MM Story Teller

Chapter 196

Viewers 32k

🌍Chapter 196

အနက်ရောင်ယုန်ကြီးမှာ သူအဆင်မပြေဖြစ်နေမှုကို ကြည့်လျက် လှောင်ရယ်ကာ

"ငါကို အနက်မျှော်စင်ဘောစ့်လို့ပြောလိုက်တာ ဘာလို့ အမှားအပြစ်ဖြစ်နေတာလဲလို့ စဥ်းစားနေတာလား...ဟား ဟား ဟား ငတုံး ဘာလို့လဲဆိုတော့ ငါကနာရီထဲ၀င်လာပြီး ဂိမ်းကိုစခဲ့တာမို့လို့ပေါ့ ... အမှန်တရားနာရီမှာ ဘော့စ်ဆိုတာမရှိဘူး။ နာရီကသာ တကယ့်ဘော့စ်ပဲ"

"၆နာရီက ကစားသမား ကျေးဇူးပြုပြီး ဂိမ်းထဲကို ၀င်ရောက်ပေးပါ"

ထန်မော့ထရပ်လိုက်ပြီး သူ၏နဖူးပေါ်မှ ချွေးများကို ပွတ်သုတ်လိုက်သည်။ သူ၏အရှေ့မှ ရယ်နေသော ယုန်နက်ကြီးကို ကြည့်လျက် ဆိုလိုက်လေသည်။

"ငါက လူသားကစားသမား"

“ရွေးချယ်သည့် အမှန်တရား မှန်ကန်ပါသည်။ ကစားသမား ၆ ဂိမ်းထဲသို့ ၀င်ရောက်လာပါပြီ"

ထန်မော့အပြစ်ပေးခံရမည်ကို စောင့်နေသော ယုန်နက်ကြီးမှာ ၄င်းကိုကြားလျှင် တန့်သွားခဲ့လေသည်။ ယုန်နက်ကြီးမှာ အံကိုကြိတ်လျက် သူ့ကိုယ်သူ နံရံ၀င်တိုက်လိုက်ပြန်သည်။ ထန်မော့ အမူအယာမဲ့စွာ သူ၏ရေစိုအ၀တ်အစားများကို ညှစ်ချနေခဲ့သည်။ ထိုစဥ် ကျယ်လောင်သော ကလေးသံ၏ကြေညာမှုက သူ၏နားထဲသို့၀င်လာခဲ့ပြန်သည်။ သို့သော် ထန်မော့,၏ အမူအရာမပြောင်းလဲပဲ အ၀တ်များကိုသာ ရေဆက်ညှစ်နေခဲ့သည်။

“တင်းတောင်~ အဓိကမစ်ရှင်: ဦးဦးယုန်ရဲ့ အမှန်တရားနာရီဂိမ်း ပွင့်လာပါပြီ"

"ဂိမ်းရဲ့စည်းမျည်းတွေကတော့..."

"ပထမအချက် အမှန်တရားသည် စကြာ၀ဠာ၏ မပြောင်းလဲနိုင်သောစည်းမျဥ်းမဟုတ်ပါ...အနက်ရောင်မျှော်စင်၏ အသိအမှတ်ပြုခြင်းကို ခံရမှ အမှန်တရားဟု ယူဆသည်"

"ဒုတိယအချက် အမှန်တရားနာရီပေါ်တွင် အနိုင်ရရှိသည် တစ်ယောက်သာရှိရမည်"

"တတိယအချက် အမှန်တရားနာရီက အမှန်တရားအားလုံးကို အသိအမှတ်ပြုပြီး အမှားအပြစ်များအားလုံးကို ငြင်းဆန်သည်"

“စတုတ္ထအချက် နာရီမှာ အကွက်၆၀အဖြစ်ပိုင်းခြားထားပြီး ၁၀မိနစ်အတွင်း၂~၅၈ အထိ ပစ္စည်းမျိုးစုံပေါ်လာလိမ့်မည်...ပစ္စည်း၂ခုကြားတွင် ကွဲပြားသော အမှန်တရားတစ်ခုရှိရမည်။ အမှန်တရားနာရီပေါ်မှ ပစ္စည်းအားလုံးတွင် တူညီသောအမှန်တရားတစ်ခုသာရှိသည်"

"ပဥ္စမအချက် တစ်ခုချင်းစီ၏ အမှန်တရားကို ရှာဖွေဖော်ထုတ်ပြီး ၄င်းကိုထုတ်ပယ်ပါ....ဤနည်းဖြင့် ရှေ့သို့တစ်ကွက်တိုးနိုင်သည်။

"ဆဌမအချက် အမှန်တရားကိုရှာမတွေ့လျှင် သို့မဟုတ် အမှားအပြစ်ကိုရွေးချယ်မိလျှင် တစ်ကွက်ပြန်ဆုတ်ရမည်။ အကယ်၍ ရှိုးဒင်းဂါး၏သေတ္တာကိုဖွင့်စဥ်၌ မထုတ်ပယ်ရသေးသော ပစ္စည်းကျန်ရှိနေပါက ၂ကွက်ပြန်ဆုတ်ရမည်"

“သတ္တမအချက် အမှားအပြစ်များကိုအမျိုးအစား ၄ခုအဖြစ်ခွဲခြားထားသည်...အဆင့်၁ အမှားအပြစ်... အဆင့်၂အမှားအပြစ်... အဆင့်၃ မီးခိုးရောင် အမှားအပြစ်...အဆင့်၄ မှားယွင်းသော အမှန်တရား...မတူညီသော အမှားအပြစ်များက ရှိုးဒင်းဂါး သေတ္တာထဲမှ မတူညီသော ပြစ်ဒဏ်များကို အသက်၀င်စေမည်ဖြစ်သည်...သေတ္တာပွင့်လာသည်နှင့် ကစားသမား၏ အပြင်းထန်ဆုံးအမှားအပြစ်ကို ဆုံးဖြတ်ကာ အပြစ်ဒဏ်ခံရမည်"

“အဋ္ဌမအချက်...အမှန်တရားနာရီပေါ်မှ အမှန်တရားအားလုံးကို အောင်မြင်စွာဖယ်ထုတ်ပါ... ဂိမ်းကို အမှန်တရားဖြင့် ရှင်းထုတ်နိုင်သည်"

"န၀မအချက် ကျရှုံးသောကစားသမားမှာ အမှန်တရား၏ ထာ၀ရတွင်းနက်ကြီးထဲ ကျဆင်းသွားမည်...အနိုင်ရရှိသူမှာ နောက်ဆုံးကျန်သောကစားသမားဖြစ်သည်... ကစားသမား၁ဦးမှာ ရှိုးဒင်းဂါးသေတ္တာ၏ အပြစ်ဒဏ်ကြောင့် သေဆုံးသွားလျှင်လည်း ကျန်ရစ်သူကို အနိုင်ရရှိသူဟု သတ်မှတ်မည်"

ဒဿမအချက် တစ်နာရီတိုင်းတွင် အမှန်တရားနာရီပေါ်တွင် ပစ္စည်း၄ခုသာရှိမည်...ထိုပစ္စည်းများ၏ အမှန်တရားမှာ အခက်ခဲဆုံးအမှန်တရားဖြစ်သည်..."

"အမှန်တရားနာရီက ခိုင်လုံတဲ့အမှန်တရားကိုသာ လက်ခံပါတယ်..ဒါဟာအနက်ရောင်မျှော်စင်ရဲ့ ခင်မင်ရင်းနှီးစွာ သတိပေးမှုလေးပါ...ဂိမ်းကိုရှင်းနိုင်ဖို့ သန်မာမှ ရမှာနော်"

လွန်ခဲ့သောမိနစ်ပိုင်းခန့်က ထန်မော့မှာ ဂိမ်း၏ စည်းမျည်းများကို မသိခဲ့၍ ဤယုန်နက်ကြီးမှာ အနက်ရောင်မျှော်စင်၏ ဘော့စ်ဟုဆိုခဲ့ခြင်းဖြစ်သည်။ ထိုထပ်တစ်ရာယုန်ရုပ်ကြီးမှာ ထန်မော့ထက် ဤဂိမ်းကို ပိုအကျွမ်း၀င်နေခဲ့သည်။ ၄င်းမှာ ဂိမ်းကိုမည်သို့ဖွင့်ရမည်ကိုရော မည်သို့၀င်ရမည်ကိုပါ သိနေခဲ့လေသည်။

ဂိမ်းထဲသို့၀င်ရန် အနက်ရောင်မျှော်စင်မှပေးထားသော လျှို့၀ှက်စကားလုံးမှာ :သူသည် လူသားကစားသမားတစ်ဦးဖြစ်သည်ဟုပင်။

တွေးတောပြီးနောက်တွင် ထန်မော့လည်း ယုန်နက်ကြီးအဖြေနှင့်ဆင်တူသော :သူကအနက်ရောင်မျှော်စင်၏ဘော့စ်ဖြစ်သည်ဟူသော အဖြေကို ပေးလိုက်မိခြင်းပင်။

သိသိသာသာကိုပင် ၄င်းမှာအမှန်တရားမဟုတ်ခဲ့။

သူသည်အမှန်တရားတစ်ခုကိုသာ ရေရွတ်လိုက်ရုံဖြင့် ဂိမ်းထဲသို့၀င်ရောက်နိုင်လေသည်။

အမှန်တရားကသာ ဂိမ်းထဲသို့၀င်ရောက်နိုင်သော သော့ချက်ဖြစ်သည်။

ထန်မော့ ကြမ်းတမ်းစွာ အ၀တ်ကိုရေညှစ်နေရင်း ဆန့်ကျင်ဘက်တွင်ရပ်နေသော ယုန်နက်ကြီးကို အေးစက်စွာကြည့်လိုက်သည်။ သူ၏အကြည့်မှာ ၄င်း၏ လုံး၀န်းသောခေါင်းနှင့် ပုံပန်းမကျသော အလျားသဏ္ဍာန်ကို ခြုံငုံကြည့်လိုက်သည်။ သူသည်တစ်ခုခုကို တွေးတောနေသကဲ့သို့ ငြိမ်သက်နေခဲ့သည်။ ခတ္တမျှစိုက်ကြည့်နေပြီးနောက် ပြုံးလိုက်ကာ ကြမ်းပြင်ပေါ်ထိုင်ချလိုက်တော့သည်။

ထန်မော့ဂိမ်းထဲသို့ အောင်အောင်မြင်မြင်၀င်ရောက်လာခြင်းက ထိုယုန်နက်ကြီးကို ဒေါသပုန်ထစေသည်။ ၄င်းက သူ့ကိုဂိမ်းထဲ၀င်မလာစေလိုပေ။ ထိုလူသားမှာ အစကတည်းက တစ်ခါတည်းသေသွားလျှင် အကောင်းဆုံးဟုတွေးနေခြင်းဖြစ်သည်။ ထန်မော့ ရုတ်တရက်ထိုင်ချလိုက်သည်ကိုတွေ့လျှင် ၄င်းမှာ တန့်သွားပြီးနောက် ဒေါသများထွက်လာတော့သည်။

"နံစော်နေတဲ့လူသား ဂိမ်းထဲကို ၀င်နိုင်ရုံနဲ့ နိုင်တော့မယ်ထင်မနေနဲ့...ငါကအမှန်တရားနာရီပေါ်မှာ မင်းလိုလူတွေကိုအများကြီးစားဖူးတယ်ကွ"

ထန်မော့ ပါးစပ်ဟရန်ပင် ပျင်းလှစွာ ၄င်းကို တိတ်တဆိတ်သာ ကြည့်နေခဲ့သည်။

"မင်းလို သိပ်တော်သိပ်တတ်နေပြီထင်တဲ့ လူသားတွေက အမှန်တရားနာရီရဲ့ ၃ကြိမ်မြောက်ကို ဘယ်တော့မှ ကျော်နိုင်မှာမဟုတ်ဘူး"

ထန်မော့ မည်သို့မျှမတုန့်ပြန်ခဲ့။

ယုန်နက်"..."

ယုန်နက်မှာ အလွန်ဆောက်တည်ရာမရဖြစ်လာတော့သည်။

"မင်း သောက်ကျိုးနည်း ဘာကိုလာကြည့်နေတာလဲ"

"မင်းထွက်သွားလို့မရဘူးပေါ့"

ယုန်နက်မှာ တုန်လှုပ်သွားခဲ့သည်။ ယခုလေးတင် ဤလူသားမှာ သူသည်အမှန်တရားနာရီထဲတွင်ပိတ်မိနေပြီး ထွက်သွားလို့မရသည်ကို သိသွားခဲ့သည်။

အခုရော ဘာကိုထပ်မေးနေပြန်ပြီလဲ...

ယုန်နက်ကြီး၏ အမူအရာမှာ ပြောင်းလဲသွားလျက် ဆိုးရွားသောအပြုံးကြီးကိုဖော်ပြလာခဲ့သည်။

"ငါထွက်သွားပြီး မင်းကိုစားလို့မရ..."

"မင်းက ဒေါသထွက်နေမှာပေါ့ ဘာလို့ဆို ငါ့ကို မနာလိုလို့လေ...ငါကျထိုင်လို့ရပြီး မင်းကျထိုင်လို့မှမရတာ"

ယုန်နက်ကြီးမှာ တန့်သွားလျက် ထန်မော့ကို စိုက်ကြည့်နေခဲ့သည်။

ထန်မော့ကအပြုံးကလေးဖြင့် ဆိုလိုက်သည်။

" ကိစ္စကြီးတော့မဟုတ်ပါဘူး... မင်းဒေါသထွက်နေတာကို မြင်ရတာ ရယ်ရလို့"

ယုန်နက်မှာ သူ့အား စိုက်ကြည့်နေခဲ့သည်။ ထို့နောက် ၁၀စက္ကန့်ကျော်လွန်သွားချိန်တွင် ၄င်းမှာ ပေါက်ကွဲတော့သည်။

"လူသား"

ယုန်နက်ကြီး ဒေါသတကြီးခုန်ပေါက်နေခြင်းက ထိုနေရာတစ်ခုလုံးကို တုန်လှုပ်စေသည်။ ထန်မော့၏ကိုယ်မှာလည်း မြောက်တက်လိုက်ပြန်ကျလိုက် ဖြစ်နေသော်လည်း မည်သည့်အမူအရာမျိုးမျှရှိမနေခဲ့ချေ။ သူက ထိုဒေါသထွက်နေသော ယုန်နက်ကြီးကိုသာ ပြုံးလျက် ကြည့်နေခဲ့သည်။ ထိုယုန်မှာ အလွန်မကျေမနပ်ဖြစ်ပြီး ဒေါသထွက်နေရသည်ကို မြင်လျှင် သူ၏အပြုံးမှာ ပို၍တောက်ပလာခဲ့လေသည်။

မှန်၏။ ဂိမ်းကိုနားလည်ပြီးသည့်နောက် ထန်မော့၏ ပထမဆုံးအကြံအစည်မှာ ယုန်ကြီးကိုဒေါသထွက်အောင် ပြုလုပ်ရန်ပင်။

ထိုယုန်နက်ကြီးကို အတန်ကြာစူးစမ်းပြီးနောက် ထန်မော့မှာ ၄င်းက အလွန်စိတ်မရှည်တတ်သည်ကို တွေ့ခဲ့ရသည်။ ၄င်းမှာ သူ့ကိုစားမည်ဟု တချိန်လုံးပြောနေပြီး ဒေါသတကြီးခုန်ပေါက်နေတတ်သည်။ အကယ်၍အနက်ရောင်မျှော်စင်က တားဆီးထားခြင်းကြောင့်သာမဟုတ်လျှင် ထိုယုန်မှာ သူ့ထံတိုက်ရိုက်ပြေး၀င်လာပြီး စားပစ်မည်ကို သံသယမရှိချေ။

သို့သော် ဤသည်မှာ အမှန်တရားနာရီဂိမ်းဖြစ်သည်။

၁၀မိနစ်စီတိုင်းတွင် ၂~၅၈ ရှိသော ပစ္စည်းများပေါ်လာမည်ပင်။ ထိုပစ္စည်းများကို အုပ်စု၂စုခွဲနိုင်ပြီး တစ်ခုနှင့်တစ်ခု ကွဲပြားသောအမှန်တရားကိုယ်စီရှိရမည်။ ကစားသမားများမှာ ပစ္စည်းတစ်ခုစီ၏ ကွဲပြားသော အမှန်တရားကိုရှာဖွေကာထုတ်ပယ်ရမည်ဖြစ်သည်။

ဤသည်မှာ သင့်တင့်လျှောက်ပတ်စွာ စဥ်းစားတွေးခေါ်နိုင်စွမ်းကို လိုအပ်သောဂိမ်းမျိုးဖြစ်သည်။ အလွယ်ဆိုရပါလျှင် ဤသည်မှာ အမှန်တရားနာရီဗားရှင်း ပစ္စည်းယှဥ်တွဲခြင်းဂိမ်းမျိုးဖြစ်သည်။ အကြမ်းဖက်ခြင်းက ဂိမ်းကို သက်ရောက်မှုမရှိချေ။ ထန်မော့က ယုန်နက်ကို မသတ်နိုင်သလို ယုန်နက်ကလည်း ထန်မော့ကို မသတ်နိုင်ချေ။ သူတိူ့လုပ်နိုင်သမျှမှာ အမှန်တရားကိုရှာဖွေပြီး ပစ္စည်းများကို ဖယ်ထုတ်ကာအကွက်များကိုရှေ့တိုးသွားရန်ပင်။

"ကျရှုံးတဲ့ ကစားသမားမှာ အမှန်တရားရဲ့ထာ၀ရတွင်းနက်ကြီးထဲ ပြုတ်ကျသွားမယ်"

ထန်မော့၄င်းကိုရေရွတ်လျက် ဒေါသထွက်မနေတော့သော ယုန်နက်ကြီးကို မော့ကြည့်လိုက်သည်။ ၄င်းမှာ ထန်မော့ကို နီရဲနေသော မျက်၀န်းများဖြင့် စိုက်ကြည့်နေခဲ့ပြီး ဘာကိုတွေးနေသလဲ မသိနိုင်ချေ။ ထန်မော့ခတ္တမျှတွေးလျက် လှမ်းအော်လိုက်သည်။

"ငါ့ကိုမစားချင်တော့ဘူးလား"

ယုန်နက်ကြီး၏ မျက်လုံးများမှာ တဖန်နီရဲလာပြန်သည်။ သို့သော်၄င်းမှာ နှာခေါင်းသာရှုံ့လျက် ဆိုလာသည်။

"မင်းဘာတွေးနေလဲဆိုတာ ငါမသိဘူးများထင်နေလား"

ထန်မော့ တည်ငြိမ်စွာမေးလိုက်သည်။

"ဒါဆို ငါဘာတွေးနေတာလဲ"

ယုန်နက်မှာ ဤအတိုင်းရွဲ့လိုက်ခြင်းသာဖြစ်ပြီး ထန်မော့ကအမှန်တကယ်ပြန်မေးလာမည်ဟု ထင်မထားချေ။

ထန်မော့ စောင့်နေခဲ့သော်လည်း ယုန်နက်ထံမှ အဖြေကိုရမလာခဲ့ချေ။ ထန်မော့၏ နှုတ်ခမ်းများမှာ တွန့်ကွေးသွားခဲ့သည်။

"မင်းရဲ့နှာခေါင်းကတော့ အတော်ကြီးတယ်လို့ တွေးနေတာ"

ယုန်နက်"..."

ယုန်နက်မှာ ကြမ်းပြင်ပေါ်တစ်ချက်ဆောင့်ချလိုက်သော်လည်း အရင်ကလောက် စိတ်တိုမနေတော့ချေ။

လူတစ်ယောက်နှင့် ယုန်တစ်ကောင်မှာ မျက်နှာချင်းဆိုင်နေကြသည်။ ထန်မော့မှာ အောက်မှ အပြာရောင်နာရီကိုကြည့်လိုက်သော်လည်း ယုန်နက်၏အကြည့်မှာတော့ ထန်မော့ထံတွင်သာ စွဲကပ်နေခဲ့လေသည်။ ၁၀မိိနစ်ကျော်လွန်သွားပြီးနောက် စူးရှသောအသံတစ်ခုကိုကြားလိုက်ရသည်။ ထန်မော့မျက်လုံးများကို မှေးကျဥ်းလျက် နာရီ၏အလယ်မှ တောက်ပနေသော အလင်းတန်း၆ခုကိုကြည့်လိုက်လေသည်။

ထိုအလင်းရောင်မှာ ပိုပိုတောက်ပလာလွန်း၍ ထန်မော့နှင့် ယုန်နက်တို့မှာ မျက်လုံးပင် မဖွင့်နိုင်တော့ချေ။ အလင်းရောင်ပြန်လည်မှိန်ဖျော့သွားချိန်တွင် ထန်မော့လည်း ပစ္စည်း၆ခုကိုမြင်လိုက်ရလေသည်။ သူသည် ၄င်းတို့အား ရှင်းလင်းစွာမြင်လိုက်ရချိန်တွင် တုန်လှုပ်သွားမိလေသည်။

ထိုစဥ် နေရာလွတ်ထဲတွင် စက်ရုပ်သံတစ်သံကပဲ့တင် ထပ်လာခဲ့သည်။

"အချိန် သုညနာရီ ၁၀မိနစ်... တည်နေရာ: အမှန်တရားနာရီ ... အမှန်တရား၏ ပစ္စည်း၆ခုထွက်ပေါ်လာပါပြီ"

"တစ်မိနစ်ကြာပြီးနောက်မှာ သုညကစားသမားနဲ့ ၆ကစားသမားတို့ အမှန်တရားကို ဖယ်ထုတ်ပေးကြပါ"

ထို့နောက် ထန်မော့၏ ခြေထောက်အောက်မှ ကျယ်လောင်သော အသံထွက်ပေါ်လာခဲ့သည်။ သူငုံ့ကြည့်လိုက်လျှင် စက္ကန့်လက်တံကစတင်ရွေ့လျားလာသည်ကိုတွေ့လိုက်ရလေသည်။ ထိုစက္ကန့်လက်တံမှာ နာရီလက်တံလာရာအတိုင်းလည်နေခဲ့သည်။ ၄င်းရွေ့လျားလိုက်တိုင်း နာရီပေါ်မှ ပစ္စည်းခြောက်ခုမှာ လှုပ်ခါသွားခဲ့လေသည်။

ထန်မော့လည်း ထိတ်လန့်သွားမိသည်။

စတောင်စနေပြီပဲ...

တွန့်ဆုတ်နေရန်အချိန်မရှိခဲ့ချေ။ ထန်မော့ နာရီပေါ်မှ ပစ္စည်း၆ခုကို အလျင်အမြန်ကြည့်လိုက်သည်။

ကြီးမားသော နာရီကြီးပေါ်တွင် အပြာရောင်တောက်ပနေသော ပစ္စည်း၆ခုက အလယ်တွင် ခိုင်မာစွာရှိနေခဲ့သည်။ ဘယ်ဘက်မှ ညာဘက်အထိ ၄င်းတို့မှာ တီဗွီ၊ ခေတ်ဟောင်းစတိုင် စားပွဲတင်မီးအိမ်၊ စားပွဲ၊ ဇီးကွက်တစ်ကောင်၊ လေးတစ်ခုနှင့် တစ်၀က်စားထားပြီးသော စွပ်ပြုတ်ပန်းကန်တို့ရှိလေသည်။

ထန်မော့မှာ တီဗွီဆက်လိုက်နှင့် မီးအိမ်ကိုကြည့်လျက် သူ၏ရင်ထဲတွင် အဖြေတစ်ခုကို မှန်းမိလေသည်။ စားပွဲနှင့်လေးကို ကြည့်မိလျှင်လည်း တစ်ခုခုကို ခန့်မှန်းမိသည်။ အဆုံးတွင် သူ၏အကြည့်မှာ ဇီးကွက်နှင့် စွပ်ပြုတ်ခွက်ထံ ကျရောက်သွားခဲ့သည်။

ထန်မော့မှာ ဇီးကွက်ကိုကြည့်နေခဲ့ပြီး ဇီးကွက်မှာလည်း ထန်မော့ကိုပြန်ကြည့်နေခဲ့သည်။

၂ယောက်သားအကြည့်ချင်းဆုံသွားပြီးနောက် ဇီးကွက်မှာ ခေါင်းကိုဖြည်းညှင်းစွာစောင်းလျက်မြည်သံပြုလာသည်။

"ဟူး"

ထန်မော့"..."

ဇီးကွက်တစ်ကောင်နဲ့ စွပ်ပြုတ်တစ်ခွက်ကြားမှာ ဘယ်လိုအမှန်တရားများ ရှိနေမှာလဲ...

ထန်မော့၏ ခြေထောက်အောက်မှ စက္ကန့်လက်တံမှ တချက်ချက်နှင့် ရွေ့လျားနေခဲ့သည်။ စက္ကန့်၃၀ကျော်လွန်သွားခဲ့ချေပြီ။ ထန်မော့၏ မျက်လုံးများမှာ ဇီးကွက်နှင့် စွပ်ပြုတ်ခွက်တွင် စွဲကပ်နေဆဲဖြစ်သည်။ ဇီးကွက်မှာ သာမာန်ဇီးကွက်တစ်ကောင်သာဖြစ်ပြီး စွပ်ပြုတ်ခွက်မှာမူ ဝေးကွာနေသဖြင့် အနံ့မခံနိုင်သလို အရသာကိုရော ပါ၀င်ပစ္စည်းများကိုပါ မသိနိုင်ချေ။

ထန်မော့အတော်ကြာစိုက်ကြည့်နေပြီးနောက် ရုတ်ချည်း ဆန့်ကျင်ဘက်တွင်ရပ်နေသော ယုန်နက်ကို မော့ကြည့်လိုက်သည်။

ယုန်နက်မှာလည်း ထိုဇီးကွက်နှင့် စွပ်ပြုတ်ခွက်ကို စိုက်ကြည့်နေခဲ့သည်ပင်။ သူသည်ထန်မော့၏ အကြည့်ကို သတိထားမိသော် ၄င်း၏ မျက်နှာတွင် စိတ်လှုပ်ရှားမှုအနည်းငယ်ထင်ဟပ်လာပြီး ဟောက်လိုက်သည်။

"ဘာလာကြည့်နေတာလဲ"

ထန်မော့ နှုတ်ခမ်းကို အသာသပ်လိုက်မိသည်။

အချိန်ကျလာသောအခါတွင်မူ ထိုယုန်နက်မှာ သိပ်တုံးအပုံမပေါ်တော့ပဲ အမှားလည်း မလုပ်ခဲ့ချေ။

၁မိနစ်မှာ တိုတောင်းလွန်းခဲ့သည်။ စက္ကန့်လက်တံမှာ သုညသို့ညွှန်ပြလိုက်သည်နှင့် လေထုထဲတွင် ဖေညာက်မြင်နိုင်သော အပြာရောင် နံရံတစ်ခုပေါ်လာခဲ့လေသည်။ ၄င်းမှာ နာရီ၏ အလယ် ဇီးကွက်၏ ခေါင်းအပေါ်တည့်တည့်တွင် ဒုန်းခနဲပိတ်ချလိုက်သည်။ သို့သော် ဇီးကွက်ထံမှ မည်သည့်တုန့်ပြန်မှုမှမရှိခဲ့ချေ။ သူက ထန်မော့ကို တစ်လှည့် ယုန်နက်ကိုတစ်လှည့်သာ ခေါင်းကိုလည်လျက် ကြည့်နေခဲ့လေသည်။

"၆နာရီက ကစားသမား ကျေးဇူးပြုပြီး အမှန်တရားတွေကို ပယ်ထုတ်ပေးပါ"

ထန်မော့ အပြာရောင်နံရံမှ တစ်ဆင့် တစ်ဖက်မှယုန်နက်မှာ ပါးစပ်ကိုဟလျက် တစ်ခုခုပြောနေသည်ကို တွေ့လိုက်ရသည်။ သို့သော် ထန်မော့ ဘာတစ်ခုကိုမှမကြားရချေ။ ဤနံရံမှာ တစ်ဖက်နှင့်တစ်ဖက် အသံမဖောက်နိုင်အောင် ပိတ်ထားပြီး ခိုးနားထောင်မရအောင် လုပ်ပေးထားသည်ပင်။

ထန်မော့တည်ငြိမ်စွာဆိုလိုက်သည်။

"တီဗွီနဲ့ မီးအိမ်ဟောင်းက လျှပ်စစ်ပစ္စည်းတွေ...သူတို့၂ခုကြားက တစ်ခုတည်းသောတူညီတဲ့ အမှန်တရားက သူတို့ကို လူသားတွေက လုပ်ထားတာဖြစ်ပြီး လျှပ်စစ်နဲ့ပတ်သက်ပြီး လုပ်ဆောင်နိုင်စွမ်းရှိတယ်"

အပြာရောင်အလင်းတစ်ခုက တီဗွီနှင့် မီးအိမ်ပတ်လည်တွင် လင်းလာခဲ့သည်။

ထန်မော့ကဆက်ပြောလိုက်သည်။

" စားပွဲနဲ့ လေးကြားက အမှန်တရားက သူတို့က လူသားတွေပြုလုပ်ထားတာဖြစ်ပြီးတော့ နှစ်ခုလုံးက သစ်သားနဲ့လုပ်ထားတဲ့ ပစ္စည်းတွေ"

စားပွဲနှင့် လေးမှာလည်း အပြာရောင် တောက်ပလာခဲ့သည်။

အဆုံး၌ ထန်မော့သည် ဇီးကွက်နှင့် စွပ်ပြုတ်ခွက်ကို ကြည့်လိုက်သည်။ သူသည်အသက်ကိုဖြည်းညှင်းစွာရှူထုတ်လိုက်လေသည်။ ထို့နောက်တည်ငြိမ်စွာဆိုလိုက်သည်။

"ဇီးကွက်နဲ့ စွပ်ပြုတ်ကြားက တစ်ခုတည်းသော အမှန်တရားက ဒီဟာက စွပ်ပြုတ်အရည်...ဇီးကွက်ပေါ်မှာ အသားတွေရှိပြီးတော့ စွပ်ပြုတ်ထဲမှာလည်း အသားတွေရှိတယ်...တီဗွီ မီးအိမ် စားပွဲ နဲ့ လေး ဒီထဲကတစ်ခုမှာမှ အသားတွေမရှိဘူး... အသားက စွပ်ပြုတ်နဲ့ ဇီးကွက်မှာပဲ ရှိတယ်"

ထန်မော့ ပြောနေစဥ်မှာလည်း ဇီးကွက်နှင့် စွပ်ပြုတ်ခွက်ကို စိုက်ကြည့်နေခဲ့သည်။

ထိုပစ္စည်း၂ခုပေါ်တွင် အပြာရောင်အလင်းက ဖြည်းညှင်းစွာတောက်ပလာခဲ့သည်။ ဇီးကွက်သည် ထိုအလင်းရောင်ကြောင့် လန့်သွားပြီး ထပျံလိုသော်လည်း မမြင်နိုင်သောလှောင်ချိုင့်ထဲတွင်ပိတ်မိနေခဲ့လေသည်။

🌍

Prev Next