MM Story Teller

Chapter 55

Viewers 7k

🌍Chapter 55

ဒီဇင်ဘာ၁ရက်နေ့ ၁၂နာရီတွင် ဘွားဘွား၀ံပုလွေကြီးအိမ်မှထွက်သွားစဥ်ကပင်စ၍ ထန်မော့၏အချိန်မှာ ခွဲထွက်သွားခဲ့ခြင်းပင်။ တစ်စုံတစ်ယောက်မှ ဂိမ်းသိမ်းမှတ်နှင့်အလားတူ တစ်စုံတစ်ရာကို ဖွင့်လိုက်သည့်နှယ် ထန်မော့မှာ နေ့ရက်များကို ထပ်ခါထပ်ခါပြန်စတင်မိနေခဲ့သည်။

ဒီဇင်ဘာတစ်ရက်နေ့တွင် ထန်မော့၁ ဟုဆိုနိုင်သော သူတစ်ယောက်တည်းသာရှိသေးကာ ထန်မော့၁ မှာ ပထမနေ့တွင် ရွှေကြွက်ကို ဖမ်းရန် မစွန့်စားရဲသေးချေ။ ထိုအစား တွင်း၏အပြင်မှသာ အခြေအနေကို အကဲခတ်ရန် ရွေးချယ်ခဲ့သည်။ ထို့ကြောင့် ကန်စွန်းဥကိုသာ တွင်းဝတွင်ချန်ခဲ့ပြီးလာစားသော ကြွက်မည်း၏ ခွန်အားကို စူးစမ်းခဲ့သည်။

သို့နှင့် ပထမရက်မှာ ကုန်လွန်သွားခဲ့သည်။

နောက်တစ်နေ့တွင် ထန်မော့၁ မှာ ရွှေကြွက်ကို ဖမ်းရန်အသင့်ဖြစ်နေခဲ့သော်လည်း သူမသိခဲ့သည်က ထန်မော့ ၂ပေါ်လာခြင်းပင်။ ဒီဇင်ဘာ၂ရက်သို့ ပြောင်းလဲသွားခဲ့သည်မှလွဲလျှင် ထန်မော့ ၂ကြုံတွေ့ရသည်မှာလည်း ထန်မော့၁နှင့်အတူတူပင်။ သူသည် ထန်မော့ ၁ကဲ့သို့ပင် ရွှေကြွက်ကို နောက်တစ်ရက်မှ ဖမ်းရန် ဆုံးဖြတ်ခဲ့သည်။ သို့နှင့် ကန်စွန်းဥအား တတိယမြောက်တွင်း၀တွင် ချခဲ့ပြီး စောင့်ကြည့်နေခဲ့လေသည်။

ညနေ၆နာရီတွင် ထန်မော့၁မှာ ၅ခုမြောက်တွင်းပေါက်တွင် ကြွက်မည်းထံမှ တိုက်ခိုက်ခံခဲ့ရကာ ထန်မော့ ၂သည်လည်း ကန်စွန်းဥလာစားသော ကြွက်မည်းကို တတိယတွင်းပေါက်တွင်တွေ့ခဲ့ရသည်။

သူတို့မှာ အချင်းချင်းမမြင်နိုင်ကြသော်လည်း နောက်ပိုင်း စူးစမ်းကြည့်သောအခါတွင်မှ သံသယဖြစ်ဖွယ်ပန်းကန်အမှုန်များကို တွေ့ခဲ့ရခြင်းပင်။

၆နာရီတွင် နေ့ရက်များမှာ အသစ်တဖန်ပြန်စတင်လာပြီး ထန်မော့၂ယောက်၏ တွင်းပေါက်များမှာ တူညီစော အချိန်စီးကြောင်းသို့ ပြန်ရောက်လာခဲ့သည်။

ထန်မော့ ၁မှာ ထန်မော့ ၂၏ဖြစ်တည်မှုကို ချက်ချင်းသတိထားမိခဲ့သည်။ ထန်မော့ ၂မှာလည်း အနည်းငယ် တွေးတောမိခဲ့လိမ့်မည်။

ထန်မော့သည် ရွှေကြွက်ထည့်ထားသည့် အိတ်ကို ထိုးလိုက်သည်။

"မင်းတကယ်ပဲ ငါ့ကိုသတ်နိုင်ခဲ့တော့မလို့... မင်းရဲ့စွမ်းရည်ကဘာလဲ အချိန်နဲ့ ပတ်သက်တာလား...နေ့တိုင်း ၆နာရီမထိုးခင် တွင်းပေါက်တွေကမတူတဲ့အချိန်တွေကို ခွဲဖြာသွားတယ် ၆နာရီထိုးပြီးမှ ပန်းကန်မှုန့်တွေကိုမြင်ရတာ...ဒါပေမယ့် မင်းကိုမေးလို့လည်းအသုံးမ၀င်ဘူး မင်းကစကားမှမပြောတတ်တာ"

ရွှေကြွက်မှ ဘ၀င်မြင့်နေဟန်ဖြင့် အော်ဟစ်လာခဲ့သည်။

ဘွားဘွား၀ံပုလွေကြီးထွက်ခွာသွားကတည်းက နေ့တိုင်းတွင် ထန်မော့အသစ်တစ်ယောက်စီပေါ်ပေါက်လာသည်ပင်။ ထန်မော့အသစ်မှာ ထိုနေ့ကို ပထမနေ့ဟုသာထင်မှတ်ပြီး ရွှေကြွက်ကိုမဖမ်းပဲနေလိမ့်မည်။ ၆နာရီထိုးပြီးသောအခါတွင်မှ တွင်း၀တွင် ပန်းကန်မှုန့်များကို တွေ့လျှင် အလွန်နောက်ကျသွားပြီဖြစ်သည်။

ထန်မော့ ၇ယောက်လုံး၏ မှတ်ဥာဏ်များ သူ့ထံပြန်လည်ရောက်ရှိလာပြီးတော့ ဘွားဘွား၀ံပုလွေ၏ တဲကလေးဆီသို့ပြန်သွားရင်း တွေးတောနေမိသည်။

"ငါတို့အားလုံးက ရွှေကြွက်ကိုဖမ်းချင်နေတဲ့ နောက်တစ်ယောက်ဟာ ငါတို့ပဲဖြစ်မှန်း သိကြမှာပဲ.. အဓိကအချက်၂ချက်ကြောင့်ပဲ ပထမအချက် ဒီဟာက တစ်ဦးချင်းဂိမ်း အနက်ရောင်မျှော်စင်က လှည့်ဖျားပြီး နားလည်မှုလွဲအောင်လုပ်ချင်လုပ်လိမ့်မယ် ကစားသမားတွေကိုတော့ လိမ်မှာမဟုတ်ဘူး... ဒုတိယအချက်က ငါ့ရဲ့စွမ်းရည်တွေအကုန်လုံး အားကုန်နေပြီး သုံးမရဘူး ဒီဟာကသာမာန်ကြောင့်တော့မဟုတ်ဘူး"

ထန်မော့သည် ဘွားဘွား၀ံပုလွေ၏ အသီးအရွက်စိုက်ခင်းမှ ဖြတ်သွားပြီး မြေကြီးကိုငုံ့ကြည့်လိုက်မိသည်။ သူသည်အကြာကြီးတွေးတောနေမိပြီးမှ စကားလုံးတစ်ခုကို စဥ်းစားမိခဲ့သည်။

"ဦးစားပေးခြင်း..."

"ငါနံပါတ်၁က ပထမရက်ရဲ့ ၆နာရီမထိုးခင်အထိ စွမ်းရည်ကိုသုံးလို့မရခဲ့ဘူး ဒါပေမယ့်အဲဒါကိုလည်း နောက်ထပ် ဒုတိယငါရှိမှန်း မသိခင်အထိ သတိမထားခဲ့မိဘူးလေ.. ငါ့နောက်ပိုင်းမှာ ပေါ်လာတဲဲ့ ငါတွေလည်း ပထမရက်မှာတင် ဒုတိယငါတွေရှိကြောင်းရှာတွေ့ခဲ့ပြီးတော့ သူတို့ရဲ့စွမ်းရည်တွေကိလည်း သုံးလို့မရခဲ့ကြဘူး အဲဒါက စွမ်းရည်ကသုံးပြီးသားဖြစ်လို့ အားကုန်နေတာမျိုးမဟုတ်ပဲ ဦးစားပေးချက်ရှိနေလို့"

ထန်မော့မျက်မှောင်ကျုံ့လျက် လွန်ခဲ့သော ၇ရက်ခန့်က မွန်းစတားတောင်ကြားကို မည်သို့၀င်ခဲ့သည်အား ပြန်လည် စဥ်းစားလိုက်မိသည်။

"ငါမွန်းစတားတောင်ကြားကို ညနေ၆နာရီမှာ ၀င်လာခဲ့တာလား အင်း အခုက ၆နာရီပဲ ဒီတော့ ၆နာရီနောက်ပိုင်းမှာ နောက်ထပ်ထန်မော့တစ်ယောက် ပြောရရင် နောက်ဆုံးထန်မော့တစ်ယောက်ပေါ့...သူကသာ နောက်ဆုံးဦးစားပေးအကျိုးခံစားခွင့်ကိုရမှာ"

ထန်မော့တွက်ဆမှုအရ ညနေ၆နာရီနောက်ပိုင်းတွင် ရွှေကြွက်၏ ဦးစားပေးချက်မှာ ပြန်လည်ထိန်းချုပ်မှုမှ လွတ်သွားခဲ့ပုံပင်။

ဥပမာအနေဖြင့် ထန်မော့၂မှာ ဒီဇင်ဘာ၂ရက်နေ့တွင် ပေါ်လာခဲ့ပြီး ညနေ၆နာရီတွင် တတိယတွင်းပေါက်၌ ကန်စွန်းဥပန်းကန်ကိုထားခဲ့သည်။ ၆နာရီနောက်ပိုင်းတွင် သူသည် ၅ခုမြောက်တွင်းပေါက်တွင် ထန်မော့ ၁၏အရိပ်အယောင်ကို တွေ့ရှိခဲ့သည်။ သို့သော် ထိုစဥ်က သူ၏စွမ်းရည်ကို အသုံးပြု၍မရသေးချေ။ အဘယ်ကြောင့်ဆိုသော် ထိုအချိန်တွင် ဦးစားပေးသူအသစ်

တတိယထန်မော့ပေါ်လာခဲ့၍ပင်။

ထိုကဲ့သို့ဦးစားပေးချက်အရ ရှေ့မှထန်မော့များမှာ နောက်မှပေါ်လာသော ထန်မော့များ၏ အနာဂါတ်လမ်းကြောင်းကို ထိခိုက်စေတော့မည်မဟုတ်ချေ။

ဥပမာ ထန်မော့၂မှာ 'ငါ့အဘိုးပြန်ပေး'ဟူသော စွမ်းရည်ကို တစ်နေ့မှာတစ်ကြိမ်သာအသုံးပြုခွင့်ရ၍ သုံးခွင့်မရှိခဲ့ချေ။ သူသာအသုံးပြုနိုင်ခဲ့လျှင် တတိယထန်မော့မှာ ထိုစွမ်းရည်ကို အသုံးပြုနိုင်တော့မည်မဟုတ်ချေ။ ထို့ကြောင့်ဦးစားပေးချက်အရ ထန်မော့ ၂မှာ စွမ်းရည်များကို အသုံးမပြုနိုင်ခြင်းပင်။ တီကောင်မျက်ရည်မှာလည်း အတူတူပင်။ ဤသည်မှာလည်း ကုန်ဆုံးနိုင်သော ပစ္စည်းဖြစ်၍ ရှေ့မှ ထန်မော့တစ်ဦးကသုံးခဲ့ပါက နောက်မှ ထန်မော့က အသုံးပြုနိုင်တော့မည်မဟုတ်။

သို့သော် မာရီယိုဦးထုပ်နှင့် မီးခြစ်ဆံကဲ့သို့ပစ္စည်းများက ဦးစားပေးချက်သက်ရောက်မှုမရှိချေ။

ထန်မော့ဘွားဘွား၀ံပုလွေ၏အိမ်ထဲသို့ ပြန်လာခဲ့သည်။ သူသည် ရွှေကြွက်ထည့်ထားသည့် အိတ်ကို ဆိုဖာပေါ်တွင်တင်လိုက်ပြီး ကော်ဖီစားပွဲထံလျှောက်သွားလိုက်သည်။ ထို့နောက်သူသည် ကြော်ငြာစာရွက်နှင့် သတင်းစာတစ်ခုကိုကောက်ယူလိုက်သည်။

ခွဲဖြာနေသောအချိန်နှင့်နေရာများ ပြန်လည်ပေါင်းစပ်သွားသည်နှင့် ထန်မော့၇ယောက်လုံးပိုင်ဆိုင်သော မှတ်ဥာဏ်နှင့် ပစ္စည်းများအကုန်လုံး တစ်နေရာထဲတွင် ပြန်လည်ရောက်ရှိလာခဲ့သည်။

ဥပမာအားဖြင့် တတိယထန်မော့မှာ မာရီယို၏ဦးထုပ်ကိုအသုံးပြုလျက် မြေအောက်ကမ္ဘာမှ သတင်းစာတစ်ခုကို ရရှိခဲ့သည်။ ထိုထဲတွင်ရေးထားသည်မှာ

"ထူးဆန်းထွေလာဆပ်ကပ်ဟာ ရတနာတစ်ခုကို ပျောက်ဆုံးသွား...အံအားသင့်ဖွယ်ညတစ်ညဟာ လျင်မြန်စွာကုန်ဆုံးသွားခဲ့"

ထန်မော့သတင်းစာ၏ ခေါင်းကြီးပိုင်းကို ဖတ်ကြည့်လိုက်မိသည်။

ဤသတင်းစာကြောင့် ထန်မော့၃မှာ ၃ရက်မြောက်နေ့တွင် စွန့်စားပြီး ရွှေကြွက်ကိုဖမ်းရန် ဆုံးဖြတ်ခဲ့သည်။ ဘွားဘွား၀ံပုလွေကြီးမှာ ဘယ်အချိန်မှပြန်လာမည်လဲ မသိသဖြင့် သူအလျင်လိုနေခဲ့သည်။ ထို့ကြောင့်သူသည် ဖူ၀မ်သော်အား မစ်ရှင်စောစောပြီးမြောက်ရန် ၉၀ရာခိုင်နှုန်းသေချာသည်ဟုဆိုကာ ဂိမ်းသိမ်းမှတ်ကိုဖွင့်ခိုင်းခဲ့ခြင်းပင်။

ကံမကောင်းသည်က ၆နာရီမှ ၁မိနစ်စွန်းသည်နှင့် ထန်မော့ ၄မှာ ဦးစားပေးအခွင့်အရေးကို ရရှိသွားပြီး ဂိမ်းသိမ်းမှတ်ကိုဖွင့်မရတော့ခြင်းပင်။ ထန်မော့၃မှာလည်း ဂိမ်းထဲတွင် အခြားတစ်ယောက်ရှိနေသေးကြောင်း ရှာတွေ့သွားခဲ့သည်။

၄ယောက်မြောက်နှင့် ၅ယောက်မြောက်ထန်မော့တို့မှာတော့ မည်သည့်ပုံမှန်မဟုတ်သည့်အရာကိုမျှ ရှာမတွေ့ခဲ့ချေ။ ၆နာရီတွင် သူတို့သည် တွင်းအပြင်ကသာ ကြွက်မည်းကို စောင့်ကြည့်နေခဲ့သည်။ ၆နာရီ ၁မိနစ်တွင် တွင်းပေါက်များအားလုံး တူညီသောအချိန်ကိုပြန်လည်ရောက်ရှိလာပြီး တခြားထန်မော့များ ချန်ခဲ့သည့် အမှတ်အသားများကို တွေ့ရှိခဲ့သည်။ သူတို့သည် ဤမစ်ရှင်တွင် ပြဿနာရှိနေမှန်း သိသော်လည်း စွမ်းရည်များကို အသုံးမပြုနိုင်သလို ဘာမှလည်း မလုပ်နိုင်ခဲ့ကြချေ။

၆ရက်မြောက်နေ့မှ ထန်မော့မှာ ကိုယ်ပျောက်လူသား၏နာရီနှင့် ထူးဆန်းထွေလာဆပ်ကပ်၏ကြော်ငြာကိုလည်း လက်ခံရရှိခဲ့သည်။

ထိုကြော်ငြာစာရွက်ကြောင့် အဆိုပါဆပ်ကပ်မှာ တီကောင်ကြီးပါ၀င်ခဲ့သော ဆပ်ကပ်ဖြစ်လိမ့်မည်ဟု ခန့်မှန်းမိခဲ့သည်။ သူ့အနေနှင့် တီကောင်ကြီး၏ လွတ်မြောက်သွားမှုကြောင့် ဆပ်ကပ်ကိုသက်ရောက်မှု ရှိစေမည်ဟု မထင်ထားခဲ့ချေ။ တချိန်တည်းမှာပင် ကိုယ်ပျောက်လူသား၏ နာရီက သူ့အားတွင်းထဲတွင် ကိုယ်ပျောက်စေသည့် စွမ်းရည်ကိုပေးခဲ့သည်။ ဤနည်းဖြင့် ကြွက်မည်းနှင့်တွေ့လျှင်တောင် အသက်အန္တရာယ်ရှိလိမ့်မည်မဟုတ်။ ထို့ကြောင့် ထန်မော့၆မှာ ပထမရက်၌ပင် ရွှေကြွက်ကိုဖမ်းရန်ဆုံးဖြတ်ခဲ့ခြင်းပင်။ ပို၍သေချာစေရန် သူသည်ဂိမ်းသိမ်းမှတ်ကို ဖွင့်ရန်ဆုံးဖြတ်ခဲ့သည်။

ထို့နောက် ဖူ၀မ်သော်နှင့် ဆက်သွယ်မိခဲ့သည်။

ဖူ၀မ်သော်က ထန်မော့၃နှင့် ၆နာရီနောက်ပိုင်းတွင် အဆက်အသွယ်ပျက်သွားပြီးနောက် ထပ်မံဆက်သွယ်၍မရတော့ဟုဆိုခဲ့သည်။ ထန်မော့၆မှာ ထန်မော့၃ကဲ့သို့ထပ်ကြုံရမည်စိုးရွံ့ကာ သူတွင်စဥ်းစားချိန် ၁၀မိနစ်သာရှိခဲ့သည်။

သူသည် မင်းအဖေကမင်းအဖေဟူသော စွမ်းရည်ကို အသုံးပြုရန်ဆုံးဖြတ်ခဲ့သည်။

ထိုကဲ့သို့ အရေးပေါ်အခြေအနေမျိုးတွင် ထန်မော့၆မှာ ဖြစ်နိုင်ချေ၂မျိုးကိုတွက်ဆနိုင်ခဲ့သည်။ ပထမတစ်မျိုးမှာ ထန်မော့အနေနှင့်မှတ်ဥာဏ်များကိုသာ ဖျက်ချခံရခြင်းဖြစ်ကာ အစမှအဆုံး ထန်မော့ ၁ယောက်သာရှိခဲ့သည်ဟု၊ ၇ရက်မြောက်နေ့ရောက်ရှိလာသောအခါ ထန်မော့၇မှာ သူ၏အမည်ပြောင်းလဲခံရသည်ကို သတိထားမိပြီး ဖူ၀မ်သော်ထံ ကျိန်းသေဆက်သွယ်မိလိမ့်မည်။ သူသည်ဖူ၀မ်သော်ထံမှ အကြောင်းစုံကိုသိရကာ ရွှေကြွက်ကို ဖမ်းမိခဲ့လိမ့်မည်။

ဒုတိယဖြစ်နိုင်ချေမှာမတူညီသော အချိန်ခွဲကြောင်းများတွင် မတူညီသောထန်မော့များရှိနေပြီး တစ်ဦးကိုတစ်ဦးလည်းမဆက်သွယ်နိုင်ကြချေ။ ထို့နောက်သူသည် မင်းအဖေကမင်းအဖေပဲ ဟူသော စွမ်းရည်ကို သုံးလျက် ထန်မော့အားလုံး၏ အမည်ကိုပြောင်းလဲပစ်ခဲ့သည်။ ထန်မော့တိုင်းမှာ ထိုစွမ်းရည်ကို သတိထားမိပြီး နောက်ထပ်ထန်မော့တစ်ယောက်မှ ထိုစွမ်းရည်ကို

အသုံးပြုခဲ့ကြောင်းသိလိမ့်မည်ဖြစ်ကာ သူတို့၏အတွင်းစိတ်တွင် မြှုပ်နှံထားသော လျှို့၀ှက်ချက်ဖြစ်သည့် : ထန်မော့မှာ ဗစ်တာကို အချိန်အကြာကြီး တဖက်သတ်သဘောကျနေခဲ့သည်ဟူသော လျှို့၀ှက်ချက်ကို မှတ်မိလာခဲ့လိမ့်မည်။

၇ရက်မှာ ကုန်လွန်သွားခဲ့ချေပြီ။ ထန်မော့၁မှာ ၇ရက်စောင့်ရကာ ထန်မော့၂မှာ ၆ရက်စောင့်ခဲ့ရသည်။ နောက်ဆုံး ထန်မော့၆မှ ထန်မော့၇အား သတင်းစကားပါးနိုင်ခဲ့တော့သည်။ သို့နှင့် ထန်မော့၇ယောက်လုံးမှာ မတူညီသော အချိန်လမ်းကြောင်းများတွင် ၉ခုမြောက်တွင်းပေါက်ကို အတူတကွရွေးချယ်ခဲ့ကြပြီး ကျရှုံးနိုင်ချေ ၂၀ရာခိုင်နှုန်းကို ကျော်လွန်ကာ ဂိမ်းကိုရှင်းလင်းနိုင်ခဲ့ကြသည်။

"ငါ့ကိုယ်ငါ ယုံကြည်ပေးခဲ့တာ"

ထန်မော့ ဆိုဖာတွင်ထိုင်လျက် ရှားရှားပါးပါး လက်ဖက်ရည်တစ်ခွက်ငှဲ့လိုက်သည်။

"၇ယောက်မြောက်ငါကလွဲရင် နောက်ထပ်ငါရဲ့ဖြစ်တည်မှုကို ရှာတွေ့ခဲ့လောက်မှာ သူတို့တွေတွင်းပေါက်တစ်ခုတည်းကိုပဲ ရွေးချယ်ဖို့လိုမှန်းလည်း သိခဲ့ကြမှာပဲ ပြဿနာက တူညီတဲ့တွင်းကို ဘယ်လိုရွေးရမလဲ ဆိုတာပဲ"

"နာမည်ပြောင်းလဲတဲ့စွမ်းရည်က ၇ယောက်မြောက်နေ့က ငါ့ဆီအမှန်တရားကိုပြောပြခဲ့တယ် တစ်ခါတည်းမှာပဲ စွမ်းရည်မသုံးနိုင်တဲ့ တခြားနေ့က ငါတွေကိုလည်း သတင်းပေးပြီးသားဖြစ်သွားတယ်"

' ထန်မော့ဟာ ဗစ်တာကို အချိန်တွေအကြာကြီး တဖက်သတ်ခံစားချက်ရှိနေခဲ့ရတယ်'

ထန်မော့သူ၏ခွက်ထဲမှ ရေကိုကြည့်နေမိသည်။

ဤသည်မှာ ကမ္ဘကြီးအွန်လိုင်းပေါ်တက်လာပြီး၍ လ၀က်သာရှိသေးသော်လည်း နှစ်ပေါင်းများစွာ ကျော်လွန်သွားပြီးသကဲ့သို့ ခံစားရသည်။

ထန်မော့ ထိုအမည်ကိုမတွေးဖြစ်သည်မှာ အတော်ကြာပေပြီ။ နေ့ရက်တိုင်းမှာ သေရေးရှင်ရေးနှင့် ရုန်းကန်နေရသဖြင့် ထိုလူ၏အကြောင်းကိုမတွေးနိုင်ခဲ့။ ဤသည်မှာ တိတ်တခိုးအချစ်ဟု သူဆိုခဲ့သော်လည်း ထိုသို့မဟုတ်တာလည်းဖြစ်နိုင်သည်။ သည်အတိုင်း ထိုလူအပေါ်ထူးခြားသော ခံစားချက်တစ်ခုရှိနေသည်ကိုတော့ သူ၀န်ခံပါသည်။

ထန်မော့တွင် မည်သည့်လျှို့၀ှက်ချက်မှ မရှိချေ။

သူ၏မိဘများမှာ ဆုံးပါးသွားခဲ့သည်မှာလည်း ကြာလှပြီဖြစ်ကာ ဆွေမျိုးဟူ၍လည်း မရှိခဲ့။ မိဘများမဆုံးပါးခင်ကပင် ထန်မော့မှာ မိမိ၏လိင်စိတ်တိမ်းညွတ်မှုအကြောင်းဖွင့်ဟခဲ့ပြီးဖြစ်ကာ သူ၏သူငယ်ချင်းများသည်လည်း သည်အကြောင်းကို သိကြသည်။ သူ၏လိင်စိတ်တိမ်းညွတ်မှုအား ဖုံးကွယ်ထားရမည့်လျှို့၀ှက်ချက်ဟူ၍ မခံစားခဲ့ရဖူးချေ။

သူ့တွင်ရှိသော တစ်ခုတည်းသော လျှို့၀ှက်ချက်မှာ ဗစ်တာဖြစ်သည်။

"ဗစ်တာရဲ့မွေးနေ့တာ စက်တင်ဘာလ ၉ရက်နေ့..."

သူ့ကိုယ်သူယုံသည်။ မတူညီသောအချိန်များတွင် သူများစွာရှိနေပါစေဦး သူဖြစ်နေသ၍ အမှန်တရားကို ရှာတွေ့ပေလိမ့်မည်။ သူ့ကိုယ်သူယုံကြည်၍ပင် ထိုအမည်ပြောင်းလဲသောစွမ်းရည်ကို အသုံးပြုခဲ့ခြင်းဖြစ်သည်။ သူ့ကိုယ်သူယုံကြည်ခဲ့၍သာ အဖြေမှန်ကိုရှာတွေ့ခဲ့ခြင်းလည်းဖြစ်သည်။

ထို အမှန်တရားမှာ...

"မင်းကိုမိပြီ"

ထန်မော့ရွှေကြွက်ထည့်ထားသော အိတ်ကလေးကို လက်ညှိုးဖြင့် အသာထိုးလိုက်သည်။

ရွှေကြွက်က စိတ်တိုလွန်း၍ ထန်မော့၏လက်ညှိုးကို ၀င်တိုက်လာခဲ့သည်။

ထန်မော့ စားပွဲပေါ်မှ ကြော်ငြာစာရွက်နှင့် သတင်းစာတို့ကို ကြည့်နေခဲ့ပြီးနောက် သူ၏အိတ်ထဲမှ သာမာန်နာရီအဖြစ် ပြောင်းသွားခဲ့ပြီဖြစ်သော ကိုယ်ပျောက်လူသား၏ နာရီကိုထုတ်ယူလိုက်ကာ ထိုပစ္စည်းသုံးခုကိုကြည့်ရင်း သူ၏နှုတ်ခမ်းတို့ ကွေးညွတ်လာခဲ့သည်။

အနက်ရောင်မျှော်စင်မှာ ကစားသမားတစ်ဦးအား သည်အတိုင်း သေလမ်းသို့တွန်းပို့လိုက်မည်မဟုတ်။

သူ့တွင် မာရီယို၏ဦးထုတ်ရှိခဲ့သည်ဖြစ်စေ မရှိသည်ဖြစ်စေ အနက်ရောင်မျှော်စင်မှာ ဤပစ္စည်းသုံးမျိုးကို တစ်နည်းနည်းနှင့် သူ့ထံရောက်အောင် ပို့ပေးပေလိမ့်မည်။ ကြော်ညာစာရွက်နှင့် သတင်းစာတို့ကို မွန်းစတားတချို့ကလာပေးသည်ဖြစ်စေ နာရီမှာ ဘွားဘွား၀ံပုလွေ၏ အ၀တ်ဗီရိုထဲမှ ထွက်ကျလာ၍ဖြစ်စေ သူ့ထံသို့ရောက်ကိုရောက်လာလိမ့်မည်။ မည်သို့နည်းနှင့်ပင်ဖြစ်စေ ဤပစ္စည်းသုံးခုမှာ ဤဂိမ်းထဲတွင် ကျိန်းသေပေါ်လာရမည်ဖြစ်ကာ သို့မဟုတ်ပါက ဖြေရှင်းနည်းရှိခဲ့လိမ့်မည်မဟုတ်ချေ။

ထန်မော့၃သာ ကြက်ဆင်ဥကိုမသုံးခဲ့လျှင် ထန်မော့၆မှာ အချိန်မှန်ကိုသိခဲ့မည်မဟုတ်ပဲ ထန်မော့၇ကိုလည်း သတိပေးနိုင်ခဲ့လိမ့်မည်မဟုတ်။

၄င်းတို့မှာ လိုကိုလိုအပ်သောဖြစ်စဥ်များဖြစ်သည်။

ထန်မော့လည်း ရေကိုမော့သောက်လျက် လွန်ခဲ့သည်၇ရက်အတွင်း ထန်မော့၇ယောက်လုံး ကြုံတွေ့ခဲ့ရသော ဖြစ်စဥ်များကို အသေးစိတ်တွေးတောနေမိစဥ် အိမ်အပြင်ဘက်မှ သီချင်းညည်းသံကို ကြားလိုက်ရတော့သည်။

"မြေအောက်လူသားရဲ့ အသားချိုချိုလေးရယ်...

လည်တံရှည်ငှက်နီရဲ့ ၀ိုင်လေးရယ်...မြေအောက်လူသားရဲ့အသားကိုစား မြေအောက်လူသားရဲ့ ခြေထောက်ကိုကိုက် ခေါင်းကလေးကိုတော့ မီးအေးအေးနဲ့ကင်... ငါ့ရဲ့ချစ်စရာမြေးမလေးက ငါ့ရဲ့အစာဖြစ်လာတော့မယ်...အိုကွယ်...နူးညံ့တဲ့အသား မွှေးလိုက်တဲ့အနံ့လေး...ဦးနှောက်လေးကချိုမြပြီး အရသာရှိလှသေး..."

သီချင်းသံမှာ ကြမ်းတမ်းလှကာ မသာယာလွန်း၍ ထန်မော့မျက်မှောင်ပင် ကျုံ့လိုက်မိသည်။

ထိုသီချင်းဆိုသံမှာ တဖြည်းဖြည်းနီးကပ်လာခဲ့သည်။

ဘန်း...

အိမ်တံခါးမှာ ကန်ဖွင့်ခံလိုက်ရပြီး တစ်ကိုယ်လုံးပန်းရောင်၀တ်လျက် ထီးပန်းရောင်ကို ကိုင်ထားသော ဘွားဘွား၀ံပုလွေကြီး အတွင်းသို့၀င်လာခဲ့သည်။ သူ၏လက်ထဲတွင် ၀ိုင်တစ်လုံးနှင့် ဟင်းခတ်အမွှေးအကြိုင်အိတ်ကြီးတစ်အိတ်ကိုလည်း ကိုင်လျက်ပင်။ ၀ံပုလွေကြီး၏ နီရဲရဲမျက်လုံးများက တဲအိမ်တစ်ခုလုံး ဖြန့်လျက်ကြည့်လိုက်ပြီး ထန်မော့ထံရောက်ရှိလာခဲ့သည်။ ထန်မော့အားမြင်သည်နှင့် ထိုမျက်လုံးတို့မှာ လောဘနှင့် ဆာလောင်မှုတို့ လျှံကျတော့မတက်။

"ငါ့ရဲ့မြေးမလေး...ညည်းကိုတော့ ယုံလို့ကိုမရဘူးအေ.. ရွှေကြွက်ကိုအခုထိ မဖမ်းရသေး..အား..."

စားပွဲပေါ်မှ ရွှေကြွက်ထည့်ထားသည့်အိတ်ကို မြင်သည်နှင့် ဘွားဘွား၀ံပုလွေကြီးမှာ ထိတ်လန့်စွာ အော်ဟစ်လာခဲ့သည်။ ပန်းရောင်ထီးမှာ ပစ်ထုတ်ခံလိုက်ရပြီး ၀ိုင်ပုလင်းနှင့် ဟင်းခတ်အထုတ်တို့မှာလည်း ပြုတ်ကျသွားရသည်။

ဘွားဘွား၀ံပုလွေကြီးက သူမ၏ ချွန်ထက်နေသော ၀ံပုလွေသွားများကို လက်ဖြင့်ကာလျက် မယုံနိုင်စွာ ဆိုလာခဲ့သည်။

"နင်ကဘယ်လိုလုပ် အချိန်နဲ့နေရာလွတ် ရွှေကြွက်ကို ဖမ်းနိုင်ခဲ့တာလဲ"

🪩

Prev Next