MM Story Teller

Chapter 207

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 207

13.14

ရွှယ်လင်က သူ့ခေါင်းပေါ်မှ ယင်ကျား၏လက်ကို ပုတ်ချလိုက်ပြီး ခေါင်းညိတ်ပြလိုက်၏။ "ဟုတ်ကဲ့...ကျွန်တော်ဆရာနဲ့ဆက်သွယ်လိုက်ပါ့မယ်..."

ယင်ကျားက မျက်မှောင်ကြုတ်ကာဆို၏။

"ငါတို့အရင်ပြန်နှင့်ရအောင်..မင်းဝိညာဥ်စွမ်းအားသုံးတာများသွားပြီ...မင်းသေချာအနားယူဖို့လိုအပ်တယ်..."

ထိုစကားကြားရသည့်အခါ ကျောင်းအုပ်ကြီးက ခေါင်းညိတ်ပြီး ပြောလေ၏။

"ဒါဆို သခင်လေးအရင်ပြန်ပြီး အနားယူလိုက်ပါ... ကျွန်တော်တို့ထပ်ပြီး မနှောင့်ယှက်တော့ပါဘူး.."

ရွှယ်လင်မှာ မည်သည့်စကားမှ ထပ်မပြောရသေးခင် ယင်ကျားကသူ့အား လူအုပ်ထံမှအဝေးသို့ဆွဲခေါ်သွားလေ၏။ ထိုသူတို့ သူတို့အားကြည့်လာသည့်မျက်လုံးများက ထူးဆန်းနေသော်လည်း လေးစားမှုများဖြင့်ပြည့်နေ၏။

စနစ်က ၎င်း၏ host ကို သရုပ်ဆောင်ကောင်းကြောင်းပြသလိုက်သည်။ ရွှယ်လင်က မသိသလိုလုပ်နေပြီး အိမ်ပြန်သည့်လမ်းတွင် ယင်ကျား၏ ပုခုံးပေါ်၌ အိပ်ပျော်သွားလေ၏။ သည်တခေါက်တော့ သူတကယ်ပင်ပန်းသွားပုံရသည်။

ယင်ကျားမှာ အကူအညီမဲ့စွာဖြင့် သူ့လက်မောင်းထဲ၌ အိပ်ပျော်နေသည့်ကလေးကို ဖက်ထားလျက် လက်ပေါ်တွင်ထိန်းထားရကာ ယာဥ်ပေါ်မှဆင်းပြီးနောက် အခန်းထဲသို့ကိုယ်တိုင် အရောက်ပို့ပေးရပြန်သည်။

မုရှီးသည် မြို့စားမင်း၏အပြုအမူကို ကျက်သရေရှိလှသော မျက်နှာဖြင့်ကြည့်နေပြီး မြို့စားမင်းက အခြားသူများအပေါ် ဂရုစိုက်ပေးနေ၍ ဝမ်းသာနေပုံရ၏။

ဝိညာဥ်စွမ်းအင်ပိုသုံးလိုက်မိလျှင် ကောင်းကောင်းအနားယူရန်လို၏။ ရွှယ်လင်မှာ နှစ်နှစ်ခြိုက်ခြိုက်အိပ်ပျော်သွားပြီး ပြန်နိုးလာသည့်အခါ အားအင်များပြည့်ဝနေကြောင်း သိရှိလိုက်ရသည်။ အိပ်ရာမှထကာဆေးကြောသန့်စင်ပြီးနောက် အောက်ထပ်ဆင်းလာကာ မုရှီးကို ယနေ့စွမ်းအင်ကျောက်ထွင်းထုသည့်အခြေအနေအကြောင်း မေးကြည့်လိုက်၏။

အားလုံးကို ဧည့်ခန်းထဲတွင် နေရာချထားပြီးပေပြီ။ ထိုသူမှာ တစ်နေ့လည်ခင်းလုံး ထိုင်နေခဲ့ပုံရပြီး သူထွင်းထုထားသည်များကိုကြည့်နေလေ၏။ ရွှယ်လင် အနားရောက်သည့်အခါ တစ်ခုချင်းစီကို အင်မတန်လှပစွာဖြင့် ထုတ်ပိုးထားသည်ကို တွေ့လိုက်ရပေ၏။

ရွှယ်လင်သည် A အဆင့်စွမ်းအင်ခရစ်စတယ်သုံးခုကို မုရှီးထံပေးလိုက်၏။

"ဒါကအစ်မမုအတွက်...ဆံထိုးအဖြစ်အသုံးလည်းရတယ်..ယူထားလည်းရတယ်...သူများကိုပေးလိုက်လည်းရတယ်..ဒါကိုဟိုးခေတ်တုန်းက အဆင်တန်ဆာအနေနဲ့သုံးတာ...ကျွန်တော်အဲဒါတွေအကြောင်းကို အများကြီးရှာထားပြီးပြီ..သေချာကိုဒီဇိုင်းဖော်ထားတာ.."

ဤကမ္ဘာတွင် ဆံထိုး၊ ဆံညှပ်များမရှိပေ၊ ရွှယ်လင်က သူတို့အပျော်ဝတ်နိုင်ရန် လုပ်ပေးထားခြင်းသာဖြစ်သည်၊ မုရှီးက ၎င်းရှေးဟောင်းပစ္စည်းများကို စိတ်ဝင်စားနေပုံရသောကြောင့် သူ့အတွက်ရှာဖွေပြီး တစ်ခုလုပ်ပေးလိုက်ခြင်းဖြစ်၏။

မုရှီးမှာ စိတ်လှုပ်ရှားလွန်း၍ ရွှယ်လင်ကိုပင်ဖက်နမ်းတော့မည်အထိ၊ သို့သော် ယင်ကျားရှိနေသောကြောင့် သူ့ကိုယ်သူစိတ်ထိန်းထားပြီး ရင်ဘတ်ပေါ်တွင် ဖိထားလိုက်သည်မှာ ပြားချပ်တော့မတတ်ပင်။

ရွှယ်လင်မှာ မုရှီး၏ကျေးဇူးတုံ့ပြန်ပုံကြောင့် တစ်မျက်နှာလုံး ရဲတွတ်သွားလေသည်။ လွှတ်ပေးလိုက်ပြီးသည့်နောက် မနည်းအသက်ရှူလိုက်ရပြီး ကျန်သော ပစ္စည်းများကိုယင်ကျားအရှေ့သို့ တိုးပေးလိုက်သည်။

"ဒါက ဒယ်ဒီ့ အတွက်ပါ.."

သူသည် ကျောင်းယူနီဖောင်းကိုလဲဝတ်လိုက်ပြီး ခပ်ရှင်းရှင်း အဖြူရောင်ရှပ်ကိုသာ ဝတ်ထားခဲ့သည်။ အိပ်ရာမှထလာ၍ ဆံပင်များပွယောင်းနေကာ မျက်နှာထက်တွင် ရိုးဖြောင့်ဖြူစင်သော အပြုံးကိုတင်ထား၏။ လက်ထဲသို့လက်ဆောင်ပေးလာသောအခါ ယင်ကျား၏နှလုံးခုန်သံက တမုဟုတ်ချင်းမြန်ဆန်လာပြီး သူ့ကိုယ်သူပင် ပျောက်ဆုံးသွားလုနီးပါးပင်။

၎င်းတို့မှာ အင်မတန်လက်ရာမြောက်သော အဆင်တန်ဆာဆင်ပစ္စည်းများဖြစ်ပေ၏။ ယင်ကျားသည် ထိုပစ္စည်းနှစ်ခုကို အချိန်အတန်ကြာအောင် သည်အတိုင်းသာကြည့်နေခဲ့သည်။ အင်ပါယာ၏ မြို့စားမင်းတစ်ယောက်အနေဖြင့် သူ့အတွက်လိုအပ်ပြီး လိုချင်သည့်အရာမှာ SSS အဆင့် စွမ်းအင်ခရစ်စတယ်များသာဖြစ်ပြီး ၎င်းတို့ကိုသာ မကြာခဏဝတ်ဆင်ခဲ့သည်။ စစ်မြေပြင်မှ ဘုရင်တစ်ပါးအဖြစ် သူ့အတွက်စွမ်းအင်ခရစ်စတယ်က အရေးပါသည်မှာ အထင်အရှားပင်။

နောက်တစ်မျိုးပြောရပါက သူလိုချင်သည့်အရာဟူ၍မရှိဘဲ ဘယ်သောအခါမှ တောင့်တခဲ့ရဖူးခြင်းလည်းမရှိ။

ယင်ကျားတွင် စီနီယာကျသော လက်မှုပညာရှင်ဆရာသခင်အဖွဲ့ရှိပြီး သူ့အတွက် နေ့စဥ် စွမ်းအင်ခရစ်စတယ်များကို ထုလုပ်ပေးရသည်။ ဟယ်လန်ကျို့ယွင်၏အမေက ဤအသင်းတွင်အသင်းဝင်ဖြစ်ခဲ့ဖူး၏။

ယင်ကျားသည်ကား ရတနာပစ္စည်းများကိုသဘောမကျပါချေ။ တကယ်တမ်းတွင် သူ၏စွမ်းအင်ခရစ်များ၏ ပုံသဏ္ဍာန်နှင့်ပတ်သက်ပြီး လိုအပ်နေသည့်ပစ္စည်းဟူ၍လည်း မရှိ။ အသုံးချနိုင်စွမ်းနှင့် သန့်စင်မှုမြင့်သော စွမ်းအင်ခရစ်စတယ်ဖြစ်နေသရွေ့ အသုံးပြုနိုင်သည်။ ဘယ်လိုပုံစံ ထွက်လာပါစေ ကိစ္စမရှိ၊ အကြောင်းမှာ သူလှုပ်ရှားလိုက်သည်နှင့် မည်သည့်နေရာမှ အသုံးမဝင်သည့်ကျောက်ပင် အဆင့်မြင့်စွမ်းအင်ခရစ်စတယ်အဖြစ် ပုံစံပြောင်းသွားပြီး အသုံးချနိုင်သောကြောင့်ပင်။

ယင်ကျား၏ဘဝတွင် ရာနှင့်ချီသောတိုက်ပွဲများရင်ဆိုင်ခဲ့ရကာ အင်ပါယာ၏ မိုးကောင်းကင်ကလည်း သူ့အားကူညီပေးခဲ့သည်။ မြို့စားအိမ်တော်တွင် စွမ်းအင်အပြည့်ဖြည့်ထားပြီး ယင်ကျားသုံး၍ ပြောင်သွားခဲ့သော စွမ်းအင်ခရစ်စတယ်အခွံလွတ်များသိုလှောင်ရန် အထူးနေရာပင်ရှိသေးသည်၊ ထိုပစ္စည်းများမှာ ထိပ်တန်းအဆင့်ပစ္စည်းများဖြစ်ပြီး စွမ်းအင်လုံးဝမကျန်တော့သည်ဖြစ်စေ အနည်းငယ်သာ ထုတ်ပေးနိုင်လျှင်ပင်ဖြစ်စေ ရောင်းလိုက်လျှင် အတော်လေးအဖိုးတန်သေးသည်။

ယခုမူ ယင်ကျားက စွမ်းအင်ခရစ်စတယ်များနှင့်ပတ်သက်၍ ဂရုစိုက်နေမိသည်ကို ပထမဆုံးအကြိမ်အဖြစ် သူ့ကိုယ်သူသဘောပေါက်သွားခဲ့ရခြင်းဖြစ်သည်၊ ထို့နောက် ၎င်းပစ္စည်းများကို ပထမဆုံးအနေဖြင့် အသုံးပြုချင်စိတ်မရှိတော့ချေ။ စွမ်းအင်ခရစ်စတယ်များအတွင်းမှ စွမ်းအင်များကိုအသုံးပြုနေခြင်းမှာ ဖန်တီးထားသူများကို မလေးစားသလိုပင်ခံစားလိုက်ရပြီး ကမ္ဘာကြီးမှ ၎င်းတို့ကို ချီးမြှောက်ပေးသင့်သည်ဟုပင် ထင်လိုက်မိသည်။

ဒီဇိုင်းနှင့် လက်မှုပညာရှုထောင့်မှ ကြည့်လျှင် ရွှယ်လင်ထံ၌ တိုးတက်မှုမရှိသေးသော်လည်း ယင်ကျားမျက်လုံးထဲတွင် အနုပညာ၌ထိပ်တန်းဖြစ်နေ၏။

ယင်းအတွက် အကြောင်းပြချက်မှာ - ထိုအဆင်တန်ဆာပစ္စည်းများကို ထုလုပ်ခဲ့သည့်လူကြောင့်ဖြစ်နိုင်သည်။

သူ၏ပွေ့ဖက်ထားမှုအောက်တွင် အိပ်ပျော်နေခဲ့ပြီး အိပ်ပျော်နေစဥ် အနှီသူ၏ပါးပြင်က သူ့ရင်ဘတ်သို့ ညင်သာစွာပွတ်သပ်နေခဲ့သော ရွှယ်လင်ကို တွေးမိပြီးနောက် သူ့အား တန်ဆာပစ္စည်းနှစ်ခုအားပေးလာသော လူငယ်လေး၏ အပြစ်ကင်းသည့်အပြုံးကို ကြည့်လိုက်မိသည်၊ ယင်ကျားမှာ နူးညံ့မှုကို ကြုံတောင့်ကြုံခဲခံစားလိုက်ရ၏။

"ငါ့အတွက်လား..."

"ဟုတ်တယ်လေ.."

ရွှယ်လင် သူ့ဘေးတွင်ဝင်ထိုင်လိုက်ကာ လက်စွပ်ထည့်ထားသောဘူးလေးကို ဖွင့်ပြလိုက်ပြီး အထဲမှလက်စွပ်လေးကို ဂရုတစိုက်ထုတ်လိုက်သည်။ ၎င်းလက်စွပ်တစ်ခုလုံးကို စွမ်းအင်ခရစ်စတယ်အပိုင်းအစမှပြုလုပ်ထား၏။ ရွှယ်လင်ထံတွင် စွမ်းအင်ခရစ်စတယ်များ၏ စံပြအရောင်များအနက်မှ မင်ရောင်ဖြင့်ပြုလုပ်ထားသော နဂါးပုံစံလက်စွပ်ရှိသည်။ ၎င်းကအတော်လေးကိုကြည့်ကောင်းသည်။ လက်မှုပစ္စည်း၏ အပိုင်းအစလေးနှင့် တူသော်လည်း သန့်စင်ပြီးဖန်တီးလိုက်သည့်အခါ စွမ်းအင်တစ်ခုလုံး၏ ဗဟိုချက်ဖြစ်လာ၏။ သူဝတ်လိုက်သည်နှင့် အတွင်းတွင်ပါသော စွမ်းအင်များကို စုပ်ယူအသုံးပြုနိုင်သည်။

"ကျွန်တော်ဒါကို လဝက်ကြာအောင်စဥ်းစားခဲ့ရတာ..ဒယ်ဒီ့ကို surprise လုပ်ပေးဖို့လေ.."

ထိုသို့ပြောပြီးနောက် ယင်ကျားလက်ကို ပုံမှန်အတိုင်းကိုင်ကာ လက်ချောင်းတစ်ချောင်းကို မြှောက်၍ လက်စွပ်ကို ဝတ်ဆင်ပေးလိုက်၏။

ထိုအပြုအမူက အင်မတန်မှ သဘာဝကျနေပြီး ယင်ကျားလက်ကို ပုံမှန်အတိုင်းလွှတ်ပေးလိုက်သည်ကိုပင် ယင်ကျားမှာသူ့လက်ကောက်ဝတ်ကို ပြန်မရုတ်ဘဲ ယောင်ယမ်းပြီး ခါလိုက်မိသေးသည်။

ပြီးနောက် ရွှယ်လင်က ရင်ထိုးကို ယင်ကျားလက်ထဲသို့ ထိုးထည့်ပေးလိုက်၏။ ရင်ထိုးနှင့်လက်စွပ်က တစ်စုံဖြစ်ပြီး ရင်ထိုးတွင်လည်း အလွန်တရာမှတောက်ပသော အနက်ရောင်နဂါးပုံစံပါရှိသည်။ ရွှယ်လင်သည် ၎င်းပစ္စည်းအများအပြားကို အလှဝတ်ခဲ့ဖူးပြီး ဘူးထဲတွင်ထည့်ထားလျှင်ပင် အလွန်အမြင်လှသည်။ ကိုယ်ပေါ်တွင်ဝတ်ထားလျှင် ပို၍ပင်ကြည့်ကောင်းသေး၏။

ယင်ကျားကခေါင်းညိတ်ပြပြီး ရင်ထိုးကို သပ်သပ်ရပ်ရပ်ဝတ်ထားလိုက်သည်။ ၎င်းက ကလေးငယ်၏ သူ့အပေါ် တွေးပေးခြင်း၏ လက္ခဏာတစ်ခုပင်။

သူသည်ကား မုရှီးပြန်ရောက်လာပြီး ရွှယ်လင်ကိုမှီကာ စကားပြောနေချိန်အထိ မပျော်ရွှင်ခဲ့ရပါချေ။

"ယွင်ယွင်..အစ်မမုကို ဒီဖီးနစ်မကိုဋ်လေး လာကူဝတ်ပေးပါဦး..." သူမသည် အဝတ်အစားပင်လဲထား၏၊ နားကပ်တစ်စုံနှင့် ချုံစန်းဝတ်စုံကို ဝတ်ထားပြီး ခုနစ်လက်မဒေါက်အမြင့်ကိုစီးထားသည်။

ရွှယ်လင်က အရှေ့တိုးသွားကာ ထူးဆန်းနေဟန်ဖြင့် မေးလိုက်မိသည်။ "ဘာလို့ အစ်မမုက ကျွန်တော့်ကို ယွင်ယွင်လို့ခေါ်ရတာလဲ..."

မုရှီး: "သူတို့ကမင်းကို ရှောင်ယွင်လို့ခေါ်ကြတယ်လေ..အဲဒီတော့ ငါလည်းမင်းကိုအဲဒီလိုခေါ်ရင် အဆင်ပြေတာပဲဟာ..မြို့စားကမင်းကိုယွင်အာလို့ခေါ်တယ်..ပြီးတော့ ငါကသူခေါ်သလို လိုက်ခေါ်လို့မရဘူးလေ..ဒီတော့ ယွင်ယွင်လို့ခေါ်တာ ချစ်စရာကောင်းတယ်မလား..."

ရွှယ်လင်၏နှုတ်ခမ်းက တွန့်တက်သွားသည်။ ဤကမ္ဘာတွင် ဆရာသခင်များ၏ကဏ္ဍက ယခုလိုမဟုတ်ခဲ့လျှင် သူ့အားယခုလိုခေါ်သည့်လူများကို သေသည်အထိနှိပ်စက်ပစ်မည်ပင်။ ၎င်းတို့ကသူ့အား နူးညံ့အားနည်းသည့်ပုံစံပေါက်အောင်လုပ်နေပြီး သူ၏ရက်စက်သည့်တစ်ဖက်ခြမ်းကို လုံးဝမသိကြသေးပေ။

ရွှယ်လင်သည် မုရှီးကို ဖီးနစ်မကိုဋ်ကူဝတ်ပေးလိုက်ပြီး မုရှီးအား တစ်ခဏမျှကြည့်ကာပြောလိုက်သည်။ "အစ်မမု..ဒီဝတ်စုံနဲ့သိပ်မလိုက်ဘူး...ကျွန်တော်ဒီနေ့ည ပိုကောင်းတဲ့တစ်စုံပြပေးမယ်..ပြီးတော့ တခြားသူတွေကိုချုပ်ခိုင်းပေါ့.."

မုရှီး ပျော်နေပုံဖြင့် ခေါင်းညိတ်ပြလိုက်ပြီး မြို့စားကိုလှည့်ကြည့်လိုက်သည့်အခါ အကြောင်းအရင်းမသိရဘဲ စူပုပ်နေသည့်မျက်နှာကိုသတိထားမိသွားသည်။ သူမမှာ ခြိမ်းခြောက်ခံလိုက်ရသလို ခံစားရ၍မတ်တပ်ရပ်လိုက်မိပြီး သူမအခန်းကို ပျော်ပျော်ရွှင်ရွှင်ပြန်သွားလေသည်။

ရွှယ်လင် ယင်ကျားဘေးတွင် ပြန်ထိုင်လိုက်ပြီး အစုံလိုက်ပစ္စည်းများတွင်ပါသည့် နားကပ်ကိုထုတ်လိုက်သည်။ ၎င်းက နဂါးပုံကိုအသေးစားပြုလုပ်ထားခြင်းဖြစ်ပြီး ရွှယ်လင်က နားရွက်ဘေးမှ သူ့ဆံပင်များကို ဆွဲလိုက်၏။

ယင်ကျားမှာ နူးညံ့သည့်လှုပ်ရှားပုံကြောင့် ငေးကြည့်နေ၏၊ ရွှယ်လင်သည် ဆံပင်များကို တင်လိုက်ချိန်တွင် ဖြူဖွေးသောလည်တိုင်ကထွက်ပေါ်လာလေ၏။ အချို့အကြောင်းအရင်းများအရ သူ့နှုတ်ခမ်းကအနည်းငယ်ခြောက်လာပြီး သူ့ကိုယ်ထဲတွင်မီးမွှေးလိုက်သလိုပင်။

ရွှယ်လင်၏လက်ထဲတွင် ဘယ်နေရာကရောက်လာမှန်းမသိသည့် အပ်တစ်ချောင်းပေါ်လာသည်။ ၎င်းကစွမ်းအင်ခရစ်စတယ်နှင့်လုပ်ထားသောပစ္စည်းမှ သွန်းလုပ်ထားပုံပေါ်၏။ သူ၏နားသံသီးလေးကိုဆွဲလိုက်ပြီး နားရွက်တွင် အပေါက်တစ်ပေါက် ဖောက်လိုက်သည်။

ယင်ကျားပင် မတုံ့ပြန်ရသေးခင် လူငယ်လေး၏ လက်ချောင်းထိပ်များက နားသံသီးကိုဖြတ်သွားပြီး ထွက်လာသည့်သွေးနည်းနည်းကို သုတ်ပစ်လိုက်သည်။ ဘာမှမဖြစ်သလိုပင် လက်ထိပ်တွင်ပေသွားသည့်သွေးကို လျှာထိပ်နှင့်တို့ကာ လျက်ပစ်လိုက်၏။

လူငယ်လေး၏လက်ချောင်းများမှာ လှပသောနှုတ်ခမ်းလေများအတိုင်းပင် အတော်လေးပန်းရောင်သန်းပြီး ပွတ်သုတ်လိုက်စဥ်တွင်လည်း လက်ချောင်းလေးများက ညင်သာစွာဖြင့်ရွေ့လျားသွားသည်။ လျှာကအနည်းငယ်ခန့်ကွေးနေကာ ရွှယ်လင်က သူ့နှုတ်ခမ်းထောင့်ကို လျက်လိုက်၏။ ယင်ကျား၏အကြည့်ကသူ့အပေါ်ရောက်နေမှန်း သတိထားမိလိုက်သည်တွင် ခေါင်းလှည့်ကာ ယင်ကျားအား ကြည့်ကောင်းသည့်အပြုံးမျိုး ပြုံးပြလိုက်သည်။

ခဏတွင်းချင်းပင် ယင်ကျား၏နှလုံးသားက ကစုန်ပေါက်လာ၏။ မြန်ဆန်နေသောနှလုံးခုန်သံကို သူ့နားထဲတွင်ကြားနေရပြီး ယင်ကျားမှာမိန်းမောသွားရသည်။

ရွှယ်လင်သည် အနှီသူ၏မဖြစ်စဖူး တုံ့ဆိုင်းနေမှုကို လျစ်လျူရှုထားလိုက်သည်။ နားရွက်ကို ဝိညာဥ်စွမ်းအင်ဖြင့်ပိုးသတ်ကာ နားကပ်ဝတ်လိုက်သည်။

ကွန်ပျုတာအသေးစားလေးကိုသုံးကာ သူ့နားရွက်ကို ကျေနပ်အားရစွာကြည့်ပြီး ဓာတ်ပုံရိုက်ကာ ကြယ်တာရာကွန်ရက်ပေါ်တွင်တင်လိုက်သည်။

သူ၏ပင်မစာမျက်နှာမှာ မတိုင်ခင်က သတင်းကြောင့် အားပေးသူများ၏ရှာဖွေမှုကို ခံထားရသည်။ ယခင်က မူလကိုယ်သည် အွန်လိုင်းကိုမသုံးခဲ့၍ သင်ကြားရေးပစ္စည်းများကို ပြန်တင်ထားသည့်ပို့စ်များသာရှိနေ၏။ ရွှယ်လင် ပုံတင်လိုက်သည်နှင့် သူလေ့လာထားသည့်စာအုပ်များ သို့မဟုတ် မုရှီးနှင့်အပြင်သို့ ခိုးထွက်ကာ လည်စဥ်က စားသောက်ထားသည့်ပုံများ စသဖြင့် update တက်လာ၏။

ထိုအချိန်တွင် သူတင်ထားသည့်ပို့စ်များကြောင့် ပရိသတ်ဖြစ်လာသူအနည်းငယ်ရှိသော်လည်း အုတ်အော်သောင်းတင်းဖြစ်ပြီးနောက် လူအများအပြားက သူ၏ဝက်ဘ်ဆိုက်ထဲသို့အကြိမ်ပေါင်းမနည်း လာကြည့်ခဲ့ကြသည်။ ရွှယ်လင်ပုံတင်လိုက်သည့်အခါ ပရိသတ်များက ချက်ချင်းလာကြည့်ကြတော့၏။

လူများက သူ၏ပေ့ချ်ကို vote ပေးကြပြီး ရွှယ်လင်၏ဝက်ဘ်ဆိုက်က ချက်ချင်းပင် ထိပ်ဆုံးတက်သွားလေသည်။

[ဒီမင်းသားလေးရဲ့ ဘေးတိုက်ပုံလေးက အရမ်းကြည့်ကောင်းတာပဲ ~ ]

[သခင်လေးက နားကပ်ဝတ်ထားတယ်။ ဒါမျိုးက လိုက်ဖက်တယ်လို့ပြောရမယ်မလား။ အဲဒီနားကပ်တွေက အရမ်းလိုက်ဖက်တယ်!!!]

[အိုး..သခင်လေးရဲ့နားသံသီးလေး!! ဖယ်ကြစမ်း! ငါအရင်မြည်းစမ်းမယ်!]

[ဝူးဝူးဝူး...ဒီဘေးတိုက်ပုံလေး...ဒီမျက်တောင်ရှည်လေးတွေ၊ ဒီနားသံသီးလေးတွေက သခင်လေးကို အိမ်ခေါ်လာချင်အောင်လုပ်နေတယ်!!! အရမ်းလှတာပဲ!!!]

[အရင်ပိုစတာ...တောက်ပဖို့အချိန်ရောက်ပြီ..မြို့စားမင်းကဓားနဲ့ပြေးလာနေပြီ]

[အရင်ပိုစတာ..စားလို့ကောင်းပါတယ်...ကျေးဇူး(ပုခုံးကိုပုတ်ပေးနေ)]

နောက်ဆုံးတွင် ရွှယ်လင်သည် သူ၏ပရိသတ်များကို အေးအေးဆေးဆေးအမျိုးအစားခွဲနိုင်ပြီဖြစ်သည်။ သူဆိုဖာပေါ်တွင် ကျုံ့ကျုံ့လေးထိုင်နေသော်လည်း မှီထားပြန်လျှင်လည်းအဆင်မပြေမှန်းသိလိုက်ရသည်၊

သူ ခဏတာစဥ်းစားနေပြီးနောက် ယင်ကျားကိုမှီထားလိုက်၏။

Prev Next