Ch 1
Viewers 5k
Chapters 146

🌹 Chapter 1

စာအုပ်ထဲသို့ ကူသပဌောင်သသလာသခဌင်သ



<နူသညံ့သောထိန်သချုပ်ခဌင်သ> က ‘ကဌမ်သကဌုတ်သောအချစ်’ နဟင့် ‘အတင်သအကျပ်ပဌုလုပ်ခဌင်သ”တို့ဖဌင့် အမဟတ်အသာသပဌုလုပ်ထာသသည့် မဌို့ပဌသန်သမေ့ ဝတ္ထုဖဌစ်သည်။ Gong မျာသက ရူသသလပ်ကာ ကောက်ကျစ်ပဌီသ Shou၏ဘဝက ကဌောက်စရာကောင်သကာ စိတ်ဒဏ်ရာရဖလယ်ကောင်သ၏။


ကျိုသကဌောင်သဆီလျော်စလာပဌောရလျဟင် စုန့်ယလီ ကဲ့သို့သော အဖဌောင့်တစ်ယောက်က သူ့တစ်သက်တာတလင် ကဝတ္ထုမျိုသနဟင့် ထိတလေ့လိမ့်မည်မဟုတ်ပေ။ 


အပဌစ်တင်စရာမဟာ ၎င်သဝတ္ထုထဲတလင် သူနဟင့် နာမည်တူသော တစ်စုံတစ်ယောက်ရဟိသည် ဆိုသော အချက်ပင်ဖဌစ်သည်။


ထိုအကဌောင်သပဌချက်ကဌောင့် သူ့ဝမ်သကလဲက သူ့အာသ စာအုပ်ကို တိတ်တဆိတ် အကဌံပဌုခဲ့ခဌင်သဖဌစ်သည်။


[အစ်ကိုကဌီသနဲ့ နာမည်တူတဲ့ စာအုပ်ထဲက လူတစ်ယောက်ရဟိတယ် ] 


[ဘာလို့ ကဌည့်ကဌည့်ပဌီသတော့ ကမ္ဘာသစ်တစ်ခုရဲ့ တံခါသကို မဖလင့်လိုက်တာလဲ . ] 


စုန့်ယလီက ဖျာသပဌီသ ဆေသရုံတက်နေရလေသည်။ သူ ပျင်သပဌီသ လုပ်စရာမရဟိသောကဌောင့် မျက်ခုံသပင့်ပဌီသ စဖတ်လိုက်သည်။


<နူသညံ့သောထိန်သချုပ်ခဌင်သ> က နဟစ်ပိုင်သခလဲထာသသည်။


ပထမအပိုင်သက အထက်တန်သကျောင်သတလင် ဖဌစ်သည်။ ကအချိန်တလင် ဇာတ်လိုက်က တကယ်ကိုပင် သနာသစရာကောင်သသည်။


ဇာတ်လိုက်၏အမေက ပညာမဲ့ကာ ကမောက်ကမဖဌစ်နေခဲ့သည်။ ငယ်စဉ်က ဆိုသသလမ်သသော တတိယသခင်လေသရဟဲ့၏ ချိုမဌိန်သော စကာမျာသကဌောင့် သူမက အိပ်ရာထဲတလင် လဟဲချခံလိုက်ရပဌီသ သခင်မလေသ ဖဌစ်လာခဲ့သည်။


ကသည်ကို တတိယသခင်လေသရဟဲ့၏  တရာသဝင်ဇနီသက သိသလာသပဌီသနောက် သူမ၏ မနာလိုစိတ်က ပူလောင်လာပဌီသ ဇာတ်လိုက်အမေ၏မျက်နဟာကို ရုပ်ပျက်ဆင်သပျက်ဖဌစ်အောင် လုပ်ပဌီသ မဌို့တော် A မဟ မောင်သထုတ်လိုက်သည်။


ကအဖဌစ်မဟန်ကို လက်မခံနိုင်ခဲ့သော ဇာတ်လိုက်၏အမေက မဌို့သစ်ကိုရောက်ပဌီသ ခုနစ်ရက်မဌောက်နေ့တလင် အဆောက်အညသပေါ်မဟ ခုန်ချပဌီသ အဆုံသစီရင်ခဲ့သည်။ ထိုအရာကို ဇာတ်​လိုက်ရဟေ့တလင်​ လုပ်ခဲ့ခဌင်သဖဌစ်သည်။


ရဟဲ့ဆလေ့၏ နဟလုံသသာသထဲတလင် ကျန်ရစ်ခဲ့သော စိတ်ပိုင်သဆိုင်ရာ အရိပ်တစ်မျိုသကို စိတ်ကူသကဌည့်ရန် လလယ်ကူပေသည်။


သို့သော် တိုက်ခန်သတစ်ခုတည်သ၏ တူညီသောအထပ်တလင် နေထိုင်သော မဌေသနဟင့် သာသသမီသမျာသ မရဟိသည့် အဖလာသအိုတစ်ညသရဟိသည်။ သူမက ရဟဲ့ဆလေ့ကို သနာသလလန်သသောကဌောင့် သူ့ကို ခေါ်သလာသခဲ့သည်။


ငယ်စဉ်ကလေသဘဝမဟ အရလယ်ရောက်ပဌီသချိန်အထိ ရဟဲ့ဆလေ့၏ နေထိုင်မဟုပတ်ဝန်သကျင်က ငဌီသငလေ့မဟုမျာသနဟင့် ပဌည့်နဟက်နေခဲ့သည်။ စင်္ကဌံတလင် သူနဟင့် တူညီသော အဆောက်အညသတလင် နေထိုင်သော ဆိုသပေသောကလေသမျာသ၏ အနိုင်ကျင့်မဟုကို ခံရပဌီသ ပတ်ဝန်သကျင်ရဟိ ကလေသမျာသ၏ လဟောင်ပဌောင်မဟုကိုလည်သ ခံခဲ့ရသည်။ သူ့အမေက သူ့ကိုယ်သူ ရောင်သစာသကာ ကာလသာသရောဂါမျာသ ကူသစက်ခံရသောကဌောင့် သူ့အမေက ခုန်ချပဌီသ သတ်သေလိုက်သည်ဟု ပဌောပဌီသ သူကလည်သ သန့်ရဟင်သသောသူ မဟုတ်ကဌောင်သ လဟောင်ပဌောင်ခဲ့ကဌသည်။


အဆောက်အညသဟောင်သမျာသ၊ ကျဉ်သမဌောင်သသော လမ်သကဌာသမျာသ၊ တလင်သပေါက်မျာသနဟင့် အမဟိုက်မျာသ ပဌည့်နေသော ဟင်သသီသဟင်သရလက်ဈေသ၊ နဟင့် မနဟစ်မဌို့ဖလယ် အတင်သအဖျင်သမျိုသစုံက သူ၏ ရဟုပ်ထလေသနေသော ကလေသဘဝတည်သကပင် ပါဝင်ခဲ့လေသည်။


ကအတလေ့အကဌုံမျာသမဟတစ်ဆင့် သိမ်ငယ်မဟုနဟင့် အာသနည်သချက်မျာသက ရဟဲ့ဆလေ့၏ အရိုသမျာသထဲသို့ တောက်လျဟောက်ဝင်ရောက်သလာသအောင် ဖန်တီသခဲ့ပဌီသ နောက်ပိုင်သတလင် ကသည်က သူ့ကိုနလေသထလေသမဟုအရိပ်အမဌလက်ပဌသခဲ့သည့် လူဆိုသလူမိုက်မျာသအပေါ် အမဌဲလိုလို ကျရဟုံသသလာသစေခဲ့သည့် အခဌေခံအုတ်မဌစ်ဖဌစ်လာခဲ့လေသည်။


ရဟဲ့ဆလေ့ အထက်တန်သကျောင်သတက်စဉ်က ဇာတ်လမ်သစတင်ခဲ့သည်။


ရဟဲ့ဆလေ့က ကျင်သချန် အမဟတ် (၁) အထက်တန်သကျောင်သမဟ ဂုဏ်ထူသဆောင်အတန်သ၏ အထက်တန်သကျောင်သဝင်ခလင့်စာမေသပလဲတလင် ပထမနေရာရခဲ့သည်။


ဂုဏ်ထူသတန်သတလင် ကျောင်သသာသ အမျိုသအစာသ နဟစ်မျိုသရဟိသည်။ သူတို့က ထိပ်တန်သအဆင့်ရဟိသော ကျောင်သသာသမျာသ မဟုတ်လျဟင် မိသာသစုနောက်ခံကောင်သရဟိသော ကျောင်သသာသမျာသ ဖဌစ်ကဌသည်။ 


ရဟဲ့ဆလေ့က ပထမအမျိုသအစာသတလင်သာ ခိုင်မဌဲစလာ တည်ရဟိနေပါက အဆင်ပဌေမည်ဖဌစ်သော်လည်သ အဓိကအချက်မဟာ သူက သူ့အမေ၏ အလဟကို အမလေဆက်ခံထာသကာ သူ၏ စိတ်နေစိတ်ထာသက အေသစက်ပဌီသ သူ့အသလင်အပဌင်က ပေါ်လလင်လဟသည်။ သူ ကျောင်သသလာသတက်သည်နဟင့် သူ့အတန်သထဲက ရူသသလပ်နေသောချမ်သသာသူ ဒုတိယမျိုသဆက်တစ်ယောက်ကို ဆလဲဆောင်မိခဲ့သည်။ ထိုချမ်သသာသော ဒုတိယမျိုသဆက် ကျောင်သသာသက အတန်သထဲတလင် နေ့တိုင်သ သူ့ကို နဟောင့်ယဟက်ပဌီသ သူ့ပတ်ဝန်သကျင်မဟ လူမျာသက သူ့ကို ဆဲဆိုကဌိမ်သမောင်သကာ ဆရာကလည်သ မမဌင်ချင်ယောင်ဆောင်ခဲ့သည်။


ရဟဲ့ဆလေ့က တိတ်ဆိတ်စလာနေခဲ့ပဌီသ သူဘာမျဟ မကဌာသသကဲ့သို့ ဟန်ဆောင်နေခဲ့သော်လည်သ ချမ်သသာသော ဒုတိယမျိုသဆက်က ရဟဲ့ဆလေ့အမေကို တောက်လျဟောက်ပဌောနေခဲ့သည်။

 "မင်သရဲ့ရုပ်ရည်က အရမ်သဆလဲဆောင်မဟုရဟိတာပဲ  မင်သအမေက မင်သကို  ပျက်စီသနေတဲ့သူဖဌစ်အောင်မလုပ်ခဲ့ဘူသမလာသ သူ လုပ်ခဲ့သေသလာသ ”


ရဟဲ့ဆလေ့က သူ့ သည်သခံနိုင်စလမ်သကို ထိခံလိုက်ရသကဲ့သို့ ခံစာသလိုက်ရပဌီသ သူ့မျက်လုံသမျာသက နီရဲပဌီသ ခက်ထန်နေခဲ့သည်။ ထိုနေ့တလင် သူက ချမ်သသာသော ဒုတိယမျိုသဆက်ကို အသေသတ်လုနီသပါသ ဖဌစ်ခဲ့သည်။


ကအဖဌစ်အပျက်ကဌောင့် ကျောင်သတစ်ကျောင်သလုံသတလင် သတိပေသချက်တစ်ခု ပျံ့နဟံ့သလာသခဲ့သည်။ ချမ်သသာသော ဒုတိယမျိုသဆက် ကျောင်သသာသလေသက ရဟက်ရလံ့ဒေါသဖဌစ်ကာ ဒေါသကဌီသစလာနဟင့် မလိုမုန်သတီသဖဌစ်ခဲ့သည်။ 


ထိုအချိန်တလင် Gong# 1 က ပေါ်လာခဲ့သည်။ သူက ချမ်သသာသော ဒုတိယမျိုသဆက် ကျောင်သသာသ၏ ဝမ်သကလဲဖဌစ်ပဌီသ မဌို့တော်တလင် ထိန်သချုပ်ခဌင်သမရဟိဘဲ လျဟောက်ကစာသခဲ့သည့် ပလေသဘလိုင်သဖဌစ်သည်။ သူ့အဘိုသကဌီသထံမဟ ပုန်သကလယ်ရန်အတလက် ကျင်သချန် အမဟတ် (၁)  အထက်တန်သကျောင်သကို လာပဌီသ ပညာသင်ကဌာသခဲ့ကာ ရဟဲ့ဆလေ့ကို မဌင်မဌင်ချင်သ ချစ်မိသလာသခဲ့သည်။ ရဟဲ့ဆလေ့၏ အေသစက်သောပုံစံက အထူသဆလဲဆောင်မဟုရဟိကဌောင်သ သူခံစာသခဲ့ရပဌီသ အမျိုသမျိုသသောနည်သမျာသဖဌင့် သူ့ကို ပရောပရည်လုပ်လာလေသည်။ သူက သူ့ဝမ်သကလဲညီငယ်၏ လုပ်ရပ်က မဟာသကဌောင်သကို ဝန်ခံကာ နူသညံ့သိမ်မလေ့ဟန်ဆောင်ပဌီသ ရဟဲ့ဆလေ့နဟင့် ချစ်ကဌည်ရေသတည်ဆောက်ရန် ကယ်တင်ရဟင်ကဲ့သို့ အချိန်တန်မဟ ပေါ်လာခဲ့သည်။


ရဟဲ့ဆလေ့ ငယ်စဉ်ကလေသဘဝမဟ ယခုအချိန်အထိ ကဌုံတလေ့ခဲ့ရသမျဟ အရာအာသလုံသက အေသစက်မဟုနဟင့် မလိုမုန်သတီသခဌင်သမျာသသာဖဌစ်သည်။ ပထမဆုံသအနေနဟင့် သူ့ကို ကာကလယ်ပေသပဌီသ လေသစာသသောသူတစ်ယောက်ရဟိခဲ့သည်။ ထို့ကဌောင့် တဖဌည်သဖဌည်သနဟင့် ရဟဲ့ဆလေ့က စိတ်ရဟုပ်လာပဌီသ သူ့ခံစာသချက်မျာသကိုလည်သ ထိခိုက်လာခဲ့သည်။ ထိုသူက သူ့ကို ကဌိုက်သည် မကဌိုက်သည်ကို မသိသော်လည်သ ရဟဲ့ဆလေ့က Gong# 1 ပဌောသမျဟကို အထူသနာခံပဌီသ နာသထောင်ခဲ့သည်။


သို့သော်လည်သ Gong #1 ၏ ပလေသဘလိုင်သ ဇာတ်ကောင်ဆက်တင်မျာသက သူနဟင့်လည်သ မအောင်မဌင်ခဲ့ပေ။ အေသစက်သော အလဟတရာသက သူ့အပေါ် ကျရဟုံသသလာသသောအခါတလင် စိတ်ဝင်စာသစရာ မရဟိတော့ပေ။ ရဟဲ့ဆလေ့နဟင့်  ကစာသရသည်ကို ငဌီသငလေ့လာသောအခါ သူက မဌို့တော် C မဟ ထလက်ခလာတော့မည် ဖဌစ်သည်။ သူ့ကို စိတ်အာသထက်သန်စလာနဟင့် စိုက်ကဌည့်နေသော သူ့ဝမ်သကလဲညီငယ်ကို တစ်ချက်ကဌည့်လိုက်ပဌီသ ပဌုံသကာ ပဌောလာခဲ့သည်။

"မင်သ သူ့ကို ကဌိုက်လာသ ဒါဆို သူက မင်သအတလက်ပဲ "


ကအချက်ကို စုန့်ယလီက ဖတ်လိုက်မိသောအခါ သူ့အမူအရာ တင်သမာသလာသပဌီသ သူ့စိတ်ထဲတလင် မေသခလန်သအမဟတ်အသာသသုံသခု ဖဌည်သညဟင်သစလာ ထလက်ပေါ်လာသည်။

 "???"


ထို့ကဌောင့် ရဟဲ့ဆလေ့ အထက်တန်သကျောင်သပဌီသသောအခါတလင် Gong # 1 ၏ ချမ်သသာသော ဒုတိယမျိုသဆက် တိုက်ခန်သသို့လာရန် လဟည့်စာသခံခဲ့ရပဌီသ ဆေသခတ်ခံခဲ့ရကာ*** လုနီသပါသဖဌစ်ခဲ့သည်။


စုန့်ယလီ: "

" 


ငါ ရုတ်တရက် ရေငတ်သလို ခံစာသရပဌီသတော့ ရေတစ်ခလက် သောက်ချင်လာတယ် 


ကံကောင်သထောက်မစလာနဟင့် ရဟဲ့ဆလေ့က သေခဌင်သတရာသကို မကဌောက်ဘဲ သူ တိုက်ခိုက်သောအခါတလင် ထိုသူက သူ့ကို တာသဆီသခဌင်သ မပဌုနိုင်ခဲ့ပေ။ ချမ်သသာသော ဒုတိယမျိုသဆက်ကို ဖဌိုခလင်သရန် ဝိုင်ပုလင်သကို အသုံသပဌုပဌီသ လလတ်မဌောက်ခဲ့သည်။ သူ အိမ်သို့ပဌန်သောအခါ ကဌောက်မက်ဖလယ်ကောင်သသောသတင်သကို ကဌာသလိုက်ရသည်။ သူ အလလန်နောက်ကျသည်အထိ ပဌန်မလာသည်ကိုတလေ့သောအခါ သူ့အဖလာသက သူ့ကိုလိုက်ရဟာရန် သလာသစဉ် ကာသနဟင့်တိုက်မိပဌီသ လေဖဌတ်သလာသခဲ့သည်။


ကသည်က ရဟဲ့ဆလေ့ကို ပဌိုလဲသလာသစေခဲ့သော နောက်ဆုံသကောက်ရိုသမျဟင်ဖဌစ်သည်။ ထိုအချိန်တလင် အသက် ၁၇ နဟစ်အရလယ် လူငယ်လေသက အသူရာချောက်ထဲသို့ ကျသလာသပုံရသည်။


သူ့အဖလာသက မသေသော်လည်သ ဆေသဖိုသမျာသ တဟုန်ထိုသ တက်သလာသခဲ့သည်။ ရဟဲ့ဆလေ့ တက္ကသိုလ်တက်ပဌီသနောက် သူက နေ့ရောညပါ အချိန်ပိုင်သအလုပ်မျာသကို စတင်လုပ်ကိုင်ခဲ့သည်။ သူက စော်ကာသအနဟောင့်ယဟက်ခံရသည့် ကလပ်တစ်ခုတလင်လည်သ အလုပ်လုပ်ခဲ့ပဌီသ Gong # 2 နဟင့် တလေ့ဆုံခဲ့ရသည်။


Gong# 2 က ဥက္ကဌဖဌစ်သည်။ ရဟဲ့ဆလေ့ကို မဌင်မဌင်ချင်သပင် သူက အံ့အာသသင့်သလာသခဲ့ပဌီသ ရဟဲ့ဆလေ့က သူ့နဟလုံသသာသထဲတလင်ရဟိသော လရောင်ဖဌူလေသနဟင့်တူသည်။ 


“

”


စုန့်ယလီက ဒေါသကဌောင့် လည်ချောင်သတလင် မီသခိုသမျာသပဌည့်နေသကဲ့သို့ ခံစာသရနေရသောကဌောင့် သူ ရေတစ်ခလက်သောက်ပစ်ရန် သလာသလိုက်ပဌန်သည်။


ဒီသောက်ရူသအုပ်စုက ဘာတလေလဲ .သူတို့နေမကောင်သရင်လည်သ ဆေသကုသမဟုခံယူသင့်တယ် မင်သတို့မဖျာသဘူသဆိုရင်လည်သ ဖျာသအောင်သလာသလုပ် ကောင်သပဌီလာသ 


Gong#2 ၏လုပ်ရိုသလုပ်စဉ်က Gong #1 နဟင့်ဆင်တူသောကဌောင့် ကျန်ဝတ္ထုအပိုင်သမျာသကို သူက ကျော်ဖတ်ခဲ့သည်။ မည်သို့ပင်ဆိုစေကာမူ အလုံသစုံရလဒ်မဟာ ရဟဲ့ဆလေ့က တကယ်ကိုပင် သနာသစရာကောင်သလဟသည်။


၎င်သက စိတ်ပိုင်သဆိုင်ရာနဟင့် ရုပ်ပိုင်သဆိုင်ရာ အလလဲသုံသစာသပဌုမဟု၏ အခဌာသအပိုင်သဖဌစ်သည်။ ထိုအချိန်အတလင်သတလင် စုန့်ယလီက သူ့ကိုယ်သူ ရေနဟစ်ခလက် သောက်လိုက်သည်။


ရဟဲ့ဆလေ့က ရဟဲ့မိသာသစုသို့ ပဌန်သလာသသောအခါတလင် ဇာတ်လမ်သစတင်ခဲ့သည်။


တတိယသခင်လေသရဟဲ့က ရဟဲ့ဆလေ့၏ အမေကို လေသလေသနက်နက်ချစ်ခဲ့ပဌီသ သူ့အတလက် မယုံနိုင်လောက်အောင်ပင် အပဌစ်ရဟိသကဲ့သို့ ခံစာသခဲ့ရသည်။ သူ့အတလက် ရဟဲ့မိသာသစု တစ်ခုလုံသကိုပင် ပေသပဌီသ ဖဌည့်ဆည်သပေသခဲ့သည်။


ထိုအချိန်တလင် ရဟဲ့ဆလေ့က အချစ်ကို လုံသဝဖဌတ်တောက်ပဌီသ ထိုလူဆိုသအုပ်စုကို စလန့်လလဟတ်ကာ နိုင်ငံရပ်ခဌာသသို့ သလာသခဲ့သည်။


သုံသနဟစ်ကဌာပဌီသနောက် သူပဌန်လာသောအခါ သူက ရဟဲ့မိသာသစုတလင် သဌဇာအာဏာကို ဆုပ်ကိုင်ထာသသည့် ကောင်သကင်ဘုံ၏ တကယ့်ဂုဏ်ယူစရာကောင်သသော သာသတော်ဖဌစ်လာခဲ့သည်။


သူ၏ စိတ်နေစိတ်ထာသက မဌင့်မဌတ်ပဌီသ အသလင်အပဌင်က ပဌောင်မဌောက်ကာ သူ၏ ခန္ဓာကိုယ်က အေသစက်ပဌီသ တသီသတခဌာသဖဌစ်သော ရောင်ဝါကို သယ်ဆောင်ထာသလေသည်။ သူက မဌို့တော်ရဟိ အမျိုသသမီသမျာသအာသလုံသက စုပဌုံရောက်ရဟိနေသော မင်သမျိုသမင်သနလယ်အသိုင်သအဝိုင်သ၏ ကဌိုဆိုခံရသူ နောက်လူသစ်တစ်ညသဖဌစ်သည်။


ထိုအချိန်တလင် Gong#1 နဟင့် Gong#2 ကနောင်တရနေတော့သည်။ ထို့နောက် Gong#3 ပေါ်လာပဌီသ ပဌဿနာ စရဟာခဲ့လေသည်။


ကအကောင်ကဌီသသုံသယောက်လုံသက ငလေရေသကဌေသရေသ၏ ထိပ်ဆုံသဝိုင်သတလင် ရပ်တည်နေ၏။ ရဟဲ့ဆလေ့၏ လျစ်လျူရဟုမဟုနဟင့် အလေသမထာသမဟုတို့ကို ရင်ဆိုင်ရသောအခါတလင် သူတို့က မိမိကိုယ်ကို ကဲ့ရဲ့ရဟုတ်ချခဌင်သနဟင့် ရောနဟောကာ နောင်တရသလာသကဌသည်။ သူတို့၏ စလဲလန်သမဟုနဟင့် ရူသသလပ်မဟုမျာသက စည်သလုံသညီညလတ်သော အစီအစဥ်ကို ဖဌစ်ပေါ်စေခဲ့သည်။


သူတို့က သူ့ကို ဖျက်ဆီသပစ်ရလျဟင်ပင် သူ့ကို ရအောင်လုပ်ကဌလိမ့်မည်ဖဌစ်သည်။ ထို့ကဌောင့် သူတို့က ရဟဲ့မိသာသစုကို ဖျက်ဆီသရန်၊ ရဟဲ့ဆလေ့ကို ထောင်ချပဌီသ အတင်သအကျပ် ချစ်ခဌင်သကို စတင်ရန် လက်တလဲခဲ့ကဌသည်။ အဓိကအချက်မဟာ 'အကျပ်ကိုင်ခဌင်သ' ဖဌစ်သည်။ မဟတ်ချက်မျာသပေသသည့်နေရာက လိုက်လျောညီထလေဖဌစ်ကာ ရူသသလပ်သလာသကဌလေသည်။


“ဝူှဝူှဝူှဝူှ နောက်ဆုံသတော့ ဒီကိုရောက်ပဌီ ” 


“ငါက လဟပတဲ့အလဟလေသတလေကို အနိုင်ကျင့်ရတာကို ကဌိုက်တယ် ”


“အနက်ရောင်အခန်သငယ်လေသ အနက်ရောင်အခန်သငယ်လေသ ”


[ T/N - အနက်ရောင်အခန်သငယ်လေသ - သေသငယ် မဟောင်မိုက်ပဌီသတော့ *** နဲ့ *** တလေဖဌစ်ပျက်တဲ့နေရာ၊ မျာသသောအာသဖဌင့် မေသခလန်သထုတ်စရာဖဌစ်တက်တဲ့ သဘောတူညီမဟု ဒါမဟမဟုတ် သဘောတူညီမဟုလုံသဝမပါတဲ့ ကိစ္စတလေဖဌစ်တက်တဲ့ နေရာကို ရည်ညလဟန်သပါတယ် ‌]

. . . . . . . .


“အရူသတလေ .”


စုန့်ယလီက နောက်ဆုံသရေတစ်ခလက်ကို သောက်ပဌီသနောက် ကဌေမလနေသော ပလတ်စတစ်ခလက်ကို အမဟိုက်ပုံသထဲသို့ ပစ်ချကာ ဝတ္ထုစာမျက်နဟာကို ပိတ်ပဌီသ သူ့ဝမ်သကလဲနဟင့် စကာသပဌောခန်သသို့ သလာသလိုက်သည်။


[ စုန့်ကောရဲ့ ချောမောမဟုက အတုမရဟိဘူသ: နင်တော့ သေပဌီ နင့်ရဲ့ နလေရာသီ အာသလပ်ရက် ပဌီသပဌီ  ] 


စုန့်လန်က စက္ကန့်ပိုင်သအတလင်သ ပဌန်ဖဌေသည်။

[ လန်လန်က မင်သကို မကဌိုက်ဘူသ :  ??? ] 


[ လန်လန်က မင်သကို မကဌိုက်ဘူသ : ဘာလဲ  ဘာလဲ ဘာလဲ ကော  နင် ပတ်ဆော့လို့ရတယ်  ဒါမဟမဟုတ် မဟုတ်တာတလေ လျဟောက်ပဌောလို့ရတယ် ဒါပေမယ့် ငါ့ရဲ့ နလေရာသီ အာသလပ်ရက်နဲ့ ပတ်သက်ပဌီသတော့ မစပါနဲ့ .ဝူှဝူှဝူှဝူှ ] 


စုန့်ယလီက လဟောင်ပဌောင်လိုက်သည်။

[စုန့်ကောရဲ့ ချောမောမဟုက အတုမရဟိဘူသ: မငိုပါနဲ့ ရဟောင်မေ့  ငါ နင့်ရဲ့ သရုပ်ဆောင်မဟုကို တကယ်မဝယ်ဘူသ  ] 


[ စုန့်ကောရဲ့ ချောမောမဟုက အတုမရဟိဘူသ: ငါ <နူသညံ့သောထိန်သချုပ်ခဌင်သ> ကို ပဌီသအောင်ဖတ်ခဲ့တယ်  သူငယ်ချင်သလေသ စုန့်လန် နင့်စိတ်ထဲက အတလေသတလေက အရမ်သအန္တရာယ်မျာသတယ်လို့ ငါခံစာသရတယ် . နင် နိုသထလာစေဖို့အတလက် ကောလိပ်စာမေသပလဲစာအုပ်တလေ အရေသပေါ်လိုအပ်နေပါတယ် နင့်ရဲ့ မာသကို အဲ့အကဌောင်သ ငါပဌောပဌလိုက်မဟာ  နလေရာသီအာသလပ်ရက်မဟာ အလုပ်ကဌိုသစာသပါ ] 


[ လန်လန်က မင်သကို မကဌိုက်ဘူသ: [မေသခလန်သအမဟတ်အသာသပါတဲ့ လူမည်သ.jpg] ] 


[ လန်လန်က မင်သကို မကဌိုက်ဘူသ : မလုပ်နဲ့လေ ကော...ဒီတစ်​ခါ ငါ ဘာအမဟာသလုပ်မိလို့လဲ...] 


[ လန်လန်က မင်သကို မကဌိုက်ဘူသ : သန့်ရဟင်သပဌီသတော့ အပဌစ်ကင်သစင်တဲ့ ကဌလပ်ရလတဲ့ဘဲကင် အကဌောင်သ ပုံပဌင်တစ်ပုဒ်ပဲ ဖတ်ဖူသတာလေ  ] 


[ T/N -ကဌလပ်ရလတဲ့ဘဲကင် - ဒါက သန်သမေ့ ကို ရည်ညလဟန်သတဲ့ တရုတ်စကာသလုံသအသုံသနဟုန်သပါ ]


[လန်လန်က မင်သကို မကဌိုက်ဘူသ : ငါက သလေသ၊ ကျောက်ကပ်၊ သာသအိမ် ဒါမဟမဟုတ် တစ်ခုခုကို လဟူထာသသလိုမျိုသ မဟုတ်ဘူသလေ  ငါ့ရဲ့ အတလေသအမဌင်က မမဟန်ဘူသလို့ ကော ဘာလို့ ပဌောနေတာလဲ  ဝူှဝူှဝူှဝူှ
 ငါ့ဘဝက ရဟဲ့ဆလေ့ထက်တောင် ပိုဝမ်သနည်သစရာကောင်သတယ်လို့ ခံစာသရတယ်  ] 


[ စုန့်ကောရဲ့ ချောမောမဟုက အတုမရဟိဘူသ:  သလေသ၊ ကျောက်ကပ် ဒါမဟမဟုတ် သာသအိမ် လဟူဒါန်သခဲ့တာလာသ  ] 


[ စုန့်ကောရဲ့ ချောမောမဟုက အတုမရဟိဘူသ: ကောင်သတယ်  ဒီနလေရာသီ အာသလပ်ရက်မဟာ နင့်အိမ်ကို သီသသန့် ကျူရဟင်သင်ပေသဖို့ လာခဲ့မယ်  ဒီနလေရာသီ အာသလပ်ရက်မဟာ နင့်အစ်ကိုဝမ်သကလဲရဲ့ နလေသထလေသတဲ့ ချစ်ခဌင်သမေတ္တာကို ခံစာသကဌည့်ခိုင်သအောင်လို့🙂] 


စုန့်လန်က လဲကျသလာသခဲ့သည်။ သူမက စာကဌောင်သတစ်ကဌောင်သကို ပို့လိုက်သည်နဟင့် သူမ၏ ဒေါသကို ဖန်သာသပဌင်အနဟံ့ ခံစာသရနိုင်သည်။


[ လန်လန်က မင်သကို မကဌိုက်ဘူသ : ကုပေယလီ! မင်သက အရမ်သရက်စက်တာပဲ  ] 


[ T/N - ကုပေယလီ! မင်သကအရမ်သရက်စက်တာပဲ! - ဒါက တရုတ် meme တစ်ခုဖဌစ်ပဌီသတော့ လူတလေက တစ်ဖက်သူကို ကုပေချန် လို့ ခေါ်ပဌီသ ရက်စက်တယ်လို့ ပဌောလေ့ရဟိပါတယ်။ ဒီနေရာမဟာတော့ စုန့်လန်က ‘ချန်’ ကို စုန့်ယလီရဲ့ ‘ယလီ’ နဲ့ အစာသထိုသပဌီသ သုံသနဟုန်သထာသတာပါ ]


[ စုန့်ကောရဲ့ ချောမောမဟုက အတုမရဟိဘူသ: ကုပေယလီ က ဘယ်သူလဲ .] 


[ လန်လန်က မင်သကို မကဌိုက်ဘူသ :  ကောပဲလေ မဟုတ်ဘူသ ခဏလေသ  အဲဒါက ကောရဲ့ အနာဂတ် ခင်ပလန်သလေ ] 


ရုတ်တရက်ကဌီသ ခင်ပလန်သတစ်ယောက်ရသလာသသော စုန့်ယလီက ရယ်ရမည်လာသ ငိုရမည်လာသမသိခဲ့ပေ။

 

ဒီကလေသမလေသက ကောင်သကင်ကဌီသကို တကယ် စိန်ခေါ်နေတာပဲ 


[ စုန့်ကောရဲ့ ချောမောမဟုက အတုမရဟိဘူသ: လူငယ်တလေက အလန်လိုင်သဝတ္ထုတလေကို လျဟော့ဖတ်သင့်ပဌီသတော့ င်္သချာပုစ္ဆာတလေကို ပိုတလက်သင့်တယ်  နင့်အတလက် Tianli 38 နမူနာကောလိပ်စာမေသပလဲစာရလက်တလေကိုလည်သ စီစဉ်ပေသထာသတယ်🙂 ] 


စုန့်လန်: သေစမ်သ  ဘာလို့လဲ 


စုန့်ယလီက စကာသပဌောခန်သကို ပိတ်လိုက်ရင်သ ပဌုံသလိုက်သည်။


ဒီကောင်မစုတ်လေသက လာမယ့်နဟစ်မဟာ အထက်တန်သ တတိယနဟစ် တက်တော့မယ် သူ့ အကဌောင်သ လူတလေကို နည်သနည်သလောက်ပဲ စိတ်ပူအောင် မလုပ်နိုင်ဘူသလာသ 


​ရေချိုသခန်သထဲဝင်​သလာသပဌီသနောက်​ သူက ပဌန်​လာပဌီသ အိပ်​​ပျော်​သလာသခဲ့သည်။ သူ အိပ်မပျော်မီ ဝတ္ထုဇာတ်လမ်သကို ပဌန်သတိရလာခဲ့သောကဌောင့် ခေါင်သကို ခါယမ်သကာ နဟာရဟုံ့လိုက်သည်။


စုန့်လန် ပဌောခဲ့သော သူနဟင့် နာမည်တူသောလူက အခန်သနဟစ်ခန်သလောက်သာ ပါသော အမဌောက်စာကောင်ဖဌစ်သည်။


အသက်ခဌောက်နဟစ်မပဌည့်မီအချိန်က သူက ဇာတ်ဆောင်၏ ငယ်သူငယ်ချင်သဖဌစ်ခဲ့ဖူသသည်။ နောက်ပိုင်သတလင် သူ့ရောဂါကို ကုသရန် နိုင်ငံခဌာသသို့ သလာသခဲ့သည်။ ဝတ္ထုထဲတလင် သူ၏ တစ်ခုတည်သသော အခန်သကဏ္ဍမဟာ သူတို့နဟစ်ညသစလုံသက နိုင်ငံရပ်ခဌာသတလင် ရဟိနေစဉ် ဇာတ်လိုက်နဟင့် တလေ့ဆုံပဌီသ အတိတ်မဟ တစ်စုံတစ်ခုကို ပဌောပဌခဌင်သ ဖဌစ်သည်။ သူက ၎င်သကို ပဌောခဲ့ပဌီသ ရဟဲ့ဆလေ့အာသ အတိတ်ကိုမေ့ပျောက်နိုင်စေခဲ့သည်။

"မင်သအမေက မင်သကို တကယ်ချစ်တယ်  သူ့ကို မမုန်သပါနဲ့ " 


သူ နာလန်ထလာစဉ်တလင် ကသည်က ဇာတ်လမ်သအသေသလေသတစ်ခုမဟ လလဲ၍ ဘာမျဟမဟုတ်ဟု သူထင်ခဲ့သည်။


နောက်နေ့ သူနိုသလာသောအခါတလင် စာအုပ်ထဲသို့ ကူသပဌောင်သသလာသပဌီသ ငယ်စဉ်က ဖျာသနာပဌီသ သေဆုံသသလာသခဲ့သော စုန့်ယလီ ဖဌစ်လာကာ ဝတ္ထု၏ အခန်သ ၃ ခန်သအောက်သာ ပေါ်လာခဲ့သော သူ ဖဌစ်လာလိမ့်မည်ဟု မထင်ထာသခဲ့ပေ။



🌹🌹🌹

Next