MM Story Teller

Chapter 209

Viewers 32k

🌍Chapter 209

လမ်းခွဆုံကို ကျော်လွန်ခါနီးတွင် ထန်မော့၏ ခြေလှမ်းတို့ ရုတ်ချည်းရပ်တန့်သွားခဲ့လေသည်။

ဖူ၀မ်သော်သည်လည်း အရှေ့အရပ်ကို လှမ်းကြည့်လိုက်သည်။

ဖူ၀မ်ရှန်းမှာ ရှေ့သို့ ၂လှမ်းခန့်လှမ်းပြီးစဥ်မှာပင် တစ်ခုခုမှားယွင်းနေသည်ကို တွေ့လိုက်ရလေသည်။ သူသည် ထန်မော့နှင့် ဖူ၀မ်သော်၏ အကြည့်ကိုလိုက်၍ ကြည့်လိုက်သည်။ အခြေအနေကို ရှင်းလင်းစွာမြင်ပြီးသည်နှင့် ရှောင်ဖူ၏ မျက်၀န်းများမှာ ပြူးကျယ်သွားလျက် ထန်မော့အနီးသို့လျင်မြန်စွာ ပြန်ရောက်လာခဲ့သည်။ ဖူ၀မ်သော်မှာ ၁၀မီတာ အကွာခန့်မှ အခြေအနေကိုစူးစမ်းနေပြီး အသံများကိုလည်း နားစွင့်နေခဲ့သည်။ ထို့နောက် မြေကြီးပေါ် လဲကျလာသောလူမှာ ခြုံခိုတိုက်ခိုက်ခြင်းမဟုတ်ကြောင်း အတည်ပြုပြီးနောက် ရှေ့ကိုဆက်သွားလိုက်သည်။

ဖူ၀မ်သော် အခြေအနေကို စူးစမ်းပြီးနောက် သူတို့ထံလှည့်ကြည့်ကာဆိုလိုက်သည်။

"သေပြီ"

လမ်းကျဥ်းလေးထဲတွင် လူလတ်ပိုင်းအမျိုးသမီးကြီးမှာ မြေပေါ်တွင်လဲကျလျက် အသက်ရှူရပ်နေခဲ့သည်။သူမ၏ကိုယ်ပေါ်မှ အနီရောင်သွေးတို့မှာ ဂိတ်၀၂ဖက်စလုံးတွင် စီးလျက်။ ထိုသွေးများက ခြောက်သွေ့လျက် အညိုရောင်စီးကြောင်းများအဖြစ် ကျန်နေရစ်လေသည်။

ထန်မော့ ငုတ်တုတ်ထိုင်ချလျက် ထိုအမျိုးသမီးကြီး၏ လည်ပင်းကိုစမ်းကြည့်လိုက်သည်။ အနွေးဓါတ်က လုံး၀ပျောက်ကွယ်မသွားသေးချေ။ သူ၏အမူအရာမှာ ပျက်ယွင်းလျက် ဖူ၀မ်သော်အားကြည့်လိုက်မိလေသည်။ ၂ဦးသားမှာ ဆိုလိုရင်းကို ချက်ချင်းနားလည်သွားခဲ့သည်။

ဖူ၀မ်သော်က ခိုင်မာစွာဆိုသည်။

"သေပြီးတာ ၅မိနစ်ရှိပြီ... သူ့အသံကြောနဲ့ ပင်မသွေးကြောကြီးရောတစ်ခါတည်းအဖြတ်ခံရပြီး ချက်ချင်းသေသွားတာ.. အဆိုးဆုံးဒဏ်ရာက နဖူးပေါ်ကပဲ ရန်သူက သူ့နဖူးကိုအရင်ဆုံး ထိုးခဲ့ပေမယ့် မသေလိုက်တာဖြစ်မယ်... ကြည့်ရတာ လက်ရည်၀နေပြီး လူများများသတ်ဖူးပုံပဲ"

ဖူ၀မ်ရှန်းကမေးလိုက်သည်။

"ထျန်းရွှမ်ကတစ်ယောက်ယောက်လား"

ဖူ၀မ်သော် ခေါင်းခါလိုက်သည်။

"မသေချာဘူး ဖြစ်နိုင်ချေတော့များတယ်"

ထန်မော့ကဆိုလိုက်သည်။

"အဓိကအရေးကြီးတာက ၅မိနစ်အတွင်းမှာ သေခဲ့တာဆိုတာပဲ"

လွန်ခဲ့သော ၅မိနစ်ခန့်က ထန်မော့တို့ ၃ဦးမှာ ဤဧရိယာသို့ရောက်ရှိလာပြီး အနက်ရောင်မျှော်စင် သုတေသနစင်တာကို ရှာဖွေနေခဲ့ကြသည်။ ဤအမျိုးသမီးကြီးမှာ သူတို့နှင့် မီတာ ၂၀၀အကွာအတွင်းတွင် သေဆုံးသွားခြင်းဖြစ်သည်။ သို့တိုင်အောင် ထန်မော့နှင့် ဖူ၀မ်သော် ၂ဦးစလုံး သံသယဖြစ်ဖွယ် လူတစ်ဦးကိုမျှ မတွေ့ခဲ့ရချေ။ ထို့ကြောင့်ပင် ထန်မော့အံ့အားသင့်မိခြင်းဖြစ်သည်။

လူသတ်သမားမှာ လေထဲပျောက်ကွယ်သွားသည့်အလားပင်။ ထိုအမျိုးသမီးကြီး၏ ကိုယ်ကို စစ်ဆေးပြီးသည်နှင့် ထန်မော့ကဆိုလိုက်သည်။

"သတိထားကြဦး"

၃ယောက်သား ပတ်၀န်းကျင်ကို ပို၍ အာရုံစိုက်ထားလျက် ထျန်းရွှမ်အဖွဲ့အစည်း၏ ရုတ်တရက်ရောက်ရှိလာနိုင်သော ခြုံခိုတိုက်ခိုက်မှု မှန်သမျှအတွက် အသင့်ပြင်ထားခဲ့သည်။ ထန်မော့နှင့် ဖူ၀မ်သော်၏ မနီးမဝေး၌ပင် လူသတ်ရဲသည်ဆိုလျှင် ၄င်းမှာ ထျန်းရွှမ်အဖွဲ့အစည်းမှ အဖြစ်နိုင်ဆုံးပင်။ ပေကျင်းမှ ခွန်အားကြီး ကစားသမားတ၀က်ခန့်မှာ ထိုအဖွဲ့အစည်းမှဖြစ်သည်။ ထိုကစားသမားမှာ လူများကို လျင်မြန်စွာသတ်ပြီး လေထဲပျောက်ကွယ်သွားသည့်သဖွယ် ရွေ့လျားနိုင်သော စွမ်းရည်မျိုး ရှိပုံပင်။ မည်သို့ပင်ဖြစ်စေ သူတို့သတိထားမှ ရလိမ့်မည်။

ထန်မော့သည် ထိုအဆောက်အဦးလေးထဲ၀င်လာခဲ့ပြီး ပတ်၀န်းကျင်ကို အတော်ကြာ စူးစမ်းကြည့်နေခဲ့သည်။ ထို့နောက်၄င်းမှာ သာမာန်စာအုပ်ဆိုင်တစ်ဆိုင်သာဖြစ်ကာ အနက်ရောင်မျှော်စင် သုတေသနစင်တာမဟုတ်ကြောင်း အတည်ပြုလိုက်သည်။ တဖန် မြေပုံပေါ်မှ Cအမှတ်များကို ကြည့်လျက် ပုန်းအောင်းနေသော ရန်သူများရှိမရှိစစ်ဆေးကာ နောက်တစ်နေရာသို့ ဆက်သွားလိုက်ကြလေသည်။

၃ရက်အတွင်း ချောင်ယန် ခရိုင်တ၀က်ခန့်လျှောက်သွားခဲ့ပြီး နေရာ၁၁နေရာကို ရှာဖွေခဲ့ကြသည်။ ထိုထဲမှ တစ်နေရာကမှ အနက်ရောင်မျှော်စင် သုတေသနစင်တာ မဟုတ်ခဲ့ချေ။

၄ရက်မြောက်နေ့တွင် သူတို့ စက်ရုပ်ဓါတ်ခွဲခန်းတစ်ခုကိုတွေ့ရှိခဲ့သည်။ ထန်မော့သည် အပြင်ဘက်မှ ဆိုင်းဘုတ်ကို မျက်လုံးများတောက်ပလျက် ကြည့်နေခဲ့သည်။

ဤဓါတ်ခွဲခန်းမှာ ရိုးရိုးခြံ၀န်းငယ်လေးနှင့် သီးခြားရှိနေခြင်းဖြစ်သည်။ ၂ထပ်အဆောက်အဦးမှာ အိုဟောင်းလျက် သတိပြုမိရန်လွန်စွာ ခက်ခဲလှသည်။ သို့သော် ခြံ၀န်းမှာ အတော်လေးကြီးမားလှသည်။

ထန်မော့ တံခါးကိုတွန်းဖွင့်လျက် ဟောထဲတွင် စက်ရုပ်မော်ဒယ်တချို့ကို တွေ့လိုက်ရလေသည်။ ထိုတစ်ထပ်လုံးမှာ စက်ရုပ်လေ့လာရေး ဓါတ်ခွဲခန်းတစ်ခုဖြစ်သည်။ ဒုတိယထပ်တွင် ၃ယောက်သားမှာ ရှာရင်းဖွေရင်း ကော်ရစ်တာအဆုံးမှ အခန်းငယ်လေးတစ်ခုဆီရောက်ရှိလာခဲ့သည်။ ထန်မော့တံခါးကို ဆွဲဖွင့်ရန်ပြင်လိုက်သည်။ သို့သော် မဖွင့်နိုင်ခဲ့ချေ။

သူ ဖူ၀မ်သော်အား ကြည့်လိုက်မိသည်။

ဖူ၀မ်သော် သူ၏ညာလက်ကို ဒုချွန်လက်နက်အဖြစ် ပြောင်းလဲလိုက်လေသည်။ ချွန်ထက်မာကြောသော ဒုချွန်လက်နက်မှာ ထူထဲခိုင်ခန့်သော တံခါး၏ လော့ခ်ကို ဖျက်ဆီးလိုက်သော်လည်း ကံမကောင်းစွာ အတွင်း၌ စက်ရုပ်သုတေသနအခန်းဖြစ်နေဆဲပင်။ ထန်မော့လက်မလျှော့ခဲ့ချေ။ သူသည်တစ်ခုခုကမူမမှန်သော ခံစားချက်မျိုးရရှိနေခဲ့သည်။ သူ၏အကြည့်မှာ အခန်း၏ ထောင့်ထိုင်းကို ဖြတ်သန်းသွားလျက် နံရံမှ စာအုပ်စင်တစ်ခုထံတွင် ရပ်တန့်သွားခဲ့သည်။

ထိုစာအုပ်စင်ပေါ်တွင် စက်ရုပ်ဆိုင်ရာ ဗဟုသုတ စာအုပ်များစွာ ရှိလေသည်။ စာအုပ်တိုင်းမှာ တစ်ခါမှ မဖတ်ထားသလို လွန်စွာ သစ်လွှင်နေခဲ့သည်။

ထန်မော့ကဆိုလိုက်သည်။

"စာအုပ်စင်ကို ဖယ်ရအောင်"

ဖူ၀မ်သော်သည်လည်း ထိုစာအုပ်စင်ကိုသတိထားမိကာ တွန်းဖယ်လိုက်လေသည်။ ဖူ၀မ်ရှန်း အံ့အားသင့်သွားခဲ့သည်။

"စင်နောက်မှာ တစ်ခုခုရှိတာလား"

သူလည်း ကူညီရန်ပြေးလာခဲ့လေသည်။

ထန်မော့နှင့် ဖူ၀မ်သော်၏ လက်ရှိခွန်အားနှင့်ပင် ၅၀ရာခိုင်နှုန်းမျှ အားစိုက်၍တွန်းပါသော်လည်း ၅စင်တီမီတာခန့်သာရွေ့လေသည်။ ထို့ကြောင့်ပင် ဤစာအုပ်စင်မှာမူမမှန်ကြောင်း ပို၍ထောက်ခံပေးနေသည့်နှယ်။ စာအုပ်စင်ကိုလုံး၀ဖယ်လိုက်ပြီးသည်နှယ် မှောင်မည်းနေသော လှေကားတစ်ခု ၄င်း၏နောက်မှ ပေါ်လာခဲ့သည်။

ထန်မော့မှာ ဆင်းသွားရန်ပြင်လိုက်သော်လည်း

ဖူ၀မ်သော်က သူ့ကိုတားလိုက်သည်။

"ကိုယ်အရင်ဆင်းမယ်..."

ထန်မော့တန့်သွားမိလျက် ထိုအမျိုးသား၏ နက်မှောင်၍ တည်ငြိမ်သော မျက်၀န်းများကို ကြည့်ကာ ခေါင်းညိတ်လိုက်လေသည်။

"အိုကေ"

၃ယောက်သား လှေကားအောက်သို့ ဆင်းလာခဲ့ကြသည်။ လှေကားမှာ အတော်ရှည်ပြီး မြေအောက်သို့ ရောက်ရှိလာပုံပင်။ ထန်မော့ဓါတ်မီးကို ထုတ်ယူလျက် ဤထူးဆန်းသော နေရာကို စူးစမ်းလိုက်သည်။ သူတို့၏ရှေ့တွင် တ၀က်ဖွင့်ထားသော တံခါးတစ်ချပ်ရှိလေသည်။ ဖူ၀မ်သော်မှာ ထိုတံခါးကို ဆွဲဖွင့်လျက် လူသူကင်းမဲ့နေသော ဓါတ်ခွဲခန်းတစ်ခုထဲသို့ ၀င်သွားလိုက်လေသည်။

ထိုအခန်းထဲတွင် အနက်ရောင်မျှော်စင်မော်ဒယ် အမြောက်အများနှင့် နံရံပေါ်မှ သင်ပုန်းပေါ်တွင် ထူးဆန်းသော ပုံသေနည်းများစွာနှင့်အတူ ဤဓါတ်ခွဲခန်း၏ သရုပ်အမှန်ကို ဖော်ပြနေခဲ့လေသည်။

၃ယောက်သားမှာ အံ့သြပုံမရပဲ ထိုဓါတ်ခွဲခန်းအတွင်း အလျှင်အမြန်ရှာဖွေလိုက်ကြတော့သည်။ dataအများစုမှာ ဖူ၀မ်သော် ရှန်ဟိုင်းစင်တာတွင်တွေ့ခဲ့ရသည်တို့ထက် ထူးခြားမနေချေ။ ထန်မော့ လော့ဖုန်းချန်းထံမှ ကြားခဲ့သည်မှာ ဤdataအများစုက မှားယွင်းနေသည်ဟုပင်။

လွန်ခဲ့သော ကမ္ဘာကြီးအွန်လိုင်းပေါ် မတက်ခင်၆လခန့်တွင် ကမ္ဘာပေါ်မှ အဓိကနိုင်ငံကြီးများသည် ဤမျှော်စင်များနှင့်ပတ်သက်၍ အဖြေထုတ်နိုင်ရန် အတတ်နိုင်ဆုံးကြိုးစားခဲ့ပါသော်လည်း ကျဆုံးခဲ့ကြသည်။

သူတို့သည် ရုပ်ပိုင်းဆိုင်ရာတုန့်ပြန်မှု၊ ပုံရိပ်ရောင်ပြန်၊ ကြယ်တာရာစွမ်းအင် နှင့် အမှုန်သီအိုရီအစသဖြင့် ကောက်ချက်များစွာချခဲ့သည်။ သို့သော် ထိုအထဲမှ တစ်ခုကမှ အနက်ရောင်မျှော်စင်ကို မဖြစ်ပေါ်လာစေခဲ့ပေ။ ၄င်းမှာ လူသားများနှင့် မသက်ဆိုင်သော မျိုးနွယ်စုတစ်ခုမှ ရောက်လာခြင်းဖြစ်သည်။ လူသားများ၏ လက်ရှိ သိပ္ပံပညာ တိုးတက်မှုအဆင့်နှင့် နားလည်ဖို့ရာ လုံး၀မတတ်နိုင်ချေ။

ထန်မော့မှာ နေရာအနှံ့ကိုရှာဖွေနေစဥ် ဖူ၀မ်ရှန်း၏ ရုတ်တရက်အော်သံကို ကြားလိုက်ရလေသည်။

"အာ...အဲဒါကဘာလဲ"

လူတိုင်း ထိုနေရာကို သွားကြည့်လိုက်ကြသည်။

ရှောင်ဖူက အခန်းထောင့်မှ အနက်ရောင်လက်ဆွဲအိတ်တစ်ခုနှင့် မှန်ကန်တစ်ခုပါ၀င်သော ဘူးတစ်ဘူးကို သယ်လာခဲ့လေသည်။ ထိုမှန်ကန်ထဲမှ ရေများမှာ ညစ်ညမ်းနေခဲ့ပြီဖြစ်သည်။ ထိုအနက်ရောင်လက်ဆွဲအိတ်နှင့် မှန်ကန်တို့ကို အခန်းထောင့်တွင် ချထားခြင်းဖြစ်ကာ ရုတ်တရက်ကြည့်လျှင် မသိသာချေ။

ထန်မော့ ထိုမှန်ကန်ကိုယူလျက် အတွင်းကို ကြည့်လိုက်လေသည်။ သူသည်ထိုမှန်ကန်အပြင်မှ လက်ဗွေရာများကို သတိထားမိသည်။ ဤမှန်ကန်မှာ လူတစ်ယောက်ထက်ပို၍ ကိုင်တွယ် စစ်ဆေးခြင်းခံခဲ့ရပုံပင်။ ထန်မော့ခွဲခြားနိုင်သလောက်ဆိုရသော် မတူညီသော လက်ဗွေရာ ၁၂ခုမကရှိလေသည်။

ထန်မော့၏ ရင်ထဲတွင် အဖြေရှိနေခဲ့ချေပြီ။ သူသည် ဓါတ်မီးဖြင့် လက်ဆွဲအိတ်ကို ထိုးလျက် ဖူ၀မ်သော်အား ကြည့်လိုက်သည်။

"ဒီမှန်ကန်ထဲမှ တစ်ခုခုရှိခဲ့တာသေချာတယ်...ဒီဖိုင်လ်ထဲမှာလည်း ကျွန်တော်တို့ရှာနေတာရှိလောက်တယ်"

ဖူ၀မ်သော် ဓါးကိုထုတ်ယူလျက်လက်ဆွဲအိတ်ကို ဖွင့်ရန်ကြိုးစားလိုက်သည်။ ၄င်းမှာ ကြက်ဆင်ကြီးကို တိုက်ခိုက်စဥ်ကသုံးခဲ့သော ဓါးပင်ဖြစ်သည်။ ဓါးမြှောင်မှာ ထိုလက်ဆွဲအိတ်ကို ထိုးစိုက်ခါနီး၌ပင် ဖူ၀မ်ရှန်းက ၀င်တားလာခဲ့သည်။

"ဒီဟာကကျွန်တော်တို့ရှာနေတဲ့ အဖိုးတန်သုတေသနဒေတာမဟုတ်လား"

ဖူ၀မ်သော်၏ လက်တို့ချက်ချင်းရပ်သွားခဲ့သည်။

ထန်မော့လည်း တန့်သွားမိလျက် အတော်လေးကြာမှ ဆိုလာခဲ့သည်။

"ဒီဟာက အရေးကြီးပြီးအဖိုးတန်တဲ့ ဒေတာဆိုမှတော့ လက်ဆွဲအိတ်ထဲက ဒီနည်းနဲ့ အလွယ်တကူ ယူလို့မရလောက်ဘူး...ထောင်ချောက်တွေဘာတွေရှိမှာပဲ"

ဖူ၀မ်ရှန်းကအံ့အားသင့်သွားခဲ့သည်။

"ထောင်ချောက်ဟုတ်လား"

ထိုကလေးမှာ သူသည်အတိုင်းပြောလိုက်မိသော အရာကထိမျှ အရေးပါနေလိမ့်မည်ဟု မျှော်လင့်မထားချေ။

ထန်မော့မှာ ဖူ၀မ်သော်ကို ကြည့်လိုက်သည်။

"ကျွန်တော်တို့ဒါကို ဖျက်ဆီးမယ့်အစား သမားရိုးကျဖွင့်နိုင်ရင်ပိုကောင်းမယ်"

ဖူ၀မ်သော်သည် သူ၏နားတစ်ဖက်ကို လက်ဆွဲအိတ်ပေါ်တွင် ကပ်ထားလိုက်သည်။ ထို့နောက် လက်တစ်ဖက်မှာ လက်ဆွဲအိတ်ကို ဖိထားလျက် ကျန်တစ်ဖက်မှာ စကား၀ှတ်လော့ခ်ကို ဖြေရန်ကြိုးစားနေပြီး နားကတော့ အထဲမှ အသံကိုနားထောင်နေခဲ့သည်။ ထန်မော့ကမူ ဘေးမှ ဓါတ်မီးထိုးထားပေးခဲ့လေသည်။ ၃ယောက်လုံးမှာ အသက်ကို တိုးနိုင်သမျှ တိုးတိုးရှူလျက် အခန်းတွင်း၌ ထိုလက်ဆွဲသေတ္တာထဲမှ စကား၀ှတ်လော့၏ ကလစ်ခနဲမြည်သံကိုသာ နားစွင့်နေခဲ့ကြသည်။

သူတို့အစိုးရိမ်လွန်နေခြင်းသာဖြစ်ကောင်းဖြစ်နိုင်သော်လည်း ဖြစ်နိုင်ချေရှိနေသ၍ မစွန့်စားရဲချေ။

အနက်ရောင်မျှော်စင်သုတေသနစင်တာမှာ မြေအောက်တွင် ပုန်းလျှိးကွယ်လျှိုးတည်ရှိနေပြီး အပေါ်ယံ၌ စက်ရုပ်ဓါတ်ခွဲခန်းတစ်ခုနှယ် အသွင်ပြောင်းထားခဲ့သည်။ လက်ဆွဲသေတ္တာမှာလည်း ထောင့်တွင် သည်အတိုင်းရှိခဲ့ကာ အကာအကွယ်မဲ့လျက်ပင်။ သူတို့သည်အတိုင်းဖျက်ဖွင့်လိုက်လျှင်လည်းရလောက်သည်။ သို့သော် ထန်မော့နှင့် ဖူ၀မ်သော်မှာ မစွန့်စားရန် ဆုံးဖြတ်ခဲ့ကြသည်။

ထိုလက်ဆွဲသေတ္တာတွင် စကား၀ှက် ၈လုံးရှိသည်။ ၁နာရီကြာပြီးနောက်တွင် ရှင်းလင်းပီသသော ကလစ်ဟူသော မြည်သံကို ကြားလိုက်ရပြီးဖူ၀မ်သော်မှာ ထန်မော့ကို ကြည့်လာခဲ့သည်။ ၂ဦးသားခေါင်းညိတ်ပြလိုက်ကြသည်။ ထို့နောက် ဖူ၀မ်သော်မှာ ထိုလေးလံသော လက်ဆွဲသေတ္တာကို ဖွင့်လိုက်တော့သည်။

လက်ဆွဲသေတ္တာပွင့်သွားပြီးနောက် သည်အတိုင်းချိုးဖျက်ကာဖွင့်လိုက်လျှင်လည်း မည်သည့်ထောင်ချောက်မှ မရှိကြောင်း ရှင်းလင်းစွာတွေ့လိုက်ရလေသည်။ ထန်မော့ ထိုအထဲမှ ဖိုင်လ်ထူထူကို ထုတ်ယူလိုက်ပြီး ထူထဲသော အင်္ဂလိပ်စာလုံးများကသူ၏ အမြင်အာရုံထဲ ၀င်လာခဲ့တော့သည်။

[တက်ဆာ ရေအောက်သက်ရှိဘ၀ သုတေသနစင်တာ]

ဓါတ်ခွဲစမ်းသပ်ချိန်: ၂၀၁၇ နို၀င်ဘာ ၁၅ရက်

စမ်းသပ်ပစ္စည်း : XXဂျယ်လီငါး

……

အမျိုးအစား A တုန့်ပြန်မှု: စမ်းသပ်ပစ္စည်းနမူနာ ၁၄၁ သေဆုံးခဲ့သည်။

ထိုဖိုင်လ်အထူကြီးအား စားပွဲပေါ်တင်လျက် ထန်မော့ဖတ်ရန်ကြိုးစားလိုက်သည်။ ထိုအကြောင်းအရာထဲတွင် သိပ္ပံဆိုင်ရာအသုံးအနှုန်းအလွန်များပြားလှသည်။ ဖူ၀မ်ရှန်းမှာလည်း ကလေးသာဖြစ်၍ နားမလည်သည်မှာ ပုံမှန်ပင်။ ထန်မော့လည်း တက္ကသိုလ်တွင် အင်္ဂလိပ်ဘာသာ၌ အတော်ကောင်းကောင်းလုပ်နိုင်ခဲ့သည့်တိုင် အကြမ်းဖျင်းသာနားလည်နိုင်လေသည်။ သူအတတ်နိုင်ဆုံးဖတ်ကြည့်နေပါသော်လည်း နားလည်ရန်ခက်ခဲနေဆဲပင်။

ထန်မော့ပထမစာမျက်နှာကို ပြန်လှန်လျက် ခေါင်းစီးကို ပြန်ကြည့်လိုက်သည်။

" ဒီဟာက ဂျယ်လီငါးအကြောင်းလား"

ဖူ၀မ်သော်က လေသံနိမ့်နိမ့်ဖြင့်ဆိုလာခဲ့သည်။

"ဒီကောင်က မသေနိုင်တဲ့ ဂျယ်လီငါး"

ထန်မော့သူ့အား လှည့်ကြည့်လိုက်မိသည်။

ဖူ၀မ်သော်မှရှင်းပြလာသည်။

"ဒီသုတေသနက မသေနိုင်တဲ့ဂျယ်လီငါးအကြောင်းပဲ...ဒီကောင်တွေက အမေရိကန် အလယ်ပိုင်းဒေသကရေထဲမှ နေကြတာ ပြီးတော့လောလောလတ်လတ်မှာ အကောင်ရေအများကြီး သေသွားကြတယ်... အမေရိကန်က အနက်ရောင်မျှော်စင်သုတေသနစင်တာက ဒီဖြစ်စဥ်ကိုတွေ့တော့ ထူးခြားတယ်လို့ယူဆပြီး တရုတ်ကို သတင်းပို့ခဲ့တာပဲ...၂နိုင်ငံကဒီကိစ္စကို ဆွေးနွေးနေတုန်းဖြစ်မယ်...ဒီစမ်းသပ်ပစ္စည်းကို နို၀င်ဘာ၁၅မှာတွေ့ပြီးတော့ အမေရိကန်သုတေသီ၂ယောက်က နမူနာကို ၁၇ရက်နေ့မှာ တရုတ်ကို သယ်လာခဲ့တယ်...၂ဖက်လုံးသေချာလေ့လာဖို့အချိန်မရလိုက်ခင်မှာပဲ ကမ္ဘာကြီးအွန်လိုင်းပေါ် တက်သွားခဲ့တာပဲ"

ထန်မော့ကရေရွတ်လိုက်သည်။

"ကျွန်တော် မသေနိုင်တဲ့ ဂျယ်လီငါးအကြောင်း တစ်နေရာရာမှာ ကြားဖူးသလိုပဲ "

ဖူ၀မ်သော်ကတော့ ကြားဖူးပုံမပေါ်ချေ။ ဤသုတေသနစာတမ်းကိုဖတ်ရန်အတွက် အင်္ဂလိပ်လိုကောင်းကောင်းနားလည်ခြင်းတစ်ခုတည်းနှင့် အလုပ်မဖြစ်ချေ။ ဗဟုသုတအတော်များများလည်း လိုအပ်သေးသည်။ လော့ဖုန်းချန်းမှာ ဤစာတမ်းကိုနားလည်ကောင်း နားလည်နိုင်သော်လည်း ရှန်ဟိုင်းမှာ ခရီးရှည်ကြီးဖြစ်သည်။

တခြားနည်းလမ်းလည်း မရှိ၍ ၃ယောက်သားမှာ ထိုဓါတ်ခွဲခန်းကိုပင် တဖန်ထပ်၍ ထောင့်စေ့အောင် ရှာဖွေစစ်ဆေးလိုက်ကြသည်။ ထိုနေရာတွင် တခြားမည်သည့်အချက်အလက်မှ မရှိတော့သည်မှာ သေချာမှ ထိုဖိုင်နှင့် မှန်ကန်ကိုသာ ယူလာခဲ့ကြတော့သည်။ မှန်ကန်ထဲမှ ရေများမှာ ၅လမျှ မလဲမလှယ်ပဲထားထားသည်ဖြစ်၍ ညစ်ညမ်းနေခဲ့ချေပြီ။ မသေနိုင်သော ဂျယ်လီငါးမှာ ဤကန်ထဲတွင်ရှိခဲ့သည်ဟု ထန်မော့ယူဆသည်။ ကမ္ဘာကြီးအွန်လိုင်းပေါ်တက်လာမှသာ ကမ္ဘာပေါ်မှ တိရိစ္ဆာန်များအားလုံး ပျောက်ကွယ်သွားခဲ့ပြီး လူသားများသာ ကျန်ရစ်ခြင်းပင်။

၃ယောက်သား ထိုသတင်းကိုယူလျက် ဓါတ်ခွဲခန်းမှ ထွက်လာကြလေသည်။

ထန်မော့ ရှင်းဟွာစာအုပ်ဆိုင်တစ်ဆိုင်ကို တွေ့ခဲ့ပြီး သူ၏စာကြည့်တိုက်မှူးလုပ်ခဲ့ဖူးသော အတွေ့အကြုံကို အသုံးချလျက် ရေထုသယံဇာတဆိုင်ရာ အဘိဓါန်ထူထူတစ်အုပ်ကို ရှာတွေ့ခဲ့သည်။ ၃ယောက်သား ထိုထူထဲလှသည်စာအုပ်ကြီးကို အတူတကွရှာဖွေဖတ်ရှူခဲ့ကြလေသည်။ နေ့နှင့်ညတို့ကုန်လွန်သွားပြီးနောက် သူတို့သည် သုတေသနစာတမ်းမှ အကြောင်းအရာများနှင့် ဆိုလိုရင်းကို နားလည်နိုင်သွားခဲ့သည်။

လတ်တလောနှစ်များအတွင်း ကာရေဘီယန်ပင်လယ်မှ စပိန်နှင့် ဂျပန်နိုင်ငံတို့ထံ ပျံနှံ့မျိုးပွားလာခဲ့သော မသေဆုံးနိုင်သည့် အင်မော်တယ် ဂျယ်လီငါးများ...

၄င်းတို့မှာ အလွန်သေးငယ်ပြီး ဖောက်ထွင်းမြင်ရကာ ခေါင်းပေါ်တွင်အစာချေစနစ်ရှိသော ဂျယ်လီငါးကလေးများဖြစ်သည်။ တစ်ကိုယ်လုံးမှာ ၅မီလီမီတာမျှသာရှိကာ လူသားတစ်ဦး၏ လက်သည်းခွံအရွယ်အစားမျှသာဖြစ်သည်။ ထိုဂျယ်လီငါးများမှာ ပါတ်၀န်းကျင်မှ သေးငယ်သော ပြောင်းလဲမှုလေးမှအစ အလွန် အာရုံခံနိုင်စွမ်းမြင့်လေသည်။ ဥပမာ မိုးမလာခင်နေ့ရက်များတွင် ပုစဥ်းများ နိမ့်နိမ့်ပျံခြင်း သို့မဟုတ် မြေကြီးထဲမှ တီကောင်များထွက်လာခြင်းတို့လိုပင်ဖြစ်သည်။

ဂျယ်လီငါးများမှာ လူသားများထက် သဘာ၀ကို အဆပေါင်းများစွာ အာရုံခံနိုင်စွမ်းရှိလေသည်။ အနက်ရောင်မျှော်စင်များပေါ်ပေါက်လာပြီးနောက် တက်ဆာ ရေအောက်သက်ရှိဘ၀သုတေသနစင်တာသည် အင်မော်တယ် ဂျယ်လီငါးအပါအ၀င် ကမ္ဘာပေါ်မှ ဂျယ်လီငါးအမျိုးပေါင်း၂၀၀ကျော်ကို စုဆောင်းကာ စူးစမ်းလေ့လာခဲ့သည်။

"အင်မော်တယ်ဂျယ်လီငါးတွေက အရွယ်ရောက်ပြီးသားခန္ဓာကိုယ်ကနေ သန္ဓေသားအဖြစ်ပြန်ပြောင်းနိုင်တဲ့ ကမ္ဘာပေါ်မှာတစ်ခုတည်းသော မျိုးစိတ်ပဲ..."

ထန်မော့မှာ ထိုစာကြောင်းကိုမြင်လျှင် အလွန်ထိတ်လန့်အံ့သြသွားခဲ့သည်။

🌍

Prev Next