MM Story Teller

Chapter 203

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 203

13.10 - ငါက ယွင်အာရဲ့အုပ်ထိန်းသူ ယွင်အာနဲ့ပတ်သက်တဲ့ ကိစ္စမှန်သမျှကို ငါဖြေရှင်းမယ်

ပါလီမန် ပြောရေးဆိုခွင့်ရှိသူ၏ ဇနီးက အရိုက်ခံလိုက်ရသောကြောင့် ကြောင်တောင်တောင် ဖြစ်သွားလေသည်။ သူမ၏ ခင်ပွန်းသည် ဤရာထူးကို ရပြီးကတည်းက သူမ ထိုကဲ့သို့ စော်ကားမခံရသည်မှာ ကြာပြီဖြစ်သည်။ ဤတစ်ခေါက်တွင် သူမ မိတ်ဆွေ၏ ကလေး အရိုက်ခံရမှုကြောင့် ဒေါသကိုဖွင့်ချရန် ဤနေရာသို့ ရောက်လာခြင်း ဖြစ်သော်လည်း သူမကိုယ်တိုင် အရိုက်ခံရခြင်းဖြင့် အဆုံးသတ်သွားလေသည်။

"နင်..." သူမက အလွန်ဒေါသထွက်နေသောကြောင့် သူမ၏ မျက်လုံးများကပင် နီရဲနေသည်။ သူမ၏ အရိုက်ခံလိုက်ရသော မျက်နှာကို ကိုင်ထားပြီး သူမ၏ နာနိုကွန်ပျူတာကို သုံးကာ ခင်ပွန်းသည်ဆီသို့ မက်ဆေ့ချ် ပို့လိုက်သည်။

မုရှီးက သားရဲဖြစ်သည်။ သူမကမူ စစ်မှန်တဲ့ လက်မှုဆသခင် ဖြစ်သောကြောင့် အဲ့လို ဆန်ကုန်မြေလေးနဲ့ ဘယ်လိုမှ တိုက်ခိုက်နိုင်မှာ မဟုတ်ပေ...။

အခြေအနေများက ကယ်တင်လို့ပင် မရနိုင်လောက်သည်အထိ တင်းမာလာသည်ကို ဆရာက ကြည့်နေရုံသာ တတ်နိုင်ခဲ့သည်။ သူတို့က တစ်ဖက်ကို တစ်ဖက် ဗလာဖြစ်နေသော အမူအရာများဖြင့် စိုက်ကြည့်နေကြသည်။

" တစ်စိတ်လောက် ခွင့်ပြုပါ လေးစားရတဲ့ အုပ်ထိန်းသူ ခင်ဗျား ဘယ်လိုလုပ် တခြားသူတွေကို ရိုက်နိုင်ရတာလဲ..."

မုရှီးက အေးဆေးတည်ငြိမ်စွာ ပြောလိုက်သည်။

" ငါတို့ကိစ္စ ငါတို့ရှင်းမယ် မင်း ဒီအတွက် တာဝန်ယူစရာ မလိုဘူး မင်းတို့ရဲ့ ကျောင်းအုပ်ကို ခေါ်လိုက် ငါတို့ သခင်လေး အတန်းပြောင်းဖို့ကိစ္စကို စီစဥ်ချင်တယ်"

ဆရာ၏ နှုတ်ခမ်းထောင့်စွန်းများ တွန့်ကွေးသွားရတော့သည်။ သူတို့က ဘေးဘက်တွင် ဤကိစ္စ အားလုံးက သူနှင့် လုံးဝ မဆိုင်သလို ထိုင်နေသော ရွှယ်လင်ကို ကြည့်လိုက်သည်။

"လေးစားရတဲ့ အုပ်ထိန်းသူ ခင်ဗျား ဒီလို မပြောသင့်ပါဘူး သခင်လေးရဲ့ အရည်အချင်းက ဆန္ဒရှိသလို အတန်း ပြောင်းလို့ရတဲ့ အဆင့်မှာ မရှိပါဘူး..."

ဆရာက ထိုကဲ့သို့ ပြောပြီးနောက် ဟောက်စုန့်လဲ့၊ သူ၏ သူငယ်ချင်းလေးနှင့် သူတို့၏ မိဘများက သူတို့ ပါးစပ်များကို အုပ်ကာ ရယ်နေကြလေသည်။ သူတို့က ရွှယ်လင်ကို လှောင်သလို ကြည့်လိုက်ကြလေသည်။ သို့သော် ရွှယ်လင်ကမူ ၎င်းတို့ကို လုံးဝ လျစ်လျူရှုထားလေသည်။

မုရှီးက တည်ငြိမ်စွာ ဆက်ပြောလေသည်။

"ဆရာ သူတို့ကို ခေါ်လိုက်သင့်တယ် နောက်ပြီး ကျွန်မက အုပ်ထိန်းသူ မဟုတ်ဘူး ကျွန်မက အိမ်တော်ထိန်းပါ ကျွန်မတို့ မိသားစုရဲ့ သခင်ကြီးက သိပ်မကြာခင် ရောက်လာတော့မှာပါ အဲ့အချိန်ကျရင် ကျွန်မတို့ ဒီနေ့ဖြစ်တဲ့ ကိစ္စကို ဂရုတစိုက် ကြည့်မှာပါ"

ဆရာက သားရဲတစ်ဝက်အဆင့်သာ ရှိသောကြောင့် မုရှီး ထုတ်လိုက်သော ဖိအားများကို ခံနိုင်ရည်မရှိပေ။ ထို့နောက် ခါးသီးစွာဖြင့် လှည့်ထွက်ရန် ပြင်လိုက်သည်။ အခန်းထဲတွင် ကလေး သုံးယောက်နှင့် လူကြီး သုံးယောက်ရှိလေသည်။

မုရှီးက ရွှယ်လင် ဘေးနားတွင် ထိုင်နေပြီး ရွှယ်လင်၏ ပြောချင်ပေမယ့် ထိန်းချုပ်နေရသည့် ပုံစံလေးကို ချစ်ဖို့ကောင်းသည်ဟု ထင်နေမိသည်။ သူမက လက်ဆန့်ကာ ရွှယ်လင်၏ ခေါင်းကို ထိလိုက်ပြီး ပြောလိုက်သည်။

" မင်း သခင်ကြီးကို မနှောက်ယှက်ချင်တာ သိပါတယ် ဒါပေမယ့် မင်းနဲ့ ပတ်သက်တဲ့ ကိစ္စိတွေကို သူ့ကို သတင်းပို့ဖို့ အမိန့်ပေးထားတာလေ အဲ့တော့ သူ့ကို ပြောပြရတာပေါ့ နောက်ပြီး ဒီကိုလာဖို့ ဆုံးဖြတ်လိုက်တာ သူပါ အဲ့တော့ မင်း အရမ်းကြီး စိုးရိမ်နေစရာ မလိုပါဘူး"

ရွှယ်လင် : "..." သူ အဓိက စိုးရိမ်တာက သခင်ကြီးက ကျောင်းတစ်ကျောင်းလုံးကို မီးရှို့ပစ်လိုက်မှာကိုပါ...။

တစ်ခြားတစ်ဖက်မှ ပြောရေးဆိုခွင့်ရှိသူ၏ ဇနီးသည် မထီမဲ့မြင် ဂရုမစိုက်သော အသံက ထွက်ပေါ်လာလေသည်။

" လူ ဘယ်နှစ်ယောက် လာတယ်ဆိုတာက အရေးမကြီးပါဘူး နင်ပဲဖြစ်ဖြစ် နင့်မိသားစုရဲ့ မျက်လုံးဖြူ ဝံပုလွေပဲ ဖြစ်ဖြစ် နင်တို့ တစ်ယောက်မှ ဒီကိစ္စကနေ လွတ်မှာ မဟုတ်ဘူး နင့်ကိုယ်နင် လက်မှုဆရာသခင် ကာကွယ်ရေး ဥပဒေနဲ့ ကာကွယ်ဖို့ သိတယ်ဆိုရင် လက်မှုဆရာသခင် တစ်ယောက်ကို ရိုက်တာက ဥပဒေနဲ့ ဆန့်ကျင်တယ်ဆိုတာရော နင် မသိဘူးလား..."

သူမသားက ဟောက်စုန့်လဲ့နှင့် ဆက်ဆံရေး ကောင်းသောကြောင့် သူမနှင့် စုန့်ယင်းတွင်လည်း ကောင်းမွန်သော ဆက်ဆံရေး ရှိပေသည်။ စုန့်ယင်းက အဆင့်မြင့်သော အထက်တန်းလွှာ တစ်ယောက် မဟုတ်သော်လည်း သူမက စကားပြောကောင်းပြီး ကောင်းကောင်းမွန်မွန် ပြုမူနေထိုင်တတ်သည်။ စုန့်ယင်း၏ ယောက်ျားကလည်း သူမယောက်ျားအတွက် အသုံးဝင်သော လက်အောက်ငယ်သားဖြစ်သည်။သူမနှင့် စုန့်ယင်းက အခြေခံအားဖြင့်တော့ တစ်လှေတည်း စီးနေကြခြင်းပင်။

ယခု နှစ်ရက်အတောအတွင်း ဟောက်ယွမ်လျန်၏ ရာထူးမှ ရပ်ဆိုင်းခံထားရမှုကြောင့် သူမယောက်ျားက ပြသနာအများအပြားနှင့် ရင်ဆိုင်နေရလေသည်။ သူ့ဇနီးက ၎င်းကို သိသောကြောင့် ထိုကိစ္စများကို ဖြစ်စေသည့် ရွှယ်လင်နှင့် ပက်သက်၍ အလွန်မကျေမချမ်းဖြစ်နေသည်။ ယနေ့တွင် စုန့်ယင်း၏ သားက အရိုက်ခံရပြီး သူမ၏ ကလေးက ဟောက်စုန့်လဲ့၏ ဘေးတွင် ရပ်ရင်း အလှောင်ခံရသည်ကို ကြားသောအခါ သူမက ၎င်းအား သူမ၏ ဒေါသတချို့ကို ဖော်ထုတ်ရန် အခွင့်အရေးအဖြစ် အသုံးချလိုက်သည်။ မမျှော်လင့်ထားစွာဖြင့် သူမက ရင်ဆိုင်ရန် ခက်ခဲသော မုရှီးနှင့် ထိပ်တိုက်တိုးလေသည်။

သူတို့နှစ်ယောက်လုံးက မိန်းမများ ဖြစ်သော်လည်း လက်မှုပညာရှင် များနှင့် သားရဲများမှာ သဘာဝချင်း ခြားနားပေသည်။ ပြောရေးဆိုခွင့် ရှိသူ၏ ဇနီးက ထပ်၍ အရိုက်ခံရမည်ကို စိုးရိမ်ကာ သူမကို

ထပ်ရန်မစရဲပေ။

နောက်တစ်ကြိမ် အရိုက်ခံရရင် သူမ မျက်နှာ ပျက်ဆီးသွားလိမ့်မယ်...။

နိုင်ငံရေးနှင့် မင်းမျိုးမင်းနွယ်တို့က အတော်လေး တစ်သီးတစ်ခြားခွဲခြားထားသည်။ ပါလီမန်၏ ပြောရေးဆိုခွင့်ရှိသူက တော်ဝင်မိသားစု၏ သီးသန့် လှုပ်ရှားမှုများတွင် ပါဝင်လေ့မရှိပေ။ ထို့ကြောင့် ပြောရေးဆိုခွင့်ရှိသူ၏ ဇနီးသည်က မုရှီးကို မမှတ်မိခြင်းပင်။

မုရှီးက မာရှယ်နန်းတော်၏ အိမ်တော်ထိန်း ဖြစ်သော်လည်း မာရှယ်၏ အကျင့်စရိုက်ကြောင့် သူမက အပြင်တွင် အချိန်ဖြုန်းချိန် နည်း၏။ သူမက အရေးပါသော လူများကို သိသော်လည်း သူမနှင့် ကိုယ်တိုင် တွေ့ဖူးသော လူအရေအတွက်မှာ နည်း၏။ သူမရှေ့တွင် ရပ်နိုင်သော လူအရေအတွက်မှာမူ ပို၍ နည်း၏။ အမှန်တွင် သူမက အလုပ်တွင် အငြိမ်းစားယူပြီးဖြစ်သောကြောင့် သူမ ကိုင်တွယ်ဖြေရှင်းရန် လိုသော ကိစ္စအများစုမှာ မာရှယ်အိမ်တော်၏ သီးသန့် ကိစ္စများ ဖြစ်သည်။ ယင်ကျား၏ လက်ထောက်က ယင်ကျား၏ အလုပ်အများစုနှင့် ပြင်ပအရေးကိစ္စများကို ကိုင်တွယ်ဖြေရှင်းသောကြောင့် သူမက ထိုကိစ္စများကို စိတ်ပူစရာ မလိုပေ။

ရွှယ်လင်က သူ့စာအုပ်ကို လှန်လိုက်လေသည်။ သို့သော် တစ်ဖက်မှ မလိုမုန်းထားသော အကြည့်များကြောင့် စိတ်အနှောင့်ယှက်ခံလိုက်ရလေသည်။ သူက မကျေမချမ်းဖြစ်စွာ ခေါင်းမော့ကာ ပြောလိုက်သည်။

"ဘာကို ကြည့်နေတာလဲ...ရုပ်ချောတဲ့လူကို အရင်က မမြင်ဖူးဘူးလား..."

သူ့ကို စိုက်ကြည့်နေခဲ့သော ဟောက်စုန့်လဲ့က သနားစရာကောင်းလောက်အောင် တုန်ယင်သွားပြီး ကြာပန်းဖြူပုံစံကို ဆင်လိုက်ကာ ပြောလိုက်သည်။

" အစ်ကိုကြီး ကျွန်တော့်ကို ရိုက်ခဲ့တဲ့ ကိစ္စကို မရှိသလို သဘောထားလို့ ရတာမို့ ကျွန်တော်တို့ ညီအစ်ကို ဆိုတာနဲ့ အဖေ့မျက်နှာကို ထောက်ထားပြီး ဒီကိစ္စကို အဆုံးသတ်လို့ မရဘူးလား... မိသားစုတွင်း ရန်ပွဲလေးကြောင့် ဒီလို ရှုပ်ထွေးတဲ့ အခြေအနေထိ ရောက်သွားတော့ ကျွန်တော်တို့ အလှောင်ခံစရာ ဖြစ်နေလိမ့်မယ်"

ရွှယ်လင် အေးစက်သော အမူအရာဖြင့် ပြောလိုက်သည်။ " ငါ အရင်က ပြောခဲ့ပြီးသား ငါ မင်းတို့ မိသားစုနဲ့ ဆက်ဆံရေး အားလုံးကို ဖြတ်တောက်ပြီးသွားပြီလို့ မင်းနဲ့ ငါနဲ့လည်း မသက်ဆိုင်တော့ဘူး ငါတို့က မျိုးရိုးနာမည်တောင် မတူဘူး အဲ့တော့ မင်း ငါ့ကို အစ်ကိုကြီးလို့ မခေါ်သင့်တော့ဘူး ကြားရတာ ရွံဖို့ကောင်းတယ်"

"အဲ့ဒါအပြင် ဟောက်ယွမ်လျန်က အဲ့ဒါနဲ့ တန်တယ်လေ ဒီကိစ္စက မပြီးသေးဘူး ဒီကိစ္စတွေ အကုန်လုံး ပြီးသွားရင် မင်းရဲ့ ဘေးမှာ ထိုင်နေတဲ့ အမျိုးသမီး သူ့နေရာမှာပဲ ဆက်ပြီးရှိနေနိုင်ဦးမယ်လို့ မင်းထင်နေတာလား..."

"နင်..." စုန့်ယင်းက အော်ပြောမလို လုပ်ပြီးခါမှ အားနည်းသော ကြာပန်းဖြူလေးကဲ့သို့ သရုပ်ဆောင်ရန် သတိရလိုက်ပြီး လေသံကို ဖျော့လိုက်လေသည်။

" ယွင်လေး ငါတို့က တစ်မိသားစုတည်းလေ ခွဲခြားတဲ့ ကိစ္စတွေကို ပြောမနေပါနဲ့ အဲ့နေ့က ကိစ္စက အထင်လွဲတာပါ မင်းရဲ့ ညီလေးကို လှေကားပေါ်က တွန်းချတဲ့ ကိစ္စကိုတောင် ငါတို့ သတင်းပို့တာ မဟုတ်ဘူး မင်း ဘယ်လိုလုပ် ငါတို့ကို ဒီလို ဆက်ဆံနိုင်ရတာလဲ...မင်း အမေဆုံးသွားတော့ မင်းကို ငါတို့ပဲ ပြုစုပျိုးထောင်ခဲ့ရတာ အခုတော့ မင်းက အရင်က ငါတို့ရဲ့ ကျေးဇူးတွေကို လုံးဝ မမြင်တော့ဘူးပေါ့ အရေးမကြီးတဲ့ ကိစ္စကို အခြေအမြစ်မရှိ ရေးကြီးခွင်ကျယ်လုပ်တာက အနာဂတ်မှာ မင်းရဲ့ ဂုဏ်သိက္ခာကို ထိခိုက်စေလိမ့်မယ် မင်းရဲ့ အုပ်ထိန်းသူကိုတောင် ထိခိုက်စေလိမ့်မယ် ဒါက မင်းရဲ့ မျက်နှာကို ဖျက်ဆီးဖို့ ကိုယ့်နှာခေါင်းကို ကိုယ့်ဘာသာ လှီးလိုက်သလိုပဲ ငါတို့ အရာအားလုံးကို သေချာ ဆွေးနွေးရမယ် မင်းမှာ ဒါကို ရပ်တန့်ဖို့ အခွင့်အရေး ရှိသေးတယ်"

ရွှယ်လင် ဗလာဖြစ်နေသော အမူအရာဖြင့် မည်သည့် စကားကိုမျှ မဆိုပေ။ ဒီနှစ်ယောက်က လူစကားကို နားမလည်ဘူးပဲ... သူ့တို့နဲ့ စကားပြောရင် လေကုန်တာပဲ အဖတ်တင်မယ်...။

မုရှီးက ဂရုမစိုက်သလို စကားတစ်ခွန်း ပြောလိုက်သည်။ " တစ်မိသားစုတည်းတဲ့လား... ငါတို့ရဲ့ သခင်လေးက နင် လက်လှမ်းမှီမယ့် လူလား... ငါတို့ရဲ့ သခင်လေးနဲ့ တစ်မိသားစုတည်းလို့ မပြောခင် နင့်ကိုယ်နင် ပြန်ငုံ့ကြည့်လိုက်ဦး..."

ပြောရေးဆိုခွင့်ရှိသူ၏ ဇနီးက သရော်လိုက်သည်။

" နင်က သားရဲ ဖြစ်တာနဲ့ ငါတို့က နင့်ကို ဘာမှ လုပ်ဖို့ မရဘူးလို့ ထင်နေတာလား... အခု ကိစ္စတွေက အကြီးအကျယ်တွေ ဖြစ်ကုန်ပြီဆိုတော့ နင့်သခင်လေး အင်ပါယာရဲ့ ဥပဒေတွေကနေတောင် လွတ်နိုင်ရအောင် ဘယ်လောက်အထိ အထောက်အထား မြင့်မလဲ ကြည့်ချင်ပါသေးတယ် နင်က ဘာမှမဟုတ်တဲ့ အိမ်တော်ထိန်း အဆင့်ပဲ ရှိတာလေ ဒါကို နင်က နင်ပြောချင်တာတွေ ပြောရဲနေသေးတယ်"

" ပြောချင်တာတွေ ပြောနေတယ်ဆိုတာ မင်း ဘာကို ပြောတာလဲ..."

ဤမေးခွန်းအား မေးလိုက်သော ယောက်ျားက တံခါးကို ဖွင့်လိုက်ပြီး ယဥ်ကျေးမှုဖြင့် ကျောင်းအုပ်ကြီးကို အခန်းထဲသို့ အရင်ဖိတ်လိုက်သည်။

ဆရာက ဤကိစ္စအတွက် အရေးပါသော ကျောင်းအုပ်ကြီးကို သတင်းပို့ပြီးပြီ ဖြစ်ပြီး မစဥ်းစားနိုင်သေးဘဲ ဌာနမှုးကို သတင်းပို့ခဲ့သည်။ ထို့နောက် လမ်းတွင် ပြောရေးဆိုခွင့် ရှိသူအား တွေ့သောအခါ သူ့ခေါင်းတွင် ချွေးအေးများ ထွက်လာပြီး ကိစ္စကြီး တစ်ခုခု ဖြစ်လာတော့မည်ကို ခန့်မှန်းမိလိုက်သည်။

ပြောရေးဆိုခွင့် ရှိသူက ကျောင်းအုပ်ကြီးကို အလွန်ယဥ်ကျေးစွာ နှုတ်ဆက်လိုက်ပြီး သူ့ဇနီးကို တစ်ခြားသူက ရိုက်လိုက်သောကြောင့် သူမကို ချော့ရန် ရောက်လာခြင်း ဖြစ်သည်ဟု ပြောလိုက်သည်။ ကျောင်းအုပ်ကြီး ခေါင်းထဲတွင် ဗုံးပေါက်သလို ခံစားလိုက်ရသည်။ ပြောရေးဆိုခွင့် ရှိသူ၏ ဇနီး အရိုက်ခံလိုက်ရသည်မှလွဲ၍ ဘာကိုမျှ မတွေးနိုင် ဖြစ်သွားရသည်။

ဒီနေ့ကိစ္စက အတော်လေးကြီးတယ်...အခုခေတ် ကျောင်းသားတွေက တကယ်ကို ထိန်းမနိုင် သိမ်းမရ သောင်းကျန်းနေကြတာပဲ...။

သူမ ခင်ပွန်း ရောက်လာသည်ကို တွေ့သောအခါ ပြောရေးဆိုခွင့် ရှိသူ၏ ဇနီးနှင့် ကလေးမှာ သူ့အနားသို့ အလျင်စလို ရောက်သွားကြလေသည်။ စုန့်ယင်းနှင့် ဟောက်စုန့်လဲ့ကလည်း မတ်တတ် ထရပ်ကြလေသည်။ ပြောရေးဆိုခွင့်ရှိသူက ရုတ်တရက် လူ လေးယောက် အဝိုင်းခံလိုက်ရပြီး သူ၏ သက်တော်စောင့်များ အတွင်းရေးမှူးများပါ ရှိနေသောအခါ လူအုပ်ငယ်လေး တစ်ခုအသွင် ပြောင်းလဲသွားသည်။ ချက်ချင်းပင် သူတို့၏ အရှိန်အဟုန်က ရွှယ်လင်နှင့် မုရှီးကို လွှမ်းမိုးသွားလေတော့သည်။

ပြောရေးဆိုခွင့် ရှိသူက မလျော်ကန်စွာ ချွဲနွဲ့နွဲ့ လုပ်နေသော သူ့ဇနီးကို အရင် ချော့မော့လိုက်ပြီး သူ့သားကို ဘာဖြစ်ကြောင်း မေးလိုက်သည်။ သူတို့ ရှင်းပြနေစဥ် အတောအတွင်း ဤကိစ္စကို စတင်ခဲ့သည့် သူမှာ သူ့ကို လွန်ခဲ့သော ရက်များအတွင်း ပြသနာများ ဖြစ်စေခဲ့သူ ရွှယ်လင် ဖြစ်သည်ကို နားလည်လိုက်သည်။ သူက အနည်းငယ် အံ့အားသင့်သွားပြီး သူ့အကြည့်များက တစ်ဖက်လူထံသို့ ခြိမ်းခြောက်သလို ရောက်သွားလေသည်။

ရွှယ်လင်က သူ့ကို မထုံတက်သေး ပြန်ကြည့်လိုက်ပြီး သူ့နောက်မှ မြင့်မား ကြီးမားသော သက်တော်စောင့်များကို လုံးဝ မကြောက်ရွံ့သလိုပင်။

မုရှီးက တည်ငြိမ်စွာ မတ်တတ် ထရပ်လိုက်ပြီး တစ်ဖက်လူ၏ အကြည့်များကို ကွယ်လိုက်လေသည်။ သူမ ပျင်းတွဲတွဲဖြင့် ပြောလိုက်သည်။

" နင့်ရဲ့ နောက်ခံ လူတွေ ရောက်လာတော့ရော ဘာထူးလို့လဲ... မစ္စတာ ပြောရေးဆိုခွင့်ရှိသူက ဒီနေ့ကိစ္စအတွက် ပြောစရာ ရှိလို့လား... ရှင်ကလည်း မဒမ်လိုပဲ ကျွန်မတို့ကို ထောင်ထဲပို့ချင်လို့လား..."

ပြောရေးဆိုခွင့်ရှိသူက မုရှီးကို ပြန်မပြောဘဲ မတ်တတ်ရပ်နေသော ရွှယ်လင်ကို ကြည့်လိုက်သည်။

" သခင်လေးဟယ်လန် အမှန်ဆိုရင် ဒီကိစ္စက ငါတို့ ကြားဝင်စရာ မလိုပေမယ့် အခု လက်ရှိ အခြေအနေထိတောင် ရောက်နေပြီဆိုမှတော့ ဒီကိစ္စကို သေချာဖြေရှင်းသင့်တယ်လို့ ငါထင်တယ်"

ရွှယ်လင်နှင့် ဟောက်မိသားစုက တစ်မိသားစုတည်း ဖြစ်ကြောင်းကို သူ မပြောပေ။ ပြောရေးဆိုခွင့် ရှိသူ တစ်ယောက်အနေနှင့် လက်မှုဆရာသခင် ကာကွယ်ရေး ဥပဒေကို သူ အတိအကျ နားလည်သည်။ စစ်ဆေးဆုံးဖြတ်ချက် အဆုံးတွင် ဟောက်ယွမ်လျန်က ရွှယ်လင်၏ အရေးကိစ္စတွင် မှားသူ ဖြစ်သည်။ အကယ်၍ ရွှယ်လင် ဟောက်ယွမ်လျန်ကို ဆွဲချရန် ခိုင်မာနေပါက ဟောက်ယွမ်လျန် မလွတ်မြောက်နိုင်ပေ။ အဓိက အချက်မှာ ဟောက်ယွမ်လျန် တစ်ခုခု ဖြစ်ပါက ပါလီမန်၏ ပြောရေးဆိုခွင့်ရှိသူဖြစ်သော သူလည်း သူ့ရာထူးကို အတော်လေး အကျိုးသက်ရောက်စေလိမ့်မည် ဖြစ်သည်။

ဟောက်ယွမ်လျန်က သူ့လက်အောက်ငယ်သားဖြစ်ပြီး သူ့အတွက် အလုပ် အတော်များများကို ပြုလုပ်ပေးခဲ့သည်။ အကယ်၍ သူသာ ထောင်ထဲသို့ ရောက်ပါက ပြောရေးဆိုခွင့်ရှိသူလည်း ငြိစွန်းမည် ဖြစ်သည်။

" ဖြေရှင်းမယ်..." ရွှယ်လင်က ခေါင်းကို စောင်းကာ ရယ်လိုက်သည်။

" ဆောရီးပဲ ဒီကိစ္စကို ဖြေရှင်းလို့ ရမရဆိုတာ ကျွန်တော်နဲ့ မဆိုင်ဘူး ကျွန်တော့် ဒယ်ဒီပြောတာတော့ နောက်ဖြစ်လာတဲ့ ကိစ္စ မှန်သမျှက ကျွန်တော်နဲ့ မဆိုင်တော့ဘူးတဲ့ ကျွန်တော်က စာကောင်းကောင်း လေ့လာဖို့ပဲ လိုတယ်တဲ့ အဲ့တော့ ကျွန်တော့်ကို လာပြောနေလည်း မထူးဘူး"

"ဒယ်ဒီတဲ့လား..."

စုန့်ယင်း မျက်မှောင်ကြုတ်ကာ ပြောလိုက်သည်။

" ယွင်လေး ရက်နည်းနည်းပဲ ရှိသေးတယ် မင်း အဖေက အိမ်မှာလေ ဘယ်လိုလုပ် တခြားသူတွေကို ဒယ်ဒီလို့ ခေါ်နိုင်ရတာလဲ... မင်း အဖေအရင်းသာ ကြားရင် ဒေါသထွက်လိမ့်မယ်"

"ဒါဆိုလည်း ဒေါသထွက်ပါစေပေါ့ သူ ဒေါသအထွက်လွန်ပြီး သေသွားလည်း သူ့ လွယ်လွယ်ကူကူ လွတ်မြောက်သွားတာပေါ့"

ရွှယ်လင်က လက်ပိုက်ထားပြီး သူ့အမူအရာက ပေါ့ပါးကာ ညှင်သာနေသည်။

" ဟောက်ယွမ်လျန် ထောင်ထဲကို ရောက်ရင် ခင်ဗျားလည်း သူ့ဘေးမှာ ရောက်နေမှာပဲလေ ခင်ဗျား ကျွန်တော့်ကို အဆိပ်ခပ်တုန်းက ခြေရာလက်ရာ မကျန်ဘူးလို့ ထင်မနေနဲ့ ကျွန်တော် ခင်ဗျားကို မဖမ်းနိုင်တာနဲ့ ဘာမှ ဖြစ်မလာဘူးလို့လည်း ထင်မနေနဲ့ တကယ်လို့ ဒယ်ဒီက ခင်ဗျားနဲ့ ထိပ်တိုက်ရင်ဆိုင်ချင်တယ်ဆိုရင် အဲ့ဒါကခင်ဗျားအတွက် လွယ်ကူမှာ တကယ်လို့ ခင်ဗျား ကျုပ်လက်ထဲသာ ရောက်လာမယ်ဆိုရင် သေခြင်းတရားဆိုတာ ခင်ဗျားအတွက် လွယ်ကူတဲ့ အရာပဲ"

"နင့်လို ကလေးက ဘယ်လိုလုပ် ဒီလို ကြမ်းကြမ်းတမ်းတမ်း ပြောနိုင်ရတာလဲ..."

ပြောရေးဆိုခွင့် ရှိသူ၏ ဇနီးက ထပ်ပြောလိုက်သည်။

" နင့်ကို မွေးခဲ့ပြီး ပြုစု ပျိုးထောင်ပေးခဲ့တဲ့လူကို အသိအမှတ်မပြုဘူးပေါ့ နင်က တခြားလူတွေအပေါ် ကောင်းတဲ့ အရာတွေကို မမြင်ဘူး ဆိုးတဲ့ အရာတွေပဲ မြင်တယ် နင့်ရဲ့ စိတ်ဓာတ်က မကောင်းတော့ နင့်ကို တစ်ခြားသူတွေက အဆိပ်ခတ်မှာပေါ့... တကယ်လို့ နင်က ရုပ်ပိုင်းဆိုင်ရာ အနှောက်ယှက်ခံရတယ်ဆို နင့် ခြေထောက်ကို တစ်ယောက်ယောက်က ချိုးလိုက်လို့လား...

စုန့်ယင်းက နင့်ကို ကောင်းကောင်းမွန်မွန် ဆက်ဆံခဲ့ပြီး နေတိုင်း ကောင်းကောင်းကျွေးပြီး ကောင်းကောင်းနေရေအာင် လုပ်ပေးခဲ့တာလေ ဒါပေမယ့် နင်ကတော့ သူမကို ရက်စက်တဲ့ မိထွေးလို့ နာမည်တတ်တယ်ပေါ့...နင် လူတစ်ယောက်အနေနဲ့ တချို့ကိစ္စတွေက မေ့ထားလို့မရဘူး..."

"ဟားဟား" မုရှီး အေးစက်စွာ ရယ်လိုက်သည်။ ထို့နောက် ပြောလိုက်သည်

" ပြောရေးဆိုခွင့်ရှိသူရဲ့ မဒမ်မှာ အဖြူကို အမဲပြောင်းတဲ့ စွမ်းရည်ရှိတာကို ကျွန်မ မသိခဲ့ဘူး ဘာလဲ နင်က ငါတို့ကို လူများများနဲ့ အနိုင်ကျင့်ဖို့ လုပ်နေတာလား... နင့် အသက်အရွယ်ကို အခွင့်ကောင်းယူပြီး ငါတို့ သခင်လေးအပေါ် ဖိအားပေးဖို့ လုပ်နေတာလား... ဟောက်ယွမ်လျန်က လူကောင်းပါလို့ သူ ကျေနပ်တဲ့အထိ သခင်လေးက ကြွေးကြော်ပေးရမှာလား..."

"မင်း..."

ပြောရေးဆိုခွင့်ရှိသူက ပြန်လည်ချေပချင်သော်လည်း မုရှီးကို သေချာမြင်လိုက်ရချိန်တွင် သူ့စကားများက လည်ချောင်း၌ ဆို့နင့်သွားရတော့သည်။ နောက်ဆုံးတွင် မုရှီး မည်သူ ဖြစ်သည်ကို ရှင်းလင်းစွာ မြင်လိုက်ရပြီး သူမ မည်သူ့ထံတွင် အလုပ်လုပ်သည်ကို သတိရလိုက်သည်။ သူ အချိန် အတော်ကြာသည်အထိ မှင်သက်နေခဲ့သည်။

"အိမ်တော်ထိန်းမု..."

"အင်း" မုရှီး ရိုးရှင်းစွာ တုံ့ပြန်လိုက်သည်။

" အခု မစ္စတာ ပြောရေးဆိုခွင့် ရှိသူက ကျွန်မကို မှတ်မိသွားပြီလား... ရှင့်ရဲ့လူတွေ အရှိန်အဝါသုံးပြီး ကျွန်မ သခင်လေးကို ဖိနှိပ်ဖို့ လုပ်တုန်းက ဘာလို့ ကျွန်မကို မမြင်ခဲ့ရတာလဲ..."

ပြောရေးဆိုခွင့် ရှိသူက ပါးစပ်ကို ဖွင့်လိုက်ပြီးနောက် ပြန်ပိတ်လိုက်သည်။ သူ ချောချောမွေ့မွေ့ မပြောခင် ရုံးခန်းတံခါးက ထပ်မံ၍ တွန်းဖွင့်ခံလိုက်ရပြန်သည်။

တံခါးကို တွန်းဖွင့်လိုက်သူမှာ ကောလိပ်၏ ဌာနမှုးဖြစ်သည်။ သို့သော် သူ ချက်ချင်း ဝင်မလာခဲ့ပေ။ ထိုအစား သူက လမ်းဖွင့်ပေးလိုက်ပြီး ခြေတံရှည်တစ်စုံက မြင်ကွင်းထဲသို့ ပေါ်လာလေသည်။ အခန်းထဲသို့ ဝင်လာသည်နှင့် ယင်ကျား၏ ရှည်လျားသော ဆံပင်များက သူ၏ လှုပ်ရှားမှုအတိုင်းပါလာကာ လှိုင်းထနေလေသည်။ သူ ဝင်လာချိန်တွင် သူ့မျက်နှာက တင်းမာနေ၏။ မုရှီးနှင့် ရွှယ်လင်၏ ဆန့်ကျင်ဘက်တွင် ရပ်နေကြသော လူအုပ်ကို တွေ့လိုက်ရသောအခါ သူ အေးစက်စွာ ပြောလိုက်သည်။

"ငါက ယွင်အာရဲ့ အုပ်ထိန်းသူပါ ယွင်အာနဲ့ ပက်သက်တဲ့ ကိစ္စမှန်သမျှကို ဖြေရှင်းပေးမယ် မင်းတို့ ဆွေးနွေးချင်တာ ရှိရင် ငါနဲ့ တိုက်ရိုက်ပြောလို့ရပါတယ်"

Prev Next