MM Story Teller

Chapter 86

Viewers 9k

👻Chapter 86

ရှီကျား မြေတွင်းထဲသို့ခုန်ဆင်း၍ အခေါင်းအဖုံးကိုပြန်ဆွဲဖွင့်ကာ အထဲမှ ဖေးယွီအား အတင်းပြန်ဆွဲထုတ်လိုက်လေသည်။

ဆရာသခင်အတုလေးဖေးမှာ မျက်လုံးကိုတင်းတင်းမှိတ်လျက် ပါးစပ်မှာလည်း ရသမျှမန္တာန်များကို အဆက်မပြတ်ရွတ်နေခဲ့လေသည်။ ရှီကျားထံမှဆွဲထုတ်ခံရပြီးနောက် သူသည်မျက်လုံးဖွင့်ကာ ရှီကျားကိုကြည့်လာပြီး ဘေးတွင်ရပ်နေသော ယဲ့ကျင်းကျီအားကြည့်လာခဲ့လေသည်။

ဖေးယွီ " ...ငါ့အထင်ပြန်၀င်သွားတာပဲ ပိုကောင်းမယ်ထင်တယ်"

ရှီကျား "မင်းနည်းနည်းလောက်တော့ မျက်နှာဆယ်လို့်မရဘူးလား"

မူလတွင် လေထုမှာ သိသိသာသာလေးလံထိုင်းမှိုင်းနေခဲ့လေသည်။ သို့သော်ဆရာသခင်အတုလေးဖေးပေါ်လာပြီးနောက် ထိုလေးလံသောလေထုမှာ အတော်အတန်ပြိုကွဲသွားခဲ့လေသည်။ ဖေးယွီကိုကယ်ထုတ်ပြီးနောက် သူတို့အတူတကွပင် ရွာသားများလျှောက်သွားလိုက်လေသည်။ အတားအဆီးကိုဖောက်ထွင်းလျက်ပင် ထိုသက်ဖြတ်လိုသော အကြည့်များမှာ အလွန်ပြင်းထန်စူးရှနေခဲ့လေသည်။

ရွာသားများမှာလည်းဖေးယွီ အဘယ်ကြောင့် အခေါင်းထဲတွင်ရောက်နေသည်ကို မသိသည့်အလား ရှုပ်ထွေးစွာကြည့်လာခဲ့လေသည်။

ဖေးယွီမှာ သူ့ဘေးမှအခေါင်းများ၏ အခြေအနေကိုမသိချေ။ သူသည်ဆရာယဲ့ကိုတွေ့တွေ့ချင်းတွင် အလွန်ကြောက်ရွံ့သွားသော်လည်း တဖက်လူထံမှ လုံခြုံသော ခံစားချက်ကိုရလေရာ နောက်မှလိမ်လိမ်မာမာလိုက်လာခဲ့ခေသည်။ ထို့နောက်သူကြုံခဲ့ရသည်တို့ကို ရှီကျားအားပြောပြလာခဲ့သည်။

"အဲဒီရွာကလူတွေအကုန် တကယ်ကြီး မကောင်းဆိုး၀ါးသတ်တာကိုခံလိုက်ရတာ..ငါနဲ့ဂျုနီယာညီမလေး၀မ်နဲ့ စုံစမ်းဖို့ရောက်လာတော့ အဲဒီသရဲက အခေါင်းတစ်ခုကနေရုတ်တရက်ထွက်လာတယ်လေ..ငါလည်း အမြန်ခုခံရတော့တာပေါ့..နောက်ကျငါလည်းမယှဥ်နိုင်တော့ပဲ အဲဒီသရဲဆီကနေ အခေါင်းထဲအပိတ်ခံလိုက်ရတယ်လေ..ငါနိုးလာတော့အခေါင်းထဲကိုရောက်နေပြီး ထူးဆန်းတာက အခေါင်းကအထဲကနေဖွင့်မရဘူး..ငါမှော်အစွမ်းကိုလည်းအခေါင်းထဲမှာသုံးမရဘူး ပြီးကျတော့ ခုနကပဲအခေါင်းကြီးရုတ်တရက်ပွင့်လာရော..ငါလည်း မကောင်းဆိုး၀ါးပဲလိုထင်ပြီး တိုက်ခိုက်လိုက်တာ"

ရှီကျားမှာ ခေါင်းအသာညိတ်လိုက်လေသည်။ ၄င်းမှာ ဂျူနီယာမိန်းကလေး၀မ်ပြောခဲ့သည်နှင့်မကွာခြားချေ။

ဖေးယွီကို ကယ်တင်ပြီးဖြစ်လေရာ ရှီကျားမှာ အနည်းငယ်စိတ်သက်သာရာရသွားခဲ့သည်။ သို့သော် မိမိဆန္ဒမပါပဲ အရှင်လတ်လတ်မြေမြှုပ်ခံလိုက်ရသော မိန်းကလေး ၁၄ယောက်ကို ပြန်သတိရသွားမိသော် ရှီကျား၏ ရင်ထဲမှ ခဲဆွဲသလို လေးလံသွားခဲ့လေသည်။

သူကယဲ့ကျင်းကျီကိုကြည့်လိုက်သော် ယဲ့ကျင်းကျီမှာလည်း သူ့အားပြန်ကြည့်နေခဲ့သည်။ အဆုံးတွင်ရှီကျားမှာ ရှေ့သို့ထွက်လာခဲ့လေသည်။ အတားအဆီးခြားလျက် ထိုရန်လိုမှု သတ်ဖြတ်လိုမှုတို့ကို ဖုံးကွယ်မထားသော လူအိုကြီးအား သူကြည့်လိုက်သည်။ ထို့နောက် တစ်လုံးချင်းစီမေးလိုက်လေသည်။

"အဲဒီမိနိးကလေး၄ယောက်က မကောင်းဆိုး၀ါးကြောင့်သေသွားတာမဟုတ်ဘူး..သူတို့က ခင်များတို့ဆီကနေ အရှင်လတ်လတ်မြေမြှပ်ခံလိုက်ရတာ..ဘာလို့သူတို့ကိုသတ်ရတာလဲ"

ဖေးယွီမှာ လက်ရှိတွင် သူ၏ကိုယ်ပိုင်ဂျူနီယာညီမငယ် အဆင်ပြေမပြေကိုသာစိတ်ပူနေခြင်းဖြစ်လေသည်။ ရုတ်တရက်ထိုစကားကိုကြားလိုက်ရသော် သူသည်တမဟုတ်ချင်းအေးခဲသွားလျက် ရှီကျားကိုကြည့်လာခဲ့လေသည်။

လက်ထဲတွင်ဓါးကိုဆုပ်ကိုင်လျက် လူအိုကြီးမှာ အငိုတ၀က်အရယ်တ၀က်နှင့်ဆိုလာခဲ့သည်။

"ငါတို့ယွမ်ကျားရွာရဲ့ကိစ္စကငါတို့နဲ့ပဲဆိုင်တယ် မင်းတို့အပြင်လူတွေနဲ့မဆိုင်ဘူး"

ထိုရွံစရာလူအိုကြီး၏ အနည်းငယ်မျှ အပြစ်ရှိသလိုမခံစားရသော အမူအရာကိုကြည့်လျက် ရှီကျားမှာ သွေးများပွက်ပွက်ဆူလာလျက် အံကိုပြင်းစွာကြိတ်လိုက်မိလေသည်။ သူသည် ထိုလူအိုကြီးအားလူမဟုတ်ဘဲမကောင်းဆိုး၀ါးဖြစ်နေခဲ့ရန်ဆုတောင်းမိသည်။ သို့ဆိုလျှင် ဤလူကြီး၏၀ိညာဥ်အား တစစီပြိုကွဲသွားအောင် ဆုတ်ဖြဲပစ်နိုင်လိမ့်မည်ပင်။

ယဲ့ကျင်းကျီက ခိုင်မာစွာမေးလိုက်သည်။

"သူတို့က ခင်များတို့ရွာကလူတွေလား"

လူအိုကြီး၏ကိုယ်မှာတောင့်တင်းသွားခဲ့လေသည်။

ရှီကျားမှာ ရုတ်ချည်းဖြစ်နိုင်ချေတစ်ခုကိုစဥ်းစားလိုက်မိသည်။ သူ၏မျက်လုံးများမှာ မယုံနိုင်မှုတို့နှင့်ပြူးကျယ်သွားလျက် ထိုရွာသားများကိုကြည့်လိုက်မိလေသည်။

ထိုလူအိုကြီး၏မျက်နှာပေါ်မှ အမူအရာမှတစက်လေးမှပြောင်းလဲမသွားပဲ ရွာသားများကမူ ဆဲဆိုကာတံတွေးဖြင့်ထွေးလာခဲ့ကြသည်။

ဖေးယွီမှာ ရှီကျားထက်နှေးကွေးသူဖြစ်သည်။ မိနစ်အနည်းငယ်ကြာပြီးမှသာ သူကယဲ့ကျင်းကျီမေးခွန်း၏အဓိပ္ပါယ်ကိုနားလည်သွားခဲ့လေသည်။ သူသည်သူ၏ဂျူနီယာညီမလေး၏လက်ကို လျင်မြန်စွာဆုပ်ကိုင်လျက်ဆိုလိုက်သည်။

"မင်းဘာမှမဖြစ်လို့တော်သေးတာပေါ့..မင်းပထမဆုံးအကြိမ် သရဲထွက်ဖမ်းတော့မှ ဒီလိုကြောက်စရာကိစ္စမျိုးနဲ့ကြုံရတယ်လို့..ငါအတတ်နိုင်ဆုံးကာကွယ်ပေးခဲ့လို့ မင်းလွတ်သွားတာတော်သေးတယ်..မင်းကိုသာသရဲကအဖမ်းခံလိုက်ရရင် ဒါမဟုတ် ဒီလိုလူမဆန်တဲ့တသိုက်ဆီကနေ ပြန်ပေးဆွဲခံလိုက်ရလို့ကတော့လား..ဆရာကငါ့ကို အရေခွံနွှာတော့မှာပဲ"

မိန်းမငယ်လေးမှာလည်း ကြောက်လန့်နေလျက် ခေါင်းတဆတ်ဆတ်ညိတ်လာခဲ့လေသည်။

ရှီကျား၏ အေးစက်စက်အကြည့်တို့မှာ သူ၏ရှေ့မှ တိရိစ္ဆာန်လောက်မှ နှလုံးသားမရှိသူများထံ ဖြတ်သန်းသွားခဲ့သည်။ ထိုသူတို့၏မျက်လုံးများထဲတွင် မည်သည့်လူသားဆန်မှုအရိပ်အယောင်ကိုမျှမမြင်နိုင်ချေ။ ၄င်းတို့တွင် လူ့အသိစိတ်ဟူ၍မရှိပဲ ရက်စက်ကာ ထိုအရှင်လတ်လတ်မြေမြှုပ်ခံလိုက်ရသော မိန်းကလေး၁၄ယောက်အကြောင်း ရှီကျား၏အမေးစကားကို ကြားရသည့်တိုင်အောင် အနည်းငယ်မျှ အပြစ်ရှိသလိုမခံစားရချေ။ ယခုပင်လျှင် ၄င်းတို့မှာ လက်နက်ကိုယ်စီစွဲကိုင်လျက် သူတို့အားသတ်ဖြတ်လိုစိတ်ကို ဖုံးကွယ်မထားခဲ့ချေ။

လူအိုကြီးမှာခေါင်းကိုမော့လျက် အလွန်ယုံကြည်မှုရှိရှိဆိုလာခဲ့သည်

"သူတို့က ငါတို့ရွာကသားကလွဲလို့ ဘာဖြစ်ရမှာလဲ"

"ခင်များနောက်တစ်ကြိမ်ထပ်ပြောလိုက်စမ်း"

လူအိုကြီးမှာကျယ်လောင်စွာဆိုလာခဲ့သည်။

"သူတို့ကငါတို့ရွာကလူတွေနဲ့ ယူထားမှတော့ ငါတို့ရွာသားပဲပေါ့"

ရှီကျားမှာ ဤသို့သောနေရာမျိုးတွင် အဘယ်ကြောင့်မကောင်းဆိုး၀ါးတစ်ကောင်ကရုတ်ချည်းပေါ်လာခဲ့ပြီး တစ်ရွာလုံးကို အစုလိုက်အပြုံလိုက်သတ်ဖြတ်ခဲ့သည်ကိုနားလည်သွားခဲ့သည်။ သူ၏လက်ချောင်းများမှာ လက်သီးအဖြစ်တင်းကြပ်စွာဆုပ်သွားမိကာ ယဲ့ကျင်းကျီအားလှည့်ကြည့်လိုက်မိလေသည်။ နောက်သို့ကြည့်လိုက်သော် သူနှင့်အတူ ထပ်တူထပ်မျှပေါက်ကွဲနေသော ဖေးယွီနှင့် တစ်ကိုယ်လုံးတုန်လျက် ထိတ်လန့်နေသော ဂျူနီယာမိန်းကလေးကိုတွေ့လိုကရလေသည်။

ရုတ်ချည်းရှီကျားမှာ ထိုမိန်းမငယ်လေးကိုကြည့်လျက် တောင့်တင်းသွားမိလေသည်။

တချိန်တည်းမှာပင် ယဲ့ကျင်းကျီ၏မျက်လုံးများမှာလည်း နက်မှောင်သွားလျက် ထိုမိန်းကလေးအား ရေခဲတမျှအေးစက်သော အကြည့်များဖြင့်လှည့်ကြည့်လာခဲ့သည်။

ဖေးယွီမှာ အမြှီးလားခေါင်းလား မခွဲခြားနိုင်သေးချေ။

"မင်းတို့တွေ ငါ့ဂျူနီယာကို ဘာလို့ကြည့်နေကြတာလဲ"

ရှီကျား၏အမူအရာမှာတဖြည်းဖြည်းနက်မှောင်သွားလျက် တည်ငြိမ်စွာမေးလိုက်လေသည်။

"ဖေးယွီ မင်းကမင်းဂျူနီယာညီမလေးကိုကာကွယ်ပေးလိုက်လို့ သူလွတ်သွားတယ်လို့ပြောခဲ့တယ်နော်..အဲဒါအမှန်ပဲလား"

ဖေးယွီမှာ ရှီကျားဘာကိုမေးလိုမှန်းနားမလည်ခဲ့ချေ။ သူကခေါင်းညိတ်လိုက်သည်။

"အဲလိုပဲပေါ့..ဒါသူပထမဆုံးအကြိမ် အပြင်ထွက်ဖူးတာလေ..စီနီယာတစ်ယောက်အနေနဲ့ ငါကသူ့ကိုကာကွယ်ပေးရမှာပေါ့ .ဒါဖြစ်သင့်တာပဲမဟုတ်ဘူးလား"

ရှီကျား၏အကြည့်တို့မှာ ဖေးယွီကိုကျော်လွန်လျက် သူ၏နောက်တွင်ရပ်နေသော မိန်းမငယ်လေးထံရောက်ရှိသွားခဲ့လေသည်။ မိန်းမငယ်လေးမှာ ခေါင်းကိုငုံလျက် သူမ၏ဆံပင်များက မျက်နှာကိုအုပ်နေလေရော အမူအရာကို မမြင်နိုင်ချေ။ သို့သော်သူမ၏နှုတ်ခမ်းကမူ ထူးဆန်းသောအပြုံးကြီးအဖြစ် မြင့်တက်နေခဲ့လေသည်။

တိတ်ဆိတ်နေသောလေထုမှာလေးလံလျက် ကျက်သီးထဖွယ်ကောင်းနေခဲ့သည်။

ရုတ်ချည်းမိန်းမငယ်လေးမှာခေါင်းကိုမော့လျက် သူမအရှေ့မှ ဖေးယွီကိုကြည့်လာခဲ့သည်။ သူမ၏မျက်လုံးအိမ်ထဲတွင် မျက်သားဖြူဖြူများသာရှိကာ အနက်ရောင်မျက်ဆံပျောက်ကွယ်နေခဲ့လေသည်။ သူမ၏လက်မှာ ရုတ်ချည်း ဖေးယွီ၏ရင်ဘတ်ကို တိုက်ခိုက်လာခဲ့လေသည်။

ယဲ့ကျင်းကျီ၏လက်ဖ၀ါး ထိုသရဲမိန်းကလေး၏တိုက်ခိုက်မှုကိုတားဆီးလိုက်လေသည်။ ရှီကျားမှာ ဖေးယွီ၏လက်မောင်းကိုလှမ်း၍ဆွဲခေါ်လိုက်လေသည်။

သရဲမိန်းကလေးမှာ ယဲ့ကျင်းကျီထံမှ ၃မီတာခန့်အထိတွန်းထုတ်ခံလိုက်ရလေသည်။ ဆရာယဲ့၏ရိုက်ချက်ကြောင့် ၄င်း၏ကိုယ်မှ ယင်စွမ်းအင်ပမာဏများများ လျှံကျသွားခဲ့သည်။ သို့သော် ၄င်းကထိုသရဲမိန်းကလေးအပေါ် မည်သည့်သက်ရောက်မှုမှမရှိပုံပင်။ သူမရုတ်ချည်းတခစ်ခစ်ရယ်လိုက်သည်။ သူမ၏ခေါင်းမှာ ကိုယ်နှင့်ဆက်လျက်ပင် ၉၀ဒီဂရီလည်သွားခဲ့လေသည်။ သူမမှာ အသက်မဲ့နေသောမျက်သားဖြူဖြူအများနှင့် ထိုရွာသားများကိုကြည့်လိုက်သော် ထိုရွာသားများမှာ ကြောက်လန့်တကြားထွက်ပြေးကြတော့သည်။

ဖေးယွီမှာ မယုံနိုင်စွာဆိုလာခဲ့သည်။

"မဖြစ်နိုင်တာ..အဲဒါငါ့ဂျူနီယာညီမလေးလေ..သူကသေချာပေါက် ဂျူနီယာညီမလေး ၀မ်ပဲ"

ယဲ့ကျင်းကျီ" သူ့ကိုယ်ထဲကို မကောင်းဆိုး၀ါး၀င်ပူးသွားပြီ..သူကမင်းရဲ့ဂျူနီယာညီမလေးဖြစ်နေတုန်းပါပဲ..ဒါပေမယ့် မဟုတ်တော့ဘူးလို့လည်းပြောလို့ရတယ်"

သရဲမိန်းကလေးမှာ ပါးစပ်ကိုဟလျက် ကျယ်လောင်စွာအော်ဟစ်လာခဲ့သည်။ သူမပါးစပ်မှာ ဦးခေါင်းတစ်လုံး၀င်ဆန့်သည်အထိ တဖြည်းဖြည်းပြဲဟလာခဲ့လေသည်။ သူမထိုသို့စူးရှစွာအော်ဟစ်လိုက်သော် သူမ၏ပါးစပ်ထဲမှ ယင်စွမ်းအင်များလျှံကျလာပြီး အသည်းအသန်ထွက်ပြေးနေသော ရွာသားများကို ရစ်ပါတ်လိုက်လေသည်။ ထိုရွာသားများမြေကြီးပေါ်လှိမ့်ချလျက် နာနာကျင်ကျင်အော်မြည်လာကြတော့သည်။

ရှီကျားမှာ ၄င်းအား အေးစက်စက်စိုက်ကြည့်လျက်ဆိုလိုက်သည်။

"စောစောကတည်းကသိခဲ့သင့်တယ်..အဲဒီမကောင်းဆိုး၀ါးကသန်မာလွန်းလို့ ဖေးယွီကတောင် အကူအညီလှမ်းတောင်းရတယ်ဆိုမှတော့...ပြီးတော့ သူ့ဂျူနီယာညီမလေးရဲ့မှော်အစွမ်းကလည်း သိပ်မှမမြင့်တာ ဘယ်လိုလုပ်ဒဏ်ရာနည်းနည်းလေးမှမရရတာလဲ...မင်းကမကောင်းဆိုး၀ါးဆီကနေ အခေါင်းထဲထည့်ပိတ်ခံလိုက်ရလို့ ဖေးယွီဘယ်မှာမှန်း မသိဘူးလို့ပြောတယ်နော် တကယ်တော့ ဒီမိန်းကလေးက သူ့စီနီယာအစ်ကိုကာကွယ်ပေးလို့လွတ်သွားခဲ့ပြီးသား..မင်းကဖေးယွီကိုမသတ်နိုင်ခဲ့လို့ အခေါင်းထဲမှာ ထည့်ပိတ်ထားလိုက်တယ်..ပြီးတော့ဒီမိန်းကလေးကိုဖမ်းပြီး သူ့ကိုယ်ထဲကို ၀င်ပူးလိုက်တာ"

ရှီကျားမှာတစ်ခါက 'ghosts know'မှ ပေါ်ပျူလာဖြစ်သော သတင်းတစ်ပုဒ်ကိုဖတ်ဖူးလေသည်။ ၄င်းမှာ မကောင်းဆိုး၀ါး၀ိညာဥ်များနှင့် ပတ်သက်၍ အခြေခံသိကောင်းစရာများနှင့် သာမာန်၀ိညာဥ်ရိုင်းများထက် အဘယ်ကြောင့် ပိုသန်မာရသည်ကိုရှင်းပြထားခဲ့သည်။

၄င်းတို့၏သန်မာမှုအတွက် အကြောင်းပြချက် ၃ခုရှိလေသည်။

ပထမအချက်မှာ တစ်စုံတစ်ယောက်မှာ အငြိုးများအမုန်းတရားများနှင့်သေဆုံးသွားခဲ့ပြီးလျှင် အငြိုးကြီး၀ိညာဥ်ဖြစ်လာသည်။ အငြိုးတရားကြီးမားသော ၀ိညာဥ်များမှာ အခြား၀ိညာဥ်များထက် ယင်စွမ်းအင်ပိုသန်မာလေသည်။ သေဆုံးချိန်တွင်ခံစားခဲ့ရသော အငြိုးအမုန်းတရားပြင်းထန်လေ သူတို့၏ယင်စွမ်းကပို၍သန်မာလေဖြစ်သည်။ တချို့မကောင်းဆိုး၀ါး၀ိညာဥ်များမှာ ယခုမှသေဆုံးသွားသော၀ိညာဥ်များသာဖြစ်သော်လည်း သေဆုံးသွားသည်မှာနှစ်ပေါင်းများစွာကြာခဲ့သော မကောင်းဆိုး၀ါး၀ိညာဥ်များထက် ပိုသန်မာနေတတ်သည်။ ၄င်းမှာ ၄င်းတို့၏ အငြိုးကပို၍ကြီးမား၍ပင်ဖြစ်လေသည်။

ဒုတိယအချက်မှာ သူတို့သက်တမ်းကရှည်လျားလာလေ သူတို့၏ယင်စွမ်းအင်နှင့်ကျင့်ကြံစွမ်းကပိုတိုးလာလေဖြစ်သည်။ ထိုအချက်မှာ သရဲများ မိစ္ဆာများ အားလုံးအတွက်အတူတူပင်။ သူတို့၏ကျင့်ကြံချိန်ကြာရှည်လေ သူတို့၏အစွမ်းကပိုသန်မာလာလေဖြစ်သည်။ ဥပမာ ကျိရင်သေဆုံးသွားစဥ်က သူ၏အငြိုးတရားမှာ ပြင်းထန်သည်ဟုမဆိုနိုင်ပေ။ သို့သော်သူ၏အစွမ်းများအလွန်သန်မာနေရခြင်း၏အဓိကအကြောင်းမှာ သူသည်နှစ်ပေါင်း၂၀၀၀ခန့်နေလာခဲ့ခြင်းကြောင့်ဖြစ်သည်။

တတိယအချက်မှာ လူများကိုစားသော မကောင်းဆိုး၀ါးများအကြောင်းဖြစ်သည်။ မကောင်းဆိုး၀ါးတစ်ကောင်မှာ အသက်ရှိနေသောလူတစ်ဦးကိုစားလိုက်သည်နှင့် ထိုလူ၏၀ိညာဥ်မှာ ထိုမကောင်းဆိုး၀ါးအတွက် လွန်စွာအားဖြည့်ပေးနိုင်လေသည်။ များများစားလေ ပို၍သန်မာလာလေဖြစ်သည်။ အကယ်၍ ရှီကျားကဲ့သို့အထူးသန်မာသော ယင်စွမ်းအင်ပိုင်ရှင်မျိုးကိုစားသုံးနိုင်ခဲ့ပါက ထိုမကောင်းဆိုး၀ါးအတွက် ပြန်လည်မွေးဖွားလာသလိုပင်ခံစားရလိမ့်မည်။ ၄င်းတို့၏ယင်စွမ်းအင်မှာ နှစ်ထောင်ချီစာတစ်ခါတည်းထိုးတက်သွားမည်ဖြစ်သည်။

ရှီကျားငယ်စဥ်ကပင်မြင်တွေ့ဖူးလာသော သရဲအရေအတွက်မှာ ၁ထောင်မပြည့်လျှင်တောင် ၈၀၀လောက်တော့ရှိပေလိမ့်မည်။ အများစုမှာ ကမ္ဘာအနှံ့သို့လေလွင့်နေကြသော ၀ိညာဥ်များသာဖြစ်လေသည်။ ရက်အနည်းငယ်မျှအကြာတွင် ၄င်းတို့မှာ ပြန်လည်၀င်စားခြင်းစက်၀န်းသို့၀င်ရောက်သွားလိမ့်မည်။ သို့သော်သူသည်မကောင်းဆိုး၀ါး၀ိညာဥ်များစွာကိုလည်း မြင်ဖူးလေသည်။ သူ၏အတန်းဖော်ဟောင်း လူသတ်မှုဥပမာယူရသော် သရဲအိုကြီးမှာ နှစ်ရာပေါင်းများစွာ ကျင့်ကြံခြင်းမျိုးပိုင်ဆိုင်လျက် လူသတ်လိုက်ပြီးနောက် အလွန်ကျင့်ကြံဆင့်မြင့်သော မကောင်းဆိုး၀ါးတစ်ကောင်ဖြစ်လာခဲ့လေသည်။

သို့သော်ဤမျှနှစ်ပေါင်းများစွာနေလာပြီးနောက် ရှီကျားမှာ ထိုမျှသန်မာသော မကောင်းဆိုး၀ါးမျိုးကို မမြင်ဖူးခဲ့ချေ။

ထူထဲသိပ်သည်းသော ယင်စွမ်းအင်များမှာ သရဲမိန်းကလေး၏ မျက်လုံး နှာခေါင်း ပါးစပ်နှင့်သူမတကိုယ်လုံးမှလျှံထွက်နေခဲ့သည်။ ယဲ့ကျင်းကျီမှာ သူမ၏ကိုယ်ကိုရိုက်ချက်တစ်ချက်ပေးလိုက်သေးသည်။ အခြားမကောင်းဆိုး၀ါးများသာဖြစ်ခဲ့လျှင် ထိုရိုက်ချက်ကြောင့် အထိနာသွားကြမည်သာ။ သို့သော် ဤမကောင်းဆိုး၀ါးမှာတော့ ထိုရိုက်ချက်ကြောင့် သူ၏ကိုယ်မှ ယင်စွမ်းအင်တချို့ ထွက်ကျသွားရသည်ကို သတိမမူမိသည့်အလား ဂရုပင်မစိုက်ချေ။ သူ၏ကြောက်မက်ဖွယ်သွေးဆာနေသော မျက်သားဖြူဖြူတို့မှာ ရှီကျားတို့တသိုက်ကို စိုက်ကြည့်လာခဲ့လေသည်။

တိတ်ဆိတ်ကျယ်၀န်းသောတောင်ပေါ်တွင် ငိုကြွေးသံများပဲ့တင်ထပ်နေခဲ့လေသည်။ လက်ရှိမှာ မနက်၄နာရီဖြစ်ကာ မနက်ခင်းအချိန်သို့ရောက်ရှိရန် နာရီအနည်းငယ်မျှသာလိုပေတော့သည်။ သို့သော်ကောင်းကင်ကြီးမှာမူ ညသန်းခေါင်းနှယ်မှောင်မည်းနေဆဲဖြစ်သည်။ အေးစိမ့်စိမ့်လေတို့က တောင်ကြားကိုတိုးဝှေ့တိုက်ခတ်သွားခဲ့သည်။ မေလထဲတွင်ဖြစ်သည့်တိုင် ဤညမှာ အေးစက်သောဆောင်းညတစ်ခုနှယ် အရိုးထဲထိ အေးစိမ့်နေခဲ့လေသည်။

ပြင်းထန်သောယင်စွမ်းအင်မှာ ပတ်၀န်းကျင်ကိုပင် ပြောင်းလဲလိုက်ချေပြီ။ ယဲ့ကျင်းကျီပင်လျှင် ဤကဲ့သို့အခြေအနေနှင့်ရင်ဆိုင်နေရစဥ်တွင် အမူအရာမှာ ပိုပို၍ လေးနက်လာတော့သည်။

ရှီကျား ထိုမိန်းကလေးသရဲအား သတိအပြည့်နှင့် စိုက်ကြည့်နေခဲ့သည်။

ဤမကောင်းဆိုး၀ါးမှာ အနည်းဆုံး လူ၉၀ကို၀ါးမြိုထားသည်။ ထို့အပြင် သူ၏သေဆုံးချိန်၌ အငြိုးတရားမှာလည်း လွန်စွာကြီးမားနိုင်လေသည်။

မိန်းကလေးသရဲမှာ သူမ၏ယင်စွမ်းအင်ဖြင့် ရွာသားများကိုချည်နှောင်ထားခဲ့လေသည်။ မျက်သားဖြူဖြူတစ်စုံမှာ ရှီကျားကိုစိုက်ကြည့်လျက် ၄င်း၏ပါးစပ်မှ တဂျွတ်ဂျွတ်အသံများမြည်နေခဲ့သည်။

၄င်း၏ကိုယ်ထည်မှာ မဖြစ်နိုင်သည့်အနေအထားနှင့်တွန့်လိမ်လာခဲ့သည်။ သူမ၏ကျောပြင်မှာ မြေပြင်နှင့်မျက်နှာချင်းဆိုင်လျက် ခြေလက်များမှာ ပင့်ကူသဖွယ် တတွန့်တွန့်နှင့်လှုပ်ရှားနေခဲ့လေသည်။ လိမ်နေသောခေါင်းမှာ ဇောက်ထိုးအနေအထားနှင့် ရှီကျားတို့၃ဦးကိုစိုက်ကြည့်လာခဲ့လေသည်။

ကြားတွင် ၃မီတာအကွာအဝေးခြားလျက် လူနှင့်သရဲတို့မှာ အပြန်အလှန်စိုက်ကြည့်နေခဲ့ကြသည်။

ထို့နောက် ရုတ်ချည်းပင် ၄င်း၏ပါးစပ်မှာ ကျယ်လောင်စွာပွင့်ဟလျက် ဖန်ခွက်ကိုလက်သည်းဖြင့်ခြစ်နေသည့်အလား စူးရှသည့်အသံကိုထုတ်လွှတ်လာခဲ့သည်။ လူတိုင်းမှာ သည်းမခံနိုင်စွာ နားကိုချက်ချင်းပိတ်လိုက်မိကြလေသည်။ ထိုအခွင့်အရေးကိုအသုံးချလျက် စက္ကန့်ပိုင်းအတွင်းမှာပင် မိန်းကလေးသရဲမှာ သူမ၏ခြေလက်၄ဖက်ဖြင့် ရှီကျားထံတရှိန်ထိုးပြေး၀င်လာခဲ့လေသည်။

ကြီးမားသော သွေးသံတရွှဲရွှဲပါးစပ်ကြီးမှာ ပွင့်ဟလျက် ရှီကျား၏ခေါင်းကိုလှမ်းဟပ်လိုက်လေသည်။

ဤမကောင်းဆိုး၀ါး၏အသိဥာဏ်မှာ အခြားသရဲများလိုမဟုတ်ချေ။ ၄င်း၏နားစည်ကိုထူးဖောက်မတက်ဆူညံသံက ရှီကျားခေါင်းကို နာကျင်စေသည်။ ထိုမကောင်းဆိုး၀ါးမှာသူ့ထံရုတ်ချည်းနီးကပ်လာပြီး ၄င်း၏ အနက်ရောင်ပါးစပ်ကြီးကလည်း သူ့အားလှမ်းဟပ်လာသည်ကို မြင်လျှင်ရှီကျား၏ရင်မှာ တချက်ခုန်လှုပ်သွားခဲ့လေသည်။ သူသည်ထိုသရဲမ၏ခေါင်းကိုလက်သီးဖြင့်ထိုးချလိုက်သော်လည်း ခြေလှမ်း၀က်မျှနောက်ကျနေဆဲဖြစ်သည်။

***

စာရေးသူမှာ ပြောစရာရှိတယ်:

နတ်ဘုရားတုတ်ချောင်းဖေး: ငါဂျူနီယာညီမလေးက သေပြီလား မသေသေးဘူးလား အား!!!!!

👻

Prev Next