MM Story Teller

Chapter 135

Viewers 19k

🐯Chapter 135

အမှန်တွင် ယခင် သိပ္ပံအကယ်ဒမီကျောင်း တိုက်ရိုက်ထုတ်လွှင့်မှုတည်းက ကုယွီမြန်က ကြယ်တာရာမြို့တော်တွင် အနည်းငယ်ကျော်ကြားလာခဲ့သည်။ သို့သော် လူသစ်ပြိုင်ပွဲ၏နောက်ဆုံးညက စံချိန်ချိုးနိုင်ခဲ့သည့် တိုက်ရိုက်ထုတ်လွှင့်မှုက ကုယွီမြန်အပေါ် စိတ်ဝင်စားလာမှုကို အသိုင်းအဝိုင်းတစ်ခုလုံး၏ လက်လှမ်းမှီနိုင်သောနေရာတစ်ခုဆီသို့ တွန်းတင်ပေးနိုင်ခဲ့သည်။

အချိန်အတော်ကြာသည့်တိုင်အောင် ကုယွီမြန်မှလွဲ၍ မည်သူကမှ စံချိန်ကိုကိုင်လှုပ်နိုင်စွမ်းမရှိကြောင်း ခန့်မှန်းခဲ့ကြသည်။

ထိုညနေခင်းတွင် မရေမတွက်နိုင်သော နာမည်ကြီးတံဆိပ် ကြောငြာလိုသူများ၏ အာရုံစိုက်မှုက တစ်နည်းနည်းဖြင့် ဤအလွန်ငယ်ရွယ်သော လူသားတင်ဆက်သူလေးထံ လှည့်လာကြသည်။ သို့သော် ထင်မှတ်မထားစွာပင် မည်သည့်အထောက်အပံ့၊ မည်သည့်ကြော်ငြာများကိုမှ ကုယွီမြန်က လက်မခံခဲ့ပေ။ ထို့အပြင် နောက် ၇ ရက်ထိတိုင်အောင် တိုက်ရိုက်ထုတ်လွှင့်မှုကိုပင် မပြုလုပ်ခဲ့ပေ။

ကုယွီမြန် ရုံးချုပ်ကိုလာနေပြီဖြစ်ကြောင်း မီဒီယာအတော်များများက ကြိုတင်သတင်းရခဲ့ပြီး ဤနေရာ ကြယ်တာရာကောင်းကင်၌ အစောကြီးကတည်းက ထိုင်စောင့်နေခဲ့ကြသည်။

ーအသက်နှစ်ဆယ်အရွယ်လူသား၊ တိုတောင်းလှသည့် စုစုပေါင်းတိုက်ရိုက်ထုတ်လွှင့်ချိန်နှင့်အတူ တိုက်ရိုက်ထုတ်လွှင့်မှုတွင် ထိပ်တန်းနေရာကို ပိုင်ဆိုင်ထားသူပင်ဖြစ်၏။ ထို့အပြင် အယ်လ်ဘတ်စားသောက်ဆိုင်ကိုလည်း ပိုင်ဆိုင်ထားသေးသည်။ အထောက်အထားတစ်ခုစီတိုင်းကို တစ်ခုချင်း ဖဖယ်ထုတ်ထားလျှင်ပင် အံ့ဩစရာကောင်းလှ၏။ ၎င်းတို့ကို အတူတကွစုပေါင်းလိုက်လျှင် ကြီးမားသောလူထုအာရုံစိုက်မှုတစ်ခု ဖြစ်လာပေလိမ့်မည်။

"ဒါက မစ္စတာကု ဟုတ်ပါသလား… ကျွန်တော် ခင်ဗျားအကြောင်း အများကြီးကြားဖူးပါတယ်… ခင်ဗျားရဲ့လက်ရှိအခြေအနေနဲ့ပတ်သက်ပြီး အင်တာဗျူးလို့ရနိုင်မလား…"

"မစ္စတာကု၊ ၇ ရက်လောက် တိုက်ရိုက်ထုတ်လွှင့်မှုမလုပ်တာက တိုက်ရိုက်ထုတ်လွှင့်မှုနယ်ပယ်ထဲကနေ နောက်တစ်ကြိမ် ထပ်ပြီးပျောက်ကွယ်သွားမလို့လား…အဲဒါကဝမ်းနည်းစရာကောင်းတယ်လို့ ရှင် မထင်ဘူးလား…"

"မစ္စတာကု..."

'သကြားခဲ သကြားခဲ' ကုယွီမြန်ကို သွားကြိုရန်ထွက်လာချိန်တွင် သူ့အား စပ်စုသောသတင်းသမားအုပ်စုတစ်စုက ဝန်းရံထားသည်ကို တွေ့လိုက်ရသည်။ သူ့ကြည့်ရသည်မှာ အလွန်စိတ်ဆင်းရဲနေသည့်ပုံပင်။

သူ့တွင် တူညီသည့်အတွေ့အကြုံ မရှိသေးသော်လည်း ပြန်ဖြေရုံသာတတ်နိုင်တော့၏။

"ကျွန်တော် တောင်းပန်ပါတယ်… မှန်ပါတယ် ကျွန်တော့်မိသားစုနဲ့ ကိုယ်ရေးကိုယ်တာကိစ္စတချို့အပေါ်မှာ အရင်ဆုံးအာရုံစိုက်ထားချင်လို့ပါ… တိုက်ရိုက်ထုတ်လွှင့်မှုကနေလည်း နှုတ်ထွက်ဖို့တောင်းဆိုစရာရှိလို့ပါ…ကျွန်တော့်ရဲ့ပရိသတ်တွေကို စိတ်ပျက်သွားစေတဲ့အတွက် တောင်းပန်ပါတယ် အင်း... နောက်ပိုင်းအစီအစဉ်တွေကိုလည်း စဉ်းစားနေဆဲပါပဲ…"

သကြားခဲ သကြားခဲ "....."

၁၀ မိနစ်အကြာတွင်ー

"သူတို့နဲ့ဘာလို့ အချိန်အကြာကြီးဖြုန်းနေရတာလဲ… မှတ်ချက်ပေးစရာ မရှိဘူးလို့သာ ပြန်ပြောလိုက်ပါ…"

အချိန်ခဏကြာသည်အထိ သကြားခဲ သကြားခဲက ကုယွီမြန်ကို ကြီးစွာသောစိတ်ဝင်စားမှုနှင့်အတူ ကြည့်နေသည်။ အသံကြားရခြင်းထက် လက်တွေ့မြင်လိုက်ရခြင်း ပိုကောင်းသည်ဟု သူမ ခံစားမိသည်။ ဤလူသားအနီးတွင် ရှိနေရသည့်ခံစားချက်က မတူညီဘဲ ကွဲပြားခြားနား၏။ သူမက ကုယွီမြန်နှင့် လက်ဆွဲနှုတ်ဆက်လိုက်သည်။

"ပုံမှန်အတိုင်း ကျွန်မကိုယ်ကျွန်မ မိတ်ဆက်ပါရစေ… ကျွန်မက သကြားခဲ သကြားခဲပါ ပြီးတော့ မျိုးနွယ်က ယုန်အသေးစားမျိုးနွယ်ပါ…"

ကုယွီမြန် လက်ဆန့်ထုတ်လိုက်သည်။

"မင်္ဂလာပါ သကြားခဲ သကြားခဲ… ကျွန်တော်က ကုယွီမြန်၊ လူသားမျိုးနွယ်ပါ…"

သကြားခဲ သကြားခဲက အချိန်အတော်ကြာသည်အထိ ကြည့်နေခဲ့ပြီး နောက်ဆုံးတွင် ပျံဝဲနေသောပျော်ရွှင်မှုကို ဖုံးကွယ်လိုက်ပြီး ချောင်းဟန့်ကာပြောလာသည်။

"ဒါဆို စီးပွားရေးကိစ္စလေးတွေကို ဆွေးနွေးကြရအောင်ー စာချုပ်နဲ့ပတ်သက်ပြီး ကျွန်မတို့က ရှင့်ကို S-အဆင့် စာချုပ်အထိ တိုးမြှင့်ပေးမယ်… ရှယ်ယာဝေစုတွေအပါအဝင် အခြေအနေအားလုံးက ဆွေးနွေးလို့ရနိုင်တယ်… ဒါပေမဲ့ ရှင်က... တိုက်ရိုက်ထုတ်လွှင့်တာကို မလုပ်ချင်ဘူးမလား…"

မကြာသေးမီက ထိုသို့သောအဓိပ္ပါယ်ကို ကုယွီမြန် ဖော်ထုတ်ပြသခဲ့ဖူးသည်။ သကြားခဲ သကြားခဲက ထိုအရာကို လက်ခံရန် မလိုလားသော်လည်း ကုယွီမြန်သာ ထပ်တလဲလဲတောင်းဆိုနေလျှင် မည်သည့်အရာမှ ဖြစ်မြောက်နိုင်လိမ့်မည်မဟုတ်ပေ။

"အင်း…"

ကုယွီမြန် ခဏမျှစဉ်းစားပြီးနောက် ပြောလာသည်။

"မကြာခင်က ကျွန်တော့်မိသားစုထဲမှာ အခြေအနေတွေ ရှုပ်ထွေးကုန်တာကြောင့် အချိန်ပိုရဖို့ဆိုတာ ခက်ခဲလိမ့်မယ်… တိုက်ရိုက်ထုတ်လွှင့်မှုအတွက်ကတော့..."

အိမ်တွင် တစ်စုံတစ်ရာက အမှန်တကယ် ဖြစ်ပွားခဲ့သည်။

နှင်းကျားသစ်လေးー သို့မဟုတ် ရှို့ဟန်ကိစ္စသည်လည်း တစ်ခုအပါအဝင်ဖြစ်သည်။ ထို့အပြင် အခြားကလေးများတွင် အခြားပြဿနာများရှိနေကြသည်။

"ကျွန်တော် ပြန်သွားဖို့ အချိန်တစ်ခုလောက်ရှာချင်တယ်... မဟုတ်ဘူး၊ ရှေးဟောင်းကမ္ဘာကို ပြန်သွားဖို့ကျွန်တော် အခု လိုင်စင်လျှောက်ထားတယ်… ဒါပေမဲ့ လျှောက်ဖို့ခက်ခဲမှာကို စိုးရိမ်မိတယ်…"

ကုယွီမြန် ရုတ်တရက် ပြောလိုက်သည်။

မည်သို့ပင်ဆိုစေကာမူ ထိုနေရာ၏ပတ်ဝန်းကျင်အခြေအနေက မတူညီပေ။ ဤကဲ့သို့သောရှုထောင့်တွင် လူသားမျိုးနွယ်က ကန့်သတ်ခံထားရမည်ကို ကုယွီမြန် စိုးရိမ်မိသည်။ သူ၏လျှောက်လွှာကို ငါးရက်တာအလုပ်လုပ်ခွင့်အတွက် စဉ်းစားရန်တင်သွင်းထားသော်လည်း ခွင့်ပြုချက်မရသေးပေ။

သကြားခဲ သကြားခဲက နားထောင်ပြီး စိတ်မကောင်းစွာ ဖြင့် ခေါင်းညိတ်ပြလိုက်သည်။ ယခင်က တိုက်ရိုက်ထုတ်လွှင့်မှုကို ပြုလုပ်ရသည့် သူ၏ရည်ရွယ်ချက်သည်လည်း သူ့ကိုယ်သူနှင့် နှင်းကျားသစ်လေးကို ထောက်ပံ့နိုင်ရန် ဝင်ငွေအချို့ရစေရန်အတွက်သာဖြစ်၏။

ယခုအခါ ၎င်းက ပြဿနာမဟုတ်တော့ပေ။

"ရှင့်ရဲ့လက်ရှိစာချုပ်က အဆင့်မြှင့်ပြီးသွားပြီ… S-အဆင့်စာချုပ်က တင်ဆက်သူတွေအပေါ်မှာ ကန့်သတ်ချုပ်ခြယ်ထားတာတွေ မရှိသလောက်ပဲ… နောက်ပြီး စုစုပေါင်းထုတ်လွှင့်ရမဲ့ချိန်က တစ်ပတ်လုံးမှာ နှစ်နာရီတည်းပဲ…"

ကြယ်တာရာကောင်းကင်ရှိ တင်ဆက်သူအများအပြားက S-အဆင့် စာချုပ်ကို ချုပ်ဆိုခဲ့ကြသည်။ ကုယွီမြန်မှလွဲပြီး အခြားသူများအားလုံးက ဖျော်ဖြေရေးလောကထဲသို့ ခြေလှမ်းတစ်ဝက်လှမ်းခဲ့ပြီးဖြစ်၏။ အထောက်အပံ့အတွက် ကြော်ငြာခတစ်ခုတည်းသည်ပင် ကြယ်တာရာကောင်းကင်အတွက် ကြီးစွာသောအကျိုးရလဒ်များကို ယူဆောင်လာပေးနိုင်သည်။ ထို့ကြောင့် တိုက်ရိုက်ထုတ်လွှင့်ရန် ကြာချိန်နှင့်ပတ်သက်ပြီး မည်သည့်လိုအပ်ချက်မှမရှိပေ။

ဆိုလိုသည်မှာ စာချုပ်ကို S-အဆင့်သို့ တိုးမြှင့်ပြီးလျှင် ကုယွီမြန်က တိုက်ရိုက်ထုတ်လွှင့်မှုပြုလုပ်ရန် မလိုအပ်တော့ပေ။

ကုယွီမြန် : "အင်း... တကယ်လို့ လက်မလွတ်နိုင်တဲ့အရာဆိုရင်တော့ အဲဒါက ပရိသတ်တွေပဲ…"

"ပရိသတ်တွေတော့ ဝမ်းနည်းနေတော့မှာပဲ ဒါပေမဲ့ သူတို့က ရှင့်ရဲ့ဆုံးဖြတ်ချက်ကို လေးစားကြလိမ့်မယ်လို့ ကျွန်မ ထင်တယ်…"

သကြားခဲ သကြားခဲ ပြောလိုက်၏။

မည်သို့ပင်ဆိုစေကာမူ ကုယွီမြန်၏တိုက်ရိုက်ထုတ်လွှင့်မှုတွင် ရွေးချယ်စရာအနည်းငယ်သာရှိ၏။

ကမ္ဘာပေါ်တွင် ကုယွီမြန်တစ်ယောက်တည်းသာ ရှိပေသည်။

ကုယွီမြန်၏တိုက်ရိုက်ထုတ်လွှင့်မှုကို ကြည့်ရှုပြီးနောက် ပရိသတ်အတော်များများ၏ အစာစားချင်စိတ်က မြင့်တက်လာခဲ့သည်။ သူတို့က အမှန်တကယ်ကို အခြားတိုက်ရိုက်ထုတ်လွှင့်မှုများကို ကြည့်လေ့မရှိကြဘဲ အခြေအနေအသစ်နှင့် လိုက်လျောညီထွေမှု ရှိလိမ့်မည်မဟုတ်ပေ။

"မနက်ဖြန် လူသစ်ပြိုင်ပွဲအတွက် ဆုပေးပွဲမှာ ညစာစားပွဲကျင်းပလိမ့်မယ်… ပရိသတ်တွေနဲ့တွေ့ပြီး နှုတ်ဆက်စကားပြောရအောင်…"

သကြားခဲ သကြားခဲထံမှ ဆိုလာသည်။

ကုယွီမြန် ထိုအကြောင်းကိုစဉ်းစားပြီး ခေါင်းညိတ်လိုက်သည်။

နှစ်ယောက်သား အခြားအကြောင်းအရာများကို ဆက်လက်ပြောဆိုခဲ့ကြသည်။ စာချုပ်ချုပ်ဆိုပြီးနောက် သကြားခဲ သကြားခဲက ကုယွီမြန်အား တံခါးဆီလိုက်ပို့ပေးခဲ့သည်။ သူမ ပြန်ရောက်ချိန်တွင် သူမ၏လက်ပတ်ကွန်ပျူတာက သတင်းစကားတစ်ခုကို လက်ခံရရှိထားလေသည်။

"အမ် ငါပါ...အာ..."

နားထောင်နေစဉ် သကြားခဲ သကြားခဲ၏မျက်လုံးများ အနည်းငယ် ပြူးကျယ်သွား၏။

"ရသစုံရှိုးလား…ရှေးဟောင်းကမ္ဘာပေါ်မှာလား…"

မိနစ်အနည်းငယ်ကြာပြီးနောက် သကြားခဲ သကြားခဲက အလျင်စလိုပြေးထွက်သွားပြီး ယာဉ်ပျံပေါ်သို့မတက်ရသေးသော ကုယွီမြန်ကို မီလာခဲ့သည်။ ကုယွီမြန် နောက်သို့လှည့်လိုက်သည်။

"ဟမ်..."

"မြန်မြန်ရေ ရှင် ဒီဟာကို စိတ်ဝင်စားလား…"

သကြားခဲ သကြားခဲက လက်ကောက်ဝတ်ကို တင်းကျပ်စွာ ဆုပ်ကိုင်ထားပြီး အသက်ပင်မရှူနိုင်ပေ။

"ရသစုံရှိုးတစ်ခုမှာ ပါမလား…"

-----

ထိုအချိန်၌ အထက်တန်းလွှာနယ်မြေရှိ ကောမိသားစု၏အိမ်အဟောင်းတွင်ー

အညိုနှင့်အဖြူရောင်ပန်ဒါ ကောရှစ်စန်းက သူ့၏လုံးဝန်းသောမေးစေ့ကိုကိုင်ကာ ပန်ဒါအုပ်စုတစ်စုနှင့်အတူ ဆွေးနွေးနေလေသည်။

ကောရှစ်စန်း၊ အမြွှာနှစ်ယောက်ဖြစ်သည့် ဒယ်အိုး ၁၅ နှင့် ဒယ်အိုး ၁၆တို့အပြင် ဒယ်အိုး ၉ နှင့် ဒယ်အိုး ၁၁တို့လည်းရှိသည်။ လက်ရှိအချိန်တွင် အထက်တန်းလွှာနယ်မြေတွင် ကျန်ရှိနေခဲ့ကြသူများမှာ သူတို့သာဖြစ်၏။ အခြားပန်ဒါများက ကြယ်တာရာတစ်ခွင်လုံးတွင် ရောက်ရှိနေကြသည်။

"၂၄ လေးက ဘာဖြစ်လို့တုန်း… ဘာလို့ သူ့စိတ်အခြေအနေက သားပေါက်အခြေအနေ ဖြစ်သွားရတာလဲ… ပြီးတော့ ဘာလို့ သူ့တည်နေရာကို ရှင်းလင်းပစ်ရတာလဲ…"

ယခင်က အေဂျင့် သူ့ကို ရှာမတွေ့စေချင်သောကြောင့် ဖြစ်နိုင်ပေသည်။ ကောအာရှစ်စစ်က ရုတ်တရက် သူ့ဉာဏ်ရည်ကို ပြန်ရသွားပြီး ခဏတာစိတ်ရှင်းလင်းသွားခဲ့ဖူးသည်။ ပထမဆုံး သူ လုပ်သည့်အရာမှာ အင်တာနက်ပေါ်နှင့် နေရာတိုင်းရှိ သူ့ခြေရာလက်ရာများကို ဖျက်စီးပစ်ခြင်းဖြစ်၍ ကောမိသားစုအတွက်လည်း သူ့ကိုရှာရန် အခက်တွေ့စေခဲ့သည်။

"နေပါဦး…"

ဒယ်အိုး ၁၁က ပန်ဒါပုံစံဖြင့် အနောက်တိုင်းဝတ်စုံဝတ်ထားသည်။ သူသည်လည်း ဝဝဖိုင့်ဖိုင့်ဖြစ်ပြီး သေးငယ်သောဖဲပြားလေးနှင့် မျက်မှန်လေးတစ်လက်ကို ဝတ်ဆင်ထား၏။ ဤမျိုးဆက်တွင် သူက ဉာဏ်အထက်မြက်ဆုံးပင်။

လူတိုင်း အသက်ရှူသံများ ရပ်တန့်သွားကြသည်။

ခဏကြာပြီးနောက် ဖြေးညင်းစွာပြောလာ၏။

"စွမ်းရည်နဲ့ ငါတို့ဘိုးဘေးတွေရဲ့ တည်နေရာကို ကြိုတင်ခန့်မှန်းဖို့ အကြောင်းအကျိုးစွမ်းရည်ကို အလွန်အကျွံသုံးစွဲလိုက်တာကြောင့် ဖြစ်နိုင်တယ်… ဒါပေမဲ့ ငါတို့ ၂၄ လေးရဲ့ တည်နေရာကို ခန့်မှန်းကြည့်မယ်ဆိုရင်..."

ပန်ဒါတိုင်းတွင် ကြိုတင်ဟောကိန်းထုတ်နိုင်သည့် စွမ်းရည်ရှိကြပြီး ကောအာရှစ်စစ်တွင်လည်း ရှိပေသည်။ ၎င်းမှာ ကောအာရှစ်စစ်သည်လည်း အကြောင်းအကျိုးစွမ်းရည်ကုန်ခမ်းသွားခြင်းကို ဖော်ပြနေပေသည်။

တကယ်လို့ ဘိုးဘေး က ကောအာရှစ်စစ်ရဲ့ဘေးမှာ ရှိနေရင် သူတို့ ကောအာရှစ်စစ်ရဲ့တည်နေရာကို သိရုံနဲ့ သူ(ဘိုးဘေး) ဘယ်မှာရှိနေလဲဆိုတာကို မသိနိုင်ပေဘူးလား...

ကြိုတင်ဟောကိန်းထုတ်ခြင်းစွမ်းရည်၏ အကန့်အသတ်မှာ အနည်းဆုံးဆိုလျှင် ၁၅ ရက်အထိဖြစ်ပြီး အများဆုံးဆိုလျှင် ၃ နှစ်အထိ ဟောကိန်းထုတ်နိုင်သည်။

အချိန်ခဏကြာသည်အထိ ပန်ဒါများက တစ်ယောက်ကိုတစ်ယောက် ကြည့်ကာ ရုတ်တရက် ထခုန်လိုက်ကြသည်။

"အဲဒါက အဓိပ္ပါယ်ရှိတယ်… ငါ ဘာလို့ အဲဒီလိုမျိုး မစဉ်းစားမိရတာလဲ…"

"၁၁ မင်းက တကယ်ကို ဝက်ဝံလေးပဲ…"

အခန်းအတွင်းထဲတွင် တိတ်ဆိတ်သွား၏။

လူတိုင်း၏မျက်လုံးများအားလုံးက တစ်နေရာထဲတွင် စုစည်းသွားကြသည်။

"ရှေးဟောင်းကမ္ဘာ..."

အစပိုင်းတွင် တိတ်ဆိတ်နေပြီး နောက်ဆုံးတွင် ဒယ်အိုး ၉ က အားနည်းစွာ ဆက်လက်ပြောဆိုလာသည်။

"ငါ အခုလေးတင် မြင်လိုက်ရတယ် အာ... အဲဒါ... နောက် ၁၅ ရက်ကြာရင် ၂၄ လေးက ရှေးဟောင်းကမ္ဘာပေါ်မှာ ရှိလိမ့်မယ်…"

လူတိုင်း: ⊙⁠﹏⁠⊙

-----

ကုယွီမြန် အိမ်သို့ ပြန်ရောက်လာချိန်တွင် ဟက်စကီးလေး သူ့ပါးစပ်တွင် ဖောင်တိန်ကိုကိုက်ကာ လှေကားခုံတွင် သနားစရာကောင်းစွာ ထိုင်နေသည်။ သူက ဆောင်းဦးရာသီ မွန်းတည့်နေ၏အောက်တွင် တုန်ရီနေကာ ကုယွီမြန် အိမ်ပြန်အလာကို စောင့်ဆိုင်းနေသည်။

"အာ့အာ…"

ကုယွီမြန် သူ့ခေါင်းလေးကို ပွတ်သပ်လိုက်သည်။

"မင်း စာမရေးချင်ရင် ရေးစရာမလိုပါဘူး…ငါတို့မိသားစုမှာ စားစရာ၊သောက်စရာတွေ အများကြီးရှိပါတယ်…"

ဤကောင်ငယ်လေးက စိတ်ကူးယဉ်မြို့တော်မှ ပြန်လာပြီးနောက် သူ့အိမ်ကို တစ်စစီဖြုတ်ပစ်ချင်သည့် အင်အားများသည် ပြောင်းလဲသွားပြီး တစ်ခါတစ်ရံ တစ်စုံတစ်ခုကို ရေးချင်နေပေသည်။ သို့သော် စိတ်ကူးစိတ်သန်းများ ပိတ်ဆို့နေချိန်ဖြစ်ပြီး စာအရေးအသားနှင့် ပတ်သက်ပြီး သူ စိတ်မကျေနပ်သည့်အခါ ကိုက်ဖြဲပြီး ဆက်လက်ရေးသားပေလိမ့်မည်။

တစ်ခါတစ်လေ ကုယွီမြန် ထိုစာရွက်အပိုင်းအစလေးများကို ကောက်ယူကာကြည့်လိုက်ပြီး ထိုစာကြောင်းအတိုလေးများ၏ အဓိပ္ပါယ်ပြည့်စုံမှုကြောင့် အံ့ဩသွားရ၏။

သူတို့၏ဟက်စကီးလေးက ပါရမီရှင်အဖြစ်သို့ အမှန်တကယ် ပြောင်းလဲသွားသည့်ပုံပင်။

"အာဝူး အာဝူး..."

ဟက်စကီးလေးသည် သူ့နားရွက်များကို ကုတ်ခြစ်လိုက်သည်။ ကုယွီမြန်၊ နှင်းကျားသစ်လေး၊ ထန်ယွမ်လေး၊ မြေခွေးလေးနှင့် သူကိုယ်တိုင်၏အကြောင်းကို ဇာတ်လမ်းတစ်ပုဒ် ရေးသားချင်ကြောင်းပြောပြရန် ရှက်ရွံ့နေသော်လည်း သူ့အရေးအသားနှင့်ပတ်သက်ပြီး သဘောမတွေ့သေးပေ။

၎င်းက ပိုက်ဆံရရန်၊ မရရန်နှင့် ဘာမှမပတ်သက်ပေ။ သူ ဤအတိုင်း ရေးချင်နေရုံသာဖြစ်၏။ သုံးမိနစ်ကြာတိုင်း အမြဲတက်ကြွနေသော ကလေးတစ်ယောက်က သူ့ဘဝတွင် ပထမဆုံးအကြိမ်အဖြစ် တစ်စုံတစ်ခုအတွက် စိတ်အားထက်သန်မှုတစ်ခု ဖြစ်ပေါ်လာခဲ့သည်။

"ဟုတ်ပြီ…ယွမ်ယွမ်နဲ့ချိုးချိုးက ဘယ်ရောက်နေလဲ…ထွမ်ထွမ်ရော... ထွမ်ထွမ်..."

နှင်းကျားသစ်လေးအကြောင်း ရောက်လာချိန်တွင် ကုယွီမြန်မှာ ပြောစရာစကားကင်းမဲ့သွားရ၏။

ဘယ်လိုပြောရမလဲ...

ထိုညကတည်းက နှင်းကျားသစ်လေးက ဘယ်တော့မှ လူသားပုံ ပြန်မပြောင်းခဲ့ပေ။

ကုယွီမြန်၏ဒေါသကြောင့် ပြောလိုက်သည့် "ခွဲခွာခြင်း" က သူ့ကို ကြောက်လန့်သွားစေခြင်း ဖြစ်နိုင်ပေသည်။

နှင်းကျားသစ်လေးက သူ ဘာမှနားမလည်ချင်ဟန်ဆောင်နေ၏။ ကုယွီမြန် သူနှင့်စကားပြောရန် အကြိမ်ကြိမ်ကြိုးစားခဲ့သည်။ ဤနည်းအတိုင်းဆက်သွားနေခြင်းက နည်းလမ်းမဟုတ်သော်လည်း သူတို့နှစ်ယောက်က ဘာမှမဖြစ်သွားခဲ့သလို အဆုံးသတ်သွားရသည်။

သို့သော် နည်းလမ်းမရှိပေ။ နှင်းကျားသစ်လေး အကြောင်းနှင့်ပတ်သက်ပြီး ကိုင်တွယ်ဖြေရှင်းရန် ကုယွီမြန်တွင် အမှန်တကယ် နည်းလမ်းမရှိပေ။ ရှို့ဟန်ကို ပုံစံပြန်ပြောင်းရန် ဖိအားမပေးနိုင်ခဲ့ပေ။

ထို့အပြင် နှင်းကျားသစ်လေးက အိမ်တွင် ထူးဆန်းသောအရာများအားလုံးကို ဝယ်ထားပေလိမ့်မည်။

ဥပမာအားဖြင့် လမ်းထဲတွင် ကုယွီမြန် ကြည့်ခဲ့သော အလှစိုက်ပန်းအိုး။

ဥပမာအားဖြင့် ကြယ်ကွန်ရက်ပေါ်တွင် အချိန်ဖြုန်းသည့်အခါ ကုယွီမြန် ရှာဖွေခဲ့သည့် ရှားပါးသည့် အိမ်တွင်းအလှစိုက်ပန်းပင်အမျိုးမျိုး။

ဥပမာအနေဖြင့် ကုယွီမြန် အပြင်ထွက်သည့်အခါ သူ နားခဲ့သော အဆောက်အဦးအမြင့်ကြီးပင်။

ကုယွီမြန် "....."

ပုံစံမပြောင်းလဲမီက ရှို့ဟန်တွင် ထိုကဲ့သို့အကျင့်စရိုက်မျိုးရှိကြောင်း သူ မခန့်မှန်းနိုင်ခဲ့ပေ။

သို့သော် ယနေ့တွင် သူတို့ ထိုအကြောင်းနှင့်ပတ်သက်ပြီး စကားပြောကိုပြောရပေလိမ့်မည်။ မည်သို့ပင်ဆိုစေကာမူ မကြာမီ သူက ရှေးဟောင်းကမ္ဘာသို့ သွားရပေလိမ့်မည်။

"ရှို့ဟန်…"

ကုယွီမြန် ဟက်စကီးလေးကို ကောက်ချီကာ သူနှင့်အတူ စာရွက်နှင့်ဖောင်တိန်များပင် ပါလာခဲ့ပြီး အခန်းထဲသို့ ခေါ်သွားခဲ့သည်။

ချိုးချိုး... ယွမ်ယွမ်..."

🐯🐯🐯

Prev Next