MM Story Teller

Chapter 28

Viewers 5k

👾Chapter 28

: ဟယ့်ယွင်ထင်က အရင် လက်ကမ်းလာသူပဲလေ... စိတ်ဖတ်ရမှာက သူမှမဟုတ်တာ...

လင်းဟန်၏ မျက်နှာထားက ပြောင်းလဲမသွားဘဲ မျက်ခုံးထိပ်လေးများသာ သိမ်မွေ့စွာဖြင့် မြင့်တက်သွားကာ အသံအနေအထားကလည်း အနည်းငယ် အံ့အားသင့်ဟန်ပင်။

ဝမ်ထျန်းယောင်၏ ပထမဆုံး စကားမှာ သူ့ကို အနည်းငယ် ဝေခွဲမရဖြစ်စေသော်လည်း ဒုတိယစကားကမူ အာရုံစိုက်စရာ ဖြစ်သွားသည်။

ဝမ်ထျန်းယောင်၏ စိတ်ထဲတွင် တစ်ခုခု ရှိနေမည်ကို အံ့အားမသင့်မိသော်လည်း အချိန်တစ်ခုလောက်ထိ သူပြောနေသော 'သူကစရမယ်'ဟူသောစကား၏ ဆိုလိုရင်းကို မသိခဲ့ပါပေ။

"ဒါပေမယ့်..."

ဝမ်ထျန်းယောင်က သူ၏ အခက်အခဲများကို စိတ်ကျဥ်းကျပ်မှု ကသိကအောက်ဖြစ်မှုတို့ဖြင့် ဖော်ပြလာပြီး အစပြု၍ ပြောလိုက်သည်။

"ဒါပေါ့... မင်းမလုပ်ချင်ရင်လည်း အဆင်ပြေပါတယ်... ဖိအားမပေးပါဘူး"

၎င်းကို ခြေတစ်လှမ်းကြိုဆုတ်ထားသည်ဟု ခေါ်ဆိုရမည်ဖြစ်ပေသည်။ အဆုံးတွင် သူ၏ ဂုဏ်ပုဒ်ရာထူးဖြင့်ဆိုလျှင်... သာမန်အခြေအနေအောက်တွင် ဖြစ်ပါက သူသာ လက်လျှော့ဟန်ပြလိုက်လျှင် တစ်ဖက်လူမှာ သူ၏ နားလည်ပေးမှုကြောင့် စိတ်မကောင်း ဖြစ်သွားရနိုင်ပြီး ပြန်၍ လက်ခံပေးလာနိုင်သည်။

သို့သော်လည်း ထိုအရာအားလုံးမှာ လင်းဟန်၏လက် သူ့လက်ပေါ်တွင် မရှိမှသာ ဖြစ်ရပေလိမ့်မည်။

တော်ဝင်မင်းသား၏ လက်ဖဝါးထက်တွင် စေးကပ်ကပ် ခံစားချက်တစ်ခု ရှိနေပြီး လင်းဟန်ကို အနည်းငယ် မသက်မသာ ဖြစ်လာစေခဲ့သည်။

လင်းဟန် တစ်ဖက်လူ၏ ရင်ထိလောက်စေသော ကိုယ်ရည်သွေးစကားများကို နားထောင်ပြီးနောက် ခပ်ဖွဖွ ပြုံးကာ လက်ပြန်ရုတ်လိုက်ပြီး ကျေးဇူးတင်မှုများ ပြည့်နေသော လေသံဖြင့် ပြောလိုက်လေသည်။

"ဒါဆိုရင် ကျေးဇူးတင်ပါတယ် အရှင်မင်းသား... ကျွန်တော်တစ်ယောက်တည်း သွားလိုက်ပါ့မယ်"

ဝမ်ထျန်းယောင်မှာ ကိစ္စများက သူ ဦးနှောက်ဆေးထားခဲ့သည့်ပုံစံမှ သွေဖယ်သွားမည်ဟု မထင်ထားသည့်အလား မျက်နှာအမူအရာက သိသာစွာပြောင်းလဲသွားလေသည်။ သို့သော်လည်း တည်ငြိမ်နေသော ပုံစံကို ထိန်းသိမ်းထားဆဲ ဖြစ်ပြီး "ကောင်းပါပြီ"ဟုသာ ပြောလိုက်ရလေတော့သည်။

လင်းဟန်က ဝမ်ထျန်းယောင်အား ခေါင်းငြိမ့်ပြလိုက်ပြီးနောက် လှည့်ထွက်လာခဲ့သည်။

သူက ထိုအခိုက်တွင် ဝမ်ထျန်းယောင် သူ့အပေါ် တချို့အရာများ ပြုလုပ်လာခဲ့မည်ကို မစိုးရိမ်ပါပေ။ ထိုသူက သူ့အား နယ်ရုပ်လေးတစ်ခုအဖြစ် အသုံးချချင်ရုံသာ ဖြစ်နိုင်သည်။ ယခုတွင် ဝမ်ထျန်းယောင်က တစ်ယောက်တည်း ဖြစ်နေပြီး ဟယ့်ယွင်ထင်၏ ပိုင်နက်နေရာတွင်လည်း ရောက်နေလေရာ သူသာ သူ၏ အထောက်အထားကို အမှတ်ရနေဆဲဖြစ်ပါက စိတ်လိုက်မာန်ပါ ဆောင်ရွက်မည် မဟုတ်ပေ။

"မစ္စတာလင်း" လင်းဟန် ထွက်သွားတော့မည်အပြုတွင် ဝမ်ထျန်းယောင်က အမှန်ပင် ပါးစပ်ဟလာပြန်သည်။

"ကျွန်တော် အင်ပါယာစစ်တက္ကသိုလ်မှာ တက်ခဲ့တုန်းက သက်ဆိုင်ရာ နယ်ပယ်တွေကို ဟိုစပ်စပ်သည်စပ်စပ် လေ့လာခဲ့သေးတယ်လေ... ဒါကြောင့် သိချင်စရာလေးတွေ နည်းနည်းရှိနေလို့ မစ္စတာလင်းကို မေးလို့ရမလား... ဒါပေမယ့် မင်းရဲ့အလုပ်ကိုလည်း မနှောင့်ယှက်ချင်ဘူး"

လင်းဟန်က အပြုံးတစ်ခုကို ပြန်လည်ချိတ်ဆွဲကာ မျက်နှာထက်တွင် အပိုအမူအရာတစ်ခုမှ မပေါ်စေရပေ။ "ကောင်းပါပြီ"

လင်းဟန်က မက်ခါထိန်းသိမ်းရေးအခန်းထဲသို့ ဝင်သွားလိုက်ပြီးနောက် တံခါးဟဟဖွင့်လိုက်ပြီး ဝမ်ထျန်းယောင်အား အထူးတလှယ် မိတ်ဆက်မနေတော့ဘဲ သူကိုယ်တိုင်သာ အလုပ်ရှုပ်နေလိုက်သည်။

"မစ္စတာလင်း တပ်စခန်းကို ဘယ်အချိန်က ရောက်လာတာလဲ" လင်းဟန် ခဏနားချိန်တွင် မက်ခါနှင့် လင်းဟန် နှစ်ခုလုံးထံ၌ စိတ်ဝင်စားနေပုံရသည့် ဝမ်ထျန်းယောင်က မေးလာခဲ့သည်။

“ရက်နည်းနည်းလောက်ပဲ ရှိပါသေးတယ်” လင်းဟန် ပြောလိုက်သည်။

"ဒီနေရာနဲ့ အခုထိ မရင်းနှီးသေးဘူး"

ဝမ်ထျန်းယောင်က အခြားသော စကားလမ်းစများအား ကျပန်း ဆွဲထုတ်လာနေပြီး လင်းဟန်ကလည်း ပေါ့ပါ့ပါးပါး ပြန်လည်ဖြေဆိုနေကာ အလုပ်ထဲတွင်သာ ခေါင်းနှစ်ထားပုံရနေသည်။

သို့သော်လည်း ဝမ်ထျန်းယောင်က ဂရုမစိုက်ပေ။

လင်းဟန်က သူ့ဘာသာ အလုပ်ဆက်လုပ်နေခဲ့သည်။ အဆုံးတွင် ၎င်းက တပ်သားသစ်များအတွက် မက်ခါတစ်ခုဖြစ်ပြီး ၎င်း၏ လုပ်ဆောင်မှူများမှာ အတန်ငယ် အိုဟောင်းနေပြီး ဖြစ်သော်ငြား အတွင်းပိုင်းနည်းစနစ်များနှင့် ကန့်သတ်ချက်များမှာ ပြောင်းလဲမှု အနည်းငယ် ပြုလုပ်ရုံဖြင့် အသုံးပြုနိုင်ဆဲဖြစ်သည်။

တခဏအကြာ လင်းဟန်တစ်ယောက် မြင့်မားလှသော မက်ခါကြီးရှေသို့ ရောက်လာခဲ့သည်။

၎င်းက ထိုနှစ်၏ ဇာဂ်များနှင့် စစ်ပွဲတွင် ပါဝင်ခဲ့သည့် QT ဆယ်ခုမြောက် မျိုးဆက် မက်ခါများထဲမှ တစ်ခုပင်။

ထိုမျိုးဆက်မှစ၍ အဖွဲ့အစည်းဘက်မှ တိုက်ခိုက်ရေး စွမ်းဆောင်မှုအပေါ် သိသာထင်ရှားစွာဖြင့် တိုးတက်လာစေသည်။ အပျက်အစီးများ လျှော့ချပေးနိုင်ခဲ့သည့် မက်ခါ၏ အဓိကကိုယ်ထည်နှင့် မောင်းနှင်သူ၏ စိတ်စွမ်းအားကို ချိတ်ဆက်မှုတစ်ခု တည်ထောင်ရန် စတင် စမ်းသပ်အသုံးပြုခဲ့သည်။

ဤမက်ခါက အချိန်အတော်ကြာ အသုံးမပြုခဲ့ရဟန်တူသည်။ ထို့ကြောင့် မည်သည့်နေရာမှ ပြသနာ မရှိနိုင်လောက်ပေ။ ထို့အပြင် မောင်းနှင်သူကလည်း အကြောင်းအရင်းတစ်ခုကြောင့် စစ်ဆေးရန် မပို့ခဲ့ဘဲ မက်ခါစနစ်ကို ခပ်မြန်မြန် အဆင့်မြှင့်တင်ပြီးနောက် ၎င်းကို နောက်မှ သုံးရန် စီစဥ်ထားခဲ့သည်။

အဆုံးတွင် ဤမက်ခါဒီဇိုင်းအား လင်းဟန်ထက်ပို၍ ရင်းနှီးသူ မရှိနိုင်ပေ။ ထို့ကြောင့် စက်ခန်းထဲသို့ ဝင်ပြီးနောက် ဟိုစမ်းသည်စမ်း လုပ်ပြီးသွားသောအခါ မက်ခါကို စက်နှိုးနိုင်သွားသည်။

“ QT ဆယ်ခုမြောက်မျိုးဆက်... နံပါတ် m2764... စက်နှိုးမှု အောင်မြင်... ကိုယ်ထည်ပိုင်း အသက်သွင်းပြီး.... စိတ်စွမ်းအားဆက်သွယ်ရေးစနစ် ဖွင့်ထားပြီးဖြစ်... ထိန်းချုပ်ခန်း အသင့်ဖြစ်ပါပြီ... ကျေးဇူးပြုပြီး ညွှန်ကြားပေးပါ"

လင်းဟန်မှာ သူကိုယ်တိုင်စစ်ဆေးမှုကို လုပ်တော့မည်အပြုတွင် သူ့လက်များက screenကို ထိလိုက်သည်နှင့် သူ့ဘေးမှ ဝမ်ထျန်းယောင်၏ အသံက အေးတိအေးစက် လေသံဖြင့် ထွက်ပေါ်လာခဲ့သည်။

“ဒါက ဟိုတုန်းက ဇာဂ့်တွေ အများကြီးကို သုတ်သင်ခဲ့တဲ့ မက်ခါမလား"

လင်းဟန်မှာ မူလက သူ့အား ဝင်ခွင့်ပြုလိုက်ခြင်းမှာ ထိုသူက သူနှင့် ဟယ့်ယွင်ထင်တို့အား မည်သို့ အကွက်ချနေသည်ကို သိချင်သည့်အတွက်ကြောင့်သာ ဖြစ်သည်။ သို့သော်လည်း အလုပ်ကို နှောက်ယှက်ခံလိုက်ရသည့်အတွက် မနေနိုင်ဘဲ မျက်မှောင်ကြုတ်မိသွားပြီး အဘယ့်ကြောင့် ဝမ်ထျန်းယောင်ဘက်မှ ပြောစရာမရှိ ဖြစ်နေသည်ကိုလည်း နားမလည်နိုင်တော့ပေ။

"ဟုတ်"

ဝမ်ထျန်းယောင်သည်လည်း ထိန်းချုပ်ခန်းထဲသို့ ဝင်လာပြီး လင်းဟန်၏ လက်လှုပ်ရှားမှုများကို မြင်သောအခါ ပြောလိုက်သည်။

"အဲ့ဒီအချိန်တုန်းက ဒီမက်ခါကို ဒီဇိုင်းထုတ်ခဲ့တာ မစ္စတာလင်းလို့ ကျွန်တော် ကြားထားတယ်... တကယ် အထင်ကြီးစရာပဲ"

သာမန်လူတစ်ယောက်ကသာ အင်ပါယာမင်းသားတစ်ယောက်ထံမှ ချီးကျူးခံလိုက်ပါက အပျော်လွန်သွားနိုင်ပါသော်လည်း လင်းဟန်ကမူ ပြင်ဆင်မွမ်းမံမှုများ ပြုလုပ်နေသည့် လက်ကိုသာ ရပ်ထားလိုက်ပြီး ပြန်မဖြေပေ။ ဝမ်ထျန်းယောင် စကားဆက်ပြောလာမည်ဟု ခံစားနေရသည်။

သူထင်ထားသည့်အတိုင်း ဝမ်ထျန်းယောင် ဆက်ပြောလာခဲ့သည်။

"အဲ့ဒီအချိန်တုန်းက ကျွန်တော် ဗိုလ်ချုပ်ရဲ့ ချီတက်မှုမှာ ဝင်မပါလိုက်ရတာ တကယ်နှမျောစရာကောင်းတယ်... ဒါပေမယ့် အခု ဒီမက်ခါကို တွေ့လိုက်ရတော့ စိတ်လှုပ်ရှားမိနေတုန်းပဲ"

အဆုံးတွင် စကားဝိုင်းက ဟယ့်ယွင်ထင်ထံ ဦးတည်လာခဲ့လေပြီ။

"အရှင်မင်းသားရော မက်ခါ မောင်းတတ်ပါသလား"

"လေ့လာခဲ့ဖူးတော့ နည်းနည်းတော့ သိတယ်"

ဝမ်ထျန်းယောင်မှာ ထိုအကြောင်းကို ပြောချင်ပုံမရပေ။

"အဲ့ဒီတုန်းက တိုက်ပွဲအကြောင်း တွေးမိနေတုန်းပဲဗျာ... အဲ့ဒီအချိန်တုန်းက ခမည်းတော်နဲ့ ကောင်စီက လူအိုကြီးတွေက ကျွန်တော့်ကို မသွားဖို့ တားကြတယ်လေ... ဒါကြောင့် ကျွန်တော်က သတင်းကောင်းကိုပဲ စောင့်နေခဲ့ရတော့တာပေါ့... ရိုးရိုးသားသားပြောရရင် ဒါက ကျွန်တော့် နှလုံးသားထဲမှာအမြဲတမ်း နောင်တတစ်ခု ဖြစ်လာခဲ့တာလေ"

လင်းဟန်က "သြော်"ဟု ပြန်ဖြေလိုက်သည်။

"ပြောကာမှပဲ..." ဝမ်ထျန်းယောင်၏ အသံအနေအထားက ရုတ်တရက် ထူးဆန်းလာလေသည်။

"အဲ့ဒီအချိန်တုန်းက ဗိုလ်ချုပ် စစ်ပွဲကို အနိုင်ရခဲ့တဲ့ အခြားအကြောင်းအရင်းတစ်ခု ရှိသေးတယ်... မစ္စတာလင်း သိလား"

****

လင်းဟန်နှင့် ဝမ်ထျန်းယောင်တို့နှင့်အတူ မက်ခါလေ့လာခန်းထဲမှ ထွက်လာသောအခါ နေ့လည်စာစားချိန်နှင့် ကွက်တိပင်။

ဤတစ်ကြိမ်၌ ဝမ်ထျန်းယောင်က လျှောက်ရမည့်လမ်းအား လူထူထပ်မှုနည်းသော နေရာကို မရွေးချယ်ခဲ့သဖြင့် စစ်သားများစွာက သူ့ကို တွေ့လိုက်ကြပြီး ချက်ချင်းဆိုသလို စိတ်လှုပ်ရှားစွာဖြင့် အလေးပြုလာကြသည်။ ထိုစဥ် ဝမ်ထျန်းယောင်က ပြုံး၍ တစ်ဦးချင်းစီ တုံ့ပြန်ခဲ့ပြီး မျက်နှာချိုသွေးလိုသည့် အကြည့်များစွာ ရရှိခဲ့လေသည်။

သူက သူ့ကိုယ်သူ ပုံဖော်ထားသည့်အတိုင်း စည်းကမ်းတင်းကျပ်သူ မဟုတ်လေဘဲ အလွန် ဆက်ဆံရလွယ်ကူသည့်ဟန်သာ နေနေသည်။

လင်းဟန်က သူ့နောက်ပါးမှ လျှောက်လာခဲ့သည်။ ဝမ်ထျန်းယောင်က ဟယ့်ယွင်ထင်အား ရုံးခန်းထဲတွင် သွားရှာမည်ဟု ပြောလာပြီးနောက် လင်းဟန်အား သူနှင့်အတူ ပူးပေါင်းခွင့်ပြုကြောင်း တယဥ်တကျေး ကမ်းလှမ်းလာခဲ့သည်။

မက်ခါထိန်းသိမ်းခန်းထဲတွင် ဝမ်ထျန်းယောင်က လင်းဟန်အား အတိတ်ကို လွမ်းဆွတ်တမ်းတသည့်လေသံဖြင့် ပြောလာခဲ့သည်။

သူက ဟယ့်ယွင်ထင်မှာ ရဲရင့်ပြီး အရင်းအမြစ်ကောင်းများ ရှိသည်ဟု ပြောလာခဲ့ပါသော်လည်း ၎င်းက အဆက်အစပ် မရှိသော ခေါင်းစဥ်များသာ ဖြစ်ကာ လင်းဟန်အား ဆက်ဆံရေးတစ်ခုအတွင်း ဆွဲသွင်းရန်အတွက် အမှန်ပင် ပေါ့ပေါ့ပါးပါး စကားလာရောက်ပြောဆိုပုံသာ ပေါ်နေသည်။

လူတိုင်းက ဝမ်ထျန်းယောင်မှာ ဟယ့်ယွင်ထင်ကဲ့သို့ပင် အားလုံးနှင့်ပြေလည်နေသော အုပ်စုမှဟု ဆိုကြသည်။ ငြိမ်းချမ်းရေးအုပ်စုကဲ့သို့ ဇာဂ့်များနှင့် သံတမန်ရေးရာ ဆက်သွယ်မှုတည်ထောင်မည့်အကြံ တင်သွင်းလာခြင်း မရှိသလို စစ်တပ်အုပ်စုကဲ့သို့ ပြဿနာကို မည်ကဲ့သို့ အားသုံး၍ ဖြေရှင်းရန်ကိုလည်း စဥ်းစားခြင်း မရှိပေ။

ထို့အပြင် ဝမ်ထျန်းယောင်က မည်သည့် အုပ်စုကိုမှ နာမည်တပ်၍ ထုတ်မပြောဖူးသော်လည်း ဟယ့်ယွင်ထင်ကိုမူ ချီးကျူးမြှောက်ပင့်နေသည်။ စစ်ပွဲကို အောင်နိုင်ခဲ့ရသည့် အကြောင်းအရင်းများထဲမှ တစ်ခုမှာ ပြိုင်ဘက်အချို့၏ ဥာဏ်ရည်ဥာဏ်သွေးကို ကြိုတင်၍ ကြားဖြတ်ယူထားခြင်းကြောင့် သူတို့အားလုံးကို သတ်ဖြတ်နိုင်ခဲ့ခြင်းဖြစ်သည်ဟု ဆိုသေးသည်။

သို့သော်လည်း ၎င်းက မည်သည့် ဥာဏ်ရည်ဥာဏ်သွေး ဖြစ်ပြီး မည်သည့်နေရာမှ ရောက်ရှိလာခဲ့သည်ကိုကား ဝမ်ထျန်းယောင် ပြောမသွားခဲ့ပေ။

လင်းဟန်သာ စိတ်ဖတ်စွမ်းရည် မရှိပါက ယနေ့ စကားဝိုင်းမှာ ဒေါင်ကျကျ ပြားကျကျ နေတတ်သူ အင်ပါယာမင်းသားက အင်ပါယာ၏ အတော်ဆုံး မက်ခါပညာရှင်အား ကြီးကျယ်ခမ်းနားလှသော အတိတ်အကြောင်း ပြောနေသည်ထက်မပိုဟု ထင်ရပေလိမ့်မည်။

ကံမကောင်းစွာဖြင့် လင်းဟန်မှာ အဆုံးသတ်တွင် ဝမ်ထျန်းယောင်အား ကိရိယာတစ်ခု ကမ်းပေးရန် တောင်းလိုက်ခြင်းဖြင့် တစ်ဖက်လူ၏ အမည်ကို ကြားလိုက်ရသည်။ (လက်ချင်းထိပြီး စိတ်ထဲမှ အမည်ကိုကြားရ)

ကောင်စီထဲမှ အတက်ကြွဆုံး စစ်တပ်အုပ်စုမှလူဟု ဆိုရမည့် လောချီပါပင်။

လင်းဟန်က အဆုံးတွင် အကြာကြီး မနေခဲ့သော်လည်း ဝမ်ထျန်းယောင်၏ စကားများမှ ကိစ္စတစ်ခုစ နှစ်ခုစကို မရေမရာ ကြားလိုက်ရဆဲပါပင်။

သို့သော်လည်း ထူးဆန်းစွာပင် လင်းဟန် မူလက သိချင်ခဲ့သည်မှာ ဒင်နာပါတီတွင် ဟယ့်ယွင်ထင်အား လုပ်ကြံမည့်သူ ရှိနေရခြင်းအကြောင်း ဖြစ်ပါသော်လည်း ဝမ်ထျန်းယောင်၏ စိတ်ထဲတွင် ထိုအကြောင်း ပေါ်မလာခဲ့ပေ။

ဒီကိစ္စက သူနဲ့ တကယ် မသက်ဆိုင်ဘူးလား...

သေချာသွားခဲ့သည်မှာ ဝမ်ထျန်းယောင်က မည်သည့်ဘက်မှ မပါသည့်သူ မဟုတ်ခဲ့ပေ။

သူက လောချီလိုပင် စစ်တပ်အုပ်စုမှ ဖြစ်နေသည်။

ထိုသူက လင်းဟန်အား အရင်ပူးပေါင်းပြီး သူ့ဘက်မှစတင်၍ ဟယ့်ယွင်ထင်အား သူတို့ဘက်သို့ ရောက်လာအောင် တဖြည်းဖြည်း ဆွဲခေါ်ပေလိမ့်မည်။

ဟယ့်ယွင်ထင်ကို ချဥ်းကပ်မည့် လမ်းကြောင်း၌ သူ့အားဆွဲထည့်ရခြင်းမှာလည်း... လင်းဟန် နှုတ်ခမ်းကိုက်ထားမိသည်။ အခြားသူများ၏ အမြင်တွင် သူနှင့် ဟယ့်ယွင်ထင်တို့က သေချာပေါက်ပင် သာမန်ဆက်ဆံရေး မဟုတ်ခဲ့ပုံပေ။

လင်းဟန်က ဝမ်ထျန်းယောင်နောက်မှ လိုက်ကာ ရုံးခန်းထဲသို့ ဝင်သွားလိုက်သည်။ လုအန်းဟယ်က စားသောက်နေပြီး အင်ပါယာမင်းသား၏ မျက်လုံးထဲတွင် သူနှင့် မရှင်းမလင်း ဆက်ဆံရေး ရှိနေသည့် ဗိုလ်ချုပ်မှာ လက်ထဲတွင် စစ်ဆေးရမည့် တပ်သားသစ်စာရင်းကို လှန်လှောကြည့်ရှုနေခဲ့သည်။

ဝမ်ထျန်းယောင် ဝင်လာသည်ကို မြင်သောအ

အခါ နှစ်ယောက်လုံး ထရပ်ကာ အရိုအသေ ပေးလိုက်ကြသည်။ ဟယ့်ယွင်ထင်သည်ကား ဝမ်ထျန်းယောင် နောက်ပါးမှ လင်းဟန်ကိုသာ မျက်စိမလွှဲစတမ်း ကြည့်နေခဲ့သည်။

လင်းဟန်က လက်ဦးမှု ယူကာ ရှင်းပြလိုက်သည်။ "ကျွန်တော် မက်ခါထိန်းသိမ်းခန်းကို သွားတဲ့လမ်းမှာ မင်းသားနဲ့ တွေ့လို့လေ"

"ဟုတ်တယ်... ကျွန်တော်လည်း မစ္စတာလင်းနဲ့ ခဏလာက် စကားစမြည် ပြောခဲ့ကြသေးတယ်... " ဝမ်ထျန်းယောင်က သဘာဝကျကျပင် စကားစကို လွှဲယူလိုက်ပြီးနောက် ဟယ့်ယွင်ထင်အား ပြောလိုက်သည်။

"မစ္စတာလင်းရဲ့ အချိန်တွေကို ယူမိသလို ဖြစ်သွားတယ်... ဗိုလ်ချုပ် စိတ်မရှိပါဘူးနော်" ဟယ့်ယွင်ထင် ပြန်မဖြေပါသော်လည်း မျက်လုံးခပ်နက်နက်များကမူ လင်းဟန်ထံမှ မလွဲဖယ်သွားပေ။

ကံကောင်းစွာဖြင့် လုအန်းဟယ်က ကောင်းမွန်စွာ ပြောဆိုဆက်ဆံနိုင်ပြီး ဝမ်ထျန်းယောင်နှင့် ပေါ့ပေါ့ပါးပါး စကားပြောကာ စကားလမ်းကြောင်း လွှဲလိုက်သည်။

ဝမ်ထျန်းယောင်သည်လည်း ထိုအကြောင်းအရာကို ကပ်တွယ်မနေတော့ပေ။

"ကျွန်တော် ဒီနှစ်ရဲ့ လက်ရွေးစင်တွေကို လာကြည့်ချင်လို့လေ.. ဒီနှစ်မှာ ထူးချွန်တဲ့ လူသစ်လေးတွေ ရှိလား သိချင်နေတာ"

ဟယ့်ယွင်ထင်က ထိုစကားကို ကြားသောအခါ မျက်ခုံးပင့်ကာ စကားဆက်မပြောပေ။ အဆုံးတွင် ဝမ်ထျန်းယောင်က နှစ်တိုင်း နှစ်တိုင်း ဤအချိန်များ၌ လာရောက်လည်ပတ်လေ့ရှိပေသည်။ သူက စာရင်းကို ဝမ်ထျန်းယောင်ထံ ကမ်းပေးလိုက်ပြီး လုအန်းဟယ်က ထပ်ပေါင်းပြောလိုက်သည်။

"ဒီနေ့က ဒုတိယအကျော့ရဲ့ စတုတ္ထနေ့လေ... အဓိက ရွေးချယ်မှုက ဟန်ချက်ညီစွမ်းအားနဲ့ အလားအလာရှိတဲ့ မောင်းနှင်သူတွေရဲ့ အခြေခံထိန်းချုပ်မှုအရည်အချင်းကို အကဲဖြတ်ဖို့ပါ"

ဝမ်ထျန်းယောင်က စာရင်းကို ကြည့်လိုက်ပြီးနောက် ဟယ့်ယွင်ထင်နောက်မှ အလင်းမျက်နှာပြင်ကြီးကို ကြည့်ကာ ခေါင်းငြိမ့်ပြလိုက်သည်။

"ဒါပေမယ့် အခုက နေ့လည်စာစားချိန်လေ... အရှင်မင်းသားက စာရွက်စာတမ်းတွေကို နောက်တစ်နာရီကြာမှ ကြည့်လို့လည်း ရပါတယ်... ဘေးခန်းမှာ အနားယူတဲ့အခန်းရှိတယ်... အရင်ဆုံး အနားယူလိုက်ပါဦးလား" လုအန်းဟယ် အကြံပြုလိုက်သည်။

"တပ်ဖွဲ့ကို နေ့လည်စာ ယူခိုင်းလိုက်ပါမယ်"

ဝမ်ထျန်းယောင်က "ကောင်းပြီ"ဟု ပြောလိုက်ပြီးနောက် လုအန်းဟယ်ကို ပတ်၍ လင်းဟန်ထံ လျှောက်လာခဲ့သည်။

"ကျွန်တော် ခဏနေမှ ပြန်လာတော့မယ်... ဒီနေ့ မစ္စတာလင်းနဲ့ စကားကောင်းကောင်း ပြောခဲ့ရတယ်ဗျာ"

လင်းဟန်မှာ ယဥ်ယဥ်ကျေးကျေးသာ ပြုံးနေလိုက်သည်။ "ကျွန်တော်လည်း တူတူပါပဲ"

သူ့အသံမှာ ယခင်က ဝမ်ထျန်းယောင် ပြောခဲ့သမျှကို နားထောင်ခဲ့ပြီး ထိုသူက အားလုံးနှင့် ပြေလည်နေသည့် အင်ပါယာမင်းသားကောင်းတစ်ယောက်ဟု ယုံကြည်ထားသည့်အလား အသံအနေအထားက စိတ်ရင်းပါနေခဲ့သည်။

လင်းဟန်ပြောလိုက်သည်။

"ဒါပေမယ့် ဒီနေ့လည်မှာ ကျွန်တော် အလုပ်မရှိတော့လို့ အရှင်မင်းသားနဲ့ စကားဆက်မပြောနိုင်တော့မှာ စိုးမိပါတယ်"

ဝမ်ထျန်းယောင်က အလွန်ပင် စိတ်ကောင်းဝင်နေခဲ့ပြီး လင်းဟန်အား နှုတ်ဆက်စကားပြောရန် မမေ့ဘဲ တံခါးမှ ဖြတ်ထွက်သွားလိုက်သည်။

"အဆင်ပြေပါတယ်... မစ္စတာလင်းရဲ့ အလုပ်က အရေးကြီးတာပေါ့... ကိစ္စတစ်ခုခု ရှိရင် နောက်မှ ပြောကြတာပေါ့"

လင်းဟန် ခေါင်းငြိမ့်ပြလိုက်ပြီး "ဟုတ်ကဲ့"ဟုဆိုကာ လက်ဆွဲနှုတ်ဆက်လိုက်သည်။

ဝမ်ထျန်းယောင်က သဘာဝကျကျပင် ပုံရိပ်အား ထိန်းသိမ်းထားပြီး လင်းဟန်ကို မျက်နှာသာပေးကာ လက်ဆွဲနှုတ်ဆက်လိုက်သည်။

【ဒီအိုမီဂါလှလှလေးက တကယ်တော့ ကောင်းကောင်းလိမ်တတ်သားပဲ】

👾

Prev Next