MM Story Teller

Chapter 82

Viewers 7k

🌍Chapter 82

"ခရစ်စမတ်ဘောနပ်စ်ဂိမ်းပွင့်လာတာနဲ့ ကျွန်တော် ရှန်းရှန်း လျိုချန်း ဖေးဖေးတို့အတူတူ သစ်ကိုင်းတွေကိုသွားရှာခဲ့တယ်... ကျွန်တော်တို့၂ခုပဲတွေ့တော့ ရှန်းရှန်းနဲ့ ဖေးဖေးကို ပေးဖို့ပဲဆုံးဖြတ်လိုက်တာ... သူတို့၂ယောက်အတူ ဂိမ်းထဲ၀င်သွားတယ်"

ဖက်တီးလေးမှာ လွန်ခဲ့သောလ၀က်ကထက် ပို၍ သန်မာနေချေပြီ။ သူ၏သူငယ်ချင်းများ ပျောက်ဆုံးနေမှုအား သူအတတ်နိုင်ဆုံးတည်ငြိမ်အောင်ကြိုးစားပြီး ပြောဆိုနေခဲ့သည်။

"ကျွန်တော်ထင်ခဲ့မိတာက ရှန်းရှန်းနဲ့ ဖေးဖေးက မိိန်းကလေးမို့ တိုက်တာခိုက်တာတွေမှာ ကျွန်တော်နဲ့ လျိုချန်းလောက် အားမသာနိုင်ဘူးလို့လေ..ကျွန်တော်နဲ့ လျိုချန်းကသစ်ကိုင်းတွေမရှိပေမယ့် ပြီးမှရှာလည်းရတာပဲ...မိန်းကလေး၂ယောက်ကို အရင်ပေး၀င်လိုက်မယ်လို့ပေါ့...ဒါပေမယ့် သန်းခေါင်ကျော်သွားတာတောင် သူတို့ထွက်မလာဘူး"

ကျောက်ကျန်း၏ မျက်လုံးများမှာ နီရဲနေသော်လည်း သူငိုမချခဲ့ချေ။

ထန်မော့ တင်းတင်းဆုပ်ထားသော လက်ချောင်းများကို ဖြေလျော့ရင်း ဆိုလိုက်သည်။

"သူတို့၂ယောက်က သစ်ကိုင်းကိုအတူတူရခဲ့ရင်တောင် ဂိမ်းတစ်ဂိမ်းကိုရောက်သွားမယ်လို့ အာမမခံနိုင်ဘူး...ဂျက်ကနောက်မှ သစ်ကိုင်းကိုရပြီး မင်းကမရပေမယ့် ဂိမ်းအတူတူကျသလိုပဲပေါ့... ဂိမ်းတွေကကျပန်းပဲ"

ကျောက်ကျန်းခေါင်းငြိမ့်လိုက်သည်။

ထန်မော့သည် တိတ်ဆိတ်စွာ ရပ်နေသောလော့ဖုန်းချန်းကို ကြည့်လိုက်သည်။

ထို့နောက် ဖက်တီးလေးနားတိုးသွားကာ ဆိုခဲ့သည်။

"စောင့်ပါ"

တကယ်တမ်းတွင် ကျောက်ကျန်းမှာ အစကတည်းကဤကိစ္စကိုသိပြီးဖြစ်သည့်တိုင် ထန်မော့အားပြောမထွက်ခဲ့ခြင်းပင်။ သူတို့တွင်စောင့်ဆိုင်းခြင်းကလွဲရွေးချယ်စရာမရှိချေ။ ချန်ရှန်းရှန်း မည်သည့်ဂိမ်းသို့၀င်သွားသလဲ သူမသိနိုင်။ ထို့အပြင် ခရစ်စမတ်ဂိမ်းများမှာ ပိတ်သွားပြီဖြစ်ပြီး သူ၀င်သွား၍လည်းမရတော့ချေ။

ဖက်တီးကလေး ခေါင်းငိုက်စိုက်ကျလျက် ထွက်သွားလေသည်။

ထန်မော့ ဖက်တီးလေး၏ကျောပြင်ကို ကြည့်လျက် နှုတ်ခမ်းတို့မှာ ဖြောင့်တန်းသွားခဲ့သည်။

"ကလေးမ၂ယောက် မျှော်စင်တိုက်ခိုက်ခြင်းဂိမ်းထဲ ဆွဲသွင်းခံရနိုင်တယ်ဆိုတာကို သူ့ကိုမပြောနဲ့"

ထန်မော့ လော့ဖုန်းချန်း၏စကားကိုကြားလျှင် လှည့်ကြည့်လိုက်သည်။ ငယ်ရွယ်သော ဒေါက်တာက သူ၏လက်နှစ်ဘက်ကို ကုတ်အင်္ကျီအဖြူ၏ အိတ်ထဲထိုးထည့်ပြီး ထန်မော့ကို တိတ်ဆိတ်စွာကြည့်နေခဲ့သည်။

"ခရစ်စမတ်ဂိမ်းတွေမှ အများကြီးပဲ ၁၂နာရီမှာ စန်တာက လက်ဆောင်တွေပေးပြီးသွားတာနဲ့ တရုတ်ပြည်ရဲ့ ခရစ်စမတ်ဂိမ်းတွေပိတ်သွားပြီလို့ ဆိုလိုတာပဲ"

ထန်မော့လည်း ထိုအမှန်တရားကို သိသည်သာ။

တိုက်အဖွဲ့၀င် ၁၃ဦးထဲတွင် ထန်ရှောင်းမှာ ဂိမ်းထဲ အတင်းအကြပ်ဆွဲသွင်းခံလိုက်ရသည်။ ၁၂နာရီတွင် သူမပါ၀င်ခဲ့သော လူဦးရေများသည့်ဂိမ်းထဲတွင် လူ၃ယောက်သေပြီး ၈ယောက်မှာ ထုတ်ပယ်ခံလိုက်ရလေသည်။ ကျန်ခဲ့သောလူ၅ယောက်ကသာ တစ်ဦးကိုတစ်ဦး သတိချပ်လျက် ဂိမ်းကိုဆက်ကစားခဲ့ရသည်။ ၁၂နာရီတွင် ဂိမ်းမှာမပြီးသေးသည့်တိုင် သူတို့၅ယောက်လုံးကမ္ဘာသို့ပြန်လည်ပို့ဆောင်ခံလိုက်ရလေသည်။

ခရစ်စမတ်ဘောနပ်စ်ဂိမ်းမှာ ခရစ်စမတ်တွင်သာပွင့်သည်။

ချန်ရှန်းရှန်းနှင့် ရှောင်ဖေးဖေးမှာထွက်မလာရသေးချေ။ ဆိုလိုသည်မှာ ဖြစ်နိုင်ချေတစ်မျိုးသာရှိလေသည်။ သူတို့ထုတ်ပယ်ခံလိုက်ရပြီး မျှော်စင်တိုက်ခိုက်ခြင်းဂိမ်းထဲပို့ခံလိုက်ရခြင်းပင်။

ထန်မော့သည် လော့ဖုန်းချန်းစားပွဲပေါ်မှ ရုပ်တုအသေးလေးကိုကြည့်နေမိသည်။ အတော်ကြာပြီးနောက် သူကဆိုလိုက်သည်။

"အနက်ရောင်မျှော်စင်က မကြာခင်မှာ ဗားရှင်းအသစ်မြှင့်လိမ့်မယ်၊ ကျွန်တော် အချိန်တစ်ခုအထိ ရှန်ဟိုင်းကထွက်သွားဖြစ်ဦးမှာ မဟုတ်ဘူး"

လော့ဖုန်းချန်းကမေးလာခဲ့သည်။

"မင်းဘယ်လောက်ကြာကြာစောင့်မယ်လို့ တွေးထားလဲ"

အနက်ရောင်မျှော်စင်၏ဗားရှင်းအသစ်ကိုစောင့်ရန်မှာ ဤအကြောင်းပြချက်တစ်ခုသာရှိလေသည်။ စုကျိုးတွင်လည်းအနက်ရောင်မျှော်စင်ရှိသည်မို့ သူ့အနေနှင့် ရှန်ဟိုင်းတွင်စောင့်စရာမလိုအပ်ချေ။ သူကချန်ရှန်းရှန်း၏လုံခြုံမှုကိုအတည်ပြုလိုခြင်းသာ။

ထန်မော့ တည်ငြိမ်စွာပင် တုန့်ပြန်လိုက်သည်။

"၁၀ရက်"

****

လော့ဖုန်းချန်း၏ ရုံးခန်းမှထွက်လာပြီးနောက် ထန်မော့ ကြုံရာကားတစ်စီးကိုရွေးလိုက်ပြီး အနားယူရန်လှဲချလိုက်သည်။

တိတ်ဆိတ်ပြီး လူသူကင်းမဲ့နေသော မြေအောက်ကားပါကင်မှာ အလင်းရောင်ဖျော့ဖျော့လင်းလက်နေခဲ့သည်။ ထိုဖျော့တော့တော့အလင်းရောင်မှာ ကားမှန်အနက်မှတဆင့် အတွင်းမှ အရိပ်အယောင်မျှကိုသာမြင်နေရခြင်းပင်။ ထန်မော့လက်ကိုဆန့်လျက် ၄င်းကို သူ၏မျက်လုံးရှေ့တွင် ထားလျက်ကြည့်လိုက်လေသည်။ လွန်ခဲ့သောတစ်လခန့်က ကလေးမလေးမှာ သူ၏လက်ထဲသို့ ဘီစကစ်တစ်ဘူး ထိုးထည့်ပေးလျက် သူမ၏စွမ်းရည်ကိုပေးလာခဲ့သည်။

အကယ်၍ ချန်ရှန်းရှန်းကို ကယ်တင်ရန် ဂိမ်းထဲသို့၀င်ရောက်နိုင်သည့်အခွင့်အရေးရှိခဲ့လျှင်တောင် ထန်မော့ချက်ချင်း၀င်မှာမဟုတ်ချေ။ သူသည်အချိန်အကြာကြီးတွေးတောဦးမည်ဖြစ်ကာ သူ၏ဘုရင့်ရွှေဒင်္ဂါးကိုအခြေပြုလျက်သာ လူတစ်ယောက်ကိုရှာဖို့ ဆုံးဖြတ်ရလိမ့်မည်ပင်။ ထိုရွှေဒင်္ဂါးမရှိပါက သူ့အနေနှင့် အန္တရာယ်များလွန်းသော မျှော်စင်တိုက်ခိုက်ခြင်းဂိမ်းထဲသို့ ထိုကလေးမလေးကိုသွားရှာရန်မှာ မဖြစ်နိုင်ချေ။

လော့ဖုန်းချန်းအားဆိုခဲ့သလိုပင် သူ၁၀ရက်စောင့်ကြည့်ရန်ဆုံးဖြတ်ခဲ့သည်။

ထို၁၀ရက်အတွင်း ချန်ရှန်းရှန်းထွက်မလာပါက သူစုကျိုးကိုခရီးဆက်မည်ဖြစ်သည်။

အချိန်မှာ ရေစက်များနှယ် ၇ရက်မှာလျင်မြန်စွာ ကုန်ဆုံးသွားခဲ့သည်။ ခရစ်စမတ်နေ့တွင် တိုက်အဖွဲ့မှ အသင်းသား၅ယောက်မှာ ဂိမ်းထဲမှ ထွက်ရန် ကျရှုံးခဲ့သည်။ ခိုး၀င်သူအဖွဲ့အစည်းအား နှိမ်နင်းသည့်အဖြစ်အပျက်ပြီးနောက်တွင် အဖွဲ့သားများဆုံးရှုံးရခြင်းကို သူတို့က လွန်လွန်ကဲကဲမတုန့်ပြန်လာတော့ချေ။ လူတိုင်းမှာတည်ငြိမ်စွာ လက်ခံခဲ့သည်။

မှောင်မိုက်သော ညတစ်ခုတွင် ထန်မော့ ဂျက်နှင့် လော့ဖုန်းချန်းတို့မှာ မောလ်မှ တိတ်တဆိတ်ထွက်လာခဲ့ကြသည်။

အမှောင်ထုထဲတွင် လူ၃ဦးမှာ လျှပ်စီးသဖွယ်အလျင်ဖြင့် ရွေ့ရှားနေလျက် စက်ရုံနယ်မြေနှင့် အိမ်ယာ၀န်းများကို ဖြတ်ကျော်လာခဲ့ကြလေသည်။ ထို့နောက်နန်ဖူမြစ်ကိုကျော်လျက် ပုရှီိသို့ရောက်လာခဲ့ကြသည်။

အနက်ရောင်မျှော်စင်နှင့် ၅မီတာခန့်အကွာအဝေးသို့ရောက်လျှင် ထန်မော့ရပ်တန့်လျက် ဂျက်နှင့် လော့ဖုန်းချန်းတို့အား စောင့်လိုက်လေသည်။ လူ၃ဦးမှာ အလင်းရောင်နည်းပါးလှသည့် လမ်းကြားလေးတစ်ခုထဲတွင်ပုန်းနေခဲ့ကြသည်။ ထန်မော့အသံကိုနှိမ့်လျက်ဆိုလိုက်သည်။

"ဂျက်မင်းက ကျွမ်းကျင်တဲ့သူဆိုပေမယ့် မင်းရဲ့ကိုယ်က သတ်ထားမိဖို့လွယ်လွန်းတယ် လော့ဖုန်းချန်း ခင်များကတော့ အရံကစားသမားဆိုတော့ အရမ်းနီးသွားရင် ခင်များကိုလည်း သူတို့ရှာတွေ့သွားမှာပဲ

ဒါကြောင့် ကျွန်တော်ပဲသွားမယ်"

ဂျက်ကမျက်မှောင်ကျုံ့လိုက်သည်။

"ငါတို့လာတုန်းက ပုန်းနေတဲ့၅ယောက်အုပ်စုကိုတွေ့ခဲ့တယ်လေ မင်းတစ်ယောက်တည်းသွားရင် အန္တရာယ်မများလွန်းဘူးလား"

လော့ဖုန်းချန်းကလည်း မေးလာခဲ့သည်။

"အရေးပေါ်အခြေအနေနှာ မင်းဘယ်လောက်မြန်မြန်ငါတို့နဲ့လာပေါင်းလို့ရလဲ"

သူတို့မှာ ထန်မော့တွင် အလျင်လူသားစွမ်းရည်ရှိနေသည်ကို မသိကြချေ။ သူ၏အလျင်ကို အသံ၏အမြန်နှုန်းအထိတိုးမြှင့်နိုင်လေသည်။

"ချက်ချင်းပေါ့ အဲဒီလူတွေကိုမနိုင်ရင်တောင် လွတ်အောင်တော့ ပြေးနိုင်တယ်"

ဂျက်မှာတစ်ခုခုပြောရန်ပြင်လိုက်သေးသော်လည်း လော့ဖုန်းချန်းကသူ့ကို တားလိုက်သည်။

"အိုကေလေ ငါတို့မင်းကို ဒီမှာပဲ 00:15 အထိစောင့်နေမယ် မင်းပြန်မလာသေးရင် ငါတို့နေရာရှာပြီး ပုန်းနေလိုက်မယ်"

ထန်မော့ ခေါင်းညိတ်လိုက်သည်။ ထို့နောက် ခပ်လှမ်းလှမ်းမှ နန်ကျင်းလမ်းကိုကြည့်လိုက်လေသည်။

၀ှစ်...

ညအမှောင်တွင် အရိပ်တစ်ခုမှာ လေထုကိုထိုးခွဲလျက် အလွန်လျင်မြန်စွာ အနက်ရောင်မျှော်စင်ဆီသို့ ဦးတည်နေခဲ့လေသည်။

ရွေ့လျားနေစဥ်အတွင်း ထန်မော့မှာ ဘေးပါတ်၀န်းကျင်မှာ သေးငယ်သောလှုပ်ရှားမှုလေးများကအစ မလွတ်စေရအောင် သတိထားနေခဲ့သည်။ သူ၏စိတ်မှာဗလာကျင်းလျက် အဆုံးစွန်အထိ အာရုံစိုက်ထားခဲ့သည်။ အလွန်မြန်လှသောအရှိန်ကြောင့် သူ၏နားထဲတွင် လေထုနှင့်ပွတ်တိုက်မိသံမှာ စူးရှနေခဲ့သည်။ သူသည်မိမိ၏နှလုံးခုန်သံနှင့် မီတာ၅၀အတွင်းမှ သတိတကြီးနှင့် လှမ်းနေသော ခြေသံ ၁၀ချက်ခန့်ကိုလည်းကြားလိုက်ရလေသည်။

နှစ်သစ်ကူးရက်တွင် ရှန်ဟိုင်းမှာ ပကတိတိတ်ဆိတ်လျက်။ လေရောမိုးရာရှိမနေခဲ့၊ ဤညနေတွင် အန္တရာယ်ရှိသည့်တိုင် ကစားသမားအများစုမှာ အနက်ရောင်မျှော်စင်အနီးသို့ ချည်းကပ်သွားကြသည်။ ဝေ့တန်နာရီစင်ကြီးမှ ညသန်းခေါင်ရောက်ပြီဖြစ်ကြောင်း အချက်ပေးသည်နှင့် ယခင်ကကဲ့သို့ဟွမ်ပူမြစ်ကမ်းတစ်ဖက်မှ နှစ်သစ်ကိုကြိုဆိုသည့် မီးရှူးမီးပန်းများပေါက်ကွဲထွက်မလာခဲ့ချေ။

နန်ကျင်းလမ်းနှင့် နာရီစင်အကြားတွင် အနက်ရောင်မျှော်စင်အနီးသို့ ၅၀ထက်ပိုသော အရိပ်များ တိုးကပ်လာကြလေသည်။ သူတို့မှာ အချင်းချင်း အာရုံခံမိလျက် အနီးဆုံး လုံခြုံရာနေရာများထံ ပြေး၍ပုန်းလိုက်ကြသည်။

ထန်မော့အသက်ကိုပြင်းပြင်းရှုလျက် ငြိမ်းချမ်းမှုအမည်ရှိဟိုတယ်၏တံခါးကို လက်ထောက်ရင်း ဖြည်းညင်းစွာ ထိုင်ချလိုက်သည်။

အနက်ရောင်မျှော်စင်အနီးသို့မရောက်ခင်မှာပင် သူကစားသမား ၁၂ယောက်ခန့်ကို တွေ့ခဲ့ရလေသည်။ အမှောင်ထဲတွင် တစ်ဦးကိုတစ်ဦးမမြင်နိုင်သည့်တိုင် အသက်ရှူသံများကိုတော့ ခံစားမိမည်သာ။ ထို၁၂ဦးမှာ အတူတကွလှုပ်ရှားလျက် ပုန်းခိုရန်နေရာအသီးသီးကိုရှာဖွေနေခဲ့ကြသည်။

ထန်မော့ ငြိမ်းချမ်းမှုဟိုတယ်၏ ပထမထပ်ကိုပြေးသွားလျက် တံခါးနောက်တွင်ပုန်းနေခဲ့သည်။ ထို့နောက် တိတ်တဆိတ်ပင် ခေါင်းကိုလှည့်လျက် အပြင်ဘက်ရှိအနက်ရောင်မျှော်စင်အား ပြတင်းပေါက်မှတဆင့်ကြည့်လိုက်လေသည်။

အမှောင်ထုသိပ်သည်းသောညတွင် ၁၂နာရီက လျင်မြန်စွာရောက်ရှိလာခဲ့သည်။

ထန်မော့မှာ အနက်ရောင်မျှော်စင်အား စိုက်ကြည့်နေရင်း မျက်မှောင်ကျုံ့မိသည်။

"ဘာမှမဖြစ်ဘူးလား..."

လွန်ခဲ့သည့် ၇ရက်တွင် အနက်ရောင်မျှော်စင်မှ ဇန်န၀ါရီ ၁ရက်နေ့တွင် ဗားရှင်းအသစ် ၂.၀အွန်လိုင်းတက်လာမည်ဟု ကြေညာခဲ့လေသည်။ ထန်မော့နှင့် လော့ဖုန်းချန်းတို့ဆွေးနွေးပြီးနောက် အနက်ရောင်မျှော်စင် ဗားရှင်းအသစ်မှာ နှစ်သစ်ကူး ညသန်းခေါင်းတွင် လိုင်းပေါ်တက်လာလိမ့်မည်ဟု ကောက်ချက်ချခဲ့ကြသည်။

"တကယ်အမှန်က ၆နာရီဖြစ်နေရင် ဘယ်လိုလုပ်မလဲ"

ထန်မော့၏ရင်ထဲမှ တစ်ချက်ဆောင့်ခုန်သွားမိသည်။

၆နာရီမှာဖြစ်နိုင်သောအချိန်ပင်။ အနက်ရောင်မျှော်စင်၏ သံမဏိစည်းကမ်းကြီး ၃ချက်ထဲမှ ၁ချက်မှာ ၆နာရီမှ ၁၈နာရီအထိ ဂိမ်းအချိန်ဟုဆိုထားသည်ပင်။ သို့ဆိုပါက ဗားရှင်းအသစ်မှာ ၆နာရီတွင်မှ လိုင်းပေါ်တက်လာမှာ ဖြစ်နိုင်သည်။ ထပ်ပေါင်းဆိုရပါလျှင် တတိယဖြစ်နိုင်ချေမှာ ၈နာရီဖြစ်သည်။ အဘယ်ကြောင့်ဆိုသော် လွန်ခဲ့သော၁လခန့်က အနက်ရောင်မျှော်စင်မှာ ကမ္ဘာကြီးအွန်လိုင်းပေါ်တက်လာပြီဖြစ်ကြောင်း နို၀င်ဘာ ၁၅ရက်နေ့ ၈နာရီတွင် ကြေညာပေးခဲ့၍ပင်။ ဂိမ်းမှာ ၁၈ရက်နေ့ ၈နာရီတွင် တရား၀င်စတင်ခဲ့လေသည်။

" သန်းခေါင်းအချိန်မဟုတ်ဘူးဆိုရင် ငါဂျက်နဲ့ လော့ဖုန်းချန်းဆီ ပြန်သွားလိုက်မယ် နောက်ထပ်၆နာရီအထိစောင့်ပြီးမှ ပြန်လာကြည့်တာပေါ့"

ထန်မော့ကြီးမားသော အနက်ရောင်မျှော်စင်ကြီးကို မော့ကြည့်လျက် ပြန်သွားရန် ပြင်ဆင်လိုက်သည်။ သို့သော် အနက်ရောင်မျှော်စင်၏ အလယ်နေရာကိုတွေ့လျှင် ထန်မော့၏ လှုပ်ရှားမှုတို့ အေးခဲသွားလျက် စိုက်ကြည့်နေမိခဲ့လေသည်။

အနက်ရောင်မျှော်စင်မှာ တောင်ကြီးတစ်လုံးနှယ် လေထုထဲ ချိတ်ဆွဲနေခဲ့သည်။ ယခုအချိန်တွင် အဖြူရောင်အလင်းလေးတစ်ခုက မျှော်စင်၏အလယ်နေရာမှ တဖျတ်ဖျတ်လင်းလက်နေခဲ့သည်။ ဤအလင်းစက်လေးမှာ စီးချက်တစ်ခုအလိုက် တဖျတ်ဖျတ်ဖြစ်နေခြင်းပင်။

ထန်မော့မှာ သူ၏နှလုံးခုန်သံနှင့်အတူ ရေတွက်နေခဲ့သည်။

ဒုန်း ဒုန်း ဒုန်း...

သေးငယ်သောအလင်းစက်လေးမှာ စက္ကန့်အချက်တိုင်း တစ်ဖျတ်ဖျတ်လင်းနေပြီး ၆၂ကြိမ်မြောက် တဖျတ်ဖျတ်ပြုလုပ်ပြီးနောက် ၄င်း၏အောက်မှနေရာတစ်ခုမှ ထပ်၍လင်းလာခဲ့လေသည်။ သို့သော်ဤတစ်ကြိမ်တွင်မူ ၄င်း၏အောက်မှ အလင်းစက်လေးမှာမူ တ၀က်မျှသာလင်းလေသည်။

နောက်တစ်စက္ကန့်တွင် မြူးကြွသောသီချင်းကိုကြားလိုက်ရပြီး များစွာသော ကလေးများ၏ သံပြိုင်သီချင်းဆိုသံထွက်ပေါ်လာခဲ့သည်။ ထိုသီဆိုသံမှာ အရပ်မျက်နှာပေါင်းစုံမှ ထွက်လာနေပြီး မှောင်ထုထဲ ပဲ့တင်ထပ်နေခဲ့သည်။ ထိုထူးဆန်းသောအသံက လူတိုင်းကို ခေါင်းကျိန်းသွားစေသည်။

"ပျော်ရွှင်ဖွယ်နှစ်သစ်ပါ ပျော်ရွှင်ဖွယ်နှစ်သစ်ပါကွယ်... လူတိုင်းကိုပျော်ရွှင်ဖွယ်နှစ်သစ်လို့ ဆုတောင်းပေးပါတယ်"

"ဆိုလိုက်ကြ ကလိုက်ကြစို့ ပျော်ရွှင်စရာနှစ်သစ်ရောက်ခဲ့ပြီ"

"ပျော်စရာနှစ်သစ်..."

ထန်မော့မှာ ပါတ်၀န်းကျင်မှ အာမေဋိတ်သံတချို့ကို ကြားလိုက်ရသည်။ သူသည်ပြတင်းပေါက်ဘေးတွင်ကွယ်လျက် အမှောင်ထဲတွင်ပုန်းကွယ်နေခဲ့သည်။ သူ၏မျက်လုံးများကသာလျှင် မီတာတချို့အဝေးမှ အနက်ရောင်မျှော်စင်အား မလွှဲစတမ်း စိုက်ကြည့်နေခဲ့လေသည်။

အမှောင်ထုထဲတွင် ကြီးမားသောအနက်ရောင်မျှော်စင်ကြီးမှာ ခေတ်ဟောင်း KTVခန်းမှ ဒစ်စကိုအလင်းလုံးနှယ် ရောင်စုံအလင်းရောင်များတဖျတ်ဖျတ်တောက်ပလျက်။ ထိုရောင်စုံအလင်းများမှာ ဟွမ်းဖူမြစ်ရေပေါ် ရောင်ပြန်ဟပ်နေခဲ့သည်။ ၄င်းမှာ ကလေးတစ်အုပ်မှ နှစ်သစ်ကူးသီချင်းကို ဆိုနေကြသည့်အတိုင်း မြူးကြွသော သီချင်းအား ထပ်ခါထပ်ခါဆိုနေခဲ့လေသည်။

အမှောင်ထုထဲရှိ အယောက်၅၀မကသော ကစားသမားများမှာလည်း အနက်ရောင်မျှော်စင်ကို စိုက်ကြည့်နေခဲ့ကြလေသည်။

သီချင်းကို၃ကြိမ်တိုင်တိုင်ဆိုပြီးချိန်တွင် အလင်းရောင်များမှာ ရုတ်ချည်းရပ်တန့်သွားခဲ့သည်။ လူတိုင်းမှာ ထိုမြင်ကွင်းကို သတိတကြီးစောင့်ကြည့်နေချိန်တွင် ကလေးသံ၏ ကြေညာမှုကို ကြားလိုက်ရတော့သည်။

"တင်းတောင်~ ၁၆၂.၂ မီလီယံသော ကစားသမားတွေဟာ ဂိမ်းထဲကိုအောင်မြင်စွာ ၀င်လာပါပြီ"

"ဂိမ်းကိုသိမ်းလိုက်ပါပြီ"

"ကစားသမားအချက်အလက်များကို သိမ်းဆည်းနေပါသည်"

"ဂိမ်းဒေတာများကို သိမ်းဆည်းနေပါသည်"

"သိမ်းဆည်းခြင်း အောင်မြင်ပါသည်"

"အစစ်အမှန်လောကဂိမ်းကို ဖွင့်လိုက်ပါပြီ"

"စုဝေးခြင်းဂိမ်းကို ဖွင့်လိုက်ပါပြီ"

"တင်းတောင်~ ၂၀၁၈ ဇန်န၀ါရီ ၁ရက်နေ့မှာ အနက်ရောင်မျှော်စင် ဗားရှင်း ၂.၀ကို တရား၀င် မြှင့်တင်လိုက်ပါပြီ...ကစားသမားအားလုံးကို ဂိမ်းကနေကြိုဆိုပါတယ်နော်"

“ကစားသမားအားလုံး မျှော်စင်ကို တိုက်ခိုက်ကြပါနော်"

"တင်းတောင်~ပျော်ရွှင်ဖွယ်ဂိမ်းလေးဖြစ်ကြစေ"

ကြေညာသံမှာ ရှန်ဟိုင်းတခွင် ပဲ့တင်ထပ်သွားခဲ့သည်။ အနက်ရောင်မျှော်စင်မှ မီးရောင်များ ပျောက်ကွယ်သွားလျက် လေပြင်းတစ်ခုကသာ ဟွမ်ဖူမြစ်ပေါ် ဖြတ်တိုက်သွားခဲ့သည်။ ၅မိနစ်ကြာပြီးနောက် အနက်ရောင်အရိပ်များမှာမှာ အနက်ရောင်မျှော်စင်အနီးမှ ပြေးလာခဲ့လေသည်။ ထန်မော့၏ လက်၀ါးမှာ ဟိုတယ်၏ စကျင်ကျောက်သားပြတင်းပေါက်အနားသပ်ကို ဖိဆုပ်လိုက်မိလျှင် လက်၅ချောင်းရာက ထိုမာကျောသော ကျောက်သားဘောင်တွင် တမဟုတ်ချင်း ထင်သွားခဲ့သည်။

၄င်းနောက်တွင် ၃၀ထက်ပိုသောလူရိပ်များက အနက်ရောင်မျှော်စင်အနီးသို့ပြေးသွားပြီး ပြောင်းလဲမှုများကို စူးစမ်းရန် ကြိုးစားနေကြသည်။ သူသည်အနက်ရောင်မျှော်စင်အား အမူအယာမဲ့စွာ စိုက်ကြည့်နေခဲ့သည်။ ထို့နောက်အနက်ရောင်မျှော်စင်အနီးသို့သွားမည့်အစား သူ ဂျက်နှင့်လော့ဖုန်းချန်းတို့ထံပြန်သွားလိုက်သည်။

ဂျက်က တီးတိုးဆိုလာသည်။

"ပြန်လာပြီပဲ ၁၄မိနစ်တောင်ရှိနေပြီ"

ထန်မော့၏အမူအယာမှာ လွန်စွာပျက်ယွင်းနေခဲ့သည်။ သူသည် လော့ဖုန်းချန်းကိုလှည့်ကာ ကြည့်လိုက်သည်။

လော့ဖုန်းချန်း၏အမူအယာမှာလည်း သိပ်မကောင်းလှချေ။

"လွန်ခဲ့တဲ့လကလိုပဲ နှစ်သစ်ကူးသီချင်းနဲ့ ရောင်စုံအလင်းပဲ...အဝေးကနေလည်းမြင်ရတယ်...အနားကနေမြင်ရတာဘာရှိသေးလဲ"

ထန်မော့ပြန်ဖြေလိုက်သည်။

" အနက်ရောင်မျှော်စင်က ဗားရှင်းအသစ်လိုင်းပေါ်တက်လာပြီလို့ မကြေညာခင်က သူ့အလယ်မှာ အဖြူအလင်းစက်လေးကိုတွေ့လိုက်တယ်"

"အဖြူရောင်အလင်းစက်ဟုတ်လား"

"အင်း ကျွန်တော်သေချာရေထားတာ ၆၂ကြိမ်လောက်လင်းလာတယ် နောက်ပြီး ၂ကြိမ်လောက် လင်းပြီးတော့ ၁ကြိမ်လင်းလာတဲ့ပုံစံနဲ့လင်းတာ... ၆၂ကြိမ်လင်းပြီးတော့ သူ့အောက်မှာ နောက်အသေးလေးတစ်စက်ထပ်ပေါ်လာတယ်...အဲဒီအစက်က တဖြတ်ဖြတ်မလင်းဘူး တ၀က်လောက်ပဲလင်းလာတာ..ပြီးတော့ဗားရှင်းအသစ်အကြောင်းကြေညာတယ် အဲဒီနောက်ပိုင်းကတော့ ခင်များမြင်လိုက်သလိုပဲ"

ထိုစဥ် အဝေးမှ ခြေသံများကို ကြားလိုက်ရလေသည်။ ထန်မော့ချက်ချင်းတိတ်သွားပြီး ဂျက်သည်လည်း အသက်ရှူအောင့်လိုက်မိသည်။

ထိုခြေလှမ်းများ ကျော်လွန်သွားအောင် စောင့်ဆိုင်းပြီးနောက် ထန်မော့ကဆက်၍ပြောလာခဲ့သည်။

"ပုန်းဖို့နေရာအရင်ရှာရအောင်"

လူ၃ယောက်မှာ ကီလိုမီတာအနည်းငယ်ခန့်ပြေးသွားပြီးနောက် အနီးအနားမှ လူမရှိသော ဟိုတယ်တစ်ခုထဲသို့၀င်သွားခဲ့ကြသည်။

ထန်မော့လည်း သူမြင်ခဲ့သမျှကို ဂရုတစိုက်ရှင်းပြလိုက်သည်။

"အလင်းစက်လေးက အပြင်ကမဟုတ်ဘူး အနက်ရောင်မျှော်စင်ရဲ့ အလယ်ဗဟိုကနေလင်းနေတာ.. ပထမအလင်းစက်လေးက ၆၂ကြိမ်လင်းလာတယ်.. ဒီအကြိမ်ရေကအဓိပ္ပါယ်တစ်ခုခုတော့ရှိမယ်ထင်တယ်..ဒုတိယအစက်အတွက်ကတော့ အခုထိမပြောနိုင်သေးဘူး"

"အနက်ရောင်မျှော်စင်က ဗားရှင်းအသစ်အကြောင်းအခုထိတော့မကြေညာသေးဘူး..ကြည့်ရတာ အနာဂါတ်မှာ တဖြည်းဖြည်းသိရမယ်ထင်ပါတယ်"

လော့ဖုန်းချန်းကခေါင်းညိတ်လိုက်သည်။

"အဲဒီအလင်းစက်က တကယ်အရေးကြီးလောက်တယ် ဘာအဓိပ္ပါယ်လဲဆိုတာရှာမှရမယ်"

🪩

Prev Next