MM Story Teller

Chapter 210

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 210

13.17 - သူသာမန်လူတွေကို လွှတ်ပေးထားလို့မရဘူးလား

ရွှယ်လင်၏အကြည့်မှာ ဟောက်ရှူအပေါ်ရောက်သွားပြီး ပိုကာခေါင်းရှုပ်သွားလေသည်။ ဟောက်မိသားစုတစ်စုလုံးတွင် မူလကိုယ်ကို အကောင်းဆုံးဆက်ဆံပေးခဲ့သူကိုပြောပါဆိုလျှင် ဟောက်ရှူသာဖြစ်လိမ့်မည်။ ဟောက်ရှူသည်လည်းရွှယ်လင်ကိုကြည့်နေပြီး မျက်လုံးချင်းဆုံသွားကြသည့်အခါ ဟောက်ရှူ၏အကြည့်က မလုံမလဲဖြစ်နေပြီး သတိထားနေသည့်ဟန်ပါနေလေ၏။

ရွှယ်လင် အံ့အားသင့်သွားသလို မျက်ခုံးပင့်လိုက်သည်။ ဟောက်ရှူအပေါ်ရှိ မူလကိုယ်၏အမြင်မှာမဆိုးလှပေ၊ သို့သော် အဆုံးမရှိအမှောင်ထုထဲမှ ရှားပါးလှသောအလင်းစက်လေးဖြစ်သောကြောင့် သူ၏ဤအစ်ကိုကြီးကိုမမုန်းတီးခဲ့ပေ။

ဟောက်ရှူ၏မျက်လုံးထဲတွင် သူ့မိဘများကဟယ်လန်ကျို့ယွင်အပေါ်မှားခဲ့ကြလေရာ သူ့ဘက်မှဟယ်လန်ကျို့ယွင်ကို ကောင်းကောင်းဆက်ဆံပေးနေခြင်းဖြစ်သည်။ သို့သော် သူ့ခမျာအိမ်တွင်နေရသည့်အချိန်က နည်းနေပြီး တတ်နိုင်သည့်အရာသိပ်မရှိချေ။

အခြေအနေမှာ တင်္ဒဂခန့်ကို့ရို့ကားယားဖြစ်နေလေသည်။ ဟောက်စုန့်လဲ့၏မျက်နှာထားမှာဆိုးရွားနေသည့်တိုင် ရွှယ်လင်က ယင်ကျားလက်ကိုကိုင်ထားကြောင်း တွေ့လိုက်ရသည့်အခိုက် ပါးစပ်ပိတ်သွားပြီး စကားတစ်လုံးမှမပြောတော့ပေ။ ဟောက်ရှူအတွက် ရွှယ်လင်ကိုတွေ့ရသည့်အခွင့်အရေးက ရှားပါးသောကြောင့် အကြည့်ချင်းဆုံသွားသည့်နောက် လှမ်းနှုတ်ဆက်လိုက်သည်။

"မတွေ့ရတာကြာပြီ ကျို့ယွင်..."

ရွှယ်လင်က ခေါင်းညိတ်ပြပြီး များများစားစားမပြောပေ။ ထိုလူများအနက် သူ ရင်းနှီးသူမှာမော့ရှီးတစ်ယောက်သာရှိသောကြောင့် အနှီသူကိုနှုတ်ဆက်လိုက်၏။

"ဟယ်လို...အစ်ကိုကြီးမော့..."

မော့ရှီး နှုတ်ခမ်းထောင့်များကို ကွေးလိုက်ပြီး ရွှယ်လင်ကို ခေါင်းညိတ်ပြလိုက်သည်။

"မြို့စားမင်း...သခင်လေးယွင်...ကျန်းမာပါစ.."

ယင်ကျား၏မျက်လုံးများက သူတို့အရှေ့မှလူများအပေါ်ဖြန့်ကျက်သွားကာ နှစ်ဖက်လုံးမှ ပြိုင်ဆိုင်မှုအင်အား ယုတ်လျော့နေရသည့်အခြေအနေကို သဘောပေါက်သွားခဲ့၏၊ ၎င်းတို့က သူ၏ယွင်အာကို ခိုးမသွားနိုင်ပေ။ ထို့ကြောင့် အေးစက်စက်ဖြင့် ခေါင်းညိတ်ပြကာပြောလိုက်သည်။

"အင်း...ငါတို့အရင်သွားနှင့်ပြီ..."

ရွှယ်လင်က သူနှင့်အတူသွားရန်စိတ်ကူးမရှိမှန်း သူပြောနိုင်သည်၊ သို့ဖြစ်၍ အရင်သွားနှင့်မည်ဖြစ်ကြောင်း ပြောလိုက်ရခြင်းသာ။

သို့ထိတိုင် တဖက်ကသူတို့အားသွားခွင့်မပေးချေ။ "ကျွန်တော်တို့ တစ်ခါဆုံရဖို့ဆိုတာ အခွင့်အရေးရှားတယ်..အတူသွားရအောင်..."

မော့လန်၏နှုတ်ဆက်မှုက လျစ်လျူရှုခံလိုက်ရသော်လည်း မြို့စားမင်းနှင့်စကားပြောရန်အခွင့်အရေးကို အမိအရဆုပ်ကိုင်ထားပြီး တတ်နိုင်သမျှဆက်ဆံရေးကောင်းရန်ကြိုးပမ်းနေလေသည်။ မော့လန်သည်ကား ၎င်းတို့ကိုလွှတ်ပေးရန် စိတ်ကူးမရှိ။

"ငါတို့အားလုံးကျောက်တုံးရှာနေကြတာပဲဟာ...အချင်းချင်းကူညီရင် အခက်အခဲလည်းမရှိတော့ဘူးပေါ့..."

ရွှယ်လင်သည် နားလည်ရခက်စွာဖြင့် နှာခေါင်းရှုံ့လိုက်ပြီး ယင်ကျားကိုဆွဲကာ လှည့်ထွက်သွား၏။

"မင်းလိုက်နိုင်ရင်လိုက်လာခဲ့ပေါ့..."

သူသည်ကား ရန်လိုသည့်သဘောထားကိုပြလိုက်သည်။ ထိုနည်းလမ်းက သာမန်လူများမတတ်နိုင်သော ခုခံနည်းမျိုးဖြစ်သော်လည်း ရွှယ်လင်ကမည်သူပါနည်း။ သူ့ဘက်တွင်ယင်ကျားရှိနေပြီး သူ့ကဲ့သို့ရွှေပေါင်လုံးကြီးနှင့်သာဆိုလျှင် ရွှယ်လင်က ဤကမ္ဘာပေါ်တွင်ရန်အထောင်ဆုံးလူဖြစ်လာလျှင်ပင် ဘာမှဖြစ်သွားမည်မဟုတ်။

တစ်ချက်လေးကြည့်ရုံဖြင့် စွမ်းအင်ကျောက်ရိုင်း၏ အတွင်းပိုင်းကို မြင်နိုင်လေရာ ဟောက်စုန့်လဲ့နှင့်မော့လန်တို့က သူ့အရှိန်အား လိုက်မမီနိုင်ချေ။

သို့တစေ လက်ရှိလူများက သူ၏စွမ်းအားအကြောင်းကိုမသိကြ။ လူတိုင်းတွင် အတွေးကိုယ်စီရှိကြပြီး မော့ရှီးပင် ရွှယ်လင်၏ယခုလိုရန်လိုနေပုံကိုပင်နားမလည်နိုင်ပေ။ သူသည်ရွှယ်လင်နှင့် ရက်ပေါင်းများစွာကုန်ဆုံးခဲ့ကာ သူ့စရိုက်ကိုနားလည်နိုင်သေးသည်။ သူ၏လက်ရှိသဘောထားကိုကြည့်ပြီး ရွှယ်လင်က သူတို့နှင့်အတူမသွားချင်ဖြစ်နေမှန်း မှန်းဆနိုင်သည်။

သည့်အပြင် ဟောက်စုန့်လဲ့လည်းရှိနေသည်။

ဟောက်စုန့်လဲ့မျက်နှာကမူ အလွန်တရာမှဆိုးရွားနေလေပြီ။ သူသည် ရွှယ်လင်၏စကားများက အထင်အမြင်သေးနေခြင်းဖြစ်ကြောင်း ပုံမှန်အရနားလည်နိုင်၏။ အစက သူဤကမ္ဘာကိုရောက်လာချိန်တွင် နိုင်ချင်စိတ်မရှိခဲ့သော်လည်း လူတစ်ယောက်၏မောက်မာရိုင်းပြမှုကို ဤမျှကြာအောင်ခံစားလာရသည့်အခါ ရွှယ်လင်၏ အပေါ်ထားသည့်စိတ်က ပြောင်းလဲသွားလိမ့်မည်။

ရွှယ်လင်ကိုစိတ်ထဲတွင် အချိန်အတန်ကြာအောင် ကဲ့ရဲ့နေပြီးနောက် နောက်ဆုံးတွင် သူစိတ်ထိန်းလိုက်နိုင်သည်။

မော့လန်၏မျက်လုံးက ရွှယ်လင်နှင့်ယင်ကျားတို့ချိတ်ဆက်ထားသည့်လက်အပေါ် ကျသွားပြီး လူနှစ်ယောက်၏ကျောပြင်ကို အတန်ကြာအောင်စိုက်ကြည့်နေကာ သူ့အစ်ကိုကိုလှည့်ပြောလိုက်သည်။

"အစ်ကိုကြီး...သွားရအောင်..သူတို့အနောက်ကို လိုက်ကြည့်ကြမယ်..."

ယင်ကျားက ရွှယ်လင်ကို အလိုလိုက်လွန်းသည်ဟု ကြယ်တာရာကွန်ရက်မှလူတိုင်းပြောကြသည်၊ မော့လန်ကမူ သူတို့နှစ်ယောက်ကြားမှဆက်ဆံရေးက သွေးသားမတော်စပ်ဟု အမြဲတွေးထားခဲ့သည်။ ယင်ကျား၏တာဝန်သိတတ်သောအကျင့်အရ ရွှယ်လင်အပေါ် ကောင်းမွန်စွာဆက်ဆံပေးခြင်းကဖြစ်သင့်သော်လည်း ရွှယ်လင်ကို ထိုသူနှင့် အလွန်နီးကပ်အောင် ဘယ်တော့မှမထားသင့်ပေ။

ကဲ့ရဲ့ခံရလောက်သည်အထိရင်းနှီးမှုမျိုး။

မော့လန်၏နှလုံးသားထဲတွင် အချက်ပေးသံထွက်လာသည်။ ၎င်းတို့နှစ်ယောက်အနောက်မှလိုက်သွားပြီး နောက်ကွယ်တွင် ဘယ်လိုဆက်ဆံရေးရှိကြောင်းသိချင်လာသည်၊ သို့သော် ရွှယ်လင်က ကျောက်တုံးတစ်တုံးကိုမှမထိမကိုင်ဘဲ မကြည့်ဘဲ ပထမပြခန်းထဲသို့ တိုက်ရိုက်ဝင်သွားသည်ကိုသာ မြင်လိုက်ရ၏။

မော့လန်ကမျက်မှောင်ကြုတ်ကြည့်လိုက်သည်။ ရွှယ်လင်က သူတို့နှင့်မသွားချင်၍ ပထမပြခန်းထဲမှကျောက်တုံးများကိုထားခဲ့ခြင်းပေလား? လမ်းကြောင်းကအဆုံးပိုင်းတွင် ပြန်မကွေ့နိုင်လင့်ကစား နောက်တစ်ကြိမ် အတူသွားနိုင်မည့်အခွင့်အရေးရှိသေးသည်၊ ပထမပွဲစဥ်၏ပြခန်းတွင်လည်း ကောင်းသည့်ကျောက်များမရှိနိုင်ပေ။

သို့သော် ရွှယ်လင်က သည်ဧရိယာကိုလက်လျှော့လိုက်သည့်အတွက် မော့လန်၏စိတ်ကို ပါးပါးမျှထိခတ်သွားစေခဲ့သည်။

ဒီလိုလုပ်ပြီးခြောက်ဖို့လိုလို့လား?

ယင်ကျားက ရွှယ်လင်၏လုပ်ရပ်ကြောင့် အံ့ဩသွားပုံရပြီး သူ့အားဖြည်းဖြည်းချင်းအရှိန်နှေးသွားစေသည်။

"ယွင်အာ...မင်း ကျောက်ရိုင်းတွေကို လိုက်ရှာနေတာမဟုတ်ဘူးလား.."

ရွှယ်လင် သွားနေရာမှရပ်သွားပြီး သူ့အားမော့ကြည့်လာ၏။

ယင်ကျား: "မင်းအဲဒီလူတွေကိုသဘောမကျရင်...မမြင်သလိုဟန်ဆောင်လိုက်လေ..သူတို့နဲ့ဆန့်ကျင်ဘက်လုပ်စရာမလိုပါဘူး..."

ရွှယ်လင်ကပြုံး၍ခေါင်းညိတ်ကာသက်ပြင်းချလိုက်သည်။

"ဒယ်ဒီ...ကျွန်တော့်ကိုအခုထိနားမလည်သေးဘူးပဲ..."

သူ့အသံကပေါ့ပါးအေးဆေးနေပြီး မထိတထိကျီစယ်နေသလိုပင်။

"ကျွန်တော်ကစိတ်ပြောင်းလွယ်ပေမဲ့ ဒီလိုပွဲမျိုးကို အလွယ်လေးဝင်ခဲ့ရတာမဟုတ်ဘူး..ကျွန်တော်ကဆရာရှာခိုင်းတဲ့ SSS အဆင့် ကျောက်တုံးကို ရှာဖို့ ဒီပြိုင်ပွဲကိုဝင်ပြိုင်တာ..ပထမဧရိယာမှာတစ်ခုမှမရှိဘူး..သူတို့နဲ့ဖက်ပြိုင်မနေတော့ဘူးလေ...တန်လည်းမတန်ဘူး..."

သူပြောသည့်စကားကြောင့် ယင်ကျား၏ခြေထောက်များ ရပ်တန့်သွားသည်။

"မင်းကဖျတ်ကနဲကြည့်ပြီး သင့်တော်တဲ့ကျောက်မပါတာကို အတိအကျပြောနိုင်တယ်..."

ရွှယ်လင် ခြေဖျားထောက်ရပ်ကာ ယင်ကျားကို ခေါင်းငုံ့ရန်လက်ယပ်ပြလိုက်သည်။ ယင်ကျား၏မျက်တောင်လေးများက ကွေးသွားပြီး ကျီစယ်ခံလိုက်ရ၍ မျက်လုံးလေးများတောက်ပလာသော်လည်း ခေါင်းငုံ့ပေးလိုက်သေး၏။

ဤလောကကြီးတွင် သူ့အားခေါင်းငုံ့လာအောင်လုပ်နိုင်သူက သူ့ကလေးလေးတစ်ယောက်သာရှိသည်။

"ကျွန်တော်သာ ဝိညာဥ်စွမ်းအင်သုံးပြီးရှင်းပစ်လိုက်ရင် ဒီကျောက်တွေကဘယ်လောက်ကြီးပြီးလေးတယ်ဆိုတာ အတိအကျသိတယ်..အထဲမှာဘာရှိမယ်ဆိုတာလဲသိတယ်..."

ယင်ကျားမှာ သူ့စကားကြောင့် ခေတ္တမျှငိုင်ကျသွားချိန် ရွှယ်လင်ပိုတိုးကပ်လာကာ နီရဲရဲနှုတ်ခမ်းများမှထွက်လာသော လေပူများက ယင်ကျား၏နားရွက်ကို ပွတ်သပ်သွားခဲ့သည်၊ သူ၏စကားသံတွင် နှာသံအနည်းငယ်ပါနေကာ နူးညံ့ညင်သာနေ၏။

"ကျွန်တော်သာဆန္ဒရှိရင်...အတွင်းရေးတွေပါမြင်နိုင်တယ်...ပြောရရင်..."

သူသည်မူရာမာယာပိုစွာဖြင့် ယင်ကျား၏လက်ဖဝါးတွင် လက်ချောင်းထိပ်ဖျားလေးများသုံးပြီး စက်ဝိုင်းပုံဆွဲလိုက်သည်။

"ဒယ်ဒီက အတွင်းဝတ်တွေကို နေ့တိုင်းအပြည့်အစုံဝတ်တယ်..အမြဲတမ်းလေ..."

ယင်ကျားမှာ ရွှယ်လင်၏အူမြူးနေသောမျက်လုံးများနှင့်ဆုံတွေ့သွား၍ အသက်ရှူပင်ရပ်သွားလေ၏။ ပြန်ထိန်းဖို့ရန် ခက်ခဲနေခဲ့သည်။

သူ့ခမျာ အဖြေပေးရန်အခွင့်အရေးမရဖြစ်နေပြီး ရွှယ်လင်ကမူ တိုးဖွဖွရယ်လာလေသည်။

"ကျွန်တော်က စတာပါ.." သူသည် ယင်ကျားလက်၏ဘေးဘက်ကို ပျော်ပျော်ပင်နမ်းလိုက်ပြီး တစ်ဖက်လှည့်ကာဆက်လျှောက်သွားခဲ့သည်။

ယင်ကျားက မျက်လုံးမှေးကြည့်လိုက်သည်။ သူ့ကလေးက သူ့အားတမင်တကာ နောက်ပြောင်နေသည်ဟုပင် စတင်သံသယဝင်လာလေပြီ။

မတိုင်ခင်က သူသည်စိတ်ရှုပ်ထွေးနေပြီး ရွှယ်လင်၏ အခြားရည်ရွယ်ချက်မျိုးရှိနေသော အပြုအမူများကို သံသယမဝင်ခဲ့ဘဲ သူ့အတွေးများကသာ မသန့်မစင်ဖြစ်နေသည်ဟုသာ ထင်ခဲ့သည်။ ယခုမူ စိတ်တည်ငြိမ်သွားပြီဖြစ်ရာ ရွှယ်လင်၏မထိတထိကျီစယ်တတ်မှုများက ပုံမှန်လိုပင် ရည်ရွယ်ချက်မရှိလျှင် သူမသိဘဲမနေပေ။

သို့တစေ အနှီသူက တမင်လုပ်နေရခြင်းမှာ သူ့အားသဘောကျနေ၍ သို့မဟုတ် အခြားရည်ရွယ်ချက်တစ်ခုကြောင့်ဖြစ်နိုင်သည်....။

ယင်ကျား၏အတွေးများက ထူးဆန်းသည့်နေရာတစ်ခုအထိ နယ်ချဲ့သွားသည်။ ရွှယ်လင် သူ့အားလှမ်းခေါ်လိုက်သည့်အချိန်မှ အသိစိတ်ပြန်ဝင်လာပြီး ကလေးကသူ့အား သံသယအပြည့်ဖြင့်ကြည့်နေသည်ကိုမြင်လိုက်ရသည်။

"ဒယ်ဒီ...သွားမယ်လေ...ဘာတွေငေးနေတာလဲ.."

ယင်ကျား ခေါင်းခါပြလိုက်သည်။

"ဘာမှမဟုတ်ပါဘူး..." ကလေးငယ်က ဘယ်လိုပင်တွေးပါစေ ကိစ္စမရှိ၊ ထိုသူကသူ့ဘေးတွင်ရှိနေပြီ။ သူ၏မိသားစုစာရင်းဝင်ဖြစ်နေပြီး အနာဂတ်တွင် အလွယ်တကူထွက်မသွားနိုင်တော့ပေ။

ရွှယ်လင်သည် ပြခန်းတစ်ဝိုက်ကိုလျှောက်ကြည့်နေပြီး သူလက်လျှော့ခါနီးလေးတွင် သူလိုက်ရှာနေခဲ့သည့် စွမ်းအင်ကျောက်ရိုင်းကို နောက်ဆုံးပြခန်းတွင်ရောက်နေမှန်းတွေ့လိုက်ရ၏။ ရွှယ်လင် ယင်ကျားကိုခြောက်လိုက်ပြီးနောက် ကျောက်တုံးဘေးသို့သွားလိုက်သည်။ ချက်ချင်းပင် ကျောက်တုံးကိုကောက်ကိုင်လိုက်ပြီး ယင်ကျားကို ကိုင်ခိုင်းထားလိုက်သည်။

လူအချို့သည် သူကျောက်အားကိုင်လိုက်သည်ကိုမြင်ကြကာ မရယ်ရမနေနိုင်ဖြစ်သွားကြကာ သူ့အားလှောင်ပြောင်လာကြသည်၊ သို့သော် ကျောက်တုံးကိုင်ထားသည့်ရွှယ်လင်ဘေးမှ ငွေရောင်ဆံပင်နှင့်လူကို တွေ့လိုက်ကြသည့်အခါ ပါးစပ်ပိတ်နေကြရန်သာရွေးချယ်လိုက်ကြ၏။

ငွေရောင်ဆံပင်နှင့်လူက သူတို့ရန်စနိုင်သည့်လူမဟုတ်ရာ သူ့အနောက်မှဆရာသခင်သည်လည်း ဒေါသထွက်နိုင်မည့်လူမဟုတ်။

ရွှယ်လင်က ကျောက်တုံးကို အေးအေးလူလူပင်ရသွားခဲ့သည်။ ၎င်းကအလွန်ကြီးပြီး အထဲတွင်ပါသောစွမ်းအင်ခရစ်စတယ်မှာ ပြန်လည်သန့်စင်ပြီးလျှင်ပင် ရွှယ်လင်ပစ္စည်းတစုံစာလုပ်ရန်လုံလောက်နေပြီ။

သူသည်ယင်ကျားနှင့်အတူ အပြင်ပြန်ထွက်လာသည့်တိုင် သူတို့ဝင်သွားသည်က အချိန်ခဏသာရှိသေးပြီး အချို့လူများဆိုလျှင် ပြိုင်ပွဲကွင်းထဲသို့ တစ်ယောက်ပြီးတစ်ယောက်ဝင်နေရုံသာရှိသေးသည်။

သူအမြန်ပြန်ထွက်လာပုံက ပြိုင်ပွဲတွင်အရှုံးပေးလိုက်ပုံနှင့်တူနေ၏။

ရွှယ်လင် ထိုအံ့အားသင့်နေသောအကြည့်တို့ကို လုံးဝဥပက္ခာပြုထားလိုက်ပြီး ကျောက်တုံးများကို ပြန်လည်သန့်စင်ရန်အတွက် အစောင့်များထံပို့ပေးလိုက်သည်။

ထိုကျောက်က အလွန်ကိုကြီးမားပြီး ပြန်လည်သန့်စင်ရမည့်အချိန်က အလွန်ကြာလိမ့်မည်။ ရွှယ်လင် သန့်စင်ပြီးသောကျောက်များကို ဂရုတစိုက်သယ်ကာ ယင်ကျားပြင်ဆင်ထားသော သေတ္တာထဲထည့်လိုက်ချိန်တွင် ပြိုင်ပွဲကွင်းတစ်ခုလုံး ဂီတသံများထွက်ပေါ်လာခဲ့၏။

ယင်းမှာ အလွန်တရာစိတ်လှုပ်ရှားစရာကောင်းပြီး ကောင်းကောင်းမသိသူများဆိုလျှင် ပွဲကွင်းထဲသို့ အလျင်စလိုပြေးလာရမည့်အချိန်ကောင်းဟုထင်ကြလိမ့်မည်။ အကြောင်းမှာ ပြိုင်ပွဲတစ်ခုလုံး၏အဆင့်ဇယားတွင် လူတစ်ယောက်၏အမည်ထွက်လာ၍ပင်။

ထိုအချိန်၌ ပြိုင်ပွဲတွင်ပေါ်ထွက်လာသည့်လူအရေအတွက်က နည်းပါးလွန်းသေးပြီး စာရင်းပေါ်ရှိလူသည်လည်း နည်းနေသေးသည်။

စာရင်းပေါ်တွင် သာမန်ပြိုင်ပွဲဝင်များထွက်ပေါ်လာသည့်အခါ ဂီတသံမရှိပေ။ ထို့ကြောင့် သာမန်လူများမှာ ရွှယ်လင်နှင့်သူရှာတွေ့ခဲ့သည့် ကျောက်တုံးအမျိုးအစားကိုရှင်းရှင်းလင်းလင်းမြင်လိုက်ရပေပြီ၊ ကျယ်လောင်လှသည့် ဂီတသံကထပ်မံထွက်လာပြန်ပြီး ပြိုင်ပွဲကွင်းအပြင်ဘက်တွင် ရွှယ်လင်ကိုတွေ့ချင်ကြသည့်လူများက ရုတ်တရက်များလာခဲ့သည်။ ပြိုင်ပွဲကွင်းအပြင်ဘက်မှလူများမှာ ရေပြင်ပေါ်သို့ကျောက်ခဲတစ်ခဲပစ်ချလိုက်သလို လှိုင်းထသွား၏။

သို့သော်လည်း ရွှယ်လင်ကမူ အပြင်တွင်စောင့်နေသောယာဥ်ပေါ်သို့တက်ပြီး မြို့စားမင်းအိမ်တော်သို့ပြန်နေပြီဖြစ်သည်။

SSS အဆင့်ကျောက်များက ရှာတွေ့ရန်အင်မတန်ခက်ခဲသည်။ ရွှယ်လင်က ပြိုင်ပွဲတစ်ခုလုံးကိုအောင်မြင်ခဲ့ပြီး ကျောက်တုံးကိုရှာတွေ့ခဲ့သည်။ သို့ဖြစ်၍ ရွှယ်လင် SSS အဆင့်ကျောက်တုံးကို ရှာတွေ့သည့်သတင်းကြားရသည်နှင့် ကြယ်တာရာကွန်ရက်တစ်ခုလုံး နောက်တကြိမ် ပွက်လောရိုက်သွားကြပြန်သည်။

ထိုသတင်းအစအနလေးက စိတ်ပူစရာကောင်းသည့်တိုင် ရွှယ်လင်က စွမ်းအင်ခရစ်စတယ်ကို သုံးရာ့ခြောက်ဆယ်ဒီဂရီလှည့်ရိုက်ပြီး သူ၏ကိုယ်ပိုင်ဟုမ်းပေ့ချ်တွင်ပင် တင်လိုက်သေးသည်။ သူ့ဟုမ်းပေ့ချ်ကို သွားလည်ကြသူတိုင်း ထိုစွမ်းအင်ခရစ်စတယ်လေးကိုတွေ့ကြလိမ့်မည်။

ဤသို့ဖြင့် သူ၏ဟုမ်းပေ့ချ်လေးက နောက်တကြိမ်လာလည်သူများဖြင့်စည်ကားသွားပြန်သည်။ လူတိုင်းက လူတစ်ယောက်ကိုဒေါသထွက်အောင်လုပ်လျှင် သူတို့ကိုယ်သူတို့သေကြောင်းကြံခြင်းသာ ဖြစ်သောကြောင့် အချင်းချင်းနှိုင်းယှဥ်ရန် မဖြစ်နိုင်ကြောင်းပြောကြ၏။ သခင်လေးက အရမ်းတော်လွန်းနေပြီး ကံကောင်းလွန်းနေပြီ! သာမန်လူတွေကိုလွှတ်ပေးထားလို့မရဘူးလား!။

ရွှယ်လင်သည် အောင်မြင်မှုရ၍ အပျော်ကြီးပျော်နေခဲ့သည်။ သည့်အပြင် သူသည်မူလကိုယ်ကို ဘဝတွင်အောင်မြင်ရန် ကူညီပေးချင်ခဲ့၏။ ယခုကဲ့သို့အမုန်းပွားပြီးမနာလိုဖြစ်ခံနေရခြင်းက ပို၍ပင်ကောင်းနေသေးသည်။

ရွှယ်လင်သည် SSS အဆင့် စွမ်းအင်ကျောက်ရိုင်းကိုရခဲ့ပြီး ပြိုင်ပွဲကျင်းပရာ ကွင်းတစ်ခုလုံးအတွင်း အခြားသော ၎င်းအဆင့်ကျောက်များ မရှိတော့ကြောင်း သေချာနေခဲ့သည်၊ ထို့ကြောင့် သူ့အားပြိုင်ပွဲနောက်ဆုံးအဆင့်သို့ တိုက်ရိုက်တက်ခွင့်ပြုကြောင်း အကြောင်းကြားစာရလာမှ စိတ်ချလိုက်နိုင်ပြီး ကြားမှ အပျော်တမ်းပြိုင်ပွဲငယ်လေးများကိုမူ ဝင်မပြိုင်တော့ချေ။

လူအများက ဤကိစ္စအပေါ် မှတ်ချက်ပေးခဲ့ကြသော်လည်း ထိုစည်းမျဥ်းကို ပြိုင်ပွဲစီစဥ်သူများက ပွဲအစတည်းက ချမှတ်ထားခဲ့ပြီး မည်သူကမှလည်း စောဒကမတက်နိုင်ချေ။ ရွှယ်လင်သည် ထိုငြင်းခုန်မှုများအကြားတွင် ဝင်မပါဘဲ သူယူလာခဲ့သည့်ကျောက်ကို အိမ်တွင်စစ်ဆေးနေလေသည်။

အနှီစွမ်းအင်ခရစ်စတယ်မှာ သူ၏အောင်မြင်မှုအတွက် ခြေလှမ်းအစဖြစ်ပြီး နောက်ဆုံးပြိုင်ပွဲအတွက် အသုံးဝင်မည့်အရာလည်းဖြစ်သည်။ နောက်ဆုံးပြိုင်ပွဲတွင် ကျောက်တုံးကိုသန့်စင်ပြီး နေရာတွင်ပင် ထွင်းထုဖန်တီးရလိမ့်မည်။

ထိုအချက်ကြောင့် ရွှယ်လင်ကိုမနာလိုဖြစ်နေသူအချို့က ပြဿနာရှာရန် ချောင်းနေကြလေပြီ။

ထို့အပြင် SSS အဆင့်ကျောက်ကို ထွင်းထုနိုင်သူအားလုံးမှာ မာစတာအဆင့် လက်မှုဆရာများသာ၊ အချို့သော စီနီယာအဆင့်ဆရာများပင်လျှင် SSS အဆင့်ကျောက်တုံးကို အလွယ်တကူစတင်မထွင်းနိုင်ကြပေ။ နောက်ဆုံးပြိုင်ပွဲမတိုင်ခင် လဝက်သာအချိန်ရပြီး ရွှယ်လင်အတွက် SSS အဆင့်ကျောက်ကိုထွင်းနိုင်ရန် လေ့လာရန်အတွက်အချိန်အလုံအလောက်မရဖြစ်နေလေသည်။

Prev Next