MM Story Teller

Chapter 107

Viewers 19k

🐯Chapter 107

စိတ်ကူးယဉ်မြို့တော်တည်နေရာမှ ကီလိုမီတာ အနည်းငယ်အကွာတွင် လမင်းရေကန်မှာ ကျယ်ပြောသောည၌ ရောင်ပြန်ဟပ်နေသည်။ နွေးထွေး၍အရိပ်ရသော

သစ်ပင်အိမ်က ညသန်းခေါင်ယံတွင် ရေကန်ထဲ၌ ကောင်းကင်မီးအိမ်ကဲ့သို့ ရှိနေသည်။

သစ်ပင်အိမ်လေးထဲတွင်...

ကုယွီမြန်က ဝါးပေါင်းအိုးအား ထုတ်နေပုံကို အမွေးလုံးလေး လေးလုံးမှစောင့်ကြည့်နေသည်။ ဖြူဖွေးကြည်လင်ပြီး ပါးလွှာသောအရေပြား နှင့် လုံလုံလောက်လောက် အစာသွပ်ထားသော ဖက်ထုပ်သေးသေးလေးများကို ပေါင်းအိုးထဲတွင် စီစီရီရီ ပေါင်းထားသည်။

အပေါ်ယံအရေခွံက ပါးလွှာသော်လည်း ရွှေရောင်သန်းသောကဏန်းမှုန့်ဖြင့် ထုပ်ထားသည့်အတွင်းထဲမှ နူးညံ့လတ်ဆတ်သောအသားကိုမြင်နိုင်သည်။အပေါ်ယံအရေခွံက ပါးလွှာပြီး အသားမှာနူးညံ့သည်။ တူနှင့်တစ်ကြိမ်ခန့်

ထိုးလိုက်ရုံဖြင့်ပင် ကဏန်းစွပ်ပြုတ်ရည်က လျှံထွက်လာလိမ့်မည်။

မွှေးပျံ့လတ်ဆတ်သောအနံ့က အပူငွေ့နှင့်အတူ ထွက်ပေါ်လာပြီး ပထမဦးစွာ ရှာလကာရည်နှင့်ဂျင်း၏ လတ်ဆတ်သောရနံ့ထွက်လာသည်။ နောက်တစ်ကြိမ် ခပ်ပြင်းပြင်းရှူကြည့်လိုက်သည့်အခါ ကဏန်းအသားစွပ်ပြုတ်က ချိုမြိန် မွှေးပျံ့ကာ အပူငွေ့နှင့်အတူ နှာခေါင်းတွင်းသို့ ထိုးဖောက်ဝင်ရောက်လာပြီး လူတိုင်းအား ဆာလောင်စေသည်။

မကြာမီတွင် ဟက်စကီးလေး၏အမြှီးမှာ လျှပ်စစ်ပန်ကာ အသွင်သို့ ပြောင်းသွားသည်။ ဦးစွာ သူက စွပ်ပြုတ်အနံ့ခံရန် ကုယွီမြန်၏ လက်မောင်းအတွင်းသို့ဝင်ပြီး ခေါင်းကိုမော့၍ စိတ်လှုပ်ရှားစွာဖြင့် အူလိုက်သည်။

"အာဝူး...အာဝူး..."

ဧရာမ နဂါးကြီးထံမှလည်း နှာမှုတ်သံထွက်လာသည်။

ထို့ပြင် ပန်ဒါလေးနှင့်မြေခွေးလေးမှာ တအီအီအသံပြုရင်း နှင်းကျားသစ်လေးသည်လည်း သူ၏လက်သည်းလေးများဖြင့် ပန်းကန်ပြားအား တွန်းလိုက်သည်။ ရေသူမလေးက အမြှီးဖြင့် ရေမျက်နှာပြင်သို့ ရိုက်လိုက်သည်။

ကံကောင်းထောက်မစွာ ကုယွီမြန်က မှတ်ချက်မျက်နှာပြင်၏ အသံအား ပိတ်ထားခဲ့ပြီးဖြစ်သည်။ သို့မဟုတ်လျှင် ထွက်ပေါ်လာသည့် တ"ဘီ့ ဘီ့" အသံများကြားနေရလိမ့်မည်။

ကြည့်ရှုသူများက "အားးး"၊ "မြန်မြန်လုပ်ပါ"၊ "ညကျမှ အဆိပ်ခပ်ပြီ"ကဲ့သို့ အဓိပ္ပါယ်မရှိသော စာကြောင်းထောင်ပေါင်းများစွာပို့ခဲ့သည်။ ယခုအခါ ကြည့်ရှုသူအရေအတွက်က သန်းတစ်ရာ ကျော်သွားပြီဖြစ်ပြီး ညသန်းခေါင်၌ပင် လျော့ကျမသွားဘဲ ဆက်လက်တိုးတက်နေသည်။

မူလက သာယာသောသုခဘုံလေးမှာ ဆူညံပွက်လောရိုက်လာသည်။

ကုယွီမြန်က ရယ်ရမည်လား ငိုရမည်လား မသိတော့ချေ။

"မင်းတို့အရင်က ဒါကို စားဖူးပြီးသားမလား... ဘာလို့ အရမ်းစိတ်လှုပ်ရှားနေကြတာလဲ..."

[တရုတ်ပြည်တောင်ဘက်ကကျားက ဘယ်တော့မှချိန်းမတွေ့ဘူး : အမှန်အတိုင်းပြောရရင် ငါအခုစိတ်ကူးယဉ်မြို့တော်ကိုသွားတဲ့ လက်မှတ် ကြည့်နေတာQAQ အဲ့ဒီကို အခုချက်ချင်းလာချင်နေပြီ...]

[အလှကုန်တွေကို လွှင့်ပစ်မယ် : ငါလည်းသွားချင်တယ်...လုပ်စမ်းပါ...]

မှတ်ချက်မျက်နှာပြင်က သူ့အား ပုံမှန်အတိုင်း အားပေးနေသည်။ လက်တွေ့တွင်လည်း သူ့အား မျှော်လင့်ချက်အပြည့်ဖြင့် ကြည့်နေသည့် မျက်ဝန်းခြောက်စုံရှိသည်။

"ရတော့မယ်.."

ကုယွီမြန်က ရေသူမလေး အိမ်ပြန်ယူသွားနိုင်ရန်အတွက် ဖက်ထုပ် ခြောက်ဗန်းပေါင်းထားပြီး သူမ၏သားနှင့်ပါတနာအတွက် ရှာလကာရည်နှင့် ဂျင်းအားပြင်ဆင်ထားပေးသည်။

"ပထမဆုံး စွပ်ပြုတ်ကိုအရင်သောက်ပါ... ပြီးရင် ပေါက်စီတစ်လုံးလုံးကို ရှာလကာရည်နဲ့ဂျင်းထဲနှစ်ပြီး ကိုက်စားလိုက်..."

ကုယွီမြန်ပြောလိုက်သည်။

အာ့ဟာလေးမှလွဲ၍ ကလေးအားလုံးက ထိုကဲ့သို့ဖက်ထုပ်စွပ်ပြုတ်အားစားခဲ့ဖူး၍ ယခုအခါ သူတို့က စားသောက်သည့်နည်းနှင့် ရင်းနှီးနေသည်။ ရေသူမလေးနှင့်နဂါးကြီးက

သူတို့၏အတွေ့ကြုံရှိသော ဧည့်သည်ကုယွီမြန်

ထံ မှီခိုနေစဥ်တွင် ကုယွီမြန်မှ ဟက်စကီးလေးအား

စားသောက်နည်းသင်ပေးနေသည်။

ပေါက်စလေးများက တူမသုံးနိုင်သည့်အတွက် ကုယွီမြန်မှ သူတို့အတွက် လက်အိတ်များ ပြင်ဆင်ပေးထားသည်။ ပန်ဒါလေးမှာ ကို့ယို့ကားယားနှင့် သူ၏လက်ကလေးကိုဆန့်ထုတ်၍ ဖက်ထုပ်လေးအားကိုင်ကာ တစ်ကိုက်ကိုက်လေသည်။

ထန်ပေါင်နှင့်ယှဥ်လျှင် ဖက်ထုပ်လေးများက ပို၍ချိုကာ တောင်ပိုင်းအရသာနှင့်နီးစပ်သည်။ သကြားခဲများထည့်ထားသည့်အတွက် မည်သည့်ယှဥ်ပြိုင်မှုမဆို အနိုင်ရပေလိမ့်မည်။ လတ်ဆတ် နူးညံ့သောကဏန်းအသားကို ထပ်မံဖြည့်ထားသည့်အတွက် ၎င်းက ပျစ်နှစ်အရသာရှိသော ဟင်းချိုထဲတွင် အရည်ပျော်သွားသည်။

ပါးလွှာသောအပေါ်ယံအရေခွံအား ကိုက်လိုက်ပြီးနောက် အဆီများပြီးမအီသော စွပ်ပြုတ်နှင့် လတ်ဆတ်သော ကဏန်းစွပ်ပြုတ်က လည်ချောင်းထဲသို့ ချက်ချင်းဝင်လာသည်။ ထို့ပြင် ရှာလကာရည်နှင့်ဂျင်းဖြင့်ထုပ်ထားသည့် ဆောင်းဦး ကဏန်းနှင့်အသားများ ပြည့်နှက်နေသည်။အပြင်ပိုင်းက ကြွပ်ရွပြီး အတွင်းတွင် နူးညံ့ပျော့ပျောင်း၍ သူတို့မြည်းစမ်းကြည့်သည့်အခါ မေ့နိုင်ရန်ခက်ခဲလှသည်။

ကြည်လင်ပြီးအရသာရှိသော ဖက်ထုပ်သေးသေးလေးများကြောင့် သူတို့ တစ်ခုပြီးတစ်ခု မစားဘဲ မနေနိုင်ခဲ့ချေ။ တစ်ကိုက်စာ ဖက်ထုပ်လေးများက ဝမ်းဗိုက်အတွက်သင့်တော်ပြီး အရသာရှိသည်။ ဤကဲ့သို့ပျော်ရွှင်မှုက လူတိုင်းအား စိတ်သက်သာစွာသက်ပြင်းချစေသည်။

မြေခွေးလေးနှင့် နှင်းကျားသစ်လေးမှာ အကျွမ်းကျင်ဆုံးဖြစ်သည်။ သူတို့က အကြိမ်များစွာ စားခဲ့ဖူးသည်။ နှင်းကျားသစ်လေးက ကုယွီမြန်၏လက်မောင်းထဲတွင်လှဲနေပြီး သူ၏လက်ဖဝါးအား သတိမမူမိစွာလျက်နေသည်။

လှပသောမျက်နှာလေးနှင့် ရေသူမလေးက ဖက်ထုပ်အား အာရုံထွေပြားခြင်းမရှိဘဲ စားသောက်နေသည်။ သူမကိုယ်တိုင် ဖက်ထုပ်အများစုအား စားသုံးခဲ့ဖူးသော်လည်း မူလတွင် အချိန်အတော်ကြာ ကြည့်နေခဲ့ပြီး ဖက်ထုပ်တစ်ခုအားစားရန် ဝန်လေးနေခဲ့သည်။ သို့သော် ယခုချိန်၌ စုံတွဲမှာ စိတ်သက်သာယာ ရစွာသက်ပြင်းချလိုက်ပြီး သူတို့၏နှာခေါင်းထဲမှ အငွေ့အနည်းငယ်ထွက်လာသည်။

အစပိုင်းကတည်းက မှတ်ချက်မျက်နှာပြင်မှာ ပြင်းထန်စွာ

တောက်လောင်နေခဲ့ပြီး ကျော်ကြားမှုလှိုင်းကလည်း ယခင်ကထက် မြင့်တက်လာသည်။

[သစ်တော်ပန်းပွင့်လေးအဖြူရောင်လေး : အရသာရှိတယ် အရသာရှိတယ် အရသာရှိတယ်... အရမ်းကိုအရသာရှိတယ်... တစ်ခါကိုတစ်ကိုက်ကိုက်ပြီး အကြာကြီးစားနိုင်တယ်... ဒါပေမယ့် တကယ်မစားရတဲ့အတွက် ငါငိုနေပါပြီ...အားးး...]

[ငါနဲ့နေပေးပါ : စွပ်ပြုတ်က အရမ်းနူးညံ့ပြီး အရသာရှိတယ်... လက်သည်းတွေကို ရူးသွပ်စွာလျက်ရင်း သွားရည်တွေကျနေပါပြီ...ဒီနေ့ရဲ့ ဝိတ်ချမယ့်အစီအစဥ်ကလည်း

ပျက်စီးသွားပြန်ပြီ...]

[တိမ်လေးတစ်ခုရှိတယ် : ကြွပ်ရွပြီး အရသာရှိတယ်... ငါ လက်ဆောင်တွေအားလုံးရပြီးပြီ... တင်ဆက်သူရေ ကျေးဇူးပါ...]

[အသုံးပြုသူ 197827: အဓိကစာမျက်နှာက ထောက်ခံချက်ကြောင့် ဒီကိုရောက်လာခဲ့တာ... သေစမ်း...ဒီညငါဘယ်လိုအိပ်ရတော့မလဲ...]

အမျိုးမျိုးသောအထူးပြုလုပ်ချက်များနှင့် မှတ်ချက်များဖြင့် မျက်နှာပြင်တစ်ခုလုံးပြည့်နေသည်။ ၎င်းတို့အားလုံးအားဖတ်ရန် အချိန်မရှိပေ။ ကြည့်ရှုသူအရေအတွက်ကလည်း သန်း၁၄၀အထိ တိုးသွားသည်။

စိတ်ကျေနပ်စရာကောင်းပြီး ပျော်ရွှင်ဖွယ် ညတစ်ညပင်ဖြစ်သည်။

ဖက်ထုပ်များက အလွန်အရသာရှိသောကြောင့် စကားပြောရန် အချိန်မရှိချေ။ ကြည့်ရှုသူများက ဟင်းပွဲချင်း တိုက်သံကိုပင် ကြားနေရသည်။ အနောက်တွင် မီးလုံးနှစ်လုံးကိုထားရှိပြီး အကွာအဝေးအနည်းငယ်အကွာမှ ရေကန်ဘေးရှိမီးပုံ၏ အလင်းရောင်က တောက်ပနေကာ သူတို့အားလုံးအတူထိုင်နေကြသည်။

ဖက်ထုပ်လေးများ၊ ကြက်ဥစိမ်းစွပ်ပြုတ်၊ ရေကန်မှ

လေညင်း၊ ညဘက်တွင်ပျော်ဝင်နေသောလရောင် နှင့်ချစ်ခင်ရသူများ ဝိုင်းရံနေသည်။ ယခုထက် ပိုမိုကောင်းမွန်သည့် ဘဝတစ်ခုအား တွေးကြည့်ရန် ခက်ခဲလှသည်။

သုံးဖက်မြင်စနစ်(3D)တွင် ကြည့်ရှူသူများက အလွန်ကျေနပ်နေသော ထန်ယွမ်လေး၏ရှုထောင့်မှ ကြည့်နေသည်။ သူက အရသာရှိသော ဖက်ထုပ်များနှင့် ပါးစပ်အပြည့် ကြက်ဥစိမ်းစွပ်ပြုတ်နှစ်ငုံကို သောက်ပြီးနောက် ကုယွီမြန်၏ လက်မောင်းထဲတွင် ပျင်းရိစွာ အိပ်ပျော်သွားခဲ့သည်။ ညက မီးရောင်တဖျပ်ဖျပ်နှင့် ရေကန်မှ လေပြေလေအေးလေး တိုက်ခတ်လာသည်။

ပန်ဒါလေးက ကျေနပ်အားရစွာ လေချဥ်တက်ပြီးမြေခွေးလေးက သူ၏နောက်ကျောကို ပုတ်ပေးနေသည်။ ရေသူမလေးက ဧရာမနဂါးကြီး၏ဦးချိုကိုထိပြီး သီချင်းစတင်ဆိုတော့သည်။

ကုယွီမြန်က ဤခရီးတွင် ဟာဝိုင်ယီ ဂီတာကလေးအား ယူလာခဲ့ရာ ၎င်းကိုထုတ်ပြီး ရေသူမလေး၏သီချင်းနှင့် အတူတီးခတ်နေသည်။ နှင်းကျားသစ်လေးက လက်ဆန့်ပြီး ကုယွီမြန်၏လက်ဖဝါးအားကုတ်ခြစ်ကာ ကုယွီမြန်၏လက်မောင်းထဲတွင် လှဲနေသော ဟက်စကီးလေးအား တွန်းထုတ်လိုက်သည်။

[နည်းပညာသစ်ပင် :ငါအချိန်ပိုလုပ်နေရင်း ဘာလို့ဒီတိုက်ရိုက်ထုတ်လွှင့်မှုကိုကြည့်မိတာလဲ... ဒါကိုယ့်ကိုကိုယ်နှိပ်စက်နေတာ မဟုတ်ဘူးလားTVT]

[Aicyhuh:ဒါ ကောင်းမွန်တဲ့ဆောင်းဦးတစ်ခုပဲ... အမှန်တိုင်းပြောရရင် မြန်မြန့်လို ဘဝမျိုးနေနိုင်အောင် ငါအလုပ်ထွက်ဖို့ကြိုးစားနေတယ်...]

၁၁နာရီအနည်းငယ်ကျော်ပြီဖြစ်ပြီး သူတို့က

ယခုမှ စားသောက်ပြီးစီးသွားခြင်းဖြစ်သည်။ ကြည့်ရှုသူအရေအတွက်က နောက်ထပ် ၁၀သန်းတိုးလာပြီး ယခုအခါ သန်း ၁၅၀သို့ ရောက်ရှိလာသည်။

ကုယွီမြန်က ကြည့်ရှုသူအရေအတွက်အားကြည့်ပြီး ကူကယ်ရာမဲ့သွားရသည်။ တိုက်ရိုက်ထုတ်လွှင့်မှုအားအဆုံးသတ်ရန်လိုအပ်သည်။ သို့မဟုတ်ပါလျှင် အချို့ကြည့်ရှုသူများက ညည့်နက်သည်အထိနေလိမ့်မည်။

"ယေဘုယျအားဖြင့်ပြောရရင် ၆နာရီကလုံလောက်ပြီ..."

ကုယွီမြန်က လက်ဆန့်ပြီး ပန်ဒါလေး၏ဗိုက်အား ပွတ်လိုက်သည်။

"မင်းအရမ်း ပြည့်မနေဘူးလား... ဗိုက်ဆာသေးလား ဟမ်..."

ပန်ဒါလေး : "အီ"

ယခင်ဘဝ ကုယွီမြန်၏မွေးရပ်မြေတွင် သူက မနက်စာအတွက် လတ်ဆတ်သောအသားဖက်ထုပ် ၆ခု၊ ကဏန်းသားဖက်ထုပ် ၆ခု စုစုပေါင်း ဖက်ထုပ်၁၂ခုအား စားသုံးသည်။ သို့သော် ညအချိန်တွင် ထထိုမျှမလိုအပ်ဘဲ ၆ခုဆိုလျှင်လုံလောက်သည်။

ညစာစားပြီးနောက် ရေသူမလေးနှင့် နဂါးကြီးတို့ အိမ်ပြန်ရမည့်အချိန်ပင်။

"မစ္စတာနစ်ခ်... မစ္စအန်နာ..."

ကုယွီမြန်က ဖက်ထုပ်များထည့်ထားသည့် အပူခံအိတ်အား ရေသူမလေးထံကမ်းပေးလိုက်သည်။

" စိတ်မရှိဘူးဆိုရင် အိမ်အပြန်ကျယူသွားပါဦး...ဖက်ထုပ်တွေကို ပေါင်းအိုးထဲထည့်ပေါင်းပြီး စားလို့ရတယ်... အရသာကတော့ ချက်ချင်းစားတာလောက် မကောင်းလောက်ဘူး..."

အဆုံးတွင် အကောင်းဆုံးအရသာရှိရန်အတွက် ပါဝင်ပစ္စည်းများ လတ်ဆတ်ရန်လိုအပ်သည်။

သူမက စားသောက်ပြီးနောက် အပြန်အတွက် ယူသွားနိုင်ရန် မမျှော်လင့်ခဲ့ချေ။ ယခုအချိန်၌ ရေသူမလေးမှာ မနေနိုင်တော့ချေ။ သူမ၏လက်အားမြှောက်ကာ ကုယွီမြန်ကိုလာခိုင်းလိုက်သည်။ လူတိုင်းမတုံပြန့်နိုင်မီတွင် သူမက ပြုံး၍ သူ့မျက်နှာအားနမ်းလိုက်သည်။

နှင်းကျားသစ်လေး၏မျက်နှာမှာ မဲမှောင်သွားတော့သည်။

သေစမ်း...

ကုယွီမြန် :"..."

-----

မိနစ်နှစ်ဆယ်ကြာပြီးနောက်…

သစ်ပင်အိမ်လေး၏အကျယ်အဝန်းက မကြီးမားသော်လည်း အသုံးအဆောင်များ အလွန်ပြည့်စုံပြီး ရေပူချိုးရန်အတွက် သစ်သားပုံးများလည်း ရှိသည်။ ကုယွီမြန်က သစ်သားပုံးအား ဆွဲထုတ်ပြီး ရေထည့်လိုက်သည်။ ပဝါများ၊ ရေချိုးပစ္စည်းများ၊ ခေါင်းဖြီးများ၊ ဘရပ်ရှ်များနှင့်ဆောင်းဦးရာသီအတွက် ကလေးလိမ်းအဆီများ အားလုံး

အဆင်သင့်ရှိနေသည်။ ကုယွီမြန်က ကလေးများကို ရေနွေးနှင့် ရေချိုးခိုင်းလိုက်သည်။

"ငါတို့အားလုံး အလုပ်ရှုပ်တဲ့နေ့ပဲ... ပိုပြီးသက်သောင့်သက်သာဖြစ်ဖို့ ရေပူနဲ့ရေချိုးကြမယ်..."

မြေခွေးလေးက ကုယွီမြန်၏လက်မောင်းထဲတွင် ဘောလုံးလေးကဲ့သို့ကွေးနေသည်။ ကုယွီမြန်က လက်တစ်ဖက်ဖြင့် ဘရပ်ရှ်လေးအားထုတ်ပြီး ဦးစွာဖီးပေးလိုက်သည်။ ထို့နောက် "ရေချိုးပြီးရင် တိုက်ရိုက်ထုတ်လွှင့်မှု ပြီးပါပြီ" ဟုပြောလိုက်သည်။

သန်း ၁၆၀ နီးပါးလူများက ထွက်ခွာရန် တွန့်ဆုတ်နေကြသည်။ ပရိသတ်အများစုက သူ၏တိုက်ရိုက်ထုတ်လွှင့်မှုအတွက် မီးရှူးမီးပန်းများ ပို့ပေးကြသည်။

['မြန်မြန်'ရေ ညဥ့်မနက်သေးပါဘူး... အခုမှ ညကစရုံရှိသေးတယ်QAQ]

[မင်း တိုက်ရိုက်ထုတ်လွှင့်တာ ၅နာရီရှိပြီလား…ဒါပေမယ့် ဘာလို့ ၅မိနစ်လောက်ပဲရှိတယ်လို့ ခံစားနေရတာလဲ...အားလုံးက ရုတ်တရက် ပြီးသွားတယ်...]

[+1,ငါလည်းပျော်ပျော်ကြီးကြည့်နေခဲ့တာ...]

ကုယွီမြန်က ရွေးချယ်စရာမရှိဘဲ ပြောလိုက်ရသည်။

"ညဥ့်နက်တဲ့အထိမနေကြပါနဲ့... အဲဒါက မင်းရဲ့ခန္ဓာကိုယ်ကိုထိခိုက်လိမ့်မယ်... ကျွန်တော် တိုက်ရိုက်ထုတ်လွှင့်မှုကို မနက်ဖြန် မနက်ပြန်စပါမယ်... မင်းတို့ကြိုက်တဲ့အချိန် ကြည့်လို့ရတယ်..."

မနက်ခင်း၌ သူက အယ်လ်ဘတ်တွင် စတင်ဖြန့်ချီမည့် ဟင်းပွဲအသစ်ဖြစ်သော အလွှာအလွှာများဖြင့် ထပ်တစ်ရာမုန့်ကြွပ် လုပ်ရန် စီစဥ်ထားသည်။ သူက ကလေးများကို ဦးစွာမြည်းစမ်းစေချင်သည်။

ရေချိုးသည့်နေရာမှာ သေးငယ်သောပလက်ဖောင်းပေါ်တွင်ဖြစ်သည်။ ယနေ့ ကောင်းကင်ပေါ်တွင် လပြည့်နေ၍ လရောင်အောက်တွင် ရေကန်အလင်းဖြင့် ရေပူချိုးရခြင်းမှာ အလွန်ကျေနပ်စရာကောင်းသည်။

ချွေးပေါက်တိုင်းပွင့်ပြီး နွေးထွေးသော အပူငွေ့များအား အရည်ပြားထဲသို့စီးဝင်စေသည်။ ထို့ပြင် ကုယွီမြန်က ကလေးများကို ဖီးသင်ပေးပြီး အလှည့်ကျနှိပ်ပေးသည်။ သူတို့က မေပယ်ရွက်နှင့် ထင်းရှုးနံဖျော့ဖျော့အား ရနိုင်သည်။

ဤညပြီးနောက် သူတို့၏ပင်ပန်းမှုအားလုံးက ရေပူနှင့်အတူ ပျောက်ကွယ်သွားသည်။

ကြည့်ရှုသူများက သူတို့၏မျက်လုံးများကို မပိတ်ဘဲ မနေနိုင်ခဲ့ချေ။ ယခုအခိုက်အတန့်၏ ငြိမ်းချမ်းမှုအား လေးလေးနက်နက် ခံစားလိုက်သည်။ ကုယွီမြန်က မကြာမီတွင် တိုက်ရိုက်ထုတ်လွှင့်မှု အဆုံးသတ်တော့မည်ဟု ပြောခဲ့သော်လည်း မှတ်ချက်မျက်နှာပြင်၏ စိတ်အားထက်သန်မှုမှာ မပြောင်းလဲဘဲ ကျန်ရှိနေဆဲပင်။ ကြည့်ရှုသူများမှာလည်း သန်း ၁၆၀ကျော်သွားပြီး ဆက်လက်တိုးနေဆဲပင်။

ယခုကဲ့သို့အချိန်မျိုးတွင် ကြယ်တာရာကောင်းကင်မြို့တော်၏ ထိပ်တန်းတင်ဆက်သူများပင်လျှင် ယခုကဲ့သို့ကြည့်ရှုသူအရေအတွက်ထိ ရောက်ရှိရန်ခက်ခဲပြီး ဆက်လက်၍တိုးမလာနိုင်ချေ။ ကုယွီမြန်က ယခုအချိန်၌ သူ၏ကိုယ်ပိုင် တိုက်ရိုက်ထုတ်လွှင့်မှု စတူဒီရိုသို့ ပလက်ဖောင်းတစ်ခုလုံး၏ ကြည့်ရှုလူများအားယူထားသည်။

ပန်ဒါလေးက ရေကန်ထဲတွင် သက်သောင့်သက်သာလှဲနေပြီး လက်ကလေးဖြင့် သူ၏ဗိုက်ပေါ်သို့ရေများခပ်ယူနေသည်။ ဟက်စကီးလေးမှာ စိတ်လှုပ်ရှားစွာဖြင့် ရေပူထဲသို့ သူ့ခေါင်းအားနှစ်ထားသည်။ သူက သူ့ကိုယ်သူ ငါးတစ်ကောင်ဟုထင်နေကာ ရေပူဖောင်းများမှုတ်ထုတ်ပြီး ရေနစ်လုနီးပါးဖြစ်သွားကာ ကုယွီမြန်ထံမိသွားသည်။ နှင်းကျားသစ်လေးက ရေကန်ထဲသို့ ပထမဦးစွာ ခြေချလိုက်ပြီး သူ၏လက်ဖဝါးများကိုနှစ်ကာ မျက်နှာသစ်လိုက်သည်။ သူ့လက်ဖဝါးလေးအားဆန့်၍ ကုယွီမြန်၏ပါးကိုထိပြီး ဖိကာ ထပ်မံပွတ်လိုက်သည်။

ကုယွီမြန်က အစပိုင်းတွင် မသေချာသော်လည်း ထိုနေရာက ရေသူမလေးသူ့အားနမ်းသွားသောနေရာဖြစ်ကြောင်း သတိရသွားသည်။

ကုယွီမြန် :"...."

သူက သားပေါက်လေး၏လက်ဖဝါးအား ဖယ်ကာ ပြောလိုက်သည်။

"သူက လက်ထပ်ပြီးပြီ... သူ့ရဲ့ကလေးတွေကလည်း အရမ်းကြီးနေပြီမို့လို့ မိထွေးတွေ ပထွေးတွေကိုလက်ခံမှာမဟုတ်ဘူး...စိတ်မပူပါနဲ့..."

ထို့ပြင် ရေသူမလေးက စိတ်အားထက်သန်သူဖြစ်ပြီး သူ၏ယခင်ဘဝမှ အနောက်တိုင်းနိုင်ငံသားများကဲ့သို့ပင်။ ကုယွီမြန်က အနည်းငယ် သက်သောင့်သက်သာမရှိသော်လည်း ဘာမှမဖြစ်ချေ။

နှင်းကျားသစ်လေးမှာမူ သက်သောင့်သက်သာမဖြစ်ဘဲ မဲမှောင်သောမျက်နှာထားနှင့် ရှိနေသေးသည်။

ကုယွီမြန် ကူကယ်ရာမဲ့သွားရသည်။ ဦးစွာ သူက နှင်းကျားသစ်လေးအား ရေချိုးပေးပြီးအမွေးများဖြီးပေးကာ

ရေချိုးပုဝါကြီးဖြင့်ပတ်၍ ချီထားလိုက်သည်။ ထို့နောက် ယွမ်ယွမ်၊ ချိုးချိုးနှင့် အာ့အာတို့ကို ဆေးကြောပေးသည်။သူကိုယ်တိုင် ရေအမြန်ချိုးပြီး ပြန်လာသည့်အခါ ထန်ယွမ်လေးက အလွန်ပင်ပန်းသဖြင့် သူ့မျက်လုံးများကို လက်ဖဝါးလေးဖြင့် ပွတ်သပ်နေသည်။

"အိပ်ငိုက်နေပြီလား... အိပ်ရာဝင်ကြစို့..."

🐯🐯🐯

Prev Next