MM Story Teller

Chapter 209

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 209

13.16 - မင်းကို ငါကိုယ်တိုင်လိုက်စောင့်ရှောက်တာက ပိုစိတ်ချရလိမ့်မယ်

စွမ်းအင်ကျောက်ရိုင်းများထွက်ရှိရာ ဂြိုလ်အများအပြားရှိသော်လည်း နေရာအများစုက B နှင့် C အဆင့်သတ္တုရိုင်းများသာထုတ်နိုင်ပြီး A နှင့် S အဆင့်မှာမူ အလွန်တရာမှရှားပါးနေ၏။

မိုင်းတွင်းများမှ နှစ်တိုင်း ပုံသေအတိုင်းအတာတစ်ခုအထိသာ တူးယူကြသည်၊ သို့မှသာ မိုင်းကြောများက ပြန်လည်ပြင်ဆင်နိုင်လိမ့်မည်။

SS အဆင့် စွမ်းအင်ခရစ်စတယ်ပါသောကျောက်များမှာ ကံပေါ်မူတည်ပြီးမှရတတ်၏။ ကျောက်ရိုင်းတွင်းတိုင်းမထွက်နိုင်သည့်တိုင် ယင်ကျောင်းပိုင်သည့် မိုင်းတွင်းအများစုတွင် S အဆင့်ကျောက်ရိုင်းများထွက်ကြ၏။

ထို့ကြောင့် ရွှယ်လင်သာ SSS အဆင့် စွမ်းအင်ကျောက်ရိုင်းများကိုရှာချင်ပါက S အဆင့်ကျောက်ထွက်သောမိုင်းတွင်းများကို မြို့စားမင်းအိမ်တော်တွင်ရှာရပေမည်။

ဆရာမုန့်ကခေါင်းညိတ်ပြလာ၏။ "အဲဒါမျိုးဆိုရင်လည်းခိုးချတာပဲ.."

ရွှယ်လင်က သဘောပေါက်သွားသည့်နောက်မေးလာပြန်သည်။ "ဒါဆိုဆရာက ကျွန်တော့်ကို ကံစမ်းခိုင်းနေတာလား..."

မုန့်ချောင်က သူ နားလည်သွားသည့်အခါ ကျေနပ်ဝမ်းသာသည့်အပြုံးကိုဖော်ပြလာသည်။ သူသည်ကား ရယ်မောပြီးပြောလာ၏။ "ဒါပေါ့..မင်း S အဆင့်မိုင်းတွင်းတွေမှာသွားရှာ..ဒါပေမဲ့ မြို့စားမင်းအိမ်ရဲ့နာမည်နဲ့နောက်ခံကိုမသုံးပါဘူးလို့တော့ ကတိပေးရမယ်..."

ရွှယ်လင်: "......" မြို့စားမင်းအိမ်ရဲ့နာမည်မပြောဘဲနဲ့ မိုင်းတွင်းရှိမယ့်နေရာကို ဘယ်သိမလဲဟ!

ရွှယ်လင်မှာ စူပုပ်နေသည့်မျက်နှာဖြင့် ပထမဆုံးအတန်းကို အဆုံးသတ်လိုက်ရသည်။ သူ့ဆရာက ဤအခွင့်အရေးကိုအရယူကာ လက်မှုဆရာသခင်ကောင်းတစ်ယောက်ထံ၌ ကံကောင်းမှုက ပထမဆုံးလိုအပ်သည့်အရာဖြစ်ကြောင်းနားလည်စေခဲ့သည်။

တကယ်ရယ်ရတာပဲ။ ကံကိုယုံရတဲ့အလုပ်ကိုလွယ်တယ်များထင်နေလား?။

ရွှယ်လင် နှုတ်ခမ်းကိုဖိလိုက်ပြီး အခန်းထဲတွင် တွေးတောရင်းကျန်နေခဲ့သည်၊ ပြီးနောက် ယင်ကျားစာဖတ်ခန်းသို့ အပြေးအလွှားသွားကာ တံခါးခေါက်လိုက်၏။

ယင်ကျားက ရေချိုးနေခဲ့ပြီး နောက်ဆုံးမှ သူ့ခေါင်းကို ရှင်းသွားအောင်လုပ်နိုင်ခဲ့သည်။ သူထိုင်ချလိုက်သည့်အချိန်မှာပင် ရွှယ်လင်ကတံခါးလာခေါက်၏။ ယခုတော့ သူ့ခမျာ သူ့မိသားစုမှ ဆရာသခင်ငယ်လေးကို ကိုင်တွယ်ရန်နည်းလမ်းအားရှာမတွေ့တော့၊ ထို့နောက် အခန်းထဲသို့ဝင်မလာခိုင်းတော့ဘဲ တံခါးကိုသာသွားဖွင့်လိုက်သည်။

ရွှယ်လင်က သူ့အားမေးလာ၏။ "ဒယ်ဒီ..မော့ရှီးကိုခဏလောက် ခေါ်သွားလို့ရမလား..."

ယင်ကျားက တင်္ဒဂခန့်အေးခဲသွားပြီးနောက် မေးလိုက်သည်။ "ဘာလုပ်မလို့လဲ.."

"ကျွန်တော်အခုလေးတင် စာတမ်းတင်ဖို့ကျလာတယ်...နည်းနည်းခက်နေလို့...ပြီးတော့ ကြယ်မြို့တော်က မားကတ်မှာ ကျောက်ရိုင်းကြီးတစ်တုံးသွားဝယ်ချင်တယ်...အဲဒါကြောင့် မော့ရှီးကိုခေါ်သွားမလို့.."

ပထမအလွှာတွင် မော့ရှီး၏အဓိကတာဝန်မှာ ကြယ်မြို့တော်တမြို့လုံးအနှံ့ကင်းလှည့်ရန်ဖြစ်ပြီး သူ၏မူလမိသားစုမှာလည်း စွမ်းအင်ရိုင်းစီးပွားရေးကိုလုပ်ကိုင်ကြသည်။ ထိုပစ္စည်းများအကြောင်း ကောင်းကောင်းနားမလည်သေးသောသူ့အတွက် မော့ရှီးကိုခေါ်သွားခြင်းက အသင့်တော်ဆုံးအကြောင်းပြချက်ပင်။

ယင်ကျားကခေါင်းညိတ်ကာဖြေလိုက်သည်။ "ရတယ်လေ..ဒါပေမဲ့ အလုပ်ချိန်တော့ သွားမနှောင့်ယှက်နဲ့နော်..."

ရွှယ်လင်ကရယ်မောကာပြန်ဖြေလိုက်သည်။ "သိပြီ..ဒါဆို သူအလုပ်အားတဲ့ပိတ်ရက်မှသွားဖို့ပြောလိုက်မယ်..."

သူလိုချင်သည့်အဖြေရသွားသည့်အခါ ရွှယ်လင်သည် အင်မတန်ဝမ်းသာသွားသည့်အပြုံးဖြင့် မော့ရှီးနှင့်တွေ့ရန် ထွက်သွားလေ၏။ နောက်ဆုံးတကြိမ်တွေ့စဥ်က ၎င်းတို့နှစ်ယောက် ဖုန်းနံပါတ်များလဲယူထားခဲ့သည်။ ထိုသူထွက်သွားကာတံခါးပိတ်လိုက်ပြီးမှ ယင်ကျားမှာ ရုတ်တရက် တစ်ခုခုမှားနေသလိုခံစားလိုက်ရတော့သည်။

မော့ရှီးနဲ့တွေ့တာက ဘာစိတ်လှုပ်ရှားစရာများရှိနေလို့လဲ..?။

သူ စိတ်ထဲတွင်သာရေရွတ်လိုက်ကာ ကြယ်တာရာကွန်ရက်မှ မက်ဆေ့ချ်များကို ပြန်လည်မှတ်မိသွားခဲ့သည်..

ရွှယ်လင်သာ တကယ်ပင် သားရဲလူသားကိုအိမ်ခေါ်လာကာ သူနှင့်အတူနေချင်သည်ဟုပြောလာခဲ့ပါက သူတုံ့ပြန်ရမည့်နည်းလမ်းကို မနေနိုင်မထိုင်နိုင်တွေးမိသွားလေ၏။

အထပ်ထပ်အခါခါ တွေးကြည့်ပြီးနောက်: အဖြေတစ်ခုသာ ထွက်လာသည်။

သားရဲကောင်ကိုသတ်ပစ်...

ထိုကောင်လေးကို သော့ခတ်ပိတ်ထားပြီး လောကကြီးနှင့် ခွဲထားလိုက်မည်!

ယင်ကျား အသံတိတ်ပင်နဖူးကိုပွတ်လိုက်သည်။ ထိုအတွေးက ဘယ်နေရာမှရောက်လာမှန်းမသိသော်လည်း ရွှယ်လင်က သူ သဘောကျနေသည့်သူတွေ့ပြီဟု ပြောလာမည့်အတွေးကိုတွေးမိတိုင်း သူ့ရင်ထဲမှ ဒေါသလှိုင်းလုံးက တမုဟုတ်ချင်းတိုးထွက်လာပြီး သားရဲလူသားအချို့ကိုမသတ်ပစ်သရွေ့ မငြိမ်သက်နိုင်သလိုခံစားရသည်။

ဒါကဘယ်လိုဒုက္ခမျိုးလဲကွာ....

ယင်ကျားမှာ အခုတလောထူးဆန်းသည့်ကိစ္စများသာလုပ်နေခဲ့သည်။ ပထမဆုံး သူက မွေးစားကလေးတစ်ယောက်၏ အဖေဖြစ်နေသည့်အချက်ကို မျက်ကွယ်ပြုထားပြီး လူနှစ်ယောက်ကြားမှ ရိုးရှင်းသည့်ပတ်သတ်မှုကို အခြေခံလျှင်ပင် ထိုကောင်လေးထက် မျိုးဆက်တစ်ဆက်စာ အသက်ကြီးနေသေးသည်။ ကျန်နေသေးသောဘဝ၏ ဒုတိယမြောက်တစ်ဝက်ကို မျက်နှာပြောင်တိုက်ကာနေချင်နေသည်...ထိုကလေးထံမှအမုန်းကိုမူခံရနိုင်သည်မဟုတ်လား?။

ယင်ကျား၏အတွေးများက ပို၍ပိုကာ ဗရမ်းဗတာဖြစ်လာပြီး ရွှယ်လင်က အခုလေးတင်သူ၏စာဖတ်ခန်းတံခါးတွင် မှီရပ်နေခဲ့သည်ကိုပင် မေ့လျော့သွားခဲ့၏၊ ခေါင်းငုံ့ထားရင်း ခြေထောက်ကိုကြည့်နေပြီး သူတို့၏ဆက်ဆံရေးကိုအဆင့်မြှင့်ရန်တွေးနေကာ အခြေအနေကိုအခွင့်အရေးယူပြီး ထိုသူကိုသူ့နှလုံးသားတွင်ရော သူ့ဘေးတွင်ပါ အပြီးတိုင်ထားရန် တကယ်ကိုတွေးနေလေတော့၏။

ရွှယ်လင်ကမူ ၎င်းကို ယာယီပျော်စရာအနေဖြင့်သတ်မှတ်ထားခဲ့ပြီး မော့ရှီးကို ကြယ်မြို့တော်တဝိုက်မှကျောက်ရိုင်းဆိုင်များထံ ခေါ်သွားခိုင်းခဲ့သည်။

မော့ရှီးတွင်အားလပ်ရက်သိပ်မရှိ၊ နှစ်ပတ်ခန့်အချိန်ယူပြီးမှ ဈေးအကုန်လုံးကိုနှံ့နိုင်ခဲ့သည်။ ရွှယ်လင်မှာ SS အဆင့်စွမ်းအင်ကျောက်ရိုင်းများကိုရခဲ့သော်လည်း SSS အဆင့်သတ္တုရိုင်းတစ်တုံးကိုမှ မတွေ့ခဲ့ရချေ။

မုရှီးလည်း သူပြောသည်ကိုကြားရသည့်အခါ စိတ်လှုပ်ရှားနေပြီး SSS အဆင့်သတ္တုရိုင်းအစများကိုရှာပေးချင်နေခဲ့သည်၊ သို့သော် SSS အဆင့်စွမ်းအင်ကျောက်ရိုင်းများက ယင်ကျားအသုံးပြုချင်လျှင် စာရင်းမှတ်ထားရသည့်အဆင့်တွင်ရှိပြီး သူမလည်းမကူညီနိုင်ပေ။

ရွှယ်လင်သည် စိတ်လောနေပုံမရဘဲ မုရှီးကိုစိတ်အေးရစေရန်ရယ်မောပြောပြရသည်။

"တခြားနည်းလမ်းမရှိတော့လည်း SS အဆင့်ကျောက်ရိုင်းကို SSS အဆင့်စွမ်းအင်ခရစ်စတယ်ဖြစ်အောင်လုပ်လိုက်မယ်လေ ~ အရင်ကတခါမှမလုပ်ဖူးဘူး..ကြိုးစားကြည့်လိုက်မယ်"

နောက်ထပ်ရက်သတ္တပတ်ကုန်ဆုံးသွားပြီး မုန့်ချောင်သတ်မှတ်ပေးထားသည့် နောက်ဆုံးရက်ရောက်ရန် ငါးရက်သာကျန်တော့သည်၊ ရွှယ်လင်သည်ကား ပထမဆုံးအဆင့် လက်မှုပညာဆရာသခင်ပြိုင်ပွဲအတွက် အသင့်ဖြစ်နေပြီ။

တိုက်ဆိုင်စွာပင် ပြိုင်ပွဲ၏ပထမဆုံးအဆင့်မှာ စွမ်းအင်ကျောက်ရိုင်းရွေးချယ်ရန်သာ။

တကယ်တမ်းတွင် ရွှယ်လင်သည် ဤပြိုင်ပွဲကိုစောင့်ဆိုင်းနေခဲ့သည်။ အကြိုအဆင့်ပြိုင်ပွဲတွင် လူအများအပြားဝင်ပြိုင်ကြကာ ရွေးချယ်ရမည့် စွမ်းအင်ကျောက်ရိုင်းများလည်း အများအပြားရှိသည်။

ပွဲစီစဥ်သူများက ပြိုင်ပွဲဝင်များကို စိတ်ရှုပ်ထွေးစေရန် ကျောက်ရိုင်းများနှင့်သာမန်ကျောက်များကို ရောချပေးထားသည် အချို့သောကျောက်ရိုင်းများက စီနီယာကျသောပန်းပုဆရာများပင် မခွဲနိုင်ပေ။

ပထမပွဲစဥ်တွင် အစီအစဥ်ကြေညာသူက ပွဲခင်းတစ်ခုလုံးကိုသိမ်းယူထားပြီး အရွယ်တူသော စွမ်းအင်ကျောက်ရိုင်းများနှင့် ကျောက်တုံးများကိုထုတ်ပိုးလိုက်သည်။ ပြိုင်ပွဲဝင်များက လျှောက်လွှာများကိုယူကာ ပွဲခင်းထဲသို့ဝင်လာရပြီး ပြိုင်ပွဲဝင်များ ထွက်ခွာသည်နှင့် စွမ်းအင်ကျောက်များကို ရွေးယူသွားရမည်ဖြစ်သည်။

ပြိုင်ပွဲဝင်များက ရလာသည့် စွမ်းအင်ကျောက်ရိုင်းများအတွက် အခကြေးငွေပေးရန်လိုအပ်သောကြောင့် ပွဲခင်းထဲမှကျောက်များကို ယူသွားပြီးသည်နှင့် စက်များနှင့်အဆင့်ခွဲရမည်။

ပြိုင်ပွဲဝင်များယူလာသည့် စွမ်းအင်ကျောက်ရိုင်းများ၏အဆင့်အပေါ်မူတည်ကာ အဆင့်အများအပြားကွဲထွက်သွားမည်ဖြစ်သည်၊ ထို့နောက် ယှဥ်ပြိုင်ရမည့်အဆင့်များကို အတည်ပြုသတ်မှတ်ပေးလိမ့်မည်။

SS အဆင့်ကျောက်ရိုင်းများကို ရွေးချယ်ပြီးသည်နှင့် နောက်ဆုံးအဆင့်ကို တိုက်ရိုက်ကျော်လာနိုင်ပြီး ဆက်ပြိုင်နိုင်၏။ ပြိုင်ပွဲဝင်မည့်အဆင့်ကိုလည်း ရွေးချယ်ထားသည့် ကျောက်ရိုင်းများအပေါ်မူတည်ပြီး သတ်မှတ်ထားသည်။

ပြိုင်ပွဲကြောင့် ကြယ်မြို့တော်တစ်ခွင် သက်ဝင်လှုပ်ရှားနေသည်။ အခြားသောဂြိုလ်မှ လက်မှုဆရာများလည်း ပြိုင်ပွဲကိုလာကြည့်ကြ၍ နာမည်ကျော်ကြားလာနိုင်မည့် အကောင်းဆုံးအခွင့်အရေးပင်။ နောက်ဆုံးအဆင့်ပင်ဖြစ်သော်လည်း ပြိုင်ပွဲအတွင်း ၎င်းတို့၏ စွမ်းရည်ကိုပြသနိုင်မည်၊ သူတို့၏ဘဝကို တစ်ခဏချင်း ပြောင်းပြန်လန်သွားစေလိမ့်မည်။

ဥပမာ ကုမ္ပဏီကောင်းတွင် စာရင်းသွင်းနိုင်သလို စစ်တပ်ပိုင်းဆိုင်ရာတွင် နေရာကောင်းတစ်ခုရနိုင်သည်၊ ၎င်းတို့လိုအပ်သော ပစ္စည်းများကိုအထောက်အပံ့ရနိုင်ပြီး ကျန်သည့်ဘဝတစ်လျှောက်လုံး စိတ်အေးနိုင်မည်။

ယခုကဲ့သို့ ကြီးကျယ်သောပြိုင်ပွဲမျိုးက လက်မှုဆရာများ၏ အလုပ်အကိုင်အတွက် အကောင်းဆုံးနည်းလမ်း ဖြစ်လာနိုင်သည်။ စီနီယာဆရာသခင်များမှာလည်း ယခုကဲ့သို့ပြိုင်ပွဲမျိုးတွင် ပြိုင်ပွဲဝင်များအပေါ်ဘက်လိုက်၍မရပေ။

ရွှယ်လင်သည် စီနီယာဆရာသခင်အဖြစ်လက်မှတ်ရချင်၍ ယခုပြိုင်ပွဲကို ဝင်ပြိုင်ခဲ့ခြင်းဖြစ်၏၊ ၎င်းက မူလခန္ဓာကိုယ်၏ ဆန္ဒလည်းဖြစ်သည်။ ရွှယ်လင်၏အရှေ့မှယခုကဲ့သို့သော ညွှန်ကြားချက်မျိုးနှင့်ဆိုလျှင် ပြိုင်ပွဲတစ်ချင်းစီကို အပင်ပန်းခံဖြေနေမည်မဟုတ်။ စာမေးပွဲက အတန်းပြောင်းရွှေ့သည့်စာမေးပွဲထက် ပိုမိုရှုပ်ထွေးပြီး အလှည့်ကျစစ်ဆေးခံရမည်။ ရွှယ်လင်မှာ ထိုကိစ္စများနှင့်အချိန်မကုန်လိုပါချေ။

အရေးကြီးသည့်အချက်မှာ ရွှယ်လင်က အပြာရောင်ဂြိုလ်တွင် အမည်ကျော်ကြားသည့် လျှမ်းလျှမ်းတောက် ပလက်မှုဆရာ မဖြစ်ချင်သလို အာကာသထဲတွင်လည်း ခရီးမသွားချင်ပေ၊ ၎င်းက သူနှင့်ယင်ကျား ရင်းနှီးရမည့်အချိန်အကန့်အသတ်သို့ ရောက်နေသောကြောင့်ပင်။

ယင်ကျားက မကြာခင်ရက်ပိုင်းအတွင်းသူ့အားရှောင်နေခဲ့သောကြောင့် ရွှယ်လင်၏အစီအစဥ်များက အလုပ်မဖြစ်တော့ပေ။ သူစိတ်ရှုပ်ထွေးနေသော်လည်း ပုံချစရာနေရာမရှိဖြစ်နေပြန်သည်!။

ယင်ကျားစိတ်ဆိုးနေရသည့် အကြောင်းအရင်းကို သူလည်းမသိထားပေ၊ ယင်ကျားကသူ့အားသဘောကျသော်လည်း ခပ်ဝေးဝေးတွင်သာနေခဲ့ပြီး ထပ်ပြီးမရင်းနှီးချင်တော့သောကြောင့် အရင်ရက်များက အိမ်ကိုပင်ပြန်မလာတော့ပေ။ ရွှယ်လင် အကြောင်းအရင်းကိုမသိသေးသော်လည်း သူ့ဘက်မှ ယခုလို စပြီးပုန်းမနေချင်။ အနှီသူတကယ်ပင် သားရဲလူသားကိုအိမ်ခေါ်လာခဲ့ပါက ဒေါသထွက်လွန်း၍ သွေးများအန်ထွက်သွားနိုင်လောက်၏။

မုရှီးကမူ ယင်ကျားဘာဖြစ်နေမှန်းမသိသော်လည်း မြို့စား နေ့တိုင်းအိမ်ပြန်မလာသည့်သမိုင်းကြောင်းရှိခဲ့ဖူးသည်၊ ထို့ကြောင့် သူမအတွက်အဆန်းမဟုတ်တော့ပေ။ ပြိုင်ပွဲကျင်းပမည့်နံနက်အစောတွင် ရွှယ်လင်အိပ်ရာမှထလာသည့်အခါ ပြိုင်ပွဲတွင် သူမအဖော်လိုက်ပေးရန်စီစဥ်ခဲ့သည်။

ဆရာသခင်နှင့် သားရဲတပိုင်းပြိုင်ပွဲဝင်များပါထပ်ပေါင်းသည့်အပြင် ပြိုင်ပွဲအတွင်း သားရဲလူသားများကိုကာကွယ်ခွင့်ပြုထားသည်။ အခြားသူများထံမှ စွမ်းအင်ကျောက်ရိုင်းများယူပြေးခြင်းမရှိစေရန် သူတို့အားကူညီခွင့်ပေးထားသည်။

ယခင်က ကျောက်ရိုင်းများကို ကန့်သတ်ထားသော်လည်း ပြိုင်ပွဲဝင်များသောကြောင့် တချိန်တည်းမှာပင်လူပေါင်းများစွာက တူညီသော ကျောက်ရိုင်းများကိုယူသွားသည့်ဖြစ်ရပ်မျိုး ဖြစ်ခဲ့ဖူး၏။

ယင်ကျားမရှိ၍ မုရှီးကသူနှင့်အတူအဖော်လိုက်ပေးခဲ့၏။ ရွှယ်လင်သည် အင်မတန်နည်းသောလူကသာ သူ့ကို သို့မဟုတ် မြို့စားအိမ်တော်၏ဝန်ထမ်းများကို ဆန့်ကျင်ချင်မှန်းယုံကြည်နေဆဲ၊ ထို့ကြောင့် မုရှီးကိုခေါ်လာသည်ကပင် လုံလောက်နေပြီ။ မည်သူမျှ အန္တရာယ်ပေးမှာမဟုတ်မှန်း သိသာသော်လည်း တခြားတစ်စုံတစ်ယောက်ကမူ ထိုသို့မတွေးပေ။

ရွှယ်လင် ယာဥ်ပေါ်မှဆင်းလာသည့်အခါ ယင်ကျားအပြင်တွင်စောင့်နေသည်ကို မြင်လိုက်ရသည်။ သူမုရှီးကို အံ့ဩသွားသလို ကြည့်မိပြီး သူမက သူ့အားခေါ်လိုက်ခြင်းဖြစ်မည် ဟုတွေးမိသေးသည်၊ သို့သော် အိမ်တော်ထိန်းကြီးမှာလည်း ထိုအကြောင်းဘာမှမသိထားသလို သူမကိစ္စလည်းမဟုတ်ပေ။

ယင်ကျားကသာရှင်းပြလာသည်။

"ဒီလိုပွဲမျိုးမှာ ဓားတွေကမျက်စိမပါဘူး..ပြီးတော့ လူတွေအများကြီးက မင်းရဲ့အရည်အချင်းကိုသိနေကြတာ...ပြိုင်ပွဲမှာနိုင်ဖို့အတွက်ဆို သူတို့ကဘာမဆိုလုပ်ကြလိမ့်မယ်...ဒီတော့ မင်းကို ငါကိုယ်တိုင် လိုက်စောင့်ရှောက်တာက ပိုစိတ်ချရလိမ့်မယ်"

ရွှယ်လင် မနားလည်သည့်တိုင် ခေါင်းညိတ်ပြလိုက်ပြီး နားလည်ချင်ဟန်ဆောင်လိုက်သည်။ ယင်ကျားက သူ၏လက်ကြီးဖြင့် ခေါင်းကိုပွတ်သပ်ပေးလာ၏။

ရွှယ်လင် ဂရုတစိုက်ကြည့်ကာ အဆုံးတွင် ယနေ့ ယင်ကျားကသူလက်ဆောင်ပေးထားသည့်ရင်ထိုးကို ဝတ်ထားမှန်းတွေ့လိုက်ရ၏။

"ထားလိုက်ပါ.." ရွှယ်လင်ခေါင်းငုံ့ပြီး ခပ်တိုးတိုးရေရွတ်၍ သူ့အသက်ရှူသံကိုထိန်းထားကာ စိတ်ငြိမ်အောင်လုပ်လိုက်၏၊ ထို့နောက် သူ၏ 'ဒယ်ဒီ' လက်ကိုဆွဲကာ လိမ္မာစွာဖြင့် ပြိုင်ပွဲကွင်းပြင်သို့ ဦးဆောင်ခေါ်သွားလိုက်လေသည်။

ဝင်ခွင့်စစ်ဆေးခြင်းကို စက်များကလုပ်ဆောင်ပေးပြီး ပြိုင်ပွဲဝင်တစ်ယောက်ချင်းစီတိုင်း၏ နာနိုကွန်ပျူတာတွင် ထိပ်တန်းအရည်အသွေးမြင့်ကုဒ်များထည့်သွင်းထားသည်။ ဤပြိုင်ပွဲဝင်ပြိုင်သူများကို အစပိုင်းတွင် အမည်ဖြင့်ကြေညာပေးခဲ့သည်။သို့သော် အငြင်းပွားမှုများမဖြစ်စေရန်အတွက် နောက်ပိုင်းတွင် လူတိုင်းကို၎င်းတို့၏ ကိုယ်ပိုင်ကုဒ်များဖြင့်သာ ဖော်ပြပေးရသည်။

၎င်းတို့ရွေးချယ်ထားသော စောင့်ရှောက်သူသားရဲလူသားများနှင့်တွဲပေးပြီးနောက် ၎င်းတို့၏တွဲဖက် သားရဲလူသားများအတွက် ဒုတိယမြောက်ကုဒ်ကိုရရန် လက်မှုဆရာများက ၎င်းတို့၏ကိုယ်ပိုင် ကုဒ်ကို တရားဝင်ဝက်ဘ်ဆိုက်တွင် ရိုက်ထည့်ပေးရသည်။

ရွှယ်လင်သည် ယင်ကျားကိုကုဒ်ဖြင့်မဖော်ပြပေ၊ သို့သော် ထိုလူက သူနှင့်အတူလိုက်ဝင်လာခဲ့သည်။ ရွှယ်လင်က ခေါင်းလှည့်ကာသူ့အား အဓိပ္ပာယ်တစ်မျိုးဖြင့် ကြည့်လိုက်သော်လည်း လူမြင်ကွင်းတွင်နှင်မထုတ်ချေ။

သူသည် အစတည်းက ကုဒ်ကို မုရှီးထံပေးထားခဲ့သည်မှာ သေချာသောကြောင့် ယင်ကျားက မုရှီးထံမှကုဒ်ကိုအတင်းတောင်းယူမည်မှာသေချာ၏။ ထိုသို့သောကိစ္စမျိုးက အမြန်လုပ်မရပေ။ ထို့ကြောင့် ရွှယ်လင်၏ထိုလူအပေါ်နားလည်မှုအရ သူ မုရှီးကိုပေးလိုက်သည်နှင့် ထိုလူကသူမထံမှ ကုဒ်ကိုရပြီးသားဖြစ်လိမ့်မည်။

ရွှယ်လင်မှာ သူ လှုပ်ရှားချိန်တွင်ဖြစ်လာမည့်အရာကိုသိချင်နေ၍ လိမ်မပြောလိုက်ပေ။ ပြိုင်ပွဲဧရိယာအတွင်းဝင်ရောက်သည်နှင့် ကျောက်များကို စစ်ဆေးရာတွင်သာ အာရုံစိုက်ထားလိုက်သည်။

စွမ်းအင်ကျောက်များကိုစစ်ဆေးရန် လူတိုင်း၌ အချိန်အလုံအလောက်ရှိသည်။ ထိုအချိန်အတွင်း ပြိုင်ပွဲမှမထွက်သွားသရွေ့ နောက်ဆုံးနေ့အထိ ၎င်းတို့အားလုံးစောင့်နေနိုင်သည်။

ပြိုင်ပွဲကွင်းအတွင်းမှကျောက်တိုင်းကို အမှတ်အသားပေးထားပြီး ကာကွယ်ရေးအတွက် စစ်တပ်စခန်းကိုလည်းနေရာချထားလေရာ မည်သူကမှ ပြဿနာရှာရဲကြမည်မဟုတ်။

ရွှယ်လင် ပြိုင်ပွဲကိုဝင်ရောက်ပြီးနောက် ဝင်ပေါက်တွင်ရှိနေသော လက်ထောက်ပေးလိုက်သည့် ကျောက်တုံးကိုယူလာခဲ့သည်။ ပြိုင်ပွဲကွင်းက အလွန်တရာကျယ်လွန်းပြီး စွမ်းအင်ကျောက်များရှိနေသည့်နေရာကို ရှစ်ပိုင်းပိုင်းခြားထား၏။ ရွှယ်လင်က လမ်းကြောင်းကိုကြည့်လိုက်ပြီး ပြိုင်ပွဲကွင်းက အမှတ်အသားပြပေးထားသော လမ်းကြောင်းအတိုင်းလိုက်သွားလျှင် လမ်းတလျှောက်၌ နေရာရှစ်ခုလုံးကိုတွေ့နိုင်ကြောင်း သိလိုက်ရသည်။

ယင်ကျားကသူ့အား တစ်ခွန်းမှမမေးဘဲ နံဘေးတွင်သာ တိတ်တိတ်လေးရပ်နေသည်။

ရွှယ်လင်သည် ကျောက်ရှာရာတွင် လောမနေသောကြောင့် သူ့အားတစ်ချက်ခန့်ကြည့်ကာ ရုတ်တရက်ကြီးဟာသပြောလိုက်၏။

"ဒီလိုမျိုးခိုးချတာကြီးက သိသာမနေဘူးလား..."

ယင်ကျားသည်ကား ပျော်နေပုံကိုမသိမသာပြကာ ငုံ့ကြည့်လာသည်။ "ဟင်?" ထိုအကြောင်းတွေးနေပြီးနောက် သူ၏သံသယကို ဖော်ထုတ်လာလေ၏။

ရွှယ်လင်ပြုံးလိုက်ပြီး သူ့လက်ကိုလှမ်းဆွဲကာလက်မောင်းကို ဖက်ထားလေသည်။ တကိုယ်လုံးကို ယင်ကျားနှင့်နီးနီးကပ်ကပ်မှီထား၏။ သူ၏အရပ်က အလွန်မြင့်နေခြင်းမဟုတ်ရာ အလွန်ကပ်ထားသည့်အခါ ငှက်လေးတစ်ကောင်က လူတွင်နားနေသလိုခံစားချက်မျိုးရစေသည်။ သူသည် အလွန်ကျေနပ်သွားဟန်ဖြင့်ပြုံးလိုက်ပြီး သူတို့ပုံစံကိုကြည့်ပါက အကြောင်းမသိသူများဆိုလျှင် သားအဖဟုမထင်ဘဲ စုံတွဲများဟု အထင်မှားသွားနိုင်လေ၏။

"ကျွန်တော့်အဖေက အင်ပါယာမှာ အသန်မာဆုံးပဲ...ဒယ်ဒီ့ကိုသာ ဘော်ဒီဂတ်အနေနဲ့ထားရင် ဘယ်သူမှကျွန်တော့်ရဲ့စွမ်းအင်ကျောက်ရိုင်းတွေကို လာလုရဲမှာမဟုတ်တော့ဘူး..."

ယင်ကျားက လက်ဆန့်ကာသူ့ခေါင်းကိုသပ်ပေးလာသည့်တိုင် အနားကပ်လာသည်ကိုမူမတားပေ။ လွန်ခဲ့သောနှစ်ပတ်အတွင်း ရွှယ်လင်နှင့်ဝေးရာရှောင်ပြေးနေမိသည့်အကြောင်းအရင်းကိုမသိခဲ့သော်လည်း ရွှယ်လင်အပေါ်ပို၍ပိုကာ လိုက်လျောမိလာလေသည်။

"အကောင်းဆုံးဖြစ်ဖို့အတွက်ပါ.."

ရွှယ်လင် ခေါင်းညိတ်ပြပြီး ယင်ကျားကိုခေါ်ကာ အရှေ့သို့ဆက်သွားတော့မည့်အချိန် အနားမှလူတစ်ယောက်ခေါ်နေသံကိုကြားလိုက်ရ၏။ ရွှယ်လင်လှည့်ကြည့်ပြီး မျက်မှောင်ကုတ်လိုက်မိသည်။

သူ့အားလှမ်းခေါ်လိုက်သူမှာ သူနှင့်အတူအတန်းပြောင်းရွှေ့ခြင်းစာမေးပွဲတွင် ဝင်ပြိုင်ခဲ့ပြီး S အတန်းသို့ဝင်ခဲ့သူ မော့လန်။

သူ၏ ညီလေးဘေးတွင် မျက်နှာကြီးမည်းမှောင်လျက် တကယ့်ဘော်ဒီဂတ်နှယ် လုပ်ဆောင်နေသော မော့ရှီးကအနောက်မှလိုက်လာနေသည်။ သူတို့အနားတွင် နောက်ထပ်လူနှစ်ယောက်လည်းရှိနေသေးပြီး ၎င်းတို့မှာဇာတ်လိုက်ဟောက်စုန့်လဲ့နှင့် အစ်ကိုကြီးဟောက်ရှူတို့ပင်။

Prev Next