MM Story Teller

Chapter 63

Viewers 7k

🌍Chapter 63

ထန်မော့ အလယ်တန်းကျောင်းမှ မထွက်ခွာခင်တွင် အတန်း၅သို့ပြန်သွားလျက် ချန်ရှန်းရှန်းအတွက် သူထားခဲ့သော စာမှာ စတိတ်စင်အောက်တွင် ရှိသေးသည်လား သေချာစေရန် စစ်ဆေးလိုက်သည်။

စာ သေချာပေါက် ပျောက်ကွယ်သွားခဲ့လေပြီ။ ထိုလူက သူ့နောက်မှ အမြန်လိုက်လာခဲ့ပြီးစာကို ယူသွားခဲ့ခြင်းဖြစ်လိမ့်မည်။

စာမှာ မီးရှို့ခံလိုက်ရပုံပေါ်သည်။ ထန်မော့လည်း စာတစ်စောင်ထပ်ရေးလျက် ထိုမှောင်မည်းသော စတိတ်စင်အောက်တွင် တဖန်ထိုးထည့်လိုက်ပြန်သည်။

ထို့နောက် ပူဒုန်ခရိုင်သစ်သို့အမြန်ဆုံးပြန်ရောက်လာပြီးနောက် လော့ဖုန်းချန်း၊ထန်ရှောင်းနှင့် ဂျက်တို့ စကားပြောနေကြသည်ကို တွေ့လိုက်ရသည်။ ထန်မော့ ထိုလူနှစ်ဦးကို ကြည့်လိုက်ပြီး လော့ဖုန်းချန်းထံလျှောက်သွားလိုက်သည်။

ထို့နောက် တည်ငြိမ်သောလေသံဖြင့်ပင် အမူအယာမဲ့စွာဆိုလိုက်သည်။

"ငါအခုပဲ 'အလျင်'ကိုသတ်လိုက်ပြီ"

ဂျက်နှင့် ထန်ရှောင်းမှာ ထိတ်လန့်သွားခဲ့သည်။

လော့ဖုန်းချန်း၏ မျက်နှာတွင် အံအားသင့်မှုတစ်ခု ဖြတ်ပြေးသွားလျက် သူကထန်မော့၏ပုခုံးကို အလျင်အမြန်ကြည့်ကာ မျက်မှောင်ကျုံ့လျက်မေးလိုက်သည်။

"မင်းဒဏ်ရာရလာတာလား"

ထန်မော့က ခေါင်းငြိမ့်လိုက်သည်။

"အင်း 'အလျင်'ရဲ့ ဓါးချက်မိသွားတာ"

"ထန်ရှောင်းနဲ့ အရေးပေါ်ခန်းကို လိုက်သွားလိုက်ပါ သူမင်းရဲ့ ဒဏ်ရာကို ချုပ်ပေးလိမ့်မယ် ငါဂျက်ကို ပြောစရာနည်းနည်းပြောပြီးရင် မင်းဆီလာခဲ့မယ်"

ထန်မော့ မငြင်းဆန်လိုက်ချေ။

ဓါးချက်မှာ အတော်လေးနက်ကာ ထန်မော့၏ ပုခုံးရိုးကိုပင် ဖြတ်လုနီးနီးပင်။ သူ၏အဖြူရောင်အားကစား၀တ်စုံမှာ အနီရောင်သွေးများ စိုရွှဲနေခဲ့ပြီးဖြစ်သည်။ သူ၏သန်မာလှသော ပြန်လည်ကုသနိုင်စွမ်းကြောင့် သွေးတိတ်သွားခဲ့သည်မှာ ကြာပြီဖြစ်သော်လည်း ဒဏ်ရာမှာ ပွင့်နေဆဲပင်။ အကယ်၍၄င်းကို မချုပ်ပဲ ဤအတိုင်း ပစ်ထားမည်ဆိုပါက ပြန်ကောင်းရန် လ၀က်ခန့်အချိန်ယူရလိမ့်မည်။

ထန်မော့ အရေးပေါ်ခန်းမှ ကုတင်ပေါ်တွင်ထိုင်လျက် သူ၏အင်္ကျီကို တ၀က်ချွတ်လိုက်သည်။

အမျိုးသမီးငယ်က အပ်ကို အရက်ပျံဖြင့် ပိုးသတ်လျက် ဒဏ်ရာတ၀ိုက်ကိုလည်း အရက်ပျံဖြင့် သန့်ရှင်းလိုက်ကာ စတင်ချုပ်လိုက်သည်။

ဒဏ်ရာပေါ်မှ စူးရှသောခံစားမှုတစ်ခုကို ခံစားနေရလေသည်။ ထန်မော့ မျက်မှောင်အသာကျုံ့လျက် နှုတ်ခမ်းတို့ကို တင်းတင်းစေ့လိုက်မိသည်။

"ကျွန်မအတတ်နိုင်ဆုံး ညင်ညင်သာသာချုပ်ပါ့မယ်"

ထန်ရှောင်းကဆိုလိုက်သည်။

"ရှင့်ရဲ့ ပြန်လည်ကုသနိုင်စွမ်းကအတော်လေးကောင်းတာပဲ တိုက်အဖွဲ့အစည်းမှာ ရှင့်ထက်ပိုသာနိုင်တဲ့သူ ၅ယောက်ထက်ပိုမရှိနိုင်ဘူး"

ထန်မော့၏စွမ်းရည်မှာ ခွန်အားနှင့်မဆိုင်ချေ။ ဤမျှ သန်မာလာရန်ပင် အလွန်ရှားလှသည်။ သူကအမ်းဟု အသံတိုးတိုးသာပြုကာ ထန်ရှောင်းကို ဘာမှပြန်မပြောလိုက်ချေ။

၅မိနစ်ခန့်ချုပ်ပြီးနောက် ထန်ရှောင်းကဆိုလိုက်သည်။

"ရှင်က တရား၀င်ကစားသမားတစ်ယောက်ပဲ မတော်တဆသာမရှိဘူးဆိုရင် ရှင့်ရဲ့ဒဏ်ရာက ၃ရက်အတွင်း ပြန်ကောင်းသွားလိမ့်မယ်"

ထန်မော့လည်း အ၀တ်အစားလဲပြီးနောက် လော့ဖုန်းချန်းအား သွားရှာရန်ပြင်လိုက်သည်။ ထန်မော့ အရေးပေါ်အခန်းထဲမှ ထွက်မသွားနိုင်ခင်မှာပင် အေးစက်သောအသံတစ်ခုက နောက်မှ ဆိုလာခဲ့သည်။

"ကျေးဇူးတင်ပါတယ်"

ထန်မော့၏ခြေလှမ်းများက ရပ်တန့်သွားလျက် နောက်သို့ပြန်လှည့်ကြည့်လိုက်သည်။

တောက်ပသောအလင်းရောင်အောက်တွင် ထန်ရှောင်းမှာ ခွဲစိတ်ကုတင်ကို ခေါင်းငုံ့လျက် အလုပ်ရှုပ်နေဟန်ပင်။ သူမ၏လှပသောမျက်နှာတွင် မည်သည့်အမူအယာမျှမရှိပဲ ပစ္စည်းများကို သိမ်းဆည်းနေခဲ့သည်။

"လွန်ခဲ့တဲ့ တစ်ပါတ်က နျဲ့ဖေးနဲ့ ကျွန်မ အဲဒီခိုး၀င်သူတွေဆီကချောင်းတိုက်ခံလိုက်ရတာ သူတို့ထဲကတစ်ယောက်က 'အလျင်'ပဲ ဒီတော့ ကျေးဇူးတင်ပါတယ်"

(သူလွတ်နိုင်ခဲ့တယ် ဒါပေမယ့် ထန်ရှောင်းကို အရင် ထွက်ပြေးခိုင်းခဲ့တာ)

ထန်မော့ လော့ဖုန်းချန်း၏ စကားကို ပြန်အမှတ်ရမိလိုက်သည်။ ထို့နောက် သူကဆိုလိုက်သည်။

"မလိုပါဘူး သူ့ကိုသတ်ခဲ့တာ နျဲ့ဖေးအတွက်ကြောင့်ပဲ မဟုတ်ဘူး"

သူ ပြောပြီးသည်နှင့် ထန်ရှောင်းက အပ်များကို အသာအယာသိမ်းဆည်းနေလေသည်။

ထန်မော့ ထိုအခန်းထဲမှထွက်လာခဲ့တော့သည်။

သူတတိယထပ်သို့လျှောက်လာခဲ့လိုက်သည်။ ဂျက်ကထိုနေရာတွင် မရှိတော့ချေ။ လော့ဖုန်းချန်းတစ်ယောက်တည်းသာ သူ့အားစောင့်နေခဲ့သည်။ သူကထန်မော့အား ဆေးတစ်တောင့်နှင့် ရေတစ်ခွက်ကိုကမ်းပေးလာခဲ့သည်။ ထန်မော့သူ့အားထူးဆန်းစွာ ကြည့်လာလျှင် သူကရယ်လိုက်ပြီး

"ဒါက ရိုးရိုးယောင်ယမ်းတာသက်သာတဲ့ဆေးလေးပါပဲကွာ ဘာပဲပြောပြော လောလောဆယ် ဒါတွေပဲရှိတော့တာလေ မင်းဒဏ်ရာပိုး၀င်ကုန်ရင် ဘယ်လိုလုပ်မလဲ"

ထန်မော့ကဆိုလိုက်သည်။

"ကျွန်တော့်ရဲ့ လက်ရှိကိုယ်ခံအားနဲ့ဆို ဒဏ်ရာချုပ်ပြီးမှတော့ စိတ်ပူစရာမရှိလောက်တော့ပါဘူး"

"ကြိုတင်ကာကွယ်ခြင်းက ကုသခြင်းထက်ပိုကောင်းသည်တဲ့"

ထန်မော့ဆေးကို ဘေးဖယ်လိုက်သည်။ လော့ဖုန်းချန်းအတင်းမတိုက်တွန်းပဲ 'အလျင်'၏သေဆုံးမှုအကြောင်းကို ဆက်ပြောလိုက်ကြသည်။

ထန်မော့သည် သူ၏စွမ်းရည် ၃မျိုးနှင့် ဂိမ်းကူပစ္စည်းနှနှစ်မျိုးအကြောင်းကို ဖယ်၍ ဖြစ်ပျက်ခဲ့သည်တို့ကို ရိုးရိုးရှင်းရှင်းသာ ပြောပြလိုက်သည်။ လော့ဖုန်းချန်းသည် ၄င်းကိုနားထောင်ပြီးနောက် ခတ္တမျှတွေးတောနေပြီးနောက် ရေရွတ်လာခဲ့သည်။

"အံသြစရာမရှိဘူး သူတို့တကယ်ပဲ မောလ်ကိုစောင့်ကြည့်နေခဲ့တာပဲ ဒါပေမယ့် မင်းနောက်ကို ဘာလို့လိုက်ရတာလဲ... မောလ်ထဲကနေ နေ့တိုင်းအ၀င်အထွက်လုပ်နေတဲ့သူ အယောက်၃၀မကရှိတာပဲ...

ဒါပေမယ့် မင်းနောက်ကို ရွေးလိုက်ခဲ့တယ် မင်းကငါတို့အဖွဲ့အစည်းနဲ့ တစ်ခုခုပါတ်သတ်နေတယ်လို့ ရှာတွေ့သွားလို့လား"

လော့ဖုန်းချန်း၏ အမူအယာမှ တည်တံ့နေခဲ့သည်။

အကယ်၍ အလျင်ကသာ ထန်မော့နှင့် တိုက်အဖွဲ့အစည်းကြားမှ ပါတ်သတ်မှုကို သိနေခဲ့သည်ဆိုလျှင် တိုက်အဖွဲ့အစည်းထဲတွင် ထိုခိုး၀င်သူများ၏သတင်းပေးရှိနေသည်ဟု ဆိုလိုခြင်းပင်။ ပထမဆုံးဖြစ်နိုင်ချေမှာ ထိုခိုး၀င်သူများမှာ မောလ်ထဲသို့ ခိုး၀င်လာခဲ့ပြီး တိုက်အဖွဲ့အစည်းက သူတို့ကို မမိခဲ့ခြင်းပင်။ ထိုနည်းဖြင့် တိုက်အဖွဲ့၏ လှုပ်ရှားမှုများကို စောင့်ကြည့်နေခဲ့ခြင်းဖြစ်နိုင်လေသည်။ ဒုတိယဖြစ်နိုင်ချေမှာ အဖွဲ့အစည်းအတွင်း ထိုခိုး၀င်သူများနှင့် တိတ်တဆိတ်ဆက်သွယ်နေသော သစ္စာဖောက်ရှိခြင်းပင်။

ထိုဖြစ်နိုင်ချေနှစ်ခုလုံးမှာ အလွန် အန္တရာယ်ကြီးလှသည်။

ထန်မော့မှာ ဖြစ်ပျက်ခဲ့သည်တို့ကို အသေးစိတ်ပြန်တွေးလျက်

"မဟုတ်ဘူး... သူတို့က ကျွန်တော်နဲ့ အဖွဲ့အစည်းရဲ့ ပတ်သတ်မှုကို သိသွားတာမဟုတ်ဘူး... သူကျွန်တော့်နောက်ကို လိုက်လာတာ အခြားအကြောင်းကြောင့်ပဲ"

ထန်မော့ရုတ်တရက်မေးလိုက်သည်။

"ခင်များသူတို့ထဲက ဖြူဖတ်ဖြူလျော်နဲ့ ခပ်ငယ်ငယ်ကောင်လေးကိုသိလား"

လော့ဖုန်းချန်းကဆိုလိုက်သည်။

"ငါနာမည်တွေကိုတော့မသိဘူး... အလျင်တို့ လျှပ်စစ်လူသားတို့ ခါးပါတ်နက်တို့လို့ပဲပေးထားတာ"

ထန်မော့ပြောပြလိုက်သည်။

"အလျင်ပြောပုံအရဆိုရင် သူတို့ထဲမှာ ဖြူဖျော့ဖျော့နဲ့ အစားကြီးတဲ့ကောင်ဆိုပြီး သူကြည့်မရတဲ့ တစ်ယောက်ယောက်ရှိပုံပဲ... သူကအဲဒီလူကိုသတ်လို့မရလို့ သူ့ဒေါသတွေကိုဖွင့်ထုတ်ဖို့ ကျွန်တော့်နောက်ကိုလိုက်လာတာ"

"သြော် အဲလိုကိုး..."

လူနှစ်ဦးမှာ 'ထန်မော့နှင့် မျက်နှာဖြူကောင်လေး'ဟူသော ခေါင်းစဥ်အောက်တွင် အတော်လေး ဦးနှောက်စားနေခဲ့ကြသည်။ ထန်မော့ကဆက်ပြောလာခဲ့သည်။

"အလျင်ကအဲဒီလူကိုတကယ်မကြိုက်ဘူး... ဒါပေမယ့် သတ်လို့လည်းမရဘူးလို့ပြောတယ်...ကျွန်တော့်ခံစားမှုအရ အလျင်က တဖက်လူကသူ့ရဲ့အဖွဲ့သားဖြစ်နေရုံလောက်နဲ့တော့ သတ်ဖို့ တုန့်ဆိုင်းနေမယ့်သူမျိုး မဟုတ်ဘူး"

လော့ဖုန်းချန်းက ထိုအချက်ကို ထောက်ခံလာခဲ့သည်။

"ခိုး၀င်သူ၇ယောက်က သိပ်မစည်းလုံးဘူး...မဟုတ်ရင်သူတို့သန်မာလာတာနဲ့ လူခွဲပြီး လှုပ်ရှားနေကြမှာ မဟုတ်ဘူး... အလျင်အဲဒီကောင်လေးကို မသတ်နိုင်တာက သူ့ထက်ပိုသန်မာလို့ဖြစ်နိုင်တယ်...သူတို့က ယောကျာ်း၅ယောက်နဲ့ မိန်းမ၂ယောက်အုပ်စုပဲ... သူတို့ထဲက ဖြူဖျော့ဖျော့နဲ့ ကြည့်ကောင်းတဲ့သူဆိုရင် ၂ယောက်တော့ရှိတယ်"

ထန်မော့မေးလိုက်သည်။

"ဘယ်နှစ်ယောက်လဲ"

"ပထမတစ်ယောက်က ၂၅နှစ်လောက်ရှိတဲ့ ယောကျာ်းပဲ သူ့စွမ်းရည်က ဘာလဲမသိရဘူး...ရဲ့ယွမ်ကျယ်က သူ့ကိုလွန်ခဲ့တဲ့၄ရက်ကတွေ့ခဲ့တာ...သူကရုပ်မဆိုးတဲ့ပုံပဲတဲ့ မျက်မှန်နဲ့ ညင်ညင်သာသာပုံစံရှိတယ်"

ထန်မော့တွေးကြည့်လိုက်သည်။

"အသက်ကတော့ ကျွန်တော်နဲ့ရွယ်တူလောက်ပဲဖြစ်နိုင်တယ် နောက်တစ်ယောက်ကရော"

လော့ဖုန်းချန်းကဆိုလိုက်သည်။

"သူကတော့ မင်းသိတဲ့တစ်ယောက်ပဲ...ခါးပတ်နက်"

"သူလား" ထန်မော့မျက်မှောင်ကျုံ့လိုက်မိသည်။

"ခါးပတ်နက်က ၁၇ ၁၈လောက်ပဲရှိဦးမယ်...သူမျက်လုံးတွေကိုကာထားတော့ သေချာတော့ ပြောမရဘူး... ဒါပေမယ့်အဲဒီမျက်လုံးကာတွေကိုဖယ်လိုက်ရင် သူကဖြူဖျော့ဖျော့နဲ့ အတော်လေးကြည့်ကောင်းတဲ့အထဲတော့ပါတယ်... သူတို့ထဲက မျက်နှာဖြူလေး၂ယောက်နဲ့တူတာဆို အဲဒီ၂ယောက်ပဲ ရှိမှာ"

ထို၂ဦးထဲမှ အစားကြူးသောသူ...

ထန်မော့ကဆိုလိုက်သည်။

"အဲဒီနာမည်ကတော့ အရင်းမဟုတ်လောက်ဘူး... သူစွမ်းရည်မဟုတ်ရင် အကျင့်စရိုက်နဲ့ဆိုင်တဲ့ နာမည်ပြောင်ပဲဖြစ်မယ် အသက်အရွယ်နဲ့ ပုံပန်းအရ ခါးပတ်နက်ကတော့ သိပ်မဖြစ်နိုင်ဘူးထင်တယ်...နောက်တစ်ယောက်ဖြစ်လောက်မယ်"

လူနှစ်ဦးမှာ ထိုယူဆချက်ကို လက်ခံလိုက်ကြသည်။

ထို့နောက်လော့ဖုန်းချန်းမှာ ထန်မော့အား တိုက်အဖွဲ့အစည်း၏ နောက်ထပ်အစီအစဥ်ကို ပြောပြလိုက်သည်။

"ငါတို့ဘာမှသေချာမသိပဲနဲ့တော့ ခုခံနိုင်မှာမဟုတ်ဘူး ရန်သူတစ်ယောက်က ရှင်းသွားပြီဆိုတော့ ၆ယောက်ပဲ ကျန်တော့တယ်...လျှပ်စစ်လူသားရဲ့ လက်တစ်ဖက်က ဖက်တီးလေးကြောင့်မရှိတော့ဘူး... ဒီတော့ သူ့ရဲ့ တိုက်ခိုက်နိုင်စွမ်းလည်း နည်းနည်းတော့ ကျသွားမှာပဲ"

ထန်မော့မေးလိုက်သည်။

"ဒီအနီးအနားမှာ နည်းနည်းပါးပါး ပိုခက်တဲ့ Sအမျိုးအစားဂိမ်းတွေရှိလား"

"မင်းနောက်ပိုင်းပြင်ဆင်ဖို့အတွက် ခွန်အားပိုတိုးလာအောင် စိန်ခေါ်ကြည့်ချင်လို့လား"

ထန်မော့ခေါင်းငြိမ့်လိုက်သည်။

သူသည် လတ်တလော၌ တိုက်အဖွဲ့အစည်း၏ ရှေ့တန်းမှ လူတစ်ဦးဖြစ်နေချေပြီ။ ထက်မြက်သူအချင်းချင်း စကားများများစားစား ပြောနေစရာမလိုချေ။ ရှန်ဟိုင်းမှထွက်ခွာမည့်အစား ပူဒုန်သို့ပြန်လာပြီး တိုက်အဖွဲ့အစည်းကိုလာရှာစဥ်ကတည်းက သူ့၏ရည်ရွယ်ချက်မှာ ရှင်းလင်းနေခဲ့ပြီးဖြစ်သည်။

ထိုခိုး၀င်သူများကို ရှင်းပစ်နိုင်ရန် သူကြိုးစားမှာပင်။

ယခုလက်ရှိတွင် တိုက်အဖွဲ့အစည်းမှာ ရှန်ဟိုင်းတွင် အားအကြီးဆုံးအဖွဲ့အစည်းဖြစ်သည်။ ထိုခိုး၀င်သူ၇ယောက်၏ အဓိကပစ်မှတ်မှာလည်း တိုက်အဖွဲ့အစည်းဖြစ်ကာ ၄င်းတို့ကို ထိပ်တိုက်ပြန်လည်ရင်ဆိုင်ခြင်းမှာ အကောင်းဆုံးခုခံခြင်းနည်းလမ်းပင်။

လော့ဖုန်းချန်းကဆိုလိုက်သည်။

"ရဲယွမ်ကျယ်နဲ့ ဂျက်က S1ဂိမ်းတစ်ခုကို ရှင်းလိုက်ကြပြီ ကျန်တဲ့အခက်ဆုံးကတော့ S2ပဲ မနက်ဖြန်ကျရင် ငါဂျက်ကို လိုက်ပို့ခိုင်းလိုက်မယ်...ဘယ်သူပဲ ဂိမ်းကိုရှင်းနိုင်ရှင်းနိုင် ငါတို့အတွက် အမြတ်ချည်းပါပဲ"

ထန်မော့လည်း လော့ဖုန်းချန်း ရုံးခန်းမှ ထွက်ခွာလာခဲ့သည်။ မြေအောက်ကားပါကင်၏ ဒုတိယထပ်တွင် ဗန်ကားတစ်စီးကိုတွေ့၍ ခတ္တ၀င်လှဲကာ အနားယူလိုက်လေသည်။

အမှောင်ထုထဲတွင် သူ၏ဓါတ်မီးဖြင် စွမ်းရည်စာအုပ်၏ နောက်ဆုံးစာမျက်နှာကို လှန်ကြည့်လိုက်သည်။

[စွမ်းရည်: အလျင်လူသား]

[ပိုင်ရှင်: ထန်မော့]

[ပိုင်ရှင်: လျန်ချောင်း (ခိုး၀င်သူ)]

[အမျိုးအစား: လေးဘက်မြင်]

[အသုံးပြုပုံ: အချိန်ထက်ပိုမြန်သော အလျင်]

[အဆင့်: ၃]

[ကန့်သတ်ချက်: အမြန်ဆုံးအလျင်မှာ အသံ၏အမြန်နှုန်းအထိ မြှင့်တင်နိုင်။ ဤစွမ်းအင်ကို အသုံးပြုနေစဥ်တွင် ခန္ဓာကိုယ်၏ အသက်စွမ်းအင်ကုန်ဆုံးမှုနှုန်းလည်း မြန်ဆန်လာလိမ့်မည်]

[မှတ်ချက်: အရမ်းမြန်တဲ့လူသားပဲကွ၊ ဘာပဲလုပ်လုပ် သောက်ရမ်း အပြီးမြန်တာ]

[ထန်မော့ဗားရှင်းအသုံးပြုရန်အညွှန်း: တစ်နေ့တွင် ၃ကြိမ်သာအသုံးပြုနိုင်၊ တစ်ခါသုံးလျှင် ကြာချိန် ၃၀စက္ကန့်၊ စွမ်းရည်ကို အသုံးပြုနေချိန်တွင် အသက်စွမ်းအင် ၂ဆကုန်ဆုံးမည်။ ဤစွမ်းရည်အား ၂၄နာရီအတွင်း လွန်ကဲစွာအသုံးပြုမိပါက 'အလျင်လူသား'၏ဘေးထွက်ဆိုးကျိုးက အလိုလိုသက်ရောက်လာမည်ဖြစ်ပြီး သင်ဘာလုပ်လုပ် ပို၍လျင်မြန်လာမည်။ ထန်မော့က နဂိုထဲကမြန်ပြီးသားလေ။ ဒီလိုဆို အနာဂါတ်မှ ပိုပြီး မြန်လာတော့မယ်ဆိုတဲ့ သဘောမလား]

သူနည်းနည်းလေးမှ မြန်မနေပါဘူးနော်...(🌚)

ထန်မော့ရင်ထဲမှ ကျိန်ဆဲလိုက်မိသည်။

ဒီစွမ်းရည်စာအုပ်ကတော့ သူနဲ့လာကစားနေတာပဲ...

ကစားတာထက်ပိုတယ် ဒါလာရန်စနေတာ...

ဤအလျင်စွမ်းရည်မှာအလွန်သန်မာသည်က ပြောနေစရာတောင်မလိုချေ။ ထန်မော့သာ အသံ၏အလျင်ကို ရောက်ရှိနိုင်ပါက ရန်သူနှင့်ထိပ်တိုက်ရင်ဆိုင်ရလျှင် လွန်မြောက်ရန် အလွန် လွယ်ကူသွားချေပြီ။ သို့သော် ဤစွမ်းရည်ကို သုံးလိုက်သည်နှင့် သူ၏အသက်မှာလည်း တဖြည်းဖြည်းတိုသွားမည်ဖြစ်သည်။

ဤစွမ်းရည်မှာ အသုံးပြုသူ၏လှုပ်ရှားမှုအလျင်ကိုမြှင့်တင်ပေးခြင်းသာဖြစ်ကာ အပြင်ကမ္ဘာ၏ အချိန်စီးဆင်းမှုနှုန်းကိုမူ မထိန်းချုပ်နိုင်ချေ။ ဤစွမ်းရည်ကို အသုံးပြုနေချိန်တွင် အချိန်က အလွန်ရှည်လျားလွန်းသည်ကို ခံစားရမည်ဖြစ်ပြီး၊ တစ်စုံတစ်ယောက်၏ မျက်တောင်တစ်ခတ်စာမှာ သူ့အတွက် စက္ကန့်တချို့မျှ ကြာလိမ့်မည်။ ထို့ကြောင့် တခြားလူများ၏ အမြင်တွင် သူကအလွန်လျင်မြန်ကာ သာမာန်မျက်စိဖြင့် လိုက်မီနိုင်မည်မဟုတ်ချေ။

ဥပမာ ဤစွမ်းရည်မှာ တစ်စက္ကန့်တွင် ၃၄၀မီတာရှိသောအသံ၏အလျင်ကို ရောက်ရှိနိုင်သည်။ သာမာန်လူတစ်ဦးမှာ တစ်နာရီလျှင် ၁၀ကီလိုမီတာနှုန်းပြေးနိုင်လေသည်။ ထို့ကြောင့် ထန်မော့ ဤစွမ်းရည်ကို အသုံးပြုလိုက်လျှင် သူ၏အချိန်စီးဆင်းမှုနှုန်းမှာ အခြားသူများထက် ၁၂၀ဆပိုလာမည်ဖြစ်သည်။

အခြားလူများအတွက် ၁စက္ကန့်သာကြာသေးသော်လည်း သူကတော့ ၁၂၀စက္ကန့်ကို ကုန်ဆုံးပြီးချေပြီ။

ဤစွမ်းရည်မှာ စက္ကန့်၃၀ထိကြာမြင့်သည်ဖြစ်၍ မိနစ်၆၀သို့မဟုတ် ၃၆၀၀စက္ကန့်စာ သူ့အသက်တိုသွားပြီးဖြစ်လိမ့်မည်။

အကယ်၍ အသက်စွမ်းအင်၏ ၂ဆပိုကုန်ဆုံးမည်ဆိုပါက ထန်မော့အသက် ၂နာရီစာ တိုသွားချေပြီ။ အကယ်၍ သူသာ ဤစွမ်းရည်ကို အဆင်အခြင်မဲ့သုံးမိပါက စောစောသေရပေတော့မည်။ ထန်မော့ဗားရှင်းအသုံးပြုရန်အညွှန်းအရ ထိုကန့်သတ်ချက်မှာ သူ့အား ဤစွမ်းရည်ကို အသုံးပြုခြင်းမှ တားမြစ်နေသည့်နှယ်။ အမှန်တကယ်တွင်လည်း သူဤစွမ်းစည်အပေါ် အများကြီး မှီခို၍ မရပါချေ။ စွမ်းရည်ကြောင့် အသက်တိုရတာမျိုးတော့ အဖြစ်မခံနိုင်ပေ။

၄င်းအပြင်ကို...

'၂၄နာရီအတွင်း ဘာလုပ်လုပ် အရမ်းမြန်လာလိမ့်မည်'ဟူသော စာကြောင်းကိုကြည့်ပြီး သူ ၄င်းကို သုံးချင်စိတ်ပင်မရှိတော့ချေ။ သို့တည်းမဟုတ်ပါက ထိုစွမ်းရည်ကို နေ့တိုင်း အသုံးပြုမိသည်နှင့် သူတစ်နေ့ထက်တစ်နေ့ ပိုပို မြန်လာပေတော့မည်။(🤣)

ကမ္ဘာကြီးအွန်လိုင်းပေါ်တက်လာကတည်းက ထန်မော့ပထမဆုံးအကြိမ် တုန်လှုပ်မိခြင်းပင်။ သူ၏မျက်လုံးများကို ပိတ်လျက် အိပ်စက်ရန်သာ ကြိုးစားလိုက်တော့သည်။

ဆယ်ရက်ကြာပြီးနောက် လော့ဖုန်းချန်း၏ ပင်ပန်းနေသောမျက်နှာတွင် ပျော်ရွှင်မှု အရိပ်အယောင်တချို့ ထင်ဟပ်လာခဲ့သည်။ ထန်မော့ ရုံးခန်းထဲသို့၀င်လာပြီးနောင် ဖုံးကွယ်ရန် ခက်ခဲသော စိတ်လှုပ်ရှားမှုများကို ခံစားမိလိုက်ရသည်။

"ငါတို့ သူတို့ပုန်းနေတဲ့နေရာကို ရှာတွေ့ပြီ"

ထန်မော့၏ ရင်မှာတင်းကြပ်သွားခဲ့သည်။

"ဘယ်မှာလဲ"

"ဒီကနေသိပ်မဝေးဘူး ဖူရှီထဲက ရုပ်ရှင်ရုံတစ်ခုမှာ"

လ၀က်ကျော်မက ခိုး၀င်သူများမှာ အမှောင်ထဲတွင် ပုန်းအောင်းနေခဲ့ကြသည်။ မကြာခဏဆိုသလို တိုက်အဖွဲ့၀င်၏အလစ်ကို စောင့်ဆိုင်းနေရင်း တရား၀င်ကစားသမားများနှင့် အရံကစားသမားများကို ချုံခိုတိုက်ခိုက်နေကြဆဲပင်။ အတိအကျဆိုရလျှင် ထန်မော့ အလျင်ကိုသတ်ခဲ့ပြီးနောက်မှလည်း ထိုအဖွဲ့မှာ အားနည်းသွားသည့်ပုံ ပြမလာချေ။ ကစားသမားအများစု၏ နှလုံးကို စားရင်း တိတ်တဆိတ်ခွန်အားများကို မြှင့်တင်နေကြပုံပင်။

အချိန်သည် မည်သူ့ကိုမျှ မစောင့်ချေ။

တိုက်အဖွဲ့အစည်းမှာ နောက်ဆုံးတော့ ထိုသူတို့၏ ခြေရာကိုတွေ့ခဲ့ချေပြီ။

🪩

Prev Next