြောပြီးနောက် ဖုန်းချကာ လုကျင်းရှိူ့ထံသို့ ချက်ချင်း သွားသည် : “ ကျင်းရှိူ့၊ မင်းနဲ့ အမြဲပြဿနာတက်နေတဲ့ ဝမ်မျိုးနွယ် ရှယ်ယာရှင်က သူ့ရှယ်ယာတွေကို ရောင်းချင်နေတယ်လို့ သတင်းရတယ်။ ” 

လုကျင်းရှိူ့ အံ့ဩသွားသည် : “ မင်း ဘယ်က သတင်းကြားလာတာလဲ? ”

“ လုရွေ့ချွင် ပြောတာ ” ယန်ကျင်းဇီက ဆက်ပြောသည် : “ သူ ကိုယ့်ဆီက ငွေချေးပြီး ရှယ်ယာဝယ်ချင်နေတယ်... သေချာပေါက် ဒီရှယ်ယာတွေကို သူ့ကို မဝယ်ခိုင်းရဘူး!

လုကျင်းရှိူ့တွင် လုရွေ့ချွင်ကဲ့သို့ ရှယ်ယာအများအပြား ရှိသည်။ လုရွေ့ချွင်က ရှယ်ယာတွေ ထပ်ဝယ်ပြီးတော့ သူ့ကို ထောက်ခံဖို့ လူနည်းနည်းထပ်ခေါ်နိုင်ပြီး နောက်ဆုံးမှာ လုကျင်းရှိူ့ကို ကျော်သွားရင် ဘယ်လိုလုပ်မလဲ?

လုကျင်းရှိူ့သည် လုရွေ့ချွင် ရှယ်ယာဝယ်သည်ကို အမှန်တကယ်ပင် မကြောက်ရွံ့ပေ။

ဤနှစ်များရှိ လု၏ ရှယ်ယာရှင်အသစ်များမှာ တကယ်တော့ သူ့လူများပင်။ လုရွေ့ချွင်တွင် ရှယ်ယာများ နောက်ထပ် ၃% ရှိလာလျှင်တောင်မှ သူ့ကို မထိခိုက်ချေ။

သို့သော် ယန်ကျင်းဇီ သူ့ကို စိုးရိမ်ခြင်းက သူ့ကို အတော်လေး ပျော်ရွှင်စေသည်။ သူသည် လုရွေ့ချွင်ကို အမှန်တကယ် မဝယ်ယူစေချင်ပေ : “ ငါ သူ့ကို ဝယ်ခွင့်ပေးလို့မဖြစ်ဘူး။ ”

“ ကျင်းရှိူ့၊ ဒါဆို မင်း ရှယ်ယာဝယ်ဖို့ လူရှာပါလား? ” ယန်ကျင်းဇီ အကြံပြုလိုက်သည်။

“ သွားဝယ်လိုက် ” လုကျင်းရှိူ့သည် ယန်ကျင်းဇီကို မျက်နှာအမူအရာမဲ့စွာ ကြည့်သော်လည်း သူ့အကြည့်များမှာ နူးညံ့နေသည် : “ ငါ ရှေ့ထွက်ရင် သူ မရောင်းချင်မှာ သေချာတယ်။ ပြီးတော့ ငါ့ဘက်မှာ ယုံကြည်လို့ရတဲ့လူ မရှိဘူး။ ”

အိမ်မဝယ်မီ သူသည် ယန်ကျင်းဇီကို ၅၀ မီလီယံ ပေးခဲ့သော်ငြား နောက်ပိုင်းတွင် ယန်ကျင်းဇီက သူ့ကို ၂၀ မီလီယံ ပြန်ပေးခဲ့ပြီး သူတို့က အိမ်အတူဝယ်ကာ သူတစ်ဦးတည်းကို ငွေမချေခိုင်းသင့်ဟု ပြောလေသည်။

ထို့အပြင် ယန်ကျင်းဇီက အိမ်အလှဆင်ခြင်းနှင့်ပတ်သက်ပြီး စိတ်ပူနေ‌သည်။

ယန်ကျင်းဇီက သူ့ကို တစ်ခုပြီးတစ်ခု ပစ္စည်းများစွာကိုလည်း ဝယ်ပေးသေးသည်။

ယန်ကျင်းဇီ၏အခြေအနေကို သူ သိသည်။ အနာဂတ်တွင် ယန်ကုမ္ပဏီကို ယန်ကျင်းဇီ၏အစ်ကိုအား ပေးမည်ဖြစ်ပြီး ယန်ကျင်းဇီ၏လက်ထဲ၌ ပိုင်ဆိုင်မှုအများအပြား သိပ်မရှိချေ။ သူက လတ်တလောတွင် အိမ်ဝယ်ထားပြီး အနည်းဆုံး ၃၀ မီလီယံ ကုန်စေမည့် ကားတစ်စီးကိုလည်း ဝယ်ထားရာ ယန်ကျင်းဇီက ယခု ငွေပြတ်နေလောက်ပြီဖြစ်သည်။

သူသည် လုရှယ်ယာများကဲ့သို့ တစ်ခုခုပေးချင်သည်။ အခု သူ့မှာ ဒီလိုအခွင့်အရေးရှိလာမှတော့ အတော်ပဲမဟုတ်ဘူးလား?

“ အင်း၊ ကိုယ် အရင်ဝယ်ပြီး ပြီးရင် မင်းကို ရှယ်ယာပြန်လွှဲပေးမယ်။ ” ယန်ကျင်းဇီက ပြောသည်။

“ ကောင်းပြီ ” လုကျင်းရှိူ့က သဘောတူသည် : “ ငါ သူ့အခြေအနေကို စုံစမ်းဖို့ လူရှာလိုက်မယ်။ မင်း သူနဲ့ ဈေးနှုန်းတစ်ခု ညှိနှိုင်းကြည့်၊ ပြီးရင် ငါ မင်းကို ပိုက်ဆံပေးမယ်။ ”

သူတို့သည် စကားဆက်ပြောနေရင်း ဝမ်မျိုးနွယ် ရှယ်ယာရှင်အကြောင်းကို ပြောဖြစ်ကြသည်။

“ သူ ခံသင့်တယ်၊ သူက သူ့သားကို အလိုလိုက်ဖျက်ဆီးခဲ့တာ... ” ယန်ကျင်းဇီ လုကျင်းရှိူ့ကို ကြည့်လိုက်သည် : “ ဦးလေးလု၊ သူ့အကြောင်း ပြောတာ ရပ်လိုက်ရအောင်။ ကိုယ် မင်းကို နှိပ်ပေးရမလား? ”

လုကျင်းရှိူ့ အနည်းငယ် ချောင်းဟန့်လိုက်၏။

နှိပ်ပေးမည်ဟု ယန်ကျင်းဇီ ပြောသောအခါ ၎င်းက ရိုးရှင်းသော နှိပ်ပေးမှု ဖြစ်သည်ကို သူ သိသည်။ သို့သော် ယန်ကျင်းဇီ၏ အမူအရာက... ယန်ကျင်းဇီ သူ့ကို တစ်ခုခုလုပ်‌ချင်နေသည်ဟု သူ့အား အမြဲခံစားရစေသည်။

ကံမကောင်းစွာဖြင့် ယန်ကျင်းဇီက တစ်ခါမှ မလုပ်ခဲ့ချေ။

လုကျင်းရှိူ့သည် ခုတင်ပေါ်တွင် လှဲပြီး သူ့ခြေလက်တို့ကို ပွတ်သပ်နေသော ယန်ကျင်းဇီကို ကြည့်ကာ သူ့စိတ်တစ်ခုလုံး ငြိမ်သက်သွားသည်ကိုသာ ခံစားလိုက်ရသည်။

ယန်ကျင်းဇီနှင့် သူ မသိမီ သူသည် အနာဂတ်တွင် သူ၏ မသန်စွမ်းခန္ဓာကိုယ်ကို မမုန်းတီးမည့် လူတစ်ဦးကို ရှာရသည်မှာ သူ့အတွက် ခက်ခဲလိမ့်မည်ဟု ထင်ခဲ့သည်။ သူ မမျှော်လင့်ထားသည်မှာ ယခု ယန်ကျင်းဇီက သူ့ခန္ဓာကိုယ်ကို လုံးဝဥဿုံ လျစ်လျူရှုထားနိုင်သည်ကိုပင်။

လာဗင်ဒါရနံ့က တကယ် ကောင်းသည်။ လုကျင်းရှိူ့သည် ၎င်းကို ရှူရှိုက်ပြီး ထွေဝါးစွာ အိပ်မောကျသွားပြန်သည်။

ယန်ကျင်းဇီသည် လုကျင်းရှိူ့ မျက်လုံးမှိတ်သွားသည်ကို တွေ့ပြီး လုကျင်းရှိူ့က အိပ်ပျော်နေဟန်ဆောင်သည်လား သို့မဟုတ် တကယ် အိပ်မောကျသွားသည်လားကို မသိပေ။

သို့သော် ၎င်းကြောင့် ဘာမှမကွဲပြားချေ။

ယန်ကျင်းဇီသည် ခေါင်းငုံ့ကာ လုကျင်းရှိူ့ကို ဖွဖွနမ်းပြီးနောက် လက်သွားဆေးပြီး လုကျင်းရှိူ့ဘေးတွင် လှဲလိုက်သည်။

လှဲပြီးနောက် ယန်ကျင်းဇီသည် သူ ဘာဆက်လုပ်ရမည်ကို တွေးကြည့်သည်။

သူနှင့် လုကျင်းရှိူ့တို့၏ အိမ်ဟာ အသင့်ဖြစ်ပြီဖြစ်ပြီး မနက်ဖြန် သူတို့ ရွှေ့ကြမည်ဖြစ်သည်။

သူ့အစ်ကိုက သူ့ကို ယနေ့ နေ့ခင်းတွင် ဖုန်းဆက်ခဲ့ပြီး သက်သေစုဆောင်းနေသည်မှာ ပြီးလုနီးပါး ဖြစ်နေပြီဟု ပြောခဲ့သည်။ ထိုရှယ်ယာရှင်ဝမ် ကိုင်ထားသော ရှယ်ယာများကို သူ ဝယ်သောအခါ တစ်ချိန်တည်း၌ သူ ဖျက်သိမ်းနိုင်ပြီဖြစ်၏။

နောက်... နောက်ဆက်ပြီးတော့ သူသည် လုကျင်းရှိူ့ကို လက်ထပ်နိုင်ပြီဖြစ်ကာ ဆေးပညာကို သွားလေ့လာမည်ပင်။

ယခင်က ယန်ကျင်းဇီသည် နှစ်အနည်းငယ်ကြာ လေးလေးနက်နက် စာလေ့လာရန် ဆေးတက္ကသိုလ်တစ်ခုသို့ သွားဖို့ စီစဉ်ခဲ့သော်ငြား နောက်ပိုင်းတွင် ဤအစီအစဉ်ကို ‌လက်လျှော့လိုက်သည်။

သူသည် တက္ကသိုလ်သို့ သွားကိုသွားရဦးမည် ဖြစ်သော်လည်း အတန်းသွားတက်စရာတော့ မလိုပေ။ သူသည် သူ့ဘာသာသူ ‌လေ့လာနိုင်ပြီး စာမေးပွဲစစ်ချိန်တွင် ဝင်ဖြေနိုင်သည်။

အဆင့်မြင့်ဆရာဝန်များအချို့နောက်ကို လိုက်၍ ချက်ချင်း သင်ယူခြင်းမှာ သူ့အတွက် အကောင်းဆုံးပင်။

ဆေးကုသစွမ်းရည်များနှင့်ပတ်သက်ပြီး အရေးကြီးဆုံးအရာမှာ လေ့ကျင့်မှု ဖြစ်သည်။ 

သူသည် ပိုမိုသင်ယူပြီးနောက် လုကျင်းရှိူ့ နေပြန်ကောင်းအောင် မလုပ်နိုင်လျှင်တောင်မှ လုကျင်းရှိူ့ ခံစားချက်ပိုမိုကောင်းစေရန် လုပ်နိုင်လောက်သည်။

ဤသို့စဉ်းစားရင်း ယန်ကျင်းဇီသည် လုကျင်းရှိူ့၏လက်မောင်းကို ထပ်ထိကြည့်သည်။

လုကျင်းရှိူ့က အလွန်ပိန်ပါးပြီး သူ့ဘယ်လက်နှင့် ဘယ်ခြေထောက်တို့မှာ ပို၍ပင် သေးသွယ်ကာ သူသည် အောက်မှ အရိုးများကိုပင် အလွယ်တကူ ကိုင်နိုင်သည်။

လုကျင်းရှိူ့နှင့်အတူရှိနေသော ဤရက်များတွင် သူ့၌ ညစ်ပေရှုပ်ပွသော အတွေးမျိုးစုံများ အမှန်

တကယ် ရှိသော်ငြား လုကျင်းရှိူ့၏ ခန္ဓာကိုယ်အခြေအနေကို တွေးမိမိချင်း သူသည် သူ၏ အတွေးရှုပ်ရှုပ်များ အားလုံးကို ကောင်းကင်ထဲသို့ ပစ်လွှတ်လိုက်သည်ပင်။

လုကျင်းရှိူ့က ဒီလိုအခြေအနေ ဖြစ်နေတယ်၊ ဘယ်လိုလုပ် သူက လုကျင်းရှိူ့ကို တစ်ခုခုလုပ်ဖို့ ဆန္ဒရှိနိုင်ပါ့မလဲ?

သူ လုကျင်းရှိူ့ ဝလာတဲ့အထိ စောင့်ရမယ် ဟုတ်တယ်မလား?