MM Story Teller

Chapter 207

Viewers 49k

💘Chapter 207

ကျော်ကြားမှု

ယွမ်သန်းသုံးဆယ်ကျော်က ဝူကျိုက်လင်၏အကောင့်ထဲမှာကြာကြာမနေခဲ့ပါချေ။

ကျူးကောယွီဆီက ချန်လီ၏အကောင့်ကိုတောင်းပြီးနောက်သူကတစ်ပြားမှမလျော့ဘဲ လွှဲပေးလိုက်သည်။

ပိုက်ဆံရောက်လာချိန်မှာ ချန်လီကမနက်စာစားနေခြင်းဖြစ်သည်။သူ့ဖုန်းကနေမက်ဆေ့ချ်ဝင်သံမည်လာ၏။ချန်လီဖုန်းဖွင့်လိုက်သည့်အခါ သူ့အကောင့်ထဲမှာရုတ်တရက်ကြီး ယွမ်သန်းသုံးဆယ်ကျော်ရောက်နေကြောင်းတွေ့လိုက်ရသည်။ပိုက်ဆံကိုစိတ်မဝင်စားသည့်ချန်လီပင်လျှင် အချိန်အတော်ကြာကြောင်အနေပြီးမှ ပြန်အသိဝင်လာသည်။

"ဘာဖြစ်လို့လဲ"

ချန်လီက မက်ဆေ့ချ်ကိုကြည့်ပြီး ကြက်သေသေနေသည်ကိုမြင်လျှင် တစ်ခုခုဖြစ်နေသည်ထင်ပြီး စိတ်ပူကာမေးလိုက်သည်။

ချန်လီက ခေါင်းယမ်းကာ ဖုန်းကိုဝေ့ချန်ဆီကမ်းပေးလိုက်ပြီး ဝေ့ချန်ကိုဖုန်းပေါ်ကမက်ဆေ့ချ်ကိုဖတ်ခိုင်းလေသည်။

ယွမ်သန်းသုံးဆယ်ကျော်က ဝေ့ချန်အတွက်ပမာဏသေးသေးလေးမဟုတ်ပေ။ထို့ကြောင့် ချန်လီ၏အကောင့်ထဲကို ဤမျှငွေပမာဏအများကြီးရောက်လာသည်ကို မြင်ရချိန်မှာဝေ့ချန်က အံ့ဩသွားပြီးမျက်ခုံးပင့်လိုက်မိသည်။　

"ဒီငွေက..."

ဝေ့ချန်ကမေးလိုက်သည်။

ချန်လီက ခဏလောက်စဥ်းစားပြီးနောက် ပိုက်ဆံလွှဲလိုက်သူက မည်သူဖြစ်သည်ကိုသိသွားသည်။

"စီနီယာအစ်ကိုဝူကျိုက်လင်က မနေ့ကငါ့ဆီလာပြီး သူ့မိတ်ဆွေတစ်ယောက်က ငါ့ရဲ့ပန်းချီကားတွေကိုစုဆောင်းချင်နေတယ်လို့ပြောတယ်...ဒါကြောင့် ငါသူ့ကို ငါ့ပန်းချီကားတွေထဲကတစ်ချပ်ယူသွားခိုင်းလိုက်တာ"

၎င်းကိုကြားသည်နှင့် ဤပိုက်ဆံ၏အရင်းအမြစ်ကိုဝေ့ချန်တန်းသိလိုက်သည်။သို့ပေမဲ့ သူမနေနိုင်ဘဲ ချန်လီ၏ခေါင်းလေးကိုပွတ်ကာ စိတ်ရင်းဖြင့်ပြောလိုက်မိသည်။

"လီလီက တော်လိုက်တာကွာ"

ယခုအချိန်မှာ ပန်းချီကားတစ်ချပ်က ငွေသန်းဆယ်နှင့်ချီယူဆောင်လာနိုင်သည်။သူ့ဇနီးလေးက ငွေရှာတော်လွန်း၍ သူ့မှာဂုဏ်ယူရသည်။

ဝေ့ချန်၏ချီးကျူးခြင်းကိုခံလိုက်ရချိန်မှာ ချန်လီ၏မျက်လုံးများကွေးညွတ်သွားကာ နှုတ်ခမ်းလေးမသိမသာကော့တက်သွားသည်။

ချန်လီ၏အမြင်မှာ အနှီသန်းသုံးဆယ်က ဝေ့ချန်၏ချီးကျူးမှုလောက်အရေးမပါပေ။

မနက်စာစားပြီးနောက် ချန်လီနှင့်ဝေ့ချန် လူချင်းခွဲခဲ့ကြသည်။ဝေ့ချန်က အလုပ်ကိုသွားပြီး ချန်လီကကျောင်းသွားလေသည်။

ချန်လီကျောင်းကိုရောက်ချိန်မှာ ကျူးကောယွီကိုသူ့ဆုံးဖြတ်ချက်ကိုပြောလိုက်သည်။နေ့လည်ခင်းမှာ ကျူးကောယွီကချန်လီ၏ပန်းချီကားများစွာကို ဂရုတစိုက် သယ်ပြီး ရှန်ဟိုင်းကိုလေယာဥ်ဖြင့်သွားကာ စတင်ပြင်ဆင်တော့သည်။

ချန်လီက ကျူးကောယွီနှင့်ဝူကျိုက်လင်ရှေ့ဆက်မည်သို့လုပ်မည်ဆိုသည်ကိုမမေးခဲ့ပေ။ပြီးလျှင် ချန်လီကိုယ်၌ကပင် ပန်းချီလောကမှာသူ၏လက်ရှိအဆင့်အတန်းကဘာဖြစ်သည်ကိုမသိပေ။

သူ၏နေ့စဥ်ဘဝက ကျောင်းနှင့်အိမ်ကိုအသွားအပြန်လုပ်နေခြင်းပဲဖြစ်ကာ ရိုးရှင်းပြီးသာမန်ဆန်သည်။

သို့ပေမဲ့ ချန်လီမသိခဲ့သည်က သူ တရုတ်ပြည်ပန်းချီအသိုင်းအဝိုင်းမှာ တဖြည်းဖြည်းနှင့်နာမည်ကျော်ကြားလာခဲ့ခြင်းပဲဖြစ်လေသည်။

ရှန်ဟိုင်း၊နှလုံးသားစေရာ

ယခင်ကသည်မှာချိတ်ထားသည့် ချန်လီဆွဲထားသောမင်(မှင်)ပန်းချီက ဤလ နှလုံးသားစေရာ၏ပြခန်းမှာ နာမည်အကြီးဆုံးပန်းချီကားဖြစ်လာခဲ့သည်။

ပိတ်ရက်များမှာ နှလုံးသားစေရာတွင် လူအနည်းငယ်ပဲရှိတတ်ပေမဲ့ ယနေ့တွင် ချန်လီ၏မင်ပန်းချီတစ်ခုတည်းရှေ့မှာ လူများစွာရပ်နေကြသည်။

သင်က ပန်းချီလောကထဲကဆိုလျှင် ဤလူများကိုသေချာပေါက်သိလိမ့်မည်ဖြစ်ပြီး မည်သို့သော ပန်းချီကားမျိုးက စုဆောင်းသူများနှင့်ပန်းချီလောကထဲက အကောင်ကြီးများစွာကိုဆွဲဆောင်နိုင်ပြီး ဤပန်းချီကားရှေ့မှာ မခွာနိုင်ဘဲအကြာကြီးရပ်နေအောင်လုပ်နိုင်ရသနည်းဟူ၍သက်ပြင်းချမိပေလိမ့်မည်။

"ရှောင်ဝူ ဒီလာပါဦး"

အဝတ်အစားသပ်ရပ်ကျနစွာဝတ်ဆင်ထားသောလူအိုကြီးတစ်ယောက်က ကောင်တာမှာရပ်နေသောဝူကျိုက်လင်းကိုလက်ယက်ခေါ်လိုက်သည်။

ဝူကျိုက်လင်က သူလုပ်နေသည့်အရာကိုချထားပြီး ဆိုင်ကဝန်ထမ်းတစ်ယောက်ကို ပိုက်ဆံလာသိမ်းခိုင်းလိုက်ကာ လူအုပ်၏အလယ်ကိုလျှောက်လာခဲ့လိုက်သည်။

"ရှောင်ဝူ ဒီပန်းချီကားကိုရောင်းမှာလား"

လူအိုကြီးက လိုရင်းကိုတန်းသွားလိုက်ပြီး လေကုန်မခံခဲ့ပေ။အမှန်တွင် သူ ဝူကျိုက်လင်ကိုလေကုန်မခံခဲ့သည်မှာ ရက်အတော်ကြာနေပြီဖြစ်သော်လည်း အဖြေကအမြဲတမ်း 'ဟင့်အင်း'ပဲဖြစ်နေခဲ့သည်။

ဤတစ်ခေါက်လည်း အတူတူပါပင်။

"ဦးလေးဝမ် ဦးလေးလည်း ကျွန်တော်တို့ဆိုင်ရဲ့စည်းမျဥ်းတွေကိုသိပါတယ်...ပြထားတဲ့ပန်းချီကားတွေကရောင်းဖို့မဟုတ်ဘူး"

ထို့အဖြေကို လူအိုကြီးကမျှော်လင့်ထားပြီးသားဖြစ်သည်။သူကစိတ်ပျက်လက်ပျက်သက်ပြင်းချကာ သူ့အကြည့်ကိုမင်ပန်းချီဆီပြန်ပို့လိုက်သည်။

ဤတစ်ကြိမ်မှာ ပန်းချီကိုကြည့်နေသည့်နောက်တစ်ယောက်က ထပြောလေ၏။

"ရှောင်ဝူ မရောင်းရင်လည်းရပါတယ်...ဒီပန်းချီကားရဲ့ဖန်တီးရှင်ကိုတော့ပြောပြလို့ရတယ်မလား...ငါတို့လည်း ဒီပန်းချီဆရာရဲ့လက်ရာတွေကိုတခြားလမ်းကြောင်းတွေကနေရနိုင်မလားကြည့်လို့ရတာပေါ့"

သူတို့ ရက်အတော်ကြာအောင် ဤပန်းချီကားကိုလာကြည့်နေခြင်းမှာ ဤပန်းချီကားကိုတကယ်ကြိုက်၍ဖြစ်သည်။ပန်းချီဆရာက ဘယ်သူလဲဆိုသည်ကို သူတို့သိလျှင် ထိုပန်းချီဆရာ၏တခြားလက်ရာများကိုဝယ်ပြီး ဤပန်းချီကားကိုမဝယ်လိုက်နိုင်သည့် သူတို့၏နောင်တများကို ဖြေသိမ့်နိုင်ကောင်းလေသည်။

ဝူကျိုက်လင်အတွက်မူ သူဆက်ပြီးဖုံးကွယ်နေတော့မှာမဟုတ်ပေ။ယခု သူကသူ့ဂျူနီယာညီလေး၏နာမည်ကို ကြော်ငြာချင်နေပြီး သူ့ဂျူနီယာညီလေး၏အကြောင်းကို လူအများပိုပြီးသိလာအောင်လုပ်ချင်နေသည်။

"ဒါက ကျွန်တော့်ဂျူနီယာညီလေးရဲ့ပန်းချီ"

ဝူကျိုက်လင်ကပြောလိုက်သည်။

"သူ့ရဲ့အရင်ပန်းချီကားတွေကို ဦးလေးတို့မြင်ဖူးကြမှာပါ...အိပ်မက်ဖလားရွှေတံဆိပ်ဆုရှင်'အလင်းရောင်'က ကျွန်တော့်ဂျူနီယာညီလေးဆွဲထားတာ"

ဝူကျိုက်လင်က ယခုလို ပြောလိုက်ပြီးနောက် ရှိနေသည့်လူတိုင်းအံ့ဩမှင်သက်သွားကြသည်။

သူတို့စိတ်ထဲမှာ မရေမတွက်နိုင်သောဖြစ်နိုင်ခြေများကိုတွေးခဲ့ကြပေမဲ့ အိပ်မက်ဖလား၏ရွှေတံဆိပ်ဆုရှင်ဖြစ်လိမ့်မည်ဟု သူတို့လုံးဝမမျှော်လင့်ထားကြပေ။မည်သို့ပင်ဖြစ်စေ အိပ်မက်ဖလား၏ရွှေတံဆိပ်ဆုရှင်'အလင်းရောင်'က အရောင်အသွေးစုံလင်သောဆီဆေးပန်းချီကားတစ်ချပ်ဖြစ်ပြီး သူတို့ရှေ့ကပန်းချီကားက ထင်ရှားသောအနုပညာအမြင်နှင့် မင်ပန်းချီတစ်ချပ်ဖြစ်လေသည်။နှစ်ခုက အလွန်ကိုမှကွာခြား၏။မည်သို့တစ်ယောက်တည်းဆီကဖြစ်နိုင်ပါမည်နည်း။

သို့ပေမဲ့ အမှန်တွင် ပန်းချီကားနှစ်ချပ်လုံးက လူတစ်ယောက်တည်းဆီမှဖြစ်လေသည်။

"ရှောင်ဝူ မင်းငါတို့ကို အရူးလုပ်နေတာတော့မဟုတ်ပါဘူးနော်"

သူတို့ထဲက တစ်ယောက်က သူ၏သံသယကိုထုတ်ပြောလိုက်သည်။

ဝူကျိုက်လင်က ခေါင်းခါလိုက်သည်။

"ကျွန်တော်က ဦးလေးတို့ကိုဘာလို့အရူးလုပ်ရမှာလဲ...အမှန်တော့ ကျွန်တော် ဂျူနီယာညီလေးရဲ့ဆီဆေးပန်းချီကို ကျွန်တော့်ဆရာကသင်ပေးထားတာ...ပြီးတော့ သူ့ရဲ့ရိုးရာတရုတ်ပန်းချီကလည်းလူကြီးမင်းစွန်းကသင်ပေးထားတာ"

"လူကြီးမင်းစွန်း"ဟူသောစကားလုံးလေးလုံးက မိုးချူန်းသံလိုပါပင်။

လူကြီးမင်းစွန်းက နာမည်ကြီး ရိုးရာတရုတ်ပန်းချီပညာရှင်တစ်ယောက်ဖြစ်သည်။သူ၏တရုတ်ပန်းချီက အထွတ်အထိပ်ကိုရောက်နေပြီဖြစ်သည်။အကယ်၍ ဝူကျိုက်လင်၏ဂျူနီယာညီလေးက အမှန်တကယ်လူကြီးမင်းစွန်း၏လက်အောက်မှာ သင်ယူနေပါက သူ့မှာဤအဆင့်ရှိနေခြင်းကနားလည်၍ရလေသည်။

ဆရာကောင်းတပည့်ပန်းကောင်းပန်တဲ့...တကယ်ဆရာကောင်းတပည့်ပန်းကောင်းပန်တာပဲ...

ဝူကျိုက်လင်က သူတို့မျက်နှာများပေါ်ရှိရှော့ရနေသောအမူအရာများကိုကြည့်ပြီး စိတ်ထဲမှာပြောလိုက်သည်။ဒါတောင် ဒီပန်းချီကားက ကျွန်တော့်ဂျူနီယာညီလေးချန်လီ လူကြီးမင်းစွန်းရဲ့တပည့်မဖြစ်ခင်ကဆွဲထားတဲ့အကြောင်းမပြောရသေးဘူးနော်...အဲဒါကိုသာကြားရင် ခင်ဗျားတို့အမူအရာတွေဘယ်လိုဖြစ်ကုန်မလဲသိချင်ပါရဲ့...

"ရှောင်ဝူ မင်းရဲ့ဂျူနီယာညီလေးနာမည်ကဘယ်သူလဲ...ငါတို့ ဘယ်အချိန်လောက်သူ့ဆီသွားလည်ရင်အဆင်ပြေမလဲ"

ခုနက ဝူကျိုက်လင်ကိုလှမ်းခေါ်ခဲ့သောလူအိုကြီးကပြောလိုက်သည်။

"ကျွန်တော့်ရဲ့ဂျူနီယာညီလေးက ချန်လီလို့ခေါ်ပါတယ်...ဒါပေမဲ့သူကသူစိမ်းတွေနဲ့တွေ့ရတာကိုမကြိုက်ဘူး...ကျွန်တော်ဒီကနေပဲသူ့အစားတောင်းပန်ပါတယ်ဗျ"

ဝူကျိုက်လင်၏စကားဆုံးချိန်မှာ သူ့မေးခွန်းကအတန်ငယ်ရုတ်ချည်းနိုင်သွားမှန်း လူအိုကြီးသိလိုက်သည်။အိမ်မက်ဖလားအထူးသတင်းစားရှင်းလင်းပွဲမှာ လက်ရေးလှနှင့်ပန်းချီအသင်းဥက္ကဋ္ဌကျောက်လီယိုက "အလင်းရောင်"၏ဖန်တီးသူက ငယ်စဥ်ကတည်းက အော်တစ်ဇင်ရောဂါကိုခံစားခဲ့ရကြောင်း ပြောခဲ့သည်။

အော်တစ်ဇင်ရှိသူများက သူစိမ်းများနှင့်အဆက်အဆံမလုပ်လိုသည်မှာသဘာဝဖြစ်ပေသည်။ခုနက သူ့မေးခွန်းက တကယ်ကို အတော်လေးတဇွတ်ထိုးနိုင်သွားသည်။

သို့ရာတွင် လူအိုကြီး စိတ်ထဲမှာသက်ပြင်းမချဘဲမနေနိုင်ပါချေ။အဟုတ်ကိုပင်၊ဘုရားသခင်းက တံခါးတစ်ချပ်ကိုပိတ်ထားချိန်မှာ ပြတင်းပေါက်တစ်ခုကိုဖွင့်ထားပေးလိမ့်မည်ဖြစ်သည်။တစ်ခုသာ၊ဘုရားသခင်ချန်လီအတွက်ဖွင့်ပေးထားသောပြတင်းပေါက်က သာမန်ပြတင်းပေါက်မဟုတ်ဘဲ မြင်ကွင်းကျယ်လသာပေါက်တစ်ခုဖြစ်နေခြင်းပင်။

"ငါရိုင်းပျသွားမိတယ်"

လူအိုကြီးက ထိုသို့ပြောလိုက်ပေမဲ့ သူ့စိတ်ထဲမှာချန်လီ၏နာမည်ကို စွဲစွဲမြဲမြဲမမှတ်ထားလိုက်ပြီး ပြန်ရောက်လျှင် တစ်ဖက်လူကို ချန်လီ၏ပန်းချီကာများအားလုံးရှိသည့်နေရာကိုမေး၍ တစ်ချပ်လောက်စုဆောင်းရမည်ဟုတေးထားလိုက်သည်။

ကိုယ့်ကိုယ်ပိုင်ပျော်ရွှင်မှုအတွက် စုဆောင်းသည်ဖြစ်စေ၊ရင်းနှီးမြုပ်နှံ့မှုတစ်ခုအနေဖြင့်စုဆောင်းသည်ဖြစ်စေ တကယ်ကိုကောင်းသောရွေးချယ်မှုဖြစ်လိမ့်မည်ပင်။ချန်လီ၏ပန်းချီကားများက တစ်နေ့မှာပိုပိုပြီးနာမည်ကြီးလာပြီး တောက်ပသောအနာဂတ်တစ်ခုရှိလိမ့်မည်ဟုသူယုံကြည်သည်။

"ဦးလေးဝမ် စိတ်မပျက်ပါနဲ့ဗျ...ဒီတစ်ခေါက် ကျွန်တော်ဆရာကိုဂျူနီယာညီလေးရဲ့လက်ရာတွေကို တကူးတကယူလာခိုင်းထားတယ်...သုံးလတစ်ကြိမ် ပန်းချီကားတစ်ချပ်စီပြသထားမှာပါ...ဦးလေးစိတ်ဝင်စားရင် အဲဒီအခါကျလာကြည့်လို့ရပါတယ်"

"ရှောင်ဝူ မင်းကရက်စက်လှပါလား"

တစ်စုံတစ်ယောက်က ဖြတ်ပြောလိုက်၏။

"ငါတို့မြင်သာမြင်မကြင်ရဘဝမှာနေခိုင်းမလို့တော့မဟုတ်ပါဘူးနော်...ဒါက ငါတို့အတွက် ညှင်းပမ်းမှုပဲဆိုတာမင်းမသိဘူးလား"

ဝူကျိုက်လင်က ရယ်ရယ်မောမောနှင့်ဆိုလိုက်သည်။

"မတရားစွပ်စွဲခံရတာပါဗျာ...ဒါက ကျွန်တော်လုပ်နိုင်သမျှမိုင်ကုန်ပဲ...ဦးလေးတို့ မကျေနပ်ရင် ကျွန်တော့်မှာဖြုတ်ချထားရုံပဲရှိတယ်"

ခုနကစကားဆိုသူက အလျင်အမြန်လက်ခါလိုက်လေသည်။

"အဲလိုတော့မလုပ်ပါနဲ့...ငါတို့ လူကြီးမင်းချန်လီရဲ့ပန်းချီကားတွေကိုမစုဆောင်းနိုင်မှအတူတူ မင်းနေရာကိူလာပြီး မျက်လုံးအဟာရဖြည့်ရတာလည်းအဆင်ပြေပါတယ်"

တခြားသူများကလည်း ချက်ချင်းသံယောင်လိုက်ကြသည်။

"ဟုတ်တယ်...ဟုတ်တယ်"

"ထားလိုက်ပါ...ဒီအတိုင်းထားလိုက်ပါ...လာမဲ့လတွေမှာ မင်းရဲ့ဆိုင်ကိုလာပြီး ဒီပန်းချီကားတွေကိုရေတွက်ရင်း အသက်ဆက်ရမှာလေ...မင်းကဖြုတ်ချလိုက်ရင် ငါတို့ဘယ်လိုလုပ်ရမလဲ"

ဤသို့ဖြင့် အမှတ်တမဲ့စကားဝိုင်းတစ်ခုထဲမှာ ဝူကျိုက်လင်က ချန်လီ၏နာမည်နှင့် နှလုံးသားစေရာ၏အနာဂတ်အစီအစဥ်များကိုထုတ်ဖော်ပြောကြားလိုက်တော့သည်။

ထို့နေ့ပြီးသည့်နောက်မှာ ချန်လီနာမည်က တရုတ်ပန်းချီလောကထဲမှာနာမည်ကျော်ကြားလာခဲ့သည်။လူများစွာက ဘာဖြစ်နေမှန်းပင်နားမလည်ကြပေ။သူတို့နားလည်သွားသည့်အခါ သူတို့လည်း ရုတ်ရုတ်သဲသဲဖြစ်သွားကြသည်။

ဤသက်ရောက်မှုက အိမ်မက်ဖလားအပေါ်ကို လုံးလုံးလျားလျားမူတည်နေသည်။

အိမ်မက်ဖလားမှာ ချန်လီ၏လက်ရာ"အလင်းရောင်"က တုံ့ပြန်မှု အကြီးကြီးကိုဖြစ်စေခဲ့သည်။ ယခုအချိန်ထိပင် နှစ်ဝက်ခန့်နီးနီးရှိပြီဖြစ်သော်လည်း "အလင်းရောင်အပေါ်တုံ့ပြန်မှုကပဲ့တင်ထပ်နေဆဲဖြစ်သည်။အမျိုးသားပန်းချီပြတိုက်သို့သွားကာ "အလင်းရောင်"ကိုကြည့်ရှုခဲ့သူတိုင်း "အလင်းရောင်"ပန်းချီကားကြောင့် တုန်လှုပ်နေကြဆဲဖြစ်ပေလိမ့်မည်။အမှောင်ထုထဲမှာနစ်မြုပ်နေကြသူများစွာသည်လည်း "အလင်းရောင်"ကိုမြင်ပြီးနောက်အမှောင်ထုထဲကနေတဖြည်းဖြည်းထွက်လာနိုင်ကြသည်။

"အလင်းရောင်"၏ဖန်တီးသူက အမြဲတမ်းပန်းချီလောကထဲမှာ လူပြောအများဆုံးခေါင်းစဥ်တစ်ခုဖြစ်နေခဲ့သည်။လူများစွာက "အလင်းရောင်"၏ဖန်တီးသူကမည်သူလဲဆိုသည်ကို ခန့်မှန်းနေကြသည်။

သို့ပေမဲ့ယခု အနှီဖန်တီးသူကပေါ်လာသည်။အနှီဖန်တီးသူ၏ရုပ်ရည်သွင်ပြင်ကမည်သို့မည်ပုံဖြစ်သည်ကို သူတို့မသိသော်လည်း "ချန်လီ"ဟူသောစကားလုံးနှစ်လုံးကပင် လူအများကို ရူးသွပ်စေ၊မနာလိုအားကျစေနိုင်လေသည်။

"အလင်းရောင်"၏ဖန်တီးသူကို ချန်လီဟုခေါ်သည်။သူက ကျူးကောယွီ၏တပည့်ဖြစ်သည်။အများက ဤသည်ကို အိပ်မက်ဖလားအတွင်းမှာသိရှိခဲ့ပြီးပြီဖြစ်သည်။သို့ပေမဲ့ ရှော့ရစရာကောင်းသည်က ဤချန်လီဆိုသည့်လူက ရိုးရာတရုတ်ပန်းချီပညာ၏ဆရာတစ်ဆူဖြစ်သော စွန်းလောင်၏တပည့်လည်းဖြစ်နေသည်။

ဤအထာက်အထားနှစ်ခုတည်းကတင် ချန်လီ၏နာမည်ကိုပန်းချီလောကထဲမှာ နာမည်ကြီးအောင်လုပ်ရန်လုံလောက်နေပြီဖြစ်သည်။ချန်လီကိုယ်တိုင်က အံ့ဖွယ်လက်ရာတစ်ခုဖြစ်သော "အလင်းရောင်"၏ဖန်တီးသူဖြစ်နေသည့်အခါမှာပြောဖွယ်ရာပင်မရှိတော့ပေ။

ရုတ်ချည်းဆိုသလိုပဲ ချန်လီက ပန်းချီလောကထဲမှာရေပန်းအစားဆုံးပုဂ္ဂိုလ်တစ်ယောက်ဖြစ်လာခဲ့သည်။သူ့ကို မမြင်ဖူးလျှင်ပင် ချန်လီဆိုသည့် နာမည်ကိုကြားရုံနှင့် စိတ်လှုပ်ရှားမှုကိုမထိန်းချုပ်နိုင်တော့သည်အထိပဲဖြစ်လေသည်။

အချိန်တိုလေးအတွင်းမှာ ချန်လီ၏ဂုဏ်သတင်းက လျင်မြန်စွာမြင့်တက်လာပြီး သူ့ပန်းချီကားများ၏တန်ဖိုးက စျေးကွက်ထဲမှာ စျေးကွက်ထဲမှာ တဟုန်ထိုးထိုးတက်လာသည်။

မှန်ပေသည်၊ချီးမွှမ်းဩဘာသံများကြားမှာ ချဥ်စူစူးစကားအနည်းငယ်လည်းရှိနေပေသည်။အထူးသဖြင့် ထိုဝေဖန်မှတ်ချက်များက ချန်လီက"အလင်းရောင်"ပန်းချီကားတစ်ခုတည်းနှင့်အများအမြင်မှာပေါ်လာသည်နှင့်ပတ်သက်၍ အငြင်းပွားကြခြင်းဖြစ်သည်။တခြားပန်းချီကားများက မည်သို့ မည်ပုံရှိသည်ကိုမသိရသဖြင့် သူ့ကိုဤမျှစန်းတင်နေစရာမလိုဟု သူတို့ကဆိုကြသည်။

ထိုသို့သောစကားသံများက တဖြည်းဖြည်း ပန်းချီလောကထဲမှာပျံ့နှံ့လာသည်။သို့ပေမဲ့သူတို့ကမကြာခင်မှာပဲ နှလုံးသားစေရာမှာပြသထားသည့်ချန်လီ၏ပန်းချီကားများ၏မျက်နှာဖြတ်ရိုက်ခြင်းခံလိုက်ရသည်။

ထိုမင်ပန်းချီက လူများစွာကိုရူးသွပ်အောင်လုပ်ခဲ့သည်။ထိုမင်ပန်းချီကိုဖြုတ်ချပြီးနောက်မှာ နှလုံးသားစေရာက ချန်လီ၏ဆီဆေးပန်းချီနောက်တစ်ချပ်ကိုချိတ်လိုက်သည်။

ဤဆီဆေးပန်းချီက နည်းစနစ်ပိုင်းဆိုင်ရာနှင့်အရောင်အစပ်အဟပ်ပိုင်းဆိုင်ရာမှာ "အလင်းရောင်"နှင့်ယှဥ်လျှင် များစွာတိုးတက်လာပြီး အံ့ဩတုန်လှုပ်စေသည့်စွမ်းရည်ကရှိနေဆဲဖြစ်သည်။မည်သူမည်ဝါပဲဖြစ်ပါစေ၊ပန်းချီမှာမည်မျှကျွမ်းကျင်မှုရှိသည့်သူပဲဖြစ်ပါစေ သူတို့သည် မြင်မြင်ချင်းမှာပဲ ချန်လီ၏ပန်းချီကားများ၏ဆွဲဆောင်ခြင်းခံလိုက်ရပေလိမ့်မည်။ပြီးလျှင် သူတို့၏အတွင်းကမ္ဘာများ ရေဖြန်းမင်္ဂလာပြုခြင်းခံလိုက်ရမည်ဖြစ်သည်။

ချန်လီ၏ပန်းချီကားများက စိတ်ဝိညာဥ်ရှိပုံရပြီး ပန်းချီကားများထဲက စိတ်ဝိညာဥ်များက လူ့သဘာဝ၏တချို့သောရှူထောင့်များကို အမြဲတစေ ပဲတင့်ထပ်နိုင်ပြီး သူ့ပန်းချီကားများကိုကြည့်မိသူတိုင်းကို ပန်းချီကားကဖော်ပြချင်သည့်ကမ္ဘာကြီးထဲကို မသိလိုက်ပါဘဲနှစ်မြုပ်သွားစေနိုင်လေသည်။　

ကောင်းမွန်ပြောင်မြောက်သောပန်းချီကားတစ်ချပ်က တိုက်ဆိုင်မှုဟုဆို၍ရနိုင်ပြီး ကြက်ကန်းဆန်အိုးတိုးသည်ဟုပြောရသည်။သို့ပေမဲ့ ပန်းချီကားနှစ်ချပ်၊သုံးချပ်က အကုန်လုံးပထမဆုံးပန်းချီကား၏အဆင့်အထက်မှာရှိနေသည်က ချန်လီမှာ အမှန်တကယ်ဤစွမ်းရည်ရှိပြီး သူကတကယ်ကိုပန်းချီမှာပါရမီပါသည်ဟုဆိုရမှာဖြစ်သည်။　

မနာလိုစကားပြောသူက မျက်နှာဖြတ်ရိုက်ခြင်းခံလိုက်ရပြီး တိတ်တိတ်လေး ခေါင်းပုသွားရုံတတ်နိုင်လေသည်။သို့ပေမဲ့ သူတို့က လူမသိသူမသိပဲ ချန်လီ၏လက်ရာများအကြောင်းစုံစမ်းရေးအတန်းထဲမှာ မသိမသာပါဝင်လာကြ၏။

တစ်လသာရှိသေးသော်လည်း ချန်လီ၏ပန်းချီကားများက သန်းဆယ်နှင့်ချီ၍စျေးပြိုင်ပေးခြင်းခံနေရပြီဖြစ်သည်။သို့ပေမဲ့ ချန်လီ၏ပန်းချီကားများကို သွားကြည့်န်ိုင်သည့်နေရာဖြစ်သောနှလုံးသားစေရာမှလွဲ၍ မည်သူ့လက်ထဲမှာမှ ချန်လီ၏ပန်းချီကားများရှိမနေပါချေ။

<< >>

💘

Prev Next