Chapter 22

🐯Chapter 22

[ကြောင်လေးရဲ့အော်သံ : အရမ်းအရသာရှိတယ်... ငါ မြန်မြန် လုပ်တဲ့ ဟင်းတိုင်းကို ကြိုက်တယ်... ငါ့ဘဝရဲ့ နောက်ဆုံးဟင်းပွဲကို အဲ့ဒီထဲက တစ်ခုပဲဖြစ်စေချင်တယ်...] 

[အလှကုန်တွေကို လွှင့်ပစ်မယ် - အရသာရှိလိုက်တာ.. စကားမစပ်၊ မင်းဘယ်တော့သီချင်းဆိုမှာလဲ မြန်မြန်... ငါ သီချင်းတောင်းနေတာပါ...]

အချိုပွဲက အံ့မခန်းဖြစ်၍ တစ်ချိန်တည်းမှာပင် လက်ဆောင်မျိုးစုံ တစ်ပြိုင်နက် ပို့ပေးလာကြသည်။ ထုတ်လွှင့်မှုအစတည်းက ကုယွီမြန်၏ တိုက်ရိုက်ထုတ်လွှင့်မှု စတူဒီယို၏ ရေပန်းစားမှုက မြင့်တက်လာပြီး ကျဆင်းသွားခြင်းမရှိဘဲ ရှို့ရှီဟော့ပေါ့ စားသောအခါတွင် အထွတ်အထိပ်သို့ ရောက်ရှိသွားခဲ့သည်။ ယခုအချိန်တွင် ကြည့်ရှုသူဦးရေ မြင့်တက်လာဆဲဖြစ်ပြီး ယမန်နေ့ကကဲ့သို့ပင် ၎င်းက ထိုနေ့၏ လူကြိုက်များသည့် စာရင်းတွင် ထိပ်ဆုံး (၃) ခုသို့ အောင်မြင်စွာ တက်လှမ်းနိုင်ခဲ့သည်။ ကောင်းကင်ကြီးက လုံးဝမှောင်သွားကာ လကလည်း ကမ္ဘာမြေကြီးပေါ်သို့ ထွန်းလင်းပေးနေပြီး လှိုင်းလုံးသံများက အဝေးမှ တိုးတိုးလေး ညှင်သာစွာမြည်တမ်းနေသည်။ 

“အာ... သီချင်းတစ်ပုဒ်ပါပဲ... ကျွန်တော် မနေ့က ထွမ်ထွမ် နဲ့ လူတိုင်းကို ကတိပေးခဲ့တယ်နော်…" 

ကုယွီမြန်က သူ့ခေါင်းကို နှင်းကျားသစ်လေး၏ကုပ်ပိုးနှင့် ပွတ်သပ်ရင်း တိုးတိုးလေးပြောလိုက်သည်။

“မင်း ဘာနားထောင်ချင်လဲ,”

နှင်းကျားသစ်လေးက ၎င်းကို သေချာစဉ်းစားနေသည်။ သူ၏ လေးနက်ပြီး ရှုပ်ထွေးနေသောအမူအရာက ကုယွီမြန်ကို ရယ်မောလုနီးပါး ဖြစ်သွားစေသည်။ သူက လက်လှမ်းကာ နှင်းကျားသစ်လေး၏ မေးစေ့၊ လည်ပင်းနှင့် နောက်ကျောကို ပွတ်သပ်ရင်း တိုးတိုးလေး ပြောလိုက်သည်။

"ဘာပဲဖြစ်ဖြစ် စဉ်းစားလိုက်... ငါတို့ရဲ့ထွမ်ထွမ်လေး ပျော်နေသရွေ့ပေါ့…" 

နှင်းကျားသစ်လေး၏ မသိစိတ်က ကုယွီမြန်၏ လက်ဖဝါးကို ခေါင်းဖြင့်တွေးဝှေ့နေမိပြီး မျက်လုံးမှိတ်ထားသည်။ 

ရွေးရခက်လိုက်တာ... ငါနားထောင်ချင်တာ အရမ်းများနေတယ်...

"ဆုံးဖြတ်ရခက်နေတာလား... ဒါဆို မင်းကို သားချော့တေး ဆိုပြရမလား...” 

ကုယွီမြန် တိုးတိုးလေးပြောလိုက်သည်။ 

"ငါ့ရဲ့ ထွမ်ထွမ် ဒီည အိပ်မက်ကောင်းကောင်းမက်နိုင်မယ်လို့ မျှော်လင့်ပါတယ်…"

သူက နှင်းကျားသစ်လေး၏နားရွက်ကို နမ်းလိုက်သည်။

 "ကိစ္စမရှိပါဘူး... မင်းကြိုက်ရင် ငါ တစ်နေ့ကို သီချင်းတစ်ပုဒ် ဆိုပြနိုင်ပါတယ်... အချိန်အကြာကြီး သီချင်းဆိုပြပြီးရင် ငါ့ရဲ့ ထွမ်ထွမ်လေးက ထွမ်ထွမ်ကြီးဖြစ်လာပြီး အရပ်ရှည်ပြီး အစွမ်းထက်လာလိမ့်မယ်... အဲ့ဒီအချိန်ကျရင် ငါလည်း မချီနိုင်လောက်တော့ဘူး..." 

နှင်းကျားသစ်လေး၏ ခဲပြာရောင်မျက်လုံးများက သူ့ကို ကြည့်နေသည်။ သူ့မျက်လုံးများက လရောင်ကို ရောင်ပြန်ဟပ်ကာ အနည်းငယ် နက်စွေးနေသည်။ 

ဒီလူသားက ငါ့ကို သူနဲ့အတူတူ ကြီးပြင်းလာရမယ်လို့ ပြောတယ်...

ထိုအရာက သူတို့နှစ်ယောက် ပထမဆုံးတွေ့ဖူးချိန်ကနှင့် အတူတူဖြစ်ကာ ယခုလည်း အတူတူဖြစ်နေဆဲပင်။ 

ကုယွီမြန်၏စကားများကြောင့် အားလုံးနီးပါးက သူတို့၏ဦးနှောက်ထဲတွင် တိကျသော ပုံရိပ်များ ပေါ်လာကြသည်။ ကုယွီမြန်က အနာဂတ်နှင့် လွယ်ကူစွာ ချိတ်ဆက်နိုင်သူတစ်ဦးဖြစ်သည်။ သူနှင့်သာဆိုလျှင် ဘဝက စည်းစနစ်တကျရှိနေမည်ပင်။ သူတို့က သူတို့၏ အနာဂတ်ကိုပင် မြင်နိုင်လုနီးပါး ဖြစ်သည်။ 

နွေနှင့်ဆောင်းဦး၊ ဆောင်းနှင့်နွေ၊ ထင်း၊ ဆန်၊ ဆီနှင့်ဆား။ 

သို့သော် သူတို့က နှစ်များကို တစ်နှစ်ပြီးတစ်နှစ် ရေတွက်ရန် သူနှင့်အတူ လက်တွဲရန် စောင့်မျှော်နေကြဆဲဖြစ်သည်။ 

[ကြောင်လေးရဲ့အော်သံ: ငါ တခြားဘာကိုမှ မတွေးချင်တော့ဘူး...] 

[မိုင်းထဲမှာ မိသားစုတစ်ခုရှိတယ် - ရှောင်ရွှယ်ထွမ်ကို ပွေ့ဖက်ပြီး သူ့နားထဲမှာ တီးတိုးပြောနေတဲ့ မြန်မြန်ရဲ့ခံစားချက်ကို ငါ သဘောကျတယ်... အဲလိုပဲ သူက ငါ့ကို သူ့လက်ထဲမှာ ထွေးပွေ့ထားပြီး ငါ့အတွက် စိတ်ပူပေးနေသလိုပဲ... ဝူးးဝူးးဝူးးးးး]

[သမင်လေးက လုပ်နိုင်ပါတယ် : ငါ့မျက်လုံးတွေ ဘာကြောင့် နည်းနည်း စူးနေတာလဲ မသိဘူး… ငါဘာဖြစ်နေတာလဲ QAQ ငါလဲ မြန်မြန်နဲ့ တစ်နှစ်ပြီးတစ်နှစ် ဖြတ်သန်းချင်တယ်…] 

ပရိသတ်ဦးရေ ၃၀၀,၀၀၀ နီးပါးအထိ တိုးလာသော်လည်းမှတ်ချက် အရေအတွက်မှာ တစ်ဖန် လျော့နည်းလာသည်။ ကြည့်ရှုသူများက တိတ်ဆိတ်ငြိမ်သက်ပြီး ဤထူးခြားသော လေထုထဲတွင်သာ နှစ်မြုပ်နေခဲ့သည်။ 

အစာစားပြီးနောက် စိတ်ကျေနပ်မှုနှင့် နှစ်သိမ့်မှုတို့က လူများကို ငိုက်မျဉ်းစေခဲ့သည်။ သူတို့အနားရှိ လူသား၏အသံကလည်း နူးညံ့ပြီး တုနှိုင်းမရပေ။ ဖော်ပြနေသည့် ရုပ်ပုံက တစ်စုံတစ်ယောက်အား လွန်စွာ ကြည်နူးစေသည်။ တစ်ချိန်တည်းမှာပင်၊ အရေပြားနှင့် အဆစ်များကို ညင်သာစွာ နှိပ်ပေးနေသောလက်ကလည်း မသက်မသာဖြစ်မှုနှင့် နာကျင်မှုအားလုံးကို သက်သာစေပြီး စိတ်လုံခြုံစေသည့် ပူနွေးသော ထွက်လေကို ဖြန့်ကျက်ပေးနေသည်။ 

ကြယ်လေးများက မှိတ်တုတ်မှိတ်တုတ်လင်းလက်နေပြီး ညနေခင်း၏လေပြေက နူးညံ့စွာ တိုက်ခတ်နေသည်။ 

သူတို့က နှစ်များစွာကို အတူတူဖြတ်သန်းချင်ကြပြီး ဤအချိန်လေးမှာသာ ထာဝရ ရပ်တန့်နေချင်ကြသည်။ သူတို့က ဤနွေဦးညကို မရေမတွက်နိုင်သော အကြိမ်ပေါင်းများစွာ ဖြတ်သန်းချင်ခဲ့ကြပြီး ထိုနေရာရှိ လူငယ်လေးနှင့်သာ ဆိုပါက ဘာမဆို လုပ်၍ရသည်ဟု ခံစားခဲ့ရသော်လည်း ထိုအရာက မလုံလောက်ခဲ့ပေ။

အဲဒီနောက်မှာ ဘာကများ အခုထက် ပိုပြီး စွဲမက်စရာကောင်းတာမျိုး ရှိပါ့မလဲ…

နွေဦးညတွင် အသံများအားလုံး တိတ်ဆိတ်သွားသောအခါ သန့်ရှင်းပြီးချိုမြသော သီချင်းတစ်ပုဒ်၏အသံ ပေါ်ထွက်လာသည်။ 

တစ်ချိန်တည်းမှာပင် လူသုံးသိန်း၏ မျက်လုံးများ ပွင့်လာကြသည်။ နှင်းကျားသစ်လေးက ကုယွီမြန်၏ လက်နှစ်ဖက်လုံးကို အမြီးရှည်ဖြင့် လက်ကောက်ဝတ်နားတွင် ချုပ်နှောင်ထားသည်။ သူက ခဲပြာရောင်မျက်လုံးများကို ဖွင့်ကာ ဂရုတစိုက် ကြည့်လိုက်သည်။ ၎င်းက မည်သည့် တီးခတ်မှုမှ မပါသည့် တစ်ကိုယ်တော်သီဆိုမှု ဖြစ်သည်။ ကုယွီမြန်၏အသံက အစပိုင်းတွင် ဖိအားများကြောင့် အနည်းငယ်ထူးဆန်းသလို ဖြစ်နေသော်လည်း တဖြည်းဖြည်းချင်း ချောမွေ့ပြီး သဘာဝကျလာသည်။

ထိုအသံက ကြည်လင်နေသော နွေဦး၊ ထင်းရှူးလေပြေ ၊ သစ်တော၏ရွက်စိမ်းလေး တို့နှင့်တူသည်။ သီချင်းထဲတွင် မရေမတွက်နိုင်သော အသံများနှင့် အရောင်များဖြင့် ရှိနေသည်။ ထိုအသံက သူတို့ကို မိုးရေအိုင်ထဲတွင် ရောင်ပြန်ဟပ်နေသည့် ကောင်းကင်ပြာနှင့် နွေလယ်ည တစ်ညတွင် ပုဇင်းရင်ကွဲများ သီချင်းဆိုနေချိန်တွင် အိပ်မက်ကောင်းများ မက်နေသည့်သူများကို အမှတ်ရစေသည်။ 

သူက သီချင်းဆိုရာတွင် ကျွမ်းကျင်မှု မရှိသည်မှာ သိသာထင်ရှားသော်လည်း ကုယွီမြန်က သီချင်းဆိုလိုက်သောအခါ နားမလည်နိုင်အောင် ဆွဲဆောင်မှုရှိနေသည်။ တစ်ယောက်ယောက်က သူ့စည်းချက်ထဲကို ဝင်သွားသည်နှင့် သီချင်းထဲရှိ ခံစားချက်များကို သူတို့တစ်ယောက်ပြီးတစ်ယောက်ထံသို့ ပဲ့တင်ထပ်ပြီး နားစည်မှ နှလုံးသားအထိ ပြန့်နှံ့သွားကာ အထပ်ထပ်ကြားယောင်မိပြီး အတူတူ စည်းချက်လိုက်မိနေလိမ့်မည်။ 

ဤအချိန်တွင် သီချင်းတစ်ပုဒ်လုံးမပြောနှင့် ယမန်နေ့က စကားတိုလေးကြားရသည်ကပင် အံ့ဩစရာကောင်းလွန်းလှသည်။

ဆယ်စက္ကန့်ကြာခန့် တိတ်ဆိတ်သွားပြီးနောက် မှတ်ချက်များက ဝုန်းကနဲ ပေါက်ကွဲသွားသည်။

[အဆီ ဘယ်တော့မှ မစားဘူး အားးးး အားးး အားးး ငါတော့ သေပြီ အားးး အားး အားးး ကောင်းလိုက်တာ…] 

[စု : ဒါက ဘယ်လိုသီချင်းမျိုးလဲ… ငါ့နားတော့ ကိုယ်ဝန်ရှိတော့မယ်... ကူညီကြပါဦး…]

[အလှကုန်ပစ်ခြင်း- မြန်မြန်က တကယ့်ကို ဘုရားသခင်ရဲ့ ဆုလာဘ်လေး လို့ ငါထင်နေမိတယ်... ငါ ဘုန်းကြီးပဲ ဝတ်လိုက်တော့မယ်... တကယ်ပါ… အယ်လ်ဘမ်ထုတ်ဖို့ မြန်မြန်လုပ်ပါ… ငါဘယ်လောက်ပေးရပေးရ ပေးလိုက်မယ်...] 

[တိမ်လေးတစ်ခုရှိတယ်- ခံစားချက်ကို စကားလုံးတွေနဲ့ ဖော်ပြဖို့ခက်တယ်... ဘာပဲဖြစ်ဖြစ် ဒီညနေ လာခေါ်ပေးတဲ့ တင်ဆက်သူကို တကယ်ပဲ ကျေးဇူးတင်ချင်ပါတယ်... မိနစ်တိုင်း မမေ့နိုင်စရာဘဲ... စက်တင်ဘာလက နှင်းဆီပန်းတွေလိုပါပဲ... မင်းအတွက် မီးရှူးမီးပန်း။] 

[ကြောင်လေးရဲ့အော်သံ: မီးရှူးမီးပန်းအားလုံးက မြန်မြန်အတွက်ပဲ... နားထောင်လို့ အရမ်းကောင်းပြီး အရမ်းမိုက်တယ်လို့ခံစားရတယ်... ငါတော့ လူတိုင်းက နူးညံ့သိမ်မွေ့လာပြီး အနာဂတ်နဲ့ပတ်သက်ပြီး ရှင်းရှင်းလင်းလင်း မပြောပြနိုင်တဲ့ ခံစားချက်တွေ ရနေကြတယ်လို့ ထင်တယ်…] 

ယခုအချိန်အထိ ကုယွီမြန်၏ တိုက်ရိုက်ထုတ်လွှင့်မှု ရေပန်းစားမှုမှာ တစ်ညလုံး တဖြည်းဖြည်း မြင့်တက်လာခဲ့သည်။ ဤအခိုက်အတန့်လေးတွင် သီချင်းကြောင့် ကြာရှည်စွာ စောင့်မျှော်ခဲ့ရသော အငွေ့အသက်များက လုံးဝ လောင်မြိုက်သွားခဲ့သည်။ သီချင်းတစ်ပုဒ်တည်းကြောင့် မဟုတ်ဘဲ အငွေ့အသက်နှင့် ခံစားချက်တို့ကြောင့်လည်း ဖြစ်နိုင်သည်။ 

ထိုညနေခင်းတွင် အရသာရှိသည့် ရှို့ရှီဟော့ပေါ့၊ ချိုမြသည့် ဘလူးဘယ်ရီဝိုင်၊ ပိုးသားတို့ဟူးနှင့် ချိစ်မှရသည့် နို့ရနံ့များက နှာခေါင်းတစ်ဝိုက်တွင် ပျံ့နှံ့နေပြီး လူငယ်လေး၏ နူးညံ့သိမ်မွေ့သည့် နှလုံးခုန်သံနှင့် သွေးခုန်နှုန်းတို့ကလည်း နားထဲကို ရောက်လာနေသည်။ လူငယ်လေး၏ စိတ်ရှည်ရှည်နှင့်ညင်ညင်သာသာ ပြောဆိုတတ်ခြင်းများက တိတ်ဆိတ်ပြီး ရှည်လျားသည့် ညတာကို အပန်ဖြေစရာ အကောင်းဆုံးနေရာ ဖြစ်သွားစေရန် ခံစားချက်များကို တွန်းပို့နိုင်ခဲ့သည်။

နှစ်များက လုံခြုံပြီး အနာဂတ်ကလည်း အလားအလာ ကောင်းသည်။

တင်ဆက်သူအသစ် ၁၀ ဦးကို ယနေ့ညနေပိုင်းတွင် သီးသန့် အကြံပြုချက်နေရာများ သတ်မှတ်ပေးခဲ့သော်လည်း ကုယွီမြန်ကဲ့သို့သောသူက မည်သူမျှ မရှိပေ။ လူသားများကို မုန်းတီးနေသော ပရိသတ်များ၊ တိုက်ရိုက်ထုတ်လွှင့်ပုံနှင့်ပတ်သက်၍ သံသယရှိသူများ သို့မဟုတ် မျက်နှာဖုံးခေါင်းစဉ်နှင့် အစမ်းကြည့်ရှုသည့် အကြောင်းအရာကြောင့် ဆွဲဆောင်ခံရသည့် ပရိသတ်များပင်လျှင် သူတို့အားလုံး ဆက်ကြည့်မိရန် တစ်မိနစ်အတွင်း ဆွဲဆောင်ခံသွားရမည်ဖြစ်သည်။ 

ကုယွီမြန်၏ ကြည့်ရှုသူများက ကြည့်ရှုသူဦးရေ ကြီးမားလာသည်ကို ဘယ်သောအခါကမှ ငြင်းဆန်ခြင်းမျိုးမရှိပေ။ ကြည့်ရှုသူများက ကြည့်မိသွားသည်နှင့် ပြန်လည်ထွက်ခွာရန် တွန့်ဆုတ်နေတတ်ကြသောကြောင့် ဖြစ်သည်။ ယခုအချိန်တွင် ပရိသတ်အရေအတွက်က မယုံနိုင်လောက်အောင် အရှိန်အဟုန်ဖြင့် များလာပြီး မရေမတွက်နိုင်သော လက်ဆောင်များ ရောက်ရှိလာကာ ယနေ့၏ လူကြိုက်များမှု ဒုတိယနေရာကို ကျော်လွန်ကာ ပထမနေရာသို့ ချဉ်းကပ်လာခဲ့သည်။ 

ဒင်…

ညနေ ကိုးနာရီတွင် သတင်းတစ်ခု ထွက်လာသည်။ 

( ကုယွီမြန်၏ တိုက်ရိုက်ထုတ်လွှင့်မှုအခန်းကို လူပေါင်း ငါးသိန်းကျော် ကြည့်ရှုခဲ့သောကြောင့် သူက လူသစ်ပြိုင်ပွဲတွင် ချန်ပီယံဖြစ်လာခဲ့သည်။  သူ၏ ကျော်ကြားမှုက ပထမအဆင့်ပင်ဖြစ်သည်။ )

-----

ဒုတိယထပ် အိပ်ခန်းထဲတွင် ။ 

လူငယ်လေး၏ သီချင်းကို လေထုကို ချည်နှောင်ထားပြီး အတားအဆီးအလွှာများ ပိတ်ဆို့နေသည်ကို ဖြတ်သန်းပြီး နောက်ဆုံးတွင် တေးသွားအနည်းငယ်နှင့် အပိုင်းအစများကိုသာ ကြားခဲ့ရသည်။ 

သို့သော်လည်း ထိုအရာကပင် လုံလောက်နေပြီဖြစ်သည်။ 

ဥဖြူကြီးက ပထမတွင် အနည်းငယ် လှုပ်ခါလာပြီးနောက်တွင် ပြင်းထန်စွာ လှုပ်ယမ်းလာကာ အတွင်းမှ နှိပ်လိုက်သော အသံတစ်ခု ထွက်ပေါ်လာသည်။ အဖြူရောင်ဥခွံ၏ မျက်နှာပြင်ပေါ်တွင် အက်ကွဲကြောင်းတစ်ခု ပေါ်လာသည်။ ထိုအက်ကွဲကြောင်းက တဖြည်းဖြည်း ကျယ်ပြန့်လာပြီး အက်ကွဲရာများက ပင့်ကူအိမ်ကဲ့သို့ ဥတစ်ခုလုံးကို လျှင်မြန်စွာ ပျံ့နှံ့သွားခဲ့သည်။ 

ဘန်း…

မှောင်နေသည့် အခန်းထဲရှိ ပျော့ပျောင်းသည့်အသိုက်ထဲတွင် ဥဖြူကြီး၏ ထိပ်ပိုင်းတစ်ဝက် လုံးဝပြိုကွဲသွားသည်။ ပန်ဒါဝက်ဝံငယ်လေးတစ်ကောင်က ကွဲနေသော ဥခွံအတွင်း၌ ကျိုးပဲ့နေသော ဥခွံလေးတစ်ပိုင်းကို ဦးထုပ်အဝိုင်းပုံ ၀တ်ဆင်ထားသည်။

သူ့တစ်ကိုယ်လုံးကို ဖုံးအုပ်ထားသည့် အဖြူအမည်း အမွေးအမျှင်လေးများ၊ နားရွက်လေးနှစ်ခု၊ စိုစွတ်နေသည့် မျက်လုံးဝိုင်းဝိုင်းတစ်စုံနှင့် ကြည်လင်တောက်ပနေကာ နှစ်လနီးပါးအရွယ် ပန်ဒါလေးနှင့် တူသည်။

သူက ပထမဆုံး ငေးငိုင်ပြီး ပတ်ဝန်းကျင်ကို အပြစ်ကင်းစွာ လှည့်ပတ်ကြည့်ကာ ဥခွံကိုဖိထားသည့် သူ၏ နူးညံ့သော ခြေသည်းများကို ဖော်ပြနေသည်။ 

သူက မှတ်ဉာဏ်နှင့် ဗဟုသုတများ အားလုံး မပျက်မစီးဘဲ သူ့ကလေးဘဝသို့ ပြန်ရောက်သွားခဲ့သည်။ သို့သော်လည်း ထိုအိပ်ခန်းထဲရှိ ထွက်သက်ဝင်သက်က သူ့ကို လွန်ကဲသည့် ရင်းနှီးကျွမ်းဝင်မှုနှင့် စိတ်ချမှုကို ခံစားရစေသည်။ ထူးဆန်းသည့်နေရာသို့ ရောက်နေမှန်းသိသည့်တိုင် မကြောက်မိပေ။

အကောက်ပေါက်လေးက ဥခွံကို ကိုက်လိုက်ပြီး ကိုယ်ခွန် ကိုယ့်အားနှင့် အပြင်ကို ရောက်အောင် မထွက်နိုင်သည်မှာ သေချာသည်။ ထို့နောက်တွင် သူလည်း ထိုဥခွံလေးထဲတွင်ထိုင်ကာ ဥခွံကို လှေငယ်လေးကဲ့သို့ သဘောထားပြီး လူးလိမ့်နေလိုက်တော့သည်။

ကုယွီမြန်၏အိမ်တွင် နှင်းကျားသစ်လေးတစ်ကောင်ရှိသောကြောင့် သူ့အိမ်တွင်ရှိသည့် အသုံးအဆောင်များအားလုံးက ထိုကဲ့သို့သော အရွယ်အစားရှိသည့် တိရစ္ဆာန်လေးများနှင့် အလွန်လိုက်လျောညီထွေ ရှိလှသည်။ ကြမ်းပြင်ကို နူးညံ့သည့် ကော်ဇောဖြင့် ဖုံးအုပ်ထားပြီး စားပွဲများပေါ်တွင် ချွန်ထက်သောထောင့်များ မရှိသည့်အပြင် အိမ်တွင်းအပူချိန်ကလည်း အမြဲတမ်း သက်တောင့်သက်သာ ဖြစ်နေသည်။ 

ပန်ဒါပေါက်စလေးက ဆိုဖာပေါ်မှ ကော်ဇောပျော့လေးဆီသို့ လှိမ့်သွားသည်။ သူက အရာအားလုံးကို အလွန်သိချင်နေခဲ့သည်။ သူက ဘယ်ညာကြည့်ပြီး လှိမ့်လိုက်ကာ ထို့နောက်တွင်…

ဖွင့်ထားသော တံခါးမှတစ်ဆင့် လူငယ်လေး၏ သန့်ရှင်းကြည်လင်သော အသံကို ကြားလိုက်ရပြီး ပန်ဒါလေးက ထိုအသံအား ရင်းနှီးပြီး သူနှင့် နီးစပ်သွားသလို ခံစားလိုက်ရသည်။ 

"ထွမ်ထွမ် ဒီည စောစောအိပ်ရအောင်... နှစ်ရက်နေရင် ငါတို့ ကြယ်တာရာမြို့တော် အာာာ... ဒါဘယ်သူ့ကလေးလေးလဲ…" 

ကုယွီမြန် အံ့အားသင့်သွားပြီး ဥခွံထဲမှ ပန်ဒါလေးအား ပွေ့ဖက်လိုက်သည်။ 

🐼🐯🐼🐯

စာရေးသူမှာ ပြောစရာရှိပါတယ်…

နှင်းကျားသစ်လေး: "ဟမ်…"