Chapter 117

Volume 6 : အားကစားပြိုင်ပွဲများ

Chapter 117 (အားကစားပြိုင်ပွဲ ၀၈)

အားကစားကွင်းက ထွက်လာတော့ စာကြည့်တိုက်ထဲမှာ နေ့လယ်သာရှိသေးသည်။ ယွဲ့ရှင်းဝမ်သည် သူ့အဖွဲ့ဝင်များကို နေ့လယ်စာစားရန် ကန်တင်းသို့ ခေါ်သွားပြီး ခဏလောက် အနားယူဖို့ အိပ်ဆောင်ကို ပြန်သွားကြသည်။ နေ့လယ် 2 နာရီတွင် ရေအားကစားပြိုင်ပွဲအတွက် ပြင်ဆင်ရန် အနုတ်ခြောက်ထပ်ရှိ အားကစားရုံသို့ ထပ်မံရောက်ရှိလာသည်။

စာကြည့်တိုက်အားကစားပြိုင်ပွဲသည် ရေကူးခြင်း၊ ရေငုပ်ခြင်း၊ ရွက်လွှင့်ခြင်း၊ လှေလှော်ခြင်းစသည်ဖြင့် အမျိုးမျိုးသော ရေကစားနည်းများ ပါဝင်သည်။ 183 သုတေသနအဖွဲ့၏အဖွဲ့ဝင်အများစုမှာ ရေမကူးတတ်သူများဖြစ်ပြီး ရေအားကစားပြိုင်ပွဲများအတွက် လျှောက်ထားခြင်းမရှိပေ။ လင်းမန့်လော်နှင့် ကျိုဖုန်းတို့ကသာ ရေကူးခြင်း အမျိုးအစား လေးမျိုးကို စာရင်းသွင်းခဲ့သည်။

သူတို့ဟာ ဟွာအန်းတက္ကသိုလ်မှာရှိစဉ်တုန်းက ကျောင်း၏ရေကူးအသင်းအဖွဲ့ဝင်များဖြစ်သည်။ စီနီယာအစ်မမန့်လော်သည် ငယ်စဉ်ကတည်းက ရေကူးတတ်သည်ဟု ပြောခဲ့တာကြောင့် ကျိုဖုန်းကလည်း သူ့ရည်းစားအတွက် အထူး‌သင်ယူခဲ့သည်။

ယွဲ့ရှင်းဝမ်သည် ပြိုင်ပွဲအတွက် စာရင်းမသွင်းထားသော်လည်း ကျိုဖုန်းနှင့် လင်းမန့်လော်တို့ကို အားပေးရန် အချိန်မတိုင်ခင် သူ၏အဖွဲ့ဝင်များကို အားကစားရုံသို့ ခေါ်ဆောင်ခဲ့သည်။

ရေကူးပြိုင်ပွဲမှာ ပါဝင်သူအရေအတွက်က ပြေးခုန်ပစ်ပြိုင်ပွဲထက် အများကြီးနည်းပါသည်။ ကျောင်းသားအများစုသည် ယွဲ့ရှင်းဝမ်ကဲ့သို့ ရေမကူးတတ်သူများဖြစ်ပြီး ယှဉ်ပြိုင်ရန် ရေထဲသို့ မသွားရဲကြပေ။ ထို့ကြောင့် ကျိုဖုန်းနှင့် လင်းမန့်လော်တို့သည် နောက်ဆုံးအဆင့်သို့ အောင်မြင်စွာ တက်ရောက်နိုင်ခဲ့သည်။

ကံမကောင်းစွာဖြင့် သူတို့တွင် နေရာရွှေ့ပြောင်းခြင်းစွမ်းရည်များမရှိသလို၊ ခန္ဓာကိုယ်ကြံ့ခိုင်မှုအပိုဆုရရှိသော အားကစားကျောင်း၏ ကျောင်းသားများနှင့်လည်း နှိုင်းယှဉ်၍မရဘဲ အုပ်စုA၏ အမြန်နှုန်းအပိုဆုလည်း မရှိတာကြောင့် နောက်ဆုံးတွင် လင်းမန့်လော်သည် သူမ၏ရေကူးအားကို အားကိုးပြီး အဓိကအချိန်တွင် သူမထက်မြန်သောပြိုင်ဘက်များကို နွယ်ပင်များဖြင့် ချည်နှောင်ခဲ့သည်။ အလွတ်စတိုင်နှင့် ပက်လက်ကူးပြိုင်ပွဲများတွင် ကြေးတံဆိပ်နှစ်ခုရရှိခဲ့သည်။ ကျိုဖုန်းက သူမနှင့်အတူ ပြိုင်ပွဲဝင်ခဲ့ပေမယ့် ဘာဆုတံဆိပ်မှ မရရှိခဲ့ပေ။

သို့ပေမယ့် သူတို့ပြန်လာသောအခါ အလွန်ပျော်ရွှင်နေကြသေးသည်။

ခယ်ရှောင်ပင်းက စိတ်ခံစားမှုဖြင့် ပြောသည်။

"လူသားတွေရဲ့ ပျော်ရွှင်မှုနဲ့ ဝမ်းနည်းမှုတွေက ဘယ်လိုမှ ဆက်စပ်မှုမရှိဘူး… စုံတွဲတစ်တွဲရဲ့ ပျော်ရွှင်မှုဟာ single dog ‌တွေရဲ့ ဝမ်းနည်းမှုပါပဲ…"

ရှင်းယန်က ပေါ့ပါးစွာ ဆိုသည်။

"ဘာလဲ? မင်းက ချစ်ချင်နေတာလား?"

ခယ်ရှောင်ပင်းက သူ့မျက်မှန်ကိုပင့်တင်ပြီး လေးနက်စွာ ပြောသည်။

"ဟင့်အင်း… ငါက ရှောင်ထူနဲ့အတူ ရှိနေတာပဲ ကျေနပ်ပြီ… ငါက မင်းတို့ကိုပြောနေတာ…"

သူ့ဘေးနားရှိ အဖွဲ့ဝင်များ: "…"

အတန်းဖော်၊ မင်းအရိုက်ခံချင်နေတာလား!

လန်ယာရုန်က မျက်ခုံးပင့်လိုက်ပြီး ပြောသည်။

"ရှောင်ခယ်၊ နင်ကငါ့ကို အရပ်ဘက်ရေးရာဗျူရိုကို ခေါ်ပြီး နင်နဲ့ ရှောင်ထူကို လက်ထပ်ခိုင်းစေချင်တာလား?"

ခယ်ရှောင်ပင်းက ချက်ချင်းပင် တည့်တည့်မတ်မတ်ထိုင်လိုက်ပြီး စိတ်ရောကိုယ်ပါ အမူအရာဖြင့် ပြောလိုက်သည်။

"မလိုဘူး၊ ကျေးဇူးတင်ပါတယ် စီနီယာအစ်မ… လူသားတွေက စက်ရုပ်တွေနဲ့ မတူပါဘူး၊ ကျွန်တော်တို့က မျိုးပွားမှုကို သီးသန့်ခွဲခြားထားပြီး လက်ထပ်လို့မရဘူး…"

ရှင်းယန်: "…" ဒီနေ့တစ်နေ့လုံး ဒီကောင်ရဲ့စိတ်က ဘာတွေဖြစ်နေတာလဲ?

မကြာခင်မှာပဲ ကျိုဖုန်းနှင့် လင်းမန့်လော်တို့ ပြန်ရောက်လာသည်။ လင်းမန့်လော်သည် ယွဲ့ရှင်းဝမ်းအား ကြေးတံဆိပ်နှစ်ခုကို လွှဲပြောင်းပေးခဲ့သည်။

"တောင်းပန်ပါတယ်၊ ငါ ကြေးတံဆိပ်နှစ်ခုပဲ ယူခဲ့နိုင်တယ်… ရှင်းဝမ်၊ ဘယ်သူက credit မှတ်လဲလှယ်ဖို့ လိုအပ်သလဲဆိုတာ ကြည့်ပြီး ဖြန့်ဝေလိုက်ပါ…"

ယွဲ့ရှင်းဝမ်က ဆုတံဆိပ်ကိုလက်ခံပြီး အပြုံးဖြင့် ပြောသည်။

"စီနီယာအစ်မက နိမ့်ချပြန်ပြီ… အားကစားကျောင်းရဲ့ ကျောင်းသားတွေနဲ့ယှဉ်ပြီး ဆုတံဆိပ်တွေယူနိုင်တာက အရမ်းတော်နေပါပြီ…"

ကျိုဖုန်း: "မိုးလုံလေလုံ ရေအားကစားပြိုင်ပွဲ ပြီးပြီမလား? ငါတို့ အပြင်ထွက်ရတော့မယ်…"

ခယ်ရှောင်ပင်းက ခေါင်းလှည့်ပြီး မေးသည်။

"ချင်မြောင်နဲ့ ချင်လုတို့လည်း နှစ်ယောက်တွဲလှေလှော်အတွက် စာရင်းသွင်းထားကြတယ်မလား?"

ချင်လု: "ဟုတ်တယ်၊ တစ်ဦးချင်းနဲ့ နှစ်ယောက်တွဲက အရင်ဆုံးဖြစ်ပြီး အဖွဲ့လိုက်လှေလှော်က နောက်ဆုံးပဲ… ရှင်းဝမ်၊ ငါတို့ ဘယ်လိုစီစဉ်ကြမလဲ?"

ယွဲ့ရှင်းဝမ်က အဖွဲ့လိုက်လှေလှော်ခြင်း၏ စည်းမျဉ်းများကို ဂရုတစိုက်ကြည့်ရှုခဲ့သည်။

ယခုတစ်ကြိမ် အဖွဲ့လိုက်လှေလှော်ခြင်းသည် လူ 8 ‌ဦး လှေလှော်ခြင်းပုံစံဖြစ်သည်။ လှေလှော်၏ ဘယ်ဘက်နှင့် ညာဘက်တွင် လှော်တက် 4 ခုစီပါရှိပြီး ရှေ့မှနောက်သို့ စီစဉ်ထားကာ လှေလှော်အဖွဲ့တွင် ပါဝင်ရန် လူ 9 ဦး လိုအပ်သည်။ ၎င်းတို့အနက်မှ လှေလှော်မည့် လူ 8 ယောက်က လှေအတွင်းထဲ၌ လှေကိုထိန်းရန် လက်နှစ်ဖက်ဖြင့် လှော်တက်များကို ကိုင်ကြရမည်။ ပဲ့ကိုင်တစ်ဦးသည် ပဲ့ပိုင်း သို့မဟုတ် လှေဦးပေါ်တွင် တစ်ယောက်တည်းထိုင်ကာ လှေလှော်နေသည့်လမ်းကြောင်းကို ထိန်းချုပ်ရန် ဝါယာတက်မကြိုးကို အသုံးပြုသည်။ 

လှေလှော်ရာတွင် လှေလှော်သူ 8 ဦးသည် လှေလှော်မည့် လမ်းကြောင်းဆီသို့ နောက်ပြန်လှည့်ကာ လှေလှော်ရန် လိုအပ်သည်။ ပဲ့ထိန်းသည် လှော်ခတ်မည့် လှေအနောက်ဘက်တွင် ထိုင်ကာ ရှေ့ဦးတည်ရာသို့ ဦးတည်ထားသည်။

အဖွဲ့ဝင်များက နောက်ပြန်ထိုင်ပြီး လမ်းကြောင်းကို မမြင်နိုင်သည့်အတွက် ပဲ့ထိန်းက လမ်းညွှန်ချက်ကို ဆုပ်ကိုင်ပြီး လှော်တက်၏စည်းချက်အတိုင်း အမိန့်ပေးရန်လိုအပ်သည်။

ယွဲ့ရှင်းဝမ်က ခဏလောက်စဉ်းစားပြီး ပြောသည်။

"အရင်က ငါတို့ လက်ဆင့်ကမ်းပြိုင်ပွဲမှာ နောက်ဆုံး တန်ပြန်တိုက်စစ်နဲ့ ချန်ပီယံဆုကို ဆွတ်ခူးနိုင်ခဲ့လို့ ဒီတစ်ကြိမ် နောက်ဆုံးကို တမင်တကာ ပြုတ်ကျခဲ့မယ်ဆိုရင် အခြားအဖွဲ့တွေရဲ့ အာရုံစိုက်မှုကို ဆွဲဆောင်နိုင်ပြီး အမျိုးမျိုးသော ထိန်းချုပ်မှုစွမ်းရည်တွေနဲ့ ငါတို့ကို မိတ်ဆက်နိုင်တယ်…" 

လျှိုကျောက်ချင်း: "ဆုမရဘဲ နောက်ကျကျန်ခဲ့တဲ့အဖွဲ့တွေလည်း ငါတို့ကို ပစ်မှတ်ထားနိုင်တယ်မလား?"

ယွဲ့ရှင်းဝမ်က ခေါင်းငြိမ့်သည်။

"ဟုတ်တယ်၊ ဘာပဲဖြစ်ဖြစ် သူတို့လည်း ဆုမရနိုင်တော့ 183 သုတေသနအဖွဲ့ကို နှောင့်ယှက်တာက စိတ်ဝင်စားစရာပဲလို့ သူတို့ထင်လိမ့်မယ်…"

လျှိုကျောက်ချင်း: "ဒါဆို လှေလှော်ပြိုင်ပွဲမှာ နောက်ကျကျန်အောင် ကစားတာက အသုံးမဝင်တာကြောင့် ရှေ့ကို တည့်တည့်သွားမှာလား? အဲဒါက အခြားလူတွေရဲ့ ပစ်မှတ် မဖြစ်သွားစေဘူးလား?"

ယွဲ့ရှင်းဝမ်က ရှင်းပြသည်။

"ဒီလိုပြိုင်ပွဲမျိုးမှာ ချန်ပီယံဆုရဖို့ နည်းလမ်းနှစ်ခုရှိတယ်… ပထမတစ်ခုက ရှေ့က လက်ဆင့်ကမ်းပြိုင်ပွဲမှာ သုံးတဲ့နည်းပဲ… စစချင်းမှာ နောက်ကျကျန်ပြီး လူတွေကို အခြားအဖွဲ့တွေဆီ အာရုံစိုက်စေပြီးတော့ ငါတို့ရဲ့ဖြစ်တည်မှုကို လျစ်လျူရှုပြီး နောက်ဆုံးမှာ အခိုက်အတန့်မှာ ရုတ်တရက် တန်ပြန်တိုက်စစ်ဆင်တာပဲ… ဒုတိယတစ်ခုက ဆန့်ကျင်ဘက်ဖြစ်ပြီး ပြိုင်ပွဲစကတည်းက ရှေ့ကို ပြေးပြီး ကြီးမားတဲ့အားသာချက်ကို ယူတာ… ငါတို့က နောက်ကအဖွဲ့တွေနဲ့ ဝေးကွာနေသ၍ သူတို့ရဲ့ထိန်းချုပ်မှုစွမ်းရည်တွေက ငါတို့ကို ထိန်းချုပ်နိုင်မှာ မဟုတ်ဘူး…"

ခယ်ရှောင်ပင်း၏ မျက်လုံးများ တောက်ပလာသည်။

"ဟုတ်တယ်၊ အုပ်စုလိုက်ထိန်းချုပ်မှုစွမ်းရည်တွေက ထိရောက်နိုင်တဲ့အတိုင်းအတာရှိပြီး အေးခဲခြင်း ဒါမှမဟုတ် အိပ်စက်ခြင်းလိုမျိုး 10 စက္ကန့်ထက်ပိုတဲ့ ပြင်းထန်တဲ့ ထိန်းချုပ်မှုစွမ်းရည်တွေက မီတာ 100 အတွင်း အကွာအဝေးရှိပြီး မီတာ 100 ကျော် ထိန်းချုပ်ချိန်က အများအားဖြင့် အရမ်းတိုတောင်းပြီး 2 စက္ကန့်၊ 3 စက္ကန့်ပဲရှိတာကြောင့် ငါတို့ ထိန်းချုပ်ခံရရင်တောင် သိပ်ပြီးအကျိုးသက်ရောက်မှုမရှိဘူး… ပြိုင်ပွဲအစကတည်းက ငါတို့တွေ အခြားသူတွေထက် မီတာ 100 ရှေ့ရောက်နေသ၍ ပြင်းထန်တဲ့ ထိန်းချုပ်မှုစွမ်းရည်အများစုက ငါတို့အပေါ် ကျရောက်မှာမဟုတ်ဘူး…"

ယွဲ့ရှင်းဝမ်က ခေါင်းငြိမ့်ပြသည်။

"ဒါအမှန်ပဲ… လှေလှော်ခြင်းနဲ့ လက်ဆင့်ကမ်းပြိုင်ပွဲကြားက ခြားနားချက်ကတော့ လက်ဆင့်ကမ်းက စက်ဝိုင်းပုံသဏ္ဌာန် လည်ပတ်နေတာပဲ… ငါတို့ရဲ့အားသာချက်က ဘယ်လောက်ပဲ ကြီးမားနေပါစေ စမှတ်ကို ပြန်ပြေးရမှာဆိုတော့ အနီးနားက ကျောင်းသားတွေက ငါတို့ကို ထိန်းချုပ်နိုင်တယ်… ဒါပေမယ့် လှေလှော်ရာမှာ ဒါက ရေလမ်းကြောင်း တစ်ဖြောင့်တည်းဖြစ်ပြီး အားသာချက်က ကြီးမားနေရင် အခြားအဖွဲ့တွေနဲ့ ဝေးကွာသွားစေမှာဖြစ်ပြီး သူတို့က ငါတို့ကို ထိန်းချုပ်နိုင်မှာ မဟုတ်ဘူး…"

မတူညီသောပြိုင်ပွဲပုံစံများတွင် မတူညီသောနည်းဗျူဟာများ လိုအပ်သည်။

လှေလှော်ခြင်းပြိုင်ပွဲက ရေလမ်းကြောင်းတစ်ဖြောင့်တည်းဖြစ်ပြီး သူတို့သာ နောက်ကျကျန်ခဲ့ရင် အခြားနောက်ကျကျန်ခဲ့သော အဖွဲ့များက သူတို့ကို ထိန်းချုပ်ရန် ကြိုးစားမှာဖြစ်ပြီး တန်ပြန်တိုက်ခိုက်ရန် အလွန်ခက်ခဲလိမ့်မည်။ ထို့အပြင် သူတို့သည် ဤနည်းလမ်းကို အသုံးပြုထားခဲ့ပြီး အခြားအဖွဲ့တွေကလည်း သေချာပြင်ဆင်ထားလိမ့်မည်။

ရှေ့ကို တိုက်ရိုက် အလျင်အမြန်သွားပြီး ပ‌ထမနေရာကို သိမ်းပိုက်လိုက်တာက ပိုကောင်းပါသည်။

ရွှီယိရှန်းက ပြုံးကာ မေးသည်။

"ဒီပြိုင်ပွဲအတွက် ကစားသမား 9 လိုတယ်၊ ဘယ်သူတွေ ပါဝင်မှာလဲ?"

ယွဲ့ရှင်းဝမ်၏မျက်လုံးများက သူ့အဖွဲ့ဝင်များကို လျင်မြန်စွာ ကြည့်လိုက်ပြီး ခဏလောက် စဉ်းစားပြီးနောက် ပြောခဲ့သည်။

"ရှောင်ခယ်၊ စီနီယာအစ်ကိုရွှီနဲ့ ချောင်မြောင်တို့က နေထားပြီး ကျန် 9 ယောက်က ပါဝင်ကြမယ်…"

ခယ်ရှောင်ပင်း၏စက်ရုပ်သည် ဤပြိုင်ပွဲမျိုးတွင် အမှန်တကယ် အသုံးမဝင်ပေ။ ရွှီယိရှန်းက ကိုယ်ပွားပြီး အခြားလှေများဆီသို့ သွား၍ မရသည့်အပြင် ချင်မြောင်၏ စွမ်းရည်များကလည်း များစွာ အကူအညီမဖြစ်ပေ။

ယွဲ့ရှင်းဝမ်က ချင်လုကို ကြည့်ရင်း မေးလိုက်သည်။

"မင်းရဲ့ကျောက်ထုလွှာလှုပ်ရှားမှုက ဘယ်နှစ်ခေါက်ကျန်သေးလဲ?"

ချင်လု: "လက်ဆင့်ကမ်းပြိုင်ပွဲမှာ 2 ကြိမ်အသုံးပြုခဲ့ပြီး 10 ကြိမ်ရှိသေးတယ်… ငါနဲ့ အစ်မရဲ့ နှစ်ယောက်တွဲလှေလှော်ပြိုင်ပွဲကို စွမ်းရည်အသုံးမပြုဘဲ ယှဉ်ပြိုင်ပြီး အဖွဲ့လိုက်ပြိုင်ပွဲအတွက် ချန်ထားလို့ရတယ်…"

ချင်မြောင်: "အဲဒါကို အသုံးမပြုနဲ့… နှစ်ယောက်တွဲပြိုင်ပွဲတွေအတွက် ငါတို့စာရင်းသွင်းထားတာက ကစားဖို့သက်သက်ပဲ၊ဆုရဖို့မဟုတ်ဘူး… နင့်ရဲ့စွမ်းရည်တွေကို ချန်ထားလိုက်…"

ပထဝီဝင်ဌာန၏ ကျောက်ထုလွှာလှုပ်ရှားမှုသည် ပြိုင်ဘက်ကိုကျော်တက်ရန် အကွာအဝေးသို့ ချက်ချင်းနေရာရွှေ့ပြောင်းနိုင်တာကြောင့် ဤသည်မှာ အကောင်းဆုံးနည်းလမ်းဖြစ်သည်။

အခြားအဖွဲ့တွေမှာလည်း ပထဝီဝင်ဌာနမှ ကျောင်းသားတွေလည်း ရှိနိုင်ပြီး သူတို့၏ကျောက်ထုလွှာလှုပ်ရှားမှုက 12 ကြိမ် ရှိကောင်းရှိနိုင်သည်။ အားလုံးက အတူတကွ ရှေ့ကိုသွားကြမယ်ဆိုရင် ယွဲ့ရှင်းဝမ်နှင့် အခြားသူများက အသာစီးရနိုင်မည်မဟုတ်တာကြောင့် ထိုအချိန်ရောက်ရင် သူက ကြံဖန်ပြုလုပ်ရလိမ့်မည်။

“Outdoor ရေအားကစား”ပြိုင်ပွဲဧရိယာသို့ လူတိုင်းရောက်လာကြသည်။

ဒါက ပင်လယ်ကမ်းစပ်ဖြစ်ပြီး အဆုံးမဲ့ပင်လယ်က မိုးကုပ်စက်ဝိုင်းနှင့် ချိတ်ဆက်ထားသည်။ ပတ်ဝန်းကျင်က ကမ်းခြေသည် ဖြူစင်သန့်ရှင်း၏။ ပင်လယ်ပြင်ပေါ်တွင် အရောင်မျိုးစုံ ပူဖောင်းများဖြင့် ကိုယ်စားပြုထားသော လမ်းကြောင်းများစွာရှိသည်။ လှေလှော်ပြိုင်ပွဲအားလုံးကို ဤပင်လယ်ဧရိယာတွင် အပြီးသတ်မည်ဖြစ်သည်။

စာကြည့်တိုက်ပြိုင်ပွဲတွင် အထူးစွမ်းရည်များကို အသုံးချနိုင်ပြီး ထို့ကြောင့် တစ်ဦးချင်းလှေလှော်ပြိုင်ပွဲကို မီတာ 500၊ နှစ်ယောက်တွဲလှေလှော်ပြိုင်ပွဲကို မီတာ 1,000 နှင့် အဖွဲ့လိုက်လှေလှော်ပြိုင်ပွဲကို လူတိုင်း မီတာ 3,000 ပြီးအောင် ပြုလုပ်ရန် လိုအပ်သည်။

မီတာ 3,000 က ဝေးကွာသော်လည်း ပထဝီဝင်ဌာနသာ ကျောက်ထုလွှာလှုပ်ရှားမှုကို တိုက်ရိုက်အသုံးပြုပါက ဆယ်စက္ကန့်သာ ကြာမည်ဖြစ်သည်။

တစ်ဦးချင်းနှင့် နှစ်ယောက်တွဲလှေလှော်ပြိုင်ပွဲများကို မကြာမီစတင်ခဲ့ပြီး ချင်လုသည် အဖွဲ့လိုက်ပြိုင်ပွဲအတွက် စွမ်းရည်ကို ချန်ထားကာ ပထမအကျော့မှာတင် နှစ်ယောက်စလုံး ဖယ်ထုတ်ခံခဲ့ရသည်။

အဖွဲ့လိုက်လှေလှော်ပြိုင်ပွဲက နောက်ဆုံးမှဖြစ်သည်။ ကျယ်ပြောလှသော ပင်လယ်ရေမျက်နှာပြင်နှင့် အဖွဲ့လိုက်လှေလှော်ပြိုင်ပွဲအတွက် သုတေသနအဖွဲ့ပေါင်း 300 ထက်မနည်း စာရင်းသွင်းထားသောကြောင့် သည်တစ်ခေါက် ဤအဖွဲ့လိုက်လှေလှော်ပြိုင်ပွဲတွင် ပဏာမပြိုင်ပွဲမရှိပေ။ လှေလှော်မည့်လှေများအားလုံးက တစ်ခါတည်း တိုက်ရိုက် ယှဉ်ပြိုင်ရမည်။

လှော်ခတ်နေသော လှေများသည် ပင်လယ်ကမ်းစပ်တွင် ပြည့်ကျပ်နေသဖြင့် အဆုံးမရှိပေ။ အံ့မခန်းမြင်ကွင်းက ကျောင်းသားများစွာ အံ့အားသင့်စေခဲ့သည်။

ခယ်ရှောင်ပင်းက ရှောင်ထူကို ချက်ချင်း ‌ဆင့်ခေါ်ကာ နေရာတိုင်းတွင် စိတ်လှုပ်ရှားစွာ ဓာတ်ပုံရိုက်ခဲ့သည်။ ယွဲ့ရှင်းဝမ်က မနေနိုင်စွာ အပြုံးဖြင့် ပြောလိုက်သည်။

"ခယ်ရှောင်ပင်းက ငါတို့ 183 သုတေသနအဖွဲ့ရဲ့ ရှေ့တန်း သတင်းထောက်တစ်ယောက်လိုပဲ၊ သူက အားကစားပြိုင်ပွဲတိုင်းမှာ ဓာတ်ပုံတွေပဲ ရိုက်နေတာ…"

လျှိုကျောက်ချင်းက ရယ်လိုက်သည်။

"မင်း ထိန်းချုပ်ခံထားရတဲ့အချိန်တုန်းက ထူးဆန်းတဲ့ အမူအရာနဲ့ မင်းကို ဓာတ်ပုံတွေအများကြီးရိုက်ပြီး အမှတ်တရ လုပ်ချင်တယ်လို့ သူပြောခဲ့သေးတယ်…"

ယွဲ့ရှင်းဝမ်: "…"

ခယ်ရှောင်ပင်း၊ မင်း အရိုက်ခံချင်နေလို့ ယားနေတာလား?

ပြိုင်ပွဲ စတင်တော့မည်ဖြစ်ကာ ယွဲ့ရှင်းဝမ်နှင့် သူ့အဖွဲ့အား C-183 ပြိုင်လှေတွင် နေရာချထားခဲ့သည်။

ပြိုင်လှေများကို သုတေသနအဖွဲ့၏ အမည်ဖြင့်သာ ခေါ်ဆိုကြသည်။ အနီးနားရှိ ကျောင်းသားများက သူတို့ကိုမြင်သောအခါ သူတို့က ချက်ချင်း တီးတိုးပြောကြသည်။

"နောင်ကျရင် ဘေးလမ်းကြောင်းက 183 ကို စောင့်ကြည့်ထား!"

"183 လှေကို အရင်ထိန်းချုပ်လိုက်၊ သူတို့ကို တန်ပြန်တိုက်ခိုက်ဖို့ အခွင့်အရေးမပေးနဲ့!"

တချို့ကျောင်းသားများကလည်း စိုးရိမ်စွာ မေးကြသည်။

"တကယ်လို့ ငါတို့က သူတို့ထက် လှေလှော်တာမြန်သွားရင် ကျန်းဖျင်စစ်က ငါတို့ကို ထပ်ပြီးအနောက်ပြန်ပို့မှာလား?"

ကျန်းဖျင်စစ်: "…"

စိတ်ချပါ၊ မင်းတို့တွေ ဒီတစ်ခေါက် မြန်မြန်တောင် သွားနိုင်မှာ မဟုတ်ဘူး။

စက်အသံက ပြိုင်ပွဲစည်းမျဉ်းများကို စတင်ရွတ်ပြသည်။

"အဖွဲ့လိုက်လှေလှော်ပြိုင်ပွဲ စတင်ပါတော့မယ်… မြန်မြန် ပြိုင်လှေတွေပေါ် တက်ကြပါ… ပြိုင်ပွဲကာလအတွင်း ပြိုင်လှေက အခြားလမ်းကြောင်းကို မှားယွင်းစွာဝင်ရောက်မိရင် ပြစ်ဒဏ်အဖြစ် မှတ်ယူပြီး ပြိုင်ပွဲကနေ ဖယ်ထုတ်ခံရပါမယ်!"

စက်အသံ: "အချိန်စတင်ရေတွက်ပါပြီ၊ 10၊ 9၊…"

အချိန်စတင်ရေတွက်ချိန်တွင် ယွဲ့ရှင်းဝမ်က တိုးတိုးလေး ရွတ်ဆိုလိုက်သည်။

"တကယ်တော့ မြေပြင်မှာလမ်းမရှိဘူး၊ ဒါပေမယ့် လမ်းလျှောက်တဲ့သူတွေများလာတဲ့အခါ လမ်းဖြစ်လာတယ်!"

သူသည် လှော်ခတ်နေသော လှေ၏ ပဲ့ပေါ်တွင် ထိုင်နေကာ ရှေ့သို့ မျက်နှာမူထားပြီး သူ့ပတ်ဝန်းကျင်ကို ရှင်းရှင်းလင်းလင်း မြင်နေရသည်။

သူ စာကြောင်းများကို ရွတ်ပြီးသည်နှင့် တစ်ပြိုင်နက် ပြိုင်ပွဲအစ၏ ရင်းနှီးသော‌ သေနတ်သံက သူ့နားထဲတွင် ထွက်ပေါ်လာသည်။ ယွဲ့ရှင်းဝမ်သည် သူ၏“ခေတ်သစ်စာရေးဆရာများ၏ဂန္တဝင်လက်ရာများ”စာအုပ်ကို ဖွင့်လိုက်ပြီး လူရွှင့်၏‘လမ်း’စွမ်းရည်က စတင်အသက်ဝင်လာခဲ့သည်။

တစ်ချိန်တည်းတွင် ချင်လုသည် ပထဝီဝင်ဌာနမှ ‘ဆိုက်ဘေးရီးယားအအေးလှိုင်း’စွမ်းရည်ကို ထုတ်လွတ်ခဲ့သည်။

အေးစက်သောလေပြင်းသည် ကမ်းစပ်ကိုဖြတ်လာပြီး ပင်လယ်မျက်နှာပြင်က ရေခဲအဖြစ် တိုက်ရိုက်အေးခဲသွားသည်။

အေးခဲနေသောပင်လယ်ထဲမှာ သူတို့က လှေကို ဘယ်လိုလှော်ရမှာလဲ?

ချင်လုသည် လူများကို အေးခဲလိုက်ပါက ထိန်းချုပ်မှုမှ လွတ်မြောက်ရန် လွတ်မြောက်ခြင်းစွမ်းရည်များကို အသုံးပြုနိုင်တာကြောင့် လူများကို အေးခဲစေမည့်အစား ပင်လယ်မျက်နှာပြင်ကို အေးခဲစေသည်မှာ အလွန်ဉာဏ်ထက်ပါသည်။ သို့သော် ပင်လယ်ရေမျက်နှာပြင်ကို အေးခဲခြင်းက သဘာဝပတ်ဝန်းကျင်ကို ထိခိုက်မှုနှင့် ညီမျှသည်။ သဘာဝပတ်ဝန်းကျင်ထိန်းသိမ်းရေးဌာနသည် ရေခဲမျက်နှာပြင်ကို အ‌ရည်ပျော်ရန်အတွက် မြက်ခင်းသန့်စင်ခြင်းကို အသုံးမပြုသ၍ အခြားဘာသာရပ်များရှိ စွမ်းရည်များသည် သဘာဝပတ်ဝန်းကျင်အပေါ်သက်ရောက်မှုကို လျော့‌ပါးသက်သာစေမည်မဟုတ်ပေ။

တရုတ်ဘာသာစကားဌာန၏ ရွှေပုစဉ်းရင်ကွဲခွံကို အသုံးပြုရင်တောင်—— ၎င်းက အေးခဲနေသောလှေကို ခေါ်ဆောင်မသွားနိုင်ပါ။

ဘေးပတ်ပတ်လည်ရှိ ပြိုင်လှေအများအပြားသည် ပင်လယ်ထဲတွင် အေးခဲနေပြီး ရှေ့သို့မရွေ့နိုင်တော့ပေ။

သို့သော် ယွဲ့ရှင်းဝမ်သည် လူရွှင့်၏စွမ်းရည်ကို အသုံးပြုကာ ရှေ့တည့်တည့် လမ်းကြောင်းဖွင့်ခဲ့သည်။

လူရွှင်၏‘လမ်း’စွမ်းရည်နဲ့ပတ်သက်ပြီး အကောင်းဆုံးအပိုင်းကတော့ မြေပြင်အနေအထားအရ အကန့်အသတ်မရှိဘဲ ရေထဲမှာ၊ လေထဲမှာ၊ တောင်တွေပေါ်မှာ လမ်းဖွင့်နိုင်သည်… သေချာပေါက် ရေခဲပေါ်မှာလည်း လမ်းဖွင့်လို့ရသည်။

ထို့အပြင် ဤလမ်းပေါ်တွင် လျှောက်လှမ်းခြင်းဖြင့် တိုက်ခိုက်မှုအားလုံးကို ခံနိုင်ရည်ရှိနိုင်ပါသည်။

ဖွင့်ထားသော လမ်းအရှည်မှာ မီတာ 500 ဖြစ်သည်။ သူတို့သည် ဤအကွာအဝေးကို ကျော်သွားသ၍ လမ်းကြောင်းစုစုပေါင်း၏ ခြောက်ပုံတစ်ပုံမျှသာ ရှိသေးသော်လည်း သူတို့ကို အမီလိုက်နိုင်ရန် အ‌ခြားပြိုင်လှေများအတွက် ခက်ခဲမည်ဖြစ်သည်။

ယွဲ့ရှင်းဝမ်: "ချင်လု၊ ရှေ့ကို နေရာတွေ ဆက်တိုက်ပြောင်းလိုက်!"

လမ်းကြောင်းဖွင့်ပြီးနောက် သူတို့၏လှေသည် ရွေ့လျားသွားနိုင်သည်။ ချင်လုသည် ကမ္ဘာကို ချက်ချင်းထုတ်လိုက်ပြီး ရှေ့ကို နေရာများကို ပြောင်းလိုက်သည်။ 183 သုတေသနအဖွဲ့၏ ပြိုင်လှေသည် ပစ်လွတ်လိုက်သော မြားတစ်စင်းကဲ့သို့ လွင့်ထွက်သွားပြီး မီတာ 400 အကွာတွင် ချက်ချင်း ပေါ်လာသည်။

အနီးနားရှိ လှေများသည် ရေခဲပေါ်တွင် အေးခဲနေပြီး လှုပ်ရှားနိုင်ခြင်း မရှိပေ။

ပင်လယ်ကမ်းစပ်က ပွဲကြည့်စဉ်ဧရိယာရှိ ကျောင်းသားတော်တော်များများက မနေနိုင်စွာ တွေးဆကြသည်။

"ပင်လယ်က အေးခဲနေပြီး ဘယ်သူမှ ရွေ့လို့မရဘူးလေ… 183 သုတေသနအဖွဲ့ရဲ့လှေက ဘယ်လိုလုပ်ရွေ့နိုင်ရတာလဲ?"

တစ်စုံတစ်ယောက်က ပြောသည်။

"အဲဒီစီနီယာအစ်ကိုယွဲ့ရှင်းဝမ်က စာကြောင်းတွေ ရွတ်နေတာကို ငါကြားလိုက်တယ်… အဲဒါက ‘တကယ်တော့ မြေပြင်မှာလမ်းမရှိဘူး၊ ဒါပေမယ့် လမ်းလျှောက်တဲ့သူတွေများလာတဲ့အခါ လမ်းဖြစ်လာတယ်’ဆိုတာမျိုး ဖြစ်မယ်ထင်တယ်?"

လူတိုင်း: "..."

ဒီတော့ သူတို့ရဲ့ 183 သုတေသနအဖွဲ့မှာ လမ်းရှိပြီး အခြားအဖွဲ့တွေမှာ လမ်းမရှိဘူးပေါ့?

အဲဒါကို—— ငါသွားမယ့်လမ်းကို အခြားသူတွေ သွားခွင့်မရှိဘူးလို့ ပြောရမှာလား?

တစ်စုံတစ်ယောက်က အံ့အားသင့်စွာ ပြောလာသည်။

"အဲဒါက လူရွှင့်ရဲ့စကားမဟုတ်ဘူးလား?"

"လက်ဆင့်ကမ်းပြိုင်ပွဲတုန်းက ‘လူသားတွေရဲ့ ပျော်ရွှင်မှုနဲ့ ဝမ်းနည်းမှုတွေက ဘယ်လိုမှ ဆက်စပ်မှုမရှိဘူး။ ငါတော့ သူတို့တွေ ဆူညံတယ်လို့ပဲ ထင်မိတယ်’လို့ ယွဲ့ရှင်းဝမ် ရွတ်ခဲ့တယ်… အဲဒါကလည်း လူရွှင့်ရဲ့စကားပဲ…"

"ဒါဆို တရုတ်ဘာသာစကားဌာနက စာကြည့်တိုက်ရဲ့ plug-in လား? ယွဲ့ရှင်းဝမ်က မစ္စတာလူရွှင့်ရဲ့ စွမ်းရည်တွေကို လော့ခ်ဖွင့်ခဲ့တာလား?"

လူတိုင်း: "..."

183 သုတေသနအဖွဲ့က တကယ်ကို လိမ္မာပါးနပ်ဆုံးဖြစ်သည်။

‘တိုက်ခိုက်မှုအားလုံးကို ခံနိုင်ရည်သော’လမ်းဖြင့် အခြားအဖွဲ့များသည် 183 ၏ လှေက ရှေ့ကို ထွက်သွားတာကို မြင်ရပြီး သူတို့ကို ထိန်းချုပ်ရင်တောင် စွမ်းရည်အားလုံးက ပျက်ပြယ်သွားလိမ့်မည်။ ဆန့်ကျင်ဘက်အနေဖြင့် 183 သုတေသနအဖွဲ့မှ ကျောင်းသားများသည် စွမ်းရည်အမျိုးမျိုးဖြင့် သူတို့နှင့် နီးစပ်သောလှေများကို မိတ်ဆက်ပေးခဲ့ကြသည်။

ရှင်းယန်သည် သူ့ရှေ့မှ ပြိုင်လှေတစ်စင်းကို ကြီးမားသော ပေါင်းခံပုလင်းဖြင့် ဖုံးအုပ်ခဲ့သည်။ လင်းမန့်လော်၏ နွယ်ပင်များသည် အတူတူနီးကပ်လာသော ပြိုင်လှေနှစ်စင်းကို ချည်နှောင်ခဲ့သည်။ ကျန်းရှောင်နျန်သည် အမြန်တက်လာသော လှေများကို ရပ်တန့်ရန် ရေထဲတွင် နံရံတစ်ခု စိုက်ထူလိုက်သည်။

ယွဲ့ရှင်းဝမ်သည် အစပိုင်းတွင် “အေးခဲခြင်း+လမ်းဖွင့်ခြင်း”စစ်‌ဆင်ရေးကို အားကိုးခဲ့ပြီး အနီးနားရှိ အဖွဲ့အားလုံးကို ‌ချက်ချင်း ကျော်တက်သွားခဲ့သည်။ သူတို့၏ 183 သုတေသနအဖွဲ့၏ ပြိုင်လှေသည် 10 ကြိမ်ဆက်တိုက် နေရာပြောင်းသွားကာ အဆုံးစည်းကိုရောက်ရန် ဆယ်စက္ကန့်သာကြာခဲ့သည်။

‌အနောက်မှ အဖွဲ့များသည် သူတို့ကို ထိန်းချုပ်ချင်သော်လည်း လက်လှမ်းမမီနိုင်တော့ဘဲ အလွန်နောက်ကျသွားခဲ့သည်။

ပင်လယ်ပြင်တွင် စက်အသံတစ်ခု ထွက်ပေါ်လာသည်။

"C-183 သုတေသနအဖွဲ့က 12.33 စက္ကန့်အတွင်း အဆုံးစည်းကို ရောက်ရှိခဲ့ပါတယ်…"

လူတိုင်း: "..."

သည်တစ်ခေါက်မှာတော့ သူတို့က ‘အရင်ဆုံး နောက်ကျကျန်ပြီး နောက်မှ တန်ပြန်တိုက်ခိုက်ခြင်း’၏ လုပ်ရိုးလုပ်စဉ်ကို မကစားခဲ့ကြဘဲ အစမှာတင် သူတို့က ရှေ့ကို အပြေးအလွှားသွားခဲ့ပြီး အဆုံးစည်းကို အသက်တစ်ရှိုက်အတွင်း ရောက်သွားကြသည်။

သူတို့က ပင်လယ်ရေကို ရေခဲပြင်အဖြစ် အေးခဲလိုက်ပြီး သူတို့ပြိုင်လှေကို ရေခဲပြင်ပေါ်မှာ တိုက်ရိုက် တယ်လီပို့ခိုင်းလိုက်တာလား?

ဒါက နတ်ဆိုးအဖွဲ့ပဲ မဟုတ်ဘူးလား?

#TK