Chapter 71
Viewers 5k
Chapters 167

👟Chapter 71

[ ကိုယ် မင်သကိုချစ်တယ်၊ ကိုယ် မင်သကိုချစ်တယ်၊ ကိုယ် မင်သကိုချစ်တယ် ]



ဟယ့်ယလင်ထင်သည် ဖဌောင့်တန်သ‌နေသော နဟုတ်ခမ်သပါသမျာသ၊ မည်သည်ကိုမဟ စိတ်မဝင်စာသသည့် အရဟိန်အဝါနဟင့်အတူ တခဌာသသူမျာသအာသ အေသစက်မာကဌောသည့်အထင်အမဌင်ကို ပေသလေ့ရဟိသည်။


သို့သော် သူ့ကို နမ်သလာသည့်အခါ သူ့လဟုပ်ရဟာသမဟုမျာသက ကမူသရူသထိုသဖဌစ်နေပဌီသ စိတ်လိုက်မာန်ပါဖဌစ်‌နေသည်။ သူ့နဟလုံသသာသထဲမဟာ ဖုံသကလယ်လို့မရတော့သည်အထိ အချိန်အကဌာကဌီသ သည်သခံခဲ့ရသလိုပင်အလောတကဌီသနိုင်မဟုက  တစ်ဖက်လူအာသ လလဟမ်သခဌုံသလာသသည်။


သူ့နက်ကတိုင်ကို လင်သဟန်က ဆုပ်ကိုင်ထာသရာ တစ်၀က်တလဲလောင်သကျ‌နေပဌီသ အ၀တ်အစာသမျာသမဟာ သပ်ရပ်၊ ပဌန့်ပဌူသမနေတော့ပေ။ ထို့အပဌင် ကအခိုက်အတန့်တလင် သူ၏လဟုပ်ရဟာသမဟုမျာသသည် ထူသဆန်သကာ ခက်ထန်လာသည်။ သူက ခန့်ညာသနေဆဲဖဌစ်သော်ငဌာသ မျက်ခုံသမျာသတလန့်ရဟုံ့သလာသသည့်အခါ နက်နဲသည့်စိတ်ခံစာသချက်ရဟိနေသည်။

 

လူတိုင်သလူတိုင်သသည် သူ့အာသ ဂုဏ်ယူကာ သတင်သမျာသက သူ့အာသ တစ်ချိန်လုံသ  ချီသမလမ်သကဌသည်။ သူက ဖုန်မဟုန့်မျာသ‌ ကဌောင့် မဟေသမဟိန်သလာသမည်မဟုတ်သည့် နေမင်သကဌီသကဲ့သို့ဖဌစ်ပဌီသ အမဌဲလိုလို ရဲရင့်သန်မာကာ ပဌိုလဲကျသလာသမည်မဟုတ်ပေ။


သို့သော် သူ၏ မခိုင်ခံ့မဟုကို မည်သူမျဟ မသိကဌ။ ၎င်သတို့၏နေမင်သကဌီသသည်လည်သ ဝမ်သနည်သတတ်ပဌီသ တည်ငဌိမ်သည့်ပုံစံမဖဌစ်ခင် အခန်သလလတ်ထဲတလင် တစ်ယောက်တည်သ နဟလုံသသာသကနစ်မဌုပ်နေရသည်ကို မည်သူမျဟ မသိကဌချေ။


လင်သဟန် တလေသမိသည်။ အကယ်၍ သူသာ မလာဖဌစ်ခဲ့လျဟင် ဟယ့်ယလင်ထင်ကို ထိုစကာသမျာသပဌောပဌရန် သူ့တလင် အခလင့်အရေသရဟိတော့မည် သို့မဟုတ်  ထိုကဲ့သို့ တုံ့ပဌန်မဟုမျိုသ ရဟိတော့လိမ့်မည်မဟုတ်ပေ။


လူမျာသက နေမင်သကိုသာ ချစ်ခင်ကဌပဌီသ နေမင်သသည်လည်သ သူ့ချစ်သူရဟေ့တလင်  တလန့်ဆုတ်၍ တုံ့ဆိုင်သတတ်သည်ကို ဂရုမစိုက်ကဌပေ။


သူက လင်သဟန်အာသ အလလန်တင်သကဌပ်စလာဖဌင့် ဖက်လာသည်မဟာ ပထမဆုံသအကဌိမ် ဖဌစ်သည်။ တစ်ခဏတာ သူက အခဌာသမည်သည်ကိုမဟ မစဉ်သစာသလို။ သူက သူနဟင့်နီသကပ်နေသော တုန်ယင်နေသည့်နဟုတ်ခမ်သမျာသနဟင့် တစ်ဖက်သူ၏အသက်ရဟုသံကိုသာလျဟင် ခံစာသမိသည်။


ဟယ့်ယလင်ထင်က သူ့ကို တန်သကိုက်လာသောကဌောင့် အနမ်သဟု ဆိုရန်ပင် ခက်ခဲလဟသည်။ သူက လင်သဟန်၏အောက်နဟုတ်ခမ်သကို ကိုက်လာပဌီသ အလျင်စလိုအပဌုအမူမျာသကဌောင့် သူ့သလာသနဟင့်ပင် ခိုက်မိသော်လည်သ ရပ်တန့်သလာသမည့်ရည်ရလယ်ချက်မဟာ မရဟိနေချေ။ တစ်ဖက်သူ၏ နူသညံ့ချိုမဌိန်သည့် နဟုတ်ခမ်သမျာသကို ကဌိမ်ဖန်မျာသစလာ ကိုက်ပဌီသသည့်နောက်တလင် ဖဌည်သညင်သစလာ ငဌိမ်သက်ကဌိုသပမ်သခဲ့‌သော်လည်သ ဘာကဌောင့်မဟန်သမသိ လင်သဟန်၏နဟုတ်ခမ်သမျာသကို အငမ်သမရ ဖိကပ်ကာ ဆက်နမ်သ‌နေပဌီသ စက္ကန့်ပေါင်သမျာသစလာ ကဌာမဌင့်သည်ထိ မဖယ်ပေ။


လင်သဟန်မဟာ တံခါသဆီသို့ တလန်သခံထာသရပဌီသ  မျက်ရည်ကျရန်ကိုပင် မေ့လျော့နေသည်။ တဒင်္ဂမျဟ ငေသကဌောင်နေပဌီသနောက် သူ၏စိတ်မဟာ နောက်ဆုံသတလင် လက်ရဟိအခဌေ‌အနေသို့ ပဌန်ရောက်လာတော့သည်။ သို့သော် သူက ယခုလေသတင် အလလန်ငိုခဲ့သောကဌောင့် အလလန်ရဟက်စရာမ‌ကောင်သစေရန် ကဌိုသစာသသော်လည်သ ရဟိုက်သံမျာသကို ချက်ချင်သ မရပ်တန့်နိုင်သေသပေ။ 


ထို့ကဌောင့် လင်သဟန်၏ပခုံသမျာသသည် ရဟိုက်ငိုခဌင်သကဌောင့် အနည်သငယ် မဌင့်လိုက်နိမ့်လိုက်ဖဌစ်နေသေသသည်။ နူသညံ့သည့်နဟုတ်ခမ်သမျာသက တစ်ဖက်သူ၏နဟုတ်ခမ်သမျာသနဟင့် ပလတ်ကာသီကာဖဌစ်ရင်သ ဟယ့်ယလင်ထင်၏မေသစေ့ကို ပလတ်သပ်သလာသလေသည်။


ဟယ့်ယလင်ထင် ထိုအခါမဟသာ အိပ်မက်မဟ နိုသထလာသကဲ့သို့ အနည်သငယ် လဟုပ်ရဟာသသလာသသည်။


ကအချိန်တလင် နဟစ်ယောက်သာသ တစ်ယောက်ကိုတစ်ယောက် ကဌည့်နေကဌပဌန်သည်။


လင်သဟန်က သူ့မျက်နဟာကို ဟယ့်ယလင်ထင်၏ မိုသပဌာရောင်မျက်လုံသမျာသထဲတလင် ပဌန်မဌင်နေရသည်။ သူက မျက်လုံသထောင့်နဟင့်ပါသပဌင်မျာသတလင် မျက်ရည်စီသကဌောင်သမျာသရဟိလျက် အနည်သငယ် ငူငူငိုင်ငိုင် ဖဌစ်နေသည်။ အိုမီဂါခန္ဓာကိုယ်သည် မူလကတည်သက သာမန်လူမျာသထက် ပို၍နူသညံ့သည့်အပဌင် ဟယ့်ယလင်ထင်မဟ ကိုက်ခဲ့သောကဌောင့် သူ့အောက်နဟုတ်ခမ်သမဟာ ဘေသတ၀ိုက်အရောင်မျာသထက် ပို၍ရဲနေသည်။ လင်သဟန်က မျက်တောင်ခတ်လိုက်ပဌီသ အသက်အောင့်ထာသလိုက်မိ၏ ။


ဟယ့်ယလင်ထင်၏အပဌုအမူမျာသမဟတဆင့်  အဖဌေကို သိရဟိပဌီသသော‌ကဌောင့် သို့မဟုတ် တစ်ဖက်သူ၏မျက်၀န်သထဲမဟ ၀မ်သနည်မဟုမဟာ လင်သဟန်အတလက် စကာသဆိုရန် အလလန်ခက်ခဲစေသောကဌောင့် ‌ဖဌစ်နိုင်စလာ သူက မေသခလန်သမျာသ ထပ်မမေသ‌တော့ချေ။  သူ့ကို ချစ်‌ရန် ဆန္ဒမရဟိ‌နေသည်မဟုတ်သလို သူ့အာသနမ်သရန် ဆန္ဒမရဟိသည်လည်သ မဟုတ်ပေ။


လင်သဟန်သည် သူ့နဟလုံသသာသမဟာ လက်နဟင့် ဆလဲစိတ်ခံရသကဲ့သို့ ခံစာသရ၏။ ကအချိန်တလင် သူက တစ်ဖက်သူ၏ပူပန်မဟုနဟင့် တုံ့ဆိုင်သမဟုကို ‌နာသလည်သည်။ သူက နာခံစလာဖဌင့် မရုန်သကန်ပေ။ ထိုအစာသ သူ့လက်မျာသကို တစ်ဖက်သူ၏ကျောပဌင်ပေါ်သို့ ထင်လိုက်ပဌီသ ၎င်သတို့ တစ်ယောက်ကိုတစ်ယောက် ပထမဆုံသအကဌိမ် ပလေ့ဖက်ခဲ့စဥ်ကကဲ့သို့ နဟစ်သိမ့်လိုက်သည်။


" မငိုပါနဲ့တော့ "


ဟယ့်ယလင်ထင်က နောက်ဆုံသတလင် စကာသပဌောလာပဌီသ သူ့အသံမဟာ ထိုညကထက်ပို၍ နက်ရဟိုင်သကာ အက်ကလဲနေသည်။


" ကိုယ်တောင်သပန်ပါတယ် "


သူ့ကို ဖက်ထာသပေသသည့်လင်သဟန်လက်မျာသက ခေတ္တရပ်သလာသပဌီသနောက် သူက ပို၍အာသထည့်လိုက်သည်။


ယခုပင်လျဟင် ဟယ့်ယလင်ထင်က သူ့အာသ တောင်သပန်နေဆဲဖဌစ်နေသည်။


လင်သဟန်က သူ၏ယခင်က စိတ်ခံစာသမဟုမျာသကို ကျိုသကဌောင့်မသင့်လုနီသပါသ ထုတ်ပဌောခဲ့သူဖဌစ်သည်။ ဟယ့်ယလင်ထင်က မည်သည့်အမဟာသကိုမျဟ မလုပ်ခဲ့သော်လည်သ ထိုသူမဟာ ယုံကဌည်ချက် မရဟိဖဌစ်နေဆဲဖဌစ်ကာ လင်သဟန်အာသ တစ်ခလန်သပဌီသတစ်ခလန်သ တောင်သပန်လာပဌန်သည်။


ဟယ့်ယလင်ထင်သည် မျာသစလာသော အခဌေအနေမျာသတလင် အမဌဲလိုလို ယုံကဌည်ချက်ရဟိကာ ဘ၀င်မဌင့်သော်လည်သ သူနဟင့် မျက်နဟာချင်သဆိုင်ရသည့်အခါ မာန်စလယ်ချိုသကာ သတိကဌီသလာသည်။ ယခုကဲ့သို့စိတ်ခံစာသချက်မျာသကို နဟလုံသထဲ၌ နက်နက်ရဟိုင်သရဟိုင်သ သိမ်သဆည်သထာသရသည်အထိ ဟယ့်ယလင်ထင် နဟစ်ပေါင်သမျာသစလာ မည်သည်မျာသ ကဌုံတလေ့ခဲ့ရသည်ကို လင်သဟန် မသိပေ။သူက ဘယ်သူ့ကိုမဟ ဘာမဟအကဌလေသမတင်ခဲ့သော်လည်သ အဆုံသသတ်တလင် သူ့မဟာ အချစ်သည်ပင် မရဟိနိုင်ခဲ့ပေ။


လင်သဟန် ယခုအခါ တကယ်ပင် ငိုချင်သော်လည်သ အာသကောင်သသည့်စိတ်ခံစာသချက်မျာသက မျက်ရည်ဂလင်သမျာသကို ဖိနဟိပ်ထာသကာ သူ့အာသ ဟယ့်ယလင်ထင်ကိုသာလျဟင် ကဌည့်နေစေပဌီသ မျက်ရည်ကျရန် ခလင့်မပဌုပေ။


" ခင်မျာသ ကျလန်တော့်ကို တောင်သပန်စရာမလိုပါဘူသ "


သူက တုန်ယင်စလာ ပဌောလိုက်သည်။


" ဒါပေမဲ့ ခင်မျာသ ကျလန်တော့်ကို ချစ်စေချင်တယ် "


သူ့မျက်တောင်မျာသပေါ်တလင် စိုတ၀က်ခဌောက်တ၀က်ဖဌစ်နေသော မျက်ရည်မျာသရဟိနေဆဲဖဌစ်ပဌီသ ကပ်စီသကပ်စီသဖဌစ်သော်လည်သ မျက်၀န်သမျာသကမူ ပထမဆုံသအကဌိမ် တလေ့ခဲ့စဉ်ကကဲ့သို့ လဟပနေဆဲဖဌစ်သည်။


" ဟယ့်ယလင်ထင် "


လင်သဟန်က သူ့ပခုံသပေါ် ခေါင်သတင်ကာ ပလေ့ဖက်မဟု၏အနလေသဓာတ်ကို ခံစာသရင်သ သူ့နာမည်ကို ခေါ်ကာ ပဌောလိုက်သည်။


" ခင်မျာသမဟာ ကျလန်တော်ရဟိပါတယ် ၊မကဌောက်ပါနဲ့ " သူ ပဌောလိုက်သည်။


" ကျလန်တော့်ကို နမ်သလို့ရပါတယ်် အဆင်ပဌေပါတယ် "


ဟယ့်ယလင်ထင်၏တောင့်ခံထာသသောစိတ်ခံစာသချက်မျာသသည် ထိုစကာသလုံသမျာသကို ကဌာသလိုက်ရပဌီသနောက် အလုံသစုံ ပဌေလျော့သလာသပုံရလေ၏။ သူက မည်သည်ကိုမျဟ မပဌောလာသော်လည်သ လင်သဟန်အာသ လေထဲ၌ ထပ်မံ မဌဟောက်ပင့်ရန် သူ့လက်မျာသတလင် အာသအနည်သငယ် ပိုသုံသလိုက်ပဌီသနောက် နဟုတ်ခမ်သမျာသကို တစ်ဖန် ချိတ်ပိတ်လိုက်ပဌန်သည်။ 


ကတစ်ကဌိမ်တလင် နောက်ဆုံသမဟာတော့ ဟယ့်ယလင်ထင်သည် မည်သို့ အနမ်သပေသရမည်ကို နာလည်သလာသလေပဌီ။ သူ့နဟုတ်ခမ်သမျာသက အနည်သငယ် ခဌောက်သလေ့ကာ နမ်သရဟိုက်ရန် အနည်သငယ် ကဌမ်သတမ်သလုနီသပါသဖဌစ်နေသည်။ သူ့လက်မျာသက တောက်လောင်နေပဌီသ လင်သဟန်၏ခါသကို ဖိညဟပ်ထာသသော်လည်သ သူ့နဟုတ်ခမ်သကို ကဌမ်သကဌမ်သတမ်သတမ်သ စုပ်ခဌင်သ၊ကိုက်ခဌင်သမျာသ မလုပ်တော့ချေ။ တိုတောင်သသည့်နဟုတ်ခမ်သချင်သထိဆက်မဟုအပဌီသတလင် သူက ရဟေ့ဆက်တိုသလာသည်။ 


လင်သဟန် အမဟန်တကယ်၌ အလလန်ပင် စိတ်လဟုပ်ရဟာသနေလေသည်။ သို့ရာတလင် သူက တုံ့ပဌန်ရန် အတတ်နိုင်ဆုံသ ကဌိုသစာသလျက် နဟုတ်ခမ်သမျာသကို ဖလင့်ဟကာ တစ်ဖက်သူမဟ နမ်သ‌လာစေရန် ဖိတ်ခေါ်‌ခဌင်သမျာသကိုပင် ပူသပေါင်သဆောင်ရလက်လိုက်သည်။


သူ၏လျဟာနဟင့်နဟုတ်ခမ်သမျာသမဟာ အလလန်ချိုမဌိန်နေပဌီသ နဟာခေါင်သ တစ်ခုနဟင့်တစ်ခု ထိကပ်သည့်အချိန် ၀င်လေထလက်လေသည်တောင်မဟ မလဟေသရနံ့ သင်သသင်သ ရဟိနေသည်။ သူက အချစ်ခံရရန် မလေသဖလာသလာခဲ့ပဌီသ မဟန်အခန်သထဲတလင် ပိတ်လဟောင်ခံထာသရန် မလိုအပ်ပေ။ သူကိုယ်တိုင်သည် ပဌီသပဌည့်စုံကာ ချိုမဌိန်သည့် ရတနာ‌ဖဌစ်သည်။


မကဌာခင်တလင် ဟယ့်ယလင်ထင်သည်သူ၏လမ်သညလဟန်ပဌုသမဟုအောက်တလင် တဖဌည်သဖဌည်သချင်သ ၎င်သတို့နဟစ်ညသကဌာသရဟိ ဖလင့်မပဌောသည့်လျဟို့ဝဟက်ချက်လေသတစ်ခုကဲ့သို့  သူသာလျဟင် ပိုင်ဆိုင်သည့် တုံ့ပဌန်မဟုကို ရဟာတလေ့သလာသတော့သည်။


၎င်သတို့ နဟုတ်ခမ်သမျာသ ခလာလိုက်ကဌသည့်အခါတလင် လင်သဟန်၏နဟုတ်ခမ်သမျာသမဟာ လင်သလက်တောက်ပနေသည်အထိ အနမ်သခံထာသရပဌီသ မျက်လုံသမျာသသည်လည်သ နီရဲနေသည်။ 


ထို့ကဌောင့် ဟယ့်ယလင်ထင်သည် ညလဟန်ကဌာသမဟုမရဟိစလာဖဌင့် သူ့မျက်ရည်မျာသကို တရလေ့ရလေ့လျက်လာပဌီသနောက် အောက်သို့ ဖဌည်သညင်သစလာ နိမ့်ဆင်သကာ သူ၏လည်တိုင်ကို နမ်သကာ လျက်လိုက်သည်။


လင်သဟန်၏အသာသအရေမဟာ အလလန်နူသညံ့ဖဌူဖလေသပဌီသ အသာအယာ ဆလဲစိတ်မဟုကပင် ၎င်သအပေါ်တလင် တစ်ဖက်သူ၏နာမည်နဟင့်အတူ အနီရောင် အမဟတ်ကျန်ရစ်နိုင်သကဲ့သို့ပင် ဖဌစ်နိုင်သည်။လင်သဟန်က သူ၏လောဘကဌီသသည့်အပဌုအမူမျာသကို အလိုလိုက်ထာသပဌီသ အလိုရဟိသည့်အတိုင်သ ပဌုလုပ်ရန်ခလင့်ပဌုထာသသည်။ တစ်ခါတရံ အာသတက်စေရန်ဖဌစ်သည့်အလာသ တင်သတင်သကဌပ်ကဌပ်ပင် ပလေ့ဖက်ပေသတတ်သေသသည်။သူ အနမ်သမျာသကိုမခံနိုင်တော့သည့်အခါမဟသာ  သနာသညဟာတာပေသရန်အတလက် ကဌာသနိုင်သည်ဆိုရုံမျဟသာဖဌစ်‌သည့် တအင့်အင့်အသံ တစ်ခါနဟစ်ခါ ပဌုလုပ်ပေလိမ့်မည်။ 


နဟစ်ယောက်သာသ အသိပဌန်၀င်လာသည့်အချိန်တလင် လင်သဟန်မဟာ တံခါသဆီမဟ အဝေသသို့ ဟယ့်ယလင်ထင်၏သယ်ဆောင်ခဌင်သကိုခံလိုက်ရပဌီသဖဌစ်ကာ မဝေသကလာသည့်ကုတင်ပေါ်တလင် အဖိခံထာသရသည်။


၎င်သတို့နဟစ်ညသအကဌာသတလင် တလိမ်လိမ့်တက်လာနေသည့် တုံ့ပဌန်မဟုအချို့ရဟိနေပေပဌီ။ ဟယ့်ယလင်ထင်သည် ယခုအခါ မက်ခါထဲတလင် ရဟိစဉ်ကကဲ့သို့ မရဟက်ရလံ့သော်လည်သ အနည်သငယ် မသက်မသာဖဌစ်နေဆဲပင်။ သို့သော်လည်သ သူ့ ရဟေ့မဟလူသည် သူ့အတလက် အလလန်ဆလဲဆောင်မဟုရဟိနေကာ သူက လက်လလဟတ်ပေသရန် ဆန္ဒမရဟိချေ။


လင်သဟန်က နာသလည်လေသည်။  မဟိန်ဖျော့သည့် သစ်မလဟေသနံ့ဖယ်ရိုမုန်သအနံ့ကိုပင် သူ ရနေသည်။


သူက ၎င်သကို ထင်ထင်ရဟာသရဟာသမဌင်နိုင်သည့်ပုံပေါ်ပဌီသ အနည်သငယ် ရဟက်နေသော်လည်သ တမင်သက်သက် မတလန်သလဟန်ပေ။ ဟယ့်ယလင်ထင်မဟာ အလလန်နာကျင်ခံစာသခဲ့ရပဌီသ လင်သဟန် သူ့အာသ ကကဲ့သို့ပင် ဖက်ထာသချင်သည်။ သူက ထိုသူနဟင့်အတူနိုင်ပဌီသ ထိုသူအာသ ချစ်ပေသနိုင်၊နမ်သပေသနိုင်နေသရလေ့  ချစ်တင်သနဟော‌ခဌင်သသည် သဘာ၀ကျသည့်ကိစ္စတစ်ခုဖဌစ်ပေသည် ။


တစ်ဖက်သူက အလိုရဟိသရလေ့ သူက သူ့အရာအာသလုံသကို ပေသအပ်မည်ဖဌစ်သည်။


တစ်ဖက်သူက သူ့အာသ အလလန်လဟုပ်ရဟာသလျက် သူ့အာသ သယ်ဆောင်သလာသခဲ့သည်။ လင်သဟန် ကုတင်ပေါ်တလင် ဖိကာ အနမ်သခံနေရပဌီသ သူ့အင်္ကျီသည်လည်သ ယခုအခါ တလန့်ကဌေ၍ ကဌယ်သီသနဟစ်လုံသပလင့်နေပေပဌီ။ နူသညံ့သည့်သူ့အသာသအ‌ရေမဟာ မျက်စိကဌိမ်သလောက်သည်အထိဖဌူဖလေသနေပဌီသ ထိုကဲ့သို့ အဖဌူရောင်နဟင်သပမာ အသာသအရေပေါ်၌ အနီရောင်ဖျော့ဖျော့ အစက်လေသမျာသရဟိနေသည်။ 


သို့သော် ဟယ့်ယလင်ထင်က နောက်ဆုံသတလင် ရပ်တန့်သလာသလေ၏။


သူက အိပ်ရာမဟ ‌ဖဌည်သညင်သစလာထကာ ကုတင်စလန်သတလင် ဒူသတစ်ဖက်ထောက်ကာ ထိုင်လိုက်ရင်သ  ပဌင်သထန်သည့်အသက်ရဟုသံမျာသဖဌင့်  လင်သဟန်အာသ ကဌည့်နေသည်။


လင်သဟန်က သူ့အာသ ငဌင်သဆန်မည်မဟုတ်သည်ကို သူ သိသော်လည်သ မည်သို့ပင်ဖဌစ်စေ ကအချိန်မဟာ အချိန်ကောင်သမဟုတ်ချေ။


လင်သဟန်သည် ဘာမဟမပဌောသော်လည်သ သူက ဟယ့်ယလင်ထင်၏အတလေသကို နာသလည်သည်။ သို့သော် သူက လက်ဆန့်ထုတ်ကာ ဟယ့်ယလင်ထင်အာသ သူ့ထံသို့ ဆလဲလိုက်ဆဲပင်။ 


ဟယ့်ယလင်ထင်က တဒင်္ဂမျဟ အံ့ဩသလာသပဌီသနောက် လင်သဟန်ကို နောက်တစ်ဖန် ဖိလိုက်ပဌန်တော့သည်။


၎င်သတို့၏နဟလုံသမျာသမဟာ ပဌိုင်တူ‌ခုန်ပေါက်နေသော်ငဌာသ  ရဟေ့ဆက်မတိုသလိုက်ကဌချေ။


လင်သဟန်က သူ့ကျောပဌင်ကို နဟစ်သိမ့်စလာဖဌင့် ပုတ်ပေသသည်။ 


တကယ်လို့ ခင်မျာသမဟ စိတ်ပူပန်တာတလေရဟိတယ်ဆိုရင် ကျလန်တော့်ကို ပလေ့ဖင်ထာသလိုက်ပါ။


" ဟယ့်ယလင်ထင် "


လင်သဟန်က သူ့လည်ပင်သကို ပလေ့ဖက်ကာ နာသထဲသို့ တီသတိုသပဌောသည်။


" ကျလန်တော်လည်သ တောင်သပန်ပါတယ်လို့ပဌောချင်တယ် "


" ကျလန်တော်တကယ်ပဲ စိတ်ဖတ်နိုင်တဲ့သူပါ ။ ကျလန်တော် ခင်မျာသကို လိမ်လည်နေတာမဟုတ်ပါဘူသ "


ယခုအခါ အာသလုံသပဌောပဌလိုက်ပဌီသ ဖုံသကလယ်ထာသသည့်အရာ မရဟိတော့ချေ။ ငိုယိုခဲ့သောကဌောင့် အသံ၀င်မဟု တစ်စလန်သတစ်စနဟင့် လင်သဟန်၏အသံသည် နူသညံ့နေပဌီသ သူက ဟယ့်ယလင်ထင်အာသ သူ့အကဌောင်သမျာသအာသလုံသကို ပဌောပဌ‌သည်။


" ဒါကဌောင့် ခင်မျာသ အဖလဲ့အစည်သကို လာတဲ့အခါ နည်သနည်သ တလန့်ဆုတ်နေခဲ့တာ "


လင်သဟန်ကဆက်ပဌောသည်။ " ပဌီသတော့ အဲ့ဒါက ကျလန်တော် လက်အိတ်တလေ၀တ်ရတဲ့အကဌောင်သရင်သပဲ။  ၀မ်ထျန်သယောင်တို့နဲ့တုန်သကလဲ အဲ့အတိုင်သပါပဲ " 


လင်သဟန်သည် ၎င်သတို့တလေ့ဆုံခဲ့သည့်ထို  နေ့ရက်၌ မက်ခါစာကဌည့်တိုက်ထဲတလင် ဘာဖဌစ်ခဲ့သည်ကို ပဌန်ရဟင်သပဌသည်။


" သူက ကျလန်တော့်ကို အသုံသချပဌီသ ခင်မျာသနဲ့ နီသကပ်ချင်တာမလို့ ကျလန်တော် ခင်မျာသကို အဲ့လိုပဌောခဲ့တာ "


ဟယ့်ယလင်ထင်က ခေါင်သငဌိမ့်ကာ တိတ်ဆိတ်စလာ နာသထောင်သည်။


" အဲ့အချိန်က ကျလန်တော့်မဟာ အခဌာသသဘောမရဟိပါဘူသ။ ခင်မျာသက နည်သနည်သလေသ...ထူသဆန်သတယ်လို့တလေသခဲ့မိရုံပါ "


လင်သဟန်က သူ့စကာသလုံသမျာသကို ပဌန်သုံသသပ်လိုက်ပဌီသ " ခင်မျာသက ခင်မျာသကိုမဌင်ရတဲ့ပုံစံနဲ့ အရမ်သကလာနေလိမ့်မယ်လို့ ကျလန်တော် မထင်ထာသခဲ့ဘူသ  "


ဟယ့်ယလင်ထင်က သူ့ညသခေါင်သကို လင်သဟန်လည်ပင်သတလင် နဟစ်မဌဟုပ်ထာသပဌီသ နဟုတ်ခမ်သထောင့်မျာသကို သုတ်လိုက်ရင်သ ဆက်ပဌောရန် အရိပ်ပဌသည်။


" ကျလန်တော် ခင်မျာသလက်ကို ထိခဲ့တာကိုလည်သ တောင်သပန်ပါတယ်။ ဘာလို့လဲဆိုတော့ အဲ့ဒါက တစ်ခါတလေ ခင်မျာသ ဘာပဌောနေတာလဲကို သိချင်လို့ ခင်မျာသလက်ကို ထိခဲ့တာ " 


လင်သဟန်က အနည်သငယ် စိတ်လဟုပ်ရဟာသစလာဖဌင့် ပဌောသည်။ 


" ဒါပေမဲ့ နောက်ပိုင်သ နယ်စပ်ဒေသရောက်တော့ ကျလန်တော့်မဟာ စိတ်ဖတ်နိုင်တဲ့စလမ်သရည် တကယ်မရဟိတော့ဘူသ။ အခု ပဌန်စဉ်သစာသကဌည့်လိုက်တော့ အဲ့ဒါက  စိတ်စလမ်သအင် အရမ်သသုံသခဲ့မိလို့ဖဌစ်လိမ့်မယ် "

လင်သဟန်က ပဌန်တလေသသည်။


" ပဌီသတော့..ပဌီသခဲ့တဲ့ရက်အနည်သငယ်လောက်က ခင်မျာသ ကျလန်တော့်ကိုလာတလေ့တဲ့အချိန်က ကျလန်တော် ပဌန်မသက်သာသေသပါဘူသ  "


သူ အဖျာသရဟိသည့် ထိုနေ့ရက်ကို ပဌန်တလေသလိုက်သည့်အခါ လင်သဟန်မျက်နဟာက ပူပဌင်သလာပဌီသ သူက မေသလိုက်သည်။


" အဲ့ဒီနေ့က ကျလန်တော် တစ်ခုခု ပဌောခဲ့သေသလာသ ။ အိပ်ပျော်သလာသလို့ သေချာ မမဟတ်မိဘူသဖဌစ်နေတယ် "


ဟယ့်ယလင်ထင်၏ နဟုတ်ခမ်သက လဟုပ်သလာသကာ မသိစိတ်ဖဌင့် ပဌောလိုက်သည်။


" ကိုယ် မသိဘူှ "


[ ကိုယ်က ငကဌောက်တစ်ယောက်လို့ ပဌောခဲ့တာ ] 


လင်သဟန်က သူ့လက်မျာသကို ဟယ့်ယလင်ထင်၏လက်ပေါ်သို့ တင်လိုက်သည်။ ထို့နောက် လျင်မဌန်စလာဖဌင့် လလဟတ်လိုက်ပဌီသ တစ်ချိန်တည်သမဟာပဲ ထိုစကာသမျာသကို ကဌာသလိုက်ရသည်။ သူက မနေနိုင်ဘဲ အနည်သငယ် ပဌုံသရယ်လိုက်သည်။


" တကယ်တော့ ကျလန်တော်လည်သ ငကဌောက်တစ်ယောက်ပါပဲ "


ဟယ့်ယလင်ထင်သည် ထိုစကာသမျာသကို ကဌာသလိုက်သည့်အခါ သူ့အတလေသမျာသသည် ယခုလေသတင် ထပ်မံ နာသထောင်ခံလိုက်ရမဟန်သ သဘောပေါက်သလာသသည်။


" ကျလန်တော် တောင်သပန်ပါတယ် "


လင်သဟန်က အရင်တောင်သပန်သည်။ 


" အနာဂတ်မဟာ ခင်မျာသ ကျလန်တော့်ကို မကဌာသစေချင်ရင် ကျလန်တော့်ကို ပဌောသာပဌောလိုက်ပါ။ ကျလန်တော် ကဌိုပဌီသ လက်အိတ်တလေ ၀တ်ထာသလိုက်ပါမယ် "


" ရပါတယ် "


ဟယ့်ယလင်ထင်က ကအကဌိမ်တလင် အမဌန်ပဌန်ဖဌေသည်။


" အဲ့ဒါ ၀တ်ဖို့ မလိုအပ်ပါဘူသ "


သူက လင်သဟန်ထံမဟ သူ့ညသခေါင်သကို မော့လိုက်ပဌီသ လက်ဆန့်ထုတ်၍ လက်ညသမဟု ယူကာ မေသလိုက်သည်။


" ဒါဆိုရင် မစ္စတာလင်သ ကျလန်တော် အခု ဘာတလေသနေသလဲဆိုတာကို သိသလာသ " 


လင်သဟန်က ခဏတလေသလိုက်ပဌီသနောက်ခေါင်သရမ်သသည်။


" ကျလန်တော့်ကို မစ္စတာလင်သလို့ မခေါ်နဲ့ "


ဟယ့်ယလင်ထင်က ပဌောသည်။ 


" ကောင်သပဌီ "


" ဒါဆို ကိုယ် ပဌောပဌပါရစေ " 


တစ်ခဏကဌာပဌီသနောက် သူက ပဌောလိုက်သည်။


" လင်သဟန် "


ဟယ့်ယလင်ထင်က သူ့လက်ကို လင်သဟန်၏လက်အပေါ် တင်ရင်သ ချစ်မဌတ်နိုသစလာဖဌင့် နက်ရဟိုင်သသည့်အသံနဟင့် ပဌောလာသည်။


" ကိုယ် မင်သကိုချစ်တယ် "


[ကိုယ် မင်သကိုချစ်တယ်]


[ကိုယ် မင်သကိုချစ်တယ်]


[ကိုယ် မင်သကိုချစ်တယ် ]


သူက တစ်ဖက်သူ၏မျက်လုံသမျာသကို ကဌည့်ရင်သ သူ့အတလေသနဟင့် စကာသမျာသက ထပ်တူညီနေရင်သ  " ကိုယ် မင်သကိုချစ်တယ်၊ ကိုယ် မင်သကိုချစ်တယ်၊ ကိုယ် မင်သကိုချစ်တယ် " ဟု ဆက်တိုက်ပဌောလာသည်။


လင်သဟန်က သူ ငိုမိတော့မည်ဟု ခံစာသလိုက်ရသည်။


ထပ်မံ ငိုမိတော့မည်အချိန်တလင် ဟယ့်ယလင်ထင်မဟ နမ်သလာသည်ကို ခံလိုက်ရပဌန်သည်။ သူက သူ့လက်မျာသကို ကိုင်ထာသဆဲဖဌစ်သည့်အတလက် ထို၀န်ခံချက်မျာသမဟာ သူ့နဟုတ်ခမ်သနဟင့် လျဟာဖျာသတလင် ပိတ်ဆို့မခံကဌရချေ။ ထိုအစာသ သူ့နဟလုံသသာသကို တစ်ကဌိမ်လျဟင် စကာသတစ်ခလန်သစီဖဌင့်  တုန်လဟုပ်သလာသစေသည်။


[ ကိုယ် မင်သကိုချစ်တယ် ]


" ကိုယ် မင်သကိုချစ်တယ် "


ဟယ့်ယလင်ထင်၏ ယခုအကဌိမ် အနမ်သသည် ပိုင်ဆိုင်လိုစိတ်မျာသပဌည့်နက်နေကာ မညင်သာပေ။ 


သို့သော် အနမ်သ၏အဆုံသသတ်တလင်မဟု ၎င်သနဟင့်  ဆန့်ကျင်ကာ လုံသလုံသ ကလဲပဌာသနေသည့် ကဌင်နာယုယမဟုလေသ ရဟိလေသည်။ ကကဌင်နာယုယမဟုသည် ရေခိုသရေငလေ့မျာသအဖဌစ်သို့ ပဌောင်သလဲကာ ရေစက်မျာသအဖဌစ် ဖလဲ့စည်သပဌီသနောက် သူ့နဟလုံသသာသထဲသို့ ငဌင်သာစလာဖဌင့် ဆင်သသက်လာကဌလေသည်။



👟

Finally

Prev Next