Chapter 6

အခန်း(၆) - ဒေတာကတ်

ဟော့ဂျ် အလွန်အမင်း ဒေါသထွက်နေလေသည်။

သူ့ကို ဒီလိုစကားပြောရဲတဲ့ အဆင့်နိမ့်သတ္တဝါဆိုတာ တစ်ခါမှ မရှိခဲ့ဖူးဘူး...

အရင်တုန်းကဆိုရင် တိုက်ရိုက်ကြည့်ရှုမှုတွေကို ပိုစိတ်ဝင်စားစရာကောင်းအောင်လို့ သူက ရှင်သန်ကျန်ရစ်သူတွေကို ပေါ်လာတဲ့စာကနေ ရှင်သန်ရေးဆိုင်ရာ အချက်အလက်တွေ ပေးခဲ့တယ်။ အဲဒီ ရှင်သန်သူတွေထဲက ဘယ်သူတွေက သူ့အကူအညီအတွက် ကျေးဇူးမတင်တာမျိုး၊ သူ့ကို ကယ်တင်ရှင်အဖြစ် မသတ်မှတ်တာမျိုး ရှိခဲ့ဖူးလို့လား.....

ဒါပေမဲ့ အခုတော့ ဒီကောင်က သူ့ကို ကျေးဇူးမတင်ရုံသာမက  သူ့ရဲ့လိုက်ဖ်စထရင်းထဲကနေ ထွက်သွားဖို့တောင် ပြောရဲတယ်တဲ့လား.......

ဟော့ဂျ် အတော်ကြာအောင် မီးပွင့်မတတ် ဒေါသထွက်နေပြီးနောက် နောက်ထပ်စာတစ်ကြောင်း ပို့လိုက်သည်-

"ကောင်းပြီ! ဒါဆိုရင် မင်း သေဖို့သာ စောင့်နေပေတော့...."

ဒေါသတကြီးဖြင့် "မကြိုက်ဘူး" (downvote)ကို တစ်ချက်နှိပ်ပြီးနောက် ဟော့ဂျ် ထုတ်လွှင့်မှုမှ ထွက်ခွာရန် ပြင်ဆင်လိုက်သည်။ သို့သော် သူ၏အကြည့်သည်  ညာဘက်အောက်ထောင့်ရှိ ဆုလာဘ်ကဏ္ဍကို ကျရောက်သွားသောအခါ၊ တစ်စုံတစ်ခုကို သတိရသွားဟန်ဖြင့် မျက်နှာပေါ်တွင် မကောင်းဆိုးဝါးဆန်သော အပြုံးတစ်ခု ပေါ်လာသည်။

[ဂုဏ်သရေရှိ အဆင့်မြင့် ကမ္ဘာကြည့်ရှုသူရေ၊ ရှင်သန်ကျန်ရစ်သူ နံပါတ် ၇ ထံသို့ မြန်နှုန်းမြှင့် ဘီလူးကို ပို့ရန်အတွက် ရှင်သန်မှုအမှတ် ၁,၀၀၀ ကိုသုံးစွဲမည်မှာ သေချာပါသလား...]

လက်ဆောင်ပေးပို့ခြင်းအတွက် အနည်းဆုံး ရှင်သန်မှုအမှတ် ၁၀၀ သာ လိုအပ်သော်လည်း၊ ဘီလူးကဏ္ဍအတွက် အနည်းဆုံး ရှင်သန်မှုအမှတ် ၁,၀၀၀ လိုအပ်​ပေသည်။

ဟော့ဂျ် နာကျင်မှုအချို့ဖြင့် [အတည်ပြုသည်] ကို နှိပ်လိုက်သည်။ ထို့နောက် တိုက်ရိုက်ထုတ်လွှင့်မှုပေါ်ရှိ အကာအကွယ်မဲ့နေသော ဆံပင်နီနီ လူငယ်လေးထံ အကြည့်ပြန်ရောက်လာချိန်၌ မောက်မာသောအပြုံးဖြင့် ပြုံးလိုက်သည်။

ထိုသူ နာကျင်စွာ အော်ဟစ်ပြီး၊ အသက်ချမ်းသာပေးရန် တောင်းပန်၍ ၊ထို့နောက် ဖုတ်ကောင်ဆွဲဖြဲခံရလျက်  ကြောက်မက်ဖွယ်ကောင်းစွာ သေဆုံးသွားသည်ကို သူ ကြည့်ချင်မိသည်။

ကမ္ဘာပျက်မည့်အချိန် နီးကပ်လာသည်နှင့်အမျှ မီကျား သူ၏ပြတင်းပေါက်အပြင်ဘက်မှ ကမ္ဘာလောကကြီး ပိုမိုဆူပူရှုပ်ထွေးလာသည်ကို ကြားနေရသည်။ လူနာတင်ယာဥ်သံများကို မကြာခဏ ကြားနေရပြီး၊ တစ်ခါတစ်ရံ အနီးအနားရှိ လူနေအဆောက်အအုံများမှ အော်ဟစ်သံများ ပဲ့တင်ထပ်နေသည်။

လျှပ်စစ်မီး ရှိနေချိန်တွင် ဂိမ်းအနည်းငယ်သာ ထပ်ကစားနိုင်တော့မည် ဖြစ်သည်။ မီးပြတ်သွားသည်နှင့် ထပ်ကစားနိုင်တော့မည် မဟုတ်ပေ။

သို့သော် သူ ဤသို့ကစားနေချိန်တွင် ကြည့်ရှုသူတစ်ဦးမှ ဝင်ရောက်နှောင့်ယှက်လာသည်။

မီကျား သူ့ဘဝတွင် ဂိမ်းကစားနေချိန် အနှောင့်အယှက်ခံရသည်ကို အမုန်းဆုံးပင်.....

စိတ်ပျက်စရာကောင်းလိုက်တာ! .... ဒီ သေသင့်ဖို့ကောင်းတဲ့ ရုတ်တရက် ပေါ်လာတဲ့ စာမျက်နှာ! ... သူ အနိုင်ရဖို့ နီးနေပြီကို! ....

ကြည့်ရှုသူ၏ နှောင့်ယှက်မှုကြောင့် မီကျား ဆက်ကစားလိုသည့် စိတ်ဆန္ဒ ပျောက်ဆုံးသွား၏ ။ သူ အလုပ်ရုံသို့သွားကာ လုချန်၏ နှစ်သက်မှုအဆင့်  တိုးလာအောင် မည်သို့ ပြုလုပ်ရမည်ကို စဥ်းစားကာ ထရပ်လိုက်သည်။ သို့သော် တံခါးဝသို့ ရောက်သည့်အခါ သူ့နောက်ဘက်မှ ရွံစရာအနံ့ဆိုးကြီးတစ်ခု ရုတ်တရက် ပျံ့လွင့်လာသည်။

[စနစ်မှ ချစ်ခင်စွာ အသိပေးခြင်း: မြန်ဆန်တဲ့ဘီလူး ငါးစက္ကန့်အတွင်း ပေါ်လာပါမည်။]

[၅]

[၄]

...

ရေတွက်မှု ၁ သို့ ရောက်သည်နှင့် မီကျား အလိုအလျောက် ခေါင်းလှည့်လိုက်သည်။ ပုပ်ပွနေသည့် ၊ အနံ့ဆိုးထွက်နေသော လက်တစ်ဖက်သည် သူ့မျက်နှာကို တိုက်ခိုက်သွားပြီး ၎င်း၏ချွန်ထက်သော လက်သည်းများသည် အလုပ်ရုံတံခါးတွင် အပေါက်ငယ်လေးတစ်ခု ဖန်တီးလိုက်သည်။

သူ၏တံခါးနှင့် ပြတင်းပေါက်များ နှစ်ခုစလုံး တင်းကျပ်စွာ လော့ခ်ချထားသည်၊ ထို့ပြင် လုချန်သည်လည်း အခန်းထဲတွင် နာနာခံခံ ပိတ်မိနေပြီး ထွက်လာခြင်းမရှိသည်ကို မီကျား သေချာ​ပေသည်။ ထို့ကြောင့် ရုတ်တရက်ပေါ်လာသော ဤဖုတ်ကောင်အတွက် ဖြစ်နိုင်ခြေ တစ်ခုတည်းသာ ရှိသည်။

ကြည့်ရှုသူများက ထည့်လိုက်ခြင်းဖြစ်သည်။

မီကျား ဝမ်းသာလွန်း၍ ပျော်ရွှင်သွားသည်။ ဘီလူးဒေတာကတ် တွေကို ဘယ်လိုစုဆောင်းရမလဲ စဥ်းစားနေခဲ့တာ၊ အခုတော့ တစ်ကောင်တည်း သူ့ဆီကို ရောက်လာတာပဲ!

အလွန်လျင်မြန်သော ဖုတ်ကောင်သည် ၎င်း၏လက်ကို ပြန်ဆွဲထုတ်သွားပြီး ခြိမ်းခြောက်ဟိန်းဟောက်သံဖြင့် မီကျားထံသို့ တစ်ဖန် ခုန်အုပ်လိုက်သည်။

မီကျား အလုပ်ရုံတံခါးကို ဖွင့်ပြီး ဝင်ပေါက်တွင် ရပ်နေလိုက်သည်။ ဖုတ်ကောင် သူ့ဆီ ခုန်အုပ်လာချိန်တွင် သူက လျင်မြန်စွာ ရှောင်တိမ်းလိုက်ပြီး ခြေထောက်ကို မြှောက်ကာ ဖုတ်ကောင်ကို အခန်းထဲသို့ ကန်သွင်းလိုက်သည်။ ထို့နောက်  ချောမွေ့ပြေပြစ်သော လှုပ်ရှားမှုဖြင့် တံခါးကို ပိတ်လိုက်သည်။

အတွင်းမှ ဖုတ်ကောင်၏ ဒေါသထွက်နေသည့် အော်ဟစ်သံများ အနည်းငယ် ကြားရသော်လည်း မကြာမီတွင် အသံများ တိတ်တဆိတ် မှေးမှိန်သွားသည်။

ဖုတ်ကောင်က တံခါးတွင် ဖောက်ထားသည့် အပေါက်မှတစ်ဆင့် မီကျား ချောင်းကြည့်လိုက်ရာ ဖုတ်ကောင် ရပ်တန့်သွားသည်ကို တွေ့လိုက်ရသည်။ ၎င်း၏ကိုယ်ခန္ဓာသည် ဆွဲဖြဲခံထားရပြီး၊ အစိတ်အပိုင်းများ နေရာအနှံ့ ပြန့်ကြဲနေကာ၊ ၎င်း၏ခေါင်းသည်လည်း စုတ်ပြတ်သတ်နေသည်။ စကျင်ကျောက်လုံးအရွယ်ခန့်ရှိသော အပြာရောင်အလုံးလေးတစ်ခုသည် ၎င်း၏ပျက်စီးနေသော၊ အစိမ်းရောင်သန်းနေသည့် ဦးနှောက်ထဲမှ လိမ့်ထွက်လာပြီး ကြမ်းပြင်ပေါ်သို့ တကျောက်ကျောက်ကျသွားသည်။

မီကျား တံခါးကိုဖွင့်ပြီး အပြာရောင်အလုံးလေးကို ကောက်ယူရန် ငုံ့လိုက်သည်။

[ရှင်သန်သူ မီကျား အနေဖြင့် မြန်နှုန်းမြင့် ဘီလူးဒေတာကတ်ကို ဖွင့်လှစ်နိုင်ခဲ့သည့်အတွက် ဂုဏ်ယူပါသည်။]

အီလက်ထရွန်နစ်အသံ ထွက်ပေါ်လာသည်နှင့်အမျှ သူ၏ရှေ့တွင် စာမျက်နှာတစ်ခု ပေါ်လာသည်။

[ဘီလူးအမည်- မြန်နှုန်းမြင့်ဘီလူး] 

[အဆင့်- အဆင့် ၂]

 [မှတ်ချက်- မြန်ဆန်ခြင်းမှလွဲ၍ ကောင်းသည့်အရာ မရှိပါ။ ဤ ခရစ်စတယ်ကို ဂိမ်းအဆုံးသတ်ပြီးနောက် ရှင်သန်ရေးအမှတ်အဖြစ် တွက်ချက်နိုင်ပြီး ဘီလူးဘုရင်မှ စုပ်ယူနိုင်ပါသည်။]

ခရစ်စတယ်ကို ဘီလူးဘုရင်မှ စုပ်ယူနိုင်သည်... ဖုတ်ကောင်ကမ္ဘာပျက်ခြင်း ကမ္ဘာဖြစ်သည့်အတွက် ကမ္ဘာ့ဘော့စ်  သည် ဘီလူးဘုရင် ဖြစ်ရမည်။ ဆိုလိုသည်မှာ လုချန်ပင်။

မီကျား အပြာရောင် ခရစ်စတယ်ကို တစ်ချက်ကြည့်လိုက်ပြီးနောက် လုချန်ထံသို့ လျှောက်သွားသည်။ သူသည် လုချန်၏ပါးစပ်မှ ကိုက်ခံထားရသော အကာကို အနည်းငယ် လျှော့လိုက်ပြီး၊ ခရစ်စတယ်ကို သူ၏လက်ဖဝါးတွင် ဂရုတစိုက်ကိုင်ကာ ၊ မြန်နှုန်းမြှင့်ဘီလူးကို အကြွင်းမဲ့ ဖုတ်ကောင်အဖြစ် ပြောင်းလဲကာ ဆွဲဖြဲပစ်ခဲ့သည့် လုချန်ထံ ကမ်းပေးလိုက်သည်။

လုချန် ခြိမ်းခြောက်သည့်အနေဖြင့် သွားဖြဲပြရင်း ခေါင်းကို အနည်းငယ် မော့လိုက်သည်။ သို့သော် အပြာရောင် ခရစ်စတယ် ကို မြင်လိုက်ရသောအခါ ခေတ္တရပ်သွားပြီးနောက် ပါးစပ်ကို ကျယ်ကျယ်ဖွင့်ကာ ၎င်းကို ကိုက်ချလိုက်သည်။

မီကျား ကျွမ်းကျင်လျင်မြန်စွာဖြင့် ခရစ်စတယ်အား သူ့ပါးစပ်ထဲသို့ လွှဲပစ်ထည့်လိုက်သည်။

လုချန်၏ခေါင်းပေါ်တွင် စာကြောင်းတစ်ကြောင်း ပေါ်လာသည်။

(နှစ်သက်မှုအဆင့် +၁)

ဒါကလည်း အလုပ်ဖြစ်တယ်ပေါ့?! နှစ်သက်မှုအဆင့်အား တိုးမြှင့်ရန် နည်းလမ်းသစ်ကို ရှာဖွေတွေ့ရှိလိုက်သော မီကျားသည် ထိုဘီလူးကို ထည့်သွင်းပေးခဲ့သော စိတ်အားထက်သန်သည့် ကြည့်ရှုသူအား စိတ်ပါလက်ပါ ကျေးဇူးတင်လိုက်သည်။

သဘာဝရဲ့ လက်ဆောင်အတွက် ကျေးဇူးတင်ပါတယ်....

ဟော့ဂျ်သည် မီကျားက ကြိုးတုပ်ထားသော ဖုတ်ကောင်အား ခရစ်စတယ် ကျွေးလိုက်သည်ကို အံ့အားသင့်စွာ ကြည့်နေမိသည်။

ဒီရှင်သန်သူရဲ့ အခန်းထဲမှာ ဖုတ်ကောင်ကို ဘာလို့ ကြိုးတုပ်ထားတာလဲ... ဒါ့အပြင် ဒီဖုတ်ကောင်ရဲ့ ခေါင်းပေါ်မှာ "စတင်သူနယ်မြေ ကမ္ဘာ့ဘော့စ် အမှတ် ၃၀၇၃" ဆိုတဲ့ စာသားတွေ ကပ်ထားတယ်လေ။

သူ့ရဲ့ ရှင်သန်မှုအမှတ် ၁,၀၀၀ က ဒီရှင်သန်သူကို သတ်ဖို့ ပျက်ကွက်ရုံသာမကဘဲ၊ ဘီလူးဘုရင်ကိုပါ အဲဒီလို ကျွေးလိုက်ရတယ်တဲ့လား....

ဒါက သဘာဝကျရဲ့လား?.....

ဒါ့အပြင် ဒီလို ဘီလူးဘုရင်တစ်ကောင် အခန်းထဲမှာ ရှိနေတယ်ဆိုတာ သူသိခဲ့ရင်၊ ဘီလူးတစ်ကောင်ကို ထည့်သွင်းဖို့ ရှင်သန်မှုအမှတ်တွေ လုံးဝအလဟဿ မဖြုန်းခဲ့ပါဘူး။ အဘယ်ကြောင့်ဆိုသော် ကံကြမ္မာဆိုးနှင့် ရင်ဆိုင်နေရသည့် ရှင်သန်သူတစ်ယောက်အတွက် နောက်ထပ် ဘီလူးများ ထည့်ပေးရန် မလိုအပ်ပါဘဲ၊ သူတို့ သေဆုံးရန် အချိန်တစ်ခုသာ လိုအပ်သောကြောင့်ပင်။

စတင်နယ်မြေထဲမှ ကမ္ဘာ့ဘော့စ်များသည် အစောပိုင်း အသွင်ပြောင်းကာလတွင် အတော်လေး အားနည်းပေမယ့်၊ နောက်ပိုင်းတွင် အဆင့်တက်နေမှာပင် ။ အဆင့်မြင့်လေလေ၊ ရှင်သန်သူ၏အခြေအနေမှာ ပိုခက်ခဲလာလေလေ ဖြစ်မှာပင် ဖြစ်သည် ။

ဒီရှင်သန်သူသာ အစကတည်းက သူ့ကို သတ်ခဲ့ရင် အနိုင်ရနိုင်တယ်။ ဒါပေမဲ့ သူက မသတ်ခဲ့ရုံသာမကဘဲ အဆင့်တက်ဖို့ ခရစ်စတယ်တွေတောင် ကျွေးနေသေးတယ်...

ဟော့ဂျ် နှာခေါင်းရှုံ့လိုက်ပြီး တိုက်ရိုက်ထုတ်လွှင့်မှုမှ ထွက်ခွာသွားသည်။

 ရက်အနည်းငယ်အတွင်းတွင် ထိုရှင်သန်သူသည် ဘီလူးဘုရင်၏ ကိုက်ဖြတ်ခြင်းကို ခံရပြီး အပိုင်းပိုင်းပြတ်သွားနိုင်ပေ၏ ...

လုချန်ကို ခရစ်စတယ် ကျွေးပြီးနောက် မီကျားသည် သူ့ထံမှ ပစ္စည်းများ လိုက်လံရှာဖွေရန် လုချန်၏အိမ်သို့ သွားခဲ့သည်။ သို့သော် သူသည် အတွင်းတွင် အစားအစာများစွာ မတွေ့ရပေ။ အိတ်ကြီးများ၏ အများစုမှာ ဆေးဝါးပစ္စည်းများနှင့် စာအုပ်များဖြင့် ပြည့်နေသည်။

တိုက်ခန်းတစ်ခုလုံးကို အဖြူနှင့် အနက်ရောင် တစ်ရောင်တည်းဖြင့် အလှဆင်ထားပြီး၊ အေးစက်စက်ရှိသော်ငြားလည်း သန့်ရှင်းနေသည်။

အိပ်ခန်းသို့ ရောက်သောအခါ၊ ကုတင်ဘေးရှိ ဗီဒိုသေးသေးလေးပေါ်တွင် ဓာတ်ပုံဘောင်တစ်ခုကို တွေ့ရပြီး ပေါ့ပေါ့ပါးပါး ကောက်ယူကြည့်လိုက်သည်။

ယင်းသည် ပျော်ရွှင်သော မိသားစုသုံးယောက် ဓာတ်ပုံဖြစ်ပြီး ပျော်ရွှင်စွာ ပြုံးနေကြသည်။ ဓာတ်ပုံထဲမှ လုချန်သည် ဆယ်ကျော်သက်အရွယ်ခန့်သာ ရှိသေးပြီး ကလေးတစ်ယောက်သာ ဖြစ်နေသေးသည်။ မီကျားသည် လုချန်၏ မိဘ မျက်နှာပေါ်တွင် ခေတ္တမျှ စိုက်ကြည့်ပြီးနောက် ဓာတ်ပုံဘောင်ကို လှန်လိုက်ကာ ဗီဒိုပေါ် ပြန်တင်ပြီး သူ၏အိမ်သို့ ပြန်လာခဲ့သည်။

အိမ်သို့ပြန်ရောက်သောအခါ မီကျား နံရံပေါ်ရှိ နာရီမှ အချိန်ကို တစ်ချက်ကြည့်လိုက်သည်။ ည ၁၁ နာရီကျော်နေပြီ ဖြစ်ပြီး မကြာမီ စတုတ္ထမြောက်နေ့ ဖြစ်လာတော့မည်။ သတင်းများက စိတ်အနှောင့်အယှက်ဖြစ်ဖွယ်ရာ အချက်အလက်များကို ပြီးခဲ့သည့် သုံးရက်တာလုံး ထုတ်လွှင့်နေသော်လည်း၊ လုချန်နှင့် ကြည့်ရှုသူများ ပို့လိုက်သည့် ဖုတ်ကောင်မှလွဲ၍ သူသည် အခြားခြိမ်းခြောက်မှုများကို မကြုံတွေ့ရသေးပေ။

ကမ္ဘာပျက်ဂိမ်းသည် ဤမျှနှေးကွေးသော အရှိန်အဟုန်ဖြင့် ဆက်သွားနေပါက၊ သူ၏နှစ်ပေါင်းများစွာ ဂိမ်းကစားခဲ့သည့် အတွေ့အကြုံအရ သူ့အတွက် အလွန်ပျင်းစရာကောင်းလိမ့်မည်။ ဒီလို ဆွဲဆန့်နေတဲ့ ဂိမ်းထုတ်လွှင့်မှုကိုလည်း သူ ဆက်ကြည့်ချင်မှာ မဟုတ်ဘူး။

အကျပ်အတည်းသည် တစ်ချိန်ချိန်တွင် ရုတ်တရက် ပေါ်ပေါက်လာနိုင်သည်။ မကြာခဏဆိုသလို ဖြစ်လာနေသည့် လျှပ်စစ်မီးနှင့် ရေပြတ်တောက်မှုများကို ကြည့်ခြင်းအားဖြင့်၊ ဤအရေးကြီးသည့် အချိန်သည် လာမည့်ရက်အနည်းငယ်အတွင်း ရောက်ရှိလာနိုင်ဖွယ်ရှိသည်။

စတုတ္ထမြောက်နေ့ မရောက်မီ တစ်နာရီထက်နည်း‌သော အချိန်တွင်၊ ကျွမ်းကျင်မှု  အချိန်ကန့်သတ်ချက်ကို စမ်းသပ်မှုငယ်တစ်ခုအတွက် အသုံးပြုရန် အကောင်းဆုံးအချိန် ဖြစ်သည်။

ဤအကြောင်းကို စဥ်းစားရင်း မီကျား သူ၏မျက်နှာပေါ်ရှိ အနီရောင်ကြက်ခြေခတ်အမှတ်အသားကို ထိလိုက်ပြီး ပေါ်လာသော ပရိုဖိုင်ကတ်ပေါ်ရှိ ကျွမ်းကျင်မှုခလုတ်ကို နှိပ်လိုက်သည်။

ခလုတ်ကို နှိပ်လိုက်သောအခါ ကတ်အကွက်များ တန်းစီ ပေါ်လာသည်။ အကွက်များထဲတွင် သူ ခုနက ကြုံတွေ့ခဲ့ရသော မြန်နှုန်းမြင့်ဘီလူးကို သရုပ်ဖော်ထားသည့် ကတ်တစ်ကတ်သာ ရှိနေသည်။

သူ ထိုကတ်ကို နှိပ်လိုက်သည်နှင့် သူ့ခန္ဓာကိုယ်တွင် အပြောင်းအလဲတချို့ကို  ချက်ချင်း ခံစားလိုက်ရသည်။

သွေးအနံ့ သင်းသင်းလေးမှာ သူ့ပတ်လည်တွင် လွှမ်းခြုံလာသည်။

တိုက်ရိုက်ထုတ်လွှင့်မှု စာမျက်နှာမှတစ်ဆင့် မီကျား၏ ယခင်က ချောမွေ့နူးညံ့သည့် ၊ ပန်းရောင်သန်းနေသော အသားအရေသည် ဖြူဖျော့သွားပြီး အပြာရောင် သွေးပြန်ကြောများ ထင်ရှားစွာ ပေါ်ထွက်လာသည်ကို မြင်လိုက်ရသည်။ သူ၏မျက်လုံးအိမ်များသည် နက်နက်ရှိုင်းရှိုင်း ပိန်ချိုင့်ဝင်သွားပြီး ပါးစပ်မှာ နားရွက်နားအထိ ကျယ်ပြန့်စွာ ကွဲအက်သွားကာ၊ ချွန်ထက်သော သံမဏိကဲ့သို့ သွားများကို ဖော်ပြနေသည်။ သူသည် အလွန် ထူးဆန်းပြီး ကြောက်မက်ဖွယ်ကောင်းနေသည်။

သို့သော် သူသည် ရွံရှာခြင်း သို့မဟုတ် စက်ဆုပ်ခြင်းအား မခံစားရပေ။ ဆန့်ကျင်ဘက်အားဖြင့်၊ သူ၏ပုံစံသစ်ကို အတော်လေး ကျေနပ်ပြီး အကြိမ်များစွာ သဘောကျနေခဲ့သည်။ မဆိုးဘူး၊ အရမ်းကြည့်ကောင်းတယ်….

တိုက်ရိုက်ထုတ်လွှင့်မှု မြင်ကွင်းရှုထောင့်မှကြည့်လျှင် သူ၏ခေါင်းပေါ်တွင် စာလုံးအနီသေးသေးလေးတစ်ကြောင်း ပေါ်နေသည်။

[မြန်နှုန်းမြင့်ဘီလူး]

မီကျားသည် သူ၏ပရိုဖိုင်ကတ်ကို တစ်ဖန် ပြန်ကြည့်လိုက်၏ ။

ပရိုဖိုင်ကတ်၏ အကြောင်းအရာများ ပြောင်းလဲသွားသည်။

[ရှင်သန်သူအမည်: မြန်နှုန်းမြင့်ဘီလူး - မီကျား]

 [ကျား/မ: ?] 

[ထူးခြားသော စွမ်းရည်: အရှိန် +၅] 

[ကျွမ်းကျင်မှု: မရှိ]

 [ခွန်အား: ၂]

 [ကာကွယ်မှု: ၃] 

[ဉာဏ်ရည်: ၀]

 [ဆွဲဆောင်မှု: ၀]

ဒေတာကတ်၏ ကျွမ်းကျင်မှုခလုတ်ပေါ်တွင် စာလုံးအနည်းငယ် ပိုထွက်လာသည်။

[ကျန်ရှိသည့်အချိန်: ၃:၃၄]

သူ ကျွမ်းကျင်မှုခလုတ်ကို ထပ်နှိပ်လိုက်သည်နှင့် သူ၏ကိုယ်ခန္ဓာသည် မူလပုံစံသို့ ချက်ချင်း ပြောင်းလဲသွားပြီး၊ ကျန်ရှိသည့်အချိန်သည် ၃:၃၄ တွင် ဆက်ရှိနေသည်။

ဆိုလိုသည်မှာ အသွင်ပြောင်းနိုင်သည့် စွမ်းရည်ကို ရပ်နားနိုင်ပြီး အကြိမ်များစွာ ပြန်လည်အသုံးပြုနိုင်သည်။ တစ်ခါ အသက်သွင်းပြီးသည်နှင့် အချိန်ကုန်ဆုံးသည်အထိ စောင့်ရန်မလိုပေ။

ယင်းသည် မီကျားအတွက် အတော်လေး အသုံးဝင်ပေသည်။ သူ၏ကာကွယ်မှုအဆင့်မှာ ၀ သာရှိပြီး မတော်တဆ ထိခိုက်ဒဏ်ရာရလျှင် သေဆုံးနိုင်သည်။ သို့သော် ဤကျွမ်းကျင်မှုဖြင့် ဒဏ်ရာမရမီ ကာကွယ်ရန်အတွက် ဘီလူးပုံစံကို အသုံးပြုနိုင်သည်။ ဘီလူး၏ ကာကွယ်မှုသည် မမြင့်မားသော်လည်း ၀ ထက် သာပြီး၊ တစ်ချက်တည်းဖြင့် သေဆုံးခြင်းမှ ကာကွယ်ပေးနိုင်မည် ဖြစ်သည်။

သို့သော် တစ်နေ့လျှင် ၅ မိနစ်သည် အလွန်တိုတောင်းနေသေးသည်။ ကျွမ်းကျင်မှုကို အဆင့်မြှင့်တင်ရန် နည်းလမ်းရှာဖွေရဦးမည် ထင်ရပေသည်။ အသွင်ပြောင်းလဲခြင်း ကျွမ်းကျင်မှုကို ဖွင့်ရန်အတွက် စာမျက်နှာကို ဖွင့်ပြီး ဘီလူးကတ်ကို နှိပ်ရခြင်းမှာ အနည်းငယ် အလုပ်ရှုပ်သည်။ သူ မည်မျှပင် ကျွမ်းကျင်ပါစေ၊ လုပ်ဆောင်ချက်ကို လုပ်ဆောင်ရန် အနည်းဆုံး ၁-၂ စက္ကန့်တော့ အချိန်ယူရပေမည်။ ဆိုလိုသည်မှာ အကျပ်အတည်းနှင့် ရင်ဆိုင်ရသောအခါ လျင်မြန်စွာ ခန့်မှန်းနိုင်ရမည်၊ မဟုတ်ပါက ကျွမ်းကျင်မှုကို အသက်သွင်းနိုင်ခြင်းမရှိမီ အမိခံလိုက်ရနိုင်သည်။

နောက်ထပ် အာရုံစိုက်ရမည့်အရာတစ်ခု ရှိသေးသည်။

မီကျား တိုက်ရိုက်ထုတ်လွှင့်မှု မျက်နှာပြင်ကို ကြည့်လိုက်ရာ ညာဘက်အပေါ်ထောင့်ရှိ ကြည့်ရှုသူအရေအတွက်သည် ၀ ဖြစ်နေပြီးမှ အနည်းငယ် တည်ငြိမ်သွားသည်ကို တွေ့လိုက်ရသည်။

ကြည့်ရှုသူ၏ ပေါ်လာသည့်စာပါ အကြောင်းအရာများအရ ကြည့်ရှုသူများသည် ရှင်သန်သူ၏တည်နေရာကို မြင်နိုင်ပြီး၊ အတူတူရှိသော ဧရိယာမှ အခြားရှင်သန်သူများအား အချက်အလက်အချို့ကို ပေးပို့နိုင်ပုံရသည်။

ဤ စတင်သူနယ်မြေသည် ရှင်သန်သူများကို အဆင့်ကျော်ရန် အတူတကွ လုပ်ဆောင်စေရန် ကြိုးစားနေပုံရသော်လည်း၊ ရှင်သန်သူအားလုံးသည် သူ့လိုမျိုး ဥပဒေကို လိုက်နာသော ကောင်းမွန်သော နိုင်ငံသားများ ဖြစ်လိမ့်မည်ဟု အာမခံနိုင်ခြင်း မရှိပေ။

သူ အခု ပိုပြီး အာရုံစိုက်ခံရလေလေ၊ သူ့ ကျွမ်းကျင်မှုများကို ကြည့်ရှုသူများ သိရှိသွားနိုင်ခြေက ပိုများလေလေ ဖြစ်သည်။ ကြည့်ရှုသူများက သူ၏ကျွမ်းကျင်မှုများကို သိရှိသွားပြီး ဆိုးရွားသော ရည်ရွယ်ချက်ရှိသည့် အခြားရှင်သန်သူများအား သတင်းပေးပါက ပြဿနာရှိလာနိုင်သည်။

ထို့ပြင် ကမ္ဘာပျက်ကမ္ဘာရှိ ရှင်သန်သူများအကြား ဆက်ဆံရေးသည် ပူးပေါင်းဆောင်ရွက်ခြင်းမှ ဆန့်ကျင်ဘက်ဖြစ်ခြင်းသို့ ပြောင်းလဲသွားပါက၊ ၎င်းသည် အလွန်ခက်ခဲရှုပ်ထွေးသော ပြဿနာ ဖြစ်လာနိုင်သည်။

သူ၏ကျွမ်းကျင်မှုများက သူ၏ဘေးကင်းမှုကို အာမခံနိုင်လောက်အောင် မတိုးတက်သေးမီ၊ အာရုံစိုက်မှု အလွန်အကျွံ မခံရအောင် သေချာလုပ်ရပေမည်။

ဤအချက်ကို စဥ်းစားပြီးနောက် မီကျားသည် အနက်ရောင် လည်ပင်းစည်းဆွယ်တာကို ဝတ်လိုက်ရာ မျက်နှာတစ်ဝက်ကို ဖုံးအုပ်သွားသည်။ ပွပွချောင်ချောင် အနီရောင်ရင့်ရင့် ခေါင်းစွပ်ကို ဝတ်ဆင်ပြီး အနက်ရောင် နှာခေါင်းစည်း တပ်လိုက်သည်။ ခေါင်းစွပ်ကို ခေါင်းပေါ်ဆောင်းလိုက်ရာ သူ၏ဆံပင်များကို လုံးဝဖုံးကွယ်သွားပြီး၊ သူ၏မျက်နှာတစ်ခုလုံးအား အရိပ်များက နီးပါး မြိုချထားသကဲ့သို့ ဖြစ်နေသည်။

"သက်ပြင်းချ"၊ အရမ်းချောတာက တစ်ခါတလေ ကျိန်စာတစ်မျိုးပါပဲဟု သူ အနည်းငယ် ဝမ်းနည်းပူဆွေးစွာ တွေးလိုက်မိသည်။

"တိတ်-တုတ်"

"တိတ်-တုတ်"

နံရံကပ်နာရီ၏ လက်တံများသည် ၁၂ နာရီကို ညွှန်ပြနေသည်။

ပြတင်းပေါက်အပြင်ဘက်တွင် အော်ဟစ်သံတစ်ခုဖြင့် ကမ္ဘာပျက်ခြင်းအား စတင်လိုက်သည်။