MM Story Teller

Chapter 101

Viewers 19k

🐯Chapter 101

၎င်းက သာမန်ပြဇာတ်တစ်ပုဒ်ဖြစ်လျှင် ခရီးသည်များမှာမြေအောက်မြစ်မှထွက်လာပြီး ရေပေါ်တွင်ပေါလောပေါ်နေသောစင်္ကြန်ဆီသို့ လှေဖြင့်ခေါ်ဆောင်သွားခံရလိမ့်မည်။ ထို့နောက် ကောင်းကင်မြို့တော်ဆီသို့သွားရန် ကောင်းကင်ရထားကို စီးကြလိမ့်မည်။

သို့သော် ကုယွီမြန်က မြှုပ်ထားသောဇာတ်ကွက်ကို အသက်ဝင်စေခဲ့သည်။

ကြီးမားသောနဂါးကြီးမှာ အနက်ရောင်ကြေးခွံများဖြင့် ဖုံးအုပ်နေပြီး ‌ရွှေရောင်မျက်လုံးတစ်စုံရှိသည်။ သူ့တောင်ပံများကို ဖြန့်ကျက်လိုက်သောအခါ ကောင်းကင်တစ်ခုလုံးကို ဖုံးအုပ်လုနီးပါးပင်။ သူက ဟိန်းဟောက်ကာ ကုယွီမြန်တို့ကို ကျယ်ပြောလှသောညကောင်းကင်ဆီသို့ သယ်ဆောင်သွားသည်။

ကုယွီမြန်၏လှေက ပျောက်ကွယ်သွားသည်။ သူ့မိသားစုဝင်ကလေးများကို ထွေးပွေ့ထားသော ကုယွီမြန်က နဂါးကြီး၏နောက်ကျောပေါ်သို့ ချက်ချင်းတက်ထိုင်မိသွားပြီး ပျံသန်းသွားချိန်တွင် လေပြင်းများက သူ့နားရွက်များကို ဖြတ်သန်းတိုက်ခတ်သွားသည်။

လှေပေါင်းနှစ်ရာနှင့် ထောင်ပေါင်းများစွာသော ခရီးသွားများက သူတို့ကို အားကျစွာ ကြည့်နေကြသည်။

ဘာကြောင့်လဲဆိုတော့ အဲဒါက အရမ်းကို...မိုက်တယ်လေ

[အလှကုန်တွေကို လွှင့်ပစ်မယ် - ငါ့ရဲ့အခင်ဆုံးသူငယ်ချင်းက အခုလေးတင် မြန်မြန့်ကို တွေ့ခဲ့တယ်… သူ့ရဲ့မြင်ကွင်းကနေပြီး မြန်မြန့်ကို ဓါတ်ပုံလှမ်းရိုက်ခဲ့တယ်… သူက ဘယ်လိုတောင်ခန့်ညားနေရတာလဲ… သူ့သားပေါက်လေးတွေကို ရင်ခွင်ထဲမှာထွေးပွေ့ထားရင်း မြန်မြန်က နဂါးကြီးရဲ့ကျောပေါ်မှာ ထိုင်စီးနေတယ်… သူ့နောက်မှာဆိုရင် ညကောင်းကင်ကျယ်ကြီးရယ်၊ မြစ်တွေရယ်၊ တောင်တန်းတွေရယ်ရှိတယ်… သူက နူးညံ့ပြီးချောမောလွန်းတဲ့အပြင် သူ့ဆီမှာ ခမ်းနားပြီးသူရဲကောင်းဆန်တဲ့ ခံစားချက်ရှိတယ်… ငါတော့ ငါ့မျက်လုံးတွေကို လုံးဝမပိတ်ထားနိုင်တော့ဘူး…]

[အဖြူရောင်သစ်တော်ပွင့်ပန်းလေး - ဘုရားရေ၊ ဓါတ်ပုံလေးတွေပို့ပေးပါဦး… ငါ မမြင်ဖူးပေမဲ့ သူက ဘယ်လောက်တောင် ချောမောနေမလဲဆိုတာ စိတ်ကူးကြည့်နိုင်တယ် T-T]

[သားမ် - ရေသူမလေးနဲ့နဂါးကြီးရဲ့ စာအုပ်တွေအများကြီး ဖတ်ဖူးတယ်… မြှုပ်ကွက်ကိုတော့ တစ်ခါမှမဖတ်ဖူးသေးဘူး… မူလမြှုပ်ကွက်ရဲ့ရှုထောင့်က အရမ်းမိုက်တယ်…]

မမျှော်လင့်ထားသည့် အခြေအနေသစ်ကြောင့် ကြယ်တာရာကောင်းကင် ပလက်ဖောင်းအပြင် ကိုယ်ပိုင်ဘလော့အငယ်စားနှင့် သူငယ်ချင်းအသိုင်းအဝိုင်းကဲ့သို့သော အခြားမီဒီယာအခွဲများမှ များစွာသောလူများက ဆက်တိုက်ဆိုသလို အကြံပြုတိုက်တွန်းကာ စတင်ကြော်ငြာပေးခဲ့ကြသည်။ အခြားပလက်ဖောင်းများမှ ဆက်သွယ်ရေးစနစ်များက အရှိန်အဟုန်ကြီးမားစွာ စီးဝင်လာခဲ့ပြီး စတူဒီယို၏အပူချိန်ကို နောက်တစ်ကြိမ် မြင့်တက်သွားစေသည်။ ယခုအခါ ပရိတ်သတ်ဦးရေက ထိတ်လန့်တုန်လှုပ်ဖွယ် သန်း ၁၅၀ အထိ ရောက်ရှိလာခဲ့ပြီး သောကြာနေ့ည ၁၀ နာရီထိတိုင် မြင့်တက်နေဆဲပင်။

သို့သော် အမှန်တကယ်၌ ကုယွီမြန်၏ကိုယ်ပိုင်ခံစားချက်များကမူ အလွန်"ချောမောပြီး သူရဲကောင်းဆန်ခြင်း" မဟုတ်ပေ။

သူ့ရင်ခွင်ထဲတွင် ထန်ယွမ်လေး၊ မြေခွေးလေးတို့နှင့် ပြည့်နှက်နေသည်။ ထန်ယွမ်လေးက စိတ်လှုပ်ရှားနေပြီး ကုယွီမြန်၏လက်မောင်းကိုကိုင်ကာ အောက်သို့ငုံ့မကြည့်ဘဲမနေနိုင်ပေ။ မြေခွေးလေးက အခြားအကောင်ပေါက်လေးများကဲ့သို့ သတ္တိမရှိပေ။ ပိုမြင့်သောနေရာသို့ရောက်ရှိသွားချိန်တွင် သူ၏လက်သေးသေးလေးများဖြင့် သူ့မျက်လုံးများကို တင်းတင်းကျပ်ကျပ် ကာထားပြီး ဘောလုံးလေးတစ်လုံးကဲ့သို့ ကွေးထားကာ ကုယွီမြန်၏လက်မောင်းများထဲသို့ တိုးဝင်လျက်ရှိသည်။

တက်ကြွပျော်ရွှင်နေသော ခွေးပေါက်လေးကို မဆိုထားနှင့် ထိုကလေးနှစ်ယောက်နှင့်ပင် ကုယွီမြန်အား အလုပ်ရှုပ်သွားစေသည်။

အာ့ဟာလေးက သူ့ခေါင်းကို လုံးဝခါရမ်းနေပြီး လမင်းကြီးထံ "အာဝူး အာဝူး" ဟု လှမ်းဟောင်နေလေသည်။ သူ ကျယ်လောင်စွာအော်ဟစ်ပြီးနောက် နဂါးကြီးသည်လည်း သူ့အားတုန့်ပြန်သည့်အနေဖြင့် အော်ဟစ်လာသည်။ ဤကဲ့သို့ အပြန်အလှန်အော်ဟစ်နေမှုနှင့် ပတ်သက်ပြီး အလွန်စိတ်လှုပ်ရှားနေလေသည်။ ကုယွီမြန် သူ၏လက်တစ်ဖက်ကို အာ့ဟာလေး၏ပတ်ပတ်လည်တွင် ထားကာ ခွေးပေါက်လေး ခုန်ဆင်းသွားပြီး လေထဲတွင် နဂါးကြီးနှင့်ရန်မဖြစ်စေရန် ကာကွယ်ထားရသည်။

ကုယွီမြန်က လူစုခွဲနိုင်သည့်အရည်အချင်းမရှိသလို ခံစားမိသည်။ "..."

ကလေးတစ်ယောက်ကို အပြင်သို့ခေါ်သွားခြင်းမှာ လူကြီးများ၏ခရီးသွား အတွေ့အကြုံအပေါ် အမှန်တကယ် သက်ရောက်မှုရှိသည်။ ကံကောင်စွာပင် သူ့တွင် ချစ်သူမရှိသလို အကောင်ပေါက်လေးများနှင့်လည်း အဆင်မပြေမှုများရှိမနေပေ။ ၎င်းက လက်တွဲဖော်မရှာမည့် ကုယွီမြန်၏စိတ်ကူးကို ပို၍ခိုင်မာလာစေသည်။ သို့သော် နဂါး၏ကျောပေါ်မှ စိတ်ကူးယဉ်မြို့တော်ကို အနီးကပ်ကြည့်လိုက်လျှင် သူတို့ မြေအောက်မြစ်မှ ထွက်လာခါစထက် ပို၍အံ့အားသင့်စရာကောင်းနေပေသည်။

"ယွမ်ယွမ်၊ အာ့အာ၊ ထွမ်ထွမ်...ချိုးချိုးကို အနိုင်ကျင့်မနေနဲ့တော့…"

ကုယွီမြန်က အကောင်ပေါက်လေးများကို ကိုင်ထားရင်း သူတို့၏ခေါင်းသေးသေးလေးများကို ထိလိုက်ကာ နွေးထွေးသောအသံနှင့် ပြောလိုက်သည်။

"အောက်ကိုကြည့်လိုက်… မလှဘူးလား…"

စိတ်ကူးယဉ်မြို့တော်က ကျယ်ပြောလွန်းလှ၏။ အတိတ်နှင့်အနာဂတ်ရှိ အဆောက်အဦးပုံစံအမျိုးမျိုးက ပြန့်ကျဲနေပြီး အပန်းဖြေစရာကိရိယာများလည်း နေရာတိုင်း၌ ပြန့်ကျဲနေသည်။ ထိုအချိန်တွင် မြို့တော်တစ်ခုလုံးကို နီရွှေရောင်မီးအိမ်များဖြင့် ထွန်းလင်းထားပြီး နေထိုင်သူများက စက္ကူမီးများဖြင့် ဝင်ထွက်သွားလာနေကြသည်။

စိတ်ကူးယဉ်မြို့တော်သို့ ညအချိန် သွားရောက်လည်ပတ်ခြင်းက အကောင်းဆုံးဖြစ်သည်မှာ ထူးဆန်းသည့်အရာမဟုတ်ပေ။ ညအချိန်၌သာလျှင် ဤကဲ့သို့သောရှုမျှော်ခင်းများကို မြင်တွေ့နိုင်သည်။ အနီးတစ်ဝိုက်တွင် မြင့်မားသောအဆောက်အအုံ အနည်းငယ်ရှိသော်လည်း လူပုလေးမြို့တော်၊ လမင်းရေကန်၊ နဂါးတောင်ကြားနှင့် အစရှိသည်တို့လည်းရှိသည်။ စိတ်ကူးယဉ်မြို့တော်ရုပ်ရှင်ထဲကအတိုင်း ရှုခင်းများနှင့်ဇာတ်ကောင်အားလုံးကို ပြီးပြည့်စုံစွာ ပုံတူပြုလုပ်ထားပြီး အရာအာလုံးမှာ လက်တွေ့ဆန်လွန်းလှသည်။

ကလေးများက ကုယွီမြန်နှင့်အတူ အောက်သို့ငုံ့ကြည့်လိုက်ကြသည်။

"အီ"

"ကျီ"

"အာဝူး~"

နောက်ဆုံးတွင် မြေခွေးလေးက သူ့မျက်လုံးများကို ဖွင့်ကြည့်ရဲသွားသည်။ သူက ကုယွီမြန်၏အင်္ကျီကိုဆွဲထားကာအောက်သို့ ဂရုတစိုက် ငုံ့ကြည့်လိုက်ပြီးနောက် ရှုမျှော်ခင်းများ၏ဆွဲဆောင်ခြင်းကို ခံလိုက်ရသည်။

ထိုအချိန်တွင် နှင်းကျားသစ်လေးက အမှားအယွင်းတစ်ခုကို ရှာတွေ့သွားပြီး သူ့လက်များဖြင့် မြေခွေးလေးကို ကုယွီမြန်၏ရင်ခွင်ထဲမှ တွန်းထုတ်လိုက်သည်။

"..."

"ထွမ်ထွမ်ရေ…"

ကုယွီမြန် ကူကယ်ရာမဲ့သွားသည်။ မြေခွေးလေးကို ပြန်ဆွဲယူလိုက်ပြီး နှင်းကျားသစ်လေး၏နားရွက်လေးများကို ပွတ်သပ်ကာ ဆိုဆုံးမလိုက်သော်လည်း ဂရုတစိုက် နားမထောင်ခဲ့ပေ။

မြင့်တက်လာသောအမြင့်နှင့်အတူ အောက်တွင် ဖြန့်ခင်းထားသော မြို့တော်၏အခြေအနေက ပို၍သေးငယ်လာသည်။ ကောင်းကင်ယံတွင် တံမြက်စည်းတံများဖြင့် လေ့ကျင့်နေကြသောစုန်းမများ၊ ပျံသန်းနေသောပိုးစုန်းကြူးများနှင့် ယူနီကွန်းများအပြင် ကုယွီမြန် မမှတ်မိနိုင်သောသတ္တဝါများရှိသည်။

သူတို့ နဂါးကြီးဘေးမှ ဖြတ်သန်းသွားချိန်တွင် သူတို့အားလုံး၏အကြည့်များသည် ကုယွီမြန်တို့အပေါ် ကျရောက်လာကာ စပ်စုလိုစွာနှင့် အံ့အားသင့်စွာ နှုတ်ခွန်းဆက်လာသည်။ ကုယွီမြန်လည်း တီးတိုးပြောဆိုသံအချို့ကို ကြားရသည်။

"ကောင်းကောင်းလျှောက်ကြည့်ခဲ့နော်…"

"အဲဒါက အရှင်သခင်ပဲ…"

"သူ ငါ့ကလေးကို လက်ခံနိုင်လောက်လား…"

ကုယွီမြန်: "…"

[တရုတ်ပြည်တောင်ဘက်ကကျားက ဘယ်တော့မှချိန်းမတွေ့ဘူး: သူတို့ ဘာပြောလိုက်တာလဲ…အဲဒါက ဇာတ်လမ်းရဲ့မြှုပ်ကွက်နဲ့ပတ်သက်နေမယ် ထင်တယ်…]

[tegotai: သောက်ကျိုးနည်း၊ ငါ အွန်လိုင်းပေါ်မှာ ရှာကြည့်လိုက်တာ… စိတ်ကူးယဉ်မြို့တော်က တရားဝင်အချက်အလက်တွေကို ထုတ်ပြန်ထားတယ်… တော်တော်ကြာတဲ့အထိ ဘယ်သူကမှ ရေသူမလေးနဲ့နဂါးကြီးရဲ့ ဇာတ်လမ်းမြှုပ်ကွက်ကို မဖွင့်နိုင်ခဲ့သေးဘူးတဲ့… ဒါကြောင့် ရေသူမလေးနဲ့နဂါးကြီးဇာတ်လမ်းကို လူသိရှင်ကြားဖော်ထုတ်ခံရတာက ဒါပထမဦးဆုံးအကြိမ်ပဲ…]

[အသုံးပြုသူ 18797 - တင်ဆက်သူရေ...အဲဒါ မကောင်းဘူးလား…]

လူသန်းပေါင်း ၁၅၀ ကျော်က အမျိုးမျိုးသောဖြစ်နိုင်ခြေများအားလုံးကို ထင်ကြေးပေးမှန်းဆလာကြသည်။ မှတ်ချက်ပေါင်းတစ်သောင်းကျော်သည်လည်း တစ်ချိန်တည်းမှာပင် စက္ကန့်မလပ် ပေးပို့လာကြသောကြာင့် ၎င်းတို့ကို တစ်ခုချင်းလိုက်ကြည့်ရန် ခက်ခဲလွန်းလှ၏။ သေချာသည်မှာ လူတိုင်း၏စိတ်ဝင်စားမှုကို အပြည့်အဝနှိုးဆော်ခံလိုက်ရပြီဖြစ်သည်။ ဇာတ်ကွက်အတွက် မမဟုတ်လျှင်ပင် ရှုခင်းများကိုကြည့်ရုံနှင့် ပျော်စရာကောင်းလှသည်။

နဂါးကြီးက ပထမဦးစွာ သူတို့ကို လေထုထဲသို့ ခေါ်ဆောင်ပျံသန်းသွားသောကြောင့် စိတ်ကူးယဉ်မြို့တော်တစ်ခုလုံးကို အထက်စီးမှမြင်ရကာ မြို့တော်နှင့်ပတ်ဝန်းကျင်ကိုလည်း တစ်ဆက်တည်းမြင်နိုင်ပေသည်။ ထို့နောက် နောက်တစ်ကြိမ် အောက်သို့ထိုးဆင်းသွားပြီး သက်ဝင်လှုပ်ရှားနေသောမြို့တော်၏ အလယ်ဗဟိုကိုပင် ကျော်ဖြတ်သွားလေသည်။

ကုယွီမြန်တို့က အဆောက်အအုံ၏အတွင်းနှင့်အပြင်၊ ညဈေးနှင့် စတိုးဆိုင်များ၏အတွင်ထဲအထိ ရှင်းရှင်းလင်းလင်း မြင်နိုင်လောက်သည်အထိ နီးကပ်လွန်းလှပေသည်။ အနီးအနားရှိ ထပ်ခိုးထပ်တွင်နေထိုင်သော မှင်စာများနှင့် နတ်သူငယ်များအားလုံးသည် အော်ဟစ်ရယ်မောနေကြပြီး ကလေးများက ကုယွီမြန်ကို နှုတ်ဆက်ရန် ရောက်လာကြသည်။ အခြားပစ္စည်းများနှင့်ဆော့ကစားနေသော ခရီးသွားများသည်လည်း လေချွန်၍လက်ခုပ်တီးကာ ဩဘာပေးလာကြသည်။

"အာဝူး~"

ခွေးပေါက်လေးက သူ့အမြီးကို အရူးအမူးဝှေ့ယမ်းနေပြီး ဘေးမှဖြတ်သွားသူများကို သွားဖြဲပြနေလေသည်။ ထန်ယွမ်လေးနှင့်သူက အတူတကွစကားပြောရန် စိတ်လှုပ်ရှားနေပြီး အတူတူကစားရန် မြေခွေးလေးကိုလည်း လာရောက်ဆွဲခေါ်သွားသည်။

မိန်းမငယ်လေးတစ်ယောက်က ကုယွီမြန်ထံသို့ လက်တစ်ဆုပ်စာပန်းပွင့်များကို ပစ်ပေးလာသည်။ ကုယွီမြန် ထိုအရာကိုကြည့်လိုက်ပြီးနောက် ပန်းများထဲတွင် သူမကိုဆက်သွယ်ရမည့်အချက်အလက် ပါရှိနေ၍ နှင်းကျားသစ်လေးက ၎င်းကို ဒေါသတကြီး အပိုင်းပိုင်းဖြစ်သည်အထိ ဆုတ်ဖြဲပစ်လိုက်သည်။

ကုယွီမြန် "..."

သက်ဝင်လှုပ်ရှားနေသောမြို့တော်ကို လည်ပတ်ပြီးနောက် နဂါးကြီးက နောက်တစ်ကြိမ် နဂါးတောင်ကြားထဲသို့ ခုန်ဆင်းသွားခဲ့သည်။ သူ့တောင်ပံတစ်ဖက်ဖြင့် ရေကိုလှိုင်းထအောင်လုပ်ရင်း တလက်လက်တောက်ပနေသော လမင်းရေကန်ကို ကျော်ဖြတ်သွားသည်။ အရောင်တောက်ပနေသောရေက လွင့်စင်သွားပြီး ကုယွီမြန်၏ပါးပြင်ပေါ်သို့ ပက်ဖြန်းရောက်ရှိသွားသည်။

သူ့ဆံပင်နှင့်အင်္ကျီထောင့်လေးများကြား လေ ဖြတ်သန်းတိုက်ခတ်သွားပြီး လရောင်ထိန်ထိန်သာ ဖြာကျနေလျက်ရှိသည်။ ကုယွီမြန်နှင့်ကလေးများအပြင် သုံးဖက်မြင်ကြည့်ရှုသူများအမြောက်အများက ရယ်မောကာ နဂါးကြီး၏ဟိန်းဟောက်သံကို အတုယူကာအော်ဟစ်ခဲ့ကြသည်။ ယနေ့ခေတ်နည်းပညာက အလွန်ဖွံ့ဖြိုးတိုးတက်လာသည် ဆိုလျှင်ပင် ကြီးမားသောနဂါး၏နောက်ကျောပေါ်တွင် စီးနင်းလိုက်ပါခြင်းမှာ အသက်ရှင်နေစဉ်အတွင်း ထိုကဲ့သို့လက်တွေ့ဆန်လွန်းလှသည့် အတွေ့အကြုံကိုရရှိရန် လူအများစွာအတွက် ခက်ခဲပေလိမ့်မည်။

ထို့နောက် နဂါးကြီးက ကောင်းကင်မြို့တော်ဆီသို့ သူ့တောင်ပံများကိုဖြန့်ကာ ပျံသန်းသွားသည်။ ကုယွီမြန်၏ခံစားချက်များက ရုပ်ရှင်တစ်ကားကိုကြည့်နေရသည်နှင့် တူသော်လည်း ဤအရာက ရုပ်ရှင်တစ်ခုထက် ပို၍လက်တွေ့ဆန်ပြီး ပို၍ပင်အံ့ဩစရာကောင်းသည်။ ကုယွီမြန်က ကြယ်တာရာခေတ်၏ မြင့်မားသောနည်းပညာဖြင့် လုံးဝလွှမ်းမိုးခြင်းကိုခံလိုက်ရပေပြီ။

အမှန်တကယ် ပျော်ရွှင်စေသည်ဟု ကုယွီမြန် ခံစားမိပြီး ပရိသတ်များသည်လည်း ထိုကဲ့သို့တွေးမည်မှာ သေချာသလောက်ပင်။

[အန်နာစူး - စိတ်ကူးယဉ်မြို့တော်ရဲ့ ညခရီးစဉ်အတွင်း နဂါးရဲ့ကျောပေါ်မှာလိုက်စီးရတာက အရမ်းမိုက်တာပဲ… သောက်ရမ်းကိုမိုက်တယ်… အဲဒါက ညအချိန်ကြီး စိတ်ကူးယဉ်မြို့တော်ကို ဖွင့်ရတဲ့အကြောင်းအရင်းအမှန်ပဲ၊ ဟုတ်တယ်မလား…]

[ကျွဲကောသီးရောင်းဝယ်သူ - အား.....]

ပရိသတ်များက တိုက်ရိုက်ထုတ်လွှင့်မှုတွင် ၁၀ ရာခိုင်နှုန်းခန့်သာမြင်ရန် မျှော်လင့်ထားကြလျှင် ကုယွီမြန်နှင့်စိတ်ကူးယဉ်မြို့တော်က ၁၀၀ ရာခိုင်နှုန်းအထက် ယူဆောင်လာခဲ့ပြီးပြီဖြစ်၏။ ထိုအချိန်တွင် မှတ်ချက်ရေးသားသည့် ဖန်သားပြင်မှာ ည ၁၀ နာရီကကဲ့သို့ ရှုပ်ယှက်ခတ်မနေတော့ပေ။

မျက်စိတစ်မှိတ်အတွင်းမှာပင် ပရိသတ်ဦးရေက သန်း ၁၆၀ အထိ ရောက်ရှိလာသည်။

-----

ထိုအချိန်တွင် အခြားတစ်ဖက်၌မူ စိတ်ကူးယဉ်မြို့တော်၏အရာရှိများက ကူကယ်ရာမဲ့သလို ခံစားနေရသည်။

သူတို့က စီမံကိန်းအသစ်များကို စတင်အကောင်အထည်ဖော်နေရုံသာရှိသေးပြီး အားလုံး အချိန်ပိုအလုပ်လုပ်နေရသည်။ သို့မဟုတ်လျှင် ဤအချိန်တွင် အိမ်စောစောပြန်လို့ရပေလိမ့်မည်။ ထိုအချိန်ပိုကြောင့် ဇာတ်လမ်း၏မြှုပ်ကွက်မှာ အမှားတစ်ခုကြောင့် ပထမဆုံးအကြိမ် ပွင့်သွားခဲ့ကြောင့် လူတိုင်းနားလည်နိုင်သည်။

"ရေသူမလေးနှင့်နဂါးကြီး" ဇာတ်လမ်း၏မြှုပ်ကွက်ကို အထူးသီးသန့်ဖယ်ထားခြင်းဖြစ်သည်။ အဘယ်ကြောင့်ဆိုသော် ၎င်းက စိတ်ကူးယဉ်မြို့တော်ဇာတ်လမ်း၏ အထူးသီးသန့်အရာတစ်ခုဖြစ်ပြီး လူထုကိုချပြမည့်နည်းလမ်းအား အသီအစဉ်ဆွဲနေဆဲပင်။

စီစဉ်ထားသည်မှာ ကျော်ကြားသောအနုပညာရှင်တစ်ယောက်ကိုရှာ၊ သင့်တော်သောရသစုံရှိုးကိုရွေးချယ်ပြီး ဇာတ်လမ်း၏မြှုပ်ကွက်ကို မျှော်လင့်မထားဖွယ် ဖွင့်လှစ်ရန်ဖြစ်သည်။

ကွဲပြားခြားနားပြီး ပုံမှန်မဟုတ်သော ဇာတ်လမ်းမြှုပ်ကွက်ကို တင်ဆက်သူအသစ်တစ်ယောက်က ရိုးရိုးရှင်းရှင်းပင် ဖွင့်နိုင်သွားလိမ့်မည်ဟု ဘယ်သူမှ မထင်ခဲ့ပေ။

ရယ်စရာကောင်းလိုက်တာ...

ထို့အပြင် ရေသူမလေး အစာတောင်းလိုက်ချိန်တွင် နဂါးကြီးက လိုက်ပါစီးနင်းရန် သူတို့ကို ခေါ်ဆောင်သွားလိမ့်မည့်အစီအစဉ်ကို ယခင်က လုံးဝ မပြင်ဆင်ထားပေ။

ရေသူမလေးက ဆွဲဆောင်ခံရပြီးနောက် လှေကို မြေအောက်အခန်းအပြင်ဘက်သို့ တွန်းလွှတ်လိမ့်မည်။ ထို့အပြင် နဂါးကြီးက လူများကိုသယ်ဆောင်ထားလျှင် ကောင်းကင်မြို့တော်သို့ တိုက်ရိုက်ပျံသန်းသွားလိမ့်မည်။

ဘယ်လိုလုပ်ပြီးတော့ နဂါးကြီးက လူတွေကိုကစားဖို့ ခေါ်သွားရမှာလဲ...အဲဒါတွေအားလုံးက ဟက်ခံ(ခိုးယူခံ)ထားရတာပဲ…

ရေသူမလေးနှင့်နဂါးကြီးက ဇနီးမောင်နှံဖြစ်ရန် ထိုက်တန်ကြပြီး လိုက်ဖက်ညီလှသည်။

"ဒါပေမဲ့...အကျိုးရလဒ်က တကယ်ကောင်းတယ်…"

ခဏကြာသည်အထိ မှတ်တမ်းတင်ထားသော ဗီဒီယိုအတိုလေးနှစ်ခုကို ပြန်ကြည့်ပြီးနောက် ကုယွီမြန်၏တိုက်ရိုက်ထုတ်လွှင့်မှုကို ဖွင့်ကြည့်လိုက်တော့သည်။

ထိုကဲ့သို့ကြည့်လိုက်ပြီး ၁၀ မိနစ်အကြာ၌...

"..."

"သောက်ကျိုးနည်း…"

"ဘုရားရေ၊ AIက သူ့ကို သဘောကျတာ အံ့ဩစရာမရှိပါဘူး… ငါလည်း သူ့ကို သဘောကျတယ်ー"

သူတို့ စကားဆက်ပြောရန် အချိန်မရှိပေ။

"လူတိုင်း ဒီနေရာမှာရှိလား…"

တံခါးပွင့်သွားပြီး တာဝန်ရှိသူတစ်ယောက် ဝင်လာကာ သူ့မျက်လုံးများက တောက်ပနေသည်။

"မင်းတို့ တိုက်ရိုက်ထုတ်လွှင့်မှုကို ကြည့်ခဲ့သေးလား…"

အားလုံး အူကြောင်ကြောင်ဖြင့် ခေါင်းညိတ်လိုက်ကြသည်။

"ကြည့်ခဲ့တယ်…"

တာဝန်ရှိသူက စားပွဲခုံပေါ်သို့ ရိုက်ချကာ လက်ဝှေ့ယမ်းလိုက်သည်။

"ဒါက အခွင့်အရေးတစ်ခုပဲ…"

ကောင်းကင်မြို့တော်က တိမ်တိုက်များကြားထဲတွင်တည်ရှိပြီး မြေပြင်ပေါ်ရှိ စိတ်ကူးယဉ်မြို့တော်ကို အတုခိုးထားသည်။ စိတ်ကူးယဉ်မြို့တော်ရုပ်ရှင်များ၏ မူလဇာတ်လမ်းတွဲများ၌ မြေပြင်ပေါ်ရှိမြို့တော်များတွင် နတ်သူငယ်များ၊ မှင်စာများနှင့် လူပုလေးများနေထိုင်သည်။ သူတို့ထံတွင် ဆူညံကာ စိတ်ကူးယဉ်ဆန်သော မီးရှူးမီးပန်းများလည်းရှိသည်။ ကောင်းကင်မြို့တော်က စိတ်ကူးယဉ်မြို့တော်နှင့် ဆန့်ကျင်ဖက်ပင်။ ထိုနေရာတွင်နေထိုင်သူများက နတ်ဘုရားများနှင့် နဂါးလူမျိုးများဖြစ်၍ ညစာစားချိန်မှလွဲ၍ တစ်နှစ်ပတ်လုံး တိတ်ဆိတ်နေသည်။

ဥပမာအနေဖြင့် ရုပ်ရှင်များထဲမှတစ်ခုဖြစ်သော "စိတ်ကူးယဉ်မြို့တော်ကို လျှောက်လည်ခြင်းအိပ်မက်" က ဝူလုံ၏စိတ်ဝင်စားဖွယ်ကောင်းသော ပုံပြင်ဇာတ်လမ်းတွဲများနှင့် ပတ်သက်နေသည်။ ကောင်းကင်မြို့တော်၏ ဗဟုသုတမရှိသောနတ်ဘုရားက လက်ထပ်ပွဲမှ လွတ်မြောက်နိုင်စေရန် စိတ်ကူးယဉ်မြို့တော်သို့ မှားယွင်းဝင်ရောက်လာခဲ့ပြီး မှင်စာတစ်ကောင်နှင့် ချစ်ကျွမ်းဝင်သွားခဲ့သည်။

🐯🐯🐯

Prev Next