MM Story Teller

Chapter 76

Viewers 7k

🌍Chapter 76

ထန်မော့ ချက်ချင်းဆိုသလို ဤအမျိုးသားက သူ့တွင် ဘုရင့်ရွှေဒင်္ဂါးရှိနေသည်ကို သိကြောင်း ရိပ်မိလိုက်သည်။

ပီနိုကီယို၏ ရိုးသားမှုကတ်ဂိမ်းထဲသို့ ၀င်လာစဥ်ကတည်းက ထန်မော့မှာ သူ၏အင်အားကို ပေါ်မသွားစေရန် အတန်နိုင်ဆုံး သတိထားခဲ့သည်။ ဂိမ်းတစ်ခုထဲတွင် မည်သို့အသင်းဖော်နှင့် ရန်သူမျိုးနှင့် တွေ့ကြုံရမည်ကို မည်သူမျှ ကြိုမသိနိုင်ချေ။ သတိမူခြင်းမှာ အကောင်းဆုံးကာကွယ်မှုပင်။ ထို့ကြောင့် ပီနိုကီယိုထံမှ ရွှေဒင်္ဂါးအကြောင်းပြောသည်ကို ကြားရစဥ်က ကျောက်၀မ်ပင်းနှင့် တခြားသူများကဲ့သို့ စိတ်လှုပ်ရှားမိသယောင် ဟန်ဆောင်ခဲ့ခြင်းပင်။

ယခုအချိန်မှသာ လူကြီးမင်းဖူမှာ တစ်ခုခုကို ရှာတွေ့သွားခဲ့ခြင်းဖြစ်လိမ့်မည်။

သို့သော်အားလုံးမှာ သူ၏ခန့်မှန်းမှုသာဖြစ်သည်။ ထန်မော့တွင် အမှန်တကယ် ဘုရင့်ရွှေဒင်္ဂါးရှိမရှိ မည်သူကမျှ မသိချေ။

ထန်မော့ ပေါ့ပါးစွာပြန်ဖြေလိုက်သည်။

"ခင်များဘာပြောချင်နေတာလဲ ကျွန်တော်နားမလည်ဘူး"

ဖူ၀မ်သော်က ပြုံးလိုက်သည်။

"ကျွန်တော်မှန်း ဘယ်တုန်းက သိသွားတာလဲ"

ဖူ၀မ်သော်ကပြန်ဖြေလာခဲ့သည်။

"ပထမအချီမစခင်က"

ထန်မော့အနည်းငယ် တုန်လှုပ်သွားခဲ့သည်။

အဲလောက်မြန်မြန်ကြီးလား...

"ကိုယ့်မှာ လူတွေရဲ့အသံနဲ့ လေယူလေသိမ်းကို ခွဲခြားနိုင်တဲ့ လေ့ကျင့်မှုမျိုးရှိခဲ့ဖူးတယ်လေ"

ဖူ၀မ်သော်က လက်ဦးမှုရယူလျက် ရှင်းပြလာခဲ့သည်။

"မင်းကရော ဘယ်တုန်းက သိသွားတာလဲ"

"ပထမအချီပြီးတော့"

ပထမအချီအပြီးတွင် ထန်မော့မှာ တဖက်အမျိုးသား၏ သရုပ်မှန်နှင့် သူ၏အသင်းသားများက အဘယ်ကြောင့် ဘုရင်ကတ်ကိုရွေးရန်သဘောတူခဲ့ကြသည်ကို စဥ်းစားနေခဲ့သည်။ ထိုသူကခိုး၀င်သူတစ်ဦးဖြစ်ရမည်။ အလွန်စားအားကြီးသော ခိုး၀င်သူမျိုးပင်။ အင်အားမမျှလွန်း၍ အနက်ရောင်မျှော်စင်မှပင် ဘုရင်မအသင်းအား မမျှတသော အသာစီးအခွင့်အရေးတစ်မျိုးကို ပေးခဲ့သည်။

ဘုရင်မအသင်းသာလျှင် မေးခွန်းမေးခွင့်ရှိသည်။ ဤသည်မှာ သိသိသာသာကိုပင် ဂိမ်း၏မညီမျှခြင်းကို ဖော်ပြနေပေသည်။

ဘုရင်မအသင်းကသာ ဘာလို့ မေးခွန်းမေးခွင့်ရှိတာလဲ ဘုရင်ကလည်း ၄င်းကို အမှန်အတိုင်းဖြေရန်လိုအပ်ပြီး လိမ်လည်ရင် ရှုံးနိမ့်တာလဲ...

ဘုရင်မကတ်ရမဲ့ဘက်ခြမ်းကိုရော ဘယ်လိုဆုံးဖြတ်ထားတာလဲ....

ထန်မော့အတွေးအရ ဤသည်မှာ ကံကောင်းမှူချည်း သက်သက်ဖြစ်သလို တဖက်အသင်းမှာ ဘုရင်မကတ်ကို မရနိုင်သည့် အကြောင်းပြချက်တစ်ခုခုရှိရမည်ဟုပင်။

သူ ပီနိုကီယိုအား လှည့်ကြည့်လိုက်သည်။

"မြေအောက်လူသားတွေက ရိုးသားမှုကတ်ဂိမ်းကို ဆော့ကြတဲ့အခါ သူတို့မှာရော ဘုရင်မကတ်ရဲ့ အခွင့်အရေးကိုရတာလား"

ပီနိုကီယိုက ပြုံးလျက်ပြန်ဖြေလာခဲ့သည်။

"ဘယ်ဟုတ်မလဲ...ငါတို့မြေအောက်လူသားတွေက ဂိမ်းဆို မျှတမှကြိုက်တာ...ဘုရင်မကတ်က တစ်ဖက်အသင်းက ရန်သူကဘယ်လိုမှ ဖယ်ထုတ်မရနိုင်အောင် အားကြီးလွန်းတော့မှ ပေါ်လာတာ"

ပီနိုကီယိုက အံ့အားသင့်ယောင်ဆောင်လျက် ဆိုသည်။

"အဲ ငါမင်းတို့ကိုပြောဖို့မေ့နေတာလား...ငါလည်းအိုပြီဆိုတော့ မှတ်ဥာဏ်တွေသိပ်မကောင်းတော့ဘူး.. မင်းတို့ကတော့ ဒီစည်းမျည်းတွေကို မေ့လို့မရဘူးနော်"

ထန်မော့ ပီနိုကီယို၏ပေါက်ကရများကို ထွေထွေထူးထူးမတုန့်ပြန်ခဲ့ချေ။ ကျောက်၀မ်ပင်းမှာလည်း အချိန်အကြာကြီးယူလိုက်ရသည့်တိုင် အဆုံးတွင်နားလည်သွားလျက် ပီနိုကီယိုအား ဒေါသတကြီး စိုက်ကြည့်လိုက်သည်။

ပီနိုကီယိုမှာ အရေထူလှပြီး ကျောက်၀မ်ပင်း၏ ဒေါသထွက်နေသောအမူအယာကိုမြင်လျှင် ပို၍ပင် ကျေနပ်နေသောအမူအယာမျိုး ပြုလုပ်လာခဲ့လေသည်။

ဖူ၀မ်သော်ကဆိုလိုက်သည်။

"ကိုယ့်ရဲ့ သရုပ်မှန်ကိုခန့်မှန်းမိတဲ့ နောက်ဆုံးအကြောင်းအရင်းက ဘုရင်မကတ်ရဲ့ အထူးအခွင့်အရေးကြောင့်ပေါ့"

ထန်မော့သူ့အားကြည့်လိုက်သည်။

"အင်း ခင်များအသံက နည်းနည်းကွဲနေတော့ ဘယ်သူမှန်းမသေချာခဲ့ဘူး.. ဒါပေမယ့်ဒီအထူးအခွင့်အရေးက အဓိပ္ပါယ်လည်းမရှိပဲ ထူးဆန်းနေတယ်.. ဘုရင်မအသင်းသားတွေကပဲ ဒီအခွင့်အရေးကို ရတာ။ ဒါကြောင့် ဖြစ်နိုင်ချေကတစ်ခုပဲရှိတယ်၊ တဖက်အသင်းကတစ်ယောက်ယောက်က ဂိမ်းရဲ့မျှချေကို ဖျက်ဆီးပစ်နိုင်တဲ့အထိ သန်မာလွန်းနေလို့ပဲ"

မည်ကဲ့သို့ဖြစ်တည်မှုမျိုးက ဂိမ်း၏မျှချေကိုပင် ဖျက်ဆီးနိုင်မည်လဲ။

ပီနိုကီယို၏ရိုးသားမှုကတ်ဂိမ်းမှာ အပိုင်း၂ခုအဖြစ် ပိုင်းခြားထားသည်။ တစ်ခုမှာ အချီတစ်ခုစီ၏ အနိုင်ရရှိမှုနှင့် နောက်တစ်ခုမှာ ဂိမ်းတစ်ခုလုံး၏ အနိုင်ရရှိမှူပင်။ အသင်းအား မရှုံးနိမ့်စေပဲ ဘုရင့်ရွှေဒင်္ဂါးကို ရရှိစေရန်မှာ တဖက်အသင်းကို အနိုင်ယူလျက် ဂိမ်းတစ်ခုလုံးကို အနိုင်ရရှိရန်လိုအပ်လေသည်။ သို့သော် မတူညီသောကတ်နှစ်ကို ရွေးမိခြင်းက စီးချင်းထိုးသက်ရောက်မှူကို အသက်သွင်းပေးသည်။

ဤစီးချင်းထိုးသက်ရောက်မှုမှာပင် ဂိမ်း၏ မမျှတသော အချက်ပင်ဖြစ်လေသည်။

မိမိကတ်မှာ တစ်ဖက်ကတ်ကိုဖိနှိပ်နိုင်လျှင်တောင် စီးချင်းထိုးရာတွင် ရှုံးနိမ့်ပါက မိမိသာထုတ်ပယ်ခံရမည်ဖြစ်သည်။ ပို၍မမျှတသည်မှာ ထန်မော့အသင်းမှာ တစ်ဖက်အသင်းကို အကြိမ်တိုင်း ဖိနှိပ်နိုင်ခြင်းပင်။ သို့သော် စီးချင်းထိုးရာတွင်မူ သူတို့မှာ ကြောက်စရာအကောင်းဆုံး ရန်သူများကို ရင်ဆိုင်ရလေသည်။ တစ်ဖက်အသင်းမှာ မိမိတို့ကစားသမားများကို တစ်ယောက်ပြီးတစ်ယောက် ဖယ်ထုတ်နေခဲ့သည်။ နောက်ဆုံးအချီပြီးနောက် တဖက်အသင်းကို နိုင်ခဲ့လျှင်တောင် ထန်မော့အသင်းတွင် လူတစ်ယောက်သာ ကျန်ရစ်မည်ဖြစ်လေသည်။

၄င်းမှာ မမျှတချေ။

ထန်မော့လည်း တဖက်အသင်းမှ အနိုင်ယူရန်မလွယ်ကူသော ရန်သူ၏ သရုပ်မှန်နှင့် ဖူ၀မ်သော်၏ ဇစ်မြစ်ကို တွဲ၍တွေးမိလေသည်။

အနက်ရောင်မျှော်စင်မှာ ထန်မော့ပင်လျှင် တဖက်လူကို အနိုင်ယူနိုင်လိမ့်မည်ဟု မထင်ခဲ့ချေ။ ဤလူအား အနက်ရောင်မျှော်စင်မှ သတိထားမိခဲ့ပြီး မျှော်စင်တိုက်ခိုက်ရန် အတင်းအကြပ်တွန်းအားပေးခဲ့သည်။

သူ တရုတ်ပြည်မှ မျှော်စင်ကို ရှင်းလင်းနိုင်ခဲ့သော ကစားသမားများကို သိပ်မသိချေ။ သို့သော် တိုက်အဖွဲ့မှာ ရှန်ဟိုင်းတွင် အတော် သတင်းစုံလင်လှသည်။ သို့တိုင်အောင် လော့ဖုန်းချန်းသည် မျှော်စင်ပထမထပ်ကို ရှင်းလင်းနိုင်ခဲ့သော ကစားသမားအားလုံးကို မသိခဲ့ချေ။ ရှန်ဟိုင်းကိုနမူနာယူလျှင် တရုတ်ပြည်တွင် မျှော်စင်ပထမထပ်ကို ရှင်းနိုင်ခဲ့သော ကစားသမား အများအပြားမရှိချေ။ ထို့အပြင် ထိုလူမှာ ဖူ၀မ်သော်ထက် သန်မာသူဖြစ်ရန်လည်းလိုသေးသည်။

"အဲဒီလောက်ထိ သန်မာတဲ့ ခိုး၀င်သူက ခင်များတစ်ယောက်ပဲ ဖြစ်နိုင်တယ်"

ဖူ၀မ်သော်ကပြုံးလိုက်သည်။

"မင်းနဲ့ဒီလိုအခြေအနေမျိုးမှာ ဆုံရမယ် ထင်မထားဘူး"

"ကျွန်တော်လည်း မမျှော်လင့်ထားပါဘူး"

ထန်မော့ပေါ့ပါးစွာဆိုလိုက်သည်။

"လူကြီးမင်းဖူ ကျွန်တော်တို့ လောင်းရအောင်"

ဖူ၀မ်သော်၏ မျက်လုံးတို့ တောက်ပသွားလျက်

"ဘယ်လိုမျိုးလဲ"

ပီနိုကီယိုမှာ ၄င်းကိုကြားသည်နှင့် စိတ်၀င်စားမှုတို့ ပြည့်နှက်လျက် အနားသို့ရောက်လာခဲ့သည်။

ထန်မော့သူ့အား ကြည့်လိုက်သည်။

"ကျွန်တော်တို့ပြောနေတာတွေက ကတ်တွေနဲ့ဆိုင်နေမှာ ခင်များမကြောက်ဘူးလား"

ပီနိုကီယိုမှာ လက်ကိုနောက်ပစ်လျက် ထန်မော့အား အရူးတစ်ယောက်နှယ်ကြည့်လာခဲ့သည်။

"ကတ်တွေတိုက်ကြတဲ့အခါ ကတ်နှစ်ကတ်လုံးက ကျောဘက်ကိုပဲ ပြထားတာလေ... မင်းတို့ကလွဲရင်ဘယ်သူကသိမှာလဲ ဘယ်ကတ်ကိုပြောနေတာလဲ... ငါမင်းကို မယုံဘူးနော်...မင်းကလိမ်ချင်လည်း လိမ်နေမှာပဲ ငါကအဲဒါကို ၉၀ရာခိုင်နှုန်းလောက်သိနေရင်တောင် ငါ၀န်မခံရင် ဘယ်သူက ငါသိတယ်လို့ပြောရဲမှာလဲ"

"သိပြီ"

ပီနိုကီယို လက်ကို စိတ်မရှည်စွာ ဝေ့ယမ်းလိုက်သည်။

"မင်းတို့ဘာကိုလောင်းကြမှာလဲ...ငါ ရိုးသားမှူကတ်ဂိမ်းမှာလောင်းကြတာ ဒါပထမဆုံးမြင်ဖူးတာပဲ"

ထန်မော့ ပီနိုကီယိုအားကြည့်မနေတော့ပဲ ဖူ၀မ်သော်ကိုသာ မျက်နှာချင်းဆိုင်လိုက်သည်။

"ဒီလောင်းကြေးက ကတ်တွေနဲ့မဆိုင်ဘူး...ပီနိုကီယိုကြားလည်းကိစ္စတော့မရှိဘူး...လူကြီးမင်းဖူ အခုချိန်ထိဆို ကျွန်တော်တို့ ၂ကတ်ကစားပြီးပြီ... ကျွန်တော်တို့ ဘယ်ကတ်ကိုပဲ ရွေးရွေး ရလဒ်ကဘယ်လိုပဲဖြစ်ဖြစ် တူနေတဲ့အချက်က ခင်များနဲ့ကျွန်တော်က အမြဲမျက်နှာချင်းဆိုင် အကွက်တွေမှာ ရပ်နေခဲ့တာပဲ"

ဖူ၀မ်သော်က မေးလာခဲ့သည်။

"ဒီတော့ "

"ကမ္ဘာပေါ်မှာ တိုက်ဆိုင်တာတွေအများကြီးပဲ...ခင်များကအသာစီးရနေပေမယ့် ရလဒ်ကိုပြောလို့မရသေးပါဘူး...အလွန်ဆုံးမှ ခင်များနိုင်နိုင်ချေက ကျွန်တော့်ထက် နည်းနည်းလေး ပိုများနေရုံပဲ... ဒီဂိမ်းက ခွန်အားအပေါ်ပဲမူတည်နေတာမဟုတ်ဘူး.. ကံကောင်းမှုနဲ့ ရွေးချယ်မှုကလည်း ဂိမ်းရဲ့အဓိကအချက်ပဲ... ကျွန်တော်တို့အသင်း၂သင်းရဲ့ နိုင်နိုင်ချေက ၅အချိုး၅တော့မဟုတ်ဘူး...အဆုံးမှာ ဘယ်သူနိုင်မယ်ဆိုတာ ပြောရခက်နေတုန်းပဲ"

ဖူ၀မ်သော်က စိတ်မ၀င်စားပုံဖြင့်ဆိုသည်။

"မင်းပြောတာမှန်ပါတယ် ဒါပေမယ့် ကံကောင်းခြင်းကလည်း ခွန်အားတစ်မျိုးပဲ"

ထန်မော့တည်ငြိမ်စွာ ဆိုလိုက်သည်။

"ကျွန်တော်ကတော့ ကံကောင်းမှုအပေါ် လောင်းကြေးမထပ်ချင်ဘူး... တစ်သင်းဖယ်ထုတ်ခံလိုက်ရတာထက် နှစ်သင်းလုံးဘေးကင်းသွားတာက အကောင်းဆုံးရွေးချယ်မှုဖြစ်နေတုန်းပဲ"

ဖူ၀မ်သော်က တိတ်ဆိတ်နေခဲ့သည်။

ပီနိုကီယိုက အရင်ဆုံး၀င်ပြောလာခဲ့သည်။

"အတူတူအနိုင်ယူကြမယ်ပေါ့ ဟား ဟား ဟား... ဘယ်ဆိုးလို့လဲ..မင်းတို့ကတကယ် သူငယ်ချင်းကောင်းတွေပဲ... သူငယ်ချင်းကောင်းနှစ်ယောက်က လက်ချင်းတွဲပြီး ရိုးသားမှုကတ်ဂိမ်းကို အတူဆော့နေကြတာဆိုတော့ လိမ်လို့မရဘူးနော်"

ထန်မော့မှာ ဖူ၀မ်သော်ကိုသာ စိုက်ကြည့်နေခဲ့သည်။

"ဒီတော့ကျွန်တော်ခင်များနဲ့ လောင်းမယ်"

ပီနိုကီယိုကမေးလိုက်သည်။

"ဟေး ဒီထူးဆန်းတဲ့အလောင်းအစားဘာလဲ"

"ကတ်တွေနဲ့မဆိုင်ဘူး"

ဖူ၀မ်သော်ကရယ်လိုက်သည်။

"အကယ်၍ ကိုယ်နိုင်ခဲ့ရင် ဒီဂိမ်းရဲ့အဆုံးသတ်က ကိုယ်နဲ့မော့မော့(ကြက်ဆင်ဥ)နဲ့ကြားက ပတ်သက်မှုကို ထိခိုက်မှုမရှိစေဘူးလို့ မင်းကတိပေးရမယ်...မင်းနိုင်ခဲ့ရင်ရော"

ထန်မော့ကပြန်ဖြေလာခဲ့သည်။

"ကျွန်တော်နိုင်ခဲ့ရင် ဒီဂိမ်းက အေးအေးချမ်းချမ်း အဆုံးသတ်သွားပြီးတော့ ဘယ်သူမှ အန္တရာယ်မရှိရဘူး"

ပီနိုကီယို နှာခေါင်းကိုထိလျက် သူ၏အကြည့်မှာတော့ ထန်မော့နှင့် ဖူ၀မ်သော်အကြား ပြေးလွှားနေခဲ့သည်။ ဖူ၀မ်သော်က ထန်မော့အား ဤလောင်းကြေးကို မသေချာသည့်နှယ် ကြည့်နေခဲ့သည်။

ထန်မော့ရုတ်ချည်းခေါင်းကိုလှည့်လျက် ပီနိုကီယိုအားကြည့်လိုက်သည်။

"ကျွန်တော်က ရိုးသားတဲ့လူပါ ပီနိုကီယို ဒီတစ်ကြိမ်လောင်းကြေးက ကတ်တွေနဲ့လုံး၀မဆိုင်ပါဘူး"

ပီနိုကီယိုကား ဂရုစိုက်ပုံမပေါ်ချေ။

"ဆိုင်နေရင်တောင် မင်းလိမ်မလိမ်ကို ငါသိနိုင်တာမှ မဟုတ်တာ...ငါကြားလည်း ဘာမှမဖြစ်ဘူး"

ဖူ၀မ်သော်က ရုတ်ချည်းဆိုလိုက်သည်။

"ကောင်းပြီ လောင်းကြေးကို သဘောတူတယ်"

ပီနိုကီယို ပြုံးလျက် လက်ခုပ်တီးလိုက်သည်။

"သူငယ်ချင်းကောင်းလေး၂ယောက်က အလောင်းအစားလုပ်လိုက်ပြီ...ဒီဟာက ငါမြင်ဖူးသမျှထဲမှ စိတ်၀င်စားစရာအကောင်းဆုံး ကတ်ဂိမ်းပဲ... ငါကမြေအောက်ကမ္ဘာမှာ ရိုးသားမှုကတ်ဂိမ်း၁၀၀ကျော်ကို တွေ့ဖူးပေမယ့် အေးအေးချမ်းချမ်းအဆုံးသတ်သွားတာကိုတော့ တစ်ခါမှ မမြင်ဖူးဘူး"

ထန်မော့ကဆိုလိုက်သည်။

"ဒီနေ့မြင်ရင်မြင်ရမှာပေါ့"

ထို့နောက်သူက ကျောခိုင်းလျက် သူ၏အသင်းထံလျှောက်သွားလိုက်လေသည်။

ဖူ၀မ်သော်လည်း အတူတူပင်။

ပီနိုကီယို ပါးစပ်ကိုဟလျက် ဆိုးရွားသောအပြုံးကြီးဖြင့်

အားရဝမ်းသာ ပြောလိုက်သည်။

"သိပ်ကိုစောင့်မျှော်နေပါပြီကွာ"

သို့သော်သူ၏မျက်လုံးထဲမှ အရိပ်အယောင်များကတော့ တခြားတစ်ခုကိုပြောနေခဲ့သည်။

အဖြူရောင်နံရံကြီးကျဆင်းလာလျက် အသင်း၂သင်းကို ပိုင်းခြားလိုက်တော့သည်။

တဖြည်းဖြည်းနိမ့်ကျလာသော နံရံကြီးအောက် ထန်မော့မှာ ဖူ၀မ်သော်အားကြည့်နေခဲ့သလို ဖူ၀မ်သော်သည်လည်း ထန်မော့ကိုကြည့်နေခဲ့သည်။ လူနှစ်ဦးမှာ နံရံမှာသူတို့၏မြင်ကွင်းကို အပြည့်အ၀ပိုင်းခြားသွားသည်အထိ တစ်ဦးကိုတစ်ဦးကြည့်နေခဲ့ကြလေသည်။

ထန်မော့ အကွက်ဆီပြန်သွားလျက် ဖြောင့်တန်းစွာရပ်နေလိုက်သည်။

ထန်မော့နှင့် ဖူ၀မ်သော်စကားပြောနေခဲ့စဥ်က ကျောက်၀မ်ပင်းမှာ ၀င်ပြောရန်အခွင့်အရေးတစ်ခါမှမရလိုက်ချေ။ သူသည် ထန်မော့နှင့် ဖူ၀မ်သော်လို့ လောင်းကြေးကိုပြုလုပ်ခဲ့ပြီး ထန်မော့ တိတ်တဆိတ် အကွက်တွင်ပြန်ရပ်လိုက်သည်ကိုသာ ကြည့်နေခဲ့ရသည်။ မည်သူမျှ ကန့်ကွက်နိုင်စွမ်းမရှိခဲ့။

ကျောက်၀မ်ပင်း စိတ်ပူပန်လွန်း၍ မျက်နှာများပင် နီရဲနေခဲ့သည်။ သူကအတော်ကြာတွန့်ဆုတ်နေပြီးမှ

"မင်း အဲဒီအကွက်မှာ ရပ်နေတာ...တ..တကယ်နိုင်နိုင်မှာလား"

ထန်မော့သူ့အား ကြည့်လိုက်သည်။

"မင်း စစ်သည်တော်ကွက်မှာ ရပ်ရမယ်"

ကျောက်၀မ်ပင်း ချက်ချင်းနားလည်သွားခဲ့သည်။

"မင်းက ဒီလောင်းကြေးအတွက် စိတ်ရင်းကိုပြဖို့ စစ်သည်တော်ကတ်ကို တမင်ရွေးတာမလား.. မဟုတ်ဘူး... ငါတို့ စစ်သည်တော်ကတ်ကို ဆုံးရှုံးသွားရင် ဘယ်လိုလုပ်မလဲ.. သူတို့လောင်းကြေးရော ကတိကိုပါဖျက်လိုက်ရင် ငါတို့ဘာတတ်နိုင်မှာလဲ..သူကတိတည်ရင်တောင် လောင်းကြေးကိုနိုင်မယ်လို့ မင်းဘယ်လိုသေချာမှာလဲ"

ထန်မော့နှင့် ဖူ၀မ်သော် တူညီသောအကွက်တွင် အတူတကွရပ်မိနိုင်နှုန်းမှာ လေးပုံတစ်ပုံသာ။

ကျောက်၀မ်ပင်း မတည်ငြိမ်နိုင်တော့။ သို့သော် ထန်မော့မှာ အစမှအဆုံး အကွက်တစ်ခုတွင်သာရပ်နေပြီး မလှုပ်ရှားခဲ့ချေ။

ပြီးခဲ့သော နှစ်ချီတွင် ပီနိုကီယိုမှာ နံရံပေါ်တွင်လဲလျောင်းလျက် သီချင်းညည်းနေခဲ့သည်။ သို့သော် ဤတစ်ကြိမ်တွင်မူ သူက ထန်မော့ဘက်သို့ကြည့်လိုက် ဖူ၀မ်သော်ဘက်သို့ ကြည့်လိုက်နှင့် အလုပ်များနေခဲ့သည်။

ထန်မော့နှင့် ဖူ၀မ်သော်က တစ်ဦးကိုတစ်ဦးမမြင်နိုင်သော်လည်း ပီနိုကီယိုကတော့ မြင်နိုင်လေသည်။

ပီနိုကီယိုသည် ထန်မော့က သူ့အားမော့ကြည့်နေသည်ကို မြင်လျှင် သူ့ခေါင်းမှ ငှက်မွှေးနီလေးလှုပ်ရှားသွားသည်အထိ မေးကိုမော့လျက်

"ငါ့ကိုကြည့်မနေနဲ့ ရိုးသားတဲ့ပီနိုကီယိုက သူ့ရဲ့ သူငယ်ချင်းတွေကို ဘယ်တော့မှ သစ္စာမဖောက်ဘူး"

"ပြူး..."

"ဟုတ်ပါပြီ မရိုးသားတဲ့ပီနိုကီယိုက အဲဒီလူဘယ်မှာ ရပ်နေလဲဆိုတာ မင်းကို ပြောပြမှာ မဟုတ်ဘူး.ဒါပေမယ့် မင်းမှန်းကြည့်လို့ ရသားပဲ"

ပီနိုကီယိုက စူးရှစွာ ရယ်မောလိုက်ကာ ထန်မော့အား ကောင်းသောရည်ရွယ်ချက်မျိုးမပါရှိသည့် အကြည့်မျိုးနှင့် ကြည့်ရင်း သူ၏နှာခေါင်းကို ထိလိုက်သည်။

"လိမ်လိုက်ရင် ပင်နိုကီယိုရဲ့နှာခေါင်းလေးကရှည်ထွက်လာမယ်... အဲဒီလူဘယ်မှာရပ်နေလဲဆိုတာ မင်းငါ့ကိုမေးကြည့်လို့ ရရင်လည်း ရမှာပေါ့"

ထန်မော့သူ့အား လျစ်လျူရှုလိုက်သည်။ သို့သော် ကျောက်၀မ်ပင်းကမူ ခတ္တမျှ တိတ်ဆိတ်နေပြီးနောက် မေးလာခဲ့လေသည်။

"ပီနိုကီယို အဲဒီလူ ရွေးထားတဲ့ အကွက်နဲ့တူလား"

“အင်း"

ပီနိုကီယို၏ နှာခေါင်းမှာ ရှည်ထွက်မလာခဲ့ချေ။

ကျောက်၀မ်ပင်းကမေးလိုက်သည်။

"ဒီလောင်းကြေးက အဓိပ္ပါယ်မရှိဘူးလို့ထင်လား"

🪩

Prev Next