ငါးဆားနယ်ကိုယ်လုပ်တော်

Description

စွပ်စွဲလုပ်ကြံခံရကာ အေးစက်လှသော နန်းဆောင်ဆီသို့ နှင်ထုတ်ခံလိုက်ရပြီးနောက်၊ ယွီမြောင်ဟွာသည် မမျှော်လင့်ဘဲ ခေတ်သစ်မှ ကူးပြောင်းလာသူတစ်ဦး၏ မှတ်ဉာဏ်များဖြင့် နိုးထလာခဲ့သည့်အပြင် နန်းတွင်းလုပ်ကြံမှုစနစ်တစ်ခုနှင့်လည်း ချိတ်ဆက်မိသွားတော့သည်။

 နန်းတွင်းလုပ်ကြံမှုစနစ် - "Host... စိတ်မပျက်ပါနဲ့။ ကျွန်တော်ပေးတဲ့ တာဝန်တွေကိုသာ ကြိုးကြိုးစားစား လုပ်ဆောင်မယ်ဆိုရင်၊ အခြားကိုယ်လုပ်တော်တွေကို နှိပ်ကွပ်၊ မိဖုရားခေါင်ကြီးကိုပါ နန်းချပြီး မကြာခင်မှာပဲ ဂုဏ်သရေရှိတဲ့ မိဖုရားကြီးတစ်ပါး ဖြစ်လာမှာပါ"

 ယွီမြောင်ဟွာ -  "ဘာလို့ တိုက်ခိုက်နေရမှာလဲ။ နန်းတွင်းရေးတွေက ကြောက်စရာကြီး။ အခု အအေးနန်းဆောင်ကမှ တကယ့်အိုအေစစ်ပဲ။ ပတ်ဝန်းကျင်ကလဲ တိတ်ဆိတ်တယ်၊ ကိုယ်ပိုင်အိမ်လေးလိုပဲ။ ပြီးတော့ ဒီစနစ်ကိုသုံးပြီး ဝတ္ထုတွေ၊ ကာတွန်းတွေလဲ ဖတ်လို့ရသေးတယ်။ ဒါဟာ အိမ်ထဲမှာပဲ အောင်းနေချင်တဲ့သူအတွက်တော့ နိဗ္ဗာန်ဘုံပဲ"

 သို့သော်လည်း...

 [သင်သည် "ဧကရာဇ်မင်းမြတ်အား သင့်အတွက်ကြောင့် အမျက်ချောင်းချောင်းထွက်စေပြီး၊ ဧကရာဇ်၏ဦးရီးတော်အား အပြစ်ပေးစေကာ သူ၏ဂုဏ်ပုဒ်ကို ရုပ်သိမ်းစေခြင်း" ဟူသော တာဝန်ကို ပြီးမြောက်ခဲ့ပါသည်။ ဆုလာဘ် - ဝါဂွမ်းစေ့များ]

 ["ကွေ့ဖေးကို လုပ်ကြံစွပ်စွဲပြီး သုံးလကြာ အကျဉ်းချခံရစေခြင်း" ဟူသော တာဝန်ကို အောင်မြင်စွာ ပြီးမြောက်သည့်အတွက် ဂုဏ်ယူပါသည်။ ဆုလာဘ် - ဘိလပ်မြေဖော်စပ်နည်း]

 ["နန်းတွင်းစာမေးပွဲတွင် ပထမရရှိသော ပညာရှိနှင့် ချိန်းတွေ့ခြင်း" တာဝန်ကို အောင်မြင်စွာ ပြီးမြောက်သည့်အတွက် ဂုဏ်ယူပါသည်။ ဆုလာဘ် - ပြောင်းဖူးစေ့များ]

 အလိုအလျောက် ပြီးမြောက်သွားသော တာဝန်များကို စိုက်ကြည့်ကာ ယွီမြောင်ဟွာမှာ ထိတ်လန့်တုန်လှုပ်သွားပြီး မျက်နှာတစ်ခုလုံး သွေးဆုတ်ဖြူလျော်သွားတော့၏။

 တစ်ခုခုတော့ မှားနေပြီ။ ဒီနန်းတွင်းလုပ်ကြံမှု တာဝန်တွေက ဘယ်လိုလုပ်ပြီး အလိုအလျောက် ပြီးသွားရတာလဲ။ စနစ်က ချို့ယွင်းနေတာများလား?

 တစ်နေ့တွင်မူ ဧကရာဇ်မင်းမြတ်သည် သူကိုယ်တိုင် နှင်ထုတ်ထားသော ကိုယ်လုပ်တော် ယွီမြောင်ဟွာ၌ နန်းတွင်းလုပ်ကြံမှုစနစ်တစ်ခု ရှိနေကြောင်း ရုတ်တရက် သိရှိသွားခဲ့လေသည်။

 ဧကရာဇ်ကမူ နှာခေါင်းရှုံ့လိုက်၏။ "နန်းတွင်းလုပ်ကြံမှုစနစ် ဟုတ်လား။ ဒါ ဘယ်လို မိစ္ဆာအတတ်လဲ။ သူမကို သန့်စင်ပေးဖို့ ဘုရားကျောင်းကို ပို့ရမယ်"

 စနစ်မှပေးမည့် ဆုလာဘ်များကို သူ ကိုယ်တိုင် မြင်တွေ့သွားသည့် အချိန်မတိုင်ခင်ထိပင်။

 [တာဝန် - "ဧကရာဇ်မင်းမြတ်နှင့် ဆုံတွေ့ပြီး သင့်အပြစ်မရှိကြောင်း ရှင်းပြပါ။" ဆုလာဘ် - တစ်နှစ်လျှင် သုံးသီးစား ထွက်ရှိသော ချန်ပါ စပါးမျိုးစေ့များ ဖြစ်သည်]

 'ဘာ... တစ်နှစ်ကို သုံးကြိမ်တောင် ရိတ်သိမ်းလို့ရတယ် ဟုတ်လား။ ပြီးတော့ မိုးခေါင်တာကိုလဲ ခံနိုင်ရည်ရှိတယ်ပေါ့။ ဒီတာဝန်ကို မဖြစ်မနေ ပြီးမြောက်အောင် လုပ်ရမယ်'

 ဒါဟာ မိစ္ဆာအတတ်မဟုတ်ဘဲ ဘိုးဘေးဘီဘင်များက ပေးသနားလိုက်သော ကောင်းချီးမင်္ဂလာပင် ဖြစ်ရမည်ဟု ထိုသူက ယုံကြည်သွားတော့၏။

 တိုင်းပြည် သာယာဝပြောရေးအတွက်သာ စိတ်တွင်စွဲမှတ်ကာ သူသည် ယွီမြောင်ဟွာ၏ နန်းတွင်းလုပ်ကြံမှုများ အောင်မြင်စေရန် တက်တက်ကြွကြွ ကူညီပေးတော့သည်။ ထိုစဉ် နောက်ထပ် တာဝန်အသစ်တစ်ခုကို သူ မြင်လိုက်ရပြန်၏။

 [နန်းတွင်းလုပ်ကြံမှုစနစ် -  "နန်းတွင်းလုပ်ကြံမှုရဲ့ ဇာတ်လိုက်မတစ်ယောက်မှာ ဧကရာဇ်ကလွဲလို့ တခြား ဝန်းရံသူတွေ မရှိလို့ ဘယ်ဖြစ်မလဲ။ Host... ဟိုပညာရှိလေးကို ကြည့်လိုက်စမ်းပါ။ ခါးလေးက သိမ်ပြီး တင်ပါးကလဲ တောင့်တင်းနေတာပဲ။ အဝတ်အစားအောက်မှာ ကြွက်သားတွေနဲ့ ကျစ်လျစ်နေတာလေ။ ဒါက မင်းကြိုက်မဲ့ ပုံစံမျိုးပဲ မဟုတ်လား]

 ဧကရာဇ်မင်းမြတ် - "???"

 သူကိုယ်တိုင်က သူ့ကိုယ်လုပ်တော် ဖောက်ပြန်နိုင်ရန် အခွင့်အလမ်း ဖန်တီးပေးရမည်တဲ့လား။ ဒါဟာ တကယ့်ကို အရှက်ရစရာပင်။

 ထားပါတော့... ငါ သည်းခံနိုင်ပါတယ်။ ဘာပဲဖြစ်ဖြစ် ဒါက တောင်ပေါ်ဒေသတွေနဲ့ ကိုက်ညီပြီး အထွက်နှုန်း ကောင်းမဲ့ သီးနှံလေ။

 မကြာမီမှာပင် ဧကရာဇ်မင်းမြတ်သည် ယွီမြောင်ဟွာ၏ စနစ်ကို သူတစ်ဦးတည်းသာမက နန်းတွင်းအမတ်များပါ မြင်နေရကြောင်း သဘောပေါက်သွားခဲ့သည်။

 ကွေ့ဖေး၏ ဖခင်ဖြစ်သူ ဆရာကြီး၊ မိဖုရားခေါင်၏ ဦးလေးဖြစ်သူ စစ်သေနာပတိချုပ်၊ ရှု့ဖေး၏ မောင်ဖြစ်သူ မြို့စားမင်း...

 နန်းတော်တစ်ခုလုံးရှိ လူများသည် ယွီမြောင်ဟွာ၏ နန်းတွင်းလုပ်ကြံမှု တာဝန်များ အောင်မြင်စေရန် အပြိုင်အဆိုင် ဝိုင်းဝန်းကူညီပေးကြတော့၏။