MM Story Teller

Chapter 57

Viewers 7k

🌍Chapter 57

ဂိမ်းတရား၀င်စတင်ချိန်မှစ၍ မရေတွက်နိုင်သော လူများကဤနေရာသို့ ရောက်လာဖူးခဲ့သည်။ သူတို့မှာ အနက်ရောင်မျှော်စင်အား ထိခိုက်အောင်မလုပ်နိုင်၍ အနက်ရောင်မျှော်စင်အနီးအနားရှိ ပစ္စည်းများတွင်သာ ဒေါသကိုလာရောက်ဖြေဖျောက်ကြရသည်။ အနက်ရောင်မျှော်စင်အနီးရှိ စတိုးဆိုင်များမှာ ဒေါသထွက်နေသော လူအများ၏ ထုရိုက်ဖျက်ဆီးခြင်းကို အခံရဆုံးပင်။ ဤကျောက်စားပွဲမှာလည်း ဘယ်နှစ်ကြိမ်မြောက်မှန်းမသိ ကွဲကြေနေခဲ့ပြီးချေပြီ။ ထန်မော့လက်ထဲမှ သံတုတ်မှာလည်း ထိုကျောက်စားပွဲကို ရှေ့လူတစ်ယောက်မှ ရိုက်ခွဲပြီးနောက် ကျန်ခဲ့သည့်အရာပင်။

ထန်မော့ကဲ့သို့ စိတ်လာဖြေဖျောက်သူများ အမြဲမပြတ်ရှိတတ်သည်။ ထို့ကြောင့် ဖြတ်သွားဖြတ်လာများမှာ ထူးဆန်းသည်ဟုထင်ကြမှာမဟုတ်ချေ။

ထန်မော့ ထိုကျောက်စားပွဲကို ၇ကြိမ်ခန့်ရိုက်ခွဲပစ်ခဲ့သည်။ ထို့နောက် သံချောင်းကိုပစ်ချလျက် နန်ကျင်းလမ်းမှ ထွက်ခွာလာတော့သည်။

စိတ်ရှိတိုင်း ပေါက်ကွဲပစ်ပြီးနောက်မှာတော့ သူအလွန်နေသာထိုင်သာရှိသွားခဲ့သည်။

ကောင်းကင်မှာမှောင်မည်းလာခဲ့ပြီဖြစ်ကာ လမ်းပေါ်တွင် လူများမရှိသလောက် နည်းနေခဲ့ချေပြီ။ ထန်မော့လမ်းပေါ်တွင် လူသူမဲ့သော အင်္ကျီဆိုင်တစ်ဆိုင်ကို တွေ့ခဲ့သည်။ အနက်ရောင်မျှော်စင်မှ သူ့အား၁၀ရက် အလိုကြိုတင်အသိပေးချက်စဥ်မှစ၍ ယခုမှသာ သူ့တွင် အသက်ရှူချိန်ရှိတော့သည်။

စိတ်သက်သာရာရသွားပြီးနောက် ထန်မော့ပြုံးလျက် သူ၏လွယ်အိတ်ထဲမှ ထီးကလေးကိုထုတ်ယူလိုက်သည်။ သူ၏မတိုင်ခင်ကအပြုအမူကိုပြန်လည်စဥ်းစားမိလျှင် မေးစေ့ကိုအသာထိလျက် ဆိုလိုက်သည်။

"အင်း...နည်းနည်းတော့ ကလေးဆန်မိသွားတယ်..."

၄င်းမှာ ကလေးဆန်လှသော်လည်း စိတ်တိုနေသော ထန်မော့မှာ စိတ်ကိုဘယ်လိုမှမထိန်းနိုင်ခဲ့ချေ။

ကမ္ဘာကြီးအွန်လိုင်းပေါ်တက်သွားပြီးသည်မှစ၍ သူ အခြေအနေကိုအပြည့်အ၀လက်ခံကာ စိတ်ကိုတည်ငြိမ်အောင်ထားခဲ့သည်။ အခြားကစားသမားများကဲ့သို့ အနက်ရောင်မျှော်စင်အနီးသို့ ပေါက်ကွဲရန်မသွားခဲ့ဖူးချေ။ သို့သော်ဤတစ်ကြိမ်တော့ အနက်ရောင်မျှော်စင်မှာ သူ့အားအမှန်တကယ် ရန်စလိုက်ချေပြီ။

ထန်မော့ အနေနှင့်သူ၏အဓိကမစ်ရှင်မှာ သည်အတိုင်း ရိုးရိုးကြွက်ဖမ်းဂိမ်းတစ်ခုသာဖြစ်နေခဲ့လိမ့်မည်ဟု မထင်ခဲ့ချေ။

မင်းပဲကြွက်ဖမ်း...မင်းတို့တစ်မိသားစုလုံးပဲ ကြွက်ဖမ်းကြ...

ထန်မော့စိတ်ထဲမှ ပယ်ပယ်နယ်နယ်ကျိန်ဆဲလိုက်မိသည်။

မှန်၏။ ဤမျှော်စင်တိုက်ခိုက်ဂိမ်းမှာ ရိုးရိုးကြွက်ဖမ်းဂိမ်းတစ်ခုသာဖြစ်သည်။ အစမှအဆုံးအထိ အနက်ရောင်မျှော်စင်မှ စည်းမျည်း ၈ခုကိုသာကြေညာပေးခဲ့သည်။ ထန်မော့အား မစ်ရှင်ပြီးမြောက်စေရန် ရွှေကြွက်ကို ကျိန်းသေဖမ်းရမည်ဟု မဆိုခဲ့ချေ။ အနက်ရောင်မျှော်စင်မှ ဘွားဘွား၀ံပုလွေကြီးမှာ ရွှေကြွက်ကိုမုန်း၍ သူ၏မြေးမလေးအား ၄င်းကို ဖမ်းပေးစေချင်သည်ဟုဆိုခဲ့သည်။ သို့သော် ရွှေကြွက်ကို ဖမ်းမမိလျှင် မစ်ရှင်ကို ကျရှုံးမည်ဟုလည်း မဆိုခဲ့ချေ။

ဤသည်မှာ ကြွက်ဖမ်းဂိမ်းသာလျှင် ဖြစ်သည်။

ကြွက်မည်းမှာ ၁မှတ်တန်၍ ရွှေကြွက်မှာတော့ ထိုထက်မကပိုတန်လေသည်။

ရွှေကြွက်မှာ အချိန်များကိုရှုပ်ထွေးစေခဲ့သော်လည်း ထန်မော့၇ယောက်မှာ ထို၇ရက်အတွင်း ကြွက်မည်းများကိုဆက်တိုက်ဖမ်းနေခဲ့ရုံမျှဖြင့် ၂၈မှတ်ရရှိနိုင်ကာ အမှတ်၂၀ကျော်သွားသည်နှင့် 'လူ၀ံကြီး၏ ချစ်သက်လက်ဆောင်' ဆုလာဘ်ကို အသက်သွင်းမိမည်သာ။ လူ၀ံကြီးမှာ ဘွားဘွား၀ံပုလွေကြီး၏ အိမ်တံခါးကို လာခေါက်၍ သူ့အားခေါ်သွားပေးလိမ့်မည်။

မူလအစကတည်းက ဘွားဘွား၀ံပုလွေကြီးမှာ သူ့အနေနှင့် ရွှေကြွက်ကိုဖမ်းမမိလျှင် စားပစ်မည်ဟုဆိုခဲ့သည်။ သူမကထန်မော့ ရွှေကြွက်ကို ဖမ်းမိမည်ဟုမထင်ထားခဲ့ချေ။ ထို့ကြောင့်သူမပြန်လာလျှင် ထန်မော့ကိုစားရန် ၀ိုင်နှင့်ဟင်းခတ်အမွှေးအကြိုင်များ ပြင်ဆင်လာခြင်းပင်။ ထို့ကြောင့်ပင် အနက်ရောင်မျှော်စင်မှာ ဂိမ်းကိုရှင်းနိုင်ခဲ့သော ကစားသမားများအားလုံးကို 'လူ၀ံကြီး၏ မေတ္တာလလက်ဆောင်'ဟူသော ဆုကိုပေးခဲ့ခြင်းပင်။

ကစားသမားတစ်ဦးမှာ ကြွက်မည်းအကောင်၂၀ကို ဖမ်းနိုင်ခဲ့သ၍ ဘွားဘွား၀ံပုလွေကြီးမှာ ထိုကစားသမားကို စားခွင့်မရှိတော့ချေ။

ထန်မော့မှာ ရွှေကြွက်ကိုဖမ်းမိခဲ့ပြီး အဓိကမစ်ရှင်ကိုပင် ကျော်လွန်သွားခဲ့သည်။ သူသည်လျှို့၀ှက်အဓိကမစ်ရှင်ကို မတော်တဆအသက်သွင်းမိလျက် အနက်ရောင်မျှော်စင်၏ ပထမထပ်အား ခက်ခဲအဆင့်ဖြင့် ရှင်းလင်းနိုင်ခဲ့လေသည်။

ထန်မော့မည်သို့ စိတ်မတိုပဲ နေလိမ့်မည်နည်း။

သူ့မှာ မသေရေးရုန်းကန်လျက် ရွှေကြွက်ကို အမိဖမ်းမည်ဟု သံဒိဌာန်ချထားခဲ့ရသည်။ ရလဒ်မှာ အနက်ရောင်မျှော်စင်မှ 'စိတ်မကောင်းလိုက်တာ...မင်းကဒီလောက်ထိတော်ပြီး အဓိကမစ်ရှင်ကိုတောင် ကျော်လွန်သွားမယ် မထင်ထားဘူးလေ...ဟောဒီမှာ ဆုပေးမယ်နော် ခက်ခဲမှုအဆင့်ကိုရှင်းနိုင်လို့ဂုဏ်ယူပါတယ်နော်' ဟု ပြောလိုက်သလိုပင်။

ထန်မော့ စိတ်တိုလွန်း၍ မျှော်စင်အောက်တွင် သွား၍ပေါက်ကွဲခဲ့မိသည်။ သူသည် ၇ရက်ကြာဒုက္ခခံခဲ့ရသည်ဖြစ်၍ ကျောက်စားပွဲကို ၇ချက်ရိုက်ခွဲပစ်ခဲ့သည်။

ထန်မော့ကောင်တာနောက်တွင် ထိုင်ကာ သူ၏ကိုယ်ကို ဗီဒိုဖြင့်ကွယ်ထားလိုက်သည်။ သူတိတ်တဆိတ်တွေးတောနေမိသည်။

"လောလောဆယ် မျှော်စင်တိုက်ခိုက်ဂိမ်းတွေမှာ အဆင့် ၃ဆင့်ရှိတယ်... ဥာဏ်ရည်မသန်စွမ်းအဆင့် ရိုးရိုးအဆင့် ခက်ခဲမှုအဆင့်...တခြားအဆင့်တွေလည်းရှိနိုင်သေးတယ်.. ငါအနာဂါတ်မှာ အနက်ရောင်မျှော်စင်ရဲ့စည်းမျဥ်းတွေကိုသေချာနားထောင်ပြီး အဲဒီလိုစကားလှည့်တာမျိုးကို ဂရုစိုက်မှဖြစ်မယ်"

ဤပျော်ရွှင်ဖွယ်ကြွက်ဖမ်းဂိမ်းမှာ အနက်ရောင်မျှော်စင်မှ ထန်မော့အားရွှေကြွက်ကို ဖမ်းမိသွားစေရန် လှည့်ဖျားကာ ကစားနေခဲ့ခြင်းနှင့်အတူတူပင်။ ဤသည်မှာ အနက်ရောင်မျှော်စင်မှ ခက်ခဲမှုအဆင့်တိုးမြှင့်ရန် ထည့်ထားခြင်းပင် မဟုတ်ပါလော။

အကယ်၍ ဘွားဘွား၀ံပုလွေကြီးမှ ထန်မော့အား ရွှေကြွက်ကို ဖမ်းရန်မပြောခဲ့ပါက ထန်မော့မှာ ဤသည်က ရိုးရိုးကြွက်ဖမ်းဂိမ်းဟုသာ တွေးကာ ကြွက်မည်းများကိုသာ တတ်နိုင်သမျှများများ ဖမ်းမိလိမ့်မည်။ သူ့သော် သူ၏ခေါင်းထဲတွင် ရွှေကြွက်ကို ဖမ်းရမည်ဟု ၀င်သွားခဲ့သည်နှင့် သူ့အနေနှင့်နည်းလမ်းပေါင်းစုံကို သုံးကာ စွန့်စားပြီး ရွှေကြွက်ကိုဖမ်းခဲ့မိတော့သည်။

ကစားသမားကို ရွှေကြွက်ဖမ်းစေရန်လှည့်စားပြီး ကြွက်မည်းကိုရှောင်နိုင်သမျှ ရှောင်ခိုင်းခြင်းမှာပင် ဤဂိမ်းခက်ခဲနေရသောအချက်ပင်ဖြစ်လေတော့သည်။

ကြွက်မည်းတစ်ကောင်မှာ တစ်မှတ်တန်ပြီး ထွေထွေထူးထူးခက်ခဲနေစရာမလိုပဲ ထန်မော့၇ယောက်မှာ ၇ရက်အတွင်း ၂၈မှတ်ကို ရရှိနိုင်ပြီးသားပင်။

သို့သော် ထန်မော့မှာ ၂၁မှတ်သာရရှိခဲ့ပြီး အကယ်၍သူသာရွှေကြွက်ကို မမိခဲ့လျှင် ၁၁မှတ်သာရှိမည်ဖြစ်ကာ ရှင်သန်ရေးအတွက်လိုအပ်သော အမှတ်၂၀နှင့်အဝေးကြီးပင်။

ထန်မော့မှာ ထိုပြဿနာကိုတွေးတောနေမိသည်။ ထိုရွှေကြွက်ကိုဖမ်းခြင်းမစ်ရှင်မှာ သူကလွဲလျှင် အခြားအောင်မြင်ခဲ့သော ကစားသမားများ ရှိခဲ့သေးသည်လော။

ဂိမ်းသိမ်းမှတ်မရှိပဲ ထန်မော့မှာ ဖူ၀မ်သော်ကိုဆက်သွယ်နိုင်မည်မဟုတ်သလို ရွှေကြွက်၏ အချိန်နှင့် နေရာလှည့်စားမှုအကြောင်းကိုလည်း သိခဲ့မည်မဟုတ်ပေ။

အမည်ပြောင်းလဲနိုင်စွမ်းမရှိခဲ့လျှင် တခြားထန်မော့များကိုဆက်သွယ်ပြီး တွင်းပေါက်တစ်ခုတည်းတွင် ရပ်အောင်ပြုလုပ်နိုင်လိမ့်မည်မဟုတ်။

တခြားကစားသမားများတွင် ထူးခြားသော ဂိမ်းကူပစ္စည်းများနှင့် စွမ်းရည်များရှိကောင်းရှိလိမ့်မည်။ သို့သော် ဤဂိမ်းကိုရှင်းနိုင်ရန် ကစားသမားတစ်ဦး၏ လိုအပ်ချက်မှာ ရက်ရက်စက်စက်မြင့်မားလွန်းလှသည်။ ဤသည်မှာ သာမာန် မျှော်စင်တိုက်ခိုက်ခြင်းဂိမ်းထက် ထန်မော့အတွက် သီးသန့်ဖန်တီးထားသော ဂိမ်းတစ်ခုဟု ခံစားရသည်။ ယခုပြန်တွေးကြည့်လျှင် ဤသည်မှာ ခက်ခဲမှုအဆင့်ဖြစ်နေလျှင်ပင် ကိစ္စမရှိတော့ချေ။

ထန်မော့သည် မျှော်စင်တိုက်ခိုက်ခြင်းဂိမ်းထံမှ အောင်မြင်မှုနှင့် ကျရှုံးမှုတချို့ကို ပြန်လည်သုံးသပ်လျက် အာရုံစိုက်ရမည့်အချက်များကို ကောက်နုတ်လိုက်သည်။

ပထမတစ်ချက်မှ ဘွားဘွား၀ံပုလွေကြီး၏ ထီးကလေးပင်။ ထန်မော့သူ၏အိတ်ထဲမှ ထိုထီးကလေးကို ထုတ်ယူလိုက်သည်။ ထို့နောက်၄င်းကို ဖွင့်ကာ အတော်ကြာစူးစမ်းကြည့်နေပါသော်လည်း မည်သည့် သဲလွန်စကိုမှမတွေ့ရချေ။

ညအချိန်ဖြစ်၍ ကုန်တိုက်တစ်ခုလုံးမှာ မှောင်မည်းနေခဲ့သည်။ ထန်မော့သည် ဓါတ်မီးကိုထုတ်ယူလျက် ထိုထီးအပေါ်ထိုးကြည့်လိုက်သည်။ မီးအလင်းရောင်က ထီးအပေါ်ကျရောက်လာသည်နှင့် ထီးအပေါ်တွင် စာလုံးတချို့ပေါ်လာခဲ့လေသည်။

[ပစ္စည်း: ဘွားဘွား၀ံပုလွေကြီး၏ ထီးကလေး]

[ပိုင်ရှင်:ထန်မော့]

[အရည်အသွေး:ထူးထူးရှယ်]

[အဆင့်:၂]

[တိုက်ခိုက်မှု: သန်မာ]

[အသုံးပြုပုံ: အလွန်သန်မာသောခုခံမှုရှိသည်။ ထီး၏မျက်နှာပြင်ကအလွန်မာကျောကာ ထီးထိပ်သည်ချွန်ထက်လှသည်။ ဖွင့်ထားလျက် ထီးကလေးမှာ တိုက်ခိုက်မှုများကို ခုခံနိုင်ပြီး၊ ပိတ်ထားလျှင်တော့ တိုက်ခိုက်ရေးပစ္စည်းအဖြစ် အသုံးပြုနိုင်သည်။ အရောင်ကလေးကလည်း သိပ်သိပ်လှနော်]

[ကန့်သတ်ချက်: ထီးကလေးကိုအသုံးမပြုမီ "ခေါင်းစွပ်နီလေးရဲ့ စွမ်းအင်.. နတ်မိမယ်ရဲ့မှော်ဆန်တဲ့အသွင်ပြောင်းခြင်း"ဟု အော်ဟစ်ရမည်]

[မှတ်ချက်: ဘွားဘွား၀ံပုလွေကြီးရဲ့ ထီးက သူ့မြေးမလေးအတိုင်းပဲ၊ နွဲ့နွဲ့နှောင်းနှောင်းနဲ့ ပန်းရောင်လေး ခိခိ]

ထန်မော့"..."

'ငါ့အဘိုးပြန်ပေး'ဟူသော စွမ်းရည်ကိုရရှိပြီးကတည်းက ထန်မော့၏မျက်နှာ အရေပြားမှာ တစ်လက်မလောက်ပိုထူလာခဲ့ပြီးဖြစ်သည်။ ထီးပန်းရောင်လေး၏ ကန့်သတ်ချက်ကိုမြင်လျှင် သူ၏နှုတ်ခမ်းအစုံမှာ အသာဖြောင့်တန်းသွားမိသည်။ သူသည် ထိုငါ့အဘိုးပြန်ပေးစွမ်းရည်ကဲ့သို့ပင် ဤထီးအားအသုံးမပြုတော့ပါဟု ဆိုလိုက်ချင်သည်။ သို့သော် ထိုထီး၏ထူးရှယ်နှစ်ထပ်ကွမ်း အရည်အသွေးနှင့် မြင့်မားသော တိုက်ခိုက်စွမ်းရည်တို့ကို ကြည့်လိုက်မိလျှင်..

ထန်မော့ သူ့ကိုယ်သူမျက်နှာပျက်အောင် လုပ်မနေတော့ ထိုထီးကို တိတ်တဆိတ် အိတ်ထဲသို့ပြန်ထိုးထည့်လိုက်သည်။

နောက်တစ်ခုမှာ ထန်မော့အပြင်သို့ပြန်ရောက်ရောက်လာခြင်းတွင် အနက်မျှော်စင်ထံမှ ဆုကို လက်ခံရရှိခဲ့သည်။ သူ၏အိတ်ကပ်ထဲမှ ရွှေဒင်္ဂါးပြားတစ်ခုကိုထုတ်ယူလိုက်ကာ အပြန်ပြန်အလှန်လှန်ကြည့်လျက် သဲလွန်စကိုရှာဖွေလိုက်သည်။

သူအပြင်သို့ပြန်လည်ပို့ဆောင်ခံရစဥ်တွင် သူ၏နားထဲတွင် အနက်ရောင်မျှော်စင်၏ အသံကိုကြားခဲ့ရသည်။

"တင်းတောင်~ ကစားသမားမော့မော့ဟာ အနက်ရောင်မျှော်စင်ရဲ့ပထမထပ် ခက်ခဲမှုအဆင့်ကို အောင်မြင်စွာ ရှင်းလင်းလိုက်ပါပြီ... ကမ္ဘာ့ပထမဆုံး ခက်ခဲမှုအဆင့်ကို ရှင်းနိုင်ခဲ့တဲ့ ကစားသမားတစ်ဦးဖြစ်လာတဲ့အတွက် အပိုဆု'ဘုရင်ရဲ့ရွှေဒင်္ဂါး'ကို လက်ခံရရှိသွားပါပြီနော်"

ဤသည်မှာ ရွှေဒင်္ဂါးပြားတစ်ပြားပင်။

အတော်လေး လေးလံသောဒင်္ဂါးတစ်ပြားဖြစ်သည်။

၄င်း၏ အလေးချိန်မှ ပုံသွင်းထားမှုတို့အထိ လုံး၀ရွှေစင်စစ်ပင်။ အရှေ့ဘက်ခြမ်းတွင် သရဖူဆောင်းထားသော ယောကျာ်းတစ်ဦး၏ပုံဖြစ်ကာ နောက်ဘက်တွင်တော့ ထန်မော့နားမလည်သော စာကြောင်းတချို့ရှိသည်။ ထန်မော့ ထိုစာလုံးများကို ခတ္တမျှကြည့်နေမိပြီးနောက် ရှေ့ဘက်မှ သရဖူဆောင်းထားသော ယောကျာ်းကိုပြန်ကြည့်လိုက်သည်။

"မြေအောက်ကမ္ဘာရဲ့ ဘုရင်..."

ဘုရင်၏ရွှေဒင်္ဂါး။ ထန်မော့၏ပထမဆုံး၀င်လာသောအတွေးမှာ မြေအောက်ကမ္ဘာပင်။ လူ၀ံကြီးမှာသူ့အား ခေါ်ဆောင်သွားစဥ်က ဘုရင်၏ကုန်သည်များမှာ မွန်းစတားများကို လိမ်လည်ရခြင်းအား နှစ်သက်ကြောင်း၊ စျေးပေါသောပစ္စည်းများကို မတန်တဆစျေးတင်ကာ လာရောင်းတတ်ကြောင်း ပြောခဲ့ဖူးလေသည်။

သူ ဤရွှေဒင်္ဂါးပြား၏ မူလကိုခန့်မှန်းနိုင်လေသည်။ သူသည် အသုံးပြုပုံကို အသေအချာဖတ်ရှူလိုက်သည်။ သို့သော် ဘာမှပေါ်မလာသဖြင့် မီးဖြင့်ရှို့ကြည့်လိုက် သွားဖြင့်ကိုက်ကြည့်လိုက် လုပ်ကြည့်လိုက်သည်။ သူ၏ကျင်တက်သွားသော သွားကို လျှာနှင့်ထိုးလိုက်သည်။

"ဒီတိုင်းရွှေနဲ့လုပ်ထားတာတစ်ခုခုလောက်ပဲလား"

ဤဒင်္ဂါးမှာ သူ့သွားနှင့် ကိုက်ချ၍ပင် ရလေသည်။

ထန်မော့ ထိုဒင်္ဂါးကိုကွေးကြည့်လိုက်သည်။ ၄င်းမှာသူ့အလိုလိုပြန်ကောင်းသွားပြီးနောက် စာလုံးတချို့ပေါ်လာရာ ထန်မော့၏ မျက်လုံးများတောက်ပသွားခဲ့သည်။

[ပစ္စည်း: ဘုရင်ကြီး၏ ရွှေဒင်္ဂါး]

[ပိုင်ရှင်: ထန်မော့]

[အရည်အသွေး: ရှားပါး]

[အဆင့်: ၁]

[တိုက်ခိုက်မှု: မရှိ]

[အသုံးပြုပုံ: မည်သည့်အနက်ရောင်မျှော်စင်ဂိမ်းများကိုမဆို ကျော်ချနိုင်သည်။ ဂိမ်းထဲမှ တိုက်ရိုက်ထွက်ခွာနိုင်သလို ဘေးလူအနေနှင့်လည်း ရပ်ကြည့်နိုင်လေသည်]

ထန်မော့မှာ ထိုစာလုံးများကိုမြင်လျှင် ရင်ထဲမှ တဒိုင်းဒိုင်းခုန်လာခဲ့သည်။ သူ၏အသက်ရှူနှုန်းများလည်း မြန်ဆန်လာခဲ့သည်။ စက္ကန့်အနည်းငယ်ကြာပြီးနောက်တွင်မူ သူ၏စိတ်တို့ပြန်လည်တည်ငြိမ်လာခဲ့သည်။

[ကန့်သတ်ချက်: ကုန်ဆုံးနိုင်သော ပစ္စည်း။ တစ်ကြိမ်သာအသုံးပြုနိုင်သည်။ ဂိမ်းအတွင်းတွင် သင်သည် အခြားကစားသမားများကို ကူညီရန် မည်သည့်စွမ်းရည်မျိုး ပစ္စည်းမျိုးကိုမဆို အသုံးပြုခွင့်မရှိပါ]

[မှတ်ချက်: ဒီရွှေဒင်္ဂါးပြားနဲ့သာဆို မင်းဟာ ဘုရင်ကြီးရဲ့ ပြောရေးဆိုခွင့်ရှိသူပဲနော်]

ထန်မော့ ရေရွတ်လိုက်မိသည်။

"ဖြစ်နိုင်ပါတယ်"

ကောင်းကင်ဘုံကိုပင် ကျော်လွန်နိုင်သော ပစ္စည်းမျိုးတွင် ကန့်သတ်ချက်မရှိသည်မှာ မဖြစ်နိုင်ချေ။ တစ်ကြိမ်သာအသုံးပြုနိုင်သည်မှာပင် အတော်လေးကောင်းလွန်းနေပြီဖြစ်သည်။

သို့သော်ထန်မော့အနေနှင့် ဤသည်မှာ တစ်ကြိမ်သာသုံးနိုင်သော ပစ္စည်းဖြစ်စေကာမူ စိတ်ထဲမထိမိပဲ မနေနိုင်ချေ။ သူသည်ထိုဒင်္ဂါးကိုတင်းတင်းဆုပ်လျက် ၅မိနစ်ကြာဆက်ကြည့်နေမိသည်။ ထို့နောက် သူ့အိတ်ထဲသို့ပြန်ထိုးထည့်လိုက်သည်။ ထိုရွှေဒင်္ဂါးအား အတွင်းဆုံးအိတ်ကပ်ထဲတွင် ထိုးထည့်ကာ လုံခြုံစွာ ဇစ်ဆွဲပိတ်လိုက်သည်။

ယခုအချိန်တွင် ထန်မော့တွင် ရှားပါးပစ္စည်းနှစ်မျိုးရှိလေသည်။ တစ်ခုမှာ ကြက်ဆင်ဥဖြစ်ကာ နောက်တစ်ခုမှာ ဘုရင်ကြီး၏ ရွှေဒင်္ဂါးပင်ဖြစ်လေသည်။

ကောင်းကင်ဘုံကိုပင်ကျော်လွန်နိုင်သည့် ရှားပါး ဂိမ်းကူပစ္စည်းတိုင်းမှာ ၄င်းတို့ကအဘယ်ကြောင့် ရှားပါးပစ္စည်းဖြစ်ရသည်ကို ရိုးရှင်းပြီး ရက်စက်သောနည်းဖြင့်ပြောပြနေခဲ့သည်။ ဤသည်မှာ တစ်ကြိမ်သာအသုံးပြုနိုင်သောပစ္စည်းဖြစ်စေကာမူ အနက်ရောင်မျှော်စင်ဂိမ်းကိုတိုက်ရိုက်ကျော်ချနိုင်စွမ်းရှိကာ ထန်မော့ကိုအတော်လေးစိတ်လှုပ်ရှားအောင် လုပ်နိုင်စွမ်းရှိနေဆဲပင်။

"ငါဒါကို သာမာန်ကလျှံကာသုံးလို့မဖြစ်ဘူး...ရွေးချယ်စရာမရှိတော့မှ"

ထန်မော့ကဆိုလိုက်သည်။

"ဥပမာ ကြွက်ဖမ်းဂိမ်းကိုကစားနေတုန်းကလိုမျိုးဆို ရွှေကြွက်ကိုမဖမ်းနိုင်ရုံနဲ့တော့ သုံးလို့မရဘူး ဘွားဘွား၀ံပုလွေကြီးက ငါ့ကိုစားတော့မယ်ဆိုတဲ့ အချိန်မျိုးမှာမှ သုံးသင့်တယ်"

ဤပစ္စည်းတွင် ကောင်းကျိုးရော ဆိုးကျိုးရောရှိသည်။ သို့သော်ကောင်းကျိုးကတော့ အလွန်မြင်သာလှသည်။ ထန်မော့အား သေခြင်းတရားကိုတစ်ကြိမ်ရှောင်ရှားခွင့် ပေးလိုက်သည့်သဘောပင်။ ဆိုးကျိုးမှာ ရှာရခက်သော်လည်း မရှိဘူးဟုတော့ မဆိုလိုချေ။ ဤပစ္စည်းကိုပိုင်ဆိုင်ထားသော ကစားသမားများမှာ ဂိမ်းကိုကြိုးကြိုးစားစား စွန့်စွန့်စားစားဆော့ချင်စိတ်ရှိကြတော့မည်မဟုတ်။

အဘယ်ကြောင့်မူ'ငါ့မှာ အခွင့်အရေးတစ်ခုတော့ ရှိသေးတာပဲ'ဆိုသည့် သဘောပင်'။

ဤဘုရင်ကြီး၏ ရွှေဒင်္ဂါးမှာ အသက်အန္တာရာယ်ကို မလွဲမရှောင်နိုင်တော့မှသာ အသုံးပြုသင့်လေသည်။

ယခုသူ့တွင် ပစ္စည်းအသစ်နှစ်မျိုးတိုးလာချေပြီ။ ထန်မော့ အေးစက်သော ကြမ်းပြင်တွင်လဲလျောင်းနေရင်း ကျေနပ်မှုတို့နှင့်အတူ မျက်လုံးများမှာလည်း မှေးစဥ်းလာတော့သည်။ မျှော်စင်တိုက်ခိုက်ဂိမ်း မတိုင်ခင်၁၀ကြိုကြေညာပေးပြီးကတည်းက သူစိတ်ချလက်ချအနားယူနိုင်စွမ်း မရှိခဲ့ချေ။ ယခုတော့ ဂိမ်းလည်း ပြီးသွားပြီမို့ သူ့မျက်လုံးများကို မှိတ်လျက် အိပ်စက်လိုက်မိတော့သည်။

သို့သော် သူ့မျက်လုံးများမှိတ်ထားလျက်နှင့်ပင် သတိမလွတ်ခဲ့ချေ။ အသံတစ်ခုခုကိုကြားသည်နှင့် သူ၏အသိစိတ်မှ အလိုလိုတုန့်ပြန်ကာ နိုးလာပေလိမ့်မည်။

ဘန်း...

မြေကြီးပေါ်သို့ တစ်ခုခုပြုတ်ကျသံက ကျယ်လောင်စွာ ထွက်ပေါ်လာခဲ့သည်။ ထန်မော့မျက်လုံးများ ချက်ချင်းပွင့်လာလျက် လက်ကောက်၀တ်မှ မီးခြစ်ဆံတက်တူးကို ဖိထားလိုက်သည်။ သူ ပတ်၀န်းကျင်ကို ဂရုတစိုက်နားစွင့်လျက် အင်္ကျီဆိုင်အပြင်ဘက်မှ အသံများကို ကြားလိုက်ရသည်။ သူ၏လွယ်အိတ်ကို ကောက်လွယ်လျက် တံခါးဆီသို့ လှစ်ခနဲပြေးလိုက်သည်။ ထို့နောက် သူ၏ကိုယ်အား စက္ကူပုံးများနှင့် ကွယ်လျက် အပြင်ဘက်သို့ ကြည့်လိုက်လေသည်။

ကောင်းကင်မှာ အတော်လေးလင်းနေခဲ့ပြီဖြစ်ကာ အချိန်မှာ မနက်စောစောပင်ရောက်လုပြီ။

ဒုတိယထပ်မျက်နှာချင်းဆိုင်တွင် ဂါ၀န်၀တ်ထားသော အမျိုးသမီးက အရှေ့သို့ ကြောက်လန့်တကြားကြည့်နေသည်အား သူ မြင်လိုက်ရသည်။ သူမကြည့်နေသည့်ဘက်မှာ ထန်မော့၏ မမြင်ကွယ်ရာတွင်ဖြစ်၍ သူမဘာကိုကြည့်နေသလဲ မပြောနိုင်ခဲ့ချေ။ ထိုအမျိုးသမီးမှာ နောက်သို့တစ်လှမ်းခြင်းဆုတ်ရင်း သူမတစ်ကိုယ်လုံးမှာ ကုန်တိုက်၏ မှန်အတားအဆီးထံတွင် ကပ်နေခဲ့လေသည်။

🪩

Prev Next