MM Story Teller

Chapter 178

Viewers 32k

🌍Chapter 178

မော်စကို အနီရောင်ရင်ပြင်၊ Saint Basil's Cathedral အဆောက်အဦး၌...

အရပ်မြင့်မြင့်နှင့် သန်မာသောလူမှာ ထိုကြေညာမှုကိုကြားပါသော်လည်း သူ၏အပြာရောင်မျက်လုံးများမှာ တစ်ချက်လေးမျှ လှုပ်ခတ်မသွားခဲ့ချေ။ သူကထိုအနီရောင်ရင်ပြင်မှ ဖြည်းညှင်းစွာ ပြန်လှည့်သွားခဲ့သည်။ လမ်းဘေးမီးတိုင်တစ်ခုမှ အဖြတ်တွင် သူသည် လက်ကိုဆန့်လျက် ထိုမီးတိုင်ကို ဆွဲနှုတ်လိုက်၏။ ထို့နောက် ၄င်းအား သူ၏နောက်မှ အနက်ရောင်မျှော်စင်ထံ အားမာန်အပြည့်ဖြင့် လှမ်း၍ပစ်လိုက်လေသည်။

ထိုလမ်းမီးတိုင်မှာ တကယ်ပင်မီတာ၁၀၀အမြင့်အထိ ပျံတက်သွားပြီး အနက်ရောင်မျှော်စင်ကို ထိုးဖောက်ခါနီးမှာပင် ၄င်းမှာ လေထုကိုသာ ထိုးဖောက်သွားလျက် မြေပြင်ပေါ်သို့ ချောမွေ့စွာ ပြန်ကျလာခဲ့သည်။

ကျယ်လောင်သောအသံတစ်ခုနှင့်အတူ ထိုလမ်းမီးတိုင်က အနက်ရောင်မျှော်စင်အောက်မှ cathedral အဆောက်အဦးပေါ် ပြုတ်ကျသွားခဲ့သည်။ ထိုဘုရားကျောင်း၏အထဲတွင်အလားတူ သံထည်အပိုင်းအစများ ပစ္စည်းများစွာ ပြန့်ကျဲလျက်။ ကျောက်စိမ်းဖြင့် ထုထားသော ဘုရားသခင်ရုပ်ထုမှာလည်း အစိတ်စိတ်အမွှာမွှာကွဲကြေလျက်။

တိတ်ဆိတ်နေသော မော်စကိုတွင် ထိုလူကြီးသည် ထူထဲသော နှင်းထုကို နင်းဖြတ်လျက် အနီရောင်မျှော်စင်မှ ထွက်ခွာသွားခဲ့လေသည်။

*****

တရုတ်ပြည် ယန်ကျိုး ဆားဗစ်ဧရိယာတွင်...

ဖူ၀မ်ရှန်း ပြတင်းပေါက်အနီးတွင်ရပ်လျက် ကြေညာသံ ရပ်တန့်သွားသည်အထိ အနက်ရောင်မျှော်စင်ကို ငေးကြည့်နေခဲ့လေသည်။ မိနစ်၀က်ခန့်ကျော်လွန်သွားပြီးနောက် သူကအသိပြန်၀င်လာလျက်

"အဲဒါ အနက်ရောင်မျှော်စင်ရဲ့ အသံပဲ"

ထန်မော့မှာ အလွန်တည်ငြိမ်နေပုံပေါက်လေသည်။

"အင်း အနက်ရောင်မျှော်စင်ရဲ့အသံ"

ဖူ၀မ်ရှန်းမှာ ရင်တွေတဒုန်းဒုန်းခုန်နေသဖြင့် ပြန်မဖြေနိုင်ခဲ့ချေ။ ထိုစဥ် ထန်မော့နှင့် သူ၏အစ်ကိုမှာ ပကတိတည်ငြိမ်လျက် အနည်းငယ်မှ စိတ်လှုပ်ရှားနေပုံမပေါ်သည်ကို တွေ့လိုက်ရလေသည်။

ထိုကလေးမှာ သက်ပြင်းကိုရှုထုတ်လျက် တည်ငြိမ်အောင်ကြိုးစားလိုက်သည်။ ထို့နောက် သူကဆိုလာခဲ့သည်။

"အနက်ရောင်မျှော်စင်က အမြဲတမ်း ကလေးစက်ရုပ်အသံနဲ့ကြေညာတာလေ...တစ်ကမ္ဘာလုံးကိုပဲ ဖြစ်ဖြစ် တရုတ်ပြည်ကိုပဲဖြစ်ဖြစ် ကစားသမားတစ်ယောက်ချင်းကိုပဲဖြစ်ဖြစ် ဒီအသံနဲ့ပဲကြေညာတာ ဒါပေမယ့် တခြားအသံတွေကိုလည်း သုံးဖူးတယ်"

ထန်မော့ကလည်း ပြောလာခဲ့သည်။

"အင်း လွန်ခဲ့တဲ့ ၅လက ဖူ၀မ်..."

သူကဖူ၀မ်သော်ကို လှည့်ကြည့်လိုက်သည်။

"ခင်များ ပထမဆုံးမျှော်စင်ကို တိုက်ခိုက်ပြီး တရုတ်ပြည်ကစားသမားတွေအကုန်လုံးကို ဂိမ်းထဲ ဆွဲခေါ်ခဲ့တာလေ။ အဲတုန်းကအနက်ရောင်မျှော်စင်က မိန်းကလေးအသံနဲ့ ကျေးဇူးတင်ပါတယ် သီချင်းကို ဆိုခဲ့တာ။ ပြီးတော့ အဲဒီမိန်းကလေးအသံနဲ့ပဲ ကလေးချော့တေးကိုလည်းဆိုဖူးသေးတယ်... ဒီယောကျာ်းသံကိုတော့တစ်ခါမှမသုံးဖူးဘူး... ပြီးတော့ ဒီတစ်ခေါက်က..."

ထန်မော့ တန့်သွားမိပြီးမှ ဆက်၍ပြောလိုက်သည်။

"ကစားသမားတိုင်း အနက်ရောင်ရောင်မျှော်စင်ကို တိုက်ခိုက်ဖို့ပြောသွားတယ်"

ဖူ၀မ်သော် မျက်ခုံးကိုပင့်လိုက်မိသည်။

"သူက ကိုယ့်အတွက် ကျေးဇူးတင်ပါတယ် သီချင်းကိုဆိုခဲ့တယ်ပေါ့"

ထန်မော့မှာ အနက်ရောင်မျှော်စင်၏အသံအသစ်နှင့် စည်းမျဥ်းအသစ်များအကြောင်း အတွေးများနေစဥ်ဖြစ်၍ ဖူ၀မ်သော်၏ မျက်လုံးများကို သတိမထားမိလိုက်ချေ။

ဖူ၀မ်သော်က အကြည့်ကိုပြန်ရုတ်လိုက်သည်။

"ဒီဟာက ကမ္ဘာကြီးအွန်လိုင်းပေါ်တက်လာတုန်းကကြေညာခဲ့တဲ့ သံမဏိစည်းကမ်းကြီး ၃ချက်ထဲက နောက်ဆုံးမြောက်အချက်ပဲ "

"ဟုတ်တယ် ၃ခုမြောက် စည်းကမ်းလေ"

ထန်မော့ကဆိုသည်။

"စည်းမျဥ်းအသစ်တွေမှာ နောက်လကစပြီး နောက်ဆုံးကျန်တဲ့ ကစားသမားတွေအတွက် ဂိမ်းကိုဖွင့်ပေးတော့မယ်လို့ပြောတယ်...ပြီးတော့ မျှော်စင်ကို တိုက်ခိုက်ဖို့လည်းပြောတယ်"

ထန်မော့သက်ပြင်းချလျက် ကောက်ချက်ချလိုက်သည်။

"အနက်ရောင်မျှော်စင်က ကစားသမားတွေကို သံမဏိစည်းကမ်းကြီးကိုမမေ့ဖို့ သတိပေးနေတာပဲ သူက ကစားသမားတိုင်းကို ရေသာခိုမနေပဲ ဆက်ပြီး သန်မာလာအောင် ကြိုးစားစေချင်တာ...အဲဒါကြောင့် ၃ချက်ထဲက နောက်ဆုံးအချက်ကိုပဲ ကြေညာခဲ့တာ"

ထန်မော့ကျန်သည်တို့ကို ဆက်မပြောသော်လည်း ဖူ၀မ်သော်နှင့် ဖူ၀မ်ရှန်းက အဓိပ္ပါယ်ကို နားလည်လေသည်။

အနက်ရောင်မျှော်စင်မှာ နန်ကျင်းအဖွဲ့လို နောက်ထပ်အဖွဲ့များ ပေါ်ပေါက်လာခွင့်ပေးတော့မည်မဟုတ်ချေ။

နန်ကျင်းကလွဲ၍ ကျန် ခရိုင်၉ခုတွင် လွန်ခဲ့သော ၂ရက်ကဂိမ်းထဲတွင် ပါ၀င်ခဲ့သောသူများအား နောက်ဆုံးကျန်ကစားသမားများဟု အနက်ရောင်မျှော်စင်မှ သတ်မှတ်လိုက်သည်လား မသေချာပါချေ။ မတ်လတွင် ရောက်ရှိလာမည့် ရှောင်လွှဲ၍မရသော မျှော်စင်တိုက်ခိုက်ခြင်းဂိမ်းအပြင် အနက်ရောင်မျှော်စင်ဗားရှင်း၃.၀၏ အဓိကပေးချင်သော သတင်းမှာ...

[ကစားသမားတိုင်း အနက်ရောင်မျှော်စင်ကို တိုက်ခိုက်ကြပါ] ဟူ၍ဖြစ်သည်။

ယခုချိန်မှစ၍ နန်ကျင်းအဖွဲ့ကဲ့သို့ အဖွဲ့အစည်းမျိုး တည်ရှိတော့လိမ့်မည်မဟုတ်ချေ။ နောက်လတွင် စတင်မည့် နောက်ဆုံးကျန်ကစားသမားများအတွက် မျှော်စင်တိုက်ခိုက်ဂိမ်းမှာ လူတိုင်း၏ခေါင်းပေါ်တွင် ချိတ်ဆွဲထားသော ဓါးတစ်လက်နှယ် မည်သူကိုမှ အချောင်ခိုရဲစေလိမ့်မည်မဟုတ်။

ထန်မော့ကဆိုလိုက်သည်။

"ဒါပေမယ့် ဒီတစ်ကြိမ်မှာ အနက်ရောင်မျှော်စင်ကတခြား သတင်းတစ်ခုကိုလည်းပေးခဲ့သေးတယ်...ကမ္ဘာကြီးကို နယ်မြေ၁၀ခုအဖြစ် ပိုင်းခြားထားတယ်...ပြောချင်တာက ပြီးခဲ့တဲ့ နောက်ဆုံးကျန်ရစ်သူ အမှိုက်များ ရှင်းလင်းရေးဂိမ်းလိုမျိုးက ကမ္ဘာအနှံ့မှာ ဖြစ်ခဲ့မှာပဲ သီခြားမကြေညာပေးတာပဲ ရှိမှာ "

ဖူ၀မ်သော်ကဆိုလာခဲ့သည်။

"လွန်ခဲ့တဲ့ ၅လနို၀င်ဘာ၁၅ရက်နေ့မှာ ကမ္ဘာကြီး အွန်လိုင်းပေါ်တက်လာပြီလို့ကြေညာပြီး နို၀င်ဘာ ၁၈ရက်နေ့မှာကျတော့ ကမ္ဘာအနှံ့ကလူတွေ ဂိမ်းထဲရောက်လာကြတယ်။"

ထန်မော့နှင့် ဖူ၀မ်ရှန်းက ဖူ၀မ်သော်အား ကြည့်လိုက်ကာ နောက်ဆက်တွဲစကားလုံးများကို စောင့်မျှော်နေခဲ့ကြသည်။

ဖူ၀မ်သော်ကရေရွတ်လိုက်သည်။

"UTC +8လား"

ဖူ၀မ်ရှန်းမှာ၄င်းကိုကြားလျှင် ရေရွတ်လာခဲ့သည်။

"အာ စံတော်ချိန်ကွာတာကြောင့်လား"

နန်ကျင်းအဖွဲ့နှင့် ဗျူဟာအဖွဲ့၏ ကိစ္စများမှာ အမြဲလိုလိုရှောင်ကျီထုံးကကိုင်ကွယ်ဖြေရှင်းလေ့ရှိသည်။ ဖူ၀မ်ရှန်းမှာ ကလေးမျှသာဖြစ်၍လားမဆိုနိုင် ရှောင်ကျီထုံးမှာ ထိုသတင်းများကို သူ့ထံမှ ဖုံးကွယ်ထားလေ့မရှိချေ။

ထန်မော့ ထိုကိစ္စကို ခန့်မှန်းမိပြီးဖြစ်သည်။

"အနက်ရောင်မျှော်စင်ရဲ့အချိန်က ကမ္ဘာစံတော်ချိန်ပေါ်မူတည်တယ်... ဒုတိယသံမဏိစည်းကမ်းက ဂိမ်းအချိန်က ၆နာရီကနေ ၁၈နာရီအထိလို့ပြောတယ်လေ ဒီဟာကနယ်မြေတစ်ခုချင်းစီရဲ့ စံတော်ချိန်အလိုက်ကွာလိမ့်မယ်...အကယ်၍ ခရစ်စမတ်လိုမျိုး နောက်ထပ်ဂိမ်းတစ်ခုရောက်လာရင်တော့ အဖြေရှိမှာပါ"

ဖူ၀မ်သော်ကတုန့်ပြန်လိုက်သည်။

"အချိန်နဲ့အမီ လိုက်ပြေးမလို့လား"

"အင်း အဲလိုပေါ့...တကယ်လို့ကမ္ဘာလည်တဲ့အလျင်ထက်ပိုမြန်မြန်မပြေးနိုင်ခဲ့ရင်တော့ ဂိမ်းထဲကိုတိုက်ရိုက်၀င်လိုက်တာပဲပိုကောင်းတယ်"

ဖူ၀မ်သော်က ခပ်ဖွဖွရယ်မောလာသည်။ ထန်မော့လည်းပြုံးလိုက်မိလေသည်။

ဖူ၀မ်ရှန်းက သူ့ အစ်ကိုနှင့် ထန်မော့တို့စကားပြောနေသည်ကို တိတ်တဆိတ် ရပ်ကြည့်နေခဲ့မိလေသည်။ သူတို့၏အတွေးများမှာ အလွန်လျှင်မြန်လှသည်။ များသောအားဖြင့် ထန်မော့သိပ်ပြောစရာမလိုလိုက်ခင်မှာပင် ဖူ၀မ်သော်မှာ သူ၏ဆိုလိုရင်းကို နားလည်နေခဲ့ပြီးဖြစ်သည်။

ဖူ၀မ်ရှန်းမှာ သူတို့ကို အမီလိုက်နိုင်ရုံသာရှိလေသည်။

၄င်းမှာ သူကနှေးကွေးပြီး မထက်လှဟု ဆိုလိုခြင်းမဟုတ်ချေ။ သူကထန်မော့နှင့် ဖူ၀မ်သော်တို့၂ဦးကြားကလို ထူးခြားသော နားလည်မှုမျိုး မရှိခြင်းသာ။

ဖူ၀မ်ရှန်း သူတို့၂ဦးကိုကြည့်လျက် သူ့ကိုယ်သူကြား၀င်ရန်မဖြစ်နိုင်ဟု တွေးလိုက်မိလေသည်။ ကံကောင်းသည်မှာ ထိုကလေးက ဤအဖွဲ့အတွင်း မိမိ၏အရေးပါမှုကို မေးခွန်းမထုတ်မိခင်တွင် ထန်မော့က ဒုတိယအကြောင်းအရာတစ်ခုကိုပြောလာခဲ့သည်။

"အနက်ရောင်မျှော်စင်ရဲ့ တတိယစည်းမျဥ်းက ဥာဏ်ရည်မသန်စွမ်းအဆင့်ကို ဖွင့်လိုက်ပြီတဲ့ ဥာဏ်ရည်မသန်စွမ်းအဆင့်ဆိုတာ ဘာကိုပြောတာလဲ"

ဖူ၀မ်ရှန်းကအလျင်အမြန်ဆိုလာခဲ့သည်။

"အာ ကျွန်တော် Geဆီက မျှော်စင်တိုက်ခိုက်ဂိမ်းထဲ ဆွဲသွင်းခံရတုန်းက အနက်ရောင်မျှော်စင်က အဲဒီဂိမ်းကို ဥာဏ်ရည်မသန်စွမ်းအဆင့်လို့ပြောခဲ့တယ်...ဒီတစ်ခုနဲ့အတူတူပဲလားတော့မသိဘူး...ဒါပေမယ့် ဒီတစ်ကြိမ်ကြေညာပေတဲ့ ဥာဏ်ရည်မသန်စွမ်းအဆင့်က မျှော်စင်တိုက်ခိုက်ခြင်းဂိမ်းမဟုတ်ပဲ ရိုးရိုးအနက်ရောင်မျှော်စင်ဂိမ်းပဲ...ရိုးရိုးဂိမ်းပဲနေမှာပေါ့"

၃ယောက်သားမှာ အနက်ရောင်မျှော်စင်၏ စည်းမျဥ်းအသစ်များနှင့် အမျိုးသားကြေညာသံအကြောင်း ဂရုတစိုက်ဆွေးနွေးခဲ့ကြလေသည်။

ညသန်းခေါင်တွင် ဖူ၀မ်ရှန်းက ဘူးအလွတ်အတော်များများကို ရေဖြည့်နေခဲ့သည်။ သူ၏စွမ်းရည်မှာ သူ့အား တစ်နေ့ကို ဘူး၃၀စာ ဓါတ်ဆားရည် ဖြည့်ခွင့်ပေးထားသည်ဖြစ်၍ သူထိုအခွင့်အရေးကို လုံး၀ဖြုန်းတီးခြင်းမရှိချေ။ ဖူ၀မ်ရှန်းဓါတ်ဆားရည်ကိုဖြည့်နေစဥ် ထန်မော့က ဆားဗစ်ဧရိယာမှ တိတ်တဆိတ်ထွက်လာခဲ့လေသည်။

ဖူ၀မ်သော်က ထန်မော့အား ကြည့်လာခဲ့လျှင် ထန်မော့က ပေါ့ပါးစွာဆိုလာခဲ့သည်။

"ကျွန်တော်သိပ်မကြာခင်ပြန်လာခဲ့မယ်"

သူက၄င်းကိုဆိုပြီးနောက် ဖူ၀မ်သော်အနားမှဖြတ်ကျော်သွားခဲ့သည်။ ကလေးကသူ့ကိုကြည့်လျက် အပြင်သွားမည်ဖြစ်ကြောင်း နားလည်သွားခဲ့လေသည်။ ဖူ၀မ်သော်မှာ ထန်မော့၏ ကျောပြင်ကို စိုက်ကြည့်နေခဲ့ပြီး ထန်မော့၏ကိုယ်ဟန်လုံး၀ပျောက်ကွယ်သွားသည့်အခါတွင်မူ သူ၏နှုတ်ခမ်းတို့တွန့်ကွေးသွားသော်လည်း ဘာကိုမျှမဆိုခဲ့ချေ။

ထန်မော့ ဆားဗစ်ဧရိယာနောက်မှ ခပ်နုတ်နုတ် ကော်ရစ်တာတစ်ခုလျှောက်လာခဲ့လေသည်။ ထို့နောက်သူ၏အိတ်ကပ်ထဲမှ အနီရောင်ပတ္တမြားကိုထုတ်ယူလျက် သူ၏ခေါင်းပေါ် အမူအယာမဲ့စွာတင်လိုက်လေသည်။ ထို့နောက် သူ၏ရှေ့မှ နံရံသို့ တိတ်တဆိတ်၀င်ဆောင့်လိုက်၏။

ဘန်း ဘန်း ဘန်း

၃ချက်၀င်ဆောင့်ပြီးနောက် ထန်မော့မှ ပြုတ်ကျလာသော အမှိုက်၃ခုကိုသိမ်းယူလျက် ထိုနေရာမှ ခပ်တည်တည်ပင် ထွက်လာခဲ့လိုက်သည်။

နောက်တစ်နေ့မနက်စောစောတွင် ၃ယောက်သားလည်း ခရီးဆက်လာကြတော့သည်။

ဖူ၀မ်သော်က ယန်ကျိုးမှ ပေကျင်းကိုသွားရန် ၄ရက်မျှကြာလိမ့်မည်ဟုဆိုခဲ့သည်။ သို့သော် ဟဲပေ့နယ်သို့အ၀င်တွင် သူတို့မှာ မျှော်စင်ဂိမ်းတစ်ခုအတွင်းသို့ ရုတ်တရက် ဆွဲသွင်းခံလိုက်ရလေသည်။ ဖူ၀မ်သော်နှင့် ဖူ၀မ်ရှန်း၂ယောက်သာ ဆွဲသွင်းခံလိုက်ရပြီး ထန်မော့တစ်ဦးသာကျန်ရစ်ခဲ့လေသည်။ ထန်မော့မှာ မိမိအသင်းဖော်၂ဦးပျောက်ကွယ်သွားသည်ကို မြင်သော် အံ့အားသင့်သွားခဲ့လေသည်။

ထန်မော့ ထိန်းချုပ်သူမဲ့နေသော စတီရင်ယာကို လျင်ဖြင့် ချက်ချင်းလှမ်းဆွဲလိုက်သည်။ ထို့နောက် သူကကားကို ဖြည်းညှင်းစွာ ရပ်လိုက်လေသည်။

၃ရက်ကျော်လွန်သွားပြီးနောက် ကိုယ်ဟန်၂ခုက အဝေးပြေးလမ်းပေါ်တွင် ပေါ်လာခဲ့လေသည်။

ဖူ၀မ်သော်၏ကိုယ်ပေါ်တွင်ဒဏ်ရာအချို့ရှိနေခဲ့သည်။ ဖူ၀မ်ရှန်းမှာ အခြေအနေပိုကောင်းသော်လည်း သူ၏နဖူးမှလည်း သွေးတချို့စီးကျနေခဲ့လေသည်။ ဂိမ်းထဲဆွဲသွင်းခံလိုက်ရပြီးကတည်းက ထန်မော့မှာ ကြက်ဆင်ဥကိုသုံးလျက် ဖူ၀မ်သော်ကိုဆက်သွယ်ကာ အခြေအနေကိုမပြတ်နားထောင်နေခဲ့လေသည်။ ယခု၂ဦးစလုံးပြန်လာပြီဖြစ်၍ ထန်မော့လည်း မောင်းနှင်သူခုံကို ဖူ၀မ်သော်အားပြန်ပေးလိုက်ပြီး အနီးဆုံးရှိ ဆားဗစ်ဧရိယာတစ်ခုဆီမောင်းလာခဲ့ကြလေသည်။

ထန်မော့ ထိုနေရာတွင် ရိက္ခာတချို့ကိုတွေ့ခဲ့သည်။ သူကကားထံသို့ပြန်လာပြီး ဖူ၀မ်သော်အား ရေဘူးတချို့ကိုကမ်းပေးလိုက်လေသည်။

"ခင်များအဆင်တပြေနဲ့ ဂိမ်းထဲကပြန်ထွက်လာပေမယ့် ဒီနေ့က မတ်လ ၁၄ရက်ဖြစ်နေပြီ"

ဖူ၀မ်သော် ရေဘူးကို လက်ခံလိုက်သည်။

"ဒီနေရာက ဟန်ဒန်းပဲ...မတော်တဆသာမရှိရင် မနက်ဖြန်မတိုင်ခင်တောင် ပေကျင်းကိုရောက်နိုင်တယ်"

ထန်မော့သူ၏အိတ်ထဲမှမြေပုံစာအုပ်ကို ဆွဲထုတ်ပြီး ဟဲပေ့မြေပုံကို ရှာဖွေလိုက်သည်။

"မြေပုံမှာပြထားတာတော့ ဟန်ဒန်းနဲ့ ၁၀၀ကီလိုမီတာကျော်ဝေးတယ်တဲ့.. ကျွန်တော် အဝေးပြေးလမ်းပေါ်ကနေ သေချာတွက်ကြည့်လာတာကတော့ အနက်ရောင်မျှော်စင်ရဲ့အရွယ်အစားအရဆို သိပ်မဝေးတော့ဘူး"

လူ၂ဦးမှာ တစ်ဦးကိုတစ်ဦး ကြည့်လိုက်မိကြသည်။

ဖူ၀မ်သော်ကဆိုလိုက်သည်။

"ဒီည ဟန်ဒန်းကိုသွားရအောင်"

ဟန်ဒန်း၊ ဟဲပေ့ မတ်လ ၁၄ရက် ၂၃:၃၀...

ဖူ၀မ်သော်မှာ ကားကိုမြို့စွန်အထိမောင်းနှင်လာခဲ့ပြီး မြေအောက်ကားပါကင်တစ်ခုတွင် ထိုးလိုက်သည်။ သူနှင့်ထန်မော့က ကားထဲမှ ထွက်လာပြီး ဖူ၀မ်ရှန်းအား ကားထဲတွင်စောင့်နေစေခဲ့သည်။ ထိုကလေးမှာ ၄င်းကိုနေသားကျနေပုံပင်။

"ကျွန်တော့်ကို စိတ်မပူနဲ့ Geနဲ့ အစ်ကိုထန်ဂရုစိုက်ပါ.. နန်ကျင်းမှာ ကျွန်တော်တို့နန်ကျင်းအဖွဲ့ကအတော်လေးသန်မာတယ်လေ...ခေါင်းဆောင်ချိုင်နဲ့ ခေါင်းဆောင်ရှောင်းတို့လဲ အနက်ရောင်မျှော်စင် ဗားရှင်းအသစ်ကိုလေ့လာဖို့ရှင်းကျဲခုဆီသွားဖူးတယ်...ဒါပေမယ့်ဒီနေရာက ဟန်ဒန်းဆိုတော့ဂရုစိုက်ပါ"

ထန်မော့ခေါင်းအသာညိတ်လိုက်သည်။

ဖူ၀မ်သော်ကမူ ဘာမှမဆိုခဲ့ချေ။

ဖူ၀မ်ရှန်း.. ထန်မော့နှင့်ဖူ၀မ်သော် ထွက်ခွာသွားသည်ကို ကြည့်နေခဲ့မိလေသည်။ သူတို့၂ဦးစလုံးမှာအလွန်လျင်မြန်ပြီး စက္ကန့်ပိုင်းအတွင်းမှာပင် ကားပါကင်ထဲမှ ပျောက်ကွယ်သွားခဲ့လေသည်။ သူသည် အကူပစ္စည်းကို တင်းတင်းဆုပ်လျက် ပတ်၀န်းကျင်ကို အလွန်တိတ်တဆိတ်ဂရုပြုထားလိုက်သည်။

ထန်မော့နှင့် ဖူ၀မ်သော်တို့ ဟန်ဒန်းကိုတစ်ခါမျှမရောက်ဖူးသော်လည်း အနက်ရောင်မျှော်စင်ကို ရှာရမခက်လှပေ။ ၂ဦးသားမှာလမ်း၏တစ်ဖက်တစ်ချက်စီမှခပ်မြန်မြန်လျှောက်သွားနေကြပြီး အန္တရာယ်မှန်သမျှကို အာရုံအပြည့်စိုက်ထားခဲ့သည်။ သူတို့သည်အနက်ရောင်မျှော်စင်အနီးသို့ရောက်သောအခါမှ ပြန်ဆုံလိုက်ကြသည်။ ထို့နောက် လူသူမဲ့သော အင်္ကျီဆိုင်တစ်ဆိုင်ကိုတွေ့လျှင် ထိုအထဲသို့လျှင်မြန်စွာ၀င်လိုက်ကြသည်။

ပတ်၀န်းကျင်တစ်ခုလုံးတိတ်ဆိတ်လျက်။

ဆိုင်ထဲသို့ရောက်သည်နှင့် ဖူ၀မ်သော်က တံခါးကိုလျှင်မြန်စွာပိတ်လိုက်ပြီးနောက် ထန်မော့ တီးတိုးဆိုလိုက်သည်။

"ဒီကိုလာ"

ဖူ၀မ်သော်တန့်သွားပြီးမှ ထိုနေရာသို့လျှောက်သွားလိုက်သည်။

ဤအင်္ကျီဆိုင်မှာ ဟန်ဒန်းစင်တာဘေးမှ လမ်းမကြီးဘေးတွင်တည်ရှိသော တံခါးတစ်ပေါက်တည်းပါသည့်ဆိုင်တစ်ဆိုင်ဖြစ်သည်။

လမ်းမဖက်ကိုမျက်နှာမူထားသော တံခါးတစ်ချပ်မှ လွဲလျှင် ကျန်သည်တို့က မှန်နံရံများနှင့်ကာရံထားသည်။ ထန်မော့နှင့်ဖူ၀မ်သော်မှာ ဆိုင်၏မျက်ကွယ်နေရာတွင် အတူတကွထိုင်ရင်း မနီးမဝေးမှ အနက်ရောင်မျှော်စင်ကို ကြည့်နေခဲ့လေသည်။

တစ်မိနစ်ကြာပြီးနောက် အနက်ရောင်အရိပ်တစ်ခုမှ လမ်းကိုဖြတ်ကူးလျက် အနီးရှိမောလ်တစ်ခုထဲ ၀င်ရောက် ပုန်းကွယ်သွားခဲ့သည်။

ထန်မော့ ထိုအရိပ်ကို ဂရုတစိုက်ကြည့်နေခဲ့လေသည်။

၅မိနစ်ကြာစောင့်ဆိုင်းပြီးနောက်တွင် ထိုလူရိပ်အပြင် တခြားမည်သူကိုမျှ ထပ်မတွေ့ရတော့ချေ။

လေပြည်အေးတစ်သုတ်က မြေပြင်ပေါ်မှ ဖုန်မှုန့်များကို လွင့်စင်သွားစေပြီး ၄င်း၏အောက်မှ ခြောက်သွေ့နေသောသွေးများကို ဖော်ပြလာခဲ့သည်။ ပြတင်းပေါက်မှ တဆင့် ထန်မော့နှင့်ဖူ၀မ်သော်က အနက်ရောင်မျှော်စင်ကိုစိုက်ကြည့်လျက်သားပင်။

ညသန်းခေါင်တွင် တောက်ပသော အဖြူရောင်အလင်းတချို့အနက်ရောင်မျှော်စင်ပေါ်မှ ပေါ်ထွက်လာခဲ့လေသည်။

ထန်မော့သည် အဆင့်မြှင့်တင်ရာတွင် အနက်ရောင်မျှော်စင်မှ ထိုမျှတောက်ပသော အဖြူရောင်အလင်းမျိုး ထုတ်လွှင့်မည်ဟု မထင်ထားခဲ့ချေ။ သူ၏မျက်လုံးတို့မှ အလွန်းစူးရှသောအလင်းကြောင့်နာကျင်သွားမိသည်အထိပင်။ သူမတုန့်ပြန်လိုက်နိုင်ခင်မှာ လက်တစ်ဖက်မှာ သူ၏မျက်လုံးများရှေ့သို့ အုပ်မိုးလျက် ဖုံးကွယ်သွားခဲ့သည်။

ထန်မော့၏ အသက်ရှူနှုန်းတို့ရပ်တန့်သွားခဲ့လေသည်။

ပူနွေးသော လက်ဖ၀ါးကြီးက သူ၏မျက်ခွံများကိုဖိကပ်ထားလျက် ထိုပူနွေးသော ခံစားချက်မှာ သူ၏အရေပြားပေါ်မှ ဖြတ်သန်း စီးဆင်းသွားသည့်နှယ်။

ဖူ၀မ်သော်၏ လက်ချောင်းများကြားမှ အလင်းရောင်ဖျော့ဖျော့တချို့တိုး၀င်လာဆဲ။ ထန်မော့၏နှုတ်ခမ်းတို့ပွင့်ဟသွားသော်လည်း အတော်ကြာသည်အထိ ဘာမှမဆိုနိုင်ခဲ့ချေ။ ၃စက္ကန့်ကြာပြီးနောက်ထိုအလင်းရောင်လည်း ပြန်လည်ပျောက်ကွယ်သွားပြီး ဖူ၀မ်သော်လည်းသူ့လက်ကို ဖယ်ရှားလိုက်လေသည်။

🌍

Prev Next