MM Story Teller

Chapter 153

Viewers 19k

🐯Chapter 153

ယမန်နေ့ညက ဟော့ပေါ့စားနေချိန်တွင် သူ အလွန်ပျော်ရွှင်နေသောကြောင့် ပါဝင်ပစ္စည်းများကို သိမ်းဆည်းထားရန် လုံးဝ မတွေးမိခဲ့ပေ။ ဤမနက်တွင် ပါဝင်ပစ္စည်းများက ဟင်းခတ်အမွှေးအကြိုင်အပြည့်အစုံ၊ အရည်အသွေးမြင့်အသားနှင့် အစရှိသည့်အရာများမှ သာမန်အာလူးများ၊ ဝက်ပေါင်ခြောက်အပိုင်းအစများ၊ ဂျုံအနည်းငယ်၊ ဆီအနည်းငယ်နှင့် ဆားအဖြစ်သို့ ပြောင်းလဲသွားသည်။

ယနေ့မှစတင်၍ ပါဝင်ပစ္စည်းများနှင့် ရေရရှိမှုက လုပ်ငန်းတာဝန်များ ပြီးမြောက်ခြင်းအပေါ်တွင် မူတည်ပေလိမ့်မည်။

ကုယွီမြန်က သေချာပေါက် ကျရှုံးလိမ့်မည် မဟုတ်ပေ။

ခိုအားလားတစ်ကောင်ဖြစ်သည့် ဒါရိုက်တာကိုကာအိုက တောထဲတွင် တစ်ကိုယ်တည်း နေထိုင်လေ့ရှိသောကြောင့် အကူအညီအတော်ရကာ မီးမွှေးရာတွင် ကူညီပေးခဲ့သည်။ ကုယွီမြန်က ပါဝင်ပစ္စည်းများကို ရိုးရှင်းစွာ ပြုပြင်လိုက်သည်။ ဂျုံကို မုန့်နှစ်ဖြစ်အောင် နယ်လိုက်ပြီး အခြောက်ခံလိုက်သည်။ ထို့နောက် အာလူးများကို ပါးပါးလှီးပြီး ဟင်းခတ်အမွှေးအကြိုင်များနှင့် နယ်လိုက်သည်။ အချိန်တိုအတွင်းမှာပင် အာလူးကိတ်များကို ဆီပူပူထဲတွင် နှစ်ဖက်စလုံးရွှေရောင်သန်းလာသည်အထိ ကြော်လိုက်ပြီး ထို့နောက် အမည်းရောင် ဝက်ပေါက်ခြောက် အပိုင်းအစလေးများကို အပေါ်ယံတွင်ဖြူးလိုက်၏။ လက်ရာမြောက်ကာ အသစ်အဆန်းဖြစ်နေပြီး ကြွပ်ရွကာမွှေးပျံ့နေသည်။ သူတို့ ထိုအရာကို တူဖြင့်ဖြစ်ညှစ်လိုက်ရုံနှင့် ကြွပ်ရွမှုကို ခံစားနိုင်ပေသည်။

ကုယွီမြန် အာလူးကိတ်များကို အအေးခံရန် အိုးထဲမှ ထုတ်ယူလာချိန်တွင် လူတိုင်း၏တံတွေးမျိုချသံများကို ကြားနေရသည်။ ကုယွီမြန် မရယ်မောဘဲမနေနိုင်တော့ပေ။ ထို့နောက် အချိန်ကြာမြင့်စွာ မစောင့်လိုက်ရပေ။

မနက် ၈ နာရီတွင် နောက်ထပ်နေ့တစ်နေ့၏ ရသစုံရှိုးက တရားဝင်စတင်လာခဲ့သည်။

တရားဝင်စတင်ပြီးသည့်နောက် ဧည့်သည်တော်များက ပရိသတ်များ၏ ဖန်သားပြင်ပေါ်တွင် ရေးသားထားသော မှတ်ချက်များကို မြင်ရလိမ့်မည်မဟုတ်သကဲ့သို့ တိုက်ရိုက်ထုတ်လွှင့်မှုကဲ့သို့ ပရိသတ်များနှင့် အပြန်အလှန် ပြောဆိုဆက်ဆံမှုအကြောင်းလည်းမရှိပေ။ ထိုအရာသည် ကုယွီမြန်အတွက် အလွန်လွယ်ကူလှ၏။ အဘယ်ကြောင့်ဆိုသော် ရှို့ဟန်နှင့် ကောမိသားစု၏ကလေးများအပြင် မြေခွေးလေးနှင့် ဟက်စကီးလေးတို့ကို အပြည့်အဝ အာရုံစိုက်ထားနိုင်သောကြောင့်ပင်။ သူ့တွင် ဖန်သားပြင်ပေါ်ရှိမှတ်ချက်များနှင့် ပြောဆိုဆက်ဆံရန် အမှန်တကယ်ကို စွမ်းအားမရှိတော့ပေ။

သို့သော် မနက်ပိုင်း၌ ရှို့ဟန်တွင် တစ်စုံတစ်ခု လုပ်စရာရှိသည့်ပုံပေါ်၍ စခန်းချထားသည့်နေရာတွင် နေထိုင်ကာ ရိုက်ကူးရေးတွင် မပါဝင်ခြင်းက ပို၍ကောင်းမွန်ပေလိမ့်မည်။ အတင်းအဖျင်း ပြောဆိုရန် သူ့ကို မတွေ့နိုင်တော့သည့် ပရိသတ်များအတွက်မူ စိတ်မကောင်းစရာပင်။

ရှို့ဟန် ထိုအကြောင်းအရာများနှင့် ပတ်သက်ပြီး တစ်စုံတစ်ရာကို ပြုလုပ်သင့်သည်။ ကုယွီမြန် ထိုအချက်ကို အပြည့်အဝ နားမလည်သေးသော်လည်း မည်သို့ပင်ဆိုစေကာမူ သူက ဧကရာဇ်တစ်ပါးပင်။

ထို့အပြင် မြေခွေးလေးသည်လည်း လုပ်စရာတစ်စုံတစ်ခုရှိနေခဲ့သည်။ မနက်ခင်း သူ့အမွေးများကို ဖြီးပေးရန် ကြိုတင်ပြင်ဆင်နေချိန်တွင် ကောင်ငယ်လေးက သူ့မျက်နှာပေါ်တွင် ပေါ့ပါးသောမျက်မှန်လေးတစ်လက်ကို ဝတ်ဆင်ကာ တစ်စုံတစ်ရာကို စစ်ဆေးနေခဲ့သည်။ ထိုအရာမှာ သိပ္ပံအကယ်ဒမီကျောင်းမှ တစ်စုံတစ်ရာဖြစ်နိုင်ပြီး သူသည်လည်း ရိုက်ကူးရေးတွင် မပါဝင်ခဲ့ပေ။

မှတ်ချက်ရေးသားသည့် ဖန်သားပြင်ပေါ်တွင်ပြောကြမည့် အကြောင်းအရာများနှင့် စပ်လျဉ်း၍ အလိုက်သင့်လေးသာ ပြုမူလိုက်ပေတော့မည်။

နေ့လယ်ခင်းတွင် ဧည့်သည်တော်များက လုပ်ငန်းတာဝန်တစ်ခုကို ပြီးဆုံးသွားခဲ့ပြီး ပါဝင်ပစ္စည်းများရရန် မလွယ်ကူခဲ့ပေ။ ကုယွီမြန်က နေ့လယ်စာချက်ပြုတ်ရမည့်တာဝန်ကို ယူခဲ့သည်မှာ အသေအချာပင်။

စားသောက်ပြီးနောက် တိုက်ရိုက်ထုတ်လွှင့်မှုအတွက်လည်း နေ့လယ်စာနားချိန်ရှိပေ၏။

"ဘိုးဘေးလေး…"

ကောရှစ်အာက ကုယွီမြန်ကို ထူးဆန်းစွာဖြင့် ဘေးသို့ ဆွဲခေါ်သွားခဲ့သည်။

ကုယွီမြန်: "ဟမ်"

"မင်းကို ပြောပြချင်တဲ့ကိစ္စတွေ အများကြီးရှိတယ်…"

ကောရှစ်အာကို ကြည့်ရသည်မှာ အနည်းငယ် တုံ့ဆိုင်းနေသည့်ပုံပေါ်ပြီး သူ၏လက်နှစ်ဖက်ဖြင့် မျက်နှာဝိုင်းဝိုင်းကို ကိုင်ထားသည်။

"ပထမဆုံးတစ်ခုက မင်းရဲ့ချစ်သူကောင်လေးက..."

သူ အစကတည်းက မည်သို့ခန့်မှန်းမိသွားကြောင်း ကုယွီမြန်လည်း နားမလည်ခဲ့ပေ။ အစက ဖော်ပြခဲ့ဖူးသော ကြိုတင်သိမြင်ခြင်းကြောင့်လားဟု ကုယွီမြန် တွေးလိုက်မိသည်။ ထို့ကြောင့် ပြုံးကာ ကောရှစ်အာ၏ခေါင်းကို ပွတ်သပ်လိုက်သည်။

"အင်း... ငါ သိတယ်၊ ဒါပေမဲ့ ကျေးဇူးတင်ပါတယ်…"

ခေါင်းကိုပွတ်ပေးခံရသည့် ကောရှစ်အာက သူ့ဝမ်းဗိုက်ကို မပုတ်ဘဲမနေနိုင်တော့ပေ။ သူ စိတ်သက်သာရသလို ခံစားလိုက်ရသည်။

"ကောင်းပြီ… နောက်ထပ် မင်းသိထားသင့်တဲ့ အရာတစ်ခုရှိသေးတယ်… ကောအာရှစ်စစ်ဖြစ်တဲ့ ထန်ယွမ်လေးရဲ့အကြောင်း..."

ကုယွီမြန် ခေါင်းညိတ်လိုက်သည်။

"အိုး... ယွမ်ယွမ်က ကောအာရှစ်စစ်လား...မင်း ငါ့ကို နောက်တစ်ကြိမ် ပြန်ပြောပေးလို့ရမလား...အဲဒီအနုပညာရှင်ကြီးကလေ..."

ကောရှစ်အာ "....."

ကုယွီမြန် ဆွံ့အသွားရ၏။

ထန်ယွမ်လေးသည်လည်း သူ၏ခေါင်းလေးကို တစ်ဖက်သို့စောင်းလိုက်သည်။

"အီ"

ဆယ်မိနစ်အကြာတွင်ー

"ဒါဆို သူက ဒီလိုဖြစ်သွားဖို့ မရည်ရွယ်ဘူး… နောက်ပြီး အခု သူ့ဦးနှောက်က မူလအစကိုပြန်ရောက်သွားတယ်… ဥပုံစံအသက်ကယ်အာကာသယာဥ်ကြောင့် သူက ကလေးပုံစံကို ပြန်ပြောင်းသွားတယ်…ဒါပေမဲ့ သူ လက်ရှိပုံစံကို ပြန်ပြောင်းဖို့ ဘာလို့အချိန်အရမ်းကြာနေလဲဆိုတာတော့ ကျွန်တော်တို့ မသိဘူး… သူ အရွယ်ရောက်ပြီးပုံစံကို ပြောင်းလဲနိုင်ရင်နိုင်လိမ့်မယ်… ဒါပေမဲ့ အဲဒီအေးဂျင့် သူ့ကို ရှာတွေ့သွားမှာကိုလည်း မလိုလားဘူး… သူ လူကြီးတစ်ယောက်ဖြစ်လာရင် မင်းက သူ့အနားမှာ မရှိနေတော့မှာကြောင့်လည်း ဖြစ်နိုင်တယ်…"

"....."

ကောအာရှစ်စစ်က သူ၏နည်းပရိယာယ်များ ဖော်ထုတ်ခံလိုက်ရသည့် အကြောင်းနှင့်ပတ်သက်ပြီး ဘာတစ်ခုမှသိမနေခဲ့ပေ။ ကုယွီမြန်၏ပေါင်ပေါ်တွင် ထိုင်ကာ သူ့လက်သည့်များကို နုံအစွာလျက်နေခဲ့သည်။ ကုယွီမြန်က သူ့နှဖူးကို ကိုင်လိုက်ပြီးပြောသည်။

"ဟုတ်ပြီ အခု ငါ သိသွားပြီ… ငါ မသိသေးတာ အခြားဘာတွေရှိသေးလဲ…"

"အဲဒါပါပဲ။ …ရှေ့ဆက်ဖြစ်မဲ့ အသေးအဖွဲအကြောင်းအရာ တော်တော်များများတော့ရှိသေးတယ်…"

ကောရှစ်အာ ပြုံးရယ်လိုက်၏။

ကောမိသားစုက သူ့အား တစ်မိသားစုလုံး၏ တရားဝင်အုပ်ထိန်းသူအဖြစ် သတ်မှတ်ထားခြင်းကို ထိုအချိန်က ကုယွီမြန် မသိခဲ့ပေ။ ထိုအရာက ကောရှစ်အာ ပြောခဲ့သည့် အရေးမပါသော အသေးအဖွဲကိစ္စလေးပင်ဖြစ်၏။ မျိုးနွယ်မတူညီသည့်ကိစ္စတွင် တရားဝင်လုပ်ဆောင်ရသည့် ဥပဒေလုပ်ငန်းစဉ်များရှိပြီး အလွန်ကိုမှရှားပါးကာ မျိုးနွယ်ဝင်များအတွက် အန္တရာယ်ဖြစ်စေနိုင်သည်။

ကုယွီမြန်အား 'တရားဝင်အုပ်ထိန်းသူ' ဖြစ်ပေးရန် ပြောလာခဲ့သော်လည်း အမှန်တွင် ဤတရားဝင်အုပ်ထိန်ခွင့် ဆက်ဆံရေးက ကုယွီမြန်အတွက် အကျိုးခံစားခွင့်အများဆုံးဖြစ်၏။ အမြတ်ငွေပရောဂျက်၏ အဓိကရှယ်ယာများနှင့် နေရာတိုင်းရှိ အိမ်များ၏ပိုင်ဆိုင်မှု အခွင့်အရေးများမှလွဲ၍ သူ့တွင် တာဝန်ယူမှုတာဝန်ခံမှု အနည်းငယ်သာရှိ၏။ အရေးကြီးဆုံးကိစ္စမှာ အနာဂတ်တွင် ကုယွီမြန်ထံ၌ မည်သည့်ကိစ္စမျိုး ရှိလာသည်ဖြစ်စေ ကောမိသားစုက အခိုင်မာဆုံး ကျောထောက်နောက်ခံ ဖြစ်လာပေလိမ့်မည်။

သူ တင်ဆက်သူအဖြစ် ဆက်လက်လုပ်ကိုင်ချင်သည်လား သို့မဟုတ် စားသောက်ဆိုင်နှင့် ဆက်စပ်သည့် အသက်မွေးဝမ်းကြောင်းတစ်ခုကို ထူထောင်ချင်သည်လား မည်သည့်အရာဖြစ်ဖြစ် ကိစ္စမရှိပေ။ မည်သည့်မတော်တဆမှုများ၊ ပြောင်းလဲမှုများပင် ဖြစ်ပါစေ၊ သို့တည်းမဟုတ် သူ ချမ်းသာသည်ဖြစ်စေ ဆင်းရဲသည်ဖြစ်စေ...

ကောအိမ်တော်တွင် ပန်ဒါတစ်ကောင် ကျန်နေသရွေ့ သူတို့က အမြဲတမ်း သူ၏မိသားစုဖြစ်လာပေလိမ့်မည်။ ၎င်းက ဒယ်အိုးကြီးနှင့် ဒယ်အိုး ၂၊ ဒယ်အိုး ၃ တို့ကို ကုယွီမြန် သူ့မိသားစုအဖြစ် ဆက်ဆံခဲ့သည့်ပုံစံအတိုင်းပင်။ နှုတ်ထွက်စကားတစ်ခွန်းသာသာမျှ မဟုတ်ပေ။ ၎င်းက တရားဥပဒေနှင့်ညီသည့် အထောက်အထားလက်မှတ်တစ်ခုဖြစ်ပြီး အကျိုးသက်ရောက်မှု ရှိလာမည်ဖြစ်သလို ကောမိသားစုဝင်အားလုံးသည်လည်း ခြွင်းချက်မရှိ သဘောတူခဲ့ကြသည်။

ထိုအချိန်တွင် ကုယွီမြန် ကောရှစ်အာကို ကြည့်လိုက်ပြီးနောက် ပန်ဒါလေးက အရေးကြီးသည့် အကြောင်းတစ်စုံတစ်ရာကို မပြောဘဲထိမ်ချန်ထားခဲ့သလို ခံစားရသည်။

ဝဝတုတ်တုတ်ပန်ဒါလေးက အပြစ်ကင်းစွာဖြင့် မျက်တောင်များကို ပုတ်ခတ်ပုတ်ခတ်ပြုလိုက်သည်။

"အဲဒါ အကုန်ပဲလား…"

"ဟုတ်…"

ကောရှစ်အာ ခေါင်းညိတ်လိုက်သည်။

"ဒါဆို...ငါတို့ ပြန်သွားပြီး အနားယူကြမလား…"

ယခင်က စဉ်းစားထားခဲ့ပြီး မေ့လုနီးနီးဖြစ်နေသည့် အကြောင်းအရာကို ကုယွီမြန် ရုတ်တရက် အမှတ်ရသွား၏။ "စကားမစပ် ရှစ်အာ ခဏလေး…"

ကောရှစ်အာ ရပ်တန့်လိုက်၏။

ရှစ်စန်းနှင့် ဒယ်အိုး ၁၆ တို့က အခန်းထောင့်တွင်ရှိနေပြီး စန်းရှစ်ပါးနှင့် ဒယ်အိုး ၄၂ တို့က အနည်းငယ် ခပ်ဝေးဝေးတွင်ရှိနေကြသည်။ သူတို့က အနားသို့လျှောက်လာကာ ရပ်တန့်လိုက်ကြ၏။ ကုယွီမြန် အချိန်ခဏမျှ တုံ့ဆိုင်းနေပြီးနောက် မေးလိုက်သည်။

"မင်းတို့...မင်းတို့ ငါ့ရဲ့မျိုးရိုးနာမည်ကို ခံယူချင်လား…"

ကုယွီမြန် အလောတကြီး ထပ်ဖြည့်ပြောလိုက်သည်။

"မင်းတို့ မလိုချင်လည်း အဆင်ပြေပါတယ်..."

ကုယွီမြန် ဤကလေးများကို သူ့ကလေးများကဲ့သို့ အမှန်တကယ်ပင် သတ်မှတ်ထားခဲ့သည်။ သို့သော် သူတို့၏မျိုးရိုးအမည်က ကောဖြစ်နေခဲ့သည်။ ထိုအကြောင်းကို နာမည်ပေးရာ၌မတော်သည့် ကုယွီမြန်လည်း အရင်က တွေးခဲ့ဖူးပေသည်။ စစ်ချွမ်ပြည်နယ်မှာဆိုလျှင် 'ကော‌' ဟူသောစကားက 'အစ်ကို'ဟု အဓိပ္ပါယ်ရသည်။ ကုယွီမြန် ယခင်တုန်းကတည်းက သူတို့ကိုကောင်းမွန်စွာ စောင့်ရှောက်ပေးနိုင်သည့် အစ်ကိုကြီးတစ်ယောက်ဖြစ်ချင်ခဲ့သည်။ ထိုမှသာ သူတို့ အထီးကျန်တော့မည်မဟုတ်ပေ။ နှစ်ထောင်ပေါင်းများစွာကြာသည်အထိ ထိုအသုံးအနှုန်းကို အသုံးပြုနေလိမ့်မည်ဟု မထင်ထားခဲ့ပေ။ အင်တာနက်ပေါ်တွင် ကောအာရှစ်စစ်၏ မျိုးရိုးနာမည်နှင့်ပတ်သက်ပြီး "အရမ်းတောဆန်တယ်" နှင့် "အမှိုက်ပုံက ကောက်လာသလိုမျိုး ကြုံသလိုပေးထားခဲ့တာမဟုတ်ဘူးလား" ဟူ၍ လှောင်ပြောင်နေသူများ များစွာရှိနေဆဲပင်။

ကုယွီမြန် သူ့ကလေးများအတွက် အလွန်ဝမ်းနည်းသလို ခံစားခဲ့ရသည်။

သူ၏ပန်ဒါကလေးများကို အမှိုက်ပုံမှ ကောက်လာခြင်းမဟုတ်ပေ။

သူတို့က မိဘတစ်ဦး၏ ဂရုတစိုက်စောင့်ရှောက်မှုအောက်တွင် ရှိနေခဲ့ကြသည်။

သူ ရောက်လာသည်မှာ အနည်းငယ်နောက်ကျခဲ့သော်လည်း ကုယွီမြန် တစ်ရက်ပိုပြီး အသက်ရှင်နေသရွေ့ ကောမိသားစုက ပြုပြင်မရနိုင်သော ရိုင်းစိုင်းသောကလေးများဖြစ်သည်ဟု ပြောဆိုနေကြသည်ကို ဘယ်သောအခါမှ မမြင်ချင်ပေ။

ကံကောင်းထောက်မစွာပင် ကုယွီမြန် ကြယ်တာရာများဆီသို့ ရောက်လာခဲ့ချိန်တွင် ဘာမှမရှိသော ရှေးဟောင်းကမ္ဘာမှလူသား မဟုတ်တော့ပေ။ ကုယွီမြန်က အကြွင်းမဲ့အာဏာရှိသူ ဖြစ်မလာသော်လည်း ရှေ့ထွက်ကာ ကောအိမ်တော်ကို ကောင်းစွာ ကာကွယ်ပေးပေလိမ့်မည်။

ကောရှစ်အာ အချိန်အတန်ကြာသည်အထိ စကားမပြောခဲ့ပေ။

ထောင့်နားတွင် ဆောင့်ကြောင့်ထိုင်နေသော ရှစ်စန်းနှင့် ဒယ်အိုး ၁၆ တို့နှစ်ဦးသည်လည်း စကားမပြောခဲ့ကြပေ။

ကုယွီမြန် ရုတ်တရက် စိုးရိမ်ပူပန်လာသလို ခံစားခဲ့သည်။

"တကယ်တော့ ကုကောရှစ်အာ၊ ကုကောရှစ်စန်း၊ ကုကော ၁၆ အဲလိုမျိုးဆိုလည်း အရမ်းကောင်းတယ်လို့ ငါ ထင်ပေမဲ့ မင်းတို့ရဲ့ထင်မြင်ချက်ပေါ်မှာလည်း မူတည်တယ်…တကယ်လို့ မင်းတို့သာမကြိုက်ဘူးဆိုရင်... "

ကောရှစ်အာက သူ၏မဲနက်သော ပဲစေ့ပုံမျက်လုံးများကို မှိတ်တုတ်မှိတ်တုတ် ပြုလုပ်လိုက်ပြီး ကြီးမားသော မျက်ရည်လုံးကြီးများ ကျလာခဲ့သည်။

ကုယွီမြန် သူ့ကိုယ်သူအပြစ်တင်လိုက်မိသည်။

"မင်းတို့ ဒါကို တော်တော်လေးမကြိုက်ဘူးလား…"

ကောရှစ်အာ သူ့ခေါင်းကိုခါယမ်းပြီး မျက်ရည်များဖြင့်ရှိုက်ကာ ငိုရင်းပြောလာသည်။

"မဟုတ်ဘူး အခု ကျွန်တော် အရမ်းပျော်လွန်းလို့ပါ ဝူး ဝူး..."

ငါ ဒါကို မကြိုက်ဘဲ ဘယ်လိုနေနိုင်မှာလဲ…

ငါ အဲဒါကို အရမ်းကြိုက်တယ်…ပြီးတော့ ကုယွီမြန်အတွက် ဒုက္ခဖြစ်စေမှာလည်းစိုးတယ်…

ကုကောရှစ်အာ၊ ကုကောရှစ်စန်း၊ ကုကောရှစ်လျှို...

၎င်းတို့က အမှန်တကယ် ကောင်းမွန်သော နာမည်များဖြစ်ကြသည်။ထိုထက်ကောင်းသည့် နာမည်များ မရှိတော့ပေ။

နှစ်ပေါင်းများစွာကြာပြီး နောက်ဆုံးတွင် သူတို့က ပြီးပြည့်စုံသော မိသားစုလေးတစ်ခု ဖြစ်လာခဲ့သည်။

ရသစုံရှိုးက သက်ဝင်တက်ကြွမှုများနှင့် ပြည့်နှက်နေလျက်ရှိသည်။ သို့သော် အခြားတစ်ဖက်တွင် ငြိမ်းချမ်းမနေပေ။

ကြီးမားသောအမြီးနှင့် မြေခွေးငယ်လေးက ဖန်သားပြင်ထက်မှ သတင်းအချက်အလက်များကို စိုးရိမ်ကြီးစွာ ကြည့်နေခဲ့ပြီး သူ၏သေးငယ်သော လက်သည်းလေးများဖြင့် ကီးဘုတ်ကိုနှိပ်နေသည်။ ဤကဲ့သို့သောအချိန်မျိုးတွင် သူ၏အထူးကောင်းလွန်းသော ဦးနှောက်စွမ်းအားကို မုန်းတီးနေပါကလည်း သူ့အတွက် အသုံးမဝင်ပေ။ ထိုသို့ဆိုလျှင်ပင် သူက သိပ္ပံအကယ်ဒမီကျောင်းတွင် အတွေ့အကြုံ ဆယ်နှစ်ရှိသူ ဖြစ်ပေသည်။

"စုဆောင်းတာက ပြီးဆုံးသွားပြီ။ မင်း နမူနာ ယူထားပြီးပြီလား… အဖြေကဘာလဲ…"

"ဟုတ်တယ် အဲဒါ ဇာ့ဂ်ပဲ…"

အပြန်အလှန် ဆက်သွယ်နေသည့် နှစ်ဖက်စလုံး တိတ်ဆိတ်သွားခဲ့သည်။

သာမန်ရှေးဟောင်းကမ္ဘာ ရသစုံရှိုးတစ်ခုတွင် ဤကဲ့သို့သော အရာများ ပါဝင်ပတ်သက်နေလိမ့်မည်ဟု သူ မတွေးခဲ့ပေ။

အဲဒါက ဘာလို့ ရှေးဟောင်းကမ္ဘာနားမှာ ရှိနေခဲ့တာလဲ...

၎င်းက ကြိုတင်စီစဉ်ထားသလိုပင်။ ဇာ့ဂ်နှင့်ပတ်သက်ပြီး ကြောက်စရာအကောင်းဆုံးအရာက ကပ်ပါးကောင်အဖြစ်တွယ်ကပ်ခြင်းနှင့် ရောဂါကူးစက်ပြန့်ပွားခြင်းပင်ဖြစ်ပြီး ကြောက်စရာကောင်းလောက်အောင် အရေအတွက်က တစ်ဟုန်ထိုး တိုးပွားလာနိုင်ပေသည်။ ၎င်းက သတ္တဝါတစ်ကောင် ဖြစ်နေသရွေ့ သူတို့၏အသုံးချခံများသာ ဖြစ်လာပေလိမ့်မည်။

(ကပ်ပါးကောင်အဖြစ်ပြောင်းသွားတဲ့သူတွေက ဇာ့ဂ်တွေရဲ့အသုံးချခံတွေပဲဖြစ်လိမ့်မယ်လို့ ဆိုလိုတာပါ)

ထို့အပြင် သူတို့၏တိုက်ပွဲအကျိုးသက်ရောက်မှုက ကြောက်စရာကောင်းပေသည်။ ယခုချိန်တွင် လက်နက်များကို အဆင့်မြှင့်တင်ထားခဲ့ပြီး ဖြစ်သော်လည်း ဧကရာဇ်သာလျှင် ဇာ့ဂ်များကို အမြစ်ပြတ်အောင် ချေမှုန်းနိုင်ပေလိမ့်မည်။ အကယ်၍ အခြားစစ်သားများက အင်းဆက်ပိုးတစ်ကောင်တည်းနှင့် တွေ့ဆုံခဲ့လျှင်ပင် ကြမ်းတမ်းရက်စက်သော တိုက်ပွဲတစ်ခု ဖြစ်လာပေလိမ့်မည်။

ယခုချိန်ထိတိုင် SSS-အဆင့်ရှိ စိတ်စွမ်းအားပိုင်ဆိုင်သူမှာ ဧကရာဇ်မင်းမြတ်တစ်ဦးတည်းသာရှိပေ၏။ အလွန်ကြီးကျယ်မြင့်မြတ်ကာ ကြောက်စရာကောင်းသော ဧကရာဇ်မင်းမြတ်ပင်လျှင် ဇာ့ဂ်များကိုဆန့်ကျင်တိုက်ခိုက်ရန် အချိန်ခုနစ်နှစ် ကြာခဲ့ပြီးဖြစ်သည်။ ၎င်းက မည်မျှခက်ခဲကြောင်းကို ဖော်ပြနေပေသည်။

အခု ကုယွီမြန် ဘယ်မှာလဲ...ပန်ဒါတွေနဲ့ ဟက်စကီလေးကရော ဘယ်မှာလဲ...

မြေခွေးလေးက အလွန်စိတ်ပူပန်နေကာ သူ့မိသားစုကို တွေ့ချင်နေခဲ့သည်။

"မုန်းစရာကောင်းလိုက်တာ…"

မြေခွေးလေးက သူ့လက်ပတ်ကွန်ပျူတာကို ကိုက်လိုက်ပြီး မျက်ရည်များ ကျဆင်းလာခဲ့သည်။

သိပ္ပံအကယ်ဒမီကျောင်းရှိ သူ၏အဓိကပရော့ဂျက်က မျိုးတုန်းပျောက်ကွယ်သွားသော ဇာ့ဂ်များကို ဆက်လက်၍ သုတေသနပြုလုပ်ခြင်းပင်ဖြစ်၏။

ငါ ဘာကြောင့် အရမ်းကို အသုံးမဝင်ရတာလဲ... သူ၏စွမ်းအားကိုသာ အပြည့်အဝ အသုံးပြုခဲ့မည်ဆိုလျှင် သူတို့ကို ဤထက်ပိုစောစော ရှာတွေ့ကောင်းရှာတွေ့နိုင်လိမ့်မည်။ မြေခွေးလေး၏မျက်လုံးများထဲတွင် မျက်ရည်များဖြင့် ပြည့်နှက်နေပြီး ကုယွီမြန်ကိုရှာရန် ယာယီစခန်းမှနေ၍ တစ်လမ်းလုံးပြေးလာခဲ့သည်။

🐯🐯🐯

Prev Next