MM Story Teller

Chapter 204

Viewers 32k

Chapters 240

🦊Arc 13 [စွမ်းအင်ကျောက် လက်မှုပညာရှင်]

Chapter 204

13.11 - တစ်ချို့အရာတွေက အခု သိသိသာသာကို ကွဲပြားသွားပြီ

စက္ကန့်အနည်းငယ် ကြာသည်အထိ တိတ်ဆိတ်သွားပြီးနောက် ရွှယ်လင်က မတ်တပ်ရပ်ကာ ခေါ်လိုက်သည်။

" ဒယ်ဒီ..."

ယင်ကျား ခေါင်းညိတ်ပြလိုက်ပြီး သူ့အမူအရာက အနည်းငယ် နူးညံ့သွားလေသည်။ သူက ရွှယ်လင်ကို လက်ယပ် ခေါ်လိုက်သည်။

"ဒီကိုလာ"

နာခံသော ကလေးလေး ရွှယ်လင်က လိမ္မာစွာ သူ့အနားသို့ သွားလေသည်။ သူက ယင်ကျားဘေးတွင် မတ်တပ်ရပ်လိုက်ချိန်တွင် ယင်ကျားက သူ့ခေါင်းကို လက်ဖြင့် ပွတ်လိုက်ပြီး မေးလိုက်သည်။

" မင်း ဒဏ်ရာရသွားသေးလား..."

"မရပါဘူး သူတို့နဲ့ နည်းနည်း အငြင်းအခုံ ဖြစ်ရုံလေးပါ သူတို့ထဲက တစ်ယောက် နှစ်ယောက်လောက်က လူစကားကို နားလည်ပုံ မပေါ်ဘူး"

ယင်ကျား၏ နှုတ်ခမ်းများက တွန့်ကွေးသွားလေသည်။ သူက ရွှယ်လင့်ခေါင်းကို ပုတ်လိုက်ပြီး သူ့ဘေးတွင် ရပ်နေခိုင်းလိုက်သည်။

"ယွင်အာက ငယ်သေးတယ် နောက်ပြီး အခုအချိန်မှာ သူ အတော်လေးကို ဖြတ်သန်းခဲ့ရတာ ငါ သူ့ကို အရမ်း စိတ်ပူမနေစေချင်ဘူး အဲ့တော့ မင်းတို့ ဖြေရှင်းချင်တဲ့ ကိစ္စမှန်သမျှကို ငါ ဖြေရှင်းပေးမယ် ငါ ကိစ္စတွေကို ကိုင်တွယ်ဖြေရှင်းတဲ့ နည်းလမ်းအပေါ် အကြံပြုချင်တာ ရှိလား..."

တော်ဝင်မိသားစုတွင် အလွန် ထင်ရှားသော အမှတ်အသား တစ်ခု ရှိသည်။ စကြာဝဠာ နဂါး၏ အရေခွံမှာ ငွေရောင်ဖြစ်သည်။ ထို့ကြောင့် တော်ဝင်မိသားစု တစ်စုလုံး၏ ဆံပင်များမှာ ငွေရောင်များ ဖြစ်ကြသည်။ ထို့ပြင် ယခုအချိန်တွင် ငွေရောင်ဆံပင်ရှည်များရှိသည့် တော်ဝင်မိသားစု၏ တစ်ဦးတည်းသော မိသားစုဝင်မှာ မင်းသားယင်ကျားဖြစ်လေသည်။

သူ ဝင်လာသည်နှင့် လူတိုင်းက သူ့ကို သိကြလေသည်။ အဆုံးတွင် သူက စကြာဝဌာတစ်ခုလုံးတွင် ပထမ စစ်ပွဲနတ်ဘုရားဖြစ်သည်။ ကြယ်ကွန်ယက်က နှစ်တိုင်း စစ်နတ်ဘုရားအသစ်ကို ရွေးချယ်သော်လည်း သူက ထိပ်ဆုံးတွင် ရပ်တည်နိုင်နေတုန်းပင်။ ပြောရေးဆိုခွင့်ရှိသူက တရားဝင် အရေးကိစ္စများအတွက် ယင်ကျားနှင့် အချိန်အတော်ကြာ ဖြေရှင်းခဲ့ဖူးသောကြောင့် ယင်ကျားကို သိ၏။ သူ ရုတ်တရက် ရှက်ရွံ့သလို ခံစားလိုက်ရသည်။ ဟောက်ယွမ်လျန်က အသုံးဝင်ပုံပေါ်သော်လည်း သူ တစ်စုံတစ်ရာ ဖြစ်သွားအောင် ပြုလုပ်နိုင်သည့် မစော်ကားသင့်သော လူကိုတော့ စော်ကားမိလိမ့်မည်ဟု မမျှော်လင့်ခဲ့ပေ။

"မာရှယ်" ပြောရေးဆိုခွင့်ရှိသူက ယင်ကျား၏ လက်ကို ကိုင်လိုက်သော်လည်း ယင်ကျားကတော့ ပြန်လည် ဆုတ်ကိုင်ရန် စိတ်ကူးမရှိပေ။

" ဟားဟား သူက မာရှယ်နန်းတော်ရဲ့ သခင်လေး အသစ်ဖြစ်မယ်လို့ ထင်မထားဘူး အခုလေးတင် ကျွန်တော့် လူတွေက အမှားကျူးလွန်မိနေပြီ ကျွန်တော့် မိန်းမနဲ့ ကလေးကိုယ်စား ကျွန်တော် တောင်းပန်ပါတယ် ဒါက အထင်လွဲတဲ့ ကိစ္စ ဖြစ်မှာပါ ကျွန်တော် သခင်လေးကို ပြောတော့မလို့ပဲ ဒါပေမယ့် မာရှယ်က ရောက်တောင်နေပြီ"

ယင်ကျား သူ့ကို စိုက်ကြည့်လိုက်သည်။ သူ့မျက်နှာပေါ်တွင် မည်သည့် အမူအရာကိုမျှ မပြချေ။ သူ့အသံက အေးစက်နေသည်။

" နားလည်မှု လွဲတာလား..."

"ဟုတ်ပါတယ် နားလည်မှုလွဲတာပါ" ပြောရေးဆိုခွင့်ရှိသူက ကူကယ်ရာမဲ့စွာ ပြောလိုက်သည်။

" ဘယ်လိုပဲ ဖြစ်ဖြစ် ဒါက ကလေးတွေကြားက ရန်ပွဲလေးတွေပါ ကျွန်တော်တို့က မိဘတွေအနေနဲ့ ဒီရန်ပွဲထဲကိုပါပြီး ဆက်မလုပ်သင့်ဘူးလေ ဒီနေ့ကိစ္စကို ဒီမှာတင် အဆုံးသတ်သင့်တယ်လို့ ကျွန်တော်ထင်တယ်"

"အဆုံးသတ်ရမယ်..." ယင်ကျား၏ အကြည့်များက အခန်းတွင်းရှိ လူများအပေါ် ကျရောက်သွားပြီး ပြောလိုက်သည်။

" တချို့ကိစ္စတွေက မင်းပြေလည်စေချင်တာ ဒါမှမဟုတ် မင်း အဆုံးသတ်ချင်တာကြောင့်နဲ့ စိတ်လျော့လိုက်လို့ မရဘူး မာရှယ်နန်းတော်က လူတွေက တခြားသူတွေ ကြိုက်သလို အနိုင်ကျင့် ဆူပူ ရိုက်နှက်လို့ရတဲ့ လူတွေမဟုတ်ဘူး"

"ဒါက..."

"ဒီနေ့ကိစ္စကို ကလေးတွေကြားက ရန်ပွဲလို့ မင်း သတ်မှတ်ကောင်း သတ်မှတ်နိုင်ပေမယ့် ငါကတော့ မသတ်မှတ်နိုင်ဘူး"

ယင်ကျားက ယနေ့တွင် စည်းကျော်ချင်နေသည်။ ပထမဦးစွာ လှုပ်ရှားမှု လုပ်ပြီး ရန်ပွဲကို စတင်ခဲ့သူမှာ သူအုပ်ထိန်းနေသော ကလေး ဖြစ်ရုံသာမက တစ်ဖက်လူ၏ ကလေးက အရိုက်ခံရခြင်းဖြစ်ပြီး သူတို့က မမှန်ကန်နေလျှင်တောင် ယင်ကျားက ယနေ့တွင် တစ်ဖက်လူကို လွယ်လွယ်လေး လွှတ်ပေးလိုက်ရန် စိတ်ကူးမရှိပေ။

" ငါ ဟောက်ယွမ်လျန်နဲ့ ဒီကို ရောက်နေတဲ့ စုန့်ယင်းကို ဖမ်းဖို့ လူတွေ လွှတ်လိုက်ပြီ မစ္စစုန့်ယင်းကတော့ ပြန်နေစရာ မလိုတော့ဘူးပေါ့ မင်း ယွင်အာကို အဆိပ်ခတ်တဲ့ အဓိကသက်သေကို ငါတို့ ရထားပြီးပြီ သိပ်မကြာခင် တရားဆွဲဆိုမှု ကြီးကြီးမားမားတွေနဲ့ ရင်ဆိုင်ရလိမ့်မယ်"

စုန့်ယင်း ကြက်သေသေသွားရသည်။ တစ်ဖက်လူမှ သက်သေများကို မည်ကဲ့သို့ ရှာတွေ့သွားသည်ကို မသိပေ။ သူမ ချက်ချင်း ကြောက်ရွံ့ထိတ်လန့်သွားရတော့သည်။

ပြောရေးဆိုခွင့် ရှိသူက ပိုပြောချင်သေးသော်လည်း ယင်ကျား၏ အဓိပ္ပာယ်ပါသော အကြည့်များကို တွေ့လိုက်ရသောအခါ သူ ခြောက်ခြားပြီး ဘာကိုမျှ နားမလည်နိုင်သော အခြေအနေသို့ ရောက်သွားတော့သည်။

"ပြောရေးဆိုခွင့်ရှိသူလည်း ဟောက်ယွမ်လျန်ရဲ့ ကိစ္စကြောင့် အရှေ့အနောက် လျှောက်နေစရာ မလိုတော့ဘူး အဲ့အစား မင်းရဲ့ ရာထူးကိုပဲ စောင့်ကြည့်နေဦး တရားဝင် စွပ်စွဲချက် စာရွက်စာတမ်းတွေကို မနက်ဖြန် ထုတ်ပြန်လိမ့်မယ် မင်း ငါနဲ့ ဒီမှာ စကားပြောဖို့တောင် အချိန်ရှိသေးရင် ပြန်ပြီး ဘာကို ရင်ဆိုင်ပြီး ဘယ်လိုပြင်ဆင်ရမလဲ

သွားကြည့်နေပါ့လား..."

ပြောရေးဆိုခွင့်ရှိသူ၏ နာနိုကွန်ပျူတာက အသံမြည်လာချိန်တွင် ယင်ကျား စကားပြောခြင်းကို ရပ်လိုက်သည်။ သူ ဖုန်းကို ကိုင်လိုက်ပြီးနောက် သူ့မျက်နှာ တစ်ခုလုံးက အဖြူရောင် ပြောင်းလဲသွားလေသည်။ ယင်ကျား ခေါ်လာသော လူများက စုန့်ယင်းကို ဖမ်းလိုက်လေသည်။ ဟောက်စုန့်လဲ့က စုန့်ယင်းကို ကိုင်ထားပြီး သူမကို လွှတ်ပေးရန် ငြင်းဆန်နေသောကြောင့် ဟောက်စုန့်လဲ့ကိုပါ စုန့်ယင်းနှင့်အတူ ဖမ်းဆီးသွားလေသည်။

တရားဥပဒေအမိန့်ကို အဟန့်အတား ဖြစ်စေသောလူများကိုလည်း ဖမ်းဆီးထိန်းသိမ်းထားနိုင်သည်။

ရုံးခန်းက သိပ်မကြာခင် လူရှင်းသွားလေသည်။ ယင်ကျားက ဌာနမှုးဘက်သို့ လှည့်ကာ ပြောလိုက်သည်။

" ကိစ္စတွေကို ဖြေရှင်းပြီးသွားပြီဆိုတော့ အခု ငါ့ကလေး အတန်းပြောင်းဖို့ ကိစ္စကို ဆွေးနွေးလို့ရပြီထင်တယ်"

ထိုလူအုပ်စုအား ယင်ကျားက မုန်တိုင်းကဲ့သို့ ထိထိရောက်ရောက် လျင်လျင်မြန်မြန် ကိုင်တွယ်ဖြေရှင်းသည်ကိုကြည့်နေပြီးနောက် အနည်းငယ် ဆိုးဝါးသလို ခံစားလိုက်ရသည်။ သူ အတော်ကြာ ကြောင်အနေပြီးနောက်မှ ပြောလိုက်သည်။

" မာရှယ် အတန်း ပြောင်းဖို့က မဖြစ်နိုင်တာတော့ မဟုတ်ပါဘူး ဒါပေမယ့် ကျွန်တော်တို့ ကောလိပ်မှာ ကိုယ်ပိုင်စည်းမျဥ်းတွေ ရှိတယ် သခင်ငယ်လေးရဲ့ ပါရမီအရ သူ့ကို အတန်းပြောင်းတာက အကူအညီ ဖြစ်စေမှာ မဟုတ်ဘူး"

"သူ့ရဲ့ ဝိညာဥ်စွမ်းအားက ပြင်ပအကြောင်းအရာတွေကြောင့် နိမ့်ကျသွားရတာလေ သူရဲ့ ပြန်လည်ထူထောင်ရေးကာလပြီးရင် ပြန်ကောင်းလာမှာပါ တကယ်လို့ မင်းက အတန်းပြောင်းပေးဖို့ ဆန္ဒမရှိရင် ငါ ကျောင်းပြောင်းလိုက်ရုံပဲ"

ရွှယ်လင်က နောက်ဘက်မှ ယင်ကျား၏ အင်္ကျီလက်ကို ဆွဲလိုက်သည်။ ယင်ကျားက တစ်ဝက်တစ်ပျက်သာ ပြောရသေးသော်လည်း ခေါင်းလှည့်ကာ ရွှယ်လင်ကို ကြည့်လိုက်သည်။

ရွှယ်လင် ပြောလိုက်သည်

"ဒယ်ဒီ ကျွန်တော် ကျောင်းမပြောင်းချင်ဘူး လုံယွဲ့ကောလိပ်က ကျွန်တော့်အမေရဲ့ ကျောင်းပါ နောက်ပြီး လက်မှုပညာဆရာသခင်တွေအတွက် မြို့တော်ဂြိုလ်ထဲမှာ အကောင်းဆုံး ရွေးချယ်မှုပဲ"

ယင်ကျား မျက်မှောင်ကြုတ်လိုက်သည်။ ရွေးချယ်စရာ မရှိဘဲ ရွှယ်လင်၏ ခေါင်းမာမှုကို လက်ခံလိုက်ရပုံ ပေါ်သည်။

"ဌာနမှုး" ရွှယ်လင်က အလေးအနက်ဖြင့် ဌာနမှုးကို ခေါင်းငုံ့အရိုအသေပေးလိုက်သည်။

" ကျွန်တော် မှတ်မိတာသာ မှန်မယ်ဆိုရင် အတန်းပြောင်းချင်ရင် စစ်ဆေးမှုတွေ လုပ်ဖို့လိုတယ် ကျွန်တော် စစ်ဆေးမှုတွေကို ခံယူဖို့ ဆန္ဒရှိပါတယ် ကျွန်တော် အောင်မြင်သွားရင် ပြောင်းရွေ့နိုင်ဖို့ ကူညီပေးပါဦး "

သူ စည်းမျဥ်းတွေကို လိုက်နာရန် ဆန္ဒရှိနေလိမ့်မည်ဟု ကျောင်းအုပ်ကြီး မမျှော်လင့်ခဲ့ပေ။ လုံယွဲ့ကျောင်းတွင် အတန်းများကို ပြောင်းလဲရန်မှာ မဖြစ်နိုင်ခြင်းတော့ မဟုတ်ပေ။ သို့သော် ပြောင်းလဲရန် စီစဥ်ခြင်း လုပ်ငန်းစဥ်မှာ ရှုပ်ထွေးပြီး ခက်ခဲပေသည်။

ရွှယ်လင်ကို ဥပမာအနေဖြင့် ထားပြီး ပြောရလျှင် သူ ကျောင်း၏ အဆင့်အမြင့်ဆုံး S အတန်းကို ပြောင်းရွေ့ချင်ပါက စစ်ဆေးမှု သုံးခုကို ဖြတ်ကျော်နိုင်ရမည် ဖြစ်သည်။ စစ်ဆေးမှု တစ်ခုချင်းစီတိုင်းကို လိုအပ်ပြီး တစ်ခုမှ ကျော်ချလို့ မရပေ။ ထို့ပြင် စစ်ဆေးမှု တစ်ခုချင်းစီတိုင်း၏ ခက်ခဲမှုအဆင့်က ပို၍ တိုးလာမည်ဖြစ်သည်။ ထို့အပြင် စစ်ဆေးမှုတွင် ပါဝင်သော အကြောင်းအရာများက S အတန်းရှိ ကျောင်းသားများ ဖြတ်သန်းရန်ပင် မလွယ်ကူသော အရာများ ဖြစ်သည်။

ပြောရမည်ဆိုလျှင် အဆင့်အမြင့်ဆုံး အတန်းသို့ ဝင်နိုင်ရန်အတွက် အမြင့်ဆုံး အဆင့်ကို ရောက်ရန် လိုအပ်ပေသည်။

ထို့ပြင် စကြာဝဌာတစ်ခုလုံးတွင် အဆင့်အမြင့်ဆုံး စွမ်းအင်ကျောက်ထွင်းဆရာများမှာ လက်ချိုး ရေတွက်လို့ပင် ရနိုင်သည်။ သူတို့အားလုံးက မာစတာအဆင့်တွင် ရှိပြီး သူတို့ကျောင်းတက်နေတုန်းက ဤအဆင့်သို့ မည်သူကမျှ မရောက်ခဲ့ကြပေ။

ထိုကဲ့သို့ ခက်ခဲကြမ်းတမ်းသော အခြေအနေမျိုးကြောင့် ယင်ကျားက စည်းမျဥ်းများကို ကျော်ဖြတ်ချင်ပြီး ရွှယ်လင်ကို တိုက်ရိုက် အတန်းပြောင်းစေချင်ခဲ့ခြင်းပင်။ သူ၏ ချစ်စရာ ကလေးလေးကို မပင်ပန်းစေချင်ပေ။ ထိုကဲ့သို့ စစ်ဆေးမှုမျိုးက အားလုံးကို တစ်ပြိုင်နက် ဖြတ်ကျော်ရမည် ဖြစ်ပြီး အစွမ်းကုန် ပြင်ဆင်ရမည်ဖြစ်သည်။

ရွှယ်လင်က ၎င်းကို လုံးဝ စိတ်ထဲမထားပေ။ သူက ပြောင်းရွေ့ခြင်း စစ်ဆေးမှုကို လျှောက်ထားရန် မူလတည်းက ပြင်ဆင်ခဲ့ခြင်းပင်။ အဆင့်တက်စေရန်အတွက် ယင်ကျား၏ စွမ်းအားများကိုသာ မှီခိုနေခြင်းက သူ့အတွက် မသင့်တော်ပေ။ စွမ်းအားက အရာအားလုံးကို အနိုင်ယူနိုင်သည့် ဤကမ္ဘာပေါ်တွင် သူ့တွင် လူတိုင်း မော့ကြည့်နိုင်လောက်သည့် စွမ်းအား အလုံအလောက် ရှိလျှင် ဝေဖန်ခံရမည့် အရာများကို ရှောင်ရှားရမည်ဖြစ်သည်။

ရွှယ်လင်၏ အပြင်းအထန် တောင်းဆိုမှုကြောင့် ဌာနမှုးက သူ့အတွက် ပြောင်းရွေ့ခြင်း စစ်ဆေးမှုများကို ပြုလုပ်ခွင့်ပေးလိုက်တော့သည်။ ထို့ပြင် ယင်ကျားထံမှ အေးစက်သော အငွေ့အသက်များကြောင့် ဌာနမှူးက စစ်ဆေးမည့်ရက်ကို တစ်လအကြာတွင် သတ်မှတ်ပြီး ရွှယ်လင်၏ ဝိညာဥ်စွမ်းအားများကို ပြန်လည် ရရှိစေရန် အချိန် အလုံအလောက် ပေးလိုက်သည်။

ထိုသို့ဆိုလျှင်တောင် ရွှယ်လင်က ပြောင်းရွေ့ခြင်း စစ်ဆေးမှုကို အောင်အောင်မြင်မြင် ဖြတ်ကျော်နိုင်မည်ဟု သူ မထင်ပေ။

အရာအားလုံးကို ဖြေရှင်းပြီးနောက် ရွှယ်လင်က အတန်းသို့ ပြန်သွားရန် ရည်ရွယ်လိုက်သည်။ သို့သော် ယင်ကျားက သူ့ကို အဝေးသို့ ခေါ်သွားလေသည်။ နောက်တစ်လအတွက် သူ့ကို အထူးဆရာများခေါ်ကာ သင်ကြားပေးမည်ဖြစ်ပြီး ထိုအတောအတွင်း ကျောင်းသို့ လာရန် မလိုဟု ယင်ကျားက သူ့ကို ပြောသည်။ အတန်းထဲတွင် သင်ကြားခြင်းက သူ့ စာလေ့လာမှုကို အနှောက်အယှက် ဖြစ်စေရုံသာမက မည်သည့် အကျိုးအမြတ်ကိုမျှ ရမည်မဟုတ်ပေ။

ရွှယ်လင်က မကောင်းဆိုးဝါးဆန်စွာ ရယ်လိုက်ပြီး စိတ်ထဲတွင် ပြောလိုက်သည် ' အချစ်ရေ ခင်ဗျားက အရမ်းတုံးတာပဲ ကျွန်တော့်မှာ plug-in ရှိတယ်လေ'။ ထို့နောက် ယင်ကျား သူ့ကို ခေါ်သွားခွင့်သာ ပေးလိုက်သည်။

သူ မသိသည်မှာ ယနေ့ညတွင် ယနေ့ဖြစ်သည့် ကိစ္စကို တစ်စုံတစ်ယောက်က ကြယ်ကွန်ရက်တွင် တင်လိုက်ခြင်းပင်။

ထိုပိုစ့်ကို ကောလိပ်မှ ပိုစ့်ရေးသူ တစ်ယောက်က ဖိုရမ်တွင် ပိုစ့်တင်ကာ ရေးသားခဲ့ခြင်းဖြစ်သော်လည်း တစ်စုံတစ်ယောက်က ၎င်းကို ကောလိပ်အတွင်းပိုင်း ကွန်ရက်တွင် ပို့လိုက်ပြီး ကြယ်ကွန်ရက်တွင် မျှဝေလိုက်လေသည်။ လူထုထံတွင် ဖော်ပြထားသော မာရှယ်၏ ပုံစံမှာ အလွန်နည်း၏။ ထို့ပြင် fangirl များက သူတို့ကျောင်းတွင် မာရှယ် သူ့ကလေး၏ ပြဿနာများကို လာရောက်ဖြေရှင်းမည်ဟု မမျှော်လင့်ခဲ့ကြပေ။

အဲ့ဒါက သူ့ပုံရိပ်ကို အရမ်း ထိခိုက်စေတယ်မလား...။

ဒါ အမှန်မဟုတ်ဘူး... မာရှယ်က လက်မထပ်ရသေးဘူးလေ...ဒီကလေးက ဘယ်က ထွက်လာတာလဲ...။

ထိုနေ့ညတွင် fans များက ကြယ်ကွန်ရက်၌ တစ်ညလုံး ရှိနေကြပြီး ရွှယ်လင်၏ အထောက်အထား၊ အတိတ်များ၊ ယခုရက်ပိုင်းအတွင်း ဖြစ်ခဲ့သော အရာများ၊ ထို့နောက် မာရှယ်၏ နန်းတော်တွင် သခင်လေး ဖြစ်လာခဲ့ကြောင်း စသည်တို့ကို ရှာဖွေကြလေသည်။

မရေတွက်နိုင်သော ဆရာသခင် များက လိုင်းပေါ်တွင် ညည်းညူနေကြသည်။ လက်မှုဆရာသခင်ကာကွယ်ရေးအဖွဲ့အစည်းက မာရှယ်ရဲ့ နန်းတော်ကို သခင်လေး တစ်ယောက်ကို ပို့ရလောက်တဲ့အထိ ရက်စက်ဖို့လိုလို့လားဟု မေးနေကြလေသည်။ သူတို့လည်း အဲ့လို ဖြစ်ချင်တယ်လေ... သူတို့လည်း အိမ်မှာ မပျော်ဘူး... မာရှယ် ကျေးဇူးပြုပြီး သူတို့ကိုလည်း မွေးစားပါ... မာရှယ် ကျေးဇူးပြုပြီး သူတို့ကို ကျောင်းလိုက်ပို့ပေးပါ...အဲ့ဒီ ပေါင်လုံးကြီးကို ဖက်ခွင့်ပြုပါ...။

ရွှယ်လင် ယာဥ်ပျံပေါ်မှ ဆင်းနေသည့်ပုံများနှင့် ယင်ကျား သူ့ကို ခေါ်သွားသော ဓါတ်ပုံများမှာ အင်တာနက်ပေါ်တွင် ပလူပျံနေသည်။ မြို့တော်ဂြိုလ်နှင့်ဝေးသော နေရာများတွင်ပင် သူ့ပုံစံကို တွေ့ပြီး သူ့ကံကောင်းမှုကိုလည်း သိပြီးသော လူများမှာ မရေတွက်နိုင်ပေ။ သူ၏ ကြောက်မက်ဖွယ်အတိတ်ကို သနားကြသော်လည်း သူ၏ အထောက်အထားအသစ်ကို ပို၍ မနာလိုဖြစ်ခဲ့ကြသည်။

လူအများစုက သူတို့လည်း မာရှယ့်ထံမှ မွေးစားခံလိုကြောင်း ပြောကြလေသည်။ သူတို့ရဲ့ အဖေတွေနဲ့ အမေတွေ ကျေးဇူးပြုပြီး သူတို့ကို ပါးရိုက်ပေးလို့ရမလား...။

အချို့ရည်မှန်းချက်ကြီးသော လူများက ပြောကြလေသည်။

" ဘာတွေ ငိုယိုနေတာလဲ... ဒါက အခွင့်အရေးကောင်းလေ ဘယ်လို ဆုတ်ကိုင်ရမလဲ မသိဘူးလား... မာရှယ်က ဒီ ကလေး လေးကို တကယ် ဂရုစိုက်ပုံပေါ်တယ် တကယ်လို့ မင်းတို့သာ သူလေးကို စိတ်ကျေနပ်အောင် လုပ်နိုင်ရင် မာရှယ်ကို စိတ်ကျေနပ်အောင် လုပ်ပေးတာနဲ့ တူတူပဲလေ...မင်းတို့ အရူးတွေ မင်းတို့ရဲ့ ပန်းတိုင်က ဒီ ကလေး လေးရဲ့ နောက်ထပ်မိဘတစ်ယောက် ဖြစ်လာဖို့ပဲ ဖြစ်သင့်တာ မလား..."

ကိုယ့်ကိုယ်ကို သိသော လူတစ်ချို့က ပို၍ ရိုးရှင်းစွာ ပြောကြလေသည်။

" ငါ တခြားအရာတွေကို မတောင်းဆိုပါဘူး မာရှယ်ရဲ့ မွေးစားသား ဖြစ်လာဖို့ပဲ ဆုတောင်းတာ ငါ ကျိန်းသေပေါက် လိမ္မာပြီး မာရှယ်ဒယ်ဒီအပေါ် လုံးဝ ပြသနာ ရှာမှာမဟုတ်ဘူး ငါ တစ်နေ့လုံး ကစားစရာ ကောင်လေးတွေနဲ့ ဖလစ်မှာ နောက်ပြီး ကျောင်းမှာ မာရှယ်ဒယ်ဒီ ငါ့အတွက် ရပ်တည်ပေးစရာ မလိုဘူး"

ထိုညက ရွှယ်လင် ကြယ်ကွန်ရက်ပေါ်တွင် အချိန်ဖြုန်းရင်း အနည်းငယ် စိတ်ခံစားချက်ဆိုးသွားလေသည်။ သူ၏ အကြိုက်များကို လေ့လာနေပြီး သူ့အဖေ သို့မဟုတ် သူ့အမေ ဖြစ်လာရန် ကြိုးစားနေကြသော လူအများအပြားရှိနေခြင်းကြောင့်ပင်။

အကူစနစ်လေးကလည်း အတင်းအဖျင်းများကို တွေ့သောကြောင့် သေချာကြည့်လိုက်ပြီးနောက် ရွှယ်လင်ကို ပြောလိုက်သည်။

" စိတ်လျော့ပါ သူတို့က လိုင်းပေါ်မှာပဲ ပြောနိုင်တဲ့လူတွေပါ ဘယ်သူမှ host ကို ယှဥ်နိုင်မှာ မဟုတ်ဘူး host ကြိုးစားပါ အရင်ရောက်ရင် အရင် ခံစားခွင့်ရမယ် ယုန်တွေက အသိုက်နဲ့နီးတဲ့ မြက်ကို စားရတာ ကြိုက်တယ်လေ host ရဲ့ ဒယ်ဒီကို မြန်မြန် အပိုင်သိမ်းနိုင်အောင်လုပ်...အဲ့ဆန်ကုန်မြေလေး တစ်သိုက်ကို ကလေးရော ချစ်သူရော ဖြစ်ရတယ်ဆိုတာ ဘယ်လိုလဲ ပြလိုက်..."

ရွှယ်လင် : "သွားစမ်း"

အကူစနစ်လေး : "...ကျွန်တော် ပြောတာ ဘာမှားလို့လဲ... ကျွန်တော် ပြောတာ တစ်ခုမှ အမှားမပါဘူးလေ အဲ့ဒါ host ရဲ့ ပန်းတိုင်ပဲမလား..."

ရွှယ်လင် အေးစက်စွာ နှာမှုတ်လိုက်သည်။ ကမ္ဘာများစွာကို ဖြတ်သန်းပြီးနောက် သူ နားလည်သလောက်ဆိုလျှင် ထိုယောက်ျားက သူ့ကို ကလေးတစ်ယောက်လို သတ်မှတ်ထားလေသည်။ သူ့အပေါ် ချစ်ခင်ကြင်နာသော်လည်း ထိုကဲ့သို့ နည်းလမ်းဖြင့်တော့ မဟုတ်ပေ။ ထိုယောက်ျားတွင် သူ့အပေါ် ထိုကဲ့သို့ စိတ်ခံစားချက်မျိုး မရှိသည်မှာ မြင်နိုင်သည်။ ထို့ကြောင့် တခြားသူများ ပြောနေကြသော သူ၏နောက်ထပ်မိဘတစ်ယောက် ဖြစ်လာရန်မှာ ဖြစ်နိုင်ချေရှိသေးသည်။

အဆုံးတွင် မာရှယ်က ထိုနေရာတွင် ရှိနေတုန်းပင်။ သူတို့သာ သတ္တိရှိပါက လူတိုင်းက နည်းဗျူဟာဖြင့် ချဥ်းကပ်နိုင်လေသည်။

ယခုအချိန်တွင် ရွှယ်လင်က ထိုလူများနှင့် ရင်ဆိုင်ရန် အချိန်မရှိသေးပေ။ သူ လုပ်ရန်လိုအပ်သည်မှာ ပြောင်းရွေ့ခြင်း စစ်ဆေးမှုကို ဖြတ်သန်းရန်ပင်။ ထိုမှသာ သူက မာရှယ်နှင့် မလိုက်ဖက်ဘူးဟု သူတို့ ကြွေးကြော်နိုင်တော့မှာ မဟုတ်ပေ။ လူထု အမြင်ကဲ့သို့အရာမျိုးက စိုးမိုးခြယ်လှယ်ရန် လွယ်ကူလွန်းသည်။ ရွှယ်လင်က လူထုအမြင်စစ်ပွဲများစွာကို တိုက်ခိုက်ခဲ့ပြီးဖြစ်သည်။ ရုတ်တရက် ပေါ်ပျူလာဖြစ်လာခြင်းကဲ့သို့ ကိစ္စမျိုးက သူ့အစီအစဥ်များကို လုံးဝ မသက်ရောက်စေတော့ပေ။

ဒီနေ့ ကိစ္စနှင့် ပက်သက်၍ သူ့ ကလေးလေးနှင့် သေချာ ဆွေးနွေးသင့်သည်ဟု ခံစားရသောကြောင့်ယင်ကျားက ရွှယ်လင်ကို သူ့စာကြည့်ခန်းသို့ ညဘက်တွင် ခေါ်လိုက်သည်။

သူက ပြောသလို လုပ်တတ်သော လူတစ်ယောက်ဖြစ်ပြီး ရွှယ်လင်ကလည်း သူ့ကိုယ်ပိုင် ထင်မြင်ချက်ရှိသော လူတစ်ယောက် ဖြစ်သည်။ တစ်ခြားသူများက သူ့စကားများကို လိုက်နာသောကြောင့် ယင်ကျား တစ်ခြားသူများ၏ ထင်မြင်ချက်များကို မမေးမြန်းဘဲ စကားပြောတတ်သည်။ သူ ပြုလုပ်ခဲ့သော ဆုံးဖြတ်ချက်များမှာ လုံးဝ မမှားပေ။ ထို့ကြောင့် သူ့အမိန့်များအပေါ် တခြားသူများ၏ ကန့်ကွက်မှုများ၊ ငြင်းဆန်ချက်များကို ဘယ်တော့မှ ကြားရန် မလိုအပ်ခဲ့ပေ။

ဤသည်မှာ မိမိကိုယ်ကို ယုံကြည်မှုရှိပြီး မာနကြီးသူ တစ်ယောက်တွင်သာ ရှိမည့် ပြဿနာမျိုးပင်။ သူ ပြောင်းလဲရန်လည်း စိတ်ကူးမရှိပေ။ သို့သော် ယခု သူ ရွှယ်လင်နှင့် တွေ့လေပြီ။ ရွှယ်လင်က သူ ပြောသည့်အတိုင်း လုပ်မည့်သူ မဟုတ်ပေ။ ရွှယ်လင်က ယင်ကျား သူ့အတွက် စီစဥ်ပေးထားသည့် အရာများကို ငြင်းဆန်ပုံမပေါ်ဘဲ ချစ်ဖို့ကောင်းစွာဖြင့် နာခံသလိုလုပ်ပြနေသော်လည်း အမှန်တွင် သူ့ကိုယ်ပိုင် အတွေးများရှိကာ တစ်ခုကိုလုပ်နေရင်း တစ်ခြားတစ်ခုကို ပြောပြီး ယင်ကျား၏ ဒေါသကို လုံးဝ မကြောက်ပေ။

သူက ယနေ့ ကိစ္စတွင် အဓိက အနိုင်ကျင့်ခံရပုံပေါ်နေသော်လည်း တစ်စုံတစ်ယောက်သာ သေချာကြည့်ပါက သူက ပြဿနာကို အရင် ဖြစ်စေခဲ့သူ ဖြစ်ကြောင်း သိနိုင်လေသည်။

ယခင်က ယင်ကျား သူ့ကို မွေးစားခဲ့ချိန်ကတည်းက သူ့ဘဝ အကြောင်းကို အသေးစိတ်သိပြီးပြီ ဖြစ်သော်လည်း မမျှော်လင့်စွာဖြင့် ဤကလေး ဘာတွေ စီစဥ်နေသည်ကို သူ မသိနိုင်သေးပေ။

သူက သိုးငယ်လေးပုံပေါ်သော်လည်း အမှန်တွင် သိုးရေခြုံထားသော ဝံပုလွေတစ်ကောင်ပင် ဖြစ်သည်။

"ဒယ်ဒီ..."

ယင်ကျား သူ့ကို ခေါ်ပြီး စကားမပြောသေးသည်ကို တွေ့သောအခါ ရွှယ်လင်က သူ့အတွေးများကို နှောင့်ယှက်လိုက်ပြီး ပြောလိုက်သည်။

" တကယ်လို့ ဒယ်ဒီ ပြောစရာ မရှိဘူးဆိုရင် ကျွန်တော်ပြန်ပြီး စာလေ့လာဦးမယ်"

ယင်ကျားက ခေါင်းမော့လိုက်ပြီး အရှေ့မှ ကလေးကို ခေါင်းအစခြေအဆုံး တစ်ကြိမ် ကြည့်လိုက်လေသည်။ သို့သော် သူ ဘာတွေးနေသည်ကို နားမလည်နိုင်တုန်းပင်။ ဤကလေးက သူ့ကို သတိထားနေသည်ဟု ထင်ခဲ့သော်လည်း ထိုကလေးက ကလေးဆိုးတော့ မဟုတ်ပေ။ ယခု သူက နက်နက်ရှိုင်း ကြံစည်ပြီး မရင့်ကျက်သေးသော ကလေးတစ်ယောက်ကဲ့သို့ လုံးဝဖြစ်မနေပေ။

"မင်းရဲ့ ကိုယ်ပိုင် စိတ်ဝိညာဥ်စွမ်းအား ပြန်လည်ကောင်းမွန်လာတဲ့အပေါ် မင်း ကောင်းကောင်း အသုံးချတတ်နေပြီပဲ" သူက ခိုင်မာသော စကားတစ်ခွန်းကို ပြောလိုက်သည်။ သူ့ရှေ့မှလူက တိုက်ခိုက်စွမ်းအားရှိပုံ မပေါ်သော်လည်း ထိုလူက တိုက်ခိုက်နိုင်သည်ဟု ယင်ကျား မသိစိတ်အရ ခံစားလိုက်ရသည်။

ရွှယ်လင် အနည်းငယ် မျက်မှောင်ကြုတ်လိုက်သည်။ သူ သူ့ကို မော့ကြည့်လိုက်ပြီး နှုတ်ခမ်းများက တွန့်ကွေးသွားကာ ပြောလိုက်သည်။

" ဘယ်လိုလုပ် ဖြစ်နိုင်မှာလဲ... ကျွန်တော့အမေရဲ့ပါရမီ အမွေကို ရလို့ ဖြစ်မယ်ဆိုတာ ကျိန်းသေတယ် သူမက အံ့အားသင့်စရာကောင်းတဲ့ ဆရာသခင်လေ သူမရဲ့ ကလေးဖြစ်တဲ့ ကျွန်တော်က သူမကို ရှုံးမှာ မဟုတ်ဘူးလေ"

သူ့အကြည့်များ မော့တက်လာချိန်တွင် သူ့မျက်လုံးထောင့်စွန်းများက အနည်းငယ် အပေါ်သို့ ပင့်တက်သွားကြလေသည်။ ကြမ်းတမ်းသော အလင်းတန်းတစ်ခုက သူ့မျက်ဝန်းများမှ ဖြတ်ပြေးသွားလေသည်။ အလွန်လျင်မြန်သောကြောင့် ၎င်းက ထင်ယောင်ထင်မှား ဖြစ်ခြင်းဟုပင် ယင်ကျား ထင်လိုက်သည်။

သူတို့နှစ်ယောက် တစ်ယောက်ကို တစ်ယောက် စိုက်ကြည့်နေကြပြီး သူတို့နှစ်ယောက်လုံးတွင် မရှိသင့်သော တစ်စုံတစ်ခုကို မြင်လိုက်ရလေသည်။ ထို့နောက် သူတို့နှစ်ယောက်လုံး အကြည့်လွှဲလိုက်ကြသည်မှာ အကြည့်ချင်းဖလှယ်ခဲ့သည့် တိုတောင်းသော အချိန် အတောအတွင်း ဘာမျှမဖြစ်သလိုပင်။

သို့သော် ယခုအချိန်တွင် တစ်ချို့အရာများက ကွဲပြားသွားကြောင်း ယင်ကျား ရှင်းရှင်းလင်းလင်း သိလိုက်ရသည်။

သူ ထိုကလေးကို သာမန် ရိုးရှင်းသော ကလေးကဲ့သို့ ဆက်၍ မဆက်ဆံနိုင်တော့မည်ကို စိုးရိမ်နေသည်။

Prev Next