MM Story Teller

Chapter 210

Viewers 32k

🌍Chapter 210

"အင်မော်တယ်ဂျယ်လီငါးတွေက အရွယ်ရောက်ပြီးသားခန္ဓာကိုယ်ကနေ သန္ဓေသားအဖြစ်ပြန်ပြောင်းနိုင်တဲ့ ကမ္ဘာပေါ်မှာတစ်ခုတည်းသော မျိုးစိတ်ပဲ..."

ထန်မော့မှာ ထိုစာကြောင်းကိုမြင်လျှင် အလွန်ထိတ်လန့်အံ့သြသွားခဲ့သည်။

၄င်းမှာ ထိုမျိုးစိတ်သည် ပြန်လည်ရှင်သန်ထမြောက်နိုင်သည်ဟု ဆိုလိုခြင်းပင်။ ထန်မော့ရင်ထဲမှ တစ်ခုခုကိုခန့်မှန်းမိလျက် တဖန်ဖတ်ကြည့်လိုက်ပြန်သည်။

မှန်၏။ ဂျယ်လီငါးများမှာ အမှန်တကယ် အင်မော်တယ်များဖြစ်လေသည်။

အရွယ်ရောက်လာပြီးနောက် အင်မော်တယ် ဂျယ်လီငါးများမှ မျိုးပွားပြီးသည်နှင့် သန္ဓေသားအဖြစ်ပြန်လည်ပြောင်းလဲနိုင်သည်။ ထိုပြောင်းလဲခြင်းတွင် ကန့်သတ်ချက်ရော ပြောင်းလဲနိုင်သာ အကြိမ်အရေအတွက်ရော အတိအကျမရှိချေ။ အချုပ်ဆိုရသော် ထိုဂျယ်လီငါးများမှာ ပြင်ပ ပရောဂမရှိသ၍ သန္ဓေသားအဖြစ်ပြန်လည်ကူးပြောင်းကာ အဆုံးမရှိ ပြန်လည်မွေးဖွားနိုင်ကြလေသည်။

ထန်မော့ဗလာဖြစ်နေသော မှန်ကန်ကိုကြည့်လိုက်မိသည်။ ဤအထဲတွင် ဂျယ်လီငါးရှိခဲ့သော်လည်း ကမ္ဘာကြီးအွန်လိုင်းပေါ်တက်လာပြီးနောက် ပျောက်ကွယ်သွားခဲ့သည်။ မပျောက်ကွယ်သွားခင်တွင် ၄င်းမှာ သေဆုံးပြီးဖြစ်သည်။

၃ယောက်လုံးမှာ စာတမ်းကိုဖတ်၍ပြီးစီးသွားကြသည်။ အမေရိကန်အခြေစိုက် အနက်ရောင်မျှော်စင်သုတေသနစင်တာမှ ပစိဖိတ်သမုဒ္ဒရာကိုဖြတ်၍ တရုတ်ပြည်သို့ ဤအကြောင်းကိုဆွေးနွေးရန် လာရခြင်းမှာ ထိုအင်မော်တယ်ဂျယ်လီငါးများသည် လုံခြုံ၍ ဘေးကင်းသော ပတ်၀န်းကျင်အတွင်း၌ အကြောင်းပြချက်မရှိ သေဆုံးသွား၍ဖြစ်လေသည်။

စမ်းသပ်နမူနာ ၂၀၁ကောင်တွင် ၁၄၁ကောင်မှာ သေဆုံးသွားခြင်းဖြစ်သည်။

ထန်မော့တွေးလိုက်သည်။

"စာတမ်းမှာပြောထားတာက ဒီဂျယ်လီငါးတွေက ပြင်ပခြိမ်းခြောက်မှု အန္တရာယ်ကြောင့်မဟုတ်ပဲ ပြန်လည်မွေးဖွားတဲ့အဆင့်မှာ သေသွားတာတဲ့...လိင်မဲ့မျိုးပွားတဲ့ ဖြစ်စဥ်ပြီးသွားတိုင်း သူတို့က သန္ဓေသားပြန်ဖြစ်သွားရမှာ ဒါပေမယ့် နို၀င်ဘာ ၁၅မှာ ဒီဂျယ်လီငါးတွေ လိင်မဲ့မျိုးပွားခဲ့ပေမယ့် သန္ဓေသားကိုယ်ကိုပြန်မရပဲ တိုက်ရိုက်သေသွားကြတာ"

ဖူ၀မ်ရှန်းကဆိုလာသည်။

"နို၀င်ဘာ၁၅က အနက်ရောင်မျှော်စင် ကြေညာချက် စထွက်လာတဲ့နေ့ပဲ...၃ရက်နေတော့ ကမ္ဘာကြီးအွန်လိုင်းပေါ်တက်သွားတယ်...ဒီဂျယ်လီငါးတွေသေသွားတာက အနက်ရောင်မျှော်စင်နဲ့ဆိုင်မယ်ထင်တယ်..ဒီဂျယ်လီငါးတွေက လူတွေထက် သဘာ၀ပတ်၀န်းကျင် အပြောင်းအလဲကို အာရုံခံနိုင်တယ်မလား...သူတို့မသေခင်တစ်ခုခုအပြောင်းအလဲကို သတိထားမိခဲ့လောက်တယ်"

ထိုအထဲတွင်အမှန်တရားတချို့တော့ ပါရှိလေသည်။

နို၀င်ဘာ၁၅ရက်နေ့မှာ ထူးခြားကာ အနက်ရောင်မျှော်စင်နှင့် မဆက်စပ်မိရန်မဖြစ်နိုင်ချေ။ ဤဂျယ်လီငါးများကအလွန်အထိမခံသော သတ္တ၀ါများဖြစ်ကာ ၄င်းတို့မသေခင် အပြောင်းအလဲတစ်ခုခုကို တွေ့ကြုံခဲ့ရခြင်းဖြစ်နိုင်သည်။ သို့သော်၄င်းမှာ အဓိပ္ပါယ်မရှိသေးချေ။

"ဂျယ်လီငါး၁၄၁ကောင်က လိင်မဲ့မျိုးပွားပြီး သူတို့ရဲ့ သန္ဓေသားကိုယ်ကို ပြန်ရရမှာ...သူတို့ပြန်မရပဲ သေသွားကြတယ်..."

ထန်မော့၏မျက်ခုံးများစုကျုံ့လျက် ဦးနှောက်မှာလည်း လျှင်မြန်စွာ အလုပ်လုပ်နေခဲ့သည်။ အတော်ကြာပြီးနောက် ဖူ၀မ်သော်ကို ကြည့်လျက် မေးလိုက်သည်။

"ကိုယ့်ကိုယ်ကို သတ်သေတာလား"

ဖူ၀မ်သော်၏ မတူညီသော တွေးခေါ်ပုံက ထန်မော့ထက် အမြဲသာခဲ့သည်။ သို့သော်ဤတစ်ကြိမ်တွင် သူထန်မော့၏ စကားကို ကြားလိုက်ရချိန် အံ့အားသင့်သွားခဲ့သည်။

ဖူ၀မ်သော် ခတ္တမျှအချိန်ယူလျက်တွေးလိုက်ရသည်။

"ပြင်ပပရောဂကြောင့်မဟုတ်ဘူးဆိုရင်တော့ ကိုယ့်ကိုယ်ကို သတ်သေတာက အဖြစ်နိုင်ဆုံးပဲ"

ထန်မော့၏ ခေါင်းထဲ အလင်းတစ်ချက် လက်သွားခဲ့သည်။

သူသည် အင်မော်တယ်ဂျယ်လီငါးများနှင့် နည်းတူ သတ္ဆ၀ါတစ်မျိုးကို မြင်ဖူးပုံပင်။ ၄င်းမှာ ဂျယ်လီငါးမဟုတ်သော်လည်း ဆင်တူလေသည်။ သူအတော်ကြာပြန်တွေးနေပြီးမှ မှတ်ဥာဏ်တချို့ကို ပြန်လည်ခေါ်ယူနိုင်ခဲ့သည်။

"ကျွန်တော် ပုဇွန်ထုတ်တစ်မျိုးကိုတွေ့ဖူးတယ်...သူက လိင်နဲ့ရော လိင်မဲ့ရောမျိုးပွားနိုင်တယ်..ပြောချင်တာက သူ့ရဲ့သားလောင်းတွေကလည်း သူနဲ့မျိုးရိုးဗီဇတစ်ပုံစံတည်းပဲ ပြီးတော့ ဒီဂျယ်လီငါးလိုပဲ မသေနိုင်ပဲ ထပ်ခါထပ်ခါပြန်လည်မွေးဖွားနိုင်တယ်"

ဖူ၀မ်သော်မှာ ထန်မော့ဆိုလိုသည်ကို ချက်ချင်းနားလည်သွားခဲ့သည်။

"မင်းပြောချင်တာက လိင်မဲ့မျိုးပွားနိုင်တယ် ..သူတို့နဲ့ပုံစံတူ မျိုးရိုးဗီဇတစ်မျိုးတည်းရှိတဲ့ သားလောင်းတွေကို မွေးနိုင်တယ်...geneတွေမပြောင်းလဲဘူး"

ထန်မော့ကနောက်ဆုံးစကားလုံးကိုထောက်ပြလိုက်သည်။

"Geneကဘယ်တော့မှ မပြောင်းလဲဘူး ပြောချင်တာက သူ့မှာ ဘာဆင့်ကဲပြောင်းလဲမှုမှမရှိဘူး"

ဖူ၀မ်သော်ကလည်း အဓိကအရေးကြီးသည်က်ို ဖမ်းဆုပ်လာခဲ့သည်။

"ဆင့်ကဲပြောင်းလဲခြင်း"

မှန်၏...၄င်းမှာဆင့်ကဲပြောင်းလဲခြင်းဖြစ်သည်။

ထန်မော့သည် စာတမ်းဖိုင်လ်၏ ၁၀မျက်နှာမြောက်ကို ပြန်လှန်လိုက်သည်။ အင်မော်တယ်ဂျယ်လီငါး၏ သုတေသနတွင် သုတေသီများက သေဆုံးရခြင်းဖြစ်နိုင်ချေ ၁၁မျိုးကို ပေးထားခဲ့သည်။ ထိုထဲမှ ၃ခုမှာ အဖြစ်နိုင်ဆုံးပင်။ ပထမတစ်မျိုးမှာ ပြင်ပ ပရောဂကြောင့်ဖြစ်သည်။ သုတေသီများမှာ ထိုဂျယ်လီငါးများမှာ လုံး၀လုံခြုံဘေးကင်းသော ဧရိယာတွင် ရှိနေခဲ့သည်ဟုဆိုသော်လည်း မျိုးပွားနေစဥ်အတွင်း တစ်ခုခုသက်ရောက်မှုရှိခဲ့ မရှိခဲ့သည်ကို အပြည့်အ၀အာမ မခံနိုင်ချေ။

ဒုတိယတစ်မျိုးမှာ ထိုဂျယ်လီငါးများတွင် လူသားများသတိမထားမိခဲ့သော သေဆုံးပုံသေဆုံးနည်းမျိုးရှိနေခဲ့ခြင်းဖြစ်သည်။

တတိယဖြစ်နိုင်ချေမှာတော့ မျိုးရိုးဗီဇဆင့်ကဲပြောင်းလဲခြင်းပင်ဖြစ်လေသည်။

လိင်မဲ့မျိုးပွားခြင်းမှာ အဆင့်နိမ့်မျိုးပွားခြင်းမျိုးဖြစ်သည်။ ပြောင်းလဲမှုမရှိပဲ တည်ငြိမ်သောgeneများက ထိုလိင်မဲ့မျိုးစိတ်များကို မျိုးပွားရန်ခက်ခဲစေသည်။ လိင်ဖြင့်မျိုးပွားခြင်းမှာ ဆင့်ကဲပြောင်းလဲခြင်း၏ အဓိကလိုအပ်ချက်ပင်ဖြစ်လေသည်။

အမေရိကန် သုတေသီများမှာ ဤဂျယ်လီငါးများ ညတွင်းချင်း ဆင့်ကဲပြောင်းလဲသွားလိမ့်မည်ဟု မယုံကြည်ခဲ့ကြချေ။ ၄င်းမှာ ဇီ၀သိပ္ပံသီအိုရီကို အလွန်အမင်းဆန့်ကျင်နေခဲ့သည်။ သူတို့မသိခဲ့သည်က ၃ရက်ကြာပြီးနောက် ကမ္ဘာပေါ်မှ လူတိုင်း အနက်ရောင်မျှော်စင်ဂိမ်းထဲ ဆွဲသွင်းခံလိုက်ရမည်ကိုပင်။ ထိုအနက်ရောင်မျှော်စင်နှင့် ယှဥ်ပါက ထိုသတ္တ၀ါများ ရုတ်ချည်း ဆင့်ကဲပြောင်းလဲသွားခြင်းမှာ မထူးခြားလှ။

"သူတို့ကဒီဖြစ်ရပ်ကို အနက်ရောင်မျှော်စင်နဲ့ ပတ်သက်နေလိမ့်မယ်လို့တော့ထင်ထားပေမယ့် အနက်ရောင်မျှော်စင်က အဓိကလက်သည်ဖြစ်မယ်လို့တော့ ထင်ခဲ့မှာမဟုတ်ဘူး"

အမေရိကန်သုတေသီများမှာ သမုဒ္ဒရာကို ဖြတ်၍လာခဲ့ပါသော်လည်း လိုချင်သည့်အဖြေကိုမူ ထုတ်မသွားနိုင်ခဲ့ချေ။ သို့တိုင်အောင် အရာအားလုံးဖြစ်ပျက်သွားပြီးနောက် ၅လအကြာတွင် ထန်မော့နှင့် ဖူ၀မ်သော်အတွက် သဲလွန်စအချို့ ချန်ထားပေးနိုင်ဆဲဖြစ်သည်။

အနက်ရောင်မျှော်စင်၏ လုပ်ဆောင်မှုအားလုံးမှာ လူသားမျိုးနွယ် ဆင့်ကဲပြောင်းလဲခြင်းအတွက် ဖြစ်နေခဲ့သည်။

ဤယူဆချက်မှာ အမှန်လား မှားယွင်းနေသည်လား မည်သူကမျှ အတည်မပြုပေးနိုင်ချေ။ ဤသည်အိုရီကိုအတည်ပြုရန်အတွက်လည်း ကမ္ဘာပေါ်တွင် အင်မော်တယ် ဂျယ်လီငါးများ မရှိတော့ချေ။ ထန်မော့၏နှလုံးခုန်သံက တဖြည်းဖြည်းမြန်လာခဲ့သည်။ သူမျက်လုံးများကိုမှိတ်လျက် အသက်ကို ပြင်းပြင်းရှူကာ စိတ်လျှော့လိုက်မိသည်။

အဆုံးမှာတော့ ၄င်းမှာခန့်မှန်းချက်တစ်ခုသာဖြစ်သည်။

ထန်မော့ စာတမ်းကိုအစအဆုံးတခါပြန်ဖတ်လျက် အရာအားလုံးကို မှတ်သားထားလိုက်သည်။ ပိုသေချာစေရန် ဖူ၀မ်သော်နှင့် ဖူ၀မ်ရှန်းမှာလည်း တစ်ခေါက်စီထပ်ဖတ်လိုက်လေသည်။ ထို့နောက်သူသည် ထိုစာတမ်းဖိုင်လ်နှင့်မှန်ကန်ကို အတူတကွမီးရှို့ဖျက်ဆီးလျက် လက်စဖျောက်လိုက်တော့သည်။

၄င်းတို့အားလုံးကို လုပ်ကိုင်ပြီးနောက် ထန်မော့ မော့ကြည့်လိုက်လျှင် ဖူ၀မ်သော်မှာ သူ့အားကြည့်နေသည်ကို တွေ့လိုက်ရလေသည်။

လူ၂ဦး တစ်ဦးကိုတစ်ဦး တိတ်တဆိတ်စိုက်ကြည့်နေခဲ့ကြသည်။

အတော်ကြာပြီးနောက် ထန်မော့အပြုံးဖြင့်မေးလိုက်သည်။

"သိပ်တော့မထူးဆန်းဘူး...အကယ်၍ အနက်ရောင်မျှော်စင်ကသာ ဆင့်ကဲပြောင်းလဲခြင်းအတွက် တကယ်ရည်ရွယ်တာဆိုရင် လူတွေရဲ့ စွမ်းရည်ကိုနှိုးပေးဖို့ ပျက်ကပ်တစ်ခုကိုဖန်တီးမှာပဲ...ဒါပေမယ့်ဘာလို့ လူသားတွေကိုမှလဲ..."

ကျန်ရှိသော အင်မော်တယ်ဂျယ်လီငါးများမှာ ဆင့်ကဲပြောင်းလဲပြီး ၃ရက်အကြာတွင်ပျောက်ဆုံးသွားခဲ့သည်။ ကမ္ဘာပေါ်တွင် နောက်ဆုံးကျန်ရှိသော သက်ရှိမှာ လူသားများသာဖြစ်သည်။

တိတ်ဆိတ်နေသော စာအုပ်ဆိုင်အတွင်း ဖူ၀မ်သော်က မေးလိုက်သည်။

"ကမ္ဘာပေါ်မှာ ဥာဏ်အကောင်းဆုံး မျိုးစိတ်ကဘာလဲ"

ထန်မော့မှာ သူဤမေးခွန်းကိုအဘယ်ကြောင့်မေးလာသည်ကို နားမလည်သော်လည်း ရုပ်ရှင်ကားတစ်ခုကိုတွေးမိစေသည်။ သူသည်ရှားရှားပါးပါး ဟာသပြောဓါတ်ကလေးကလည်း ထနေပြီး မျက်နှာတည်နှင့်ပင် ဆိုလိုက်သည်။

"ကြွက်တစ်ကောင်"

ဖူ၀မ်သော်"..."

ဖူ၀မ်သော်မှာ ထိုဇာတ်ကားကို ကြည့်ဖူးပုံပင်။

"အနက်ရောင်မျှော်စင်ရဲ့ရွေးချယ်မှုလေ"

မှန်၏။ အရာအားလုံးမှာ အနက်ရောင်မျှော်စင်၏ရွေးချယ်မှုသာဖြစ်သည်။

ထန်မော့သည် ၄င်းက အဘယ်ကြောင့် လူသားများကိုရွေးချယ်ခဲ့သည်နှင့် သူ၏ရည်ရွယ်ချက်မှာ လူသားမျိုးနွယ်ဆင့်ကဲ့ပြောင်းလဲစေလို၍လားဆိုသည်ကို မသိချေ။ သို့သော် သေချာသည်က ဂိမ်းမှာ ဤအတိုင်းဆက်သွား၍ မျှော်စင်၇ထပ်မြောက်ကို ကျော်လွန်ပြီးချိန်တွင်လူသားမျိုးနွယ် အောင်မြင်စွာဆင့်ကဲပြောင်းလဲတိုးတက်မည်ဖြစ်သည်။ လက်ရှိအတုံးဆုံးနှင့် အားအနည်းဆုံးလူတစ်ယောက်မှာ လွန်ခဲ့သော၆လခန့်က သူတို့ကိုယ်တိုင်ထက် ပို၍ သန်မာ ထက်မြက်သည်မှာ ပြောနေစရာပင် မလိုချေ။

ဓါတ်ခွဲခန်းမှရရှိလာသော စာတမ်းနှင့် နမူနာများကို ဖျက်ဆီးပြီးနောက် ကောင်းကင်ကြီးမှာ မှောင်မည်းလာခဲ့ပြီဖြစ်သည်။ လူ၃ယောက်မှာ ရှင်းဟွာစာအုပ်ဆိုင်တွင် အနားယူရန်ဆုံးဖြတ်ခဲ့ကြသည်။

ရုတ်တရက် ဖူ၀မ်သော်၏ အမူအယာမှာ အေးစက်သွားခဲ့သည်။ သူ ရုတ်တရက်ထရပ်ကာ စာအုပ်ဆိုင်ကနေပြေးထွက်သွားခဲ့သည်။ ထန်မော့ ထိတ်လန့်သွားလျက် ထီးကလေး၏ လက်ကိုင်ကို ဆုပ်ထားလိုက်သည်။ ၁၀စက္ကန့်မျှစောင့်ဆိုင်းခဲ့သော်လည်း တဖက်လူမှာ ပြန်မလာခဲ့ချေ။

ဖူ၀မ်ရှန်းကဆိုသည်။

"Geကတစ်ခုခုမူမမှန်တာကိုတွေ့လို့ဖြစ်မယ်..အန္တရာယ်တော့မရှိလောက်ဘူး"

ထန်မော့ ကောင်ကလေးကိုကြည့်လိုက်သည်။ သတိအပြည့်ရှိသော ဖူ၀မ်သော်က အန္တရာယ်ထဲသို့ တိုး၀င်သွားမည်မဟုတ်သည်မှာ အသေအချာပင်။ သူသည်အကြောင်းတစ်ခုခုကြောင့်ပြေးထွက်သွားခြင်းဖြစ်သော်လည်း ၄င်းမှာ ရန်သူ၏တိုက်ခိုက်မှုမဖြစ်နိုင်ချေ။ သို့မဟုတ်ပါက သူထန်မော့အား ကျိန်းသေပေါက် အကျိုးအကြောင်းပြောခဲ့မှာဖြစ်သည်။

ထန်မော့၄င်းကိုတွေးလျက် ဖူ၀မ်ရှန်းနှင့်အတူအပြင်သို့ ထွက်သွားလိုက်သည်။

နှစ်ယောက်သား အပြင်ဘက်သို့လျှောက်လာပြီးနောက် ဖူ၀မ်သော်အား တွေ့လိုက်ရလေသည်။ ထိုအချိန်မှာပင် ဖူ၀မ်သော်သည်လည်း ထန်မော့နှင့်ဖူ၀မ်ရှန်းကို ခေါ်ရန်ပြင်နေခြင်းဖြစ်သည်။ ထန်မော့မှာ ဖူ၀မ်သော်၏နောက်မှ ကိုယ်တစ်ခုကိုမြင်လျှင် အမူအယာပျက်ယွင်းသွားခဲ့တော့သည်။

တဖက်လူ၏ ရင်ဘတ်မှ သွေးများ ပန်းထွက်နေခဲ့သည်။

မိန်းမငယ်လေးမှာ မျက်လုံးများပြူးကျယ်စွာဖွင့်လျက် ကောင်းကင်ကြီးကို ကြည့်ကာလဲကျနေခဲ့သည်။ သူမ၏နှလုံးတစ်၀က်ခန့်မှာ ချေမွခံထားရပြီး ဘေးဘက်တွင် အသားစနှင့် သွေးများ ပွနေခဲ့သည်။ သွေးများမှာ ခဲမသွားသေးပဲ စီးဆင်းနေဆဲဖြစ်ကာ ဖူ၀မ်သော်၏ ဖိနပ်အောက်ဘက်ကို စိုစွတ်သွားစေသည်။

ထိုမိန်းကလေးမှာ ဖူ၀မ်သော်ဤနေရာသို့ရောက်ရောက်ချင်း သေဆုံးသွားပုံပင်။ တစ်ယောက်ယောက်သာ ဤအခြေအနေကိုမြင်ပါက ထိုမိန်းကလေးအား ဖူ၀မ်သော်သတ်လိုက်သည်ဟုသာထင်ကြပေမည်။ အကြောင်းမှာ ဖူ၀မ်သော်၏ လက်၌လည်း သွေးများပေကျံနေ၍ပင်။ ထန်မော့မှာ တည်ငြိမ်စွာလျှောက်လာလျက် အလောင်းကိုစစ်ဆေးလိုက်သည်။

"သတ်တဲ့သူကိုတွေ့လိုက်လား"

ဖူ၀မ်သော်က တုန့်ပြန်လာသည်။

"ဟင့်အင်း...ကိုယ်ထွက်လာတုန်းက သူတောင် မြေကြီးပေါ်လဲမကျသေးဘူး..သူရင်ဘတ်ကအပေါက်နဲ့ နှလုံးနဲ့ နံရိုးအသားစတွေက လွင့်ထွက်သွားတာ...သူ့ကိုမကယ်နိုင်လိုက်ဘူး...ဓါတ်ဆားရည်လောင်းကြည့်ပါသေးတယ် အလုပ််မဖြစ်လိုက်ဘူး...ဒဏ်ရာကအရမ်းပြင်းတယ် သူကိုယ်တိုင်ရဲ့ ခံနိုင်ရည်ကလည်းအတော်နိမ့်တယ်"

သူမသည် အားနည်းသော အရံကစားသမားတစ်ဦးသာဖြစ်လိမ့်မည်။ ဖူ၀မ်သော် အမြန်ဆုံးအလျင်ဖြင့် ရောက်ရှိလာသော်လည်း မကယ်နိုင်လိုက်ချေ။

ဖူ၀မ်သော်၏ ခွန်အားမှာ ထန်မော့ထက်မြင့်သည်။ သူသည်စာအုပ်ဆိုင်ထဲမှ ထိုမိန်းကလေး တိုက်ခိုက်ခံရသည်ကို ကြားမိခြင်းသို့မဟုတ် ဤသို့အရာများနှင့်ပတ်သက်ပြီး သူ၏ တုန့်ပြန်မှုနှုန်းကမြင့်နေခြင်းလည်းဖြစ်နိုင်ပါသည်။

သူသည် ထိုမိန်းကလေးအသတ်ခံနေရသည်ကို ခံစားမိချိန်တွင် ထန်မော့ကိုပြောရန်အချိန်မရှိလိုက်ခြင်းဖြစ်လိမ့်မည်။ သူကအလျင်အပြည့်ဖြင့် ပြေးထွက်သွားခဲ့သည်။ ကံမကောင်းသည်က သူနောက်ကျသွားဆဲပင်။ လူသတ်သမားကို မတွေ့လိုက်ရသကဲ့သို့ မိန်းကလေးကိုလည်း မကယ်နိုင်ခဲ့ချေ။

ထန်မော့လက်ကိုလှမ်းလျက် မိန်းကလေး၏ မျက်လုံးများကို ပိတ်ပေးလိုက်သည်။

"ပထမတစ်ကြိမ်ကိုတော့ လူတစ်ယောက် ဂိမ်းတစ်ခုခုကနေ ပစ်ထုတ်ခံလိုက်ရတယ်လို့ တွေးလို့ရသေးတယ်...ဒါပေမယ့်ဒီတစ်ခေါက်က ပိုတောင်ထူးဆန်းနေပြီ"

ထန်မော့အေးစက်သောအသံဖြင့်တည်ငြိမ်စွာ ကောက်ချက်ဆွဲနေခဲ့သည်။

"သူတို့က လူတစ်ယောက်ယောက်သတ်တာပဲ ခံရတာဖြစ်မယ်...သတ်တဲ့ပုံကရက်စက်တယ်...ရည်ရွယ်ချက်တစ်ခုတည်းရှိတယ်..တူတာလည်းတစ်ခုရှိတယ်...ဘယ်သူသတ်တယ်ဆိုတာ မမြင်လိုက်ရတာပဲ"

ဖူ၀မ်သော်က ထန်မော့ ရှေ့ရက်မှ လမ်းကြားထဲတွင်တွေ့ခဲ့သော အလောင်းအကြောင်းကိုပြောနေမှန်း နားလည်လေသည်။ ဤတစ်ကြိမ်ကဲ့သို့ပင် ထိုလူမှာလည်း မမြင်ရသော လူတစ်ယောက်ယောက်ထံမှ အသတ်ခံလိုက်ရသည့်ပုံပင်။ ၂ဦးစလုံး၏ သေပုံသေနည်းမှာ ကွာသော်လည်း လူသတ်သမားကိုတော့ အရိပ်ပင်မမြင်လိုက်ရချေ။ ပထမဝတစ်ကြိမ်ကိုတော့ဂိမ်းတစ်ခုခုမှ ပစ်ထုတ်လိုက်သည်ဟုဆိုနိုင်သည်။ ဤတစ်ကြိမ်တွင်တော့ ဖူ၀မ်သော်မှာ ဤမိန်းကလေး မြေပေါ်သို့ လဲမကျခင်ရောက်ရှိလာသည့်တိုင် လူသတ်သမားကိုမူမမီလိုက်ပြန်ချေ။

ဤသည်မှာ အနက်ရောင်မျှော်စင်ဂိမ်းတစ်ခုခု၏ စတိုင်မျိုးမဟုတ်ချေ။

*****

ညသည် ကျက်သရေတို့နှင့်အတူ ရောက်ရှိလာခဲ့ပြန်သည်။ လျှပ်စစ်မီးပြတ်တောက်နေသဖြင့် လမ်းမီးတိုင်များလည်းမလင်းတော့သလို ညမှာ မှုန်ရီဝေ၀ါးနေခဲ့သည်။

၃ယောက်သား အေးစက်နေသော အလောင်းဘေးတွင်ရပ်လျက် လေပြည်က ထန်မော့၏ အင်္ကျီလက်ကို ပွတ်တိုက်လျက် အသံများမြည်နေစေခဲ့သည်။ မိန်းကလေး၏ သွေးများမှာ တဖြည်းဖြည်း ခဲသွားလျက် မြေကြီးပေါ်တွင် ညိုမှောင်သောအရောင်များစွန်းထင်းကျန်ရစ်လေသည်။

ထန်မော့ကဆိုသည်။

"မှောင်လာပြီ...အရင်ဆုံးသူ့ကိုသယ်သွားဖို့ နေရာတစ်နေရာရှာရအောင် ပြီးမှ စဥ်းစားကြတာပေါ့"

လူ၃ယောက်ထွက်ခွာရန်ပြင်လိုက်ကြသည်။

ရုတ်ချည်း မြူးကြွသော သီချင်းသံကို ကြားလိုက်ကြသည်။ မြူးကြွပြီး စိတ်ရွှင်လန်းစေသော သီချင်းမှာ ကမ္ဘာတစ်၀ှမ်းတွင် ပဲ့တင်ထပ်လျက်။ ထန်မော့ခေါင်းကို ချက်ချင်းမော့လျက် အနက်ရောင်မျှော်စင်အား ကြည့်လိုက်လေသည်။ သူသည်မျှော်စင်၏အောက်ခြေမှ ထိပ်အထိ တဖြတ်ဖြတ်လင်းနေသော အဖြူရောင် အလင်းတန်းကို တွေ့လိုက်ရလေသည်။

၆နာရီထိုးသည်နှင့် သီချင်းသံမှာ ရုတ်တရက် ရပ်တန့်သွားပြီး အလင်းမှာလည်း ရပ်သွားခဲ့သည်။

ကမ္ဘာပေါ်မှာ ကစားသမားများအားလုံးရုတ်ချည်းရပ်တန့်လျက် အနက်ရောင်မျှော်စင်အား မော့ကြည့်လိုက်မိကြသည်။ ၉၀ရာခိုင်နှုန်းသော ကစားသမားများ၏ မျက်နှာပေါ်တွင် ကြောက်ရွံ့တုန်လှုပ်မှုတို့စွဲထင်လျက်။ တချို့မှာ ငိုကြွေးနေကြပြီး တချို့မှာတော့ ဘုရားသခင်အား ကယ်တင်ပေးရန် တောင်းဆိုနေခဲ့ကြသည်။ သို့သော် ၄င်းနောက်ထွက်ပေါ်လာခဲ့သည်က ဘုရားသခင်မဟုတ်ပဲ အနက်ရောင်မျှော်စင်၏ စိတ်လှုပ်ရှားနေသော ကြေညာသံသာဖြစ်လေသည်။

"တင်းတောင်~ ၂၀၁၈ မတ်လ ၃၁ရက် ပထမဆုံး အတင်းအကြပ် မျှော်စင်တိုက်ခိုက်စေခြင်းဂိမ်း

ကို ဖွင့်လှစ်လိုက်ပါပြီ..."

ထန်မော့သည် အနက်ရောင်မျှော်စင်ပေါ်မှ အဖြူရောင်အလင်းတန်းမှာ နှေးကွေးစွာ ပြောင်းလဲနေသည်ကို တွေ့လိုက်ရသည်။ ထို့နောက်၄င်းမှာ ဂဏန်း ၈လုံးအဖြစ်ပြောင်းလဲသွားခဲ့လေသည်။

၂၈,၂၁၅,၁၂၃

ထန်မော့မှာ တစ်ခုခုကိုနားလည်သွားပုံဖြင့် ဖူ၀မ်သော်အား လှည့်ကြည့်လိုက်လေသည်။

မိန်းကလေး၏ ခန္ဓာကိုယ်အား ပြောင်းရွေ့ရန် ပြင်ဆင်နေချိန် ၁၀စက္ကန့်အတွင်း အနက်ရောင်မျှော်စင်ပေါ်မှ နံပါတ်များမှာ တဖန်ပြောင်းလဲသွားပြန်သည်။

၂၈,၃၁၅,၀၁၉

ထန်မော့၏ မျက်လုံးတို့ပြူးကျယ်သွားခဲ့သည်။

...၁၀စက္ကန့်ပဲရှိသေးတာလေ..

ကြီးမားသော အနက်ရောင်မျှော်စင်ကြီးပေါ်တွင်တော့ နံပါတ်များမှာ ဆက်တိုက်ပြောင်းလဲနေဆဲ...

🌍

Prev Next