MM Story Teller

Chapter 63

Viewers 4k

🌌Chapter - 63

"ခဏလောက်စောင့်ပါဦး..."

လုမော့က ကတ်ကို လက်ညှိုးနှင့်ဖိကာ သူ့ဘက်သို့ ဖြေးဖြေးချင်း ပြန်ဆွဲယူလိုက်ပြီး အဓိပ္ပါယ်အပြည့်နှင့်ပြောလိုက်သည်။

"ကျွန်တော့်ရဲ့ လုပ်နိုင်စွမ်းကိုတော့ သက်သေပြပြီးသွားပြီ...ဒါပေမဲ့ ခင်ဗျားက တကယ့်လုမော့အစစ်ဆိုတာ ကျွန်တော့်ကို သက်သေမပြရသေးဘူးလေ..."

မှေးမှိန်နေသည့် အလင်းရောင်ထဲ၌ သူ့လက်ထဲတွင် အောင်နိုင်ခြင်းကတ်ကို ကိုင်ထားသည့်အလား ထိုင်ခုံပေါ်တွင် ထိုင်နေခဲ့သည်။

"..."

လုမော့အတုက ဒေါသတကြီးဖြင့် ဖြေရှင်းချက်ထုတ်လိုက်သည်။

"မင်း...ငါကတော့ မင်းကိုသူငယ်ချင်းလို့ သတ်မှတ်ထားလို့ စိတ်ရင်းနဲ့ဆက်ဆံပေးနေတာကို အခု မင်းကငါ့ကို သံသယဝင်နေတာလား..."

သူ့အင်္ကျီလက်အား ဆတ်ကနဲတစ်ချက်ခါကာ ထွက်သွားတော့မည့်အလား ချက်ချင်းထရပ်လိုက်သည်။

"လုပ်ငန်းကို ဆက်လုပ်နေစရာ မလိုတော့ဘူး... မင်းမှာ စိတ်ရင်းမရှိဘူး...မီနော့ခီ သွားကြမယ်..."

"မဟုတ်ဘူး မဟုတ်ဘူး မဟုတ်ဘူး..."

မီနော့ခီက သူ့အပေါင်းအဖော်၏လက်ကို လျင်မြန်စွာ ဆွဲလိုက်ကာ တောင်းပန်သည့် အပြုံးလေးတစ်ခုနှင့် ပြောလာသည်။

"ပိုင်လျှိုက အဲ့လိုဆိုလိုတာမဟုတ်ပါဘူး...သူက တည့်တိုးပြောတတ်လို့ပါ...အရှင်လုမော့ကပဲ ကျွန်တော့်မျက်နှာကို ထောက်ထားပြီး ဒီတစ်ကြိမ် ခွင့်လွှတ်ပေးလိုက်ပါ..."

ထိုသို့ပြောပြီးနောက် သူက လုမော့ကို တစ်ခုခုပြောရန် မျက်လုံးနှင့် အထပ်ထပ်အခါခါ အချက်ပြလိုက်သည်။

ဤနည်းလမ်းကို "တစ်ယောက်က လူကောင်းနေရာဟန်ဆောင်ချိန် အခြားတစ်ယောက်က လူဆိုးနေရာဟန်ဆောင်သည်"ဟုခေါ်ပေသည်။ ၎င်းက သူတို့၏လှည့်ကွက်ဟောင်းကြီးပင် ဖြစ်သည်။

ထိုသို့ဟန်ဆောင်ပြဇာတ်ကပြီးနောက်တွင် တစ်ဖက်သူက သံသယများ လွင့်ပြယ်သွားရုံသာမက အပြစ်ရှိစိတ်ကြောင့် သူတို့အပေါ်၌ ပို၍ယုံကြည်လာမည်ဟု သေချာပေသည်။ မျှော်လင့်ထားသည့်အတိုင်းပင် ယခုတစ်ကြိမ်တွင်လည်း အကွက်ဟောင်းကြီးက အလုပ်ဖြစ်သွားသည်။

"ကျွန်တော်က အဲ့လိုဆိုလိုတာ မဟုတ်ပါဘူး...ကျွန်တော်က ဘယ်လိုလုပ်ပြီး အရှင့်ကို သံသယဝင်ရမှာလဲ..."

လုမော့ ပင့်သက်ရှိုက်လိုက်ပြီး အထိတ်တလန့်ဖြစ်သွားသည့် အသံအနေထားဖြင့် ပြောလိုကိသည်။

"အရှင်က အရှင်လုမော့အစစ်ပါပဲ...အဲ့ဒါနဲ့ပတ်သတ်ပြီး ကျွန်တော် သံသယမရှိပါဘူး...ဒီတိုင်း..."

သူ သက်ပြင်းချကာ ပြောလိုက်သည်။

"အရှင်မသိလို့ပါ ကျွန်တော်က အရှင်လုမော့ကို လေးစားသဘောကျပြီး အမြဲတမ်း အရှင့်ရဲ့ စတိုင်လ်ကို မြင်ချင်နေခဲ့တာပါ..."

သူ့လက်နှစ်ဖက်ကို အတူတူဆုပ်ကိုင်ပြီး ခေါင်းငုံ့လိုက်သည်။

"ကျေးဇူးပြုပြီး ကျွန်တော့်ကို အရှင့်ရဲ့ခမ်းနားထည်ဝါလှမှုကို မြင်ခွင့်ရတဲ့ မျက်မြင်သက်သေဖြစ်ခွင့်ပေးပါ..."

ကျေးဇူးပြုပြီး သင်ပေးပါဦး...အတိုဆုံးအချိန်နဲ့ အမှိုက်ဆန်မှုတန်ဖိုးအမြင့်ဆုံးကို ဘယ်လိုစုပြီး ယုတ်မာတဲ့နည်းလမ်းနဲ့ တစ်ခဏအတွင်း ချမ်းသာပြီး ဘဝ အထွတ်ထိပ်ရောက်အောင် ဘယ်လိုလုပ်ရမလဲဆိုတာ ကျေးဇူးပြုပြီး ငါ့ကိုသင်ပေးလိုက်စမ်းပါ...

သူ့သဘောထားက ဟန်ဆောင်နေခြင်းမဟုတ်၍ ချက်ချင်းပင် အမျိုးသားဇာ့ဂ်နှစ်ယောက်၏ ယုံကြည်မှုကို ရလိုက်သည်။

"ဟမ့်...အဲ့လိုကမှ စစ်မှန်သေးတယ်..."

လုမော့အတုက မီနော့ခီ၏လက်ကိုတွန်းကာ ပြန်ထိုင်လိုက်သည်။ သူက ဝိုင်တစ်ခွက်ကို သောက်လိုက်ပြီးနောက် မာနတခွဲသားနှင့် ပြောလိုက်သည်။

"မင်းက တွေ့ဖို့ အရမ်းစိတ်အားထက်သန်နေမှတော့ မျိုးရိုးမြင့်ဇာ့ဂ်တွေ တွေ့ရင်တောင် ထိတ်လန့်သွားရလောက်တဲ့စတိုင်လ်ကို ငါ ပြပေးရမှာပေါ့..."

လုမော့၏မျက်လုံးများက မျှော်လင့်တကြီးဖြင့် ပြူးကျယ်လာသည်။

လာပြီ...နောက်ဆုံးတော့ ရောက်လာပြီကွ...

လုမော့အတုက လက်ဖျောက်တီးလိုက်ရာ အစောပိုင်းလေးက သူတို့အား တံခါးဖွင့်ပေးလိုက်သည့် အနီးနားရှိ အမျိုးသမီးဇာ့ဂ်က ချက်ချင်းချဥ်းကပ်လာသည်။

လုမော့ ဤအမျိုးသမီးဇာ့ဂ်အား မှတ်မိလိုက်သည်။ သူ့တွင် ရှက်ကြောက်တတ်သည့် အမူအရာရှိ၍ ဤလောင်းကစားရုံတွင် အလွယ်တကူ မှတ်မိနိုင်ပေသည်။

အမျိုးသမီးဇာ့ဂ်၏လက်ထဲတွင် ဝိုင်နီတစ်ပုလင်းကို ကိုင်ထားပြီး ကျွမ်းကျင်စွာဖြင့် ဖော့အဆို့ကို ဖယ်လိုက်ကာ ဖန်ခွက်ထဲသို့ ဝိုင်လောင်းထည့်ရန် ပြင်လိုက်သည်။

အနီရောင်အရည်များကို ဖန်ခွက်တွင်း ထည့်တော့မည့်အချိန်တွင်...

ကျယ်လောင်သည့် 'ချွတ်' ဟူသည့်အသံနှင့်အတူ လက်တစ်ဖက်က သူ့လည်ပင်းအားဆုပ်ကာ ဖန်ခွက်ပေါ်သို့ အတင်းအကျပ် ဖိချလိုက်သည်။

"ပါးစပ်ဖွင့်လိုက်..."

အမျိုးသားဇာ့ဂ်က အေးစက်စွာ အမိန့်ပေးလိုက်သည်။

"ပြီးရင် မင်းရဲ့အစွယ်တွေကို ထုတ်လိုက်..."

အမျိုးသမီးဇာ့ဂ်ဂ်၏မျက်နှာက နာကျင်မှုဖြင့် တွန့်လိမ်သွားသော်လည်း နာနာခံခံနှင့် ပါးစပ်ဖွင့်လိုက်ကာ သူ၏ချွန်ထက်နေသာသွားကို ဖန်ခွက်နှုတ်ခမ်းဝသို့ ဖိလိုက်သည်။

အမျိုးသားဇာ့ဂ်က လက်ချောင်းကိုကွေးကာ အမျိုးသမီးဇာ့ဂ်လည်ပင်း၏ နေရာတစ်ခုကို တိတိကျကျ အားဖြင့်ဖိလိုက်ရာ အမျိုးသမီးဇာ့ဂ်က ညည်းညူလာခဲ့သည်။ တစ်ချိန်တည်းမှာပင် ဖောက်ထွင်းမြင်ရမတတ် အရည်နှစ်စက်က သူ့ထက်မြက်လှသည့်သွားမှ တဖြည်းဖြည်း စီးကျလာပြီး ဖန်ခွက်နှုတ်ခမ်းဝရှိ ဝိုင်နီများနှင့် ရောနှောသွားသည်။

လုမော့ မျက်ခုံးပင့်လိုက်သည်။

"ဘာလုပ်နေတာလဲ..."

အမျိုးသားဇာ့ဂ်က လက်ကိုဖြေလျော့လိုက်ရာ မျက်နှာဖြူဖျော့နေသည့် အမျိုးသမီးဇာ့ဂ်က မြေပေါ်သို့ အားနည်းစွာ ပုံလျက်သားကျသွားသည်။

"ပိုင်လျှို နာခံရိုကျိုးတယ်လို့ ထင်ရတဲ့ အမျိုးသမီးဇာ့ဂ်ဆီကနေ အရူးမလုပ်ခံနဲ့...သူက သွေးစွမ်းရည်ရှိတဲ့ 'ခြောက်ခြားဖွယ်မျိုးနွယ်စု' က အမျိုးသမီးဇာ့ဂ်တစ်ယောက်လေ..."

မီနော့ခီက ရှင်းပြလိုက်သည်။

လုမော့ : "..."

စနစ်က အချိန်ကိုက် ထပ်ပြောလိုက်သည်။

['ခြောက်ခြားဖွယ်မျိုးနွယ်စု'က စစ်ပွဲတွေမှာ အဆိပ်သုံးနိုင်တဲ့ ဇာ့ဂ်မျ်ိုးစိတ်တစ်ခုပဲ...ဘာက အထူးခြားဆုံးလဲဆိုတော့ ဒီမျိုးနွယ်စုက အမျိုးသမီးဇာ့ဂ်တွေက အပြင်းဆုံးအဆိပ််ကို ထုတ်ပေးနိုင်တယ်...

သမိုင်းမှာ မှတ်တမ်းတင်ထားတာက 'ခြောက်ခြားဖွယ်မျိုးနွယ်စု' က သူတို့ရဲ့ သေစေနိုင်တဲ့အဆိပ်နဲ့ ဇာ့ဂ်မျိုးစိတ်အားလုံးကို တစ်ကြိမ် အုပ်ချုပ်ဖူးတယ်တဲ့...အဲ့အချိန်က ထိတ်လန့်ကြောက်ရွံ့စရာအကောင်းဆုံးနဲ့ အမှောင်မိုက်ဆုံးကာလတွေပဲ...ရှေးဟောင်းဇာ့ဂ်မှတ်တမ်းထဲမှာ သဘာဝရန်သူဖြစ်တဲ့ အနက်ရောင်ဇာ့ဂ်သေးသေးလေးတွေဆီက အဆိပ်ကိုလည်း ဇာ့ဂ်တွေက ကြောက်ကြသေးတယ်... အဲ့လက်ကျန်ကြောက်စိတ်တွေနဲ့ ပေါင်းသွားတော့ 'ခြောက်ခြားဖွယ်မျိုးနွယ်စု' က နတ်ဆိုးကို ကိုယ်စားပြုတဲ့ မျိုးနွယ်စုတစ်ခုလိုဖြစ်သွားပြီး ဇာ့ဂ်မျိုးစိတ်တွေထဲမှာ အနိမ့်ကျဆုံးနဲ့ စက်ဆုပ်ဖွယ်အကောင်းဆုံး တည်ရှိမှုတစ်ခု ဖြစ်လာခဲ့တာပဲ...]

အဲ့လိုဖြစ်သွားတာကိုး...

လုမော့အတုက သေစေနိုင်သည့် အဆိပ်ရည်များရောနေသည့် ဝိုင်ခွက်အား ညင်သာစွာ လှုပ်ယမ်းနေကာ ပြောလိုက်သည်။

"ဒီမိန်းမက သွေးသန့် ခြောက်ခြားဖွယ်မျိုးနွယ် တစ်ယောက်မဟုတ်ပေမဲ့လည်း ဒီဝိုင်ခွက်ထဲက ပမာဏက A အဆင့်အမျိုးသမီးတစ်ယောက်ကို သတ်ဖို့တော့လုံလောက်

သေးတယ်..."

လုမော့ မျက်လုံးများ တောက်ပသွားသည်။

"အရှင်ဆိုလိုတာက..."

ချက်ချင်းလက်ငင်းပင် အမျိုးမျိုးသော မြင်ကွင်းများက သူ့စိတ်ထဲတွင် လှစ်ခနဲ ဖြတ်ပြေးသွားသည်။

မည်းမှောင်သောညတွင် ကောင်းကင်ယံ၌ မိုးခြိမ်းသံများညံပြီး လျှပ်စီးများက တဖျပ်ဖျပ်လတ်၍ ပျက်စီးနေသော ချောက်ကမ်းပါးစွန်းရှိ ရှေးဟောင်းရဲတိုက်ကို လင်းထိန်သွားစေသည်။

ကောင်းကင်၌ လျှပ်စီးလက်သွားသည့် အချိန်တိုင်း ရဲတိုက်ရှိ ပြတင်းပေါက်၌ ရောင်ပြန်ဟပ်နေသွားပြီး သွယ်လျပြီးရှည်လျားသည့်အရပ်နှင့် အန္တရာယ်ရှိပုံပေါက်သည့် ပုံရိပ်တစ်ခုအား ပေါ်လွင်သွားစေသည်။

ထိုပုံရိပ်က လက်မောင်းများဆန့်တန်းကာ ကောင်းကင်ကြီးကို မော့ကြည့်၍ အော်ဟစ်ရယ်မောလိုက်သည်။

"ကမ္ဘာကြီးကို ဖျက်ဆီးပစ်လိုက်စမ်း..."

"ဟား ဟား ဟား..."

"ဟား ဟား ဟား ဟား..."

လုမော့အတုက ဟက်ဟက်ပက်ပက် ရယ်မောလိုက်သည်။

"မှန်တယ်..."

သူက လဲကျနေသည့် အမျိုးသမီးဇာ့ဂ်၏အင်္ကျီအား လှမ်းဆွဲလိုက်သည်။ အဆုံးတွင် သူက သွေးသန့် 'ခြောက်ခြားဖွယ်မျိုးနွယ်ဝင်'တစ်ယောက် မဟုတ်၍ ထိုမျှများပြားလှသော အဆိပ်များထုတ်ရန် ဖိအားပေးခံလိုက်ရသည့်အခါ အသိစိတ်လွတ်လုနီးပါး ဖြစ်သွားသည်။ နောက်တစ်စက္ကန့်မှာပင် အမျိုးသားဇာ့ဂ်က ဝိုင်ခွက်ကို သူ့ပါးစပ်နား ဖိကပ်လိုက်ပြီး အတင်းအကျပ် ဖိအားပေး သောက်ခိုင်းလေသည်။

အရည်များက သူ့ပါးစပ်မှလျှံကျလာပြီး သွယ်လျသည့် လည်ပင်းတစ်လျှောက် စီးကျလာကာ သူ့အင်္ကျီကော်လံများ စိုရွှဲသွားသည်။

သူက ကမ်းစပ်တွင် သောင်တင်ပြီး ရုန်းကန်နေရသည့် ငါးတစ်ကောင်နှင့် တူလှပေသည်။

အရည်များ ကုန်သွားသည့်အခါ အမျိုးသားဇာ့ဂ်က ဖန်ခွက်ကို လွှင့်ပစ်လိုက်ပြီး ဂုဏ်ယူဝံ့ကြွားစွာ ပြောလိုက်သည်။

"ဒီအဆိပ်က သူ့အတွက်လည်း သာတော့မသာယာပါဘူး..."

သူ့လည်ပင်းသူ ဖမ်းဆုပ်ပြီး မြေပြင်တွင် လူးလွန့်နေသည့် အမျိုးသမီးဇာ့ဂ်အား သူတို့ကြည့်နေသည့်အခိုက် အမျိုးသားဇာ့ဂ်က ပိုင်လျှိုအား ဖျတ်ခနဲတစ်ချက် တိတ်တဆိတ် ကြည့်လိုက်သည်။

အနက်ရောင်ဆံပင်နှင့် အမျိုးသားက နေကာမျက်မှန်အားတပ်ထားပြီး မြင်နေရသည့် သူ့မျက်နှာအောက်တစ်ခြမ်းက အေးစက်ပြီး တင်းမာခက်ထန်နေသည်။ အဓိပ္ပါယ်မရှိသည့် ပျင်းရိဖွယ် ဟာသပြဇာတ်တစ်ခုကို ကြည့်နေရသည့်အလား သူ့ရှေ့မှ အရာအားလုံးကို ကြည့်နေပေသည်။

ထိုအခိုက် အမျိုးသားဇာ့ဂ်၏နှလုံးခုန်နှုန်းက စည်းချက်တစ်ချက် လွဲသွားပြီး မီနော့ခီကို သေချာကြည့်လိုက်သည်။

သူတို့နှစ်ယောက်လုံးက ကိုယ်ပိုင်စွမ်းရည်အပေါ်တွင်သာ အမှီပြုနေရသည့် အဆင့်နိမ့်အမျိုးသားဇာ့ဂ်များ ဖြစ်ကြပြီး အဆင့်မြင့်အမျိုးသမီးဇာ့ဂ်များကို မဆွဲဆောင်နိုင်ဘဲ ချမ်းသာခြင်းလည်းမရှိသောကြောင့် လိမ်လည်လှည့်ဖြားရသော လမ်းကြောင်းကိုသာ ရောက်သွားရပေသည်။

သူတို့က အဆင့်မြင့်အမျိုးသားဇာ့ဂ်များ အပါအဝင် အမျိုးသမီးအများအပြားကို လှည့်စားခဲ့ဖူးသော်လည်း ဤကဲ့သို့ အမျိုးသားဇာ့ဂ်တစ်ယောက်ကို ကြုံဖူးသည်မှာ ယခုက ပထမဆုံးပင်ဖြစ်သည်။

ထိုလူက အန္တရာယ်မရှိ အလွယ်တကူလှည့်စား၍ရပုံ ပေါ်သော်လည်း အချို့အချက်များကြောင့် ခန့်မှန်း၍မရသော ရောင်ဝါတစ်မျိုးကို ထုတ်လွှတ်နေပေသည်။

အနက်ရောင်ဆံပင်နှင့်အမျိုးသားဇာ့ဂ်က လက်ဆန့်ထုတ်လိုက်ကာ စားပွဲအား အသာအယာခေါက်လိုက်သည်။

"ဒါအကုန်ပဲလား...ဒါက အရှင်ပြောတဲ့ ထိတ်လန့်ရလောက်တဲ့စတိုင်လ် ဆိုတာလား..."

"..."

ချက်ချင်းပင် ငွေ156 သန်း၏ သွေးဆောင်မှုက အမျိုးသားဇာ့ဂ်နှစ်ယာက်၏စိတ်တွင် ထပ်မံပြီး တစ်ကြိမ် ဖြတ်သွားခဲ့ပြန်သည်။

"သေချာပေါက် မဟုတ်ဘူးပေါ့..."

အမျိုးသားဇာ့ဂ်က အံကြိတ်လိုက်ပြီး ရက်စက်ကြမ်းကြုတ်စွာ ပြောလိုက်သည်။

"အရှင်လုမော့ရဲ့ လုပ်နိုင်စွမ်းက ဒါအကုန်ပဲလို့ မင်းထင်နေရင် အမှားကြီးမှားသွားပြီ..."

သူပြုံးကာ ပြောလိုက်သည်။

"ဒါကိုအကြိုပြတာလို့ သတ်မှတ်လိုက်...ငါမင်းကို လျှို့ဝှက်ချက်သေးသေးလေးတစ်ခုထဲ ပါခွင့်ပေးမယ်..."

"ဒီည ဒီလောင်းကစားရုံကြီးထဲမှာ ငါတို့ပြပွဲတစ်ခုရှိလိမ့်မယ်..."

"ပြပွဲရဲ့အဓိကအကြောင်းအရာကတော့...ဒီအမျိုးသမီးဇာ့ဂ်ကို ခွဲစိတ်လေ့လာပြီး သူ့အဆိပ်ဂလင်းတွေကို ထုတ်ပြီး နမူနာတစ်ခုလုပ်ဖို့ပဲ..."

"သေချာပေါက်…ဘာထုံဆေးမှ မသုံးဘဲပေါ့..."

မီနော့ခီ လုမော့အားကြည့်လိုက်သည်။

ဘယ်လိုလဲ...မင်း အခုကျေနပ်သွားပြီလား...

သို့သော်ငြား သူတို့ကိုအံ့အားသင့်သွားစေသည်မှာ ဤအမျိုးဇာ့ဂ်၏မျက်နှာတွင် 'လေးစား၊သဘောကျ၊ပျော်ရွှင်' သည့် အမူအရာတစ်ခုမှမပြဘဲ ထိုအစား ပို၍ပင် အေးစက်လာလေသည်။

"မင်းတို့က ငါ့ကိုတကယ် စိတ်ပျက်သွားစေတာပဲ..."

အမျိုးသားဇာ့ဂ်နှစ်ယောက်က သူတို့နားကိုပင် မယုံနိုင်ဘဲ ပြန်မေးခွန်းထုတ်လိုက်သည်။

"မင်း ဘာပြောလိုက်တာလဲ..."

"ငါပြောတာက...မင်းတို့က ငါ့ကို တကယ်စိတ်ပျက်စေတာပဲလို့..."

လုမော့ ဖြည်းညင်းစွာ မတ်တတ်ရပ်ကာ အထက်စီးဆန်စွာဖြင့် သူတို့အား အထင်တသေးကြည့်လျက် သရော်လိုက်သည်။

"ဆိုတော့ ဒါကိုမင်းတို့က ရက်စက်ကြမ်းကြုတ်တယ်လို့ ခေါ်တာပေါ့...ငါ့ကို ရယ်ရအောင်မလုပ်စမ်းပါနဲ့..."

"မင်းတို့ဘာသာမင်းတို့ သူ့ကိုကြောက်လန့်ပြီး အဆိပ်ဂလင်းကို ဖယ်ထုတ်ဖို့ ဖိအားပေးနေကြတာလေ....ငါ့မျက်လုံးထဲမှာတော့ မင်းတို့က လူရွှင်တော်တစ်အုပ်စုသာသာပဲ..."

မီနော့ခီက မယုံနိုင်စွာဖြင့် မျက်လုံးများ ပြူးကျယ်သွားသည်။

"မင်း မင်း...."

"အဆိပ်သုံးတာက ဘာမှားလို့လဲ..."

လုမော့ လက်ကို စားပွဲပေါ်တင်လိုက်ကာ အမျိုးသားဇာ့ဂ်အနီး ကိုယ်ကို ကိုင်းညွတ်လိုက်ပြီး ညင်သာ၍ အိပ်မက်ဆန်သော အသံဖြင့် ပြောလိုက်သည်။

"အဆိပ်နည်းနည်းလေးနဲ့တောင် A အဆင့်အမျိုးသမီးတစ်ယောက်ကို သတ်ပစ်နိုင်တယ်...အဲ့ထက် အံ့သြစရာကောင်းတာ ရှိသေးလို့လား .."

အမျိုးသားဇာ့ဂ်၏သူငယ်အိမ်များ တုန်ယင်သွားသည်။ အကြောက်တရားက သူ့တစ်ကိုယ်လုံးအားတုန်ယင်လာစေ၍ သသ အံကြိတ်လိုက်သည်။

"မင်း...ဒါက...တရားလွန်သွားပြီ..."

"တရားလွန်တယ်ပေါ့လေ..."

လုမော့ နှုတ်ခမ်းများကိုကွေးကာ သရော်လိုက်သည်။

"ဒါပေမဲ့ မင်းက လုမော့မလား...ဘယ်လိုလဲ ငါ့အမြင်ကို သဘောမတူဘူးလား..."

အမျိုးသားဇာ့ဂ်က ကြောက်ရွံ့တုန်လှုပ်သွားသည်။

ဇာ့ဂ်အဖွဲ့အစည်းတွင် ဘောင်မကျော်သင့်သော သို့မဟုတ် ချိုးဖောက်ခြင်းမပြုသင့်သော အများသဘာတူထားသည့်အရာများ ရှိပေသည်။ ဥပမာအားဖြင့် 'ခြောက်ခြားဖွယ်မျိုးနွယ်စု' က အကြွင်းမဲ့နတ်ဆိုးမျိုးနွယ်စုပင် ဖြစ်ပြီး သူတို့အား အမြစ်ပြတ်ချေမှုန်းသင့်ပေသည်။

သူတို့ကို ချီးမွမ်းတဲ့ဇာ့ဂ်က ဘယ်လိုလုပ်ရှိမှာလဲ…

အမျိုးသားဇာ့ဂ်က အော်ဂလီဆန်သွားပြီး သူ့အစာအိမ်အား တစ်ခုခုနှင့် မွှေနောက်နေသကဲ့သို့ အန်လုနီးပါးဖြစ်သွားသည်။ သူ သည်းမခံနိုင်စွာ ပြောလိုက်သည်။

"မင်း...မင်းက စိတ္တဇအရူးကောင်ပဲ..."

"ငါ့မျက်လုံးထဲမှာတော့ မင်းတို့က ဒီတိုင်း အသုံးမကျတဲ့သူတွေပဲ..."

လုမော့ ဆောင့်ကြောင့်ထိုင်ကာ အမျိုးသမီးဇာ့ဂ်အားကြည့်လိုက်သည်။

အမျိုးသမီးဇာ့ဂ်က ခက်ခက်ခဲခဲ အသက်ရှုနေလျက် နားစည်ထဲ တဝီဝီမြည်ကာ ပတ်ဝန်းကျင်မှ အရာအားလုံးက ဝေဝါးလာသည်။ သို့သော် ဖရိုဖရဲအခြေအနေကြားတွင် နက်ရှိုင်းလှသည့် အသံတစ်သံအားကြားလိုက်ရသည်။

"မင်းက တကယ့်အဖိုးထိုက်တန်တဲ့ ရတနာတစ်ခုပဲ..."

အမျိုးသမီးဇာ့ဂ်က ခန္ဓာကိုယ်ကိုကွေးလျက် မချိမဆံ့ဝေဒနာကို ကျိတ်မှိတ်သည်းခံလိုက်ပြီးနောက် ထိုစကားများကြားလိုက်ရခိုက်အချိန်တွင် သူ့နှလုံးသားထဲ၌ ဖုံးဝှက်ထားခဲ့ရသည့် အလွန်များပြားလှသော မကျေနပ်ချက်များက တဖြည်းဖြည်းထွက်ပေါ်လာခဲ့သည်။

မကျေနပ်ချက်များက တဟုန်ထိုးတက်လာပြီး အရာအားလုံးကို ဖောက်ထွက်သွားလျှက် မျက်ရည်များအဖြစ်သို့ ပြောင်းလဲသွားကာ သူ့မျက်ဝန်းများမှ စီးကျလာခဲ့သည်။

မျက်ဝန်းများကို ကျယ်ကျယ်ဖွင့်လိုက်ပြီး အမျိုးသား၏မျက်နှာကို မြင်ရရန် ခက်ခက်ခဲခဲ ကြိုးစားလိုက်သည်။

"ကျ...ကျွန်တော်က တကယ်ပဲ ကပ်ဆိုးတစ်ခု မဟုတ်ဘူးလားဟင်..."

သူ့အစ်ကိုကြီးကတောင် သူ့ကို တစ်ခါမှ ရတနာတစ်ခုဆိုပြီး မပြောခဲ့ဖူးဘူး…

"တကယ်ပေါ့..."

လူမော့ သူ့ခေါင်းလေးအား အသာအယာပုတ်လိုက်သည်။

"ငါမင်းကို အရမ်းမနာလိုတာပဲ ..အမျိုးသားဇာ့ဂ်တွေက မင်းကိုကြောက်ပြီး မင်းရဲ့အဆိပ်ကိုလည်း ကြောက်တယ်...ဟူး..."

ငါ့မှာသာ အဲ့လိုခန္ဓာကိုယ်အခြေအနေရှိခဲ့ရင် လွန်ခဲ့တဲ့သုံးနှစ်ကတည်းက တာဝန်တွေ အကုန်ပြီးလို့ အိမ်ပြန်နိုင်နေလောက်ပြီ...သေစမ်းကွာ...

အမျိုးသမီးဇာ့ဂ်၏ပါးပြင်အား သူ့နွေးထွေးသည့်လက်ဖဝါးနှင့် ညင်သာစွာ ပွတ်သတ်လိုက်ရာ မျက်လုံးများမှိတ်ပြီး ပျော်ရွှင်နေပေသည်။

သူထိုသို့ ပျော်ရွှင်နေသော်လည်း မျက်ရည်များက မရပ်တန့်နိုင်ဘဲ ကျဆင်းနေလျက် နူးညံ့စွာ ရှိုက်ငိုလိုက်သည်။

"ကျေးဇူးတင်ပါတယ်..."

"..."

လုမော့ လက်အား ဆတ်ခနဲ ပြန်ရုတ်လိုက်ပြီး စိတ်ထဲတွင် ကျိန်ဆဲလိုက်သည်။

[ဒင်… စိတ်ရင်းနဲ့ကျေးဇူးတင်မှုကို လက်ခံရရှိလိုက်ပါတယ်...အမှိုက်ဆန်မှုတန်ဖိုး 100 နှုတ်ခံရပါတယ်...]

[ဒင်… တရားလွန် မှတ်ချက်တွေကို လုပ်ခဲ့ပါတယ်...အမှိုက်ဆန်မှုတန်ဖိုး 100 ရရှိပါတယ်...]

[ဒင်… ဇာ့ဂ်မျိုးနွယ်စုရဲ့ နှလုံးသားတွေထဲကနေ လေးစားမှုကို ရရှိလိုက်ပါတယ်... အမှိုက်ဆန်မှုတန်ဖိုး 1000 နှုတ်ခံရပါတယ်...]

[ဒင်… ဇာ့ဂ်အဖွဲ့အစည်းရဲ့ အောက်ခြေစည်းကို ထိမိသွားပါတယ်...အမှိုက်ဆန်မှုတန်ဖိုး 1000 လက်ခံရရှိပါတယ်...]

လုမော့ သူ့ခေါင်းမော့လိုက်ပြီး နေကာမျက်မှန်နောက်တွင် ဖုံးကွယ်ထားသည့် စူးရှသော မျက်ဝန်းများက ပတ်ပတ်လည်မှ လူအုပ်ကြီးကို ပြင်းထန်စွာ အကဲခတ်လိုက်သည်။

ငါ့ကို တိတ်တိတ်လေး ချီးကျူးနေတဲ့တစ်ယောက်ယောက်ကိုများ ငါ ရှာတွေ့သွားပြီး ဖော်ထုတ်လိုက်လို့ကတော့ သူတို့ ကံကြမ္မာဆိုးဝင်သွားလောက်တယ်...

အား...ဘာလို့များဒီ ပွိုင့် 10 ပွိုင့်က တိုးမလာရတာလဲ...အရမ်း စိတ်ပျက်ဖို့ ကောင်းလိုက်တာ...

---------------

မဝေးလှသည့် ထောင့်တစ်နေရာတွင်...

လင်းက နံရံကိုမှီရပ်နေလျက် သူရှေ့မှ အရာရာတိုင်းအား စိတ်အားထက်သန်စွာ ကြည့်နေသည်။

ပတ်ပတ်လည်တွင်ရှိသည့် ဖြူဖျော့နေသည့်မျက်နှာများနှင့် ဇာ့ဂ်များအား မြင်လိုက်သည့်အခါ မထိန်းနိုင်ဘဲ ရယ်မောလိုက်မိသည်။

လုမော့က သူ့ရဲ့ဘယ်လိုဘက်အခြမ်းကို ထုတ်ဖော်ပြလိမ့်မယ်ဆိုတာ ငါတောင် ဘယ်တုန်းကမှ မသိတာ အခု ဘယ်လိုလုပ်လိုက်သင့်လဲ...

လုမော့ကို သူနားလည်ပြီဟု တွေးလိုက်သည့် အချိန်တိုင်းတွင် လုမော့က သူ့နားလည်မှုကို အသစ်များဖြစ်သွားစေသည်။

လင်း လက်တစ်ချောင်းကို မြှောက်လိုက်ရာ အနက်ရောင်ပိုးကောင်ငယ်လေး တစ်ကောင်က သူ့အင်္ကျီလက်များထဲမှ ထွက်လာပြီး လက်ချောင်းထိပ်လေးပေါ်တွင် ရပ်ကာ အတောင်များ တဖျက်ဖျက်ခါလျှက် ဦးမှင်များကို လှုပ်ယမ်းလိုက်သည်။

"ငါဘာလုပ်သင့်လဲဟင်..."

သူ့ခေါင်းကိုစောင်းလိုက်ပြီး သောကရောက်စွာ သက်ပြင်းချလျက် ပြောလိုက်သည်။

"သူက အဆိပ်တွေကို တကယ်ကြိုက်နေတာ..."

"သူ မင်းကို တကယ် ကြိုက်လောက်တယ်..."

ပိုးကောင်ငယ်လေးက သူ့လက်ချောင်းထိပ်ပေါ်တွင် ပတ်ချာလည်လှည့်နေကာ ဘဝင်ခိုက်နေပုံ ပေါ်သည်။

သူက "မင်းအပေါ် နှစ်သက်မှုတွေ ကုန်တော့မှာပဲ"ဟုပြောနေသယောင်ပင်။

🌌🌌🌌

Prev Next