MM Story Teller

Chapter 206

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 206

13.13 - သူဝတ်လိုက်သည်နှင့် အနှီသူကသူ့အပိုင်ဖြစ်နေမည်။

ဆရာသခင်၏ရုပ်ရည်က အလွန်ချစ်စရာကောင်းကာ ပါးပေါ်မှကလေးကဲ့သို့ ဖောင်းကစ်နေမှုပင်ကျန်နေသေးသည်၊ ရွှယ်လင်ထက်ပင် 'ချစ်စရာကောင်းသောဆရာသခင်' ဟူသည့်ဂုဏ်ပုဒ်နှင့် ပိုမိုလိုက်ဖက်နေပေ၏။ ပြောရလျှင် အနှီသူက ဇာတ်လမ်း၏ ဒုတိယမြောက်ဇာတ်လိုက်ဖြစ်ပြီး ဇာတ်လိုက် gong ၏ ညီလေး မော့လန်ပင်ဖြစ်သည်။

ဇာတ်လိုက်နှင့်နှိုင်းကြည့်ရလျှင် မော့လန်၏အခြေအနေက ပိုကောင်းပုံရသည်။ သည့်အပြင် ထိုသူက လက်မှုပညာရှင်ဆရာသခင်တစ်ယောက်ဖြစ်ပြီး ကလေးအရွယ်တွင် အားနည်းသောကြောင့် ဝိညာဥ်စွမ်းအင်နိုးထပြီးနောက်ပိုင်း S အတန်းသို့မဝင်နိုင်ခဲ့လျှင်ပင် ထိုသူက အတန်း A ၏ ထိပ်ဆုံးစာရင်း၌ရှိနေလေသည်။ သူသည် အတန်း S သို့ဝင်နိုင်ရန် အကြိုစစ်ဆေးပွဲများစွာကို မရေတွက်နိုင်အောင် ပြိုင်ခဲ့သော်လည်း ကျရှုံးနေဆဲပင်။

သို့သော် ထိုသူသည်ကား ဇွဲကောင်းသည့်လူငယ်လေးပင်။ တစိုက်မတ်မတ်ကြိုးစားလာပြီး နောက်ဆုံးတွင်မူ သူဖြစ်ချင်သောဆန္ဒမှာ ပြည့်သွားခဲ့ပြီး အတန်း S ၏တံခါးကို ခက်ခက်ခဲခဲဖြတ်ကျော်ခဲ့ရရှာ၏။ ထို့နောက် ဇာတ်လိုက်နှင့်အတူ စစ်ဆေးပွဲကို ကျော်ဖြတ်ပြီးနောက် အောင်မြင်ခဲ့သည်။

၎င်းကသာ အနှီစစ်ဆေးပွဲ၏ တိကျသောအကြောင်းအရင်းပင်။

မူရင်းဇာတ်လမ်းတွင် ဟောက်စုန့်လဲ့က သူ၏ရှိထားသော ကိုယ်ကျင့်သိက္ခာဖြင့် ဝိညာဥ်စွမ်းအားကို အဆင့်တစ်ခုအထိမြှင့်တင်နိုင်ခဲ့ပြီး အတန်း S အတွက် စစ်ဆေးပွဲကိုဝင်ပြိုင်နိုင်ခဲ့သည်။ ယင်းမှာ ဟောက်စုန့်လဲ့က ပထမအဆင့်ဗိုလ်မှူးမော့ရှီးနှင့်တွေ့ခဲ့ပြီး စာမေးပွဲအတူဖြေနိုင်ခဲ့သည့် ဇာတ်ကွက်ဖြစ်သည်။

မော့လန်နှင့်ဟောက်စုန့်လဲ့တို့သည် အင်မတန်ခင်သော သူငယ်ချင်းကောင်းများ ဖြစ်လာကြပြီး ဇာတ်လမ်းထဲတွင်လည်း သူက ထိုပုဂ္ဂိုလ်ကိုသဘောကျခဲ့ကြောင်း အကြိမ်ရေမနည်းဖော်ပြခံခဲ့ရသည်၊ သို့သော် တဖက်လူကို ဖွင့်မပြောခင် တိကျသောအဆင့်အတန်းတစ်ခုကို လိုချင်နေခဲ့သည်၊ ထို့နောက် ဇာတ်လမ်းဆုံးသွားသည့်တိုင်အောင် သူ၏ပန်းတိုင်ကိုရောက်သွားခဲ့ပုံမရပေ။

ထို့အပြင် မော့လန်ဆိုသောပုဂ္ဂိုလ်က ယင်ကျားနှင့်လည်း အတော်လေးဆင်တူနေသည်။

မော့လန်သည်ကား ရင်းနှီးလွယ်သူမျိုးမဟုတ်။ ရွှယ်လင် သူ့ကိုလျစ်လျုရှုလိုက်သည့်အခါ သူ့ကိစ္စကိုသာ အာရုံပြန်စိုက်သွားပြီး နောက်ထပ်စာမေးပွဲအတွက် စတင်ပြင်ဆင်နေလေသည်။

သူသည်ရွှယ်လင်ထက် တစ်နှစ်ပိုကြီးပြီး နောက်နှစ်တွင် အရွယ်ရောက်စာရင်းထဲသို့ ဝင်တော့မည်ဖြစ်သည်။ အရွယ်ရောက်လာသည်နှင့် ပထမအလွှာတွင် အလုပ်လုပ်ရန် အားခဲထားသည့်တိုင် ပထမအလွှာအတွက် ပထမတန်းစာရင်းဝင် စွမ်းအင်ကျောက်ထွင်းထုသူဆရာတစ်ယောက်ဖြစ်ရန် S အတန်းမှ ဘွဲ့လက်မှတ်ရှိရန်လိုပေ၏။ ထို့နောက် ရွေးချယ်ပွဲများ အများအပြားရှိပြီး S အတန်းသို့မဝင်နိုင်ခဲ့ပါက မျှော်လင့်ချက်မရှိတော့ပေ။ ထို့ကြောင့်ပင် မော့လန်က ဤမျှနှစ်အကြာကြီး မဆုတ်မနစ် ကြိုးစားနေရခြင်းပင်ဖြစ်သည်။

သူသည်ခေါင်းမော့ပြီး စာမေးပွဲအားကြည့်ရှုနေသည့် ပရိသတ်များထံ ကြည့်လိုက်သည်။ သူ့အကြည့်များက အပေါ်ယံရွေ့လျားသွားကာ အဆုံး၌ လူတစ်ယောက်၏ ပုံရိပ်အရောက်တွင် တိကနဲရပ်သွားလေသည်။

အနှီသူသည်ကား ဤတစ်ကြိမ်တွင်မူရောက်လာခဲ့ပြီပင်။ မော့လန်မှာ အခွင့်အရေးကိုအမိအရဖမ်းဆုပ်ပြီး S အတန်းကို အောင်အောင်မြင်မြင်ဝင်နိုင်ရန်လို၏။ အနည်းဆုံးတော့ သူ၏အနာဂတ်အစီအစဥ်များအတွက် အသုံးချရန် ပုံရိပ်ကောင်းများ ချန်ထားခဲ့ရန်လိုသည်။

ရွှယ်လင်သည်ကား ဘယ်သောအခါမှ ပရိသတ်အပေါ်အားမကိုးပေ။ အချက်ပြပေါ်လာသည်နှင့် စွမ်းအင်ကျောက်ရိုင်းကို စတင်ရွေးချယ်လိုက်သည်။

မူရင်းဇာတ်လမ်းထဲ၌ စာမေးပွဲအကြောင်း အသေးစိတ်ဖော်ပြထားမှုကို သူမှတ်မိနေသည်။ ဇာတ်လိုက်အတွက် ပြင်ဆင်ရန် ဤတခေါက် စွမ်းအင်ကျောက်ရိုင်းများထဲတွင် SS အဆင့်စွမ်းအင်ခရစ်စတယ်များ ပါဝင်နေသည်။ ဇာတ်လိုက်၏စွမ်းရည်က ပျဥ်းမျှအဆင့်သာရှိသေး၏။ သူ့ထံတွင် ကျောက်၌ ထူးခြားမှုရှိကြောင်းသိပြီး ရွေးချယ်နိုင်သော်လည်း သန့်စင်နေသည့်အချိန်အတွင်း စွမ်းအင်ခရစ်စတယ်ကို အပြည့်အဝသန့်စင်ပေးနိုင်ခြင်း မရှိသလို ထွင်းထုနိုင်ခြင်းလည်းမရှိပေ။ ဤသည်မှာ ဖယ်ထုတ်ခြင်းအတွက် အဓိကကျသည့် အကြောင်းအရင်းဖြစ်ပြီး အမှတ်လည်းပိုရနိုင်လိမ့်မည်။

သို့သော် ရွှယ်လင်၏ တည်ရှိနေမှုကြောင့် ဇာတ်လိုက်က စာမေးပွဲအောင်မြင်ဖို့ မလွယ်ကူနိုင်တော့ပေ။

ထိုကျောက်များအားလုံးကို ရွှယ်လင်၏မျက်လုံးက အကဲဖြတ်ပြီးသားဖြစ်ပြီး သူ၏အာရုံထဲတွင် ၎င်း၏ပုံသဏ္ဍာန်၊ အရွယ်အစားနှင့် စွမ်းအင်ကျောက်ရိုင်းများက အင်မတန်ရှင်းလင်းနေ၏။ သို့ဖြစ်၍ ရွေးချယ်ဖို့ရာ သူ့အတွက် အချိန်အများအပြား မလိုအပ်ပေ။ သူက ကျောက်များအပေါ် ခြုံငုံကြည့်လိုက်ပြီး အကောင်းဆုံးကျောက်တစ်တုံးကို ရွေးချယ်လိုက်သည်။

အရင်ဆုံး SS အဆင့် စွမ်းအင်ခရစ်စတယ်ပါနေသော စွမ်းအင်ကျောက်ရိုင်းကို ရွေးချယ်လိုက်သည်။ စွမ်းအင်ခရစ်စတယ်သုံးခုကို ယင်ကျားအတွက် ပစ္စည်းထုလုပ်ပေးရန် ရွေးချယ်လိုက်ရာ အကောင်းဆုံးပစ္စည်းများကိုသာ ရွေးချယ်ရပေမည်။ ကျန်နေသေးသော ကျောက်နှစ်တုံးမှာ S အဆင့်များတွင် သန့်စင်မှုအမြင့်ဆုံးဖြစ်ပြီး ၎င်းတို့၏ပုံသဏ္ဍာန်က ရွှယ်လင်လိုချင်သည့်အရာနှင့် ထပ်တူကျနေသည်။

ကျောက်ရိုင်းများကို ရွေးချယ်ပြီးသည့်နောက် ၎င်းတို့ကို စက်ထဲသို့ အစဥ်လိုက်အတိုင်းထည့်လိုက်၏။ သူနောက်တစ်ခန်းသို့ သွားတော့မည့်အချိန်တွင် မော့လန်ကစွမ်းအင်ကျောက်ရိုင်းတစ်တုံးကိုသာ ရွေးရသေးသည်။

ရွှယ်လင် သူ့ကိုပြန်လှည့်ကြည့်လိုက်ရာ မော့လန်၏ ချစ်စရာကောင်းကာ တုံးခနဲလဲသေသွားနိုင်လောက်သော အပြုံးမျက်နှာလေးဖြင့် ရင်ဆိုင်လိုက်ရပေ၏။ ရွှယ်လင်က မျက်ခုံးပင့်ပြီးနောက် ထွက်သွားခဲ့သည်။

အနှီကလေးက တော်လွန်းသည့် ပြိုင်ဖက်မဟုတ်ပေ၊ အမေဖြစ်သူ ကျေနပ်စေရန် ကြိုးစားပြနေသော ကြယ်ကွန်ရက်မှ ကလေးတစ်ယောက်နှင့် မခြားဘဲ ထိုလူအတွက်သာ ကြိုးစားပြနေသလိုပင်။

ရွှယ်လင်မှာ ထိုသို့တွေးလိုက်မိပြီး ရယ်ချင်လာရကာ နောက်ဆုံးတွင် ပရိသတ်များထဲမှ ယင်ကျားထိုင်နေသောနေရာသို့ လှမ်းကြည့်လိုက်၏။ မထင်မှတ်ဘဲ သူမော့ကြည့်လိုက်သည့်အခါ ယင်ကျားကလည်း သူ့အားကြည့်နေသည်ကို မြင်လိုက်ရသည်။ ရွှယ်လင်မှာ ထိုမျက်ဝန်းနက်တစ်စုံအတွင်း နစ်မြောသွားရကာ အကြည့်လွှဲရန် အတော်လေးကြိုစားလိုက်ရ၏။ သူသည် ယင်ကျားကို လျှာထုတ်ပြလိုက်ပြီး ယူလာသည့် စွမ်းအင်ခရစ်စတယ်များကို သန့်စင်ရန် ပြင်ဆင်ရလေသည်။

ယင်ကျား၏ စွမ်းရည်ဖြင့်သာဆိုလျှင် အဝေးမှနေ၍ အားလုံးကို ရှင်းလင်းပြတ်သားစွာမြင်နိုင်သည်။ သူသည် ကလေးငယ်လေးက သူ့အား လျှာထုတ်ပြလိုက်သည်ကိုလည်း ကောင်းကောင်းမြင်လိုက်ရပြီး အလွန်တရာမှချစ်စရာကောင်းပေ၏။ သူ့ခမျာ ရယ်ရခက်ငိုရခက်ပင်။

မုရှီးက သူ့ဘက်သို့ ကိုင်းညွတ်ကာမေးလာလေသည်။ "မြို့စားမင်း..အဲဒီ ပေါက်စလေးကို သဘောမကျအောင် ဘာလုပ်ထားသေးလဲ...ကြည့်ဦး..သူမြို့စားကို တစ်ခါမှ လေးစားတယ်လို့ကိုမရှိဘူး..."

ယင်ကျားမှာ အနှီကလေးက သူ့အား တလေးတစားရှိရန် မလိုအပ်သလိုခံစားရသည်။ ထိုသူက ဆက်ဆံရခက်နေရုံသာ။ သူခေါင်းယမ်းလိုက်စေကာမူ ပြန်လည်းမပြောပေ၊ ရွှယ်လင်စာမေးပွဲဖြေနေသည်ကိုပင် ဆက်ကြည့်လိုက်သည်။

တဖက်တွင် ကြယ်တာရာတိုက်ရိုက်ထုတ်လွှင့်နေစဥ်အတွင်း လူနှစ်ယောက်ကြားမှ အပြန်အလှန်ဆက်သွယ်မှုကို မြင်လိုက်ရသူများမှာ ရိုက်ကူးပေးသည့် စက်ရုပ်များကိုကျေးဇူးတင်နေကြလေ၏။ အမျိုးသမီးပရိသတ်များ၏ 'အား..........' ဟူသောအော်ဟစ်သံများက မျက်နှာပြင်ပေါ်တွင် တခဏမျှပြည့်သွားကာ လူနှစ်ယောက်၏မျက်နှာကို နောက်တစ်ကြိမ်ပိတ်ဆို့လိုက်ကြပြန်သည်။

နောက်ထပ်လူတစ်စုမှာ မြို့စားမင်း၏ အင်မတန်အလိုလိုက်သည့် စရိုက်ကြောင့် အသည်းယားစွာ အော်ဟစ်ကြပြန်သည်၊ ၎င်းတို့သည်လည်း မြို့စားမင်း၏ ကလေးများဖြစ်ချင်ကြသည်! မြို့စားမင်းအိမ်တော်တွင် ခွေးလေးကြောင်လေးများ လိုအပ်လာခဲ့လျှင် ပုံစံပြောင်းပြီးပင် ဝင်သွားနိုင်လောက်သည်။

ရွှယ်လင်မှာ အပြင်မှ သွေးရောမုန်တိုင်းတိုက်ခတ်နေသည်ကို သတိမထားမိပါချေ။ သူသည် စွမ်းအင်ခရစ်စတယ်သုံးတုံးလုံးကိုသန့်စင်ပြီး သူ၏မြင့်မားသော ပင်ကိုယ်လိုအပ်ချက်ကြောင့် အခြားသော S အဆင့် စွမ်းအင်ကျောက်တုံးနှစ်တုံးကို SS အဆင့်စွမ်းအင်ကျောက်တုံးအဖြစ် ပြောင်းပစ်ခဲ့သည်။ စာမေးပွဲအတွင်း သူ၏စွမ်းရည်များကို နည်းစနစ်မကျမှုအနောက်တွင် ဖုံးထားရန်ရည်ရွယ်ချက်မရှိသလို သူ၏နေရာလွတ်အကြောင်းကို ယင်ကျားအားဖုံးထားရန်လည်း အစီအစဥ်မရှိ။ သူနှင့်ယင်ကျား၏ ဆက်ဆံရေးက မှုန်ဝါးလျော့ရဲနေသေးရာ ရွှယ်လင်က ၎င်းကို သူတို့နှစ်ယောက်ကြားမှ ဆက်ဆံရေးပိုကောင်းလာစေဖို့ရာ အသုံးချရန်စီစဥ်ထားခဲ့၏။

သူတို့နှစ်ယောက်ကြားမှ လျို့ဝှက်ချက်လေးကို မျှပေးရုံဖြင့် သူတို့၏ဆက်ဆံရေးသည်လည်း ပုံမှန်တိုးတက်လာခဲ့ပြီး ဖြည်းဖြည်းချင်း အချိန်ယူသွား၍ရသည်။ မည်သို့ပင်ဖြစ်စေ ယင်ကျားအနားကို ကပ်နိုင်သည့် ဆရာသခင်ဟူ၍ လက်ရှိတွင်သူတစ်ယောက်တည်းသာ။ ယင်ကျားသာ သူ့အားသဘောမကျပါက သူ့အားသဘောကျလာမည့်သူကို မည်သည့်နေရာတွင် သွားရှာရပါမည်နည်း။

သန့်စင်သောအမှုပြီးသည့်နောက် ရွှယ်လင်သည် စွမ်းအင်ခရစ်စတယ်သုံးခုလုံးကို ပေါင်းကာ လိုချင်သည့်ပုံစံရောက်အောင် ညှိယူလိုက်သည်။

စက်က ရမှတ်ကိုတွက်ချက်နေပြီး လူများကလည်း သိပ်မအံ့ဩကြတော့ပေ! ရွှယ်လင်သည်ကား သူတို့ကို ပါရမီရှင်တစ်ယောက် မွေးဖွားလာပုံအား ဖော်ပြထားပြီးဖြစ်ရာ ၎င်းတို့က ရွှယ်လင် မည်သို့သောစွမ်းအင်ခရစ်စတယ်ကို ထုလုပ်သည်ဖြစ်စေ အံ့ဩစရာမဟုတ်တော့ချေ။

ဆုတောင်းလေ!!

၎င်းတို့က S အဆင့် စွမ်းအင်ခရစ်စတယ်များပင်!!!

S Sအဆင့်ပင်ရောက်သွားခဲ့ပြီ!!

သည်တစ်ကြိမ်တွင်တော့ ကျောင်းက တကယ်ပွဲပြီးသွားသလိုခံစားလိုက်ကြရသည်၊

သို့သော်လည်း ရွှယ်လင်က အနှီခရစ်စတယ်များကို သန့်စင်ပြီး SS အဆင့်သို့မြှင့်လိုက်ပြီ!!

ဒီလိုမျိုးက သင်လို့ရောရပါ့မလား!!

သူကအတန်းပြောင်းဖို့လိုသေးလို့လား!!

ဘွဲ့တန်းယူပြီး တသက်လုံးစိတ်ပူစရာမလိုတော့ဘူး!! ဒါလုံးဝကို မာစတာအဆင့်!!!။

အကြောင်းမှာ ယင်းက ယင်ကျားအတွက်ပင်၊ ရွှယ်လင်က လုံးဝနောက်ပြန်မဆုတ်။ ဤတစ်ကြိမ်တွင် ရွှယ်လင်၌ ကိုးဆယ့်ငါးရာခိုင်နှုန်းခန့်သာမက ကိုးဆယ့်ကိုးရာခိုင်နှုန်းအထိ တန်းပြီးသန့်စင်နိုင်သေးသည်။ ထောက်ပံ့ပေးရန်အတွက် စနစ်နှင့် နေရာလွတ်ထဲမှ ကျန်နေသေးသော တစ်လပညာသင်အမွေကိုသုံးခဲ့သည်၊ ရွှယ်လင်၏ ရွှေရောင်လက်ချောင်းမှာ ယခုသုံးရန်အသင့်ဖြစ်နေလေပြီ။

သူသည် လမ်းကြောင်းကို တဖြည်းဖြည်းဖောက်သွားနိုင်မည့် ဉာဏ်ကြီးရှင်ဖြစ်လာရန်မမျှော်လင့်ထားချေ။ သူက မိစ္ဆာတစ်ကောင်သာ ဖြစ်လာချင်နေသည်။ အလွန်တရာမှစွမ်းအားကြီးကာ မည်သူကမှ သူ့ကိုဆန့်ကျင်ပြီး သံသယမဝင်ရဲသည်အထိ။ တောင့်တင်းအားကောင်းသည့် နောက်ခံနှင့်သာဆိုပါက သူ၏အနာဂတ်ကို စိတ်ပူစရာမလိုပေ၊ နောက်ထပ်ပန်းတိုင်တစ်ခုသို့ တည့်တည့်သွားပြီး ယင်ကျားနှင့်နီးစပ်ချင်သည်။

အနှီဒေတာကြောင့် ကြယ်တာရာကွန်ရက်တစ်ခုလုံး ဆွံအမှင်သက်သွားကြ၏။ ရွှယ်လင်၏ နောက်ဆုံးပစ္စည်းစုစုပေါင်းစွမ်းအင်မှာ ကိုးဆယ့်ကိုးရာခိုင်နှုန်းအထိရောက်မည်မှာ သံသယဖြစ်စရာပင်မလိုပေ။ ထို့အပြင် စာမေးပွဲသုံးခုလုံးတွင် ရှော့ခ်ရခဲ့ကြမှာ များလှပြီ။

ရွှယ်လင်မှာ ယခင်လတည်းက စာမေးပွဲတွင် စွမ်းအင်ကျောက်များ ထွင်းထုရန်အတွက် အစီအစဥ်များချထားခဲ့ပြီးသားပင်။ အနှီကျောက်များက ယင်ကျားအတွက်သီးသန့်ဖြစ်၏။ အကြီးဆုံးတစ်ခုကရင်ထိုးဖြစ်ပြီး ကျန်တစ်ခုမှာ လက်စွပ်ဖြစ်သည်။ ကျန်နေသေးသော ခရစ်စတယ်များမှာ ရွှယ်လင်အတွက် နားဆွဲလုပ်မည်ပင်။ အစုံလိုက်ပြင်ဆင်ထားပြီးသော်လည်း ရွှယ်လင်ကမူ ကိုယ်တိုင်ဝတ်ရန်ပြင်ဆင်ထားခဲ့သည်။

ယခုချက်ချင်း လက်စွပ်တစ်စုံမလုပ်နိုင်သော်လည်း သူ၏ပိုင်ဆိုင်မှုအနေဖြင့် နားဆွဲကို ဦးဆုံးလုပ်ချင်ခဲ့သည်။ ယင်ကျားက ၎င်းကိုဝတ်လိုက်သည်နှင့် အနှီသူက သူ့အပိုင်ဖြစ်လာလိမ့်မည်။

သူသည် ဒီဇိုင်းကို ပြင်ဆင်ထားသောကြောင့် ရွှယ်လင်က အလွန်လျှင်မြန်စွာဖြင့် စတင်ထုလုပ်တော့သည်။ ထိုတစ်စုံစာအတွက် အိမ်တွင် အများဆုံးလေ့ကျင့်ခဲ့ပြီး အရင်ထုလုပ်ထားသည်များနှင့် ယှဥ်လိုက်ပါက ၎င်းကို သူအနှစ်သက်ဆုံးပင်။ သူ၏လက်ရှိအစွမ်းအစနှင့်ဆိုလျှင် ထိုပစ္စည်းများက သူထုလုပ်နိုင်သည့် စွမ်းရည်အတိုင်းအတာခန့်ရှိ၏။

လက်ရှိတွင် သူသည် SSS အဆင့် စွမ်းအင်ခရစ်စတယ်များကို မလုပ်နိုင်သေးပါချေ။ တဖက်တွင် ၎င်းတို့က ရှားပါးကာ ရရန်ခက်ခဲသည်။ အခြားတဖက်တွင်မူ ရွှေလက်ချောင်းအတွင်းမှ နည်းစနစ်က SS အဆင့်မှာပင်ရပ်သွားပြီ။ SSS အဆင့် စွမ်းအင်ခရစ်စတယ်ကို ရွှယ်လင်ကိုယ်တိုင် သွန်းလုပ်ရန်လိုအပ်ပြီး သူ၏ကိုယ်ပိုင် ထုလုပ်သည့်နည်းပညာကို အသုံးပြုရမည်။

ဝိညာဥ်စွမ်းအားများက စွမ်းအင်ခရစ်စတယ်သုံးခုကို ရစ်ပတ်သွားကာ စွမ်းအင်ခရစ်စတယ်၏ အတွင်းပိုင်းဖွဲ့စည်းမှုက ရွှယ်လင်၏အရှေ့တွင် ပေါ်လာခဲ့သည်။ သူတွေဝေမနေတော့ဘဲစတင်လိုက်သည့်အခါ နံဘေးမှဖရဲစေ့စားကာ ပွဲကြည့်နေကြသော လက်မှုပညာရှင်ဆရာသခင်များမှာ ထိတ်လန့်ကုန်ကြ၏၊ ၎င်းတို့၏ခေါင်းများထုံထိုင်းသွားကြကာ လက်ချော်သွားသည်နှင့် ထိုစွမ်းအင်ခရစ်စတယ်အပိုင်းအစလေးများ လွှင့်ပစ်လိုက်ရမည်ကို စိုးရိမ်သွားကြသည်။

နောက်ဆုံးအဆင့်တွင် ရွှယ်လင်၏ဝိညာဥ်စွမ်းအင်ကကုန်ခမ်းလာပြီ။ သူ့ထံတွင် ပြင်ပမှအင်အားရှိသေးသော်လည်း ယခုလိုမသုံးပစ်လိုက်နိုင်ပေ၊ နောက်ဆုံးအဆင့်အောင်မြင်သွားပြီးနောက် သူ့မျက်နှာတွင် သွေးရောင်သိပ်မရှိတော့သော်လည်း ကျောက်သုံးခုလုံးအား အောင်မြင်စွာ ထုလုပ်နိုင်ခဲ့သည်။

သုံးခုလုံးကို အဆင့်သတ်မှတ်ရန်အတွက် ပို့ပေးလိုက်သည်။

ကျောင်းက မူလစွမ်းအင်ကျောက်ရိုင်းကို ထောက်ပံ့ပေးထားသော်လည်း နောက်ဆုံးထုတ်ကုန်ကို ကျောင်းသားများထံပေးတတ်သည်။

ထို ကျောက်ရိုင်းများအတွက်ကုန်ကျစရိတ်ကို ၎င်းတို့စာရင်းသွင်းစဥ်တည်းက စာမေးပွဲကုန်ကျငွေအဖြစ် ဖြတ်တောက်ထားပြီးဖြစ်၏။ အဆင့်သတ်မှတ်ပြီးနောက် ကျောင်းက ထိုအရာများကို ထုတ်ပိုးကာ ကျောင်းသားများထံ ပို့ပေးလိုက်သည်။

ရွှယ်လင်သည် နောက်ဆုံးအဆင့်ကို အမှတ်ပြည့်ဖြင့်အောင်ခဲ့၏။ ထိုရတနာများအတွက် တိုက်ရိုက်ထုတ်လွှင့်ခန်းထဲတွင် အမြင့်ဆုံးဈေးဖြင့်စတင်လေလံဆွဲပြီး လူအများကဝယ်လိုကြသည်၊ သို့သော် တစ်ယောက်က အော်ကြီးဟစ်ကျယ်ဖြင့်ပြောကာ စိတ်ဓာတ်ကျသွားစေခဲ့သည်။ "လုပ်စမ်းပါ...ဒီသခင်လေးမှာငွေမရှားပါဘူး..ဒါကိုသူ့အတွက်သိမ်းထားမှာ...ရောင်းစရာအကြောင်းကိုမရှိတာ..."

စာမေးပွဲပြီးသည့်အခါ ရွှယ်လင်မှာ ကျောင်းအုပ်ကြီးနှင့် နောက်တစ်ကြိမ်ထပ်တွေ့ရပြန်သည်။ ယင်ကျားက သူ့အနောက်တည့်တည့်တွင်ရှိနေပြီး သူ့လက်ကိုဆွဲကာ နေထိုင်မကောင်းဖြစ်မဖြစ်ကို စစ်ဆေးနေလေသည်။ ကျောင်းအုပ်ကရယ်မောကာဆိုလာ၏။

"စာမေးပွဲအောင်မြင်သွားတာကို ဂုဏ်ယူပါတယ်သခင်လေး..အတန်းပြောင်းရွှေ့ရာမှာအခက်အခဲလုံးဝမရှိပါဘူး...သခင်လေးက S အတန်းခွဲတစ်ကိုတက်ရပါမယ်..ဆရာကလည်း ကျွန်တော်တို့နဲ့ စာချုပ်ချုပ်ထားပြီးပါပြီ..သခင်လေးကိုတသီးတသန့်နဲ့ စီနီယာအဆင့်အထိ ပညာသင်ပေးနိုင်ဖို့မျှော်လင့်ပါတယ်..သခင်လေးလည်း ဆရာတွေနဲ့အသေးစိတ်ဆွေးနွေးကြည့်ပါ...အဲဒီပုဂ္ဂိုလ်က အကြီးတန်းစီနီယာပါ..လက်မှုပညာရှင်ဆရာသခင်တွေထဲမှာအတော်ဆုံးဆရာသခင်ပေါ့..သူကသခင်လေးအတွက် အသင့်လျော်ဆုံးဆရာဖြစ်ပါလိမ့်မယ်..."

Prev Next