MM Story Teller

Chapter 177

Viewers 33k

🌍Chapter 177

"လက်ထုတ်လိုက် လက်ဆွဲနှုတ်ဆက်ရအောင်"

ဖူ၀မ်ရှန်းအံ့အားသင့်သွားမိသည်။

"ဟင်"

ထန်မော့ သူ့စွမ်းရည်အကြောင်းကို ဖူ၀မ်ရှန်းအား အလုံးစုံမပြောပြလိုက်ပဲ အနည်းငယ်မျှသာပြောပြလိုက်သည်။ ထိုကလေးကသူ၏လက်ကို ထုတ်ပေးလာခဲ့သည်။ ထန်မော့ထိုလက်ကို ဖမ်းဆုပ်ထားလျက် ရတနာကော်ရစ်တာအကြောင်းစတင်ပြောပြလာခဲ့သည်၊ ကြက်ဆင်ဥအကြောင်းကတော့ပြပြရန်မလိုအပ်ချေ။ ထန်မော့မှ ထိုကလေးကို လိမ်ရန် အကြောင်းပြချက်တချို့သာ ဖန်တီးလိုက်သည်။

ထန်မော့က ထူးဆန်းထွေလာဆပ်ကပ်အကြောင်းပြောပြီးနောက်တွင် ဖူ၀မ်သော်မှာ ကောင်တာတွင်မီလျက် မိမိတို့အား ငုံ့ကြည့်နေသည်ကို တွေ့လိုက်ရလေသည်။ လရောင်က ထိုအမျိုးသား၏အနောက်ဘက်မှ ဖြာကျနေပြီး သူ၏ အမူအယာကို ရှင်းလင်းစွာမမြင်နိုင်ခဲ့ချေ။

ထန်မော့ကမေးလိုက်သည်။

"ခင်များမအိပ်ဘူးလား"

ဖူ၀မ်သော် သူတို့၂ဦး၏ ဆုပ်ကိုင်ထားသော လက်များကိုကြည့်လျက် စကားလမ်းကြောင်းကိုပြောင်းလိုက်သည်။

"သူ့စွမ်းရည်ကိုရပြီလား"

"မရသေးဘူး"

ထန်မော့၏စကားသံမှာ တန့်သွားခဲ့သည်။ ထို့နောက် သူဖူ၀မ်ရှန်း၏လက်ကိုလွှတ်လိုက်ကာ ဆိုလာသည်။

"ရသွားပြီ"

ထို့နောက် ထန်မော့ သူ၏လက်ဖ၀ါးကို မြေကြီးပေါ် ဖိလိုက်သည်နှင့် အပြာရောင်အလင်းလုံးတစ်လုံးက သူ၏ကျန်လက်ဖ၀ါးတစ်ဖက်မှ ထွက်လာခဲ့သည်။ ထိုအလင်းလုံးမှာ သူ၏ခေါင်းတစ်၀က်စာခန့်ကြီးမားလေသည်။ ၄င်းက ထန်မော့လက်ထဲမှ လျှင်မြန်စွာ ပြေးထွက်သွားသော်လည်း ထန်မော့၄င်းကို သွက်လက်စွာဖမ်းယူလိုက်သည်။ ထိုအလင်းလုံးကို ဖမ်းမိသည်နှင့် ထန်မော့၄င်းကို ဖိချေလိုက်သည်။

၅မိနစ်ကြာပြီးနောက် ထန်မော့၏မျက်နှာမှာ နှင်းဆီရောင်သန်းလာခဲ့လေသည်။

ဖူ၀မ်သော်မှာ သူ၏အမူအယာကိုမြင်လျှင် အဓိပ္ပါယ်များပါ၀င်နေသော အပြုံးတစ်ခုကို ပြုံးပြလာခဲ့သည်။

ဖူ၀မ်ရှန်းမှာလည်း ထန်မော့က သူ၏စွမ်းရည်ကို သိသည်ဟုကြားသည်နှင့် အလွန်သိချင်လာခဲ့လေသည်။

"အစ်ကိုထန် ကျွန်တော့်စွမ်းရည်ကဘာလဲဟင်...ကျွန်တော်သိသလောက်တော့ တစ်နေ့မှာ ဓါတ်ဆားရည်ပမာဏတစ်ခုလောက်အထိ ထုတ်လို့ရတယ်ဆိုတာပဲ...ပြီးတော့ ကုသနိုင်စွမ်းလည်း မြင့်တယ်ဆိုတာပေါ့...တခြားအချက်တွေရောရှိသေးလား"

ထန်မော့၏လက်ဖ၀ါးမှ ကြည်လင်သော ရေတချို့စီးကျလာခဲ့သည်။

'တစ်ပြားမှ ၀ှက်ထားဖို့ မစဥ်းစားနဲ့' စွမ်းရည်မှာ သူ့အား တစ်ဖက်သူ၏စွမ်းရည်အကျဥ်းချုပ်ကို သိစေရုံသာမက ထိုစွမ်းရည်ကိုလည်း အနည်းငယ် ပွားယူခွင့်ပေးလေသည်။ စွမ်းရည်သက်ရောက်မှုကတော့ သေချာပေါက် လျော့ချခံထားရလေသည်။ ထန်မော့ ထိုစွမ်းရည်ကို အသုံးပြုနေသည်အား မြင်သည်နှင့် ဖူ၀မ်သော်မှာ ဓါးတစ်ချောင်းကိုထုတ်ယူလျက် သူ၏လက်ဖ၀ါးကို လှီးဖြတ်ရန် တွန့်ဆုတ်မနေခဲ့ချေ။

ထန်မော့ထိတ်လန့်သွားခဲ့သော်လည်း အလျင်အမြန်တုန့်ပြန်လျက် သူ၏လက်ဖ၀ါးကို ဖူ၀မ်သော်လက်ဖ၀ါးကိုဖိလျက် စွမ်းရည်ကိုထုတ်လွှတ်လိုက်လေသည်။

ဓါးဆားရည်တချို့က ဖူ၀မ်သော်၏ လက်ဖ၀ါးအပေါ်စီးဆင်းသွားလျက် ထိုဒဏ်ရာမှာ မျက်စိဖြင့်မြင်နိုင်သောအလျင်နှင့် ကောင်းမွန်လာခဲ့သည်။

"ကျွန်တော် ဒဏ်ရာသေးသေးလေးတွေကို ကုလို့ရတယ်...ကုသမှုနှုန်းကတော့ ၂၀ရာခိုင်နှုန်းလောက်ပဲ ပိုမြန်လာတာ"

ဖူ၀မ်ရှန်းကဆိုသည်။

ထန်မော့ကခေါင်းညိတ်လိုက်သည်။

"အင်း ငါကတော့ ၁၀ရာခိုင်နှုန်းလောက်ပဲ"

ဖူ၀မ်ရှန်းကမေးလာခဲ့သည်။

"အစ်ကိုထန် ကျွန်တော့်စွမ်းရည်က ဘာလဲဟင်"

ထန်မော့မှာ ဖူ၀မ်ရှန်းကို အတော်ကြာစိုက်ကြည့်နေမိလျက် တည်ငြိမ်စွာဆိုလိုက်သည်။

"မင်းရဲ့စွမ်းရည်က ကုသစွမ်းရည်ပါတဲ့ ဓါတ်ဆားရည်တွေအများကြီးကိုထုတ်လို့ရသလို အဆင့်လည်းမြှင့်လို့ရတယ်...ဒါပေမယ့် ငါပွားယူလိုက်ပြီးတဲ့အခါ ရတဲ့ စွမ်းရည်က သိပ်မစွမ်းဘူး...လောလောဆယ်တော့ မင်းရဲ့စွမ်းရည်က အဆင့်၃ဆိုတာပဲ သေချာသိတယ်... စွမ်းရည်တွေကအဆင့်မြှင့်လို့ရတယ်...အဆင့်၅လောက်ရှိတဲ့ စွမ်းရည်မျိုးတွေလည်း ငါတွေ့ဖူးတယ်"

ဖူ၀မ်ရှန်း ထန်မော့၏ ဖူးဆန်းနေသော အမူအယာကို သတိထားမိပြီး ထပ်မေးမလာတော့ချေ။ သူသည် ထန်မော့၏ စွမ်းရည်က တစ်ခုခုဖြစ်နေလို့ဟုသာတွေးလိုက်လေသည်။ သူ၏စွမ်းရည်ကမှားယွင်းနေခြင်းသာဆိုလျှင် အစ်ကိုထန်မော့မှာ သူ့ထံမှ လျှို့၀ှက်ထားမည်မဟုတ်ချေ။

ထိုကလေးကထပ်ပြီးမေးမလာတော့သည်ကို မြင်လျှင် ထန်မော့စိတ်အေးစွာ သက်ပြင်းချလိုက်မိသည်။ ထို့နောက် သူမော့ကြည့်လိုက်လျှင် ဖူ၀မ်သော်က သူ့အား မျက်ခုံးများပင့်လျက်ကြည့်နေကြောင်း သတိထားမိလိုက်သည်။

ဖူ၀မ်သော်: ဘာဖြစ်လို့လဲ

ထန်မော့: ခင်များ ညီရဲ့ စွမ်းရည်က တစ်ခုခုပဲ...

ဖူ၀မ်သော်: ဘယ်လိုကြောင့်လဲ...

ထန်မော့: လမ်းသွားလျှောက်ရအောင် ခင်များကို ပြောပြမယ်...

နှစ်ဦးသား အကြည့်ချင်းဆုံရုံမှဖြင့် စကားတချို့ကို ဖလှယ်လျက် ဆားဗစ်ဧရိယာမှ အတူတကွထွက်သွားခဲ့ကြသည်။ ထို့နောက်တွင်မှ ထန်မော့ သူအလင်းလုံးထဲမှ မြင်ခဲ့ရသည်တို့ကို ပြောပြလာခဲ့သည်။

[စွမ်းရည်: မဟာဆန်တဲ့ ပိုင်စွေ့တောင်ရဲ့ နှစ်၁၀၀ စိမ့်စမ်းရေ]

[ပိုင်ရှင်: မသိ]

[အမျိုးအစား: မသိ]

[အသုံးပြုပုံ: ကုသမှုပါ၀င်သော ဓါတ်ဆားရည်များကို ထုတ်လုပ်ခြင်း]

[အဆင့်: ၃]

[ကန့်သတ်ချက်: မသိ]

[မှတ်ချက်: နင့်ညီမကိုပဲ မသိ ၊ ငါက မဟာဆန်တဲ့ ပိုင်စွေ့တောင် နှစ်၁၀၀ စိမ့်စမ်းရေဟဲ့]

ထိုစကားများကိုပြောနေစဥ် ထန်မော့၏ အမူအယာက တစက်လေးမှ ပြောင်းမသွားခဲ့ချေ။ သူသည် အပေါစားစာအုပ်၏ စကားလုံးများကို ခံနိုင်ရည်ရှိနေခဲ့ပြီးဖြစ်ကာ ဤတစ်ပြားမှ၀ှက်ထားဖို့ မစဥ်းစားနဲ့ စွမ်းရည်ကို အသုံးပြုသောအခါတွင်လည်း တူညီသော သက်ရောက်မှုမျိုးရှိနေလိမ့်မည်ဟု မမျှော်လင့်ထားမိချေ။ ထန်မော့ တည်ငြိမ်စွာဆိုလိုက်သည်။

"ဒီစွမ်းရည်က တခြားသူရဲ့စွမ်းရည်ကို ကြည့်လို့ရသလို သုံးလို့လည်း ရတယ်... ဒါပေမယ့် သူပြထားတဲ့ အကြောင်းအရာကမပြည့်စုံဘူး... ဖူ၀မ်ရှန်းရဲ့ စွမ်းရည်က အပြာရောင်ဆိုတော့ လက်တွေ့အသုံးချအမျိုးအစားဖြစ်နိုင်တယ်...ဒါမှမဟုတ် လေးဖက်မြင်တို့ ပေါင်းစပ်ဖွဲ့စည်းအမျိုးအစားလည်း ဖြစ်ရင်ဖြစ်မှာပေါ့"

အချက်အလက်မပြည့်စုံမှုကြောင့် တစ်ဖက်လူ၏ အပြာရောင် အလင်းလုံးမှာ မည်သည်ကို ရည်ညွှန်းမှန်း သေချာမပြောနိုင်ချေ။ သူကဆိုခဲ့သည်။

"ကျွန်တော်သူ့ရဲ့ စွမ်းရည်ကို ခဏခဏပွားယူကြည့်ပြီးတော့ သူ့ရဲ့ ကန့်သတ်ချက်နဲ့ အမျိုးအစားတွေရော ပေါ်လာဦးမလားစမ်းကြည့်လိုက်မယ်"

"အိုကေ"

ထန်မော့ကမေးလိုက်သည်။

"ကျွန်တော်တို့ ဘယ်တော့ ပေကျင်းကိုရောက်မှာလဲ"

" အမြန်ဆုံးဆိုရင်တော့ ၂ရက်ပေါ့...တခြားထွေထွေထူးထူးကြုံရတာမရှိရင် အလွန်ဆုံးတော့ ၄ရက်ပဲ"

၄င်းမှာ လက်ခံနိုင်လောက်သော အချိန်ပင်။

ထန်မော့ သူ့ သူငယ်ချင်း၏ အိမ်လိပ်စာကိုစတင် ပြန်လည်တွေးတောနေလိုက်သည်။ ကမ္ဘာကြီးအွန်လိုင်းပေါ်မတက်ခင်က သူသည် ပေကျင်းကိုတစ်ခေါက်မျှသာ ရောက်ခဲ့ဖူးသည်။ ယခုသူ၏မှတ်ဥာဏ်များမှာလည်း တိုးတက်လာပြီဖြစ်၍ သူသည် သူငယ်ချင်း၏ အိမ်လိပ်စာကိုလည်း မှတ်မိကောင်း မှတ်မိနိုင်လေသည်။ ပြဿနာမှာ ပေကျင်းကကြီးလွန်းခြင်းပင်။ ထန်မော့မှာ တွေးရင်းတွေးရင်းဖြင့် ဆားဗစ်ဧရိယာထဲသို့ ပြန်လည်ရောက်ရှိလာခဲ့သည်။

ထိုစဥ်သူ၏နောက်မှ လေသံတိုးတိုးတစ်ခုကိုကြားလိုက်ရလေသည်။

"စွမ်းရည်တွေအားလုံးမှာ အဲဒီလို ထူးဆန်းတဲ့ မှတ်ချက်မျိုးရှိတာလား"

ထန်မော့၏ ခြေလှမ်းတို့ရပ်တန့်သွားပြီး မကောင်းသော ခံစားချက်တစ်ခု သူ၏ရင်ထဲတွင် လှိုက်တက်လာခဲ့သည်။ ဖူ၀မ်သော်က သူ့အား အပြုံးဖြင့်ကြည့်လျက်

"မင်းရဲ့ စွမ်းရည်စာအုပ်မှာရော တခြားလူတွေရဲ့ စွမ်းရည်ကို စုဆောင်းတဲ့အခါ အဲဒီလို စိတ်၀င်စားဖို့ကောင်းတဲ့ နာမည်နဲ့ မှတ်ချက်တွေပါတာလား"

ထန်မော့ဖူ၀မ်သော်အား တည်ငြိမ်စွာကြည့်လိုက်လျှင် ဖူ၀မ်သော်မှာ သူ့အား ပြုံးလျက်ကြည့်နေခဲ့သည်။ လူ၂ဦး၏ မျက်၀န်းများမှာ လေထဲတွင် ဆုံသွားလျက် မည်သူကမျှ စကားစမဆိုကြချေ။

ထန်မော့မပြောသ၍ ထိုစာအုပ်ထဲမှ အကြောင်းအရာများကို မည်သူမျှ သိမည်မဟုတ်ချေ၊ ချန်ရှန်းရှန်းပင်လျှင် တည်တံ့သော ထန်မော့လိုလူမျိုးတွင် ဤကဲ့သို့စွမ်းရည်မျိုးရှိသည်ဟု ခန့်မှန်းနိုင်လိမ့်မည်မဟုတ်ချေ။

ထန်မော့တည်ငြိမ်စွာဆိုလိုက်သည်။

"မဟုတ်ပါဘူး"

ဖူ၀မ်သော်နှုတ်ခမ်းတို့ပွင့်ဟလာလျက် ထပ်မံစကားဆိုရန် ပြင်လာခဲ့သည်။ ထိုစဥ် သူတို့၏ ခေါင်းပေါ်မှ ကျယ်လောင်သော အသံတစ်ခုကိုကြားလိုက်ရလေသည်။ ထန်မော့နှင့် ဖူ၀မ်သော်သည်လည်း ခေါင်းကိုမော့လျက် သတိနှင့်ကြည့်လိုက်မိလေသည်။

တချိန်တည်းမှာပင် နန်ကျင်း ဗျူဟာ အဖွဲ့ရှိ ရှောင်ကျီထုံးမှာ နင်နင်းနှင့် နောက်ထပ်အစီအစဥ်တချို့ကို တိုင်ပင်နေရာမှ ရပ်တန့်သွားခဲ့လေသည်။ ရှန်ဟိုင်းရှိ မောလ်တစ်ခု၏ မြေအောက်ကားပါကင်တွင် လော့ဖုန်းချန်းနှင့် ချန်ရှန်းရှန်းမှာ သူတို့လုပ်လက်စများကို ရပ်လျက် တစ်ယောက်ကို တစ်ယောက်ကြည့်လိုက်မိကြသည်။

ထိုကျယ်လောင်သောအသံမှာ တရုတ်ပြည်၏ နေရာအနှံ့တွင် ထွက်ပေါ်လာခဲ့ပြီး အနက်ရောင်မျှော်စင်မှာ တောက်ပသောရောင်စုံအလင်းများကို ထုတ်လွှတ်လာခဲ့သည်။ ထို့နောက် ၄င်းမှာ ရုတ်ချည်း ပြန်ငြိမ်ကျသွားခဲ့သည်။ ၄င်းမှာ လွန်ခဲ့သော ၃လမှ ခရစ်စမတ်ညတုန်းကလိုပင်။ အနက်ရောင်မျှော်စင်မှာ ကမ္ဘာအနှံ့မှ ကစားသမားများကို စပရိုက်တစ်ခုပေးခဲ့သည်။

ထိုစဥ် မရေတွက်နိုင်သော ကလေးသံများက တပြိုင် နက်ထဲ ကြေညာလာခဲ့သည်။

"တင်းတောင်~ ဗားရှင်းအသစ်မြှင့်တင်မှု အသိပေးချက်. မတ်လ ၁၅ရက် ၂၀၁၈ အနက်ရောင်မျှော်စင်ရဲ့ ဗားရှင်း ၃.၀ဟာ လိုင်းပေါ်ရောက်ရှိလာတော့မှာပါ"

ကောင်းကင်ကြီးမှာ မည်းမှောင်လျက် အရှေ့အရပ်၀င်ရိုးစွန်းအနီးတွင်ဟာ ကြယ်စုတချို့တွဲလွဲခိုနေကြသည်။

ထန်မော့ ထိုကြေညာမှုကိုကြားပြီးနောက် ဖူ၀မ်သော်ကို လှည့်ကြည့်လိုက်မိသည်။ သူ၏လက်ချောင်းများမှာ တင်းကြပ်သွားပြီးမှ တဖန်ဖြေလျော့လိုက်မိပြန်သည်။

ဖူ၀မ်သော်ကဆိုလာခဲ့သည်။

"သွားကြစို့"

လူ၂ဦး ဆားဗစ်ဧရိယာသို့ အလျင်အမြန်ပြန်လည် ရောက်ရှိလာခဲ့သည်။ ဖူ၀မ်ရှန်းမှာလည်း သူတို့အား ရပ်စောင့်နေခဲ့လေသည်။

တရုတ်ပြည်၏ အဝေးပြေးလမ်းမှန်သမျှမှာ ကျေးလက်ဒေသအစွန်အဖျားတွင် တည်ရှိကြသည်။ သူတို့လက်ရှိနားနေသော ဆားဗစ်ဧရိယာမှာ ယန်ကျိုးမြို့လေးအနီးတွင် တည်ရှိခြင်းဖြစ်လေသည်။ ဤသည်မှာ သေးငယ်သော ဆားဗစ်ဧရိယာလေးမျှသာဖြစ်ပြီး အရမ်းမခမ်းနားလှချေ။ ထို့အပြင် လယ်ကွင်းများအလယ်တွင် ထီးထီးကြီးတည်ရှိနေခြင်းဖြစ်လေသည်။

ထန်မော့အနားတွင်မည်သူမျှ မရှိကြောင်း အတည်ပြုပြီးချိန်တွင် အနက်ရောင်မျှော်စင်၏ နောက်ဆက်တွဲကြေညာမှုကိုကြားလိုက်ရပြန်သည်။

"တင်းတောင်~ အနက်ရောင်မျှော်စင် ဗားရှင်း၃.၀၏ စည်းမျဥ်းအသစ်များ"

"ပထမအချက်၊ လတိုင်း ကမ္ဘာပေါ်က နယ်မြေ၁၀ခုစီတိုင်းမှာ သက်ဆိုင်ရာနယ်မြေရဲ့နောက်ဆုံးကစားသမားတွေအတွက် ဂိမ်းတစ်ခုကိုဖွင့်ပေးမှာပါ"

"ဒုတိယအချက်၊ ၂၀၁၈ မတ်လ ၃၁ရက် ၁၈နာရီမှာ မဖြစ်မနေ မျှော်စင်တိုက်ခိုက်ရေးဂိမ်းကို ဖွင့်ပေးမှာပါ...အနက်ရောင်မျှော်စင်ကို မတိုက်ခိုက်ရသေးတဲ့ ကစားသမားတိုင်း ပါ၀င်ရမှာဖြစ်ပါတယ်"

“တတိယအချက်၊ အနက်ရောင်မျှော်စင်ဂိမ်း(ဥာဏ်ရည်မသန်စွမ်းအဆင့်)ကိုလည်း ဖွင့်လှစ်လိုက်ပါပြီ မိမိကိုယ်တိုင် ရှာဖွေစူးစမ်းကြပါနော်"

"တင်းတောင်..."

ကျယ်လောင်သော ကလေးသံမှာ ရုတ်တရက်ကြီး ရပ်တန့်သွားခဲ့ပြန်သည်။

ထန်မော့ ဤဗားရှင်းအသစ်၏ စည်းမျဥ်းများကို ဂရုတစိုက်နားထောင်နေခဲ့လေသည်။ ထိုကြေညာသံရုတ်တရက်ရပ်တန့်သွားလျှင် ထန်မော့ရင်ထဲ တင်းကြပ်သွားမိလေသည်။ ချန်ရှန်းရှန်း၏ ဥာဏ်ကြီးရှင်၏ တွေးခေါ်နိုင်စွမ်းက သူ၏ရင်ထဲမဖော်ပြတတ်သော ဆိုးရွားသော ခံစားချက်တစ်ခုကို ခံစားမိလာစေသည်။

သူ ဖူ၀မ်သော်ကိုကြည့်လိုက်မိသည်။ ဖူ၀မ်သော်က သူ၏၀ှက်ထားသော ဓါးမြှောင်ကို လက်နှင့်အသာထိလျက် အသင့်ဖြစ်နေပုံပင်။ လက်ရှိတွင် သူတို့မှာ ယန်ကျိုး အနက်ရောင်မျှော်စင်၏ ၆၀ကီလိုမီတာတွင်ရှိနေခြင်းဖြစ်သည်။ သို့တိုင်အောင် အမှောင်ထုထဲ၌ ကောင်းကင်ပေါ်မှ အနက်ရောင်အရိပ်ကလေးကိုမြင်နိုင်ဆဲပင်။

၄င်းပုံရိပ်မှာ အလွန်သေးငယ်သည့်တိုင် ထန်မော့၏ မျက်လုံးထဲတွင်တော့ အလွန်ရှင်းလင်းလျက်။

ကမ္ဘာကြီး၏နေရာအနှံ့ရှိ အနက်ရောင်မျှော်စင်တိုင်းမှာလည်း အလားတူအဖြစ်အပျက်မျိုးဖြစ်ပေါ်နေခဲ့သည်။

တရုတ်ပြည်တွင်ညနက်နေပြီဖြစ်ပြီး ဥရောပတွင် မနက်စောစောဖြစ်ကာ အမေရိကတွင်တော့ နေ့လည်ပိုင်းတွင်ဖြစ်သည်။ မော်စကိုတွင် ထူထဲသောနှင်းများကျဆင်းနေလျက် သားမွှေးကုတ်ထူထူကို၀တ်ဆင်ထားသော ၀က်၀ံတစ်ကောင်နှယ် သန်မာသော လူတစ်ဦးမှာ အနီရောင်ရင်ပြင်အလယ်တွင် ရပ်နေခဲ့သည်။ အနက်ရောင်မျှော်စင်မှာ အနီရောင်မျှော်စင်၏တောင်ဘက်ထိပ်တွင်ရှိနေပြီး Saint Basil's Cathedralအပေါ်တွင် တွဲလွဲခိုလျက်သား။

နှင်းထူသောညတွင် အနီရောင်ရင်ပြင်အနီးမှ ကစားသမားများမှာ ထိုကြေညာသံကြောင့် အမြန်အပြေးအလွှားရောက်ရရှိလာကြပြီး အမှောင်ထုထဲတွင် စူးစမ်းရန် ပုန်းကွယ်နေခဲ့ကြသည်။ သို့သော် ထိုယောကျာ်းရောက်ရှိလာသည်နှင့် ကစားသမားတိုင်းမှာ ကြောက်ရွံ့မှုကြောင့် လျင်မြန်စွာ ထွက်ပြေးကုန်ကြလေသည်။

ထိုယောကျာ်းမှာ နှင်းထုထူထူကိုဖြတ်လျက် အနက်ရောင်မျှော်စင်ထံသို့လျှောက်လာခဲ့လေသည်။ ခြေလှမ်းတိုင်းမှာ ထူထဲသော နှင်းများထဲ နစ်၀င်သွားလျက်ပင်။

အဆုံးတွင် ထိုယောကျာ်းက Saint Basil's Cathedral၏တံခါး၀ထံရောက်ရှိလာခဲ့ပြီး အနက်ရောင်မျှော်စင်ကြီးကို မော့ကြည့်လိုက်လေသည်။

ထိုစဥ်မှာပင် ရပ်တန့်သွားသော အနက်ရောင်မျှော်စင်၏ကြေညာသံမှာလည်းတဖန်ပြန်လည်စတင်လာခဲ့လေသည်။

၄င်းကိုကြားလိုက်ရလျှင် ထန်မော့ ရောက်နေသည့်နေရာမှာပင် တန့်လျက် တုန်လှုပ်သွားမိရသည်။ ကမ္ဘာအနှံ့မှ ကစားသမားများမှာ ရောက်ရာအရပ်မှနေ၍ အနက်ရောင်မျှော်စင်ကြီးကို အထိတ်တလန့်ဖြင့် မော့ကြည့်လိုက်ကြလေသည်။ ထို့နောက် လူတိုင်းမှာ ခပ်လေးလေးနှင့် တည်ကြည်သော အမျိုးသားတစ်ဦး၏အသံဖြင့် ကြေညာမှုကို တစ်လုံးချင်းစီ ပီသစွာ ကြားလိုက်ရလေသည်။

["တင်းတောင်~ အနက်ရောင်မျှော်စင်၏ တတိယမြောက် သံမဏိစည်းကမ်းကြီး"

"ကစားသမားတိုင်း အနက်ရောင်မျှော်စင်ကို တိုက်ခိုက်ပေးကြပါ"]

ထို့နောက် အနက်ရောင်မျှော်စင်မှာ မူလအတိုင်း ပြန်လည်တိတ်ဆိတ်သွားခဲ့လေသည်။ ကမ္ဘာအနှံ့မှ ကစားသမားများမှာ မတည်ငြိမ်နိုင်တော့ပဲ အကုန်လုံး ဆူဆူညံညံဖြစ်ကုန်ကြသည်။

****

မော်စကို အနီရောင်ရင်ပြင်၊ Saint Basil's Cathedral အဆောက်အဦး၌...

အရပ်မြင့်မြင့်နှင့် သန်မာသောလူမှာ ထိုကြေညာမှုကိုကြားပါသော်လည်း သူ၏အပြာရောင်မျက်လုံးများမှာ တစ်ချက်လေးမျှ လှုပ်ခတ်မသွားခဲ့ချေ။ သူကထိုအနီရောင်ရင်ပြင်မှ ဖြည်းညှင်းစွာ ပြန်လှည့်သွားခဲ့သည်။ လမ်းဘေးမီးတိုင်တစ်ခုမှ အဖြတ်တွင် သူသည် လက်ကိုဆန့်လျက် ထိုမီးတိုင်ကို ဆွဲနှုတ်လိုက်၏။ ထို့နောက် ၄င်းအား သူ၏နောက်မှ အနက်ရောင်မျှော်စင်ထံ အားမာန်အပြည့်ဖြင့် လှမ်း၍ပစ်လိုက်လေသည်။

🌍

Prev Next