Chapter 148
"နောက်တော့ ရွှီမိသားစုနဲ့ ယွမ်မိသားစုတို့ တိုက်ပွဲဖြစ်ကြတယ်ဆိုတာ ကျွန်မတို့ သိလိုက်ရတယ်။ တစ်ချို့က သတ္တုရိုင်းတွေကြောင့်လို့ ပြောတယ်။ ဒါပေမယ့် ကျွန်မ အဲဒါကို နားမလည်နိုင်ဘူး။ အဲ့ကိစ္စအတွက် တိုက်ခိုက်ကြတာဆိုရင် မော့ရှင်းမြို့မှာ ငြိမ်းချမ်းရေးအတွက် ညှိနှိုင်းဆွေးနွေးလို့ရတာပဲ။ ဒါ့ပြင် ရွှီမိသားစုကသခင်ကြီး ဒဏ်ရာရသွားတယ်လို့ သူတို့ပြောတဲ့အတွက် ရွှီမိသားစုက ဘာအကျိုးကျေးဇူးမှ မရှိဘူးထင်ပါတယ်။ သနားစရာပဲ… သူတို့က အရမ်းတော်တာမို့ အဲ့ဒီအပြင်လူတွေကို တွန်းလှန်နိုင်သင့်တယ်!" အဒေါ်၏အသံက နည်းနည်းတော့ တုန်လှုပ်သွားသည်။
"ပြောပြပေးတဲ့အတွက် အဒေါ်ကို ကျေးဇူးတင်ပါတယ်။"
"အင်း… မင်းတို့က ဖြတ်သွားရုံပဲဆိုတော့ မြန်မြန်ထွက်သွားသင့်တယ်။ လွန်ခဲ့တဲ့သုံးရက်က နှစ်ဖက်စလုံး ရန်ပွဲကြီးဖြစ်ကြတာကြောင့် အပြောင်းအလဲတွေဖြစ်ပေါ်လာတော့ ယွမ်မိသားစုက ပိုပြီးမောက်မာလာတယ်။ ရွှီမိသားစုက ဒီကိစ္စမှာ ကံမကောင်းရှာဘူး။ ဖြတ်သန်းသွားလာတဲ့ကျင့်ကြံသူတိုင်းကို ယွမ်မိသားစုကလိုက်ဖမ်းနေတာကြောင့် သတိထားသင့်တယ်။"
"ဖမ်းသွားတာလား?" ရွှီဇီယန်၏ မျက်လုံးများ လင်းလက်သွားပြီး "အဒေါ် အဲ့ဒါကရောဘာကြောင့်လဲ။"
အဒေါ်က ပတ်ပတ်လည်ကို ဂရုတစိုက်ကြည့်ရင်း အသံကို နိမ့်လိုက်ပြီး "ဒါကတော့ ကျွန်မသားက သူ့မျက်စိနဲ့ကိုယ်တိုင်မြင်ခဲ့တာ။ ဖြတ်သန်းသွားလာနေတဲ့ကျင့်ကြံသူအချို့ကို ယွမ်မိသားစုက ဖမ်းသွားခဲ့တယ်။ နောက်ပိုင်းမှာ သူတို့ ဘာအကျိုးအမြတ်တွေပေးခဲ့လဲ ကျွန်မမသိပေမယ့် အဲဒီကျင့်ကြံသူတွေက ရွှီမိသားစုကို စတင်တိုက်ခိုက်တော့တာပဲ။ မဟုတ်ရင် ရွှီမိသားစုက ဒီလောက်မြန်မြန်ကျရှုံးမှာမဟုတ်ဘူး။ ဒါကြောင့် အချိန်မရွေး အသက်ဆုံးရှုံးနိုင်သောကြောင့် သတိထားသင့်တယ်။ ဘယ်သူကမှ ဒီလိုမျိုးသေရေးရှင်ရေးတိုက်ပွဲမျိုးမှာ လွန်ဆွဲချင်ကြမှာမဟုတ်ဘူး။ ဒါကြောင့် တတ်နိုင်သမျှ မြန်မြန်ထွက်ဖို့ ကျွန်မတကယ်အကြံပြုတယ်။"
"အဒေါ်ရဲ့သတိပေးချက်အတွက် ကျေးဇူးတင်ပါတယ်။ ကျွန်တော်တို့ သေချာပေါက် သတိထားပါ့မယ်။" ရွှီဇီယန်က အဒေါ်ကိုပြုံးပြီး နှစ်သိမ့်ပေးကာ အဆင့်နိမ့်စိတ်ဝိညာဉ်ရေးကျောက်တုံးကို ပေးလိုက်သည်။
အဒေါ်ဟာ စိတ်ဝိညာဉ်ရေးကျောက်တုံးနှစ်တုံးဖြင့် ပျော်ရွှင်စွာ ထွက်ခွာသွား၏။ ဤအရာတို့သည် စိတ်ဝိညာဉ်ရေးကျောက်တုံး နှစ်ခုဖြစ်သည်။ ၎င်းတို့ကို ငွေဖြင့် အစားထိုးပါက သူတို့မိသားစုသည် နှစ်နှစ်ကြာ ရှင်သန်ရန် လုံလောက်ပေလိမ့်မည်။ ရိုးရှင်းသောမေးခွန်းအချို့ကိုဖြေဆိုခြင်းဖြင့် ၎င်းကိုရရှိခဲ့သည်။ ၎င်းဟာ အမှန်တကယ်ပင် တန်ဖိုးရှိပါသည်။
"အစ်ကိုဇီယန်…" ကျန်ရင်း ထိုသို့ခေါ်လိုက်သည့်အခါ၌ သူ့နောက်ကျောမှ လေအေးများကို ခံစားလိုက်ရသည်။ ကျန်ရင်းက သူ့အား အဲလိုခေါ်စေဖို့ ရွှီဇီယန်ဆုံးဖြတ်ခဲ့တာဖြစ်ပြီး သူ့ကို "သခင်ရဲ့အစ်ကို" လို့ မခေါ်စေချင်ခဲ့ဘဲ ဝမ်းနည်းစွာနဲ့ ရွှီဇီရုန်ကတော့ ဒီအခေါ်အဝေါ်ကို မကြိုက်ပါ။ သို့သော်လည်း ရွှီဇီယန်၏ ဖိနှိပ်မှုအောက်တွင် သူလုပ်နိုင်တာဆိုလို့ ကျန်ရင်းဆီသို့သာ ဖိအားများ လွှဲလိုက်ရုံရှိသည်…
ကျန်ရင်းဟာ အားသာချက် အားနည်းချက်များကို ခွဲခြမ်းစိတ်ဖြာပြီး ဤအခေါ်အဝေါ်ကို ဆက်လက်အသုံးပြုရန် ပြတ်ပြတ်သားသား ဆုံးဖြတ်ခဲ့သည်။ သခင်မုန်းတီးတာက ကြောက်စရာကောင်းပေမယ့် သူသာ ရွှီဇီယန်ကိုစော်ကားလိုက်ရင် နှစ်ဆမုန်းတီးခံရမည်ဖြစ်ပြီး မုန်းတီးမှု နှစ်ဆဖြစ်သွားလိမ့်မည်...
_(:3∠)_ ယနေ့ကာလကြီးမှာ တပည့်ဖြစ်ရတာ ခက်လိုက်တာ။ အမှားတစ်ခုခုကို အလွယ်တကူ လုပ်မိသွားနိုင်သည်။
ရွှီဇီယန်ဟာ ကျန်ရင်း၏တုံ့ပြန်မှုကိုမြင်လိုက်ပြီး ရွှီဇီရုန်အားခြိမ်းခြောက်ရန် ချက်ချင်း ကြည့်လိုက်သည်။
ရွှီဇီရုန်: "…"
"ဇီယန်… ငါတို့ အခု အိမ်ပြန်မှာလား။ ဒါမှမဟုတ်…?"
"ငါတို့ အခု ပြန်မသွားဘူး။ ရန်သူက ငါတို့ကို အမြဲတမ်း ဖမ်းထားနိုင်တယ်။ အခြေအနေကြည့်တာပေါ့။ ငါနဲ့ဇီရုန်က တောင်အနောက်ဘက်ကနေ ပြန်လာမယ်။"
"ကောင်းပြီ၊ ငါတို့ အခု တည်းခိုခန်းကို ပြန်ကြတော့မလား။"
ရွှီဇီယန် ခဏလောက်တွေးပြီး "ထားလိုက်တော့။ ခုနက အဒေါ်ပြောခဲ့တဲ့စကားအတိုင်းဆိုရင် ဒီယွမ်မိသားစုက ငါတို့မိသားစုနဲ့ တိုက်ပွဲဖြစ်တော့မယ်။ အခုအချိန်မှာ ငါတို့ပြန်သွားရင် မိသားစုနှစ်ခုစလုံးရဲ့အာရုံစိုက်မှုက ငါတို့ဆီပိုရောက်လာနိုင်တယ်။" အဲ့ဒီနောက် ဇီရုန်ကို ကြည့်လိုက်၏။
ရွှီဇီရုန်က ခေါင်းခါလိုက်ပြီး "ဘယ်သူမှ ကျွန်တော်တို့ကို အာရုံမစိုက်ဘူး။ ဒါပေမယ့် အခု နယ်မြေနှစ်ခုရဲ့စွမ်းအားက အတူတူပါပဲ။ နှစ်ဖက်စလုံးက ခြုံခိုတိုက်ခိုက်ချင်တာကြောင့် ဘယ်သူမှ အရင်မထွက်ရဲကြဘူး။ ဒါပေမယ့် ကျွန်တော်တို့ တည်းခိုခန်းထဲမှာနေရင် ရှောင်ဖို့ တော်တော်ခက်လိမ့်မယ်။"
"ဒီလိုဆိုရင် … မြို့ပြင်ကို အရင်ထွက်ရအောင်။ အေးအေးဆေးဆေး စောင့်ဆိုင်းဖို့ နေရာရှာမယ်။ အခြေအနေပေါ်မူတည်ပြီး ဘာလုပ်ရမလဲဆိုတာ စောင့်ကြည့်မယ်။"
"ကောင်းပြီ။"
ဆွေးနွေးပြီးနောက် အားလုံးက တူညီသည့်လမ်းကို လျှောက်လာကြသည်။ မြို့တံခါးကိုဖြတ်သွားသောအခါ၊ ရွှီဇီရုန် အနည်းငယ်မျက်မှောင်ကြုတ်သွားပြီး သူ၏လက်ချောင်းထိပ်များကို တစ်ချက်လှုပ်ရှားလိုက်ကာ လေပေါ်က မိုးစွေငှက်ဆီသို့ သွေးတစ်စက်ကျသွား၏။ မိုးစွေငှက်သည် ချက်ချင်းပြုတ်ကျပြီး လူလတ်ပိုင်းအရွယ် အမျိုးသားတစ်ဦးသည် မြို့အရှေ့ဘက်ရှိ ခြံဝင်းကြီးတစ်ခုထဲ၌ သွေးများ ပါးစပ်ထဲကနေထွေးထုတ်ကာ အော်ဟစ်လိုက်သည်။
"ဘာဖြစ်တာလဲ?" လူလတ်ပိုင်းအရွယ် အမျိုးသားတစ်ဦး ဒဏ်ရာရရှိသွားသည်ကို ယွမ်မိသားစု၏အကြီးအကဲထံ အမြန်သတင်းပို့လိုက်သည်။ ဆံပင်ဖြူအဘိုးအိုတစ်ယောက်က အမြန်ပြေးလာပြီး လူလတ်ပိုင်းအရွယ် အမျိုးသားကို မေးလေ၏။
"လေးစားရပါသော အကြီးအကဲ၊ ယနေ့ မြို့တွင်း ကင်းလှည့်ရန် မိုးစွေငှက်ကို လွှတ်ထားပေမယ့် မြို့တံခါးဝတွင် ထူးဆန်းတဲ့ကျင့်ကြံသူအနည်းငယ်ကို တွေ့လိုက်ရတယ်။ အဲဒီလူတွေရဲ့ ကျင့်ကြံခြင်းအဆင့်က တော်တော်မြင့်တယ်။ သူတို့ထဲက တစ်ယောက်က ကျွန်တော့်ကို အမြန်ရှာဖွေတွေ့ရှိပြီး ကျွန်တော့်ရဲ့ မိုးစွေငှက်ကို သတ်ပစ်လိုက်တယ်။" လူလတ်ပိုင်းအရွယ် အမျိုးသားက တလေးတစားပြောလေသည်။
"ဟင်? ထူးဆန်းတဲ့ကျင့်ကြံသူလား။ သူက ရွှီမိသားစုကိုကူညီဖို့လာခဲ့တာဖြစ်နိုင်မလား။" အဘိုးအို၏ မျက်လုံးများ မှိတ်တုတ်မှိတ်တုတ်ဖြစ်နေပြီး သူ့မျက်လုံးများထဲတွင် ပြင်းထန်သော ခံစားချက်တစ်ခု ပေါ်လာသည်။
"ကျွန်တော်မသိဘူး။ သူတို့က လူလေးယောက်ဆိုတာကိုပဲ ကျွန်တော့်ရဲ့ မိုးစွေငှက်က မြင်လိုက်တယ်။ သူတို့ရဲ့ ကျင့်ကြံခြင်းအဆင့်ကို ကျွန်တော် သေချာမသိပေမယ့် သူတို့က မြို့ပြင်ကို ထွက်သွားတာဆိုတော့ ဒီနေရာရဲ့အခြေအနေကို သိသွားတာကြောင့် ရှောင်ချင်ကြတာဖြစ်နိုင်တယ်။"
"ဟန့်… သူတို့က ဖြတ်သွားသည်ဖြစ်စေ၊ မသွားသည်ဖြစ်စေ၊ သူတို့ ဒီကိုရောက်လာခဲ့ပြီးဆိုမှတော့ ယွမ်မိသားစုဆီကို တခါမှ မလာတာက ငါ့မိသားစုကို နှိမ့်ချတယ်လို့ ဆိုလိုတာပဲ!" အဘိုးအိုက သရော်လိုက်ပြီး "သူတို့အနောက်ကိုလိုက်ဖို့ လူအနည်းငယ် စေလွှတ်ဖို့ ယွမ်ချီကိုပြောလိုက်။"
လူလတ်ပိုင်းအရွယ် အမျိုးသားက အဘိုးအိုကို ချီတုံချတုံဖြင့်ကြည့်ကာ နောက်ဆုံးတွင် တိတ်တိတ်ဆိတ်ဆိတ် သက်ပြင်းချကာ ဘာမှ မပြောတော့ပေ။ ကျင့်ကြံသူများကို အတင်းအကြပ်ဖမ်းဆီးသော အဘိုးအို၏လုပ်ရပ်ကို သူသဘောမကျသော်လည်း ယွမ်မိသားစုတွင် သူသည် နိမ့်ကျသောရာထူးသာရှိတာကြောင့် အကြီးအကဲတစ်ဦးကို ငြင်းခုံခြင်းမပြုနိုင်ပါ။
တုတ်ခိုင်သောယောင်္ကျားကြီးတစ်ယောက်သည် ချီစွမ်းအင်စုဆောင်းမှုအဆင့်ရှိ ကျင့်ကြံသူလေးဦးကို အဖိုးအိုထံ ခေါ်ဆောင်လာစဥ် လူလတ်ပိုင်းအရွယ်အမျိုးသားကတော့ တိတ်တဆိတ်ကြည့်နေခဲ့သည်။ မော့ရှင်းမြို့၏ အနီးနားရှိ နေရာများတွင် ပေါ်လာသော လူများသည် အများအားဖြင့် အခြေခံကျင့်ကြံခြင်းအဆင့်အောက်သို့ ရောက်နေသည့် ကျင့်ကြံသူများသာဖြစ်ကြသည်။ ယွမ်ချီသည် ထိုတာဝန်ကိုလုပ်ဆောင်ရာတွင် အလွန်အကျွမ်းတဝင်ရှိသော်လည်း သူသတိထားနေဆဲဖြစ်ပြီး ချီစွမ်းအင်စုဆောင်းမှုအဆင့်ရှိ ကျင့်ကြံသူလေးဦးနှင့်သာ ဆောင်ရွက်နေဆဲဖြစ်သည်။
ဆံပင်ဖြူအဘိုးအိုသည် ယွမ်ချီ၏ သတိထားတတ်သည့်စိတ်ကို အလွန်ကျေနပ်နေ၏။ မကြာမီ စစ်ပွဲကြီးဖြစ်လာတော့မည်။ အကယ်၍ သူသည် မြို့ပြင်သို့ အခြေခံကျင့်ကြံခြင်းအဆင့် ကျင့်ကြံသူအား လွှတ်လိုက်လျှင် ရွှီမိသားစု၏ ခြုံခိုတိုက်ခိုက်ခြင်းကို ခံရနိုင်သော်လည်း ချီစွမ်းအင်စုဆောင်းမှုအဆင့် ကျင့်ကြံသူများကတော့ ပြဿနာမဟုတ်ပါ။ အမှန်တော့ ရွှီမိသားစုတွင် ရွှေအမြုတေအဆင့်ကျင့်ကြံသူနှစ်ဦးသာရှိပြီး ၎င်းတို့အနက်မှတစ်ဦးဟာ လွန်ခဲ့သောနှစ်နှစ်ကမှ ဖြတ်ကျော်နိုင်ခဲ့သည့် သခင်ကြီးဖြစ်တာကြောင့် ယွမ်မိသားစု၏ကျင့်ကြံသူအား ချောင်းမြောင်းတိုက်ခိုက်ရန် မဖြစ်နိုင်ပါ။
"သွားတော့" ဆံပင်ဖြူအဘိုးအိုက သူ့လက်ကို ဝှေ့ယမ်းလိုက်ပြီး "ဒီနေရာလေးတွေက ငါ့ယွမ်မိသားစုရဲ့ပုံစံကို ကျင့်ကြံသူတွေမြင်ပါစေ။ ငါ့ယွမ်မိသားစုဆီမှာ အမှုထမ်းဆောင်ရတာ သူတို့အတွက် ကောင်းချီးတစ်ခုပဲ!"
ယွမ်ချီက ဦးညွတ်လိုက်ပြီး ကျင့်ကြံသူလေးဦးနှင့်အတူ ထွက်ခွာသွားသည်။
ဆံပင်ဖြူအဘိုးအိုက မသွားခင် လူလတ်ပိုင်းအရွယ် အမျိုးသားကို နည်းနည်း ပိုအားပေးခဲ့၏။ လူလတ်ပိုင်းအရွယ်အမျိုးသားသည် ဆံပင်ဖြူအဘိုးအို၏ နောက်ကျောကိုကြည့်ကာ ကူရာမဲ့စွာ တိတ်တဆိတ်ပြုံးနေခဲ့သည်။ သူသည် ယွမ်မိသားစုကို အခြေချရာနေရာအဖြစ် ရွေးချယ်ခဲ့တာဆိုတော့ သူရွေးချယ်တာ မှားများမှားသွားသလား။
"တစ်ယောက်ယောက် လိုက်နေတယ်။" ရွှီဇီယန်၏ အာရုံဖြန့်ကျက်ခြင်းစွမ်းအားသည် ကျယ်ကျယ်ပြန့်ပြန့်ရှိခဲ့ပြီး မကြာမီ သူတို့နောက်လိုက်နေသော ယွမ်မိသားစုမှ စေလွှတ်သောကျင့်ကြံသူအား တွေ့ရှိခဲ့သည်။
"ဒီယွမ်မိသားစုက တကယ်ကို သောင်းကျန်းတာပဲ။ ငါတို့အားလုံးက ထွက်သွားသလို ဟန်ဆောင်ခဲ့ပေမယ့် သူတို့က ငါတို့အနောက်လိုက်ချင်နေသေးတာလား။" ကျန်ရင်းက သူ့မေးစေ့သူ ပွတ်ရင်း အနည်းငယ် အံ့သြသွားသည်။
ရွှီဇီရုန် သရော်လိုက်ပြီး "သူတို့လာဖို့ဆန္ဒရှိရင် လာခဲ့လိုက်လေ။ ငါတို့ကလည်း ကြိုပြီး သတ်လို့ရတာပေါ့။"
ရွှီဇီယန်ကတော့ စကားတစ်ခွန်းမှ မပြောပေမယ့် သူ၏အမူအရာတွေအရဆိုလျှင် ရွှီဇီရုန်ဘက်ကို ရှင်းရှင်းလင်းလင်း ထောက်ခံ၏။ သူနှင့် ရွှီရှောင်သည် သားအဖအရ ခိုင်မာသော ဆက်ဆံရေးမျိုး မရှိသော်လည်း ရွှီရှောင်ဟာ ရုပ်ပိုင်းဆိုင်ရာအရ သူ့ကို ကျေနပ်စေသည်။ သံယောဇဉ်ကို မဖော်ပြနိုင်သော်လည်း သူဟာ ရွှီမိသားစုကို ကျေးဇူးတင်နေဆဲဖြစ်ပြီး ရွှီမိသားစုအား မည်သူ့ကိုမျှ စော်ကားခွင့်မပြုနိုင်ပါ။
ယွမ်ချီသည် ကျင့်ကြံရေးသမားများကို ခေါ်ဆောင်ကာ သူ၏ဓားပျံဖြင့် ထူးဆန်းသော ကျင့်ကြံရေးသမားများ၏ လမ်းကြောင်းအတိုင်း လိုက်လာသည်။
သူ၏ ထူထဲသော မျက်ခုံးနှစ်ဖက်သည် အလွန်နီးကပ်နေပြီး ယခု ရွှီမိသားစုနှင့် တိုက်ပွဲက နီးလာပြီဖြစ်၍ သူ၏အကြီးအကဲက ထိုသို့သော တာဝန်ကို ထမ်းဆောင်ခွင့်ပေးလိုက်သည့်အတွက် သူ့စိတ်ထဲ၌ အနည်းငယ် တုန်လှုပ်သွားသလို ခံစားလိုက်ရသည်။
ယွမ်မိသားစု၏ တပည့်တစ်ဦးအနေဖြင့်လည်း ယွမ်မိသားစုတွင် အမွေဆက်ခံပိုင်ခွင့်ရှိသည်။ ယခုအခါတွင် ယွမ်မိသားစု၏အကြီးဆုံးသားသည် သူ၏စိတ်ဝိညာဉ်သွေးကြောများ ဖျက်ဆီးခံထားရပြီး အမှိုက်သာသာဖြစ်ကြောင်း လူတိုင်းသိကြတာကြောင့် မျိုးနွယ်စုခွဲမှ တပည့်ငယ်များအားလုံးက သူ့နေရာ၌ အစားထိုးရန် ရန်မူနေကြသည်။
ယွမ်ချီသည်လည်း ၎င်းတို့အထဲမှ တစ်ဦးသာဖြစ်ပြီး အကြီးအကဲ၏တူဖြစ်သူသည် သူ၏ပြိုင်ဘက်ဖြစ်ကြောင်းကိုလည်း သူသိ၏။ ယခုတော့ အကြီးအကဲက သူ့အား ထိုသို့သောတာဝန်ကိုထမ်းဆောင်ရန် စေလွှတ်လိုက်သောအခါ၊ ယွမ်ချီအား ရွှီမိသားစုအမည်ဖြင့် ဖယ်ရှားရန်နည်းလမ်းတစ်ခုဖြစ်ကြောင်း သိသာထင်ရှားသည်။
"ဟန့်" ယွမ်ချီဟာ အေးစက်စွာ နှာမှုတ်လိုက်ပြီး ရုတ်တရက် ပျံသန်းခြင်းကို ရပ်လိုက်၏။
ကျင့်ကြံသူလေးယောက်သည် သူ့အနောက်၌ရပ်ပြီး ယွမ်ချီကို နားမလည်စွာ ကြည့်နေ၏။
"သခင်လေး… ဘာဖြစ်လို့လဲ။" ယွမ်ချီနှင့် တာဝန်တစ်ခုတွင် ပါဝင်နိုင်သူများသည် ပုံမှန်အားဖြင့် သူ၏လူယုံများသာဖြစ်ပြီး အဖွဲ့ကိုဦးဆောင်သူမှ အသံတိုးတိုးဖြင့် မေးလေ၏။
"အဖိုးကြီးက ငါတို့ကို ဒီပို့လိုက်တာအတွက် စိတ်ညစ်နေရုံပါ။" ယွမ်ချီဟာ ဆံပင်ဖြူအဘိုးအိုနှင့် ပတ်သက်၍ သူ၏မကျေနပ်မှုများကို ဖုံးကွယ်မထားဘဲ မဆုတ်မနစ် ကျိန်ဆဲနေသည်။
ဦးဆောင်သူဟာ ခေတ္တတိတ်ဆိတ်နေပြီး "သခင်လေး အဲဒီလို မတွေးပါနဲ့။ သူက ခေါင်းဆောင်ရဲ့ယုံကြည်စိတ်ချရသူဖြစ်ပြီး ကျင့်ကြံသူတွေကိုဖမ်းဖို့ အမိန့်ပေးခဲ့တဲ့ကျွန်တော်တို့ရဲ့အကြီးအကဲပါ။"
အကြီးအကဲဆိုသည့် အမည်ကိုကြားပြီးနောက်၊ ယွမ်ချီဟာ ချက်ချင်း သတိထားအနေအထားဖြစ်သွားပြီး "ဒါပေမယ့် အဲ့ဒါက ရွှီမိသားစုကို အဲ့ဒီကျင့်ကြံသူတွေကို အသုံးမပြုစေချင်လို့လေ။ ထွက်သွားပြီဖြစ်တဲ့သူတွေကို ငါတို့က ဘာကြောင့် ပြဿနာသွားရှာရမှာလဲ။"
ဦးဆောင်သူသည် ခနဲ့တဲ့တဲ့ပြုံးပြီး နှာခေါင်းကိုတို့ထိကာ အခြားဘာမျှ မပြောတော့ပေ။
ယွမ်ချီက မကျေမနပ်ဖြစ်ပြီး "သူတို့ရဲ့အဓိကဂိုဏ်းက လော်ယွီဂိုဏ်းရဲ့သခင်လေးကို စော်ကားခဲ့ပြီးနောက်၊ ငါတို့ယွမ်မိသားစုရဲ့ စုဆောင်းငွေတစ်ဝက်လောက် ဆုံးရှုံးသွားတယ်။ ယခု သူတို့တွေက မော့ရှင်းမြို့မှာရှိနေတာကြောင့် ဆယ်စုနှစ်အနည်းငယ်ကြာပြီးရင် သူတို့တွေပြန်လည်ကောင်းမွန်လာနိုင်တယ်။ ငါတို့ရဲ့အကြီးအကဲတွေက ဘာတွေတွေးနေမှန်းကိုမသိဘူး။ ရွှီမိသားစုနဲ့ ဘာလို့တိုက်နေရတာလဲ။ ယွမ်မိသားစုက ဒီလိုညစ်ပတ်တဲ့မြို့လေးမှာ ဆက်နေနိုင်မယ်လို့ မင်းတကယ်ထင်လား။"
"ဖြစ်ကောင်းဖြစ်နိုင်ပါတယ်… ခေါင်းဆောင်မှာလည်း သူစဉ်းစားထားတာ ရှိမှာပါ။" ဦးဆောင်သူက တိုးတိုးလေးပြောလိုက်၏။
"သူစဉ်းစားနေတဲ့အရာကလည်း စိတ်ပျက်စရာပဲ… ရွှီမိသားစုဆီမှာ တစ်ခုခုရှိလို့တဲ့လား။ အဲ့ဒါကို ဘယ်လိုခေါ်တယ်… ဟမ်၊ အဲ့ဒါရဲ့နာမည်ကဘာကြီးလဲ။"
"မသေမျိုးအဆင့်သို့တက်လှမ်းနိုင်ခြင်း"
"အင်း… အင်း… မသေမျိုးအဆင့်သို့တက်လှမ်းနိုင်ခြင်းပဲ။ ဘယ်ကောင်ဖွလိုက်လဲတော့ မသိဘူး။ ဒါပေမယ့် စိတ်ဝိညာဉ်သွေးကြောမရှိတဲ့သူက အဲ့ဒီအပေါ်မှာ လျှောက်သွားမယ်ဆိုရင် စိတ်ဝိညာဉ်သွေးကြောရှိလာနိုင်တယ်တဲ့။ ချီး… မင်းတို့ရော ယုံလား။ ဒီအရာက တကယ်ပဲ အစွမ်းထက်တယ်ဆိုရင် ရွှီမိသားစုက ဒီလိုစုတ်ပြတ်နေတဲ့မြို့မှာ ပုန်းနေပါ့မလား။ အဲ့ဒီဂိုဏ်းကြီးတွေကသာ ဒီရတနာအကြောင်းသိရင် ရွှီမိသားစုဆီကနေ မျက်နှာသာရဖို့ ဒါမှမဟုတ် ရတနာရဖို့ ရွှီမိသားစုအာလုံးကိုသတ်ပစ်ဖို့ ကြိုးစားလိမ့်မယ်။ အဲ့ဒါတွေက တစ်ခုမှ မဖြစ်သေးတဲ့အတွက် ဒီသတင်းက အလိမ်အညာပဲ။"
ယွမ်ချီသည် စိတ်ပျက်အားငယ်နေပုံရပြီး ဉာဏ်ပညာနှင့် ရဲရင့်သောခေါင်းဆောင် ဘယ်မှာရှိသနည်းဟု တွေးမိသည်။ သူ့ရဲ့ငတုံးသားငယ်အတွက် ဤကဲ့သို့ ရယ်စရာကောင်းသောသတင်းကို သူမည်သို့ယုံကြည်နိုင်ရတာလဲ။
ထို့အပြင် သူ့ရဲ့ငတုံးသားငယ်က စိတ်ဝိညာဉ်သွေးကြောများကို သူ့ဟာသူဖျက်ဆီးပစ်ခဲ့တာကို၊ သူ့မှာ မရှိခဲ့တာမှ မဟုတ်တာ။ အကယ်၍ မသေမျိုးအဆင့်သို့တက်လှမ်းနိုင်ခြင်းကို သူရှာတွေ့သွားရင်တောင် အသုံးမဝင်ပါဘူး။
ယွမ်ချီ သက်ပြင်းချလိုက်ပြီး အသံမထွက်ဘဲ သူ့ဆံပင်တွေကိုဆွဲဆောင့်ကာ ဓားပျံပေါ်မှာ ထိုင်ချလိုက်သည်။ သူပြန်သွားရန်လည်း ရည်ရွယ်ချက်မရှိသလို လိုက်ဖမ်းရန်လည်း ရည်ရွယ်ချက်မရှိပေ။
သူ့အနောက်ကနေလိုက်လာသည့် ကျင့်ကြံရေးသမားတစ်ယောက်က အသံတိုးတိုးဖြင့် မေးလေ၏။
"သခင်လေး… ကျွန်တော်တို့ သူတို့အနောက်ကိုလိုက်ဦးမှာလား။"
"ချီး… သေအောင်သွားလိုက်,လိုက်။ ငါစိတ်မဝင်စားတော့ဘူး။ ဒီနေရာက ရွှီမိသားစုနဲ့ သိပ်မဝေးဘူး။ တိုက်ပွဲကြောင့် ရွှီမိသားစုက အနှောင့်အယှက်ပေးလာရင် ငါတို့တွေ ဒီမှာပိတ်မိနေလိမ့်မယ်။ အကြီးအကဲဆန္ဒအတွက်ကြောင့် ငါဒါကိုလုပ်ပေးနေတာ။ ကျင့်ကြံရေးသမားတွေက ရွှီမိသားစုထဲဝင်သွားတာကြောင့် ငါတို့ မဝင်နိုင်ဘူးလို့ နောက်မှပြောလိုက်မယ်။"
ယွမ်ချီဟာ စိတ်ပျက်လက်ပျက်နဲ့ ပြောလိုက်၏။
အခြားကျင့်ကြံရေးသမားများသည်လည်း တစ်ယောက်ကိုတစ်ယောက်ကြည့်လိုက်ကြပြီး အားလုံးနှုတ်ဆိတ်နေကြသည်။ သူတို့အားလုံးဟာ ယွမ်ချီဂိုဏ်း၏ ကျင့်ကြံသူများဖြစ်ကြပြီး ၎င်းတို့တွင် ယွမ်ဟူသောမျိုးရိုးအမည်မရှိသော်လည်း ယွမ်ချီဆီ၌ နှစ်ရှည်လများကတိသစ္စာပြုခဲ့ကြသည်။ ယွမ်ချီ၌ ဆိုးရွားသည့်နေ့ရက်တွေရှိနေသ၍ သူတို့မှာလည်း ဆိုးရွားသည့်နေ့ရက်တွေရှိမှာမို့ ဘယ်သူမှ အမှန်တရားကို အကြီးအကဲအား မပြောရဲကြပါ။
"ဟမ်? ရပ်သွားကြပြီ။" ရွှီဇီယန်ဟာ သူ၏အာရုံဖြန့်ကျက်ခြင်းစွမ်းအင်ကို အသုံးပြု၍ ရုတ်တရက် ရပ်သွားသည်ကို တွေ့လိုက်ရသည်။ ရပ်တန့်ဖို့ မဆုံးဖြတ်ခင်မှာ သူတို့တွေ တစ်ခုခုပြောနေကြတာကြောင့် သူနည်းနည်းတော့ ပဟေဋ္ဌိဖြစ်သွားရသည်။
"သူတို့ ဘာတွေပြောနေတာလဲ။" ကျန်ရင်းက စိတ်ဝင်တစားမေးလာသည်။
ရွှီဇီယန် ခေါင်းယမ်းလိုက်၏။ သူ၏အာရုံဖြန့်ကျက်ခြင်းစွမ်းအင်ကို အဝေးမှကြည့်ရှုရန်အတွက်သာ အသုံးပြုနိုင်တာကြောင့် အလွန်နီးကပ်စွာ မနေနိုင်ပေ။ ထို့အပြင် ချီစွမ်းအင်စုဆောင်းမှုကျင့်ကြံသူသာ သူ့ကိုမြင်သွားပါက ဘေးအန္တရာယ်ရှိလာနိုင်သည်။
အချိန်အတော်ကြာအောင်စောင့်ပြီးနောက် တစ်ဖက်အဖွဲ့က နီးကပ်လာခြင်းလည်းမရှိသလို ထွက်သွားခြင်းလည်းမရှိဘဲ လှည့်ပတ်နေသေးသည်။
"သူတို့တွေ ငါတို့ကို ရှာတွေ့သွားပြီလား။" ရွှီဇီယန်က ရွှီဇီရုန်ကို သံသယဖြစ်စွာ ကြည့်လိုက်သည်။
ရွှီဇီရုန် ခဏလောက်စဉ်းစားလိုက်ပြီး ခေါင်းကိုညင်ညင်သာသာ ခါလိုက်ရင်း "မဖြစ်နိုင်ပါဘူး။"
သူဟာ ပြိုင်ဘက်၏ကျင့်ကြံခြင်းအဆင့်ကို အခြေခံ၍ ဤခန့်မှန်းချက်ကို ပြုလုပ်ခဲ့ခြင်းဖြစ်သည်။ ထိုသူသည် ချီစွမ်းအင်စုဆောင်းမှုအဆင့် ကျင့်ကြံသူသာဖြစ်ပြီး သူ၏အာရုံဖြန့်ကျက်ခြင်းစွမ်းအင်ကလည်း ပိုညံ့ဖျင်းသောကြောင့် ရွှီဇီယန်သာ ရည်ရွယ်ချက်ရှိရှိ ပုန်းအောင်းနေလျှင် သူတို့ကို ရှာတွေ့ရန် ခဲယဉ်းလှသည်။
ထို့အပြင် ၎င်းတို့ထဲ၌ အချို့သော အထူးကျွမ်းကျင်မှုများရှိပြီး သူတို့၏ ခြုံခိုတိုက်ခိုက်ခြင်းကို အချိန်မီတွေ့ရှိပါက ၎င်းတို့သည် မမြင်ဟန်ဆောင်ကာ ထောင်ချောက်ဆင်ရန် လှည့်ကွက်အချို့ကို အသုံးပြု၍ သို့မဟုတ် ရိုးရိုးပြန်ဆုတ်သွားမည်ဖြစ်သည်။ တစ်နေရာတည်းမှာ လှည့်ပတ်နေတယ်ဆိုတာက ဘာကိုလိုချင်တာလဲ။
"သူတို့...သွားပြီ?" ရွှီဇီယန်က သံသယရှိစွာပြောလိုက်၏။
ကျန်သုံးယောက်ကလည်း တစ်ယောက်ကိုတစ်ယောက် စိုက်ကြည့်ရုံမှအပ မတတ်နိုင်ပါ။ ဤယွမ်မိသားစုက ဘာအဓိပ္ပါယ်လဲ။ လူတွေအများကြီး စုဆောင်းပြီးနောက် လိုက်နေတာ ရပ်တန့်သွားပြီး စကားတစ်ခွန်းမှ မပြောဘဲ ပြန်သွားကြတာ ဘာကြောင့်လဲ။
သူတို့ဘာတွေတွေးနေလဲဆိုတာ သိဖို့ခက်ခဲလှသည်...
"ဘာပဲဖြစ်ဖြစ် ယွမ်မိသားစုတွေးနေတာကို ဂရုမစိုက်နဲ့။ ငါတို့အတွက် အနားယူဖို့ နေရာရှာရအောင်။ ညကျမှ စောင့်ကြည့်ကြစို့။" ရွှီဇီယန် ကူကယ်ရာမဲ့စွာ ပြောလိုက်၏။
ယွမ်မိသားစု၏စိတ်ထဲ၌ ဘာတွေဖြစ်နေလဲဆိုတာကို သိချင်ရုံသာရှိတာမို့ စိတ်အရှုပ်ခံပြီး ရှာဖွေဖို့ သူစိတ်မ၀င်စားဘူး။ ယင်းအဒေါ်ဖြစ်သူက သူ့ကို အမှန်အတိုင်းပြောနေသလားတောင် မသေချာဘူး။ ရွှီနဲ့ ယွမ်မိသားစုက ရန်ဖြစ်နေတာတော့ သေချာသည်။ ဘာအကြောင်းကြောင့်ပဲဖြစ်ဖြစ် ရွှီမိသားစုအတွက် စဉ်းစားရမည်။
ရွှီဇီယန်ဟာ ငြိမ်းချမ်းစွာ ပေါင်းသင်းဆက်ဆံရန် သို့မဟုတ် အရင်းအမြစ်များကို မျှဝေရန်နဲ့ပတ်သက်ပြီး ဂရုမစိုက်ပါ။ ကျင့်ကြံခြင်းလောကတွင် ကောင်းမွန်သည့်သတ္တုသွေးကြောသည် ကျင့်ကြံသူများအတွက် ရတနာများ သို့မဟုတ် လက်နက်များကဲ့သို့ အဖိုးတန်လှပါသည်။
ဘယ်သူကမှ ရတနာတွေ ပေးလှူတယ်ဆိုတာ တစ်ခါမှ မကြားဖူးဘူး။
ဟုတ်ပါတယ်၊ အဖွဲ့နှစ်ခုရဲ့အင်အားက တူညီနေတယ်ဆိုရင် မျှဝေခြင်းဟာ ဆိုးရွားသည့်အကြံအစည်တစ်ခုတော့ မဟုတ်ပါဘူး။ သို့သော် ယွမ်မိသားစုသည် မော့ရှင်းမြို့သို့ တစ်နှစ်မျှသာ ရောက်ဖူးပြီး ရွှီမိသားစု၏ သတ္တုသွေးကြောများကို လုယူချင်နေပြီ။ သို့ဆိုလျှင် ၎င်းတို့အောင်မြင်သွားပါက မြို့၏အရှင်သခင်က ပြောင်းလဲသွားမည်မဟုတ်ပါလား။
ဒါကြောင့် ဒီအရာကိုတော့ လုံးဝသည်းမခံနိုင်ဘူး။
တိုတောင်းသောတစ်နေ့တာသည် လျင်မြန်စွာ ကုန်ဆုံးသွား၏။ ညအချိန်ရောက်သောအခါ ရွှီဇီယန်ဟာ ကျန်ရင်းနှင့် အခြားလူများကို ခေါ်ဆောင်ပြီး ရွှီမိသားစု၏အနောက်ဘက်တောင်သို့ ရောက်ရှိလာသည်။
ရွှီမိသားစု၏အနောက်ဘက်တောင်သည် သစ်တော၊ပင်လယ်နှင့် ကပ်လျက်ရှိပြီး ရွှီမိသားစု၏ တပည့်များကျင့်ကြံရန် နေရာကောင်းဖြစ်သည်။
ရွှီဇီယန်ဟာ ဤတောတောင်ပင်လယ်ပြင်တွင် အကြိမ်ပေါင်းမရေမတွက်နိုင်အောင်ရှိခဲ့ပြီး ၎င်းနေရာနှင့် သဘာဝအတိုင်း အလွန်ရင်းနှီးနေ၏။ လမ်းလျှောက်သွားရင်း လေ့ကျင့်ရေးခန်းမနောက်က တောင်တန်းအနောက်ဘက်တွင် ချောက်ကမ်းပါးကို တွေ့လိုက်သည်။
မြင့်မားသောကျောက်နံရံကိုကြည့်ရင်း၊ ရွှီဇီယန် ရှုပ်ထွေးသောခံစားချက်များကို ခံစားရ၏။ သူနှင့် ဇီရုန်သည် ပထမဆုံးအကြိမ် ကြိုးပေါ်မှ လျှောဆင်းသောအချိန်က သူတို့သည် အသက်ဆယ့်နှစ်နှစ်သာ ရှိသေးပုံရသည်ဟုထင်သည်။ မျက်စိတစ်မှိတ်အတွင်းမှာပင် ကိုးနှစ်ကျော်ကြာခဲ့ပြီ။ ရှစ်နှစ်သားဇီရုန်သည် ယခုအခါ အရွယ်ရောက်နေပြီဖြစ်ပြီး အချိန်တွေက ကုန်လွန်သွားခဲ့ပြီ။
ကျန်ရင်းနဲ့ တခြားသူတွေကို ချောက်ကမ်းပါးတစ်ဝိုက်မှ ခေါ်ဆောင်သွားပြီး ရွှီမိသားစု၏အိမ်နောက်ဖေးတံခါးကို လျှောက်သွားပြီးနောက်၊ ရွှီဇီယန် တံခါးခေါက်သည့်အချိန်၌ သူ၏နှလုံးခုန်သံဟာ လှုပ်ရှားနေပြီး ရပ်တန့်သွားသည်။
"ဘာဖြစ်လို့လဲ?" ရွှီဇီရုန်က မေး၏။
ရွှီဇီယန်က သူ့မေးစေ့သူ ပွတ်လိုက်ပြီး
"မော့ရှင်းမြို့တစ်ဝိုက်ရဲ့ တစ်ဧက သုံးပုံတစ်ပုံရဲ့ ဧရိယာနီးပါးက ငါတို့ ရွှီမိသားစုရဲ့ ထိန်းချုပ်မှုအောက်မှာရှိတယ်။ ယေဘုယျအရ၊ ယွမ်မိသားစုက ငါတို့ရဲ့သတ္တုသွေးကြောကို ရှာဖွေတွေ့ရှိတယ်ဆိုတဲ့ အကြောင်းပြချက်မျိုးမရှိဘူး။ အမှန်တော့ သူတို့ဒီကိုရောက်တာ တစ်နှစ်တောင်မပြည့်သေးဘူး။ ငါတို့ရဲ့တွင်းထွက်သတ္တုကြောတွေအကြောင်း သူတို့သိတာက တိုက်ဆိုင်မှုတစ်ခုတော့မဖြစ်နိုင်ဘူးလေ မဟုတ်ဘူးလား။"
ရွှီဇီရုန်၏မျက်လုံးများ လင်းလက်သွားပြီး
"သစ္စာဖောက်များရှိနေတာလား။"
"ဘယ်ပြောနိုင်မလဲ။ သတိထားတာက အကျိုးမယုတ်ပါဘူး။" ရွှီဇီယန် ပခုံးတွန့်ပြလိုက်ပြီး ကျန်ရင်းနှင့် အခြားသူများကို ဦးစွာပုန်းစေခိုင်းလိုက်ပြီးနောက် ကုဗတုံးကို အကာအကွယ်ယူကာ ရွှီမိသားစု၏ခြံဝင်းထဲသို့ နံရံပေါ်မှ တိတ်တဆိတ်တက်ကာ ဝင်သွားသည်။
ရင်းနှီးသောပတ်ဝန်းကျင်တစ်ခုဖြစ်သော်လည်း မတူညီသောပတ်ဝန်းကျင်တစ်ခုဖြစ်နေ၏။ စစ်ပွဲတွေဖြစ်လာတာနဲ့အမျှ ရွှီမိသားစုရဲ့ ခြံဝင်းဟာ အရမ်းတင်းမာနေပုံရပြီး ခြေလှမ်းအနည်းငယ်လှမ်းတိုင်း နေရာတစ်နေရာစီ၌ စောင့်ကြပ်နေသည့်လေ့ကျင့်ရေးသမားတစ်ယောက်ရှိသည်။ ရွှီမိသားစုသည် ယွမ်မိသားစု၏ စွမ်းအားကို အလွန်သတိထားနေခဲ့သည်မှာ ထင်ရှားသည်။ သို့မဟုတ်လျှင် ၎င်းတို့သည် ခြုံခိုတိုက်ခိုက်ခြင်းမှ ကာကွယ်ရန် လူများစွာကို စည်းရုံးထားမည်မဟုတ်ကြောင်း ထင်ရှားပါသည်။
ရွှီဇီယန်ဟာ ရွှီရှောင်၏ ခြံဝင်းအတွင်းသို့ တိတ်တဆိတ် ခိုးဝင်လာခဲ့သည်။ ပြန်မလာဖြစ်တာ ခြောက်နှစ်လောက်ရှိပြီဆိုတော့ နည်းနည်းတော့ ရှုပ်ထွေးနေပြီး မူးဝေသွားသည်။
"ဘယ်သူလဲ?!" ကျယ်လောင်သော အော်ဟစ်သံနှင့်အတူ ပြတင်းပေါက်အပြင်ဘက်တွင် ရွှေရောင်အလင်းတန်းများ လင်းလက်လာသည်။
ရွှီဇီယန် ထိတ်လန့်သွားပြီး ဘေးကနေအမြန်ရှောင်ထွက်ကာ တိုးတိုးလေးပြောလိုက်၏။
"အဖေ… ကျွန်တော်ပါ"
"ဇီယန်?" ရွှီရှောင်ဟာ စူးရှသော မျက်လုံးတစ်စုံဖြင့် သူ၏စာကျက်ခန်းထဲမှ ထွက်လာသည်။
သူ့သားဖြစ်သူဟာ သူ့အရှေ့၌ ရုတ်တရက်ပေါ်လာတာကို မြင်လိုက်ရတော့ ရွှီရှောင် အိပ်မက်မက်နေသလို ခံစားလိုက်ရ၏။ ဇီယန်ဟာ လျှိုကွမ်းဂိုဏ်းမှာ ကျင့်ကြံနေသင့်တာမဟုတ်ပါလား။ ရုတ်တရက် သူဘယ်လိုလုပ်ပြန်လာရတာလဲ။
"မင်း!" ကြည့်နေတာ အနည်းငယ်ကြာသွားပြီးနောက် ရွှီရှောင်၏အမူအရာသည် သိသိသာသာပြောင်းလဲသွားသည်။ သူဟာ လျင်မြန်စွာ လျှောက်သွားကာ သူ့လက်ကို မြှောက်လိုက်ပြီး ရွှီဇီယန်၏သွေးကြောများကို စမ်းလိုက်သည်။
ရွှီဇီယန် ပြန်တိုက်ရန်တွန်းအားကို အတင်းအကျပ် ထိန်းချုပ်ကာ ဒီလူဟာ သူ့အဖေဖြစ်ကြောင်းကို သူ့ကိုယ်သူသတိပေးလိုက်၏… အနည်းဆုံးတော့ ထိုသူသည် သူ့ခန္ဒာကိုယ်၏ ဖခင်အရင်းဖြစ်သည်။ စိတ်ပိုင်းဆိုင်ရာ တွယ်တာမှု မရှိခဲ့သော်ငြားလည်း သူသည် တရားဝင်ဖခင်ဖြစ်ဆဲပင်။ သူ့သားကို ဒုက္ခပေးစရာ အကြောင်းမရှိဘူး။ ဒါကြောင့် စိတ်ကို ဖြေလျှော့ပြီး မတုံ့ပြန်တာ ပိုကောင်းပါသည်။ သူဟာ ခရမ်းရောင်မိုးကြိုးသွားကို ရုတ်တရက် လွှတ်လိုက်လျှင် အဆုံးမဲ့ဒုက္ခများ ရှိလာပေလိမ့်မည်။
ထပ်ခါထပ်ခါသတိပေးပြီးနောက်၊ နောက်ဆုံးတွင် သူဟာ ရွှီရှောင်ကို လှုပ်ရှားမှုပြုလုပ်ရန် အမှန်တကယ် မလုပ်ဆောင်ခဲ့ပါ။ ရွှီရှောင်သည် ရွှေအမြုတေအစောပိုင်းအဆင့်သို့ ရောက်ရှိနေပြီဖြစ်သော်လည်း သူဖက်ကနေ ရွှီဇီယန်ကိုစတင်တိုက်ခိုက်ပါက သူ့အတွက် ကောင်းမွန်မည်မဟုတ်ပေ။
ရွှီရှောင်၏စိတ်ဝိညာဉ်စွမ်းအားသည် ရွှီဇီယန်၏ကိုယ်ခန္ဓာအတွင်းရှိ ကျင်းလော့တစ်လျှောက်တွင် ပျံ့လွှင့်သွားပြီး သူ့ခန္ဓာကိုယ်၌ လျှို့ဝှက်ထားသည့်အန္တရာယ်မရှိဟု အတည်ပြုပြီးနောက် စွမ်းအားကို ရုပ်သိမ်းလိုက်သည်။
သူက ရွှီဇီယန်ကို မယုံကြည်သောအကြည့်ဖြင့် ကြည့်ကာ "မင်းက ဝိညာဉ်ကြောချဲ့ထွင်ခြင်းနှောင်းပိုင်းအဆင့်ကိုတောင် ရောက်နေပြီလား။ မင်း ဘယ်လိုလုပ် မြန်မြန် တိုးတက်လာရတာလဲ။" ရွှီဇီယန် မဖြေခင်မှာပင် သူ၏မျက်နှာအမူအရာက မည်းမှောင်သွားပြီး "မင်းရဲ့သွေးကြောတွေကို စမ်းလိုက်တာနဲ့ မင်းဘာလို့ မခုခံရတာလဲ။"
ရွှီဇီယန်: "..."
ရွှီရှောင်က အေးစက်သော မျက်နှာဖြင့် ပြော၏။ "ကျင့်ကြံရေးသမားတစ်ယောက်အတွက် သွေးကြောတွေက အဓိကသော့ချက်ဆိုတာ မင်းသိပါတယ်။ မင်းအဖေဖြစ်နေရင်တောင်မှ ထိတွေ့ခွင့်မပေးသင့်ဘူး။ ကျင့်ကြံခြင်းလောကမှာ သေးငယ်သောအကျိုးအမြတ်အတွက် လူများစွာက တစ်ဦးနှင့်တစ်ဦး သစ္စာဖောက်ကြတာ သိသလား။ ဒါကြောင့် မင်းအဖေက ဒီလိုမလုပ်ဘူးဆိုတာကို မင်းဘယ်လိုသေချာသိမလဲ။"
ရွှီဇီယန်: "..."
ရွှီရှောင်က ဆက်လက်၍ သူ့အားအပြစ်တင်၏။ "မင်းအဖေက မင်းကို အန္တရာယ်ပြုဖို့ မရည်ရွယ်ဘူးဆိုရင်တောင် မင်း ဘယ်လိုလုပ် အကာအကွယ်မဲ့စွာ နေနေရတာလဲ။ အကယ်၍များ အဖေက ထိန်းချုပ်ခံထားရရင် ဘယ်လိုလုပ်မလဲ။ လူတစ်ယောက်ကို ထိန်းချုပ်ဖို့ နည်းလမ်းဘယ်နှစ်သွယ်ရှိလဲဆိုတာ မင်းသိလား။ မင်းဒီလိုပုံစံမျိုးနဲ့ ရွှီမိသားစုရဲ့ ခေါင်းဆောင်ဖြစ်နိုင်ပါ့မလား။"
သူက စိတ်အားထက်သန်စွာ အခိုင်အမာယုံကြည့်နေသည့် အမူအရာဖြင့်ပြော၏။
"ဇီယန်… မင်းက မငယ်တော့ဘူး။ ငယ်ငယ်ကလိုပဲ မင်းဘာလို့ အကာအကွယ်မဲ့သလို နေနေသေးတာလဲ။ မင်းအဖေပဲဖြစ်ဖြစ်၊ အခြားတစ်ယောက်ပဲဖြစ်ပါစေ၊ မင်းရဲ့သွေးကြောတွေကို ဘယ်သူ့ကိုမှ လွယ်လွယ်နဲ့ မကိုင်ခိုင်းရဘူးဆိုတာ သတိရပါ။" အဆုံးတွင် ရွှီရှောင်၏ လေသံဟာ အလွန်စူးရှလာသည်။
ရွှီဇီယန်သည် အားကိုးရာမဲ့ပုံစံဖြစ်နေပြီး သူတိတ်တိတ်လေး ခေါင်းညိတ်လိုက်၏။
ရွှီရှောင်ဟာ ဖခင်ကောင်းမဟုတ်သော်လည်း အနည်းဆုံးတော့ သူသည် တာဝန်သိတတ်သူဖြစ်၏။
ရွှီရှောင်ဆီမှ ဖခင်ကဲ့သို့ ချစ်ခြင်းမေတ္တာမျိုးကို ရှာဖွေရန် မဖြစ်နိုင်ပေ။ ရွှီဇီယန်သည် ရွှီရှောင်အား အချစ်ဟူသည်ကို သိခြင်းရှိ၊မရှိ သံသယဝင်မိသည်။
ရွှီဇီယန်အား ဆုံးမပြီးနောက် ရွှီရှောင်က မျက်မှောင်ကြုတ်ကာ
"လျှိုကွမ်းဂိုဏ်းကနေ ဘာလို့ပြန်လာတာလဲ။ ဘာဖြစ်လာလို့လဲ။"
ရွှီဇီယန်က ခေါင်းယမ်းလိုက်ပြီး သူ့ဆရာသခင်ရဲ့သူငယ်ချင်း၏ အခမ်းအနားတစ်ခုတက်ဖို့ ဝူတျီမြို့ကို သွားရင်း ဒီကိုလမ်းကြုံဖြတ်ဝင်လာတာလို့ သူ့အဖေကို ပြောလိုက်၏။
ရွှီရှောင်၏နှလုံးခုန်သံ လှုပ်ခတ်သွားပြီး
"ဝူတျီမြို့? သူတို့တွေက တစ်ချိန်က တောကောင်တွေရဲ့ တိုက်ခိုက်မှုကို ခံခဲ့ရတာမဟုတ်ဘူးလား။"
ရွှီဇီယန်ဟာ မီးလျှံမိစ္ဆာနယ်မြေထဲသို့ ဆွဲသွင်းခံရပြီးတာ လအတော်ကြာပြီဖြစ်ကြောင်း ရုတ်တရက် သဘောပေါက်သွားပြီး ဤတောကောင်များ၏ ဝိုင်းရံမှုမှာ ကြီးကြီးမားမား ဖြစ်ရပ်တစ်ခုဖြစ်တာကြောင့် ထိုသတင်းသည် နေရာအနှံ့အပြားသို့ ပျံ့နှံ့သွားခဲ့၏။
သူခေါင်းညိတ်လိုက်ပြီးနောက် ရွှီရှောင်ရဲ့မျက်လုံးထဲတွင် စိုးရိမ်သည့်အရိပ်အယောင်ရှိနေပြီး "မင်းဒဏ်ရာ ရသွားသေးလား။"
"မရပါဘူး။" ရွှီဇီယန် ခေါင်းယမ်းလိုက်သည်။
ရွှီရှောင် ခေါင်းညိတ်လိုက်ပြီး "မင်းပြန်လာတယ်ဆိုတော့ မင်းညီကိုရော မတွေ့ပါလား။" အေးစက်သော မျက်နှာထားနှင့် ဇီယန်အနားကပ်ရတာကို နှစ်သက်သော ကလေးလေးကို သူမှတ်မိနေသေး၏။ သူ့အကြောင်းပြောရရင် ဇီရုန်ကို ဇီယန်၏လေ့ကျင့်ရေးပစ်မှတ်ဖြစ်လာစေချင်ခဲ့ပေမယ့် အခုတော့ သူက ဇီယန်၏လက်ထောက်ဖြစ်လာပြီပဲ။
ဟုတ်ပါသည်၊ သူ အဲဒီကလေးကို သိပ်သဘောမကျဘူး။ သူ့အမေကြောင့် ဇီရုန်ကို သူ့နည်းနည်း မုန်းနေသေးပေမယ့် ဇီရုန်ကလည်း သူ့သွေးသားဖြစ်တာကြောင့် သူဘယ်လိုအခြေအနေရှိလည်းဆိုတာ သိရမည်။
"ဇီရုန်က အပြင်မှာ။ ကျွန်တော့်သူငယ်ချင်းနှစ်ယောက်လည်းပါလာတယ်။" ဇီယန်ဖြေလိုက်၏။
#TK
