၆၇

ရှီဝန်ဖေး၏မျက်နှာသည် ဖျော့တော့ကာ နီရဲလာသည်။

ကင်မရာများရှိနေခြင်းကြောင့် သူမ၏ဒေါသကို မျိုသိပ်ထားရန်သာတတ်နိုင်သည်။

အစီအစဉ်အဖွဲ့၏အချိန်ဇယားကိုလက်ခံရရှိပြီးနောက် ရှီရန်သည် "ကိုးနာရီက​နေ ဆယ့်နှစ်နာရီအထိ၊ မိဘနှင့်ကလေးအတူတူလေ့ကျင့်ခန်းလုပ်ချိန်" ကို ကြည့်ရှုကာအသံကျယ်ကျယ်ဖတ်လိုက်သည်။

'လေ့ကျင့်ခန်းလား?'

'အဲဒါကလွယ်ပါတယ်။'

သူမသည် ချူးကျင်းချန်း၏လက်ထဲရှိရူရူကိုကြည့်ကာ "အပြင်ထွက်ပြီး လေ့ကျင့်ခန်းလုပ်ကြရအောင်" ဟု ညင်ညင်သာသာပြောသည်။

ချူးကျင်းချန်းသည် ကလေးကိုချီပြီး ရှီရန်နောက်သို့လိုက်သွားသည်။ တစ်ချက်ကြည့်လိုက်ရုံဖြင့်သူတို့ကမိသားစုသုံးယောက်နဲ့တူနေသည်။

[ငါတော့မ​ကောင်းတဲ့ဖီလင်ရ​နေတယ်​နော်။]

[ရှေ့ကလူ​တွေ မ​ကောင်းတဲ့ဖီလင်ရ​နေတယ် +1]

[ဒါပေမယ့် မာစတာရန်ကယုံကြည်မှုရှိတဲ့ပုံပဲ။]

[မိဘနှင့်ကလေးအတူတူလေ့ကျင့်ခန်းက မာစတာရန်အတွက်မခက်တာလည်းဖြစ်နိုင်တယ်။]

ရှီရန်သည် အိမ်အပြင်ဘက်ကိုလမ်းလျှောက်ပြီးကမ်းခြေဆီသို့ဦးတည်သွားသည်။

အခြားဧည့်သည်သုံးဖွဲ့ကလည်း ကလေးများကို အတူတူကစားခွင့်ပေးသည်က ကောင်းသည်ဟုထင်ကြသည်။

ရှီရန်၌ယုံကြည်မှုအပြည့်ရှိနေသည်ကို မြင်လိုက်ရသောအခါတွင် သူတို့ကလေးများကိုလည်းခေါ်လာသည်။

တိမ်ထူထပ်သောနေ့ဖြစ်သဖြင့် နေရောင်ကစူးရှ​စွာမလင်းပေ။

ကမ်းခြေသို့ရောက်သောအခါ ချူးကျင်းချန်းသည် ကလေးကိုအောက်ချလိုက်သည်။

"ပင်လယ်ကြီးပဲ!" ရူရူက ပင်လယ်ကိုလက်ထိုးထိုးပြရင်း ကလေးအသံဖြင့်ပြောသည်။ က​လေးက ပြုံးရယ်နေသည်။

"မိဘနဲ့ကလေးလေ့ကျင့်ခန်းက ပင်လယ်နဲ့သက်ဆိုင်နေတာများလား" ကူကျားမှန်းဆလိုက်သည်။

ရှီရန်က ဘေးပတ်ဝန်းကျင်ကိုကြည့်လိုက်ပြီးကျေနပ်နေပုံရသည်။

ထို့နောက် သူမသည် ရူရူကိုငုံ့ကြည့်ကာညင်သာစွာပြုံးလိုက်သည်။ "ရူရူ၊ လေ့ကျင့်ခန်းလုပ်ချိန်ရောက်ပြီ။ကမ်းခြေတစ်လျှောက်သုံးပတ်လောက်ပြေးလိုက်တော့။"

လူတိုင်း :????!!!

[တောင်းပန်ပါတယ် ငါ မထိန်းနိုင်တော့ဘူး ဟားဟားဟားဟားဟားဟားး]

[တစ်ခုခုမှားနေပြီဆိုတာ ငါသိလိုက်တယ်။ မာစတာရန်က "လေ့ကျင့်ခန်း" ဆိုတဲ့စကားလုံးကိုပဲ မြင်တာအသိသာကြီး။]

[အခြားသူတွေက မာစတာရန်မှာအစီအစဉ်ကောင်းတစ်ခုရှိတယ်လို့ထင်နေကြတာ။]

[မာစတာရန်က ဘယ်လောက်တောင်ယုံကြည်မှုရှိနေလဲဆိုတာကိုကြည့်လိုက်ကြဦး]

"မမ ရူရူက ငယ်သေးတယ်လေ။ သူ့အသက်က လေးနှစ်ခွဲပဲရှိသေးတယ်။ သူ့ကို သုံးပတ်လောက်အပြန်ပြန်အလှန်လှန်ပြေးခိုင်းတာတော့လွန်လွန်းတယ်မဟုတ်ဘူးလား။ သူဘယ်လိုခံနိုင်ရည်ရှိမှာလဲ" ရှီဝန်ဖေးက ထိုအခွင့်အရေးအသုံးချကာ ထောက်ပြသည်။

ဒီခွေးမရှီရန်က သေတွင်းတူး​နေမှ​တော့ ငါလည်း ငြိမ်မ​နေ​တော့ဘူး။

"သုံးပတ်။ ကျွန်​တော်တို့လူကြီးတွေတောင် သုံးပတ်ပြည့်ဖို့ တစ်နာရီကျော်ကြာမှာကို။ ရူရူက အသက်ငယ်လွန်းတယ်။ ကလေးတစ်ယောက်ကို တစ်ခါမှမပြုစုဖူးလို့ မသိတာဖြစ်နိုင်ပါတယ်" ဟု ပိုင်ကျင်းထျန်က ညင်သာစွာပြောသည်။

"ဟုတ်တယ်။ မမက ကလေးကို အရင်ပြုစုဖူးတယ်လို့မထင်ဘူး။ ကလေးတွေက အပူရှပ်ပြီးအလွယ်တကူ မူးလဲလွယ်တယ်" ရှီဝန်ဖေးက ရွဲ့စောင်းပြောသည်။

ရှီရန်က ရွဲ့​ကာပြန်လည်​ချေပသည်။ "မမက ညီမ​လေးလောက်တော့ အတွေ့အကြုံဘယ်ရှိပါ့မလဲ။"

"နင်" ရှီဝန်ဖေးအံကြိတ်လိုက်သည်။ သူမ၏မျက်လုံးထောင့်မှ ချူးကျင်းချန်းကအနည်းငယ်မျက်မှောင်ကြုတ်သည်ကို သူမ မြင်လိုက်ရသည်။ ရှီရန်လုပ်နေသည့်အရာကို သူ နားမလည်ပုံ​ပေါက်​နေသည်။

"တတိယသခင်​လေးက မမထက်တော့ ပိုသိသင့်တယ်မဟုတ်လား။ ညီ​မလေးစကားကို နားမထောင်ရင် အနည်းဆုံးတော့တတိယသခင်​လေးစကားကို နားထောင်သင့်ပါတယ်" လို့ သူမ ဝမ်းသာအားရဖြင့် တမင်တကာပြောလိုက်သည်။

[တတိယသခင်​လေးရဲ့ချူးမိသားစုကြီးမှာကလေးတွေအများကြီးရှိလောက်မယ်မဟုတ်လား။ သူ ဘယ်လိုစောင့်​ရှောက်ရမှန်းမသိရင်တောင် အရင်က ကလေးတွေကိုပြုစုစောင့်ရှောက်တာကို သူ တွေ့ဖူးမှာပဲ။]

[ဒါကရယ်စရာကောင်းလွန်းတယ် ဟားဟား။ တတိယမြောက်သခင်​လေးက လုံးဝကိုနားလည်နိုင်မှာမဟုတ်ဘူး။]

[နောက်ပြီးတော့ သူက ချမ်းသာတဲ့မိသားစုထဲက​လေ။ ဖန်လုံအိမ်ထဲမှာနေခဲ့ရတော့ သူ ရှီရန်ကို လုံးဝနားမလည်လောက်ဘူး။]

ပင်လယ်လေက တိုက်ခတ်လာသည်နှင့်အမျှ ချူးကျင်းချန်းသည် မျက်လုံးများကိုကျဥ်း​မြောင်းကာ အ​​ရှေ့အနောက်ကိုတစ်ချက်ကြည့်လိုက်သည်။

ခဏတွေးတောပြီးနောက် "သုံးပတ်က နည်း​နေသလားလို့။ ဒီအကွာအဝေးဆို ကျွန်​တော် ငယ်ငယ်တုန်းက အနည်းဆုံးဆယ်ပတ်လောက် ပြေးခဲ့ရတယ်" လို့ သူပြောလိုက်သည်။

[ငါမှားသွားပြီ။]

["ဖန်လုံအိမ်မှာကြီးပြင်းလာတယ်"]

[ဝံပုလွေမွေးမြူတာနဲ့ ကလေးကို ပြုစုပျိုးထောင်တာကအတူတူပဲလားလို့မေးတဲ့သူတွေဆီက ငါ ဘာတွေမျှော်လင့်နိုင်မှာမို့လို့လဲ။]

[သူတို့နှစ်ယောက် တကယ်သာလက်ထပ်သွားရင် သူတို့သားသမီးဖြစ်မယ့်သူက နာကျင်စရာ​ကောင်းနေလိမ့်မယ်။]

[မျက်နှာတည့်တည့်နဲ့ပြေးနေတဲ့ရန်​လေးကိုတောင် ငါစိတ်ကူးယဉ်ကြည့်နိုင်တယ်။]

"ရူရူ မင်းက တော်​တော်သနားဖို့ကောင်းတာပဲကွ"  ရှီဝန်ဖေးနဲ့ကျုံးယူဖန်တို့၏ကလေးက ပြောသည်။

"ရူရူ မင်းမိဘတွေကမင်းကိုမချစ်တာဖြစ်မယ်"

ကျန်ကလေးများအားလုံးက ကလေးဆန်စွာ ပြောနေကြသည်။

ရူရူ၏ကြည်လင်သောမျက်လုံးများသည် ချက်ချင်းပင် မျက်ရည်များဖြင့်ပြည့်နှက်သွားသည်။ သူ နှုတ်ခမ်းကို တင်းတင်းကျပ်ကျပ်စေ့ထားပြီး စိတ်ထိခိုက်​နေပုံ​ပေါ်သည်။ "မာမီ၊ ရူရူကို မချစ်ဘူးလားဟင်"

ညှိုးငယ်သောအမူအရာဖြင့် စိုက်ကြည့်နေသောရူရူ၏မျက်နှာကို​တွေ့၍  ရှီရန်ချက်ခြင်းပင် တွေ​ဝေသွားသည်။

ဘာဆက်လုပ်ရမှန်းမသိဘဲ ငုတ်တုတ်ထိုင်၍ ရူရူ၏ကျောကို ပုတ်လိုက်ကာ သူမ၏လက်က တောင့်တင်းနေသည်။ "မာ..မာမီက ရူရူကိုအရမ်းချစ်တာ​ပေါ့"

"တကယ်လား?" တစ်စက္ကန့်အတွင်း ရူရူသည် မျက်ရည်များဖြင့် ရယ်မောလိုက်သည်။

ရှီရန်၏အေးစက်နေသောနှလုံးသားသည် မသိစိတ်ကြောင့်အရည်​ပျော်သွားသည်။ သူမက ပြုံးပြီးပြောသည်။"တကယ်ပေါ့"

ဝမ်းသာအားရဖြင့် ရူရူသည် သူမ၏လည်ပင်းအား ကျစ်တုတ်​နေ​သောသူ့လက်နှစ်ဖက်ဖြင့် ရစ်ပတ်ကာ သူမ၏မျက်နှာကိုအာဘွား​ပေးသဖြင့် ကြည်လင်သောသ​ရေအမှတ်အသားက သူမပါးတွင်ကျန်​နေ​ပေသည်။

ရှီရန်၏ဖြူ​ဖွေးသောပါးပြင်နှစ်ဖက် အနီရောင်သန်းလာကာ ရုတ်တရက် တောင့်တင်းသွားသည်။

သူမ ရှက်သွေးဖြာနေသည်။

ချူးကျင်းချန်းသည် သူ့အိတ်ကပ်ထဲ၌လက်တစ်ဖက်ကိုထည့်ထားပြီး သူ့နှုတ်ခမ်းပေါ်မှအပြုံးကနက်ရှိုင်းလာသည်။ သူ၏အေးစက်​သောအနက်ရောင်မျက်လုံးများက ရူရူကိုကြည့်နေသည်။

[ချီး!! ရှက်နေတာလား???]

[မာစတာရန်က တကယ်ရှက်သွားတာလား?? ကလေးဆီက​နေအနမ်းခံရတာကြောင့်လား??]

[အရင်ကတတိယသခင်လေး သူမနဲ့ အရမ်းနီးနီးကပ်ကပ်ရပ်နေတုံးက​တောင် သူမ မျက်နှာကနီရဲမ​နေ​ဘူး။ အခု ကလေးကြောင့် ရှက်နေတာလား??]

[ ကျေးဇူးပြုပြီး မ​ကျေမနပ်ဖြစ်နေတဲ့ဇနီး၊ အဲ မှားလို့ မ​ကျေမနပ်ဖြစ်နေတဲ့ခင်ပွန်းဖြစ်သူ တတိယသခင်လေးကို ကြည့်လိုက်ကြဦး။
သူ့အမူအရာကို ကြည့်ကြဦး​ဟေး။]

[နောက်တစ်စက္ကန့်အတွင်း တတိယသခင်​လေးက ရူရူကို ဓားနဲ့ထိုးမှာကိုတောင် ငါကြောက်မိတယ်။]

[တတိယမြောက်သခင်​လေး : ကလေးတစ်ယောက်ကတောင် ငါ့ထက် ပိုဆွဲ​ဆောင်မှုကောင်းတယ်၊ ဟင့် ဟင့်]

[ကဲကဲအတွဲပေးစား​နေတဲ့ပရိသတ်တွေ တော်​လောက်ပြီထင်တယ်။ အမူအရာတစ်ခုတည်းနဲ့ ဘယ်လိုတောင်စိတ်ကူးယဉ်နေကြတာလဲ??]

[ငါ​တော့ ဆွံအသွားပြီ။ နင့် IQ ကိုကယ်တင်ချင်ရင် စခရင်ကိုပိတ်ထားလိုက်။]

"က​လေး​လေးကို ဒီမှာ​ပြေးခွင့်​​ပေးတာက တကယ်​မသင့်​​တော်​ဘူး။ မ​ပြေး​ခိုင်းကြရ​အောင်" လို့ ချူးကျင်းချန်းက ​မ​ရေမရာပြောသည်။

ရူရူ၏မျက်လုံးများ တောက်ပလာသည်။

[အဲဒါကို ငါ့ရဲ့အတွဲ​ပေးစား​နေတဲ့ပရိသတ်တွေ မြင်ကြလား။ တတိယသခင်​လေးက ဘယ်တုန်းကအူလိုနေလို့လဲ??]

[အတွဲ​ပေးစား​နေတဲ့ပရိတ်သတ်တွေ မင်းတို့မျက်နှာကို ဖြတ်ရိုက်ခံလိုက်ရသလိုမခံစားရဘူးလား။]

[စိတ်ကူးယဉ်လွန်းနေတယ်!]

"နှစ်နာရီကြာလောက် လေထဲဆောင့်​ကြောင့်ထိုင်ခိုင်းရမယ်" ဟု ချူးကျင်းချန်းက ပြောသည်။

လူတိုင်း ဆွံအသွားသည်။

ရူရူ: ?

ရှီရန်: ???

[အွန်လိုင်းကဆရာကြီးတွေ​ရေ မျက်နှာကိုဖြတ်ရိုက်ခံလိုက်ရတယ်ဟုတ်?]

[ရူရူအတွက် ငါ့နှလုံးသားလေးနာကျင်နေတယ်။ သူ့တစ်​နေ့တာ​တော့ သွားပါပြီ။]

[သူက ဟာသအ​နေနဲ့ပြောတာဖြစ်မှာပါ။ ရူရူကိုလေထဲဆောင့်ကြောင့်ထိုင်ရ​အောင် သူ ဘာလို့လုပ်မှာလဲ။]

မြင်ကွင်းက ပြောင်းသွားသည်။ အိမ်ရှေ့ခြံဝင်းရှိနား​နေရာနေရာ၌

ရှီရန်နှင့်ချူးကျင်းချန်းတို့သည် ကျောက်ကုလားထိုင်များပေါ်တွင် ထိုင်ကာ သစ်သီးများစားကြပြီး ရံဖန်ရံခါ စကားစမြည်ပြောနေကြသည်။

သူတို့နား​နေရာနေရာအပြင်ဘက်ရှိကျယ်ပြောလှသောနေရာတွင်ပင် ရူရူ၏မျက်နှာသည် တင်းမာနေပြီး သူ့ခြေထောက်ကို တစ်ဝက်​ကွေးထားကာ လေထဲ၌ဆောင့်​ကြောင့်ထိုင်​နေသည်။

နဖူးမှ ချွေးများရွှဲနေပြီဖြစ်သော်လည်း ရူရူ မလှုပ်ဝံ့သေးပေ။

အခြားအဖွဲ့များမှကလေးများသည် ဧည့်ခန်းထဲတွင် ပျော်ရွှင်စွာကစားကြပြီး ရူရူကိုကြည့်ရန် အခါအားလျော်စွာထွက်လာကြသည်။ "ရူရူက အရမ်းသနားစရာကောင်းတာပဲ" လို့ ပြောရင်းတခစ်ခစ်ရယ်ကြသည်။

ချူးကျင်းချန်းသည် စပျစ်သီးကို အခွံခွာပြီး ရှီရန်၏ပါးစပ်နားသို့ ၎င်းကို ယူလာသည်။

ရှီရန်က သူ့ကို မျက်​စောင်းထိုးကြည့်လိုက်သည်။

"ဒီနေ့ကျွန်တော်တို့ရဲ့အခန်းကဏ္ဍက ရူရူမိဘတွေ​လေ။ သုတေသနပြုချက်တွေအရ အချစ်နဲ့ပြည့်နှက်​နေတဲ့မိသားစုမှာ ကြီးပြင်းလာတဲ့ကလေးတွေက အခြားကလေးတွေထက် အကောင်းမြင်စိတ်ပိုရှိပြီး ပိုပျော်ရွှင်တယ်လို့ပြောကြတယ်"ဟု သူက အပြစ်ကင်းစွာပြောသည်။

ရှီရန်သည် ပါးစပ်ကိုဖွင့်ကာ သူမ၏ပါးစပ်ဆီသို့ ပို့ပေးလာသောစပျစ်သီးကိုကိုက်လိုက်သည်။

သူမ သတိထားလိုက်သော်လည်း သူမ၏နှုတ်ခမ်းသည် ချူးကျင်းချန်း၏လက်ကိုထိမိသွားသည်။

ချူးကျင်းချန်း၏အနက်ရောင်မျက်လုံးများ နက်​မှောင်သွားပြီး ကျေနပ်စွာရယ်မောလိုက်သည်။

[ရူရူက လေထဲဆောင့်​ကြောင့်ထိုင်နေရတဲ့အချိန် သူတို့နှစ်​ယောက်က ခွေးစာ​ကျွေး​နေတယ်။ ဘယ်လောက်တောင် ပျော်စရာကောင်းတဲ့မိသားစုလဲ။]

[တတိယသခင်​လေးက မဟုတ်မမှန်တာ​တွေ​ပြောတာမှာတကယ်တော်လွန်းတယ်။ သူတို့နှစ်ယောက်က ရူရူရဲ့မိဘ​တွေအဖြစ် တစ်​ရက်​ပဲနေရမှာမဟုတ်​လား]

[ရူရူ: ခင်ဗျားကြီးတို့နှစ်ယောက်ပျော်နေဖို့ပဲ အရေးကြီးတာ။ သားသားကို ဆွဲထည့်စရာမလိုပါဘူးဂျာ။]

[ရူရူ: လေထဲ​ဆောင့်​ကြောင့်ထိုင်​နေရတယ် လာ​အာရုံမစားနဲ့]

[သူတို့နှစ်ယောက် ကလေးရရင် သူတို့မိသားစု ပျော်ရွှင်နိုင်ပါ့မလားတောင် ငါမသိတော့ဘူး။ ဘာပဲဖြစ်ဖြစ် လေ့ကျင့်ခန်းအများကြီးလုပ်ရမှာတော့သေချာတယ်။]

[သူတို့က လွန်​လွန်းနေပြီ။ ဒါက ကလေးကိုနှိပ်စက်​နေကြတာမဟုတ်လား။]

[ရူရူမိဘအရင်း​တွေက သူတို့အဖိုးတန်သားလေး ဒီလိုဆက်ဆံခံနေရတာကိုတွေ့ပြီး ရင်ကွဲနေလောက်ပြီ။]

[မှတ်ချက်တွေက ချဲ့ကားလွန်းနေပါပြီ။ လေထဲ​ဆောင့်​ကြောင့်ထိုင်​တာကို ကလေးလုပ်တာက ခန္ဓာကိုယ်အတွက်ကောင်းတယ်လေ။]

[အဲဒါက ခန္ဓာကိုယ်ကိုသန်မာစေတယ်။ ကိုယ်ခံပညာလေ့ကျင့်သူတွေ ငယ်စဉ်ကတည်းကလေထဲ​ဆောင့်​ကြောင့်ထိုင်​တာကိုလေ့ကျင့်နေကြတာ။]

[ကလေးတွေကို လွယ်လွယ်ကူကူလေ့ကျင့်ခန်းမလုပ်ခိုင်းသင့်ဘူး။ ပြည်သူ​တွေကတော့ စောဒ ကတက်ကြလိမ့်မယ်။]

ရှီရန်သည် ရူရူသည်းခံနေရသည်ကိုမကြည့်နိုင်တော့သဖြင့် ညှိနှိုင်းလိုက်သည်။ "နာရီဝက်​ဆိုရင်​ကော ဘယ်​​လိုသ​ဘောရလဲ"

"မင်းနှလုံးသားက နာကျင်​​နေပြီလား" ချူးကျင်းချန်းက သူမကို ကြည့်လိုက်သည်။

"အင်း" ရှီရန်ပွင့်ပွင့်လင်းလင်းခေါင်းညိတ်လိုက်သည်။

ချူးကျင်းချန်းသည် စားပွဲပေါ်၌လက်ညိုးကို ခေါက်​နေလိုက်ကာ သူ့မျက်လုံးများကခန့်မှန်းရခက်​နေသည်။

ခဏအကြာတွင် သူ့ပါးစပ်ကို ဖြည်းညှင်းစွာဖွင့်ပြီး "ချစ်တတ်တဲ့အမေကတော့ ကလေးကို အလိုလိုက်ပြီးဖျက်ဆီးမိလိမ့်မယ်" လို့ပြောလိုက်သည်။