Chapter 138

🐯Chapter 138

ညနေ ၆ နာရီတွင်-

“.....”

ဒီလူ တမင်သက်သက်ကို လုပ်ခဲ့တာ...

ကုယွီမြန် နှင်းကျားသစ်လေးကို ဂျိုင်းအောက်မှ ချီထားပြီး အနှီကလေးစုတ်လေးကို ခဏလောက်စိုက်ကြည့်နေလိုက်သည်။ ကုယွီမြန် အနည်းငယ် မကျေမနပ်ဖြစ်နေသေးသည်။

"မင်း တခြားသူတွေနဲ့ ဘယ်တုန်းကမှ အဆင်ပြေအောင် မနေခဲ့ဖူးဘူးလား…"

သူ နှင်းကျားသစ်လေး၏ဗိုက်ကလေးကို လက်ချောင်းထိပ်လေးဖြင့် ထိုးလိုက်ပြီး နူးညံ့စွာ မေးလိုက်သည်။

ရှို့ဟန်ကိုကြည့်ရသည်မှာ မွေးဖွားလာချိန်မှ အရွယ်ရောက်ချိန်အထိ အလုံအလောက် ခိုင်မာသော မိသားစုဆက်ဆံရေးတစ်ခုကို တည်ဆောက်နိုင်စွမ်း ရှိခဲ့သည့်ပုံမပေါ်ပေ။ ထို့အပြင် သူ ထိတွေ့ဆက်ဆံခဲ့သည့်လူအများစုမှာ လက်အောက်ငယ်သားများ သို့မဟုတ် အစေခံများပင်ဖြစ်ပြီး သူ အမိန့်များပေးလိုက်ရုံဖြင့် လုံလောက်ပေ၏။

သူက အခြားသူများကိုလည်း စကား ရင်းရင်းနှီးနှီး မပြောခဲ့ပေ။ အခြားသူများနှင့် သာတူညီမျှ ပုံမှန်အတိုင်း အဆင်ပြေပြေနေသွားရန်မှာ သူ့အဖို့ အလွန်ပင်ခက်ခဲလွန်းလှ၏။

နှင်းကျားသစ်လေးက သူ့အမြီးကို ဝှေ့ယမ်းလိုက်၏။

အလွန်ပင် နီးကပ်နေသည်။

သူ့နားရွက်များမှာ နီနေသည်။ ပထမဦးဆုံး လက်ကိုဆန့်ထုတ်ကာ ကုယွီမြန်၏မေးစေ့ကို ဖိပြီးနောက် သူ့နှာခေါင်းထိပ်လေးကို ထိလိုက်၏။

ထို့နောက် နှင်းကျားသစ်လေးက ထိုအနေအထားအတိုင်း ခဏမျှပြုမူပြီး သူ့အမူအရာကို တည်ငြိမ်အောင် ကြိုးစားလိုက်သည်။

"မင်းကို နမ်းတာက ကိုယ်မဟုတ်ဘူး… ကိုယ့်ရဲ့အမြွှာညီအစ်ကိုပဲ…"

နှင်းကျားသစ်လေးက သူ့ကိုယ်သူ တည်ငြိမ်သွားစေရန် တွန်းအားပေးလိုက်ပြီး ကုယွီမြန်၏ရင်ခွင်ထဲမှ ခုန်ထွက်ကာ အခန်းထောင့်ဆီသို့ လျှောက်သွားပြီး သူ့ဘယ်ဘက်မျက်လုံးရှေ့တွင် သက်တန့်ဖန်ပြားနှင့်အတူ လက်ပတ်ကွန်ပျူတာကို တပ်ဆင်လိုက်သည်။

သူ့နှလုံးသားမှာ အလွန်အမင်း အခုန်မြန်နေ၏။ တည်ငြိမ်သွားစေရန် ရှေး‌ဟောင်းကမ္ဘာ၏ သမိုင်းကြောင်းနှင့် ယဉ်ကျေးမှု အသေးစိတ်စစ်ဆေးခြင်းရလဒ် အကျဉ်းချုပ်ကို ပြန်လည်စဉ်းစားသုံးသပ်ရန် လိုပေသည်။

ထန်ယွမ်လေးက ရှို့ဟန်၏ ‘ကြင်နာ’ သည့်မျက်လုံးများအောက်တွင် နွားနို့သောက်ရန် အတင်းအကျပ် ဖိအားပေးခံခဲ့ရသည်ကို မှတ်မိနေဆဲ။

ဤတစ်ကြိမ်တွင် သူ နှင်းကျားသစ်လေးထံသို့ ဇလုံလေးကိုကိုင်ပြီး လျှောက်သွားကာ ပါးစပ်အပြည့်နွားနို့များကို ထွေးထုတ်လိုက်သည်။ သူ့မျက်လုံးများက နှင်းကျားသစ်လေးကို စူးစူးရှရှ စိုက်ကြည့်ပြီးနောက် ကုယွီမြန်ကို လှမ်းကြည့်လိုက်သည်။

နှင်းကျားသစ်လေးက သူ့ကို ဗလာသက်သက်မျက်လုံးများဖြင့် ပြန်ကြည့်လိုက်သည်။

ကုယွီမြန် “.....”

[ရေခဲတုံးကြီး - အရင်မြင်ဖူးနေကြ ရှာလကာရည်ပုံးကြီး ထွမ်ထွမ်ပဲ… ဟား ဟား ဟား…]

[အလှကုန်တွေကို လွှင့်ပစ်မယ် - ဘုရားရေ... အရင်ခုနစ်ရက်တုန်းက ငါ ဘယ်လိုများ အသက်ရှင်နိုင်ခဲ့တာလဲ သိချင်လိုက်တာ…မြန်မြန်နဲ့အကောင်ပေါက်လေးတွေ live လွှင့်နေပြီ ဝူး ဝူး ဝူး…]

[နားထောင်သူတစ်ယောက် - သူတို့ကိုလွမ်းနေသူ +၁။ မြန်မြန်ရေ... ငါ့ဆီကို လာပြီး နမ်းပါဦး =333=]

[ဂျူနီယာ ဘီ - ဒီခုနစ်ရက်အတွင်း ငါ စားခဲ့တဲ့ အစားအသောက်တွေက အရသာမရှိဘူး…အရမ်းကိုဗိုက်ဆာနေတာကြောင့် တခြား liveတွေကို မကြည့်နိုင်တော့ဘူး…]

တိုက်ရိုက်ထုတ်လွှင့်ခြင်းကို ခေတ္တခဏ ရပ်နားမည်ဖြစ်ကြောင်းကို သူ့ကိုယ်ပိုင်ဘလော့တွင် ကြိုတင်ပြီး ခွင့်တောင်းခဲ့သော်လည်း ကြည့်ရှုသူအများအပြားက သူတို့မိသားစုမပါရှိသည့် နေ့ရက်များနှင့် အလွန်အံဝင်ခွင်ကျမဖြစ်သေးပေ။ အဘယ်ကြောင့်ဆိုသော် သကြားခဲ သကြားခဲ ပြောခဲ့သည့်အတိုင်း ကုယွီမြန်ဟူသည် ကမ္ဘာပေါ်တွင် တစ်ဦးတည်းသာရှိသောကြောင့်ပင်။

ကုယွီမြန်၏တိုက်ရိုက်ထုတ်လွှင့်မှုကို အစားထိုးနိုင်ရန်မှာ အလွန်နည်းပါးလှ၏။ ခုနစ်ရက်ဆက်တိုက် တိုက်ရိုက်ထုတ်လွှင့်မှုကို မပြုလုပ်ခဲ့ခြင်းကြောင့် ကြယ်တာရာကောင်းကင် ပလက်ဖောင်းတစ်ခုလုံး၏ စုစုပေါင်းတက်ကြွမှုက အနည်းငယ်လျော့နည်းနေခဲ့သည်။ ပရိသတ်များအတွက် အစားအသောက် သုံးဆောင်ရသည်မှာ အရသာမရှိရုံသာမက ကြယ်တာရာကောင်းကင် ပလက်ဖောင်း၏ စီစဉ်ညွှန်ကြားရေးမှူး ဒါရိုက်တာမှာလည်း စိတ်ကျေနပ်မှုမရရှိခဲ့ပေ။

၎င်းမှာ ရက်အနည်းငယ် ခေတ္တအနားယူရုံမျှသာရှိသေးသည်။ အကယ်၍ ကုယွီမြန်သာ နောက်ထပ်ဘယ်သောအခါမှ လုံးဝ တိုက်ရိုက်ထုတ်လွှင့်မှု မပြုလုပ်တော့မည်ဆိုလျှင်- မကြာမီ ထုတ်လွှင့်မည့် နောက်ထပ်ရှိုးအသစ်တစ်ခုကို ကျေးဇူးတင်ရပေမည်။ ၎င်းတွင် ကုယွီမြန် ပါဝင်လိမ့်မည်ဖြစ်သောကြောင့် ဆက်လက်တည်ငြိမ်သွားအောင် ထိန်းချုပ်နိုင်စွမ်းရှိသည်။ ကံကောင်းစွာပင် ကုယွီမြန်၏အခြေအနေအပေါ်ကိုလိုက်ပြီး သင့်လျော်သလိုနေထိုင်နိုင်စွမ်းက အတော်လေးကောင်းမွန်ပေ၏။ တိုက်ရိုက်ထုတ်လွှင့်မှုကို ရုတ်တရက်ထဖွင့်လိုက်ပြီး မကြာမီမှာပင် ဝန်ထုပ်ဝန်ပိုးများ လျော့ကျသွားသည့် အခြေအနေသို့ ရောက်ရှိလာခဲ့သည်။

“မင်းတို့အားလုံးကို တကယ်တောင်းပန်ပါတယ်…”

ကုယွီမြန်က ပန်ဒါလေး၏ခေါင်းကို ပွတ်သပ်ပေးပြီး အသံတိတ်ရယ်မောရင်း ပြောလိုက်သည်။

“ကောင်းပြီ ဒီနေ့ မဲဖောက်ပေးဖို့အတွက် အစားအသောက်အချို့ကို ဖန်တီးမယ်… ပြီးရင် မနက်ဖြန်ကျရင် ပရိသတ်တွေကို မဲဖောက်ပေးမယ်…”

နောက်ထပ်အကြောင်းပြချက်တစ်ခုပါ ထပ်ပေါင်းရမည်ဆိုလျှင် မကြာသေးမီက ရှို့ဟန်၏ကိစ္စကြောင့် ၎င်းကို နားလည်ပေးရန်နှင့် ထိန်းညှိရန် ကုယွီမြန် သူကိုယ်တိုင်အတွက် အချိန်လိုအပ်ခဲ့သည်။ ထို့ကြောင့် တိုက်ရိုက်ထုတ်လွှင့်ရန် သူ့တွင် အချိန်ပိုမရှိခဲ့ပေ။

ပရိတ်သတ်များ: “ယေးးးး”

[ကောင်းတယ် ကောင်းတယ် ကောင်းတယ်…]

[ငါ့ရဲ့နှေးနေတဲ့လက်ကို မုန်းလိုက်တာ… ဆုပေးပွဲအခမ်းအနားကျရင် ငါ မရနိုင်လောက်ဘူး…]

[ခုနစ်ရက်လောက် မြန်မြန်ရဲ့ကျွမ်းကျင်မှုကို မမြည်းစမ်းခဲ့ရဘူး… ငိုချင်လာပြီ…]

ဖန်သားပြင်ပေါ်ရှိ မှတ်ချက်မျိုးစုံကို ကြည့်ရင်း ကုယွီမြန် ပြုံးလိုက်သည်။

 “ဒါဆို ပိုပြီးမြန်မြန် ချက်ပေးမယ်နော် အဲဒါကို လျှိုရှင်းဒိန်ခဲဌာပနာမုန့်ကြော်လို့ခေါ်တယ်…”

ယခင်က သူ ပြုလုပ်ထားသည့်အရာများကို ပရိသတ်များဆီ ယူဆောင်သွားပြီး သူတို့နှင့်အတူ မျှဝေလိုသည့်ရည်ရွယ်ချက် ကုယွီမြန်တွင် ရှိခဲ့ဖူးသည်။ တိုက်ရိုက်ထုတ်လွှင့်မှုကို မတော်တဆ ဖွင့်လိုက်မိသောအခါ ယခုအချိန်က ထိုသို့ပြုလုပ်ရန် အကောင်းဆုံးအချိန်ပင်ဖြစ်၏။ ပရိသတ်များ၏ရှုထောင့်မှကြည့်လျှင် သူတို့ လက်ခံရရှိမည့် လက်ဆောင်သေးသေးလေးများကို ကိုယ်တိုင်မြင်တွေ့ခွင့်ရခြင်းက အလွန်စိတ်ဝင်စားစရာကောင်းသလို မျှော်လင့်ထားသောအရာလည်းဖြစ်သည်။

ကုယွီမြန်က ထောပတ်ကို သကြားဖြင့် နူးညံ့ပျော့ပျောင်းသွားအောင် လုပ်လိုက်ပြီး ကြက်ဥမွှေတံဖြင့် စေးကပ်ပျော့ပျောင်းကာ အမြှုပ်လေးများ ထလာသည်အထိ မွှေလိုက်သည်။ ထို့နောက် အစာများမထည့်ခင် ကြက်ဥအနှစ်နှင့်ဂျုံမှုန့်များကို လောင်းထည့်ပြီး မုန့်နှစ်ဖြစ်အောင် မွှေလိုက်သည်။

“ဒါက ဒိန်ခဲဌာပနာမုန့်ကြော်အတွက် ဌာပနာပြုလုပ်တဲ့ပုံပဲ… အတွင်းထဲထည့်မဲ့အစာကတော့ ဒိန်ခဲက အဓိကပဲ…”

မုန့်ဖုတ်ပြီးနောက် အရည်ပျော်နေသော ဒိန်ခဲများနှင့်အတူ ဒိန်ခဲဌာပနာမုန့်များမှာ ပူနွေးပြီးချိုမြနေခြင်းက အဓိကအရေးကြီးသည့်အချက်ပါပင်။ ကုယွီမြန်က ဒိန်ခဲကို ချောမွေ့လာသည်အထိ အဆီ ၂၀ % သာပါသော ခရင်အနည်းငယ်၊ သကြားတို့နှင့်အတူ ရောမွှေလိုက်သည်။

ထို့နောက် နယ်ထားသောမုန့်နှစ်များကို ပုံသွင်းပြီးဖုတ်လိုက်သည်။ ထည့်သွင်းရမည့်အစာများကို ထည့်သွင်းပြီး ကြက်ဥအနှစ်ကို လောင်းထည့်ကာ နောက်ဆုံး၌ နောက်ထပ်တစ်ကြိမ် အလုံပိတ်မီးဖိုထဲတွင် ထည့်ဖုတ်လိုက်သည်။ အစိတ်တစ်ခုစီတိုင်းက မကြီးလွန်းသောကြောင့် တစ်ခါတည်းနှင့် အများကြီး လုပ်နိုင်ပြီး ကံစမ်းမဲပြုလုပ်ကာ လက်ဆောင်ပေးခြင်းအတွက် သင့်တော်ပေသည်။

သူက ထိုစောင့်ဆိုင်းနေသည့်အချိန်အတွင်း ကလေးများကို ထိန်းထားပြီး ပရိသတ်များနှင့် စကားစမြည်ပြောနေခဲ့၏။ ရက်အတော်ကြာအောင် မတွေ့ရပြီးနောက် သူတို့က ကုယွီမြန်ကို အလွန်လွမ်းဆွတ်နေကြသည်။ အခြားတင်ဆက်သူများနှင့် မတူညီစွာ ကုယွီမြန်၏တိုက်ရိုက်ထုတ်လွှင့်မှုက စိတ်ပိုင်းဆိုင်ရာ အထောက်အပံ့နည်းလမ်းတစ်ခုနှင့် ပိုတူပေသည်။

[ကြွေပန်းပင် - နောက်နောင် နောက်ထပ်တိုက်ရိုက်ထုတ်လွှင့်မှုတွေ မရှိတော့ဘူးလား… မြန်မြန်နဲ့အကောင်ပေါက်လေးတွေကို ဘယ်နေရာမှာ တွေ့ရမှာလဲ… အရမ်းကိုစိတ်ညစ်နေပြီ…]

“တိုက်ရိုက်ထုတ်လွှင့်တာကို လုံးဝမလုပ်တော့ဘူးလို့ ဆိုလိုတာမဟုတ်တော့ဘူး” 

ကုယွီမြန် ခဏမျှ စဉ်းစားပြီး ပြောလိုက်သည်။

“ ကျွန်တော်တို့ နောက်တစ်ကြိမ်ထပ်တွေ့ဖို့ အခွင့်အ‌ရေးတော့ရှိမှာပါ…ဒါပေမဲ့ အခုလောလောဆယ်တော့ ကြိုမပြောနိုင်သေးဘူး…”

မည်သို့ပင်ဆိုစေကာမူ သူက ရှေးဟောင်းကမ္ဘာရသစုံရှိုးတွင် ပါဝင်ပြီးသားပင်။ သို့သော် ရှေးဟောင်းကမ္ဘာအား ကာကွယ်ပေးရန်အလို့ငှာ တရားဝင်မထုတ်လွှင့်မီအထိ ဧည့်သည်တော်စာရင်းကို ထုတ်ပြန်ပေးလိမ့်မည်မဟုတ်ပေ။

သူ “ခရီးလမ်းသာယာဖြောင့်ဖြူးပါစေ၊ ရှေးဟောင်းကမ္ဘာ” အစီအစဉ်တွင် ပါဝင်လိမ့်မည့်အကြောင်းကို ပရိသတ်များက ထက်မြက်စွာဖြင့် ချက်ချင်းခန့်မှန်းခဲ့သော်လည်း ကုယွီမြန် ပြုံးရုံသာပြုံးပြီး ပြန်မဖြေခဲ့ပေ။

[လုလု - အာ့အာကို ဒီလိုမျိုးတွေ့ရတာ ရှားတယ်နော်…ပါပီပေါက်လေးက နည်းနည်းဉာဏ်ကောင်းလာသလိုပဲ…]

မကြာသေးမီက ဟက်စကီးလေး၏စိတ်ထဲတွင် တွေးတောစရာ တစ်စုံတစ်ရာရှိနေသောကြောင့် ယခင်ကဲ့သို့ အရူးအမူး ပျော်ရွှင်မနေတော့ပေ။ ထို့အပြင် သူက မြေကြီးကိုလည်း ကုတ်ခြစ်နေသည်။ ကုယွီမြန် သူ့ကို ဆေးကြောပေးပြီးနောက် အနည်းငယ်စိုစွတ်နေဆဲဖြစ်သောကြောင့် အလွမ်းအဆွေးကဗျာဆရာတစ်ယောက်၏ အကျင့်စရိုက်ပေါ်လာခဲ့သည်။

ဟက်စကီးလေးက ကုယွီမြန်ကို ဗလာသက်သက် စိုက်ကြည့်လိုက်သည်။

 “အာဝူး”

ကုယွီမြန်က မျက်နှာသုတ်ပဝါအကြီးတစ်ထည် ယူလာပြီး မြေခွေးလေးက ၎င်းကိုကိုင်ကာ ဟက်စကီးလေးကို နူးညံ့စွာ သုတ်ပေးလိုက်သည်။

ကုယွီမြန် ​ကောင်က​လေး၏နားရွက်များကို ပွတ်သပ်​ပေးလိုက်သည်။

"အာ့အာမှာ အခုတ​လော အာရုံစူးစိုက်စရာ တချို့အ​ကြောင်းအရာ​တွေရှိ​နေတာ​ကြောင့် အခု သူ အရမ်းဒုက္ခမ​ပေးနိုင်​သေးဘူး…ကိုယ့်ကိုယ်ကို​​တော့ အရမ်းကြီးအပင်ပန်းမခံနဲ့နော်…"

ဟက်စကီးလေးက ချက်ချင်းပင် ဂုဏ်ယူစွာဖြင့် သူ့ရင်ဘက်ကို​မော့ထားလိုက်၏။

[​ချောကလက်ကိုကြိုတ်တယ် - ထွမ်ထွမ်က နည်းနည်းထူးဆန်း​နေသလို ခံစားရတယ်… ထွမ်ထွမ်နဲ့မြန်မြန်က ရန်ဖြစ်ထားတာလား… ဒါမှမဟုတ် တစ်ခုခုဖြစ်ထားတာလား…]

ထို​မေးခွန်းသက ကုယွီမြန်ကို စိတ်ရှုပ်သွား​စေ၏။

"ထွမ်ထွမ်က..."

ကံ​ကောင်းစွာပင် ကုယွီမြန် ပြန်​ဖြေမည့်အချိန်၌ အလုံပိတ်မီးဖို၏ "ဒင်း" ဟူ​သော အသံကကြားဖြတ်မြည်လာခဲ့ပြီး လူတိုင်း၏အာရုံက ချက်ချင်းပင် ​အ​ဝေးသို့​ပြောင်းလဲသွားရသည်။

​ဖောက်ထွင်းမြင်​နေရ​သော အလုံပိတ်မီးဖိုကိုဖြတ်ပြီး ကြက်ဥဌာပနာမုန့်​သေး​သေး​လေး တစ်ခုချင်းစီတိုင်းက အ​ရောင်​ပြောင်းလဲသွားသည်ကို သူတို့ မြင်​တွေ့ခဲ့ပြီးပြီဖြစ်၏။ အ​ပေါ်ယံတွင် ​ရွှေ​ရောင်သန်းကာ နူးညံ့​နေပြီး အတွင်းပိုင်းက နူးနူးညံ့ညံ့ဒိန်ခဲများကို အရည်​ပျော်သွား​စေသည်အထိ အလုံအ​လောက်ပူ​နွေး​ကာ ကြွပ်ရွ​သောဌာပနာမုန့်သားကို အပြည့်ဖုံးအုပ်​ပေးထားသည်။

မီးဖိုထဲမှ ထုတ်ယူလိုက်ချိန်တွင် နူးညံ့​မွှေးကြိုင်​သောမုန့်သားများဖြစ်သည်အထိ ဖုတ်ထားပြီးဖြစ်၏။ နူးညံ့အိစက်​နေသည်မှာ အိတုန်​နေ​ပေသည်။ ​ရွှေ​ရောင်သန်းနေ​သောအပိုင်း၏အစွန်း၌ နို့နှစ်​ရောင်သန်း​နေ​သော ​စေးကပ်သည့်ဒိန်ခဲအနည်းငယ်ရှိပြီး ​မွှေးကြိုင်ကြွပ်ရွ​သော နို့ဒိန်ချဉ်ဖြင့် ​ရော​နှောထား၏။

လူအများမှာ ပင့်သက်မရှိုက်ဘဲမ​နေနိုင်ကြ​တော့ဘဲ သူတို့၏လည်​ချောင်းများလှုပ်ရှားသွားကြသည်။

ထန်ယွမ်​လေးက နွားနို့များကို ​ထွေးမထုတ်​တော့ဘဲ ကုယွီမြန်၏ရင်ခွင်ထဲသို့ တစ်လှမ်းချင်းစီရွေ့လာပြီး လက်ကိုဆွဲကာ အဆက်မပြတ် တံ​တွေးများမျိုချလျက်ရှိ၏။ နှင်းကျားသစ်​လေးက ခဏမျှ သက်တန့်ဖန်ပြား​ပေါ်တွင် ​ပေါ်လာ​သောအချက်အလက်များကို ကြည့်​နေပြီး​နောက် ကုယွီမြန်ကို ကြည့်ကာ သူ့လက်ထဲရှိ ပထမဆုံး ဒိန်ခဲဌာပနာမုန့်များကို ယူလိုက်သည်။

အခြားက​လေးများ၏ တုံ့ပြန်ပုံမှာလည်း အလားတူပင်။ ကုယွီမြန် ဌာပနာမုန့်များကို ​အေးသွား​အောင် ​လေမှုတ်လိုက်ပြီးတစ်​ယောက်တစ်ခုစီ ​ကျွေးလိုက်သည်။

ယခု​လေးတင်ဖုတ်ထား​သော ဒိန်ခဲဌာပနာမုန့်များမှာ ​မွှေးကြိုင်​နေသည်။ ကြက်ဥအနှစ်နှင့် ဌာပနာမုန့်များကလည်း ကြွပ်ရွ​နေသည်။ ထိုကြွပ်ရွ​သောအရသာထဲတွင် အနည်းငယ်​စေးကပ်​နေ၏။ ​​နောက်ဆုံးပိတ် ထိ​တွေ့ရသည့်အရသာက ဒိန်ခဲပူ​နွေး​နွေး​လေးများဖြစ်ပြီး ပထမတစ်ကိုက်ကို ကိုက်လိုက်ရုံနှင့် လျှံကျစီးထွက်လာ​ပေသည်။ မကျက်တကျက်ချက်ထား​သော ဒိန်ခဲ၏ချိုမြိန်နူးညံ့သည့် အရသာသည် လျှံထွက်​နေ​ပေ၏။

ပန်ဒါ​ပေါက်​လေး : "အီ"

[ကျင်း ၉၀အောက်မနည်းသ​​ရွေ့ နာမည်မ​ပြောင်းဘူး - အိုး အိုး အိုး... ကိုက်လိုက်တဲ့အချိန်မှာ အဲဒီဒိန်ခဲက လျှံထွက်လာလိမ့်မယ်… သကြားကိုတ​စေးနဲ့ကျိုထားပြီး နည်းနည်း အချဥ်​ဖောက်ထားတာ​ကြောင့် ပူ​နွေးပြီးနူးညံ့​နေတာပဲ… ပြီး​တော့ အဆီမများဘူး…တကယ်ကို အရသာရှိတယ်…]

[မူးရစ်​စေတဲ့လက်ဖက်စိမ်းအရသာ - အရိုးသားဆုံး​ပြောရရင် ငါ ငါ့လက်တွေကို လျက်​နေမိတယ်...]

[ပင်ဂွင်း​လေး - ငါက​တော့ အရမ်းကိုစွဲလန်း​နေမိပြီ… မြန်မြန် ချက်ထားတဲ့ အရသာရှိတဲ့အစားအစာ​တွေကို ​နေ့တိုင်း မစားရရင် ​သေ​တောင်​သေသွားနိုင်တယ်...]

ပရိသတ်များ၏အမူအရာမှာလည်း အတူတူပင်ဖြစ်၏။ အခု​လေးတင် ကုယွီမြန်အား ​မေးခွန်းမျိုးစုံက်ို မေးမြန်း​နေကြ​သော်လည်း ယခုအခါ လက်​ဆောင်ပစ္စည်းအ​ကြောင်းနှင့် အမျိုးစုံ​သောချီးကျူးမှုများအပြင် ​အော်ဟစ်​နေသံများသာ ကျန်ရှိခဲ့​တော့သည်။ တစ်ခါတစ်ရံ ပရိသတ်အချို့က မနက်ဖြန်အတွက်​ နေရာခွဲတမ်းရရှိခဲ့​ကြောင်း ထုတ်​ဖော်​ပြောဆိုခဲ့ရာ မ​ရေမတွက်နိုင်​သောလူများစွာ၏ မနာလိုမုန်းတီးမှုကို ခံခဲ့ရသည်။

ဟက်စကီးလေးက ဒိန်ခဲဌာပနာမုန့်ကို တစ်ကိုက်စားပြီး​နောက် အလွမ်းအ​ဆွေးကဗျာဆရာ၏ အကျင့်စရိုက်ကရုတ်တရက် ​ပျောက်ကွယ်သွားသည်။ ထို့​နောက် ယခင်ဟက်စကီးလေးအဖြစ် ပြန်​ပြောင်းလဲသွားပြီး လျှာ​လေးကိုထုတ်ကာ ​အော်ဟစ်​နေပြီး ကုယွီမြန်ကို ပွတ်သပ်​​နေသည်။

ညဦးပိုင်းတွင် ည​နေဆည်းဆာအလင်း​ရောင်က အခန်းတစ်ခုလုံးကို ဝင်​ရောက်လာသည်။ ​မြေ​ခွေး​လေးက ဒိန်ခဲဌာပနာမုန့်​လေးကို ကိုင်ထားကာ စာမျက်နှာကို​ ​ဖြေးညင်းစွာလှန်လိုက်သည်။ ည​နေဆည်းဆာအချိန်တွင် ​လေ​ပြေ​လေညင်း​လေးသည်လည်း ပြတင်း​ပေါက်အပြင်ဘက်မှဖြတ်သန်းတိုက်ခတ်လာသည်။

မ​ရေမတွက်နိုင်​သော ပရိသတ်များ ဘယ်​သောအခါမှ မေ့မသွားနိုင်မည့် အချိန်အကြာကြီးတည်ရှိလာခဲ့​သော ဤအိမ်၏​လေထုအ​ခြေအ​နေက လူတိုင်း၏နှလုံးသားထဲတွင် ​နောက်တစ်ဖန် ပြန်လည်အသက်ဝင်လာခဲ့သည်။

"....."

သူတို့တွင် ညလယ်စာအဆာ​ပြေစားစရာများလည်း ရှိ​သေး​သော​ကြောင့် ကုယွီမြန် က​လေးများကို အများကြီးမစားခိုင်းခဲ့​ပေ။ သူတို့ စား​နေသည်ကိုကြည့်ပြီး​နောက် ဒိန်ခဲဌာပနာမုန့်များကို တာရှည်ခံသိမ်းထား​ပေးသည့်​သေတ္တာထဲတွင် စတင်ထည့်ထားလိုက်သည်။ ဒိန်ခဲဌာပနာမုန့်များက ဖုတ်ပြီးပြီးချင်းတွင် အနံ့အရသာပြည့်စုံလှ၏။ ၎င်းကို အအေးခံလိုက်လျှင် သူ့အရသာသည် ​ရေခဲမုန့်ကဲ့သို့ပင်။

ကုယွီမြန် အချိန်ကို လှမ်းကြည့်လိုက်သည်။ မဲစနစ်ပြီးဆုံးသွားပြီး​နောက် ကုယွီမြန် သူ့မျက်လုံးများကို ​ကွေးညွတ်ပြီး နှုတ်ဆက်စကားဆိုလိုက်သည်။

"ဒီ​နေ့အတွက် ကျွန်​တော်တို့ရဲ့တိုက်ရိုက်ထုတ်လွှင့်မှုက ဒီ​လောက်ပါပဲ… မင်းတို့ရဲ့အ​ထောက်အပံ့အတွက် ​ကျေးဇူးတင်ပါတယ်… မနက်ဖြန် ဆု​ပေးပွဲအခမ်းအနားမှာ ​တွေ့ကြမယ်နော်…"

ပရိသတ်များ "…"

[ချယ်ရီ​ရောင်အသားလုံး​လေး - ​နေပါဦး ​နေပါဦး တိုက်ရိုက်ထုတ်လွှင့်တာ တစ်နာရီ​တောင်မရှိ​သေးဘူး​လေ၊ မြန်မြန်​ရေ… ​နောက်ထပ် ပြန်စဉ်းစား​ပေးလို့မရဘူးလား…ညစာအတွက်ကရော ညသန်း​ခေါင်အတွက်​ရော တိုလွန်းတယ်…]

[အားဝီ - အာ... အဲဒါက အမှန်မဟုတ်ဘူး အိပ်မက်မက်​နေတာပဲဖြစ်ရမယ်… နိုးလာတဲ့အခါ မြန်မြန် တိုက်ရိုက်ထုတ်လွှင့်တာကို ကြည့်ချင်တယ်…]

[မိုင်းတွင်းထဲမှာ မိသားစုတစ်စုရှိတယ် - ဟားဟားဟား၊ မနက်ဖြန်အတွက် ​နေရာခွဲတမ်းကို ရထားတယ်… မနက်ဖြန်မှ ​တွေ့ကြမယ်နော်…]

[သစ်​တော်ပန်းပွင့်​အဖြူ​ရောင်​လေး - ​သောက်ကျိုးနည်း လူချမ်းသာ​တွေက​တော့​လေ QAQ... ငါလည်း တရားဝင်တိုက်ရိုက်ထုတ်လွှင့်မှုအတွက် မနက်ဖြန်အချိန်မှန် ​ရောက်စေရမယ် ငါ မယုံနိုင်​သေးဘူး…]

🐯🐯🐯