MM Story Teller

Chapter 92

Viewers 7k

🌍Chapter 92

၀မ်ရှောင်ထျန်း၏ ကာတွန်းမျက်နှာမှာ ဖန်သားပြင်ပေါ်တွင် တဖန်ပြန်ပေါ်လာခဲ့ပြန်သည်။ သူမမှာ သွားရည်များစီးကျလျက်။ ကင်မရာမှာ သူမကိုရိုက်ကူးနေကြောင်း တွေ့လျှင် အင်္ကျီလက်ဖြင့် သွားရည်များကို ကပြာကယာပွတ်သုတ်လိုက်လေသည်။ သူမက ချိုမြိန်စွာ ပြုံးလိုက်ကာ ဆိုလာသည်။

" သူကတော့ မြေအောက်ကမ္ဘာက လူတိုင်းရူးသွပ်နေကြတဲ့ ကစားသမားတစ်ယောက်ပါရှင်... သူက မွန်းစတားတွေရဲ့ ' ငါအစားချင်ဆုံး လူသား'ဆိုတဲ့ အပါတ်စဥ် အစီအစဥ်မှာလည်း ၃ကြိမ်တိုင်တိုင် ဗိုလ်စွဲထားခဲ့သူပါ"

"ဖူ၀မ်သော်ပဲ ဖြစ်ပါတယ်"

ဖူ၀မ်သော် အခန်းကျဥ်းလေးထဲတွင်ရပ်လျက် ဖန်သားပြင်အားကြည့်နေခဲ့သည်။ သူသည်ဖန်သားပြင်၏ တစ်ဖက်မှာ အနက်ရောင်၀တ်ဆင်ထားသော ကာတွန်းလူတစ်ဦးထွက်လာသည်ကို တွေ့လိုက်ရသည်။ သူကလျှောက်လာပြီး ၀မ်ရှောင်ထျန်း၏မျက်နှာချင်းဆိုင်ခုံတွင် ထိုင်ချလိုက်သည်။ သူ၏ခေါင်းထိပ်တွင်တော့ စာလုံးနှစ်လုံးရှိလေသည်။

[ဖူ ၀မ်သော်]

၀မ်ရှောင်ထျန်းကဆိုလိုက်သည်။

"ကျွန်မတို့ရဲ့ ဧည့်သည်တော် မစ်စတာဖူက သိပ်စကားနည်းတာပဲ...ရှင့်ကိုချစ်တဲ့ပုရိတ်သတ်တွေအတွက် တစ်ခုခုပြောပေးပါဦးလားရှင်"

ကာတွန်း မစ်စတာဖူမှာ တိတ်ဆိတ်နေဆဲပင်။

၀မ်ရှောင်ထျန်း၏ အကြည့်မှာ ထိုကာတွန်းမစ်စတာဖူထံမှ ရွေ့လျက် တခြားတစ်နေရာကိုကြည့်လိုက်လေသည်။ သူမမှာ ကင်မရာကို တည့်တည့်စိုက်ကြည့်နေပုံပေါ်ကာ သူမ၏အကြည့်တို့မှာ ထူးဆန်းစွာပင် အပြင်ဘက်မှ ဖူ၀မ်သော်အကြည့်နှင့် တိုက်ရိုက်ဆုံတွေ့သွားခဲ့သည်။ သူမ၏သွားရည်များကို ထပ်မံပွတ်သုတ်လိုက်ပြီး ထူးဆန်းစွာ ပြုံးလိုက်သည်။

"ကစားသမားဖူက စကားမပြောချင်ဘူးဆိုတော့ ကျွန်မတို့ စလိုက်ကြစို့လေ... ပထမမေးခွန်းကို ကြည့်ကြရအောင်... အိုး ဒါကအားလုံးထဲမှာ အလွယ်ဆုံးမေးခွန်းပဲ"

သူမ၏ တက်ကြွသောအသံက အခန်းငယ်လေးထဲ ပျံ့နှံ့လျက်။

"ကစားသမားဖူက ဒီမေးခွန်းကို လွယ်လွယ်ဖြေနိုင်မှာပါ...ဒါဆို မေးခွန်းကို နားထောင်ပေးပါနော်"

" ပထမဆုံးမေးခွန်းကတော့ အနက်ရောင်မျှော်စင်ကမ္ဘာထဲမှ ခိုး၀င်သူတွေကို စနောက်ရတာကို အကြိုက်ဆုံးက ဘယ်သူလဲ"

"A.ပီနိုကီယို B. စင်ဒရဲလား

ဟ...ငါကဘာလို့စာရင်းထဲပါနေတာလဲ...ဒီ၀မ်ရှောင်ထျန်းက ခိုး၀င်သူလေးတွေကို ဘယ်တော့မှ အနိုင်မကျင့်တတ်ပါဘူးနော်..."

၀မ်ရှောင်ထျန်းမှာပါးစပ်ကိုကာလျက် အံ့အားသင့်ယောင်ဆောင်ကာ

"အိုး...မတော်တဆ မစ်စတာဖူအတွက် အဖြေအမှားကြီးကို ပြောပြမိသွားပြီ... C.မစ်စတာ မာတင် D.ဦးဦးလူ၀ံ ကဲ ကစားသမားဖူရေ ဘယ်ဟာကအဖြေမှန်ဖြစ်မလဲနော်"

“ကျွန်မတို့ရဲ့ ကစားသမားဖူမှာစဥ်းစားချိန် စက္ကန့်၂၀ရှိပါမယ်နော်... ကစားသမားဖူ ဖြေနိုင်မယ်လို့ထင်ပါသလားရှင့်"

တစ်ချိန်တည်းမှာပင် ဖူ၀မ်သော်၏ရှေ့တွင် အပြာရောင်စာတန်းလေးတစ်ခုပေါ်လာခဲ့သည်။

ထိုစာတန်းလေးမှာ လေထဲတွင်မျောလျက် ၀မ်ရှောင်ထျန်းအခုလေးတင်မေးလိုက်သော မေးခွန်းကိုသာ ရေးသားထားခြင်းဖြစ်သည်။ ၄င်း၏အောက်တွင် ရွေးချယ်စရာ အဖြေ၄ခုရှိလေသည်။ ဖန်သားပြင်ပေါ်မှ ကာတွန်းဖူ၀မ်သော်၏ခေါင်းပေါ်တွင် ကြီးမားသော မေးခွန်းသင်္ကေတကြီးတစ်ခုရှိလေသည်။ အပြင်ဘက်ဖူ၀မ်သော်မှာမူ မေးခွန်းကိုကြည့်နေခဲ့ပြီး ၀မ်ရှောင်ထျန်းမှာမူ အလွန်စိတ်လှုပ်ရှားနေသည့်ဟန် ပြုမူနေခဲ့သည်။

သူကအမူအယာမဲ့စွာပင် အဖြေBကို ရွေးလိုက်သည်။

၀မ်ရှောင်ထျန်းက အံ့အားသင့်သွားဟန်ဖြင့် ဆိုလာသည်။

"အာ...ကျွန်မဘယ်လုပ်ဖြစ်နိုင်မှာလဲ... ကစားသမားဖူ ဒီဟာကအရမ်းလွယ်တဲ့ မေးခွန်းနော် ရှင်အဖြေမပြောင်းချင်ဘူးဆိုတာ သေချာလား"

ဖန်သားပြင်ထဲမှ ဖူ၀မ်သော်အသေးစားလေးမှာ သူမကိုတုန့်ပြန်မလာခဲ့ချေ။ ၀မ်ရှောင်ထျန်းမှာ အကြိမ်ရေတချို့မေးနေပြီးမှာ အဆုံးတွင် လက်လျော့လိုက်ဟန်ဖြင့်

"ကောင်းပြီလေ ဂုဏ်ယူပါတယ်... ဒါရိုက်တာ ကျွန်မဆန့်ကျင့်ပါတယ်နော်... ကျွန်မမှာဘယ်တုန်းကများ ခိုး၀င်သူတွေကို စနောက်တတ်တဲ့ ၀ါသနာမျိုးရှိဖူးလို့တုန်း...တစ်ခါတလေလေး စမိရုံကို"

၀မ်ရှောင်ထျန်းက ပေါက်ကရများပြောဆိုနေခဲ့သည်။

ဖူ၀မ်သော်က စင်အောက်မှပရိတ်သတ်များ၏ ရှုံ့ချသည့်တုန့်ပြန်သံများကို ဂရုမစိုက်ခဲ့ချေ။ ဖူ၀မ်သော့်ထံမှတုံ့ပြန်မှုမရလျှင် သူမလည်း လွန်စွာ ပျင်းလာပုံဖြင့် ဒုတိယမေးခွန်းကိုဆက်မေးလာခဲ့သည်။

"ဒါက ဒုတိယမေးခွန်းပါ... မွန်းစတားကမ္ဘာထဲမှာ ဘယ်မွန်းစတားက ခိုး၀င်သူတွေကို အများဆုံးစားတာလဲ"

"A.ရှန့်ခ် B.ဟော့လ်ခ်. C.ဘွားဘွား၀ံပုလွေကြီး D.ပွေးကြီး"

"၀ိုး... ဒါရိုက်တာ ရှင်ကတော့ ကစားသမားဖူအတွက် အနောက်တံခါးဖွင့်ပေးနေတာပဲနော်... ဒါကလွန်လွန်းပါတယ်... အရမ်းလွယ်လွန်းနေတာမဟုတ်ဘူးလား... ပရိတ်သတ်တွေကိုယ်စား ကျွန်မဆန္ဒပြရတော့မှာပဲ"

ပရိတ်သတ်များထံမှ ကျယ်လောင်သော အော်သံများထွက်လာခဲ့သည်။

ထိုမေးခွန်းကိုမြင်လျှင် ဖူ၀မ်သော်မျက်နှာပျက်သွားခဲ့သည်။

ဖူ၀မ်သော် မွန်းစတားကမ္ဘာကို ခိုး၀င်စဥ်က ရှန့်ခ်၏အမည်ကို ကြော်ငြာဘုတ်ပေါ်တွင် တွေ့ဖူးလေသည်။ ရှန့်ခ်မှာ မွန်းစတားကမ္ဘာမှ နာမည်ကျော်ဖြစ်၍ သူကအဖြေမှန်မဟုတ်သည်မှာ သဘာ၀ပင်။ သို့သော် ဟော့ခ်၊ ဘွားဘွား၀ံပုလွေနှင့် ပွေးကြီးတို့ကိုမူ တစ်ခါမှမမြင်ဖူးချေ။

ဤလွယ်လွန်းသော မေးခွန်း၏အဖြေကို သူအမှန်တကယ်မသိပါချေ။

*****

ထန်မော့ ဖိနပ်တိုက်၀ံပုလွေထံမှ ရရှိခဲ့သော ဖိနပ်တိုက်ဆေးကို သံဖိနပ်ချုပ်သမားကြီးထံပေးလိုက်သည်။

ဖိနပ်ချုပ်သမားကြီးမှာ ထိုဖိနပ်တိုက်ဆေးကို အလွန်စိတ်မပါလက်မပါစွာ ကြည့်လိုက်လေသည်။ သူ့ကိုကြည့်ရသည်မှာ ထန်မော့ ဖိနပ်တိုက်ဆေးရှာတွေ့ခဲ့သည်ကို သိပ်မပျော်ပုံရသည်။ ဖိနပ်တိုက်ဆေးမှာ သူ၏လက်ထဲတွင် ဘယ်ဘယ်ညာညာ လူးလှိမ့်နေခဲ့သည်။ သူက၄င်းကိုချိန်လိုက်ပြီး မကျေမနပ်ဖြင့်ဆိုသည်။

"ဖိနပ်တိုက်ဆေးကို တကယ်ရှာတွေ့မယ်မထင်ထားဘူးပဲ...ဒါပေမယ့်ဒါက ဖိနပ်တိုက်ဆေး တစ်စက်တည်းပဲ... အကုန်မဟုတ်သေးဘူး... ဘယ်မှာလဲ ကျန်တဲ့ ဖိနပ်တိုက်ဆေးတွေ"

ထန်မော့နံရံတွင်ကပ်နေသော ရှင်းဖုန်းကို လှည့်ကြည့်လိုက်သည်။

ရှင်းဖုန်းမှာ ဂိမ်း၏ စည်းမျဥ်းအကုန်ကို ရှင်းမပြခဲ့ချေ။

ထန်မော့၏အေးစက်သော အကြည့်ကိုမြင်လျှင် အလျင်အမြန်ဆိုလာခဲ့သည်။

"ဒါက သံဖိနပ်ချုပ်သမားကြီးရဲ့ ဖိနပ်တိုက်ဆေးပါပဲ ဒါပေမယ့်ပြန်သုံးလို့မရဘူး... ၀ံပုလွေတွေကိုသတ်ရင်လဲ တစ်ကောင် တစ်စက်ပဲရမှာ... မကြာခင်ကုန်သွားမှာပဲ... သံဖိနပ်ချုပ်သမားကြီးက ၃နာရီကို တစ်ခါ ဖိနပ်တိုက်ဆေးအတွက်ရောက်လာနေမှာ"

"ဟုတ်တယ်"

ဖိနပ်ချုပ်သမားကြီးမှာ သံချိန်းကြိုးကို ဆောင့်လွှဲလိုက်လျှင် နံရံကိုရိုက်ခတ်မိလျက် အသံအကျယ်ကြီး ထွက်လာစေသည်။ သူကထန်မော့ကို ပြင်းထန်စွာ ကြည့်လိုက်သည်။

"လူသားတွေက သံဖိနပ်ချုပ်သမားကြီးအတွက် ဖိနပ်တိုက်ဆေးကိုရှာပေးချင်တဲ့ အကောင်းဆုံးသူငယ်ချင်းတွေပဲ... ဒီဖိနပ်တိုက်ဆေးက မလုံလောက်ဘူး... ဖိနပ်တစ်ရံစာပဲသုံးလို့ရမယ်... ငါကမြေအောက်ကမ္ဘာမှာ အတော်ဆုံး ဖိနပ်ချုပ်သမားပဲ...နေ့တိုင်း ဖိနပ်အများကြီး ပြင်နေရတာ... ဒီလောက်လေးနဲ့ဘယ်လိုလောက်မှာလဲ"

ထန်မော့၏အကြည့်တို့က နံရံပေါ်သို့ရောက်ရှိသွားခဲ့သည်။ ထို့နောက်သူက ဖိနပ်ချုပ်သမားကြီးကို ကြည့်လိုက်သည်။

"ခင်များရဲ့ ဖိနပ်တိုက်ဆေးက ဘာလဲ"

ဖိနပ်ချုပ်သမားကြီးအား ဤမေးခွန်းကို မေးခြင်းက အဓိပ္ပါယ်မဲ့လှသည်။ အကယ်၍ ဖိနပ်ချုပ်သမားကြီးသာ ဖိနပ်တိုက်ဆေး ဘယ်မှာရှိမှန်းသိလျှင် အစစ်အမှန်လောကဂိမ်း၏အကူအညီမလိုအပ်ပဲ ရှာတွေ့နိုင်မည်သာ။ ကစားသမားများကို စားလိုသောရည်ရွယ်ချက်ဖြင့် တမင်ဟန်ဆောင်နေသည်ဟူသော ဖြစ်နိုင်ချေကိုလည်း ဖယ်ထုတ်မထားခဲ့ချေ။

ရှင်းဖုန်းက ဖိနပ်တိုက်ဆေးမှာ ဂိမ်းထဲတွင်ရှိသည်ဟု ဆိုခဲ့သည်။ ထန်မော့ဆီမှာမဟုတ်လျှင် ဖူ၀မ်သော်ဆီတွင် ရှိနေမှာပင်။ သူ့အနေနှင့် ဖိနပ်တိုက်ဆေးက မည်သည့်အရာဖြစ်ကြောင်းသိသည်နှင့် ရှာတွေ့နိုင်ပြီဖြစ်သည်။

သံဖိနပ်ချုပ်သနားကြီးမှာ မကျေနပ်သောလေသံဖြင့်မာန်မဲလာခဲ့သည်။

"မင်းက ဖိနပ်တိုက်ဆေးက ဘာလဲဆိုတာတောင်မသိဘူးပေါ့... ဒါနဲ့များ ငါ့ကို ဖိနပ်တိုက်ဆေးရှာပေးမယ်လို့ လိမ်ရဲသေးတယ်... မင်းတို့လူသားအစုတ်တွေကတော့ ဒါကဖိနပ်တိုက်ဆေးမဟုတ်ဘူးကွ"

ဆိုးရွားသောအပြုံးကြီးတစ်ခုက သံဖိနပ်ချုပ်သမားကြီး၏ မျက်နှာပေါ်တွင် ပေါ်လာခဲ့သည်။ သူကထန်မော့ပေးသော ဖိနပ်တိုက်ဆေးကိုယူလျက် ရုံးခန်းမှထွက်ခွာသွားခဲ့သည်။ လေးလံသော ခြေသံများမှာ ကော်ရစ်တာမှတဖြည်းဖြည်းတိုးလျသွားခဲ့သည်။ ထန်မော့ချက်ချင်းထွက်ကာသွားကြည့်လိုက်သည်။ သံဖိနပ်ချုပ်သမားကြီးမှာ လေထဲပျောက်ကွယ်သွားသည့်နှယ် စက်ရုံ၏တံခါးမှ ပိတ်နေဆဲပင်။

ထန်မော့တခြားရုံးခန်းများကို ဂရုတစိုက်စစ်ဆေးကြည့်လိုက်သော်လည်း ပြောင်းလဲသွားခြင်းမရှိချေ။

ထန်မော့ရုံးခန်းသို့ပြန်လာချိန်တွင် ပြတင်းပေါက်မှ ကျောက်တုံးကို ယူလျက် ရှင်းဖုန်းအားကြည့်လိုက်သည်။

ပိန်ပါးသောကစားသမားမှာ တုန်ယင်နေခဲ့သည်။ ထန်မော့ဘာမှမမေးရသေးခင်မှာပင် သူကအရင်ဦးစွာ အလျင်အမြန်ပြောပြလာသည်။

"ပြောပြပါ့မယ်... အကုန်ပြောပြပါ့မယ်... ဒီဂိမ်းကဖိနပ်တိုက်ဆေးရှာရမယ့်ဂိမ်းပါ... ၃နာရီတိုင်းမှာ သံဖိနပ်ချုပ်သမားရောက်လာပြီးတော့ ဖိနပ်တိုက်ဆေးလာတောင်းလိမ့်မယ်... ဖိနပ်တိုက်ဆေးကိုမတွေ့သေးရင် ဖိနပ်တိုက်၀ံပုလွေဆီကရတဲ့အရည်နဲ့ အစားပေးထားလို့ရတယ်... ဒါပေမယ့်လည်း ဖိနပ်တိုက်၀ံပုလွေတွေရဲ့အရေအတွက်က ၃နာရီတစ်ခါပိုတိုးလာလိမ့်မယ်...သံဖိနပ်ချုပ်သမားကြီးကလည်း တစ်ခါလာရင် တစ်စက်စီပိုတောင်းလိမ့်မယ်... ဒီတော့ နောက်၃နာရီမှာ ၀ံပုလွေက၂ကောင်ဖြစ်သွားပြီးတော့ ဖိနပ်ချုပ်သမားကြီးကလည်း ဖိနပ်တိုက်ဆေး ၂စက်တောင်းလိမ့်မယ်"

ထန်မော့ ခတ္တတွေးတောလိုက်ကာမေးလိုက်သည်။

"ဖိနပ်တိုက်ဆေးအစက်မရှိရင်ရော"

ဖိနပ်တိုက်ဆေးအစစ်ကိုရှာမတွေ့လျှင်လည်း အစားထိုးရန် အတုရှိနေသ၍ ကိစ္စမရှိချေ။ သို့သော်အကယ်၍ အစားထိုးရန် မတုမလုံလောက်ပါက မည်သို့လုပ်မည်နည်း။

ရှင်းဖုန်းမှာ ကြောက်စရာတစ်ခုခုကို သတိရသွားသည့်နှယ် သူ၏မျက်လုံးတို့ပြူးကျယ်လာခဲ့သည်။

ထန်မော့ထပ်၍မေးလိုက်သည်။

"ဘာဖြစ်မှာလဲ"

ရှင်းဖုန်းမှာ တစ်ကိုယ်လုံးတုန်ယင်လာပြီး သူ့ကိုယ်သူကုတ်ကုတ်လေးဖက်ထားလိုက်သည်။

"ဖိနပ်တိုက်ဆေးအတုမလုံလောက်ရင် မင်းရဲ့သွေးတွေကို ဖိနပ်တိုက်ဆေးအဖြစ်သုံးလိမ့်မယ်"

ထန်မော့၏ မျက်လုံးတို့မှေးကျဥ်းသွားခဲ့သည်။

တစ်နာရီကြာပြီးနောက် ကွန်ပျူတာဖန်သားပြင်မှာ တဖန်လင်းလာပြီး ထန်မော့ OK ကိုလျင်မြန်စွာ နှိပ်လိုက်သည်။

ဖူ၀မ်သော်၏မျက်နှာမှာ ဖန်သားပြင်ပေါ်တွင် ပေါ်လာခဲ့ပြီး ထန်မော့မှာ သူ့ကိုမြင်လျှင် တုန်လှုပ်သွားမိလေသည်။

ဤအမျိုးသားမှာ အခုလေးတင် ရေထဲမှတက်လာသည့်နှယ်။ သူ၏ဆံပင်များမှာ စိုစွတ်နေပြီး ဆံစတချို့မှ သူ၏နဖူးပေါ်ကျနေခဲ့သည်။ သူ၏အ၀တ်များပင် စိုစွတ်ကာ ကိုယ်ပေါ်တွင် ကပ်နေခဲ့လေသည်။ ရေစက်တစ်စက်မှာ ဖူ၀မ်သော်၏ မေးစေ့မှ ကြမ်းပြင်ပေါ်သို့ ပေါက်ခနဲ ပြုတ်ကျသွားခဲ့သည်။ သူကလက်ကိုဆန့်လျက် စိုစွတ်နေသောဆံပင်များကို ပြန်လည်သပ်တင်လိုက်ပြီး အနက်ရောင်မျက်၀န်းများကို ထုတ်ဖော်လာခဲ့သည်။

ထန်မော့မှာ ဖိနပ်တိုက်၀ံပုလွေနှင့် တိုက်ခိုက်စဥ်က ဒဏ်ရာအနည်းငယ်ရခဲ့သော်လည်း အလွန်အဆင်ပြေနေဆဲပင်။ သူ၏ပါးပြင်ပေါ်မှ ဒဏ်ရာမှာ ပြန်ကောင်းသွားပြီဖြစ်ကာ အရာနည်းနည်းသာလျှင် ကျန်တော့သည်။ တဖက်မှာတော့ ဖူ၀မ်သော်တွင် မည်သည့်ဒဏ်ရာမျှမရှိချေ။ သို့တိုင်အောင် တဖက်လူအား ဤမျှကူကယ်ရာမဲ့သော အခြေအနေမျိုးဖြင့်မြင်ဖူးသည်က ဤသည်မှာ ပထမဆုံးပင်။ တကယ်တမ်းတွင် ထိုမျှအခြေအနေဆိုးပုံမပေါ်သော်လည်း ထန်မော့တဖက်လူအား သနားသွားမိသည်။

"ထန်မော့"

သူ၏အံ့အားသင့်နေသော အမူအယာကို တဖက်လူကတွေ့သွားခဲ့သည်။ ထန်မော့ ချောင်းဟန့်လျက် စကားလမ်းကြောင်းလွှဲရန်ပြင်လိုက်သည်။ အချိန်ဖြုန်းမနေပဲ အခုလေးတင်ကြုံတွေ့ခဲ့ရသည်တို့ကို ပြောပြလိုက်လေသည်။

"ဒီတော့ ကျွန်တော်က ပထမ၃နာရီကိုတော့ကျော်သွားပြီ နောက်၁နာရီဆို ကျွန်တော် ဖိနပ်တိုက်၀ံပုလွေကို ၅မိနစ်အတွင်းသတ်ရတော့မှာ... ကျွန်တော်စွမ်းရည်တွေနဲ့ တခြားဂိမ်းအကူပစ္စည်းတွေ သုံးမရပေမယ့် ၀ံပုလွ၂ကောင်လောက်ကိုတော့ ရှင်းနိုင်ပါသေးတယ်"

ထန်မော့ကဆက်၏မေးလိုက်သည်။

"ခင်များရော ဘာတွေကြုံခဲ့ရလဲ"

"ပျော်စရာအမေးအဖြေကဏ္ဍ"

"ဘာကြီး..."

ဖူ၀မ်သော်မှာ တည်ငြိမ်စွာရှင်းပြလာခဲ့သည်။

"ဥာဏ်စမ်းတွေနဲ့အတူတူပဲ... အစီအစဥ်တင်ဆက်သူက ကိုယ့်ကိုထူးဆန်းတဲ့ မေးခွန်းတွေမေးတယ်...မေးခွန်းဘယ်နှစ်ခုရှိလဲတော့ မသိဘူး ပြီးတော့ ဆုကရောဘာလဲဆိုတာမသိဘူး... ဒါပေမယ့် အဖြေမှားရင်တော့ အပြစ်ပေးခံရတယ်... အခုလေးတင်ပဲ ဒုတိယမေးခွန်းကိုမှားဖြေမိလို့ အပြစ်ဒဏ်ကရေအောက်မှ ၁နာရီနှစ်ခံရတာလေ"

ထန်မော့လည်း တဖက်လူက အဘယ်ကြောင့် ဤပုံစံပေါက်နေရသည်ကို နားလည်သွားခဲ့သည်။ သို့သော် သူတခြားသိချင်သည်တို့ရှိနေဆဲပင်။

"ခင်များရဲ့ဂိမ်းနဲ့ ဖိနပ်တိုက်ဆေးနဲ့ဘယ်လိုဆက်စပ်နေတာလဲ"

ထန်မော့၏ဂိမ်းက ဖိနပ်တိုက်ဆေးနှင့် သက်ဆိုင်လေသည်။ သို့သော် ဖူ၀မ်သော်၏ အမေးအဖြေဂိမ်းနှင့် ဖိနပ်တိုက်ဆေးနှင့်ကို ဆက်စပ်၍မရချေ။

ဖူ၀မ်သော်က သူ့အားကြည့်လိုက်သည်။

"မစ်ရှင်နဲ့ တကယ်ပဲဆိုင်ပါတယ်... ကိုယ်မေးခွန်း၃ခုကို ဖြေခဲ့ရတယ်"

ထန်မော့ဂရုတစိုက်နားထောင်နေခဲ့သည်။

"ပထမမေးခွန်းက အနက်ရောင်မျှော်စင်ထဲမှာ ဘယ်သူက ခိုး၀င်သူတွေကို စနောက်ရတာအကြိုက်ဆုံးလဲတဲ့ ကိုယ်မှန်းတာ မှန်ခဲ့တယ်... ဒုတိယမေးခွန်းက မွန်းစတားကမ္ဘာမှာ ခိုး၀င်သူတွေကို အများဆုံးစားတာက ဘယ်သူလဲတဲ့...မင်းဆီက ဘွားဘွား၀ံပုလွေကြီးကို ကြားဖူးနေတော့ အဲဒါကိုဖြေလိုက်တာ...အဖြေမှန်ကတော့ ပွေးကြီးဖြစ်နေတယ်"

ထန်မော့အံ့အားသင့်သွားခဲ့သည်။

"ပွေးကြီးလား..."

ဖူ၀မ်သော်မျက်ခုံးပင့်လိုက်သည်။

"မင်းသူ့ကိုတွေ့ဖူးလား"

ထန်မော့ကခေါင်းညိတ်လိုက်သည်။

"ကျွန်တော် သူ့ဆီကနေ မော့မော့ကို ရခဲ့တာ"

"တင်ဆက်သူကတော့ သူကမွန်းစတားကမ္ဘာမှာ အဆင့်အတော်လေးနိမ့်တဲ့အတွက် အများဆုံးစားတာလို့ ရှင်းပြပါတယ်... အခုက မျှော်စင်တိုက်ခိုက်ဖူးတဲ့ ကစားသမားတွေအများကြီးမရှိသေးတော့ ကျန်တဲ့ မွန်းစတား၃ကောင်ကို မတွေ့ရသေးဘူး... ကျန်တဲ့၃ကောင်ကလည်း ခိုး၀င်သူစားတာတော်တော်လေးများတယ်ပြောတယ်... ဒါပေမယ့် ပွေးကြီးစားတာကတော့ အများဆုံးပဲ...၁ပါတ်တည်းမှာ ခိုး၀င်သူ ၁၆၃ယောက်တောင်စားခဲ့တယ်တဲ့"

၄င်းမှာ ထန်မော့အတွက်ပင် ခက်ခဲမည့်မေးခွန်းမျိုးဖြစ်လေသည်။

"တတိယမေးခွန်းကရော"

ရေစိုနေသောဆံပင်တစ်စမှာ ဖူ၀မ်သော်၏ နဖူးပေါ် ပြန်လည် ကျဆင်းလာခဲ့သည်။

"ကမ္ဘာပေါ်က ကစားသမားတိုင်းမြင်ဖူးတဲ့အရာကဘာလဲ...A.စင်ဒရဲလားရဲ့ဖန်ဖိနပ် B.စန်တာရဲ့စွတ်ဖားလှည်း C.ဘုရင့်ရွှေဒင်္ဂါး D...."

ဖူ၀မ်သော်က ထန်မော့ကိုကြည့်လိုက်သည်။

"သံဖိနပ်ချုပ်သမားကြီးရဲ့ ဖိနပ်တိုက်ဆေး"

ထန်မော့ကစဥ်းစားလိုက်သည်။

"အဖြေက D"

"ဟုတ်တယ်"

ထန်မော့နှင့် ဖူ၀မ်သော်မှာ ဖန်ဖိနပ်ကို တစ်ခါမျှမမြင်ဖူးချေ။ စွပ်ဖားလှည်းကိုတော့မြင်ဖူးကြသည်။ ဘုရင့်ရွှေဒင်္ဂါးကတော့ ပီနိုကီယိုမှ မိမိတို့အား လှည့်စားရန်သုံးခဲ့ဖူးသည်။

သံဖိနပ်ချုပ်သမားကြီး၏ ဖိနပ်တိုက်ဆေးသာလျှင်ဖြစ်နိုင်လေသည်။

ဖူ၀မ်သော်၏ ဂိမ်းမှာ ၄င်းနှင့်ဆက်စပ်နေသောကြောင့် ဖိနပ်တိုက်ဆေးသာဖြစ်သင့်သည်။

ထန်မော့ကဆိုလိုက်သည်။

"အမေးအဖြေဂိမ်းက ဖိနပ်တိုက်ဆေးရှာဖို့ သဲလွန်စပေးတဲ့ဂိမ်းပဲဖြစ်မှာ...ဖိနပ်တိုက်ဆေးက ဒီမှာရှိနေတယ်ဆိုတာ ၇၀ရာခိုင်နှုန်းသေချာတယ်... ခင်များကသဲလွန်စကိုရှာ ကျွန်တော်က ဖိနပ်တိုက်ဆေးကိုရှာမယ်...ပထမဆုံးသဲလွန်စက ကမ္ဘာပေါ်က ကစားသမားတိုင်း သံဖိနပ်ချုပ်သမားကြီးရဲ့ ဖိနပ်တိုက်ဆေးကို မြင်ဖူးတယ်ဆိုတာပဲ..."

🪩

Prev Next