MM Story Teller

Chapter 50

Viewers 7k

🌍Chapter 50

ထန်မော့လည်းကျောက်တုံးကြီးနောက်တွင်ပုန်းလျက် ၅မိနစ်ကြာစောင့်ကြည့်ပြီး ကြွက်မည်းလုံး၀ပြန်ထွက်မလာတော့မှသာ သတိနှင့် ၅ခုမြောက်တွင်းပေါက်အနီးသို့သွားလိုက်သည်။

ကန်စွန်းဥမှာ အနည်းငယ်မျှမကျန်ခဲ့တော့။

ပန်းကန်ပြားမှာလည်း ကြွက်မည်းကြီးထံမှ အမှုန့်ဖြစ်သည်အထိ ချေမွခြင်းခံလိုက်ရသည်။ ထိုအမှုန့်များမှာ မြေကြီးနှင့်ရောနေသဖြင့် သေချာမကြည့်လျှင် မမြင်နိုင်ချေ။

ရွှေကြွက်ပေါ်လာနိုင်သည့်ရာခိုင်နှုန်းမှာ သုညပင် ဖြစ်ကာ ၄င်းမှာကြွက်မည်းဖြစ်သည်ကို သံသယ၀င်စရာပင်မလိုချေ။ ထိုကြွက်မည်းကြီးမှာ မျောက်နှစ်ကောင်ထက်ရော 'ဘေကိုသတ်ပါ' ဖြစ်စဥ်ဂိမ်းထဲမှ

တီကောင်ကြီးထက်ရော ခွန်အားကြီးသည်။

ထန်မော့ ထိုသို့အတည်ပြုပြီးသည်နှင့် ဘွားဘွား၀ံပုလွေကြီး၏ တဲအိမ်လေးထဲသို့ပြန်၀င်လာခဲ့လေသည်။

နောက်တစ်နေ့ညနေတွင် ထန်မော့မာရီယို၏ဦးထုပ်ကိုတဖန်ပြန်ဆောင်းလျက် နံရံကိုခေါင်းနှင့် ၀င်တိုက်လိုက်ပြန်သည်။ ကျလာသောပစ္စည်းများမှာတော့ အမှိုက်ဆန်နေဆဲ။ ထန်မော့ထိုအထဲမှတစ်ခုကို ကရားထဲပစ်ထည့်လျက် ကန်စွန်းဥနှင့်လဲလှယ်လိုက်သည်။

ညနေ ၅နာရီခန့်တွင် သူ၏ခွန်အားကိုပြန်လည်ဖြည့်တင်းရန် ဘီစကစ်အချို့ကိုစားလိုက်ပြီး ကန်စွန်းဥကိုယူကာထွက်လာခဲ့ပြန်သည်။

ကြွက်တွင်းများမှာ နက်ရှိုင်းလွန်းလှသည်။ ထန်မော့ ကျောက်တုံးကြီးနောက်တွင် ပုန်းအောင်းနေလိုက်၏။

သူ မီးခြစ်ဆံကြီးကိုယူလျက် ဓါးနှစ်ချောင်းကို ချွန်လိုက်ပြီးမှ သူ၏ပေါင်တွင်ချည်နှောင်လိုက်သည်။ ၅နာရီ ၅၉မိနစ်ကိုရောက်လာသည်နှင့် ထန်မော့ပန်းကန်ကိုကိုင်လျက် ၅ခုမြောက်တွင်းပေါက်ထံလျှောက်သွားလိုက်တော့သည်။

တွင်းပေါက်၉ခုစလုံးအတွက် ရွှေကြွက်ပေါ်လာနိုင်နှုန်းကအတူတူပင်။

၆နာရီထိုးသည်နှင့် ထန်မော့ခါးကိုကိုင်းလျက် ကန်စွန်းဥပန်းကန်ကို တွင်းဝတွင်ချထားလိုက်သည်။

ထို့နောက်ခြေထောက်ကိုမြှောက်ကာ တွင်းပေါက်ထံလျှောက်သွားလိုက်တော့သည်။ သူ၏လက်များမှာ အိတ်ထဲသည်အတိုင်းထိုးထည့်ထားသည်ဟု ထင်ရသော်လည်း တကယ်တော့ဓါးတိုနှစ်ချောင်းကို တင်းကြပ်စွာဆုပ်ကိုင်ထားခြင်းပင်။ သူ မှောင်မည်းသော တွင်းပေါက်ထဲစူးစိုက်ကြည့်နေခဲ့သည်။ သူ၏ဘယ်ခြေထောက်မှာမူ ၀င်ပေါက်ဖက်ကိုမျက်နှာမူလျက်သား ထွက်ပြေးရန်အသင့်ပြင်ထားခဲ့သည်။

၁၀စက္ကန့်ကြာပြီးနောက် ထန်မော့လည်း ရင်းနှီးနေသောတစ်ခုခုရိုက်ခတ်သံကိုကြားလိုက်ရလေသည်။ ၄င်းမှာ အဝေးတစ်နေရာမှ ကြီးမားသောသတ္တ၀ါကြီးတစ်ကောင်လာနေသော အသံမျိုးပင်။ ကျဥ်းမြောင်းသောတွင်းထဲတွင် တဒုန်းဒုန်းအသံများက ကျယ်လောင်လာခဲ့ပြီး နံရံများကိုပင်တုန်လှုပ်စေခဲ့သည်။

ထန်မော့ဖြောင့်တန်းစွာရပ်နေရင်း မီတာ၂၀ခန့်အကွာမှ အနက်ရောင်အရိပ်ကြီးကိုလှမ်းမြင်လိုက်ရလေသည်။

၅မီတာခန့်အထိရောက်လာသောအခါတွင် လရောင်မှာ ထိုအရာကြီး၏အမွှေးအမျှင်များထံနောက်ဆုံးကျရောက်လာခဲ့ပြီး အနက်ရောင်များကထန်မော့၏မြင်ကွင်းထဲ၀င်လာခဲ့တော့သည်။

ထန်မော့နောက်သို့လှည့်ပြေးရန်တွန့်ဆုတ်မနေခဲ့။ သို့သော် လေချွန်သံကဲ့သို့ အသံတစ်ခုကို သူ၏ခေါင်းနောက်တွင် ကြားလိုက်ရသည်။

ထိုအနက်ရောင်မွန်းစတားကြီးမှာ မြေကြီးပေါ်မှ ကန်စွန်းဥကိုလှည့်တောင်မကြည့်ပဲ သွေးဆာနေသောအပြုံးကြီးဖြင့် ထန်မော့ထံ၀မ်းသာအားရ လက်လှမ်းလာခဲ့သည်။

အနက်ရောင်မွန်းစတားကြီး၏ တုန့်ပြန်မှုမှာ ထန်မော့ထက် အဆမတန်မြန်လွန်းနေခဲ့သည်။ ထန်မော့ တွင်းအပြင်ဘက်သို့ ခြေတစ်လှမ်းသာလှမ်းရသေးသော်လည်း ချွန်ထက်သောလက်သည်းများက သူ၏ရှေ့တွင် ပိတ်ထားခဲ့ချေပြီ။ ထန်မော့လည်းချက်ချင်းပင် ထိုင်ချကာ ထိုလက်လည်းများကိုရှောင်ရှားလိုက်ပြီး သူ၏လက်ကတော့ အိတ်ထဲမှ ဓါးများကိုဆွဲထုတ်လျက် ထိုမွန်းစတားကြီး၏မျက်လုံးကိုချိန်ရွယ်လိုက်သည်။

သူ ဓါးများပစ်ပေါက်ခြင်းကို အထူးလေ့ကျင့်ထားခြင်းမျိုးမရှိချေ။ ထိုဓါးများကိုရရှိစဥ်က အနည်းငယ်လေ့ကျင့်ထားသော်လည်း ယခု သူကအလွန်အလျင်လိုနေခဲ့သည်။ ၃ချောင်းကလွဲချော်သွားပြီး တစ်ချောင်းကသာ မွန်းစတားကြီး၏ ညာဖက်မျက်လုံးကို ထိမှန်းသွားခဲ့သည်။

ထိုမွန်းစတားကြီးကဘေးသို့စောင်းလိုက်စဥ် ထန်မော့လည်း အခွင့်အရေးရရှိသွားတော့သည်။ သူ မီးခြစ်ဆံကြီးကိုဆွဲထုတ်လိုက်ပြီး ထိုသတ္တ၀ါကြီး၏ကြီးမားသော လက်ကြီးကိုရိုက်ချလိုက်၏။

မွန်းစတားကြီးမှာ ထန်မော့ထိုမျှသန်မာမည်ဟု မမျှော်လင့်ထားပုံပင်။ ၄င်းကနောက်သို့တစ်လှမ်းဆုတ်လျက် သူ၏လက်သည်းများမှာတော့ ထန်မော့ထံမှ တားဆီးခံလိုက်ရလေသည်။

ကျိုးသွားသောလက်သည်းများနေရာမှ အနီရောင်တောက်တောက်သွေးများစီးကျလာတော့သည်။

အနက်ရောင်မွန်းစတားကြီးမှာ ဒေါသတကြီးအော်ဟစ်လျက် ထန်မော့ထံပြေး၀င်လာလေသည်။

ထန်မော့ မီးခြစ်ဆံကြီးကိုဝေ့ယမ်းလျက် နောက်သို့ဆုတ်လိုက်သည်။

ကြွက်ကြီးမှာ အလွန်ဥာဏ်ကောင်းလှသည်။ ၄င်းကသူ၏ကိုယ်ကြီးကို တွင်းပေါက်၀တွင်ပိတ်ထားကာ ထန်မော့အား ထွက်သွားခွင့်မပေးချေ။ တွင်းပေါက်ထဲမှ အလင်းရောင်ကနည်းလှကာ ထန်မော့မှာ တွင်းပေါက်အတွင်းပိုင်းသို့ တဖြည်းဖြည်းတွန်းပို့ခြင်းခံနေရသည်။ ဤကဲ့သို့ဆက်သွားနေပါက သူ့အနေနှင့်လွတ်မြောက်ရန် မဖြစ်နိုင်တော့ချေ။

ထန်မော့အံကိုကြိတ်လျက် ကြွက်ကြီးနောက်တစ်ကြိမ် လက်သည်းများကို ဆန့်ထုတ်လာစဥ် ၄င်းကို မရှောင်လိုက်တော့ချေ။

လက်သည်းများမှ အရှိန်ပြင်းစွာ လေကိုထိုးခွဲလာချိန် ထန်မော့မီးခြစ်ဆံကြီးကို တင်းတင်းဆုပ်ကိုင်ထားမိသည်။ ထိုလက်သည်းကြီးကျရောက်လာချိန်တွင် ထန်မော့အခွင့်အရေးတစ်ခုကိုရှာတွေ့လျက် ထိုလက်သည်းများကြားမှ အမြှောင်းလေးကို ရိုက်ချလိုက်သည်။

ကြွက်ကြီးမှာ နာကျင့်မှုကြောင့် ဒေါသတကြီးအော်ဟစ်လာပြန်သည်။

ထန်မော့က လက်သည်းများကို ချိုးပစ်ရုံသာ ရည်ရွယ်ထားသည်မျိုးမဟုတ်။ သူ မီးခြစ်ဆံကြီး၏ အားဖြင့် ကြွက်ကြီး၏ကိုယ်ပေါ်မှ ခုန်ကျော်လိုက်သည်။ ကြွက်ကြီးက သူ၏လက်မှ နာကျင်မှူကို လျစ်လျူရှူလျက် ထန်မော့ကို အမြန်ဖမ်းလိုက်သည်။

ထန်မော့သည်လည်း မြန်နိုင်သမျှ မြန်မြန်ပြေးလျက် တွင်းအပြင်သို့ပြေးနေစဥ် ကြွက်ကြီးကဒေါသတကြီးသူ့ကိုလိုက်ဖမ်းတော့သည်။

ဗြိ...

ချွန်ထက်သောလက်သည်းများက ထန်မော့၏၏အ၀တ်စများကို ဆွဲဖြဲသွားခဲ့ကာ အရေပြားတွင် သွေးစို့နေသော ခြစ်ရာတချို့ကိုချန်ရစ်ခဲ့သည်။

ထန်မော့တွင်းထဲမှခုန်ထွက်လိုက်ပြီး သူ၏တစ်ကိုယ်လုံးက မြေကြီးပေါ် တစ်ပါတ်ခန့်လိမ့်သွားခဲ့သည်။

ကြွက်မည်းကြီးက ဒေါသတကြီးအော်မြည်လျက် တွင်း၀မှထွက်မသွားပဲ ထန်မော့ကိုဒေါသတကြီးကြည့်နေခဲ့သည်။ သူသည်ဒဏ်ရာများကို စစ်ဆေးလိုက်ပြီး သိပ်မထိခိုက်ခဲ့သည်ကိုတွေ့လိုက်သည်။ ပြတ်ရှရာတချို့မျှသာ။ သို့သော်သူ၏အ၀တ်များမှာ စုတ်ပြဲသွားခဲ့ပြီး သူ၏ကျောမှာ ပြောင်သလင်းခါနေခဲ့သည်။

ခတ္တမျှအနားယူပြီးသည့်နောက် ထန်မော့မီးခြစ်ဆံကြီးကိုသုံးလျက် ထောက်ကန်ကာ တဲအိမ်ထဲပြန်သွားရန်ပြင်လိုက်သည်။

သူ၏ကံမှာသိပ်ဆိုးလှမည်မထင်ခဲ့ပေ။ ကြွက်မည်းပေါ်လာနိုင်နှုန်းမှာ ၂၀ရာခိုင်နှုန်းသာရှိသည့်တိုင် သူကြွက်မည်းနှင့် ထိပ်တိုက်တွေ့လိုက်ရသေးသည်။

ကြွက်မည်းကြီးက အမှန်တကယ်ကိုအလွန်သန်မာလွန်းလှသည်။ ၄င်း၏ခုခံမှုက တီကောင်ကြီးလောက် မမြင့်သော်လည်း တိုက်ခိုက်မှုကတော့ ပိုသာလေသည်။ ဥာဏ်ရည်လည်းမြင့်ကာ တိုက်ရည်ခိုက်ရည်လည်းရှိသည်။

သူ၏နောက်မှာတော့ ကြွက်မည်းကြီးမှ ၅ခုမြောက်တွင်းပေါက်၀မှ မာန်ဖီနေခဲ့သည်။ ထန်မော့ အသက်ကိုအမောတကောရှူလျက် လျှောက်သွားလိုက်သည်။

"အခွင့်အရေးက၅ပုံ၁ပုံပဲ၊ အနက်ရောင်မျှော်စင်ကငါ့ကို မလိမ်လောက်ဘူး၊ ဒီနေ့ငါ့ကံကသိပ်ဆိုးနေတာဖြစ်မယ်"

သူ လေးခုမြောက်တွင်းပေါက်ရှေ့မှ ဖြတ်သွားခဲ့သည်။

"ဒီနှစ်ရက်ထဲမှ ကြွက်မည်းနဲ့တွေ့နိုင်ချေ ၅ပုံ၁ပုံပုံရှိတယ်၊ မနက်ဖြန်တော့ ကံသိပ်မဆိုးလောက်ပါဘူး"

ထန်မော့တတိယတွင်းပေါက်ရှေ့မှအဖြတ်

ရုတ်ချည်းသူ၏ခြေလှမ်းတို့ရပ်တန့်သွားခဲ့သည်။ ထို့နောက်တောင့်တင်းစွာလှည့်လျက် သူ၏နောက်မှ တတိယတွင်းပေါက်ကို ကြည့်လိုက်မိသည်။

ထန်မော့မှာ တတိယတွင်းပေါက်မှ မြေကြီးကို ၃မိနစ်ခန့်စိုက်ကြည့်နေခဲ့သည်။ ထို့နောက်မီးခြစ်ဆံကြီးကိုပြန်ထည့်လိုက်ပြီး တတိယတွင်းပေါက်၀အား ငုံ့ကိုင်း၍ကြည့်လိုက်လေသည်။

မှောင်မည်းသောတောင်ကြားတွင် ကြွက်မည်းကြီး၏အော်သံကပဲ့တင်ထပ်လျက်။

တတိယတွင်းပေါက်၏မြေကြီးပေါ်တွင် အဖြူရောင်အမှုန့်တချို့က မြေကြီးနှင့်ရောနှောနေခဲ့သည်။ လရောင်ကဖြာကျလျက် ကြွေပန်းကန်၏အမှုန့်များက ထင်ရှားနေတော့သည်။

ထန်မော့တိုက်ရိုက်ပင်ဓါးကိုဆွဲထုတ်လိုက်ကာ တွင်းပေါက်ထဲမှ ကြွက်မည်းထွက်လာမလားလဲ စိုးရိမ်မနေတော့။ တတိယတွင်းပေါက်၀မှ အဖြူရောင်အမှုန့်များရောနှောနေသော မြေကြီးများကို တူးထုတ်လိုက်သည်။

ကံကောင်းသည်က မည့်သည့် ကြွက်မည်းသော်မျှ ထပ်ထွက်မလာတော့ချေ။ သူကထိုမြေကြီးထံမှ အဖြူရောင်အမှုန့်များကို ခွဲထုတ်လိုက်သည်။

ထို့နောက်အဖြူရောင်အမှုန့်များကို စုစည်းလိုက်သည်။

ထန်မော့မှာဘယ်သောအခါမှ ဤမျှလောက်အာရုံမစိုက်မိဖူးချေ။ အဖြူရောင်အမှုန့်များကို တစ်မှုန့်ချင်းစီစုစည်းနေရင်း သူ၏မျက်နှာမှာ အလွန်တည်ကြည်နေခဲ့သည်။ အဖြူရောင်အမှုန့်များသပ်သပ် မြေကြီးများသပ်သပ်ခွဲရန် ၁နာရီလောက်ပင် အချိန်ယူလိုက်ရသည်။

ပြီးသွားသည်နှင့် သူ၅ခုမြောက်တွင်းပေါက်ထံ အလျှင်အမြန်ပြေးသွားခဲ့သည်။

၁နာရီကြာသွားပြီးနောင် ထန်မော့နှင့်တိုက်ခိုက်ခဲ့သော ကြွက်မည်းအသံကိုလည်းမကြားရတော့ချေ။

ထန်မော့ ၅ခုမြောက်တွင်းပေါက်၀မှ မြေကြီးကိုငုံ့ကြည့်လိုက်သည်။

တွင်းပေါက်တစ်ခုစီတိုင်းက အချင်း၀က် သုံးမီတာခန့်ရှိသည်။ မနေ့ကထန်မော့သည် တွင်းပေါက်၏ဘယ်ဘက်အတွင်းတွင် ပန်းကန်ကိုချထားခဲ့သည်။ ယခုတွင်မူ တွင်းပေါက်၏ဘယ်ဘက်တွင်အဖြူရောင်အမှုန့်များမှာ မြေကြီးနှင့် ရောနှောနေခဲ့လေသည်။ သူယနေ့ချခဲ့သောပန်းကန်းသည်လည်း တွင်းပေါက်၏ အတွင်းဘက်တွင် အမှုန့်များအဖြစ် ကြေမွနေခဲ့သည်။

ယနေ့လည်း ကြွက်မည်းမှာ ကန်စွန်းဥကိုစားသွားခဲ့သည်။

အကယ်၍ထိုနေရာတွင် ထန်မော့ရှိနေလျှင် ကန်စွန်းဥကိုမစားပဲ သူ့ကိုသာတိုက်ခိုက်လိမ့်မည်။ လူမရှိလျှင်တော့ ကန်စွန်းဥကိုသာစားလိမ့်မည်။

ထန်မော့အတွင်းဘက်နက်နက်သို့လျှောက်သွားလိုက်ပြီး တွင်းထဲမှ လှုပ်ရှားသံတို့ကို နားစွင့်လိုက်သည်။ တချိန်ထဲမှာပင် ယနေ့ကြေမွသွားသော ပန်းကန်ပြားအမှုန့်များကို စုဆောင်းလိုက်သည်။

ထန်မော့ဦးစွာ ၅ခုမြောက်တွင်းပေါက်ထဲမှ ပန်းကန်ပြားမှုန့်များကို နှိုင်းယှဥ်ကြည့်လိုက်သည်။ ထို့နောက်တွင်တတိယတွင်းပေါက်မှ ပန်းကန်မှုန့်များကို တဖန်ကြည့်လိုက်ပြန်သည်။

သူ အမှုန့်၃ပုံးအား ဂရုတစိုက်နှိုင်းယှဥ်လိုက်သည်။

"လုံး၀အတူတူပဲ"

ထန်မော့မှာ မြေကြီးပေါ်မှ အမှုန့်၃ပုံကိုကြည့်လျက် လက်ချောင်းများကိုတင်းတင်းဆုပ်လိုက်မိသည်။ ဤအမှုန့်များမှာ ပန်းကန်များ ကြေမွရာမှ ထွက်လာခြင်းပင်။

တတိယတွင်းပေါက်မှ အဖြူရောင်အမှုန့်များမှာ မနေ့ကအထိ ထိုနေရာတွင်မရှိခဲ့သေးချေ။ မနေ့ကထန်မော့ တွင်းပေါက် ၉ပေါက်လုံးကို ဂရုတစိုက်စစ်ဆေးခဲ့သည်။ ၆နာရီထိုးပြီးသောအခါလည်း သူကထိုတွင်းပေါက်များကို နောက်တစ်ကြိမ်ထပ်မံစစ်ဆေးပြီး ပြောင်းလဲမှုမရှိကြောင်းအတည်ပြုခဲ့သည်။ ထို့ကြောင့် သူ ၅ခုမြောက်တွင်းပေါက်ကိုသာ ထပ်မံရွေးချယ်ခဲ့ခြင်းပင်။

"ကြွက်မည်းနဲ့ငါ ၅မိနစ်လောက်တိုက်ခိုက်ခဲ့ပြီးတော့ တွင်းအပြင်မှာ ၃မိနစ်လောက်နားခဲ့တယ်၊ ပြီးတော့ တတိယတွင်းပေါက်ကိုရောက်ဖို့မိနစ်၀က်ပဲကြာတယ်"

ထန်မော့စတင်တွက်ချက်လိုက်သည်။

"တတိယတွင်းပေါက်ကိုစစ်ဆေးတဲ့အချိန်ကိုပါ ပေါင်းလိုက်ရင်၆နာရီမထိုးခင် ၅မိနစ် ၆မိနစ်လောက်ပဲ၊ အလွန်ဆုံး ၁၅မိနစ်..."

၁၅မိနစ်အတွင်း တစ်စုံတစ်ယောက်က တတိယတွင်းပေါက်တွင် ပန်းကန်တစ်ခုလာချထားပြီး အမှုန့်ဖြစ်သည်အထိ ချေမွခံထားရသည်။

"ပန်းကန်ပြားပေါ် ကန်စွန်းဥတစ်ဥရှိခဲ့မှာပဲ၊ ကြွက်မည်းလက်ချက်ပဲနေမှာ"

ထန်မော့မီးခြစ်ဆံတက်တူးကြီးကို ဖိထားလျက် ဘေးပါတ်ပါတ်လည်ကိုကြည့်လိုက်မိသည်။

တောင်ခြေတွင် ကျယ်၀န်းသော အသီးအရွက်စိုက်ခင်းကြီးရှိသည်။ ညနက်နက်တွင် လရောင်ဖျော့ဖျော့က ကြွက်တွင်းများအပေါ်ဖျာကျလျက် ညလေပြေအေးက သုတ်ဖြူးနေခဲ့သည်။

ဘယ်သူမှမရှိဘူး...

လူတစ်ယောက်မှ မရှိဘူး...

သို့သော် ၆နာရီထိုးပြီး၍ ၁၅မိနစ်အတွင်းတွင် တစ်စုံတစ်ယောက်မှ တတိယတွင်းပေါက်တွင် ကန်စွန်းဥပန်းကန်ကို ချခဲ့ပြီး ၄င်းမှာလည်း ချေမွခံထားရသည်။ ထိုသို့ဆိုလျှင် ၅ခုမြောက်တွင်းပေါက်တွင် အဘယ်ကြောင့်ရွှေကြွက်ထွက်မလာသည်ကို ရှင်းပြပြီးသားဖြစ်သွားလိမ့်မည်။

သတ္တမအချက်: ကစားသမားနှင့်စားစရာကတစ်နေရာထဲတွင် အတူရပ်မနေလျှင် ရွှေကြွက်ပေါ်လာနိုင်သော ရာခိုင်နှုန်း သုည။

ကန်စွန်းဥမှာ တွင်းပေါက်နှစ်ခုတွင်ချထားခဲ့ပြီး ကစားသမားနှစ်ဦးမှာ တစ်နေရာထဲတွင် အတူတကွရပ်မနေခဲ့ကြချေ။ ရွှေကြွက်မည်သို့ပေါ်လာတော့မည်နည်း။

ထန်မော့မီးခြစ်ဆံကြီးကို တင်းတင်းဆုပ်ကိုင်လျက် လေထဲဝေ့ယမ်းလိုက်မိသည်။ မီးခြစ်ဆံကြီးမှာ တွင်းအနီးမှ ကျောက်တုံးကြီးအား ရိုက်မိလျက် ကျောက်တုံးကြီးမှာ အက်ကွဲသံက တွင်းထဲပဲ့တင်ထပ်သွားခဲ့သည်။ ထန်မော့မှာ အနက်ရောင်မျှော်စင်ကြောင့် ပေါက်ကွဲနေမိလေသည်။ သို့သော် အကယ်၍ အခြားကစားသမားတစ်ဦး သို့မဟုတ် မွန်းစတားတစ်ကောင် ပေါ်လာလိုပေါ်လာငြား ပါတ်၀န်းကျင်ကို အာရုံစိုက်ထားဆဲပင်။

သို့သော် ၅မိနစ်ကြာပြီးသည်အထိ ဘာမှဖြစ်မလာချေ။

ထန်မော့မီးခြစ်ဆံကြီးကို ပြန်သိမ်းလျက် မျက်မှောင်ကျုံ့လိုက်မိသည်။ ရုတ်ချည်းတစ်ခုခုကိုသတိရသွားမိပြီး ဘွားဘွား၀ံပုလွေကြီး၏အိမ်ထဲမှ မီးဖိုချောင်ထဲသို့ ပြေးသွားခဲ့သည်။

မီးဖိုချောင်စားပွဲပေါ်တွင် ပန်းကန်ပြား၉ချပ်ကို ထပ်ထားခဲ့သည်။ ဘွားဘွား၀ံပုလွေကြီးထွက်မသွားခင် ထုတ်ထားပေးခဲ့ခြင်းပင်။ ထန်မော့လည်း တွေးတောလျက် ထိုပန်းကန်၉ချပ်ဖြင့် ကန်စွန်းဥကိုထည့်ရမည်ဟု တွေးခဲ့သည်။

ယခု၂ရက်ကုန်လွန်သွားပြီဖြစ်၍ ပန်းကန်၂ချပ်လျော့သွားရပေမည်။

ထန်မော့ စားပွဲပေါ်မှ ပန်းကန်ပြားများကို အလျင်အမြန်ရေတွက်လိုက်သည်။

"၁ ၂ ၃ ၄ ၅..."

တစ်ချပ်မှ လျော့မနေဘူး...

🪩

Prev Next