MM Story Teller

Chapter 102

Viewers 19k

🐯Chapter 102

ညစာစားချိန်ရောက်လာပေပြီ။

နဂါးကြီးက သူတို့ကို ကောင်းကင်မြို့တော်၏ အကြီးမားဆုံးနေရာဖြစ်သည့် ကြယ်တာရာလမင်းရေကန်သို့ ခေါ်ဆောင်သွားခဲ့သည်။

ရုပ်ရှင်တွင်ဖော်ပြထားသည့်အတိုင်း ထိုနေရာက အလွန်အမင်း စည်းစိမ်ချမ်းသာပြည့်ဝပြီး ခန့်ညားလှပေသည်။ နောက်ခံအဖြစ် ကြယ်တာရာကောင်းကင်ကြီးဖြင့် အလှဆင်ထားပြီး ကြမ်းခင်းများကို လရောင်ကျောက်တုံးများဖြင့် လမ်းခင်းထားသည်။ အလယ်တွင် ကပွဲခန်းမတစ်ခုရှိသည်။ မျက်နှာဖုံးများတပ်ထားသော နတ်ဘုရားငယ်ငယ်လေးများနှင့် နဂါးလူမျိုးများက ညစာစားပွဲဖွင့်လှစ်မည်ကို အစွန်းဆုံးတွင်ရပ်ကာ စောင့်ဆိုင်းနေကြသည်။ ပတ်ဝန်းကျင်တွင် မီးအိမ်များကိုအစားထိုးလဲလှယ်ရန် ခွက်များကိုတွန်းကာ လေသံတိုးတိုးဖြင့် ပြောနေကြသော နတ်ဘုရားများလည်းရှိသည်။

နဂါးကြီးများရှိနေသည့်နေရာက အလွန်လျှို့ဝှက်လွန်းလှ၏။ ယခုလက်ရှိအချိန်အထိ ကောင်းကင်မြို့တော်တွင် နေထိုင်သူတစ်ယောက်မျှကို ရှာမတွေ့သေးပေ။ နဂါးကြီးက ဦးစွာ သူတို့ကို အောက်သို့ချပေးလာသည်။ ထို့နောက် သူ့တောင်ပံများကို ဖြည်းညင်းစွာ ထောင်မတ်လိုက်ပြီး သူ၏အနီရောင်မျက်လုံးပေါ်တွင် အမာရွတ်တစ်ခုရှိသော ချောမောခန့်ညားသည့်လူတစ်ယောက်အဖြစ် ပြောင်းလဲသွားသည်။

ကုယွီမြန် "..."

ပရိသတ်များက အစောကတည်းက အော်ဟစ်နေခဲ့ကြပြီးဖြစ်၏။

[54 တံတား ယွဲ့မင် - အား... အဲဒါ နစ်ခ်ပဲ… ရုပ်ရှင်ထဲကအတိုင်းပဲ QAQ ခန့်မှန်းထားတဲ့အတိုင်း သူက အနက်ရောင်နဂါးပဲ…]

နစ်ခ်က ရေသူမလေးနှင့်နဂါးကြီးရုပ်ရှင်၏ အဓိကဇာတ်ဆောင်ဖြစ်သည်။ သူက ကောင်းကင်မြို့တော်မှ မြေအောက်မြစ်ဆီ ပြည်နှင်ဒဏ်ပေးခံခဲ့ရခြင်းဖြစ်သည်။ ရုပ်ရှင်ထဲတွင် သူက ရေသူမလေးနှင့် ချစ်ကျွမ်းဝင်သွားခဲ့သည်။

နေစမ်းပါဦး... ဒါဆို ငါတို့လှေကိုတွန်းလိုက်တဲ့ အရမ်းလှပပေမဲ့ ထူးခြားတဲ့အသွင်သဏ္ဍာန်ကို ရှင်းရှင်းလင်းလင်း မမြင်လိုက်ရတဲ့ ရေသူမက "ရေသူမလေးနှင့်နဂါးကြီး" ရုပ်ရှင်ရဲ့ အမျိုးသမီးဇာတ်ဆောင်၊ နစ်ခ်ရဲ့လက်ရှိမိန်းမပေါ့...

အရသာရှိသော ဆန်းဒဝေ့ခ်ျများကို စားပြီးနောက် နဂါးကြီးက သူ့ကျောပေါ်တွင် လိုက်ပါစီးနင်းရန် ရေသူမလေးကို လာရောက်ခေါ်ဆောင်သည်မှာ အံ့ဩစရာမရှိပေ။ ကုယွီမြန် ထိုသို့တွေးမိသည်။

နစ်ခ် သူတို့ကို ကြည့်လာသောအခါ ကုယွီမြန်၏ပခုံးပေါ်တွင် ပျင်းရိစွာထိုင်နေသော နှင်းကျားသစ်လေးက အရှုံးမပေးဘဲ နဂါးကြီးကို ပြန်ကြည့်လိုက်သည်။

"လူသား၊ မင်းရဲ့ကလေးက မင်းကို အရမ်းကာကွယ်ပေးတာပဲ..."

နစ်ခ် နှင်းကျားသစ်လေးကို ထူးဆန်းစွာကြည့်ပြီး ဖြည်းဖြည်းချင်း ပြောလာသည်။

"ငါ မင်းကို အကူအညီတစ်ခုလောက် တောင်းချင်တယ်…"

၎င်းက ဇာတ်လမ်း၏မြှုပ်ကွက် စတင်တော့မည့်အချိန်ဟု ကုယွီမြန် ခန့်မှန်းကာ ခေါင်းညိတ်လိုက်သည်။

"ဘာများလဲ ကျွန်တော့်ကိုပြောပါ…"

"ငါ့သားက ဒီနေ့ပါတီပွဲမှာ အဖွင့်အကကိုကလိမ့်မယ်… ဒါပေမဲ့ သူ့ပါတနာက ဒီမနက်မှာပဲ သူ့ကို ထားသွားခဲ့တယ်…"

ခွေးပေါက်လေးက ချက်ချင်းစိတ်လှုပ်ရှားစွာဖြင့် "အာဝူး အာဝူး" ဟု အော်ပြီးထလာကာ နေရာမှာတင် သူ့လက်နှစ်ဖက်ဖြင့် စုံတွဲအကကို ပုံဖော်လိုက်သည်။ ပြောလိုသည်မှာ သူက ပါတနာနေရာအတွက် လုံလောက်သည့်အရည်အချင်းရှိသည်ဟု ဆိုလိုခြင်းဖြစ်သည်။

ကုယွီမြန် "..."

သူက ‌အော်ဟစ်နေသောခွေးပေါက်လေးကို ပွေ့ချီလိုက်သည်။

နဂါးကြီးက မလှုပ်မယှက်ဘဲ ဆက်ပြောလာသည်။

"ဒါကြောင့် သူ ပါတနာတစ်ယောက် လိုအပ်တယ်…"

ကုယွီမြန်က ဖြစ်နိုင်ခြေအချို့ကို စဉ်းစားခဲ့သော်လည်း ၎င်းကို လက်မခံနိုင်ပေ။ ထို့ကြောင့် သူ ရူးချင်ယောင်ဆောင်ကာ မေးလိုက်သည်။

"ကျွန်တော်ကို သူ့အတွက် တစ်ယောက်ယောက် ကူရှာပေးရမှာလား…"

နဂါးကြီး : "မဟုတ်ဘူး… ငါ သူ့အတွက် တစ်ယောက်ယောက်ကို ကူရှာပေးပြီးသွားပြီ…"

ကုယွီမြန် : "အိုး"

နဂါးကြီး၏မျက်လုံးများက သူ့အပေါ်သို့ တဖြည်းဖြည်းကျရောက်လာသည်။

ကုယွီမြန် "..."

ဘာလုပ်ဖို့လဲ… ငါနဲ့မသိတဲ့သူစိမ်းနဂါးတစ်ကောင်နဲ့ အတူတူတွဲ မကချင်ပါဘူး…

သို့သော် ကုယွီမြန်က မည်သည့်တိုက်ရိုက်ထင်မြင်ချက်ကိုမျှ မပေးခဲ့ပေ။ နှင်းကျားသစ်လေးက သူ့မျက်နှာကို ကုယွီမြန်၏ပခုံးပေါ်တွင် နစ်မြှုပ်ထားပြီး ဒေါသထွက်နေလေသည်။

၁၀ မိနစ်အကြာတွင် ဤအစီအစဉ်က လူကြီးများနှင့် ကလေးများကို သီးခြားခွဲထားရန်လိုအပ်ကြောင်း သိရှိသွားရသည်။ ဇာတ်လမ်းမြှုပ်ကွက်သာ အဖွင့်မခံရခဲ့လျှင် ခရီးသွားများလည်း ကောင်းကင်မြို့တော်သို့ ကောင်းကင်ရထားဖြင့် ခေါ်သွားခံရပြီး သူတို့၏ချစ်ရသူများ၊ သူစိမ်းများနှင့် ကခုန်ကြလိမ့်မည်။ ကြယ်တာရာလမင်းရေကန်မှ ကောင်းကင်မြို့တော်တွင် နေထိုင်သူများပင် ပါဝင်ပေလိမ့်မည်။

ကလေးများအတွက်လည်း ကြယ်တာရာလမင်းရေကန်အနီးရှိ အပျော်စီးချားရဟတ်ပေါ်တွင် ဆော့ကစားရန် စီစဉ်ပေးထားခြင်းကြောင့် မိဘများက သူတို့ကလေးများ၏အန္တရာယ်နှင့်ပတ်သက်ပြီး စိုးရိမ်စရာမရှိပေ။ တစ်ကိုယ်တည်းအမျိုးသားများနှင့် အမျိုးသမီးများက သူတို့၏ကိုယ်ပိုင်ပါတနာကို ရွေးချယ်နိုင်သည်။ ဤသည်မှာ ရှေ့ကဝန်ထမ်းများက တစ်ကိုယ်တည်းသမားလားဟု မေးရသည့်အကြောင်းအရင်းပင်ဖြစ်၏။

ကုယွီမြန် ကူကယ်ရာမဲ့သွားသည်။

"ကစားကွင်းက ငါ့အတွက် blind date စီစဉ်ပေးလိမ့်မယ်လို့ မျှော်လင့်မထားမိဘူး..."

"ဒါဆို ယွမ်ယွမ်နဲ့အာ့အာကို ချိုးချိုးက ကူပြီးစောင့်ရှောက်ပေးထားပါလား…"

ကုယွီမြန် ပြောရင်း ကလေးများ၏ခေါင်းများကို ပွတ်သပ်လိုက်သည်။

"မင်းလည်းပဲ မင်းရဲ့လုံခြုံရေးအတွက် ဂရုစိုက်သင့်တယ်၊ ဟုတ်ပြီလား… ထွမ်ထွမ်လည်းအတူတူပဲ… မင်းတို့ တစ်ခုခုလိုတာရှိရင် ငါ့ကို လှမ်းခေါ်လိုက်…"

မြေခွေးလေးက လေးနက်စွာ ခေါင်းညိတ်လိုက်သည်။

"ကျီ…"

"အီ…"

ပန်ဒါပေါက်လေးက အပျော်စီးချားရဟတ်ပေါ်တွင် ကစားချင်သော်လည်း ကုယွီမြန်နှင့်မခွဲချင်ပေ။ ကံကောင်းစွာပင် အပျော်စီးချားရဟတ်နှင့် အကခန်းမက အလွန်နီးကပ်လှသည်။ လူကြီးများနှင့်ကလေးများက တစ်ယောက်ကိုတစ်ယောက် မြင်တွေ့နိုင်သည်။ အစပိုင်းတွင် နှင်းကျားသစ်လေးက တစ်စုံတစ်ခုကို စဉ်စားနေသည့်ပုံပင်။

ကလေးများနှင့်ခွဲခွာပြီးနောက် ကုယွီမြန်က တစ်ယောက်တည်း အဝတ်အစားလဲရန် စီစဉ်ပေးခြင်းခံရသည်။

တိုက်ရိုက်ထုတ်လွှင့်သည့်ကင်မရာက ကုယွီမြန်နောက်သို့ ပါသွားခဲ့သည်။ မူလက ထန်ယွမ်လေး၏ရှုထောင့်မှ ရိုက်ကူးခဲ့ခြင်းဖြစ်သည်။ ထန်ယွမ်လေးနှင့် ကုယွီမြန် ခွဲခွာရချိန်တွင် ၎င်းက ကြည့်ရှုသူရှုထောင့်အဖြစ်သို့ ပြောင်းလဲသွားခဲ့သည်။ အဝတ်အစားလဲပြီးနောက် ကုယွီမြန် ထွက်လာပြီး ဖဲပြားကိုချည်နှောင်ရင်း ပြောလိုက်သည်။

"ကျွန်တော် တကယ် မကနိုင်ဘူး...အခု ငြင်းလို့ရသေးလား…"

ဝတ်စုံက အမှန်တကယ် ပြီးပြည့်စုံစွာ ကွက်တိကျနေသည်။ ထိုဝတ်စုံမှာ double breasted နှင့် အလှဆင်ကြိုးများပါရှိသောဒီဇိုင်းဖြစ်သည်။ ၎င်းသည် ကုယွီမြန်၏ပုံပန်းသဏ္ဍာန်ကို သွယ်လျကာလှပသွားစေသည့်အပြင် သူ၏ဖော်ပြ၍မရနိုင်သောအလှအပကိုလည်း ဖော်ပြနိုင်ပေသည်။

[ Double Breasted Suitပုံကို အောက်မှာထည့်ပေးထားပါတယ် ]

မှတ်ချက်ရေးသာသည့်ဖန်သားပြင်ပေါ်တွင် တစ်စက္ကန့်၊ နှစ်စက္ကန့်ခန့် တိတ်ဆိတ်သွားပြီးနောက် နောက်ထပ်မိနစ်အနည်းငယ်တွင် "ငါလိုချင်တယ်" နှင့် "ငါသေသွားပြီ" ဟူသောစကားများက ပြင်းထန်စွာ ပေါက်ကွဲထွက်လာကြသည်။

[မြန်မြန် ဝတ်ထားတဲ့ဟာကို သေချာကြည့်ကြစမ်း…]

[ မြန်မြန် တစ်နှစ်ပတ်လုံး အဝတ်အစားလဲတဲ့ဂိမ်းကို ကစားရင် ပိုကောင်းမှာပဲ…]

[အဲဒါကို ငါလည်း တကယ်ကြည့်ချင်တယ်… ငြင်းဖို့မလိုပါဘူး… ငြင်းလိုက်တာထက် ငါ့ကို လက်ထပ်လိုက်တာက ပိုကောင်းလိမ့်မယ်…]

၉ နာရီအချိန်၌ စိတ်ကူးယဉ်မြို့တော်ကိုရောက်ကတည်းက ပရိသတ်များ တင်ထားသော screenshot ပေါင်းများစွာရှိလေသည်။ အဘယ်ကြောင့်ဆိုသော် screenshot များက သေလောက်အောင် ကြည့်ကောင်းနေသောကြောင့်ပင်။ နတ်သူငယ်လေးများ သူ့ကိုနမ်းနေသည့်ပုံတွင်ဖြစ်စေ၊ ရေသူမလေးနှင့် စကားပြောနေချိန်တွင်ဖြစ်စေ၊ သို့တည်းမဟုတ် နောက်ဆုံး စိတ်ကူးယဉ်မြို့တော်ကို ညအချိန်၌ လည်ပတ်နေချိန်တွင်ဖြစ်စေ ကြည့်ကောင်းနေသည်။ ယခုအခါ သူက ဝတ်စုံအသစ်ကို ဝတ်ဆင်ထားသည်။

ကိုယ်ပိုင်ဘလော့အငယ်စားပေါ်တွင် ကုယွီမြန်၏ကျော်ကြားမှုက အရူးအမူးမြင့်တက်လာပြီး လာရောက်လည်ပတ်သူအရေအတွက်မှာ ၁၀ သန်းကျော်မှ သန်း ၁၀၀ ကျော်အထိ တိုးလာခဲ့သည်။ စတူဒီယို၌ ကြည့်ရှုသူအရေအတွက်သည်လည်း သန်း ၁၆၀ မှ သန်း ၁၈၀ အထိ တဟုန်ထိုးမြင့်တက်သွားခဲ့ပြီး မကြာခင်မှာပင် ယနေ့၏စုစုပေါင်းကျော်ကြားမှုစာရင်းတွင် ပထမနေရာချိတ်သွားခဲ့သည်။

ထိုအချိန်တွင် ကုယွီမြန်က သူ၏နှာခေါင်းနှင့်ပါးစပ်များသာဖော်ထားပြီး သူ့မျက်နှာ၏အပေါ်ပိုင်းကို ဖုံးအုပ်ထားသော မျက်နှာဖုံးကို တပ်ဆင်ထားသောကြောင့် ကောင်းကင်မြို့တော်မှ လူမျိုးများနှင့် ခြားနားမှုမရှိတော့ပေ။ ကောင်းကင်မြို့တော်မှ စားပွဲထိုးလေးများက ဖွင့်ပွဲအတွက် စောင့်ဆိုင်းဧရိယာသို့ ကုယွီမြန်အား ခေါ်ဆောင်သွားရန် ရောက်လာကြသည်။ ထိုနေရာကို လူကြီးလူကောင်းများအတွက် အထူးသီးသန့်ပြုလုပ်ထားခြင်းဖြစ်ပြီး စိတ်ကူးယဉ်မြို့တော်တစ်ခုလုံးကို အပေါ်စီးမှကြည့်ရှုနိုင်သည်။

"ကျေးဇူးတင်ပါတယ်…"

ကုယွီမြန်က စားပွဲထိုးလေးကို ပြုံးပြလိုက်သည်။

စားပွဲထိုးလေး၏မျက်နှာက နီနေပြီး သူ့နားရွက်များလည်း နီရဲနေသည်။

"အချိန်ကောင်းလေးကို ပိုင်ဆိုင်နိုင်ပါစေ…"

တစ်ဖက်တွင် အခြားခရီးသွားများ ဆက်လက်ရောက်ရှိလာခဲ့သည်။ သူတို့က ဇာတ်လမ်းမြှုပ်ကွက်ကို မဖော်ထုတ်နိုင်သောကြောင့် သာမန်ဧရိယာတွင် စောင့်ဆိုင်းပြီး အဖွင့်အက,ကပြီးမှသာ စတင်ကနိုင်ပေလိမ့်မည်။ ရှုခင်သည်လည်း အလွန်လှပနေမည်မှာ အသေအချာပင်။ ထောင်ပေါင်းများစွာသောခရီးသွားများသည်လည်း လူကြီးနှင့်ကလေး သပ်သပ်စီခွဲထားခြင်းခံရသည်။ လူကြီးများက စောင့်ဆိုင်းဧရိယာထဲတွင် ရှိနေပြီး ရံဖန်ရံခါဆိုသလို ကုယွီမြန်ထံ စပ်စုစွာ ကြည့်လာကြသည်။

လူအများစု၏စိတ်ခံစားချက်များက ဆန်းသစ်ပြီး စိတ်လှုပ်ရှားနေကြသည်။ မည်သို့ပင်ဆိုစေကာမူ လူတိုင်း ဇာတ်လမ်းမြှုပ်ကွက်ကို ကြည့်ရှုရန် အခွင့်အရေးမရရှိကြပေ။ ထို့အပြင် လူအများ၏အစကနဦးက ကုယွီမြန်အပေါ်ထားသည့် သဘောကျသည့်တန်ဖိုးက နားမလည်နိုင်ဖွယ် မြင့်တက်လာခဲ့ပြီး ကုယွီမြန်သည်လည်း စိတ်သဘောထားကောင်းမွန်လှသည်။

လူအနည်းငယ်မှလွဲ၍ပင်။

ဥပမာအားဖြင့် အင်တာနက်ကျော်ကြားသူတစ်ဦးပင်။

ဤတစ်ကြိမ်တွင် မိန်းကလေးတစ်ယောက်က စကားဝိုင်းတစ်ခု၊ နှစ်ခုကို ရိုက်ကူးရန် စိတ်ကူးယဉ်မြို့တော်ကို ရောက်လာခဲ့သော်လည်း စလာချိန်ကတည်းက ကုယွီမြန်က လူအများ၏အာရုံစိုက်မှုကို ခိုးယူသွားခဲ့သည်။ ပို၍ပင်အံ့အားသင့်စရာကောင်းသော ဇာတ်လမ်းမြှုပ်ကွက်ကို ကံကောင်းပြီး ဖွင့်နိုင်ခဲ့သည်ကို မဆိုထားနှင့်၊ လုံခြုံရေးစစ်ဆေးရန် စတင်တန်းစီကတည်းက လူတိုင်း သူ့အကြောင်းကို ပြောနေခဲ့ကြသည်။

သို့သော် သူက အဆင့်နိမ့်လူသားတစ်ယောက်ဖြစ်သည်။ ကုယွီမြန်၏ဝတ်စုံကိုကြည့်ပြီး သူ အမှန်တကယ် ချောမောကြောင်းကို သူမကိုယ်တိုင်လည်း ဝန်ခံရပေမည်။ အထူးသဖြင့် ကုယွီမြန် သူမအား ယဉ်ကျေးစွာ ပြုံးပြလာချိန်ပင်ဖြစ်၏။ မြင့်မားလာသောအက်စစ်က သူမ၏အစာအိမ်ကို အချဉ်ပေါက်လာစေသည်။

သူမ၏အပေါင်းအသင်းများက သူမစိတ်ခံစားချက်ကို နားလည်ပုံပေါ်ပြီး သူမနားထဲသို့ တီးတိုးပြောလာခဲ့သည်။

"သူ ဒုက္ခရောက်မှာကိုစိုးရိမ်မနေနဲ့… ဇာတ်လမ်းမြှုပ်ကွက်က ဘယ်လိုဖြစ်လာမလဲဆိုတာ ဘယ်သူသိမှာလဲ… ရေသူမနဲ့နဂါးရဲ့သားမှာ ထူးဆန်းတဲ့ရောဂါအချို့ရှိတယ်လို့ အချို့စိတ်ကူးယဉ်မြို့တော်ရုပ်ရှင်မှာ ဖော်ပြထားတယ်...သူ့သားက အရပ်ပုပြီးရုပ်ဆိုးလို့ဖြစ်မှာပေါ့…"

အင်တာနက်ကျော်ကြားသူ : "အဲလိုလား… အဲဒါကြောင့်မဟုတ်ရင် သူ့ရဲ့ပါတနာက ဘာလို့ ထွက်ပြေးသွားမှာလဲ… ပြီးတော့ ဒီဇာတ်လမ်းမြှုပ်ကွက်က ကောင်းတဲ့အရာတော့ မဖြစ်နိုင်ဘူး… မဟုတ်ရင် စိတ်ကူးယဉ်မြို့တော်က အဲဒါကို ဖိနှိပ်ဖုံးကွယ်ထားမှာမဟုတ်ဘူးー…ကောင်းတဲ့အရာသာဆို လွန်ခဲ့တဲ့ ၁၀ စုနှစ်လောက်ကတည်း စဖွင့်ခံရလောက်ပြီးပြီ…"

"စောင့်ကြည့်နေလိုက် အဲဒီလူသားက ခဏလောက်နေရင် အရှက်ကွဲသွားလိမ့်မယ်…"

အင်တာနက်ကျော်ကြားသူက ထိုအကြောင်းကို ခနမျှ စဉ်းစားပြီးနောက် ၎င်းက အလွန်ဖြစ်နိုင်ချေရှိကြောင်း ခံစားရကာ ချက်ချင်း စိတ်သက်သာရာရသွားသည်။

ပတ်ပတ်လည်ရှိခရီးသွားများ၏ သိလိုစိတ်ပြင်းပြပြီး ချစ်မြတ်နိုးစွာကြည့်နေသော မျက်လုံးများကို မြင်ရသည်မှာ ရယ်စရာကောင်းလှသည်။ သူမနှင့်သူမ၏အပေါင်းအသင်းများက မလိုမုန်းတီးစိတ်များဖြင့်ကြည့်ကာ စောင့်ဆိုင်းနေလိုက်သည်။

စောင့်နေတယ်...စောင့်နေတယ်...

ကုယွီမြန်လည်း စောင့်ဆိုင်းနေသည်။ သို့သော် သူက ထိုကိစ္စနှင့်ပတ်သက်ပြီး စိုးရိမ်စရာမလိုအပ်ပေ။ ညရှုခင်းများကို ငေးမောကြည့်ရှုရင်း ထန်ယွမ်လေးကို ကြည့်လိုက်သည်။ သူတို့က မဝေးလှသောနေရာရှိ အပျော်စီးချားရဟတ်ပေါ်တွင် ဆော့ကစားနေကြသည်။

ထိုအကွာအဝေးမှ လှမ်းမြင်နိုင်ရန်မှာ အနည်းငယ်ခက်ခဲသော်လည်း ထန်ယွမ်လေးက အလွန်ပျော်ရွှင်နေသည့်ပုံပေါ်ပြီး အဝေးမှ ခွေးပေါက်လေး၏အူသံကိုလည်း ကြားနေရသည်။ ကလေးများက လူကြီးများနှင့်ကလေးများ ခွဲနေရသည့်အစီအစဉ်ကို အမှန်တကယ် သဘောကျပေသည်။ မည်သို့ပင်ဆိုစေကာမူ မိဘများ၏ထိန်းချုပ်မှုကို မခံရတော့ပေ။ ကုယွီမြန် အနည်းငယ် စိတ်ပျက်သွားသလို ခံစားရသည်။ ကလေးများကြီးလာသည်နှင့်အမျှ ကုယွီမြန် ကူကယ်ရာမဲ့သလို ခံစားရသည်။

ထိုအချိန်တွင် ဆူညံနေသောခန်းမက ရုတ်တရက် တိတ်ဆိတ်ငြိမ်သက်သွားရသည်။ တစ်စက္ကန့်အတွင်း ရေခဲမှတ်သို့ရောက်ရှိသွားသည့် ပွက်ပွက်ဆူနေသောရေကဲ့သို့ပင်။ ပင်လယ်ကိုပိုင်းခြားလိုက်သော မိုးဇ်ကဲ့သို့ စုဝေးနေသည့် မျက်နှာဖုံးများတပ်ဆင်ထားသောလူများက တိတ်တဆိတ် လမ်းဖယ်ပေးလာကြသည်။

ကြီးမားခန့်ညားသောတံခါးကြီးက ရုတ်တရက် ပွင့်သွားခဲ့သည်။

လူတစ်ယောက်က စားပွဲထိုးများဝန်းရံလျက် ဝင်လာသည်။

သူသည်လည်း ကုယွီမြန်ကဲ့သို့ တူညီသောမျက်နှာဖုံးနှင့် အဝတ်အစားကို ဝတ်ဆင်ထားသည်။ နှာတံဖြောင့်ဖြောင့်၊ ပါးလွှာသောနှုတ်ခမ်းတစ်စုံနှင့်အတူ ထိုသူက အရပ်ရှည်ကာ သွယ်လျသည်။

မျက်နှာဖုံးအောက်မှ လှပပြီးအံ့ဩစရာကောင်းသည့် ခဲပြာရောင်မျက်ဝန်းများက ရံဖန်ရံခါဆိုသလို မှေးကျဉ်းကြည့်လာသည်။ ပတ်ပတ်လည်သို့ လိုက်ကြည့်ပြီး ကုယွီမြန်ကိုတွေ့သောအခါ တစ်စက္ကန့်မျှရပ်တန့်သွားသည်။

သူ လျှောက်လာပြီး ကုယွီမြန်၏အရှေ့တွင် ရပ်လိုက်သည်။

ထိုလူက သူ့အားငုံ့ကြည့်ကာ အချိနိခဏမျှ တိတ်ဆိတ်သွားပြီးနောက် ပြုံးကာပြောလာသည်။

"ကဖို့အတွက် မင်းကို ဖိတ်ခေါ်လို့ရမလား…"

"..."

ကုယွီမြန် မှင်သက်သွားရ၏။

ခရီးသွားများနှင့် ကောင်းကင်မြို့တော်မှလူမျိုးများသည် သူတို့ကို ငေးကြည့်နေကြသည်။ အင်တာနက်ကျော်ကြားသူနှင့် အပေါင်းဖော်များက အံ့ဩလွန်း၍ ပါးစပ်အဟောင်းသားဖြစ်သွားရပြီး စတူဒီယိုတွင်...

ကြည့်ရှုသူဦးရေက ထိုအခိုက်အတန့်တွင် သန်း ၂၀၀ အထိ မြင့်တက်သွားသည်။

🐯🐯🐯

Prev Next