Chapter 70

👾Chapter 70

[ ခင်များ ကျွန်တော့်ကို ချစ်ရဲလား ]

ရှန်ရှိုးနန်ကို လိုက်ပို့ပြီးသည့်နောက် လင်းဟန်က ဤအချက်ကို လျင်မြန်စွာ လက်ခံလိုက်တော့သည်။ 

သူက ဟယ့်ယွင်ထင် သန့်ရှင်းရေးလုပ်ရန် သတိမရခဲ့သည့်မီးဖိုချောင်ကို ရှင်းလင်းလိုက်ပြီးနောက် ခါတိုင်းကဲ့သို့ ကူးလုလုအတွက် နေ့လည်စာပြင်ကာ သတင်းဖွင့်လိုက်သည်။ ထို့နောက် ရှန်ရှိုးနန်ပို့လာပေးသည့်ပစ္စည်းများကို သူ့အခန်းဆီသို့ ယူဆောင်သွားသည်။

သူ၏စိတ်စွမ်းအင် အများအပြား ပြန်လည်ရရှိလာ‌သောကြောင့် ဖြစ်နိုင်စွာဖြင့် အလုပ်လုပ်သည့်အခါ အလွန်ပင်ပန်းခြင်းမရှိပေ။ သူက မက်ခါအသစ်များကို ပြန်လည်စစ်ဆေးပြီးသည့်နောက် အသေးလေး ဘာလုပ်နေသည်ကိုကြည့်ရန် ဧည့်ခန်းဆီသို့ ပြန်သွားလိုက်သည်။

ဟယ့်ယွင်ထင်က သတင်းထဲတွင် အကြိမ်ပေါင်းများစွာပါ၀င်နေဆဲဖြစ်၏။ ယမန်နေ့ညက အဖော်ပြုပေးမှုသည် လက်ချောင်းဖြင့်ထိုးလိုက်ရုံဖြင့် ကွဲအက်သွားတော့မည့် လှပသည့်အိပ်မက်အလားဖြစ်နေသည်။ 

လင်းဟန် အနည်းငယ် တွေဝေနေပြီး မနေနိုင်စွာ ပြတင်းပေါက်ဆီသို့ ခြေလှမ်းလိုက်သည်။ နေ့အချိန်ဖြစ်သည့်အပြင် လင်းဟန်က အင်ပါယာစစ်တက္ကသိုလ်အနီးနားတွင် နေထိုင်ခြင်းကြောင့် ဖြတ်သန်းသွားလာနေသည့်ကျောင်းသား၊ကျောင်းသူအများအပြားရှိသဖြင့် သွားလာလှုပ်ရှားနေသူများနှင့် အလွန်အသက်၀င်နေ‌သည်။

ဟယ့်ယွင်ထင် မတ်တပ်ရပ်ခဲ့သည့်နေရာသည် အလွန်သာမန်ဖြစ်လှ၏။ အကယ်၍ သူသာ ငုံ့မကြည့်ခဲ့မိပါလျှင် လွဲပင်လွဲချော်သွားနိုင်သည်။

လင်းဟန်က သူ့လက်များကိုကြည့်လိုက်ပြီး သူ၏အတွင်းစိတ်များက ပို၍ပို၍ ရှင်းလင်းပြတ်သားလာသည်။

သူက ဧည့်ခန်းဆီမှ အသံ‌တစ်ခုကြားလိုက်သဖြင့် ခေါင်းလှည့်ကြည့်လိုက်ရာ ကူးလုလုက သူ ပြင်ပေးထားသည်များကို စားသုံးပြီးသည့်နောက် ကျေနပ်အားရစွာ လူးလှိမ့်နေရင်း ဘူးတစ်ခုနှင့် တိုက်မိသွားသည်ကို တွေ့လိုက်ရသည်။၎င်း၏ အမြီးလေးက အစွန်းကို တိုက်မိပြီး အသံမြည်ခဲ့ခြင်းဖြစ်သည်။

သတင်းထဲတွင် ဟယ့်ယွင်ထင်၏မျက်နှာမှာ အကြိမ်ပေါင်းများစွာ ပုံကြီးချဲ့ပြသခံနေရသည်။ လူပေါင်းများစွာသည် ပုံရိပ်ယောင်စတူဒီယိုထဲတွင် ထိုင်နေကြရင်းတစ်စုံတစ်ရာကို ဆွေးနွေးနေကြပုံပင်။

လင်းဟန်က ကူးလုလုသည် မနေ့ညကလည်း ထပ်မံလာရောက်ခဲ့သည့် ဟယ့်ယွင်ထင်အား ထပ်မံဒေါသထွက်မည်ကို စိုးရိမ်မိ၏။ အသေးလေးသည် ဟယ့်ယွင်ထင်အား အမြဲလိုလို ဒေါသထွက်တတ်၍ သူက သတင်းကို အရင်ဆုံး ပိတ်လိုက်ရမလားဟု စဉ်းစားလိုက်မိသည်။

သို့သော် ခေါင်းလှည့်ကြည့်လိုက်သည့်အခါ ကူးလုလုက တီဗွီပေါ်ရှိ ဟယ့်ယွင်ထင်အား မည်သည့် ရန်လိုမှုကိုမှ မပြသသည်ကို တွေ့လိုက်ရသဖြင့် အံ့ဩသွားရသည်။ သူက အမွှေးများကို ခါလိုက်ကာ ဖန်သားပြင်ကို နက်မှောင်သည့်မျက်၀န်းများဖြင့် စိုက်ကြည့်နေပြီး စိတ်ခံစားချက်ကောင်းနေသည့်ပုံပေါ်လေ၏။ 

လင်းဟန် စိတ်ရှုပ်ထွေးမှုဖြင့် အနည်းငယ်ဖြင့် လမ်းလျှောက်လာခဲ့ပြီး ခါးကိုင်းကာ သူ့လက်ဖဝါးများကို ဖြန့်လိုက်ပြီး ကူးလုလုအား သူ့လက်ဖဝါးများထဲသို့ ခုန်၀င်စေသည်။

အသေးလေးက စားသောက်ပြီးသည့်နောက် ‌ဗိုက်ပြည့်နေပြီး အနည်းငယ် သမ်းဝေကာ လင်းဟန်၏လက်မောင်းများကြားထဲတွင် သက်တောင့်သက်‌သာ တ‌စ်ရေးအိပ်ရန် အဆင့်သင့်ဖြစ်နေသည်။ လင်းဟန်က သူ့နှုတ်ခမ်းများကို ကော့လိုက်ပြီးနောက် အသံတိုးတိုးဖြင့် မေးလိုက်၏။ 

" မင်း သူ့ကို အမုန်းဆုံးမဟုတ်ဘူးလား "

ကူးလုလုက မျက်တောင်ခတ်လိုက်ပြီး ခါတိုင်းကဲ့သို့ပင် တုံ့ပြန်ရန် အချိန်ကြာလေသည်။ ၎င်းက လင်းဟန် ဘာပြောခဲ့သည်ကို နားလည်သဘောပေါက်သွားသည့်အခါ ရုတ်တရက် သဘာ၀မကျ ပြမူလာသည်။ ၎င်းက သူ့ခြေလက်များကို ဂရုတစိုက် ခေါက်သိမ်း၍အမြီးလေးကိုပင် ခွေပစ်လိုက်ပြီး ဘောလုံးတစ်ခုအဖြစ် လုံးလုံးကျုံ့လိုက်ကာ လင်းဟန်၏‌အကြည့်များကို ရှောင်တိမ်းလေသည်။

" ဘာလို့ မင်း..."

လင်းဟန် စကားမဆုံးလိုက်ဘဲ တစ်ခုခုကို သဘောပေါက်သွားသကဲ့သို့ မဝံ့မရဲ မေးလာသည်။

" သူ မင်းကို မနေ့က တစ်ခုခုပြောခဲ့တာလား "

ကျိန်းသေ ကူးလုလုမှာ စကားပြောမလာဘဲ လင်းဟန်၏မေးခွန်းအား ရှောင်နေသကဲ့သို့ သူ့ကိုယ်သူ ပို၍ပင် လုံးဝိုင်းအောင် ကွေးလိုက်ကာ လင်းဟန်၏ လက်ဖဝါးထဲသို့ လှိမ့်၀င်လိုက်၏။ ခဏကြာပြီးသည့်နောက် ကူးလုလုက သူ၏ခြေလက်များကို ဆန့်ထုတ်လိုက်ပြီး တီဗွီပေါ်ရှိ ဟယ့်ယွင်ထင်၏မျက်နှာဆီသို့ ခုန်လိုက်သည်။ သူ့ခန္ဓာကိုယ်ရှိအမွှေးများအားလုံးက  ညွတ်ကျနေကာ...တောင်းပန်နေသကဲ့သို့ဖြစ်လေ၏။

လင်းဟန်၏စိတ်ထဲမှ သံသယများပိုမိုကြီးထွားလာလေသည်။ သူက ကူးလုလုသည် သူတို့ပြောသည်ကို နားလည်နိုင်သည်ကို သိသော်လည်း ဤထက်ပို၍ မဆက်သွယ်နိုင်တော့သောကြောင့် အနည်းငယ် လမ်းပျောက်သွားသလို ခံစားရသည်။

ဟယ့်ယွင်ထင်မှ ၎င်းအား တစ်ခုခု ပြောခဲ့ခြင်းဖြစ်ရမည်...။

လင်းဟန်က သူ့လက်ကို မြှောက်လိုက်ပြီး ကူးလုလု၏သားမွှေးများကို ညင်သာစွာ ပွတ်သပ်ကာ မေးခွန်းများမမေးတော့ဘဲ အိပ်ပျော်သွားစေရန်သာ ချော့မြူပေးလိုက်သည်။ 

သူ နေပြန်ကောင်းလာသည့်အခါ အခြေစိုက်စခန်းသို့ သွားရပေမည်။

****

ဟယ့်ယွင်ထင်သည် နှုတ်ဆက်စကားပင် မပြောဘဲ အခြေစိုက်စခန်းသို့ အမြန်ပြန်သွားရသည့်အကြောင်းရင်းမှာ လုအန်းဟယ်အား သူ စစ်ဆေးခိုင်းထားသည့်ကိစ္စများက နောက်ဆုံးတွင် ရလဒ်အချို့ထွက်လာသောကြောင့် ဖြစ်လေသည်။ 

သူနှင့် လင်းဟန်တို့ နယ်စပ်ဒေသတွင် မဖြစ်မနေ နေထိုင်နေရချိန်အတွင်း လုအန်းဟယ်သည် ၎င်း၏ လှုပ်ရှားမှုများကို ကန့်သတ်ချုပ်ချယ်ချက်များကြောင့်  ခြေလှမ်း‌ဝေးဝေး မလှုပ်ရှားနိုင်ခဲ့ပေ။ သူ ပြန်ရောက်လာပြီးမှသာ သူ၏ယခင်သံသယများကို ပိုမိုနက်ရှိုင်းစွာ စုံစမ်းစစ်ဆေးနိုင်ခဲ့သည်။

လွန်ခဲ့သောနှစ်ရက်က  ရူကျစ်ဟန်သည် နောက်ဆုံးတွင် ဟယ့်ယွင်ထင်ကို သီးသန့်တွေ့ခဲ့ပြီး လာရောက်သည့်ရည်ရွယ်ချက်ကို ရှင်းပြခဲ့သည်။ ရူကျစ်ဟန်ထံ၌ အမှန်တကယ်တွင် အလွန်ရှင်းလင်းသောနိုင်ငံရေးရပ်တည်ချက် မရှိနေချေ။ နောက်ဆုံး‌တွင် သူသည် ပညာရေးအသိုင်းအဝိုင်းတွင် လူသိများဆဲဖြစ်ပြီး တစ်နေ့တာလုံး တစ်စုံတစ်ရာနှင့်ပက်သက်၍ ငြင်းခုံကြသည့်လူအိုအုပ်စုကို စိတ်မဝင်စားပေ။ အကယ်၍ သူ့ရပ်တည်ချက်အကြောင်း ပြောရမည်ဆိုလျှင် ငြိမ်းချမ်းရေးကို ထောက်ခံသူ ကျန်းလျန်သည် သူ၏ သူငယ်ချင်းကောင်းဟု ယူဆနိုင်ပြီး  ‌မီးလျှံသွေးအိုမီဂါဆိုင်ရာနောက်ထပ်သုတေသနများကို တားဆီးကာ အကြောင်းပြချက်များအတွက် ငြင်းခုံခဲ့ကြသူမှာ ၎င်းတို့ဖြစ်ကြသည်။

" တစ်ယောက်ယောက်က ဒီကိစ္စနဲ့ ပတ်သက်ပြီး သုတေသနတွေ ပြန်စနေပြီဆိုတာ ကျွန်တော် သိတယ် " ဟု ရူကျစ်ဟန်က စိုးရိမ်တကြီးနှင့်ပြောလာသည်။

" တစ်ဖက်လူက နောက်ထပ်လုပ်ရပ်တွေကိုတောင် လုပ်ပြီးနေပြီဖြစ်နိုင်တယ် "

" ဗိုလ်ချုပ်လုပ်ကြံခံရလုနီးပါးဖြစ်ခဲ့တယ်ဆိုတာ ကျွန်တော် ကြားသိခဲ့တယ်...." ရူကျစ်ဟန်ကပြောသည်။ " ကျွန်တော် အသေးစိတ်ပြောနေဖို့ မလိုအပ်တော့ပါဘူး "

ဟယ့်ယွင်ထင်သည် ရူကျစ်ဟန်၏စကားများကို ယုံကြည်သော်လည်း သူက အဘယ့်ကြောင့် ရုတ်တရက် ဤကိစ္စ‌တွင် ပါ၀င်လာသည်ကို နားမလည်နိုင်ပေ။

" ဒါဆို ပါမောက္ခရူ ဘာကိုဆိုလိုတာပါလဲ "

ရူကျစ်ဟန်သည် နောက်ထပ်စကားလုံးများကို ပြောဆိုခြင်း၌ အခက်တွေ့ပုံရလေသည်။

 " ရက်အနည်းငယ်နေရင် ကျွန်တော် အင်ပါယာစစ်တက္ကသိုလ်မှာ စာသင်ပေးဖို့ရှိတယ် ။ ဒါပေမဲ့ ပြဿနာက .... လွန်ခဲ့တဲ့သုံးလကတည်းက တစ်ခုခုက မှားနေသလို ဖြစ်နေခဲ့တယ် ။ အမှောင်ထဲကနေ ကျွန်တော့်ကို တစ်ယောက်ယောက်က အမြဲတမ်း ကြည့်နေသလိုမျိုး ၊ ဒါပေမဲ့ သူတို့က ဘယ်တုန်းကမှ တိုက်ရိုက် မဆက်သွယ်လာခဲ့ဘဲ ခင်များ လုပ်ကြံခံရတဲ့သတင်းကို တမင်သက်သက် ဖြန့်နေခဲ့တယ် "

ဟယ့်ယွင်ထင်၏မျက်နှာထားက အေးစက်နေပြီး သူက ဆက်ပြောမည့်စကားကို စောင့်‌စားနေသည်။ 

" ကျွန်တော်နဲ့ မစ္စတာကျန်းရဲ့ ဆက်ဆံရေးကြောင့် ကျွန်တော့်ဆီတိုက်ရိုက်ချဉ်းကပ်ဖို့က သူတို့အတွက် မဖြစ်နိုင်ဘူး။ ဒါပေမဲ့ သူတို့က ကျွန်တော် ဒီအချက်ကို သိတာ သေချာအောင်လုပ်ခဲ့တယ် "

ရူကျစ်ဟန်၏ အဖြူရောင်ဖြစ်နေသည့်ဆံပင်များက လင်းလက်သွားရင်း သူက တီးတိုးပြောသည်။

" သဲလွန်စ ပေးမလာဘဲ ကျွန်တော်တားဆီးခဲ့တဲ့ဟာ တစ်ဖန်စတင်လာတာကို ကျွန်တော့်မျက်လုံးတွေနဲ့ မျက်မြင်တွေ့စေလိုနေကြတယ် "

ရူကျစ်ဟန်သည် ဤသုတေသနကို ဆက်လက်လုပ်ဆောင်ခြင်းအား ဟန့်တားရန် မည်မျှ အားစိုက်ထုတ်ခဲ့ရသည်ကို ဟယ့်ယွင်ထင် မသိချေ။ သူက ခေတ္တ ရပ်တန့်နေပြီးနောက် ပြောလိုက်သည်။

" ကျွန်တော်တို့ ခင်များကို ကာကွယ်ပေးနိုင်တယ်။ ပြီးတော့ အချို့သောစုံစမ်းစစ်ဆေးမှုတွေမှာ ခင်များနဲ့လည်း ပူးပေါင်းဆောင်ရွက်နိုင်တယ် "

ရူကျစ်ဟန်က ၀မ်းသာမှုအနည်းငယ် ဖော်ပြလာပြီးနောက် ဟယ့်ယွင်ထင် စကားတစ်ခွန်း ထပ်ပြောလိုက်သည်။

" ဒါပေမဲ့ အပြန်အလှန်အနေနဲ့ကျွန်တော့်မှာလဲ ခင်များ အာရုံစိုက်ပေးရမယ့် အရာတစ်ခုရှိတယ် "

ရူကျစ်ဟန်က ခေတ္တ တောင့်တင်းသွားသည်။ 

" ခင်များကို လုပ်ကြံခဲ့တဲ့တစ်ယောက်ကိုတော့ မဟုတ်...."

" အခြားတစ်ခုရှိတယ် "

ဟယ့်ယွင်ထင်က ထို‌‌နေ့က ဘာဖြစ်ပျက်ခဲ့သည်ကို အကြမ်းဖျင်း ရှင်းပြလိုက်သည်။

" သုံးချက်ပစ်ခံခဲ့ရပြီးတာတောင်မှ သူ့ခန္ဓာကိုယ်က ဒဏ်ရာ အရမ်းပြင်းပြင်းထန်ထန် မခံစားခဲ့ရဘူး "

ရူကျစ်ဟန်၏မျက်နှာက ဖြူ‌ဖျော့သွားတော့သည်။

 " မဖြစ်နိုင်ဘူး။ လွန်ခဲ့တဲ့သုံးနှစ်က အားလုံး.." 

သို့သော် သူက မကြာမီတွင် ရပ်တန့်လိုက်သည်။ 

" ကျွန်တော်နားလည်ပြီ"

" ကျွန်တော် ခင်များအတွက် သီးသန့်ဓာတ်ခွဲခန်းတစ်ခု စီစဉ်ပေးပြီး တိတ်ဆိတ် ပို့ဆောင်ပေးမယ်။ ခင်များကို ဘယ်သူမှ ရှာတွေ့မှာမဟုတ်ဘူး "  

ဟယ့်ယွင်ထင်က အသေအချာပြောလိုက်သည်။

ရူကျစ်ဟန်သည် ခေတ္တမျှ နှုတ်ဆိတ်သွားသော်လည်း နောက်ဆုံးတွင် သဘောတူလိုက်သည်။ 

" ဒါပေမဲ့ ဗိုလ်ချုပ်…" 

သူ ခေတ္တရပ်လိုက်ပြီး  ဟယ့်ယွင်ထင်ကို အကူအညီတောင်းနေခြင်းဖြစ်သော်လည်း ကျောပြင်ကမူ ဖြောင့်တန်းနေဆဲဖြစ်ပြီး သူ၏အရင်က အံ့အားသင့်မှုများက လျင်လျင်မြန်မြန်ပျောက်ကွယ်သွားလျက်  သူ၏ ပုံမှန် တည်ငြိမ်မှုသို့ ပြန်ရောက်သွားသည်ကို မြင်တွေ့နိုင်သည်။ 

" ဒီပရောဂျက်ကို ရပ်တန့်ဖို့ အစွမ်းကုန်ကြိုးစားပါလို့ တောင်းဆိုပါတယ် "

" ကျွန်တော်သိပြီ "

ဟယ့်ယွင်ထင် ယခုတစ်ခေါက် ပြန်လာခြင်းမှာ ရူကျစ်ဟန်ကြောင့် ဖြစ်လေသည်။

ရူကျစ်ဟန်၏ပညာရေးဟောပြောပွဲကို စီစဉ်ထားသည့်အတိုင်း ကျင်းပခဲ့သည်။ ဟယ့်ယွင်ထင်သည် မူလက သူ့နောက်လိုက်ရန် ကျပန်းလူတစ်ယောက် စီစဉ်ချင်ခဲ့သော်လည်း နောက်ဆုံးတွင် သတိရှိစေရန်အတွက် သူ့အား ကာကွယ်ရန် လုအန်းဟယ်ကို စေလွှတ်လိုက်သည်။

အရာအားလုံးကို ကောင်းမွန်စွာ စီစဉ်ထားခဲ့ပြီး လုအန်းဟယ်သည် ဟယ့်ယွင်ထင်နှင့် လျှို့ဝှက်စွာ ဆက်သွယ်ခဲ့သည်။ သို့သော် မတော်တဆမှုကမူ ရုတ်တရက် ဖြစ်ပျက်နိုင်လေသည်။ လုအန်းဟယ် အခန်းထဲမှထွက်ခါနီးတွင် ရူကျစ်ဟန်အား ၀င်တိုက်ရန် ကြိုးပမ်းသည့် ထူးဆန်းသောအိုမီပါတစ်ဦးကို လှမ်းမြင်လိုက်ပြီး သူကား နောက်ကျသွားခဲ့သည်။ လုအန်းဟယ်က ဆက်သွယ်မှုကို ဖြတ်တောက်လိုက်သောအခါတွင် စကားတစ်ခွန်းကိုသာ ပြောလာပြီး အခြားမည်သည်ကိုမှ မဆိုချေ။

" ကျွန်တော် သူ့ဘေးကင်းရေးကို သေချာပေါက် အာမခံပါတယ် "

*****

အခြေစိုက်စခန်းသို့ ရောက်ရှိသည့်အခါ မည်သည်များ ဖြစ်ပျက်ခဲ့သည်ကို လင်းဟန် မသိချေ။ လူအချို့ကသာ ၎င်းကိုသိရှိကြခြင်းကြောင့် အခြေစိုက်စခန်းသည် ခါတိုင်းနှင့် မကွာခြားပေ။

 အခြေစိုက်စခန်းမှလူများသည် သူနှင့် ရင်းနှီးကြသည်။ ဟယ့်ယွင်ထင်နှင့် သူ၏ရင်းနှီးသည့်ဆက်ဆံရေးကြောင့်အပြင် လင်းဟန်က ဤနေရာသို့ တစ်ခုခုယူရန် လာရောက်သည်ကိုလည်း သိထားကြသည်။ထို့ကြောင့် မည်သူကမှ သူ့အား မဟန့်တားကြပေ။

သူ လုအန်းဟယ် ဘာကြောင့်ရှိ‌မနေသည်ကို သိချင်မိသော်လည်း သူနေခဲ့သည့်အခန်းဆီသို့ ရောက်သည့်အခါ တံခါးဖွင့်လိုက်ပြီးနောက် အေးစက်သည့်မျက်နှာထားနှင့် နေထိုင်နေလျက်ရှိသော ဟယ့်ယွင်ထင်ကို တွေ့လိုက်သည်။ သူက ခါတိုင်းနှင့် အနည်းငယ် ကွဲပြားနေသည်။

သူ့ရှေ့မှအရာသည် လင်းဟန်အား မွေးနေ့လက်ဆောင်အဖြစ် ပေးခဲ့သည့်ကျောက်တုံးဖြစ်ပြီး သူက ၎င်းကို အချိန်အတော်ကြာ စိုက်ကြည့်နေသည်။ ဟယ့်ယွင်ထင်၏ မျက်နှာက ခပ်တည်တည်ရှိနေပြီး သူက လင်းဟန်နေထိုင်ခဲ့သည့်အခန်းထဲတွင် တစ်ယောက်တည်းထိုင်နေကာ သူ့ကို ကြည့်လာသည့်မျက်လုံးများက အသက်၀င်မှုအချို့ကင်းမဲ့နေသည်။

လာသည့်သူကလင်းဟန်ဖြစ်သည်ကိုမြင်ပြီးသည့်နောက် မထင်မှတ်စွာဖြင့် ဟယ့်ယွင်ထင်က သူ့နာမည်အား မခေါ်လာပေ။ လင်းဟန်သည် တစ်စုံတစ်ရာ ထူးဆန်းနေမှုကို ချက်ချင်း ခံစားမိလိုက်ပြီး အခြားမည်သည်ကိုမှ မတွေးတော့ဘဲ တစ်ဖက်သူ၏လက်ကို ကိုင်လိုက်သည်။

ထိုအခိုက်အတန့်တွင် သူက ဖြစ်စဉ်တစ်ခုလုံးကို ကြားသိလိုက်ရသည်။

လက်ရှိအခြေအနေသည် ယုံကြည်စိတ်ချမရမှန်း သူ သိထားပြီး ဟယ့်ယွင်ထင်၏ပုံစံသည် တည်ငြိမ်နေသည့်တိုင်‌ စိတ်ရှုပ်နေမည်ကို သူ သိသည်။ 

နောက်ဆုံးအခိုက်အတန့်တွင် သူက ဟယ့်ယွင်ထင်၏နှလုံးသားထဲမှ အတွေးများကို ကြားလိုက်ရသည်။

[ ငါ့ရဲ့လက်အောက်ငယ်သားကိုတောင်မှ မကယ်တင်နိုင်ဘူး...]

[ ငါ သူ့ကို ဘယ်လိုလုပ် ချစ်ရဲရတာလဲ ]

" ဗိုလ်ချုပ် "လင်းဟန်က သူ့အား ခေါ်လိုက်သည်။

ဟယ့်ယွင်ထင်က အသံကြားသည့်အခါ  နှုတ်ခမ်းများကို ဖြောင့်တန်း(တင်းတင်းစေ့)လျက် မော့ကြည့်လာသည်။

လင်းဟန် သူ့လက်ကို ဟယ့်ယွင်ထင်၏လက်ထဲ၌ ထားရှိထားဆဲဖြစ်ပြီး နောက်ဆုံးစကားကို ကြားပြီးသည့်နောက်မှသာ ဖြည်းညင်းစွာ လွှတ်လိုက်သည်။

 လင်းဟန်တွင် ပြောလိုသည့်စကားများ များစွာရှိနေသည်။

သူ့လက်ကို မြှောက်လိုက်သည့်နှင့် သူက ဟယ့်ယွင်ထင်၏ဂျာကင်ကို တွေ့လိုက်သည်။ ထိုဂျာကင်ကို အကြိမ်ပေါင်းများစွာ သူ ၀တ်ဆင်ခဲ့ပြီး ၎င်းက ယခုအခါ တွန့်ကြေနေသည်။ ဟယ့်ယွင်ထင်က အချိန်အတော်ကြာ စိတ်ရှုပ်နေသည့်ပုံပေါ်သော်လည်း သူ့ထံတွင် ပြောပြ(ရင်ဖွင့်)နိုင်သည့်လုံခြုံသည့်‌ နေရာတစ်ခုမျှပင် မရှိသဖြင့် သူက ဤနေရာတွင် ထိုင်နေရန်သာ ရွေးချယ်နိုင်တော့သည်။

ဒါဆို ခင်များလည်း ကျွန်တော့်ကို ချစ်နေတာဖြစ်နေတာပဲ။

ခင်များ ကျွန်တော့်ကို့ ဘာလို့ ဘာမှမပြောပြတာလဲ။

သို့သော် ဟယ့်ယွင်ထင်၏မျက်နှာနှင့် ရင်ဆိုင်လိုက်ရသည့်အချိန်တွင် သူက ဘာကိုမှ မပြောနိုင်။

သူက ဟယ့်ယွင်ထင်၏ တုံ့ဆိုင်းမှု၊ စိုးရိမ်ပူပန်မှုနှင့် အားနည်းချက်ကို ဖတ်နိုင်သည်။

ယခုအချိန်တွင် လုအန်းဟယ်အကြောင်း သတင်းမရှိချေ။ သူကလွဲ၍ ဤကိစ္စအကြောင်းသိရှိသည့် တစ်ဦးတည်းသောသူမှာ ချီကျားမူသာ ရှိပေသည်။ ဟယ့်ယွင်ထင်မှာ လူကိုယ်တိုင်  ရှေ့ထွက်၍မရသည့်အပြင် ချီကျားမူသည်လည်း အခင်းဖြစ်ရာနေရာသို့ သွားနိုင်ခဲ့သော်လည်း အမှောင်ထဲတွင်သာ ရှိနေနိုင်သည်။

လင်းဟန်က ယခုမှသာ ဤအရာများကို သိရှိလိုက်ရသည်။ သူကရှေ့သို့ ခြေလှမ်း အနည်းငယ် လှမ်းလိုက်ပြီး မူလက ဟယ့်ယွင်ထင်အပေါ်ရှိနေခဲ့သည့်သူ၏လက်ကို နှေးကွေးစွာဖြင့်  အောက်ချလိုက်သည်။

ဤအရာထက် မည်သည်က ပိုဆိုးရွားနိုင်သနည်း။

နောက်တစ်ခါ ထပ်ပြီး ရှိမှာမဟုတ်ဘူး။

လျှို့ဝှက်ကြံစည်မှုများသည် ၎င်းတို့နှစ်ယောက်ရှေ့တွင် ဖြည်းဖြည်းချင်း ပေါ်လွင်လာနေပြီး တစ်ဦးမှာ ‌စကားဆိုရန် ငြင်းဆိုနေကာ ကျန်တစ်ဦးမှာ စိုးရိမ်ပူပန်များနှင့် နှစ်ဦးလုံးက မတုန်မလှုပ်စွာ တောင့်ခံနေကြသည်။

" ဟယ့်ယွင်ထင်၊ ဟယ့်ယွင်ထင်..."

လင်းဟန်က ဤအခိုက်အတန့်တွင် သူ့ ခံစားချက်များကို ထု‌တ်ဖော်ပြသရင်း အနည်းငယ်သာ တုန်ယင်နေသောနှုတ်ခမ်းစွန်းများဖြင့် အလွန်တည်ငြိမ်နေသကဲ့သို့ ပြောလာသည်။

လင်းဟန်၏မျက်နှာက နီမြန်းနေလေ၏။ သူက ဟယ့်ယွင်ထင်အား မြင်လိုက်ရသည့်အချိန်ကတည်းက ငိုချင်သည့်ပုံပေါ်နေပြီး  ၎င်းအား မရပ်တန့်နိုင်ပေ။ ထို့အပြင် သူသည် မမှန်ကန်သည့် မိမိကိုယ်ကိုသံသယ၀င်မှုနှင့် ဝေခွဲမရဖြစ်မှုများအကြား ဆက်လက် အချိန်မဖြုန်းလိုတော့ပေ။

၎င်းကို ဇွတ်တရွတ်နိုင်သည် သို့မဟုတ် တာ၀န်ယူမှုမရှိဟူ၍ မှတ်ယူနိုင်သည်။

သူသည်လည်း သိသာစွာဖြင့် ၀မ်းနည်းနေသော်လည်း ဘာကြောင့် အတူမရှိနိုင်ရသနည်း။ လင်းဟန် ယခင်က နေထိုင်ခဲ့သည့်အခန်းသည် အသံလုံကာ တံခါးပြင်ပ၌ လေ့ကျင့်ရေးဆင်းနေသည့်စစ်သားများ၏အသံများကို ပိတ်ဆို့ထားနိုင်သည်အထိ ကောင်းမွန်သဖြင့် တစ်ကမ္ဘာလုံးတွင် ၎င်းတို့နှစ်ယောက်သာ တည်ရှိနေသကဲ့သို့ပုံရိပ်ယောင်ကို သူ့အား ပေးနေသည်။

 လင်းဟန်၏မျက်လုံးများနှင့် နှာခေါင်းမှာ နာကျင်နေပြီး သူ့နှလုံးသားက ထုံကျင်ဆို့နစ်နေသည်။

" ဟယ့်ယွင်ထင် " 

လင်းဟန်က သူ့နာမည်ကို တတိယအကြိမ် ခေါ်လိုက်သည်။ သူက သူ့စိတ်ခံစားချက်များ သိသာပေါ်လွင်မည်ကို ကာကွယ်ရန် နှုတ်ခမ်းများကို အနည်းငယ် စေ့လိုက်သော်လည်း မျက်တောင်ခတ်လိုက်သည့်အခါ မျက်ရည်များက ထပ်မံစီးကျလာလေသည်။ အရာအားလုံးကို ပြောပြီးလုပ်ပြီးဖြစ်သွားသောကြောင့် ရေကရားကို ခွဲလိုက်ခြင်းက ပိုကောင်းပေတော့မည်။

" အခြားသူတွေနဲ့  ကျွန်တော့်ကို ခင်များ ကွဲကွဲပြားပြားဆက်ဆံတာ သိသာတယ် "

ဟယ့်ယွင်ထင်၏မျက်လုံးများထဲတွင် နုနယ်သည်ဟု ဖော်ပြနိုင်သည့် ခံစားချက်ရှိနေပြီး မျက်လုံးများက နက်ရှိုင်းနေသော်လည်း သူက မည်သည်ကိုမျှ မပြောလာပေ။

" ခင်များကျွန်တော့်ကို ပထမဆုံးအကြိမ် တွေ့ခဲ့တုန်းက ခင်များမှာ သိသိသာသာ တုံ့ပြန်မှုရှိခဲ့တယ် "

" ခင်များက ကျွန်တော့်မှာ လှတဲ့မျက်လုံးတွေရှိပြီး ကျွန်တော် ရှက်သွားတဲ့အချိန်နဲ့ အိပ်နေတဲ့အချိန်မှာ ချစ်စရာကောင်းတယ်လို့ပြောခဲ့တယ်။ ကပွဲမှာ ခင်များ ဓားထိုးခံရလုနီးဖြစ်ခဲ့တယ်။ ဒါပေမဲ့ ခင်များက ကျွန်တော့်ကို ပထမဆုံးအကြိမ် တွန်းထုတ်ခဲ့ပြီး အဲ့မြင်ကွင်းကို ကျွန်တော် မြင်မှာမလိုလားခဲ့ဘူး။ ကျွန်တော့်ကို ယုံကြည်တယ်လို့ ခင်များပြောခဲ့ပြီး ကျွန်တော် မပျော်ရွှင်မှာစိုးလို့ ကျွန်တော့်ကို ကြယ်တစ်ခု လက်ဆောင်ပေးခဲ့တယ် "

လင်းဟန်က ထိုစကားများကို ငိုရင်းပြောနေခြင်းပင်။ သူက ယခုအချိန်တွင် အလွန်ရုပ်ဆိုးနေမည်ဖြစ်သော်လည်း အခြားဘာကိုမှ ဂရုမစိုက်နိုင်။ သူ လက်ဆန့်လိုက်ပြီး ဟယ့်ယွင်ထင် စစ်ယူနီဖောင်း၏နက်ကတိုင်ကို အသာအယာ ဆွဲလိုက်သည်။

" အာ။ ပြီးတော့ ခင်များက ကျွန်တော့်မျက်လုံးကို အ၀တ်နဲ့စည်းပြီး  ကျွန်တော့်လက်တွေကို နက်ကတိုင်နဲ့ချည်ချင်တယ်လို့လည်း ပြောခဲ့သေးတယ် "

လင်းဟန်ရှေ့မှ မြင်ကွင်းသည် မျက်တောင်များကြားရှိ မျက်ရည်များကြောင့် လုံးလုံး‌ ဝေ၀ါးနေပြီး သူ့အသံမှာ ရှိုက်သံများဖြင့် ပြည့်နက်နေသည်။ သို့သော် သူက ခေါင်းမော့ထားရန် ကြိုးပမ်းနေဆဲဖြစ်ပြီး သူ့ရှေ့မှသူကိုကြည့်ရင်း  နက်ဗျူလာကြည့်ရန် သူ့အား ခေါ်သွားခဲ့ပုံ၊ ပွေ့ဖက်ခဲ့ပုံနှင့် နူးညံ့သိမ်မွေ့သော်လည်း ချုပ်ထိန်းထားခဲ့သည့်အမှတ်အသားပြုပုံများကို သတိရနေမိသည်။

ဟယ့်ယွင်ထင်မှာ အံ့ဩသွားပုံပေါ်နေကာ သူ့စိတ်ထဲမှ ဟိုယခင်က အတွေးများသည် လင်းဟန် နှုတ်မှ တစ်ခွန်းပြီး တစ်ခွန်းထွက်လာလိမ့်မည်ဟု  ဘယ်တုန်းကမှ မမျှော်လင့်ထားခဲ့ချေ။

လင်းဟန်သည် ဟယ့်ယွင်ထင်၏မျက်နှာပေါ်မှ အကဲဖြတ်‌နေမူများကို မမြင်နိုင်ပေ။ 

ဟယ့်ယွင်ထင် ဘာမှမပြောလာသည်ကို တွေ့သည့်အခါ သူက စိတ်ပျက်အားလျော့သွားတော့သည်။

 သို့သော်  သူ့သတ္တိကို ရဲဆေးတင်ထားဆဲဖြစ်ပြီး ဟယ့်ယွင်ထင်ထံသို့ နီးနီးကပ်ကပ် တိုးသွားလိုက်သည်။  အလွန့်အလွန်နီးကပ်နေသည့်အ‌ကွာအဝေးတွင် သူက ညင်သာစွာ တီးတိုးပြောဆိုလိုက်ရာ မေးခွန်းမေးနေသယောင်ဖြစ်သော်လည်း သူ့ကိုယ်သူသာ စကားပြောနေသကဲ့သို့လည်း ဖြစ်နေပေသည်။

" ကျွန်တော် ဒီနေရာမှာ ရပ်နေတယ်။ ခင်များ ကျွန်တော့်ကို ချစ်ရဲလား "

အချိန်အတော်ကြာ ကုန်ဆုံးသွားသကဲ့သို့ဖြစ်နေသလို တစ်ခဏသာလျှင် ကြာမြင့်သွားသလိုလည်း ခံစားနေရသည်။

လင်းဟန် စကားပြောပြီးသွားသည့်နောက်တွင် သူ၏ခံစားချက်များကို မထိန်းချုပ်နိုင်သေးသော်လည်း အတော်လေး စိတ်သက်သာရာ ရသွားရသည်။ 

သူ့ရင်ဘတ်က အနည်းငယ် မြင့်ချည်နိမ့်ချည် လှုပ်ရှားနေပြီး ဟယ့်ယွင်ထင်၏အ၀တ်ကို ဆုပ်ကိုင်ထားသည့် သူ့လက်ချောင်းများကို မလွှတ်လိုပေ။ သူက  တစ်ဖက်သူ၏လက်ချောင်းများကို တိုက်ရိုက်မထိဘဲ ဆက်လက်ကိုင်ထားနေလေသည် ။ သူက ဟယ့်ယွင်ထင် ဘာတွေးနေသည်ကို ရုတ်တရက် မသိလိုတော့သည့်အပြင်  ရှက်ကိုးရှက်ကန်းသည်ပင် မဖြစ်တော့ဘဲ စိတ်သက်သာခြင်းကိုသာ ခံစားရသည်။

ဟယ့်ယွင်ထင်သည်လည်း စကားတစ်လုံးမျှ မဆိုဘဲ သူ့အား ကိုင်ခွင့်ပြုထားသည်။

သူ၏အယုံကြည်ရဆုံးသော လက်ထောက် ရဲဘော်ရဲဘက်မှာ ယခုအခါ သေခြင်းရှင်ခြင်းအန္တရာယ်ထဲတွင်ကျရောက်နေပြီး သူ အမြဲတမ်း လိုချင်ခဲ့သည့်သူက သူရှေ့တွင်မတ်တပ်ရပ်ကာ သူက ဘာကြောင့် အလွန်သူရဲဘော‌ကြောင်ဖြစ်နေသနည်းဟု မေးမြန်းနေသည်။ 

ဟယ့်ယွင်ထင်သည် လုံးလုံး တည်ငြိမ်သွားသည့်ပုံပေါ်ကာ သူ့မျက်နှာက ခါတိုင်းကဲ့သို့ မျက်နှာထားပြန်ဖြစ်သွားတော့သည်။သူ့ မျက်ခုံးများကို ရှုံ့လိုက်သဖြင့် လင်းဟန်က ထိုအပြာရောင်မျက်၀န်းများထဲသို့ ခိုးမကြည့်နိုင်တော့ချေ။

သူက လင်းဟန် စိတ်တည်ငြိမ်မည့်အချိန်ကို စောင့်နေသည့်ပုံပေါ်သည့်တိုင် မစောင့်နေသကဲ့သို့လည်း ဖြစ်နေသည်။

ပတ်၀န်းကျင်သည် အလွန်တိတ်ဆိတ်နေပြီး လင်းဟန်၏ မတည်ငြိမ်သည့်အသက်ရှုသံသာလျှင် တစ်ခုတည်းသောအသံဖြစ်နေသည်။

ထို့နောက် ခဏအကြာတွင် ဟယ့်ယွင်ထင်က ရုတ်တရက် လှုပ်ရှားလာလေသည်။

သူက လင်းဟန်ကို ငြင်သာမှုမရှိ တံခါးဆီသို့ တွန်းလိုက်ပြီး လက်မောင်းများထဲထွေးဖက်ကာ မျက်လုံးများကိုပိတ်၍ နီရဲ‌ကာတုန်ယင်နေသည့်နှုတ်ခမ်းများကို ငုံခဲလိုက်တော့သည်။

*

စာရေးသူမှာပြောစရာရှိသည်။

ဟယ့်ယွင်ထင် နမ်းချလိုက်ပါပြီ။

👾