MM Story Teller

Chapter 83

Viewers 7k

🌍Chapter 83

ထန်မော့ကရှင်းပြလိုက်သည်။

"အဲဒီအစက်လေးက သေးပြီးတော့ အလင်းရောင်လည်းအတော်မှိန်တယ်...အနက်ရောင်မျှော်စင်နားမှာ စောင့်ကြည့်နေတဲ့ လူ၅၃ယောက်လောက်မှာ ၁၀ယောက်လောက်ပဲ အဲဒါကိုသတိထားမိမယ်ထင်တယ်"

လော့ဖုန်းချန်းကဆိုလိုက်သည်။

"ဒါဆိုငါတို့ပြန်သွားပြီးတော့ စဥ်းစားကြည့်ရအောင်"

"ကောင်းတယ်"

ကလေးမလေးတစ်ဦး၏အရိပ်က ထန်မော့၏အာရုံထဲတွင် ရုတ်တရက်ပေါ်လာခဲ့သည်။

ထိုကလေးမလေးမှာ အထူးဥာဏ်ရည်မျိုးရှိကာ သူမ၏မှန်းဆမှုမှန်ကန်နှုန်းကလည်း ၅၀ရာခိုင်နှုန်းပင်။ ချန်ရှန်းရှန်းသာဤနေရာတွင် ရှိနေခဲ့လျှင် သူမတစ်ခုခုတော့ကို မှန်းဆနိုင်ပေလိမ့်မည်။

လော့ဖုန်းချန်း၏စကားကိုကြားလျှင် ဂျက် ခေါင်းကုတ်လျက် ဆိုလာသည်။

"ပြန်တော့မှာလား...ကိစ္စတော့မရှိပါဘူး အနက်ရောင်မျှော်စင် အဆင့်မြှင့်တာကထွေထွေထူးထူးလည်းမဟုတ်ဘူးနော်...ကျွန်တော်တ်ု့ဒီလာပြီး ဘာသတင်းမှမရလိုက်သလ်ုပဲ...လွန်ခဲ့တဲ့ရက်က ကစားသမားအားလုံး ဂိမ်းမှာအတူပါ၀င်ရမယ်လို့ပြောခဲ့သေးတယ် ဒီတစ်ခေါက်မှာ စည်းမျဥ်းတွေလည်းပြောမသွားဘူး"

၄င်းကိုကြားလျှင် ထန်မော့ ခေါင်းကိုဖြည်းညင်းစွာ လှည့်လျက် ဂျက်အားကြည့်လိုက်မိသည်။

ဂျက် ထန်မော့မှ မိမိအား အဘယ်ကြောင့် ဤသို့ကြည့်နေသည်ကို နားမလည်နိုင်ခဲ့ချေ။ ထို့နောက် သူလှည့်ကြည့်လိုက်လျှင် လော့ဖုန်းချန်းမှာလည်း မိမိအား ထိုပုံစံအတိုင်းကြည့်နေသည်ကို တွေ့လိုက်ရပြန်သည်။

ဂျက်ကြောင်တောင်တောင်ဖြစ်သွားမိသည်။

"ဒေါက်တာလော့ ကျွန်တော်တစ်ခုခုများ မှားပြောမိလို့လား"

လော့ဖုန်းချန်းမှာ သက်ပြင်းချလိုက်ပြီး

"ဂျက် မင်းပထမကြေညာချက်ကို သေချာနားမထောင်နေဘူးမလား"

ဂျက်က ခွန်အားသန်မာသူဖြစ်သော်လည်း မှတ်ဥာဏ်သိပ်မကောင်းလှချေ။ သူကပြန်တွေးတောလျက် ရေရွတ်လိုက်သည်။

"တင်းတောင်~ကစားသမား ၁၆၂.၂၁သန်းဟာ ဂိမ်းထဲကိုအောင်မြင်စွာ၀င်လာပါပြီ"

ထို့နောက် ဂျက်၏အသံကရုတ်ချည်းရပ်သွားပြီး မျက်လုံးများမှာလည်း ပြူးကျယ်သွားခဲ့သည်။ သူ့တစ်ကိုယ်လုံးရှိ ကြွက်သားများတောင့်တင်းသွားလျက်

"၁၆၂.၂၁ ဟုတ်လား သန်း၁၀၀ပေါ့လေ ၄၀၀မဟုတ်ဘူးလား"

ထန်မော့ကအသာဆိုလိုက်သည်။

"အင်း တစ်လထဲမှာပဲ လူသန်း၃၀၀ကျော် သေသွားပြီ"

ဂျက်ပြောခဲ့သလိုပင် ထန်မော့နှင့်လော့ဖုန်းချန်းမှာ လုပ်စရာဘာမှမရှိတော့သည်မို့ တိုက်အဖွဲ့အစည်းရှိရာသို့ ပြန်လာခဲ့ကြသည်။ သူတို့မှာ ဂိမ်းအချိန် ပြောင်းလဲမလဲ အတည်ပြုချင်ခဲ့တာပင်။

နေရောင်ခြည်ပို၍တောက်ပလာသည်နှင့်အမျှ အနက်ရောင်မျှော်စင်သို့ စူးစမ်းရန်သွားသော ကစားသမားများမှာ ပိုပို၍များလာခဲ့သည်။ ဤကစားသမားများမှာ ပုန်းလျိုးကွယ်လျိုးတော့မလုပ်ခဲ့ကြချေ။ အနီးအနားတွင်တခြားသူများရှိသည်ကို ခံစားမိသော်လည်း ၄င်းတို့ကိုယ်တိုင်၏ အဖွဲ့မှာ လူ၅၀ခန့်ရှိသည်ဖြစ်၍ စိတ်ပူမနေကြတော့။

ထန်မော့တို့အဖွဲ့မှာလည်း နေ့လည်တွင် အနက်ရောင်မျှော်စင်အား တဖန်စူးစမ်းရန်သွားခဲ့သေးသည်။ ထန်မော့သည် လမ်းဘေးရှိ ဆိုင်တစ်ဆိုင်မှ အရောင်ဖျော့ဖျော့ကုတ်တစ်ထည်ကိုလဲလည်၀တ်ဆင်လိုက်သည်။ သူ၏ပုံစံမှာ သိပ်မထင်ရှားချေ။ ထိုကဲ့သို့ပေါ့ပေါ့ပါးပါးသဏ္ဍာန်၀တ်ဆင်ပြီးနောက် သူသည် သာမာန် တက္ကသိုလ်ကျောင်းသားလေးတစ်ဦးပုံစံပြောင်းသွားခဲ့လေသည်။ လူအုပ်ထဲတွင်ရပ်နေရင်း သူ့အပေါ်သို့ကျရောက်လာသော အကြည့်တချို့ကိုလညိး ခံစားမိခဲ့သည်။ သို့သော် မသိချင်ယောင်သာဆောင်လျက် ဂျက်နှင့် လော့ဖုန်းချန်းတို့နှင့်အတူ ရပ်နေခဲ့လေသည်။ သို့သော်ဂျက်မှာအလွန် အမြင်ဖမ်းစားလွန်းနေခဲ့သည်။

လူ၃ယောက်မှာ သိပ်မကြာခင်တွင် ပူဒုန်သို့ပြန်လာခဲ့သည်။

လမ်းတစ်လျှောက်တွင် လော့ဖုန်းချန်းကဆိုလိုက်သည်။

"အနက်ရောင်မျှော်စင်က ကစားသမားတွေကို ဗားရှင်းအသစ်အကြောင်းသဲလွန်စတွေမပေးခဲ့ဘူး အဲဒီစုဝေးခြင်းဂိမ်းတွေနဲ့ အစစ်အမှန်လောကဂိမ်းတွေက ငါတို့တွေကိုယ့်ဘာကိုယ်သိအောင် လုပ်ရမယ်ထင်တယ် ဒါပေမယ့်တို့တွေ ၃လကိုတစ်ကြိမ် မျှော်စင်ကိုတိုက်ခိုက်ရမယ်ဆိုတဲ့ အချက်ကတော့ ပြောင်းမသွားဘူး"

ထန်မော့ခေါင်းငြိမ့်လိုက်သည်။

"အင်း"

သူနှင့်အတူ မနေ့ညက အနက်ရောင်မျှော်စင်ကို စူးစမ်းခဲ့သော ကစားသမား အယောက်၅၀ထဲမှ အများစုမှာ ခိုး၀င်သူများဖြစ်လောက်သည်။ အနက်ရောင်မျှော်စင်မှာ ခိုး၀င်သူများကို မုန်းတီးပြီး ၄င်းအတွင်းရှိ မွန်းစတားများမှာလည်း ခိုး၀င်သူများနှင့် အင်မတန်ထူးခြားသော ပတ်သက်မှုမျိုးရှိလေသည်။

မွန်းစတားများမှာ ခိုး၀င်သူများကို စားလိုက်သည်နှင့် ခွန်အားများတိုးလာပြီး စွမ်းရည်များလည်း ရရှိလာမည်ဖြစ်သည်။ မနေ့ညက ခိုး၀င်သူများမှာ အနက်ရောင်မျှော်စင်အနီးတွင်စူးစမ်းနေကြရင်း သူတို့၏ ခိုး၀င်သူဟူသော အထောက်အထားကို ပြောင်းလဲနိုင်သည့်နည်း ရှိမရှိသိလိုခဲ့ကြသည်။ သို့သော် ဤတစ်ကြိမ်တွင် အနက်ရောင်မျှော်စင်၏ အဆင့်မြှင့်တင်မှုမှာ ခိုး၀င်သူများနှင့် သက်ဆိုင်ခြင်းအလျင်းမရှိခဲ့ချေ။

မည်သူကမျှ အနက်ရောင်မျှော်စင်၏ အဆင့်မြှင့်တင်မှုကို ကြိုတင်မခန့်မှန်းနိုင်ခဲ့ချေ။ ဤသည်မှာ ၄င်း၏ပထမဆုံးအဆင့်မြှင့်တင်မှုပင်။ ထိုဗားရှင်းအသစ်အတွက် ရှင်သန်ရေးနည်းလမ်းများ ကျိန်းသေရှိသင့်ပေသည်။ ဥပမာ မနေ့ညကသူရောက်မလာခဲ့လျှင် ထို ၆၂ချက် လင်းသောအလင်းစက်လေးကိုလည်း မြင်လိုက်ရမည်မဟုတ်ချေ။

လော့ဖုန်းချန်းမှာ အရံကစားသမားဖြစ်ကာ သူ၏တိုက်ခိုက်စွမ်းအားမှာ အလွန်နိမ့်လှသည်။ သူကအနက်ရောင်မျှော်စင်၏ပြောင်းလဲမှုကို စူးစမ်းချင်ခဲ့သည်။ သူသည်ရှန်ဟိုင်းအနက်ရောင်မျှော်စင်သုတေသနအဖွဲ့၏ အဖွဲ့ခေါင်းဆောင်ဖြစ်ခဲ့သည်။ အနက်ရောင်မျှော်စင်အား သူ့ထက်ပိုပြီး သိသူမရှိနိုင်ချေ။

ဂျက်မှာ ထန်မော့၏အတွေးများကို နားထောင်ကာ သဘာ၀ကျကျပင်ဆိုလာခဲ့သည်။

"ခိုး၀င်သူတွေကအစကတည်းက လူသတ်သမားတွေပဲလေ... အနက်ရောင်မျှော်စင်ကသူတို့ကိုမုန်းတာ ပုံမှန်ပါပဲ... နျဲ့ဖေးလည်း အဲဒီခိုး၀င်သူအဖွဲ့လက်ထဲမှာသေသွားရတာပဲလေ... အဒီလို ခိုး၀င်သူတွေနည်းလေ ငါတို့တွေပိုပြီး အေးအေးချမ်းချမ်းနေနိုင်လေပဲ"

"သတ်ရတဲ့ရည်ရွယ်ချက်တွေကအမျိုးမျိုးရှိပါတယ်"

လောဖုန်းချန်းက ဂျက်ကိုကြည့်လျက် ပြောလိုက်သည်။

"အနက်ရောင်မျှော်စင်က လူသားတွေကို ဂိမ်းထဲ၀င်ဖို့အချိန်၃ရက်ပေးခဲ့တယ်...သတ်တဲ့နည်းကပဲ ဂိမ်းထဲ၀င်ဖို့တစ်ခုတည်းသောနည်းလို့ မပြောခဲ့ဘူး... ဒီတော့ ခိုး၀င်သူထဲက ၉၉ရာခိုင်နှုန်းက အနက်ရောင်မျှော်စင်အတွက်သတ်ခဲ့တာမဟုတ်ဘူး... ဒါပေမယ့် တစ်ယောက်ယောက်ကို သတ်မိတာနဲ့ပဲ အဲဒီလူက လူဆိုးဖြစ်နိုင်တယ်လို့မဆိုလိုဘူး.. သတ်ရတဲ့အကြောင်းပြချက်တွေအများကြီးရှိတယ်"

ဂျက်ကခေါင်းညိတ်လိုက်သည်။

"ကျွန်တော်သိပါတယ်"

ထန်မော့ သူတို့ကိုကြည့်လျက် အတွေးထဲနစ်မြုပ်သွားခဲ့သည်။

လူသတ်မိသူတိုင်း လူဆိုးမဖြစ်နိုင်။ ဤစကားမှာ မမှားချေ။

ထန်မော့က အနက်ရောင်မျှော်စင်မှ ခိုး၀င်သူများကို မည်သို့သောအချက်နှင့်ခွဲခြားသည်ကို မသိသော်လည်း အနက်ရောင်မျှော်စင်၏ ယေဘုယျခိုင်မာသောအချက်အရ ဘာကြောင့်သတ်ရသည်က အရေးမပါချေ။ သတ်ခဲ့သ၍ ခိုး၀င်သူသာဖြစ်သည်။ ဥပမာ ပွေးကြီးဂိမ်းထဲမှ ၁၅နှစ်အရွယ် ကျောင်းသူလေး၏အဖြစ်အပျက်ပင်။

ကလေးမလေးမှာ တစ်ယောက်လောက်ထံမှ လှည့်စားခံရပြီး ကိုယ်၀န်ရလာခဲ့သည်။ ကလေး၏အဖေဖြစ်သူမှာ တာ၀န်မယူလိုကြောင်းသိချိန်တွင် အလွန်နောက်ကျသွားချေပြီ။ သူမနှင့် သူမ၏လုံခြုံရေးအတွက် သူမ၏မိဘများမှာ အရဲမစွန့်ရန်ဆုံးဖြတ်လိုက်ကြသည်။ သူမထိုကလေးကိုမွေးပြီးသည်နှင့် သူမ၏မိဘများက ထိုကလေးအား မိမိတို့၏ ကိုယ်ပိုင်ကလေးအဖြစ် မွေးစားမည်ဖြစ်သည်။ သို့သော်ကလေးမလေးမှာ ထိုကလေးကိုမွေးပြီးသည်နှင့် ခေါင်းအုံးနှင့်ဖိကာ သေစေခဲ့သည်။ ထို့နောက်သူမမှာ အနက်ရောင်မျှော်သင်ထံမှ ခိုး၀င်သူဟုသတ်မှတ်ခံရပြီး ပွေးကြီးမှာလည်း သူမကိုစားရန် မစောင့်နိုင်ခဲ့ချေ။

တရုတ်ပြည်၏ဥပဒေအရဆိုလျှင် ဤပြစ်မှုမှာ သေဒဏ်တော့အကျခံရမည်မဟုတ်ချေ။ သူမမှာ နှစ်အနည်းငယ်သာ ထောင်ကျခံရလိမ့်မည်။ သို့သော် အနက်ရောင်မျှော်စင်အတွက်မူ ခိုး၀င်သူများအားလုံးမှာ အတူတူပင်။ နှလုံးကိုစားသောခိုး၀င်သူများပင်ဖြစ်စေ မိမိ၏ကလေးကိုသတ်ခဲ့သော ခိုး၀င်သူပင်ဖြစ်စေ။

"ကမ္ဘာကြီးအွန်လိုင်းပေါ်တက်လာပြီးတော့ အသက်ရှင်နှုန်းအမြင့်ဆုံးက ဘယ်နိုင်ငံလဲ"

ထန်မော့ရုတ်ချည်းမေးလိုက်သည်။

ဂျက်ခဏမျှတွေးလိုက်သည်။

"တရုတ်တို့ အိန္ဒိယတို့များလား ဒီနိုင်ငံတွေက လူဦးရေအများဆုံးပဲလေ"

ထန်မော့ခေါင်းခါလိုက်သည်။

လော့ဖုန်းချန်းကပြန်ဖြေလာခဲ့သည်။

"ဒါက စစ်ပွဲနယ်မြေသဘောမျိုးပဲ... လူဦးရေများများရှိရင် ရှင်ကျန်သူများများတော့ရှိနိုင်ပါတယ်... ဒါပေမယ့် သေချာစဥ်းစားကြည့်ရင် စစ်ပွဲမှာ ပါ၀င်ရတဲ့သူတွေလည်းပိုများတယ်... သေတဲ့သူလည်းပိုများတယ်... နေ့တိုင်းသတ်နေရတာကိုး"

လူသတ်ခြင်းမှာ ဂိမ်းထဲသို့၀င်ရန် အလွယ်ဆုံးနည်းပင် ဖြစ်သည်။

ထန်မော့နှင့် လော့ဖုန်းချန်းတစ်ဦးကိုတစ်ဦးကြည့်လိုက်မိသည်။

သူတို့မကြာခင် မောလ်သို့ပြန်ရောက်လာခဲ့သည်။

အနက်ရောင်မျှော်စင်အဆင့်မြှင့်တင်မှုက ကစားသမားများအတွက် မည်သည့်ပြောင်းလဲမှုကိုမှ ယူဆောင်မလာခဲ့ချေ။ ထန်မော့သည် မောလ်ထဲသို့ အ၀င်အထွက်ပြုလုပ်နေသူတိုင်းကို ဂရုတစိုက်အကဲခတ်နေခဲ့သည်။ ထိုသူတို့မှာ မျှော်စင်အဆင့်မြှင့်တင်ပြီးနောက်ပိုင်းတွင်လည်း ထူးထူးခြားခြားပြောင်းလဲသွားပုံမပေါ်ချေ။ သို့သော် နောက်တစ်နေ့တွင် အရံကစားသမားတစ်ဦးမှာ မောလ်ထဲသို့အမြန်ပြေး၀င်လာခဲ့သည်။

၄င်းမှာ မောလ်ထဲရှိ လူအယောက်၈၀ထဲတွင် လူကောင်သေးသေးနှင့် သိပ်မမြင်သာသော သက်လတ်ပိုင်းအရွယ်လူကြီးတစ်ဦးပင်။ ထန်မော့သည် ၃ထပ်မှသူ့အားငုံ့ကြည့်နေခဲ့ပြီး စတိုးဆိုင်တစ်ခုထဲသို့ လျင်မြန်သောအရှိန်ဖြင့် ပြေး၀င်သွားသည်အား တွေ့လိုက်ရလေသည်။ သွားနေစဥ်အတွင်းတွင်လည်း တစ်ဦးဦးကသူ့အားမြင်သွားမည်ကို စိုးရိမ်နေပုံဖြင်း ဘေးဘီ၀ဲယာကိုလည်း ကြည့်နေသေးသည်။

ထန်မော့မျက်လုံးကိုမှေးကျဥ်းလျက် အောက်သို့ဆင်းလာခဲ့လိုက်သည်။

အရိပ်တစ်ခုမှာ ဆိုင်များကို ဖြတ်ကျော်လျက် ကိတ်ဆိုင်တစ်ခုရှေ့တွင်ရပ်တန့်သွားခဲ့သည်။

ထိုသက်လတ်ပိုင်းလူကြီးမှာ အင်္ကျီဆိုင်တစ်ခုထဲ၀င်ပြီးနောက် တံခါးကို လော့ချလိုက်သည်။ သူ၏အရိပ်မှာ မှန်မှပင်တဆင့်မမြင်နိုင်ချေ။ ထန်မော့လည်း ဘေးပါ

တ်၀န်းကျင်ကိုအကဲခတ်လျက် ဘေးမှကိတ်ဆိုင်ထဲသို့၀င်လိုက်သည်။ ထို့နောက်ဆိုင်တံခါးကို လော့ချလိုက်ပြီး ဆိုင်၏မီးဖိုချောင်သို့လျှောက်သွားကာ လေထုတ်သည့်ပန်ကာတစ်ခုကိုတွေ့သွားခဲ့သည်။

မီးဖိုချောင်း၏စားပွဲမှာ မှိုတက်နေသော ကိတ်မုန့်များရှိနေပြီး ပန်ကာမှာလည်း ဖုန်များတက်လျက်။ ထန်မော့ပန်ကာကိုဖြုတ်လိုက်ကာ ထိုအပေါက်အား သူ၏ညာလက်ဖြင့်တိုင်းတာလိုက်သည်။ ထို့နောက်သူခတ္တမျှစဥ်းစားနေပြီးမှ ပန်းရောင်ထီးကလေးကို ထုတ်ယူလိုက်သည်။ စကားစုကိုရွတ်ဆိုပြီးနောက် ထီးကလေး၏ထိပ်ဖျားမှာ ထိုလေ၀င်ပေါက်၏အောက်မှ ၁၀စင်တီမီတာအထိ ထိုးဖောက်သွားခဲ့သည်။

လေ၀င်ပေါက်တစ်လျှောက်နံရံကို ထိုးဖောက်သံက ရှင်းလင်းစွာ ထွက်ပေါ်လာခဲ့သည်။ထိုနောက်ထီးကိုဖယ်လိုက်ပြီး နံရံမှ လတ်နေသော ကွန်ကရစ်တုံးကို ဖယ်လိုက်သည်။ ထို့နောက် ထိုအပေါက်မှတဆင့် အင်္ကျီဆိုင်၏ ဂိုထောင်ထဲသို့ ၀င်သွားလိုက်လေသည်။

သူသည် ဂိုထောင်၏ နံရံတွင်ကပ်လျက်နားစွင့်လိုက်လျှင် အပြင်ဘက်မှ ယောကျာ်းတစ်ဦးနှင့်မိန်းမတစ်ဦး၏အသံကိုကြားလိုက်ရလေသည်။

"လီရှင်း အစစ်အမှန်လောကဂိမ်းတစ်ခုထဲ ဆွဲသွင်းခံလိုက်ရတယ်... ငါအခုလေးတင် သူနဲ့လမ်းလျှောက်နေတုန်း ရုတ်တရက်ကြီး..."

"ဘာ"

"ရှူး တိုးတိုးပြော"

သက်လတ်ပိုင်းအရွယ်လူကြီးမှာ တဖက်လူ၏ပါးစပ်ကို ပိတ်လိုက်သည်။

ခတ္တကြာပြီးနောက် အမျိုးသမီး အသံကိုထပ်မံကြားလိုက်ရလေသည်။

"အစစ်အမှန်လောကဂိမ်းဆိုတာ သေချာလို့လား..အဲဒါက အနက်ရောင်မျှော်စင် ကြေညာထားတာတောင် မကြာသေးဘူး...လီရှင်းက ဒီိတိုင်းကျွန်မတို့ရှာမတွေ့ရသေးတဲ့ ဖြစ်စဥ်ဂိမ်းတစ်ခုထဲ၀င်သွားတာလည်းဖြစ်နိုင်တာပဲ...ကျွန်မတို့အရင်က၀င်ဖူးတဲ့ Sအမျိုးအစားဂိမ်းတွေလိုလည်းဖြစ်နိုင်တာပဲ"

"လုံး၀မဟုတ်ဘူးဟ...တကယ့်အစစ်အမှန်လောကဂိမ်းအစစ်"

သက်လတ်ပိုင်းအရွယ်လူကြီး၏အသံမှာ ကြောက်ရွံမှုတို့ လွှမ်းခြုံနေခဲ့သည်။

"စက်ရုံဟောင်းရဲ့နောက်မှာ သံဖိနပ်ချုပ်သမားအကြီးကြီးတစ်ယောက် ရုတ်တရက်ပေါ်လာတယ်လေ ပြီးတော့ လီရှင်းကိုဆွဲသွားတာပဲ... လီရှင်းဘာလုပ်လိုက်လို့လဲတော့ ငါလည်းမသိဘူး... ငါလည်းသူ့ဘေးမှာ ရပ်နေတာပဲ အဲဒီသံဖိနပ်ချုပ်သမားကြီးက ငါ့ကိုပြုံးရုံပြုံးပြပြီး ဆွဲခေါ်မသွားဘူး... ငါ့ကိုဂိမ်းထဲက ကြိုဆိုပါတယ်လို့လည်းပြောသွားတယ်"

ထန်မော့၏မျက်ခုံးတို့ စုကျုံ့သွားခဲ့လေသည်။

🪩

Prev Next