MM Story Teller

Chapter 208

Viewers 49k

💘Chapter 208

နောက်ဆုံးတော့ရောက်လာပြီ

ချန်လီ၏ပန်းချီကားများက အသိုင်းအဝိုင်းထဲမှာ အလွန်အမင်းစျေးမြင့်သည့်အနေအထားသို့ရောက်ရှိလာပြီး ချန်လီ၏နာမည်က ပန်းချီလောကထဲမှာ ပိုပိုနာမည်ကြီးလာသော်လည်း ဝဲဂယက်၏ဗဟိုစင်တာကလူဖြစ်သည့် ချန်လီကမူ မည်သည့်အရာများဖြစ်နေမှန်း မသိသေးချေ။

သူက ပုံမှန်အတိုင်း ကျောင်းသွားအိမ်ပြန်ပြီး တစ်ပတ်လျှင်တစ်ရက် ကျူးကောယွီနှင့်အတူတူ တောင်ဆီသို့သွားကာ ဆရာကြီးစွန်းဆီက မင်ပန်းချီသင်ကာ ဘဝကိုရိုးရှင်းစွာဖြတ်သန်းနေခဲ့သည်။　

မျက်စိတစ်မှိတ်အတွင်းမှာပဲ တစ်လကြာသွားပြီး အပူချိန်ကတဖြည်းဖြည်းမြင့်တက်လာသည်။နွေဦး၏ခြေရာများက တိတ်တိတ်လေးပဲထွက်ခွာသွားခဲ့လေပြီ။ညအချိန်ရောက်မှပဲ အေးမြမြညနေခင်းလေညှင်းလေးက နွေဦး၏ မထွက်ချင်ထွက်ချင်ထွက်ခွာသွားမှုကို လူတို့အားခံစားရစေလေသည်။　

ချန်လီနှင့် ဝေ့ချန်က ရက်ကွက်ပန်းခြံထဲမှာလက်ချောင်းများသွယ်ယှက်ရင်း လမ်းလျှောက်နေခဲ့ကြသည်။ယခုတလောခေတ်စားနေသောသီချင်းတစ်ပုဒ်က သူတို့နားထဲကိုဝင်လာသည်။အန်တီကြီးများတစ်ဖွဲ့က သီချင်းသံအတိုင်းကနေကြပြီး ကလေးများက ပန်းခြံထဲကပေါ်မှာပြေးလွှားဆော့ကစားနေကြသည်။ကလေးမိဘများက နောက်ကနေလိုက်ပြီး သားသမီးများကစားနေသည်ကိုလက်ချင်းတွဲ၍ကြည့်နေကြသည်။သူတို့၏မျက်ဝန်းများက နူးညံ့မှုနှင့်ချစ်ခင်အလိုလိုက်မှုများဖြင့် ပြည့်နေကြ၏။

ဤသည်က သာမန်ညနေခင်းတစ်ခုပဲဖြစ်လေသည်။နားထဲမှာ အသံများအနည်းငယ်ဆူညံ့နေသော်လည်း သူတို့မျက်လုံးများထဲမှာရောင်ပြန်ဟပ်နေသောမြင်ကွင်းက နွေးထွေးမှုအတိပြီးနေခဲ့သည်။　

ဤခံစားချက်ကို သူတို့အဘယ်အချိန်က သဘောကျသွားခဲ့မိမှန်းသူတို့မသိပေ။ပန်းခြံထဲကလမ်းလေးပေါ်မှာလမ်းလျှောက်ရင်း ဝင်ထွက်သွားလာနေသောလူများကိုကြည့်ရင်း အိမ်နှင့် အလွန်နီးကပ်နေသလိုသူတို့ခံစားရသည်။ဝေ့ချန်နှင့်ချန်လီက နေရာတစ်နေရာရှာပြီးထိုင်လိုက်ကာ သူတို့၏လက်ချောင်းများကမူသွယ်ယှက်ထားဆဲဖြစ်လေ၏။ချန်လီက တဖြည်းဖြည်းချင်း ဝေ့ချန်၏ဘေးကိုတိုးကာထိုင်လိုက်ပြီး ထုံးစံအတိုင်းပဲ သူ၏ခေါင်းကို ဝေ့ချန်၏ပခုံးပေါ်မှာမှီလိုက်သည်။　

နှစ်ယောက်လုံး တစ်ယောက်မှစကားမပြောကြပေမဲ့ နွေးထွေးသောလေထုက သူတို့ကိုတင်းတင်းကြပ်ကြပ်ဝန်းရံထားခဲ့သည်။　

ခပ်လှမ်းလှမ်းမှာ အေးဂျင့်တစ်ယောက်က အရပ်ရှည်ရှည်ရုပ်ချောချောလူငယ်လေးတစ်ယောက်ကိုအိမ်ပြပေးနေသည်။ 　

"လူကြီးမင်းကျန်း ဒီရက်ကွက်ထဲကအိမ်တွေက တခြား အဆင့်မြင့်ရက်ကွက်တွေနဲ့ယှဥ်ရင် အမြဲတမ်း ဝယ်လိုအားမြင့်တယ်ဗျ...ခုနကတွေ့သလိုပဲ ဒီမှာလုံခြုံရေးကအရမ်းကောင်းတယ်...ဝင်ခွင့်ထိန်းချုပ်မှုက အရမ်းတင်းကြပ်တယ်...ပြီးတော့ ကားထိုးဖို့မြေအောက်ကားပါကင်ရှိတယ်...လူကြီးမင်းစိတ်ဝင်စားနေတဲ့အိမ်က အလင်းရောင်ကောင်းကောင်းရတဲ့မြစ်ရှုခင်းယူနစ်ပါ...အိပ်ရာဘေးမှာရပ်ပြီး အဝေးကတောင်တန်းစိမ်းစိမ်တွေနဲ့ မြစ်ရေပြင်စိမ်းစိမ်းကို ရှုစားလို့ရတယ်....."

အေးဂျင့်က ရက်ကွက်ထဲကအိမ်များအကြောင်းကြိုးစားပမ်းစားမိတ်ဆက်ပေးနေပြီး အများစုမှာအမှန်ဖြစ်လေသည်။ဤမျှနှစ်တွေအများကြီး အိမ်ခြံမြေအကျိုးဆောင်အဖြစ်အလုပ်လုပ်ပြီးနောက်သူ့မှာလူများကိုအကဲဖြတ်နိုင်စွမ်းရှိသည်မှာသဘာဝဖြစ်သည်။

ဤလူငယ်က အသက်နှစ်ဆယ်သာရှိသေးပုံပေါ်သော်လည်း သူ့မှာ ထူးကဲသောအမူအကျင့်ရှိ၏။သူက ပုံမှန်ရိုးရိုးရှင်းရှင်းအဝတ်အစားများကိုပဲဝတ်ဆင်ထားသော်လည်း အကုန်လုံးက နိုင်ငံတကာ နာမည်ကြီး ဘရန်းများချည်းဖြစ်သည်။ထို့အပြင် ရှေ့မှာလည်း သူ့လုပ်ဖော်ကိုင်ဖက်များက အကောင်းမြင်စိတ်မရှိခဲ့သည့်အိမ်ဝယ်ချင်သောအသက်နှစ်ဆယ်အရွယ်လူငယ်တစ်ယောက်ရှိခဲ့ဖူးသည်။အိမ်ကြည့်ပြီးနောက် ထိုလူငယ်လေးက နေရာမှာတင်တန်းပိုက်ဆံချေခဲ့ပြီး ပမာဏအပြည့်ပင်ဖြစ်နေသေးသည်။

ထိုအရောင်းအဝယ်က သူ့လုပ်ဖော်ကိုင်ဖက်များကို မနာလိုအားကျဖြစ်စေခဲ့သည်။ကောလိပ်ကျောင်းသားပုံစံလူငယ်လေးက မိဘမပါဘဲ အိမ်တစ်လုံးဝယ်ရန် မျက်တောင်မခတ်တမ်းငွေသန်းနှင့်ချီသုံးသည်အထိလက်ကြီးလိမ့်မည်ဟု မည်သူမှ မမျှော်လင့်ထားခဲ့ပေ။

ထို့ကြောင့် ဤတစ်ခေါက်ဤလူငယ်လေးကိုမြင်ရချိန်မှာ အိမ်ခြံမြေအကျိုးဆောင်က အလွန်ကိုလေးနက်နေခဲ့သည်။သူရောပဲ လွန်ခဲ့တဲ့နှစ်နှစ်ကလူငယ်လေးလိုလက်ကြီးမလားဆိုတာဘယ်သူသိမှာလဲ...

"ဒါက ရက်ကွက်ထဲမှာ အထူးတလည်ဖွင့်ထားတဲ့ပန်းခြံပါ.. တခြားပန်းခြံတွေထက်မနိမ့်ပါဘူး...အထဲကအခြေခံအဆောက်အအုံက ပြည့်စုံပါတယ်...အကယ်၍လူကြီးမင်းကျန်းရဲ့မိသားစုက နောင်မှာဒီကိုရွှေ့လာချင်တယ်ဆိုရင် ဒီပန်းခြံကညနေခင်းလမ်းလျှောက်ဖို့အတွက်ကောင်းမွန်တဲ့ရွေးချယ်မှုတစ်ခုပါ...လူကြီးမင်းကျန်း တစ်ချက်လောက်ဝင်ကြည့်ကြည့်ပါလားဗျ"

အေးဂျင့်က ထိုသို့ပြောပြီး ဆက်သွားသည်။လူကြီးမင်းကျန်းဟူသည့်လူငယ်လေးက အေးဂျင့်နောက်ကနေ ရက်ကွက်ထဲကပန်းခြံထဲကိုလိုက်ဝင်သွားသည်။

အေးဂျင့်က လူကြီးမင်းကျန်းကို ပန်းခြံကိုတစ်ပတ်ပတ်ပြသည်။သူထွက်လာချိန်မှာ အိမ်ပြန်တော့မည့်ဝေ့ချန်နှင့်ချန်လီတို့နှင့် တိုက်တိုက်ဆိုင်ဆိုင် ဆုံလေသည်။လူကြီးမင်းကျန်းက ထိုနှစ်ယောက်ကိုမြင်သောအခါတန့်သွားလေသည်။

ဝေ့ချန်ကလည်း ရပ်သွားပြီး သူ့ရှေ့ကလူငယ်ကိုအံ့အားသင့်စွာကြည့်လိုက်သည်။

"သခင်လေးကျန်း တိုက်ဆိုင်လိုက်တာ"

တစ်နေ့မှာ ကျန်းယဲ့ကို သူတို့ရပ်ကွက်ထဲမှာ တွေ့ရလိမ့်မည် ဝေ့ချန်လုံးဝမမျှော်လင့်ထားပေ။

"တိုက်ဆိုင်လိုက်တာ"

ကျန်းယဲ့က အပြုံးတစ်ပွင့်နှင့် ဆိုလိုက်၏။သူလည်း ဝေ့ချန်နှင့်ဆုံရရန်မမျှော်လင့်ထားပေ။

သူတို့နှစ်ဦးက ရှန်ဟိုင်းဇုန်Aပရောဂျက်ကြောင့် နွေဦးပွဲတော်နောက်ပိုင်းမှာ အချင်းအချင်း အကြိမ်ရေများစွာအဆက်အသွယ်လုပ်ဖူးခဲ့ကြသည်။သို့သော်လည်း သူတို့အဆက်အသွယ်လုပ်သည့်အကြိမ်ရေတိုင်းက အလုပ်ကိစ္စနှင့်ပတ်သက်၍ ဖြစ်ကာ သူတို့မှာကိုယ်ရေးကိုယ်တာဆက်ဆံရေးများများစားစားမရှိပါချေ။ဤတစ်ခေါက်မှာ အချင်းချင်းနှုတ်ဆက်ပြီးသည်နှင့် လမ်းခွဲကာ ကိုယ်ကိစ္စကိုယ်ဆက်လုပ်ခဲ့ကြသည်။

ရှေ့တုန်းက သူနှင့်အတူအိမ်ဝယ်ခဲ့သည့်လူငယ်လေးက သူအိမ်ကြည့်ရန်ခေါ်လာသည့်လူငယ်ကို သခင်လေးကျန်းဟုခေါ်လိုက်သည်ကိုကြားလျှင် အေးဂျင့် စိတ်အေးသွားသည်။သူအမြင်က တကယ့်ကိုမှန်နေသည်ပင်။သူ့ရှေ့ကလူငယ်လေးက သာမန်လူတစ်ယောက်ဟုတ်မနေပေ။

"ဒီဟာပဲ...စာချုက်လက်မှတ်ထိုးရအောင်"

ကျန်းယဲ့က ဘေးပတ်ပတ်လည်ကိုဝေ့ကြည့်ကာဆုံးဖြတ်လိုက်သည်။

ဤရပ်ကွက်၏ ကုန်းမြေစိမ်းလန်းစိုပြေမှုအနေအထားက အလွန်ကောင်းသည်။ပိုင်ဆိုင်မှုစီမံကွပ်ကဲမှုကလည်း တာဝန်ယူမှုရှိသည်။ပတ်ဝန်းကျင်ရှုခင်းကလည်းကောင်းသည်။ဤနေရာမှာအိမ်တစ်လုံးဝယ်လိုက်လျှင် သူအကြိုက်နှင့်ကိုက်လောက်သည်။လူကို အပိုင်သိမ်းနိုင်ရန်ပဲ ကြိုးစားရန်လိုတော့သည်။

အေးဂျင့်က ကျန်းယဲ့ဆုံးဖြတ်ချက်ချလိုက်သည်ကိုကြားလျှင် သူအပျော်လွန်သွားသည်။သို့ပေမဲ့သူ၏ပျော်ရွှင်မှုကို ထိန်းကာလူကြီးမင်းကျန်းကိုစာချုပ်လက်မှတ်ထိုးရန် တလေးတစားခေါ်သွားလိုက်သည်။

လူကြီးမင်းကျန်းက နှစ်လုံးတွဲအိမ်တစ်လုံးဝယ်ခဲ့သည်။ဤရပ်ကွက်ထဲက အိမ်စျေးနှုန်းများကအရ ယင်းကငါးသန်းအတိဖြစ်လေသည်။

ကျန်းယဲ့က သူ့ပိုက်ဆံအိတ်ထဲကကတ်ကိုထုတ်ကာ အေးဂျင့်ကိုကမ်းပေးလိုက်သည်။

"လူကြီးမင်းကျန်း အရစ်ကျလား အကျေချေမလား"

အေးဂျင့်ကမေးလိုက်သည်၊လူကြီးမင်းကျန်း ငွေအကျေချေလိမ့်မည်ဟုခန့်မှန်းထားပြီးသားဖြစ်ပေသော်ငြားပင်။

"အကျေချေမယ်"

ကျန်းယဲ့က မဆိုင်းမတွပြောလိုက်သည်။

ထင်တဲ့အတိုင်းပဲဟုအေးဂျင့်ကတွေးလိုက်ပြီး ကျန်းယဲ့၏ကတ်ကိုသေသပ်စွာပွတ်ဆွဲလိုက်သည်။

ကျန်းယဲ့စာချုပ်နှင့်ထွက်သွားချိန်မှာ အေးဂျင့်က စိတ်သက်သာရာရစွာသက်ပြင်းချလိုက်သည်။ဤအရောင်းအဝယ်ဖြင့်ဆိုလျှင် သူဤလဘောနပ်ကောင်းကောင်းရပေလိမ့်မည်။

စာချုပ်လက်မှတ်ထိုးမှု လုပ်ငန်းစဥ်တစ်ခုလုံးကို ကြည့်နေခဲ့သောလုပ်ဖော်ကိုင်ဖက်များမှာ အားကျကြရုံတတ်နိုင်၏။ယခု လူငယ်လေးရောက်လာချိန်မှာ လူငယ်လေးကငယ်လွန်း၍ အိမ်တစ်လုံးမတတ်နိုင်လောက်ဟုထင်ပြီး သူ့ကိုလက်ခံရန်အချိန်မဖြုန်းချင်ခဲ့ကြရန် သူတို့ကိုမည်သူကမှ မပြောခဲ့ပေ။

ကြည့်ရသည်မှာ ဤအေးဂျင့်က သေချာလေ့လာထားပုံရသည်။

ယခင်တုန်းကလည်း သူတစ်ယောက်ရွေးထုတ်နိုင်ခဲ့သည်၊ယခုဤနှစ်လည်း နောက်တစ်ယောက် ရွေးထုတ်လိုက်ပြန်သည်။

ဒီအေးဂျင့်ရဲ့အမြင်ကပဲ စူးရှလွန်းနေတာလား...ဒါမှမဟုတ် ဒီနေ့ခေတ်လူငယ်တွေကပဲတော်လွန်းနေတာလား...

****

ညရောက်လာပြီး ညကောင်းကင်က ကြယ်ရောင်လရောင်တို့မရှိဘဲ မှောင်မည်းနေသည်။

လမ်းလျှောက်ပြန်လာပြီးနောက် ချန်လီက စတူဒီယိုခန်းထဲ၌ ပန်းချီသွားဆွဲခဲ့သည်။

ဝေ့ချန်က ဧည့်ခန်းထဲကဆိုဖာပေါ်မှာထိုင်နေသည်။ကွန်ပြူတာမျက်နှာပြင်ပေါ်က တောက်ပနေသော အဖြူရောင်အလင်းက ဝေ့ချန်၏မျက်နှာပေါ်မှာ ပုံရိပ်ထင်၍နေသည်။ထိုအလင်းက ဝေ့ချန်၏နှာတံပေါ်က မျက်မှန်ကြောင့်အလင်းယိုင်ပြီး ဝေ့ချန်၏မျက်နှာတစ်ခုလုံးကို အလင်းထဲမှာကွယ်ဖုံးကာ အနည်းငယ်မရှင်းမလင်းဖြစ်စေသည်။

သူ၏လက်ချောင်းသွယ်သွယ်များက ကီးဘုတ်ပေါ်မှာတဂျောက်ဂျောက်နှိပ်နေပြီး ကွန်ပြူတာပေါ်က ဖိုင်များက အလွန်လျင်မြန်သောအရှိန်ဖြင့်ရွေ့နေသည်။

လက်ရှိအချိန်မှာ သူက မားကတ်တင်းအစီအစဥ်တစ်ခုကိုလုပ်နေခြင်းဖြစ်သည်။မက်စ်နှင့်ပူးပေါင်းဆောင်ရွက်မှုကစတင်နေပြီဖြစ်သည်။မက်စ်ကားများက လုပ်ရိုးလုပ်စဥ်များဖြတ်ပြီး တရုတ်ကိုရောက်ရှိလာပြီဖြစ်သည်။ဤလမှာ တရုတ်စျေးကွက်မှာ ကျယ်ကျယ်ပြန့်ပြန့် ဖြန့်မှာဖြစ်သည်။ဝေ့ချန်အလုပ်လုပ်သည့် မားကတ်တင်းဌာနက မက်ကားကြော်ငြာခြင်းနှင့်ရောင်းချခြင်းမှာတာဝန်ယူထား၏။

ကွန်ပြူတာဘေးမှာချထားသည့်ဖုန်းက တဒွီဒွီမြည်လာသည်။ဝေ့ချန် အလုပ်လုပ်ရပ်ပြီး ဖုန်းကောက်ကိုင်လိုက်သည်။ရှန့်ကျားချီကခေါ်ခြင်းဖြစ်သည်။

"ဦးလေးရှန့်"

ဝေ့ချန်ကပြောလိုက်သည်။

"အားချန် သတင်းဆိုးရှိတယ်...စိတ်ကိုပြင်ဆင်ထား"

ရှန့်ကျားချီ၏လေသံက သိပ်မကောင်းပေ။ထိုသတင်းဆိုး ဟူသည့်အရာကြောင့် သူဒေါသထွက်နေမှန်းသိသာလေသည်။

ဝေ့ချန်မှာ ဘာစိတ်ခံစားချက်ပြောင်းလဲမှုမှရှိမနေပေ။

"ဦးလေးရှန့် ပြောပါ...ကျွန်တော်နားထောင်နေပါတယ်"

"အထက်က အပြောင်းအရွှေ့အမိန့်ထွက်လာပြီ...မင်းက ကုမ္ပဏီရဲ့လက်ထောက်အထွေထွေမန်နေဂျာအဖြစ်ရာထူးတိုးခံရလိမ့်မယ်...မားကတ်တင်းဌာနရဲ့ဒါရိုက်တာရာထူးကို လူသစ် ချန်ယွင်ဇန်းကလွှဲယူလိမ့်မယ်"

ရှန့်ကျားချီက ဝေ့ချန်ကို အတော်လေး လေးလံနေသောအသံဖြင့် ထိုသတင်းကိုပြောခြင်းဖြစ်လေသည်။

ရှန့်ကျားချီက ချန်ဖုန်းအုပ်စု၏ဥက္ကဋ္ဌဖြစ်သော်လည်း ချန်ဖုန်းအုပ်စုက စင်စစ်တွင် အစိုးရပိုင်လုပ်ငန်းဖြစ်ပေသည်။ဖွဲ့စည်းပုံကရှုပ်ထွေးပြီး အင်အားစုပေါင်းစုံရှိသည်။ထိုသို့ဖြစ်ရာ ရှန့်ကျားချီ မထိန်းချုပ်နိုင်သောအရာအချို့ရှိ၏။

အပေါ်ယံတွင် ဝေ့ချန်က မားကတ်တင်းဒါရိုက်တာရာထူးကနေ လက်ထောက်အထွေထွေမန်နေဂျာရာထူးကို ရာထူးတိုးသွားခြင်းဖြစ်သည်။ဤသည်က သတင်းကောင်းပင်။အဘယ်မှာသတင်းဆိုးဖြစ်နိုင်မည်နည်း။

သို့ပေမဲ့ ဝေ့ချန်က မားကတ်တင်းဌာနနှင့်အရောင်းဌာနကိုပေါင်းစည်းရန်တာဝန်ပေးခြင်းခံထားရခြင်းမှာ လက်ထောက်အထွေထွေမန်နေဂျာ၏အာဏာကိုတစ်စိတ်တစ်ပိုင်းရှင်းထုတ်ထားသည်ကိုမမေ့သင့်ပေ။မားကတ်တင်းဌာနအသစ်က ဒါရိုက်တာဘုတ်အဖွဲ့ကို တိုက်ရိုက်အစီအရင်ခံရ၏။တစ်နည်းဆိုရသော် လက်ထောက်အထွေထွေမန်နေဂျာရာထူးက အမှန်တကယ်တွင် ဒါရိုက်တာရာထူးနှင့်အတူတူလောက်သာရှိလေသည်။တချို့ရှုထောင့်များတွင် မားကတ်တင်းဒါရိုက်တာထက်ပင်နိမ့်လေသည်။

ထို့ကြောင့် အမည်ခံအရဝေ့ချန်က ရာထူးတိုးခံလိုက်ရသော်လည်းတကယ်တမ်းမှာရာထူးချခံလိုက်ရခြင်းဖြစ်သည်။ဤသည်ကမှသတင်းဆိုးမဟုတ်လျှင် ဘယ်အရာကသတင်းဆိုးဖြစ်ဦးမည်နည်း။

ဝေ့ချန်က ရှန့်ကျားချီမျှော်လင့်ထားသလိုမျိူး ဘာမကျေနပ်မှုမှမပြပေ။ထိုအစား သူ့လေသံကတည်ငြိမ်နေပြီး ဤသည်ကိုမျှော်လင့်ထားသည်အတိုင်းပင်။

ရှန့်ကျားချီက သူ့လေသံထဲကနေတစ်ခုခုကိုဖမ်းမိသွားသည်။သူကမျက်ခုံးပင့်ကာမေးလိုက်သည်။

"ထင်ထားပြီးသားလား"

"အင်း"

ဝေ့ချန်က ဝန်ခံလိုက်သည်။

ရှန့်ကျားချီက ဘာကြောင့်လဲဆက်မမေးပေ။အနည်းငယ်တွေးပြီးနောက်မှာ သူသဘောပေါက်သွားသည်။သို့သော်လည်း ဝေ့ချန်က ချန်ဖုန်းအုပ်စုအတွင်းက အာဏာအရင်းအမြစ်အစစ်အမှန်ကို အမှန်တကယ်သိနေခြင်းအတွက် သူအနည်းငယ်အံ့ဩသွားမိဆဲဖြစ်လေသည်။

ရှန့်ကျားချီ ဥက္ကဋ္ဌမဖြစ်ခင်က ချန်ဖုန်းအုပ်စုက အမြဲတမ်းချန်မိသားစုလက်ထဲမှာရှိခဲ့သည်။ရှန့်ကျားချီလည်း ချန်ဖုန်းအုပ်စု၏ပုလ္လင်ကို ချန်မိသားစုဆီက တိုက်ခိုက်ယူနိုင်ရန် အခက်အခဲများစွာဖြတ်ကျော်ခဲ့ရသည်။

သို့တိုင် ချန်ဖုန်းအုပ်စုထဲရှိ ချန်မိသားစု၏အာဏာကပျောက်ကွယ်မသွားသေးပေ။ယခုအချိန်ထိ ချန်မိသားစုက ချန်ဖုန်းအုပ်စုထဲမှာ အလွန်အာဏာရှိနေဆဲဖြစ်သည်။

သူတို့က လက်ထောက် အထွေထွေမန်နေဂျာရာထူးအစား မားကတ်တင်းဌာန၏ဒါရိုက်တာရာထူးထဲသို့ တစ်စုံတစ်ယောက်ကိုဆွဲထည့်ရသည်လဲဆိုရန်အတွက်မူ အဖြေကအင်မတန်ရိုးရှင်းလေသည်။

ပထမအနေဖြင့် လက်ထောက်အထွေထွေမန်နေဂျာရာထူးက အာဏာအစစ်အမှန်များများစားစားမရှိပေ။ထို့ကြောင့် ချန်မိသားစုကသဘောမကျပေ။ဒုတိယအနေဖြင့် ချန်မိသားစု ဝေ့ချန်ဆီကနေ မက်စ်နှင့်ပူးပေါင်းဆောင်ရွက်မှုမှရမည့် အမှတ်(အကျိုးအမြတ်/ဂုဏ်စသည်)ကိုယူချင်နေသည်။

တရုတ်ပြည်ရှိ မက်စ်ကားအထူးသီးသန့်အေဂျင်စီအတွက် မက်စ်နှင့်စာချုပ်ချုပ်ထားသူက ဝေ့ချန်ဖြစ်သော်လည်းကားများကိုမည်သို့ရောင်းပြီး ကုမ္ပဏီအတွက် အကြီးမားဆုံးအမြတ်ရအောင် မည်သို့ဖန်တီးမည်ဆိုသည်ကို ဤအချိန်မှာဝေ့ချန်ဘာမှမလုပ်နိုင်ပါချေ။

ထို့ကြောင့် ချန်မိသားစုက မက်စ်၏မားကတ်တင်းအားထုတ်မှုများကိုမောင်ပိုင်စီးပြီး မက်စ်ကနေယူဆောင်လာသည့်အကျိုးအမြတ်များကို ချန်ဖုန်းအုပ်စုထဲကချန်မိသားစု၏အကျိုးအတွက်အသုံးချပြီး ချန်မိသားစုအာဏာတိုးပွားအောင်လုပ်ချင်နေသည်။

ဝေ့ချန်က ချန်ဖုန်းအုပ်စုအတွင်းရှိ ချန်မိသားစု၏လွှမ်းမိုးမှုကိုသိလျှင် ဤကိစ္စကိုခန့်မှန်းရသည်က အလွန်ကိုလွယ်ကူလေသည်။

ရှန့်ကျားချီက ၎င်းကိုတွေးပြီး စိတ်သက်သာရာရစွာပဲ သက်ပြင်းချမိလိုက်သလို တစ်ချိန်တည်းမှာပဲ သူကဝေ့ချန်လောက်ရှေ့ရေးမမြင်တတ်ပါလားဟုသတိပြုမိသွားသည်။

"မင်းကကြိုတင်ခန့်မှန်းထားပြီးသားဆိုတော့ မင်းမှာအရန်အစီအစဥ်တစ်ခုရှိလိမ့်မယ်လို့ငါယုံကြည်တယ်...ငါက ဘာမှမဟုတ်ဘဲ စိတ်ပူနေမိတာထင်တယ်"

"စိတ်မပူပါနဲ့ ဦးလေးရှန့်"

ရှန့်ကျားချီက ပြုံးကာပြောသည်။

"အမှန်တော့ မင်းလုပ်တဲ့ကိစ္စတွေကို ငါ100%စိတ်ချထားသင့်တာ"

ဤအခိုက်အတန့်မှာ ရှန့်ကျားချီ သူ့ကိုယ်သူမလိုအပ်ဘဲဇာချဲ့မိသလိုခံစားနေရသည်။

နှစ်ယောက်သား ခဏလောက်စကားပြောပြီးနောက် ဖုန်းချလိုက်ကြသည်။

ဝေ့ချန်က သူ့ဖုန်းကို စားပွဲပေါ်တင်ပြီး သူရိုက်ထားသည့်မားကတ်တင်းအစီအစဥ်ကိုကြည့်လိုက်သည်။၎င်းနောက် သူက 'ဖျက်သည်'ခလုတ်ကို အသာအယာနှိပ်လိုက်သည်။

ဖြစ်လာရမည်ကိစ္စက နောက်ဆုံးတော့ ရောက်ရှိလာပြီပင်။

<< >>

💘

Prev Next