MM Story Teller

Chapter 19

Viewers 5k

🐯Chapter 19

ရှည်လျားပြီး ဖရိုဖရဲဖြစ်နေသော အိပ်မက်အဆုံးတွင် ကုယွီမြန်၏ဝိညာဥ်မှာ ကောင်းကင်မှ တဖြည်းဖြည်းနိမ့်လာပြီး ပွေ့ဖက်မှုတစ်ခုထဲသို့ ကျရောက်သွားသည်။

သစ်ကတိုးနံ့က သူ့နှာခေါင်းထိပ်တွင် ရစ်ဝဲလာသည်။ ၎င်းက နွေးထွေးသော ပွေ့ဖက်မှုတစ်ခုမဟုတ်ဘဲ တောင့်တင်း၍ အတွေ့အကြုံမရှိသော ပွေ့ဖက်မှု ဖြစ်နေခဲ့သည်။

သို့သော် ၎င်းကပင် လုံလောက်နေခဲ့သည်။

ရှည်လျားသောမှတ်ဥာဏ်နှင့် ကူရာကယ်ရာမဲ့မှုက ရုတ်တရက် ပျောက်ကွယ်သွားသည်။

"ကုယွီမြန်..."

တစ်စုံတစ်ယောက်က သူ့နာမည်အား တီးတိုးခေါ်နေခဲ့သည်။

"ကုယွီမြန်..."

သူ၏နားထဲရှိ ဆူညံသံများအားလုံး ရပ်တန့်သွားသည်။

သူ၏နှလုံးသားထဲရှိကြိုးများက လေဖြင့်လွင့်သွားပြီး သူ၏လက်မောင်းထဲသို့ ကြယ်များကြွေကျလာခဲ့သည်။

သူ ကောင်းမွန်သော အိပ်မက်တစ်ခုမက်ခဲ့သည်။

-----

နောက်တစ်နေ့၌…

ကုယွီမြန်မှာ လက်ပတ်ကွန်ပျုတာမှ အသံကြောင့် နိုးလာသည်။

နိုးလာသောအခါ မိန်းမောတွေဝေနေပြီး အိပ်မက်ထဲတွင် နစ်မြုပ်နေခဲ့သည်။ အိပ်မက်ထဲတွင် မြင်ခဲ့သည့် သူသေဆုံးပြီးနောက် ဖြစ်ပျက်ခဲ့သော အရာများမှာ အစစ်အမှန်လော အိပ်မက်တစ်ခုလော သူ မသိချေ။

နွေဦးမနက်ခင်းအစောပိုင်း နေရောင်က ကောင်းမွန်ပြီး ပြင်သစ်ပြတင်းပေါက်များရှေ့ရှိ အဖြူရောင်လိုက်ကာမှာ လေနှင့်အတူ လွင့်နေသည်။ နှင်းကျားသစ်လေးက သူ့ရင်ဘက်ပေါ်တွင် အသိုက်ဖွဲ့ပြီး အိပ်ပျော်နေသည်။ သူ၏ရှည်လျားသောအမြီးမှာ ကုယွီမြန်၏ လက်ကောက်ဝတ်အား ပတ်ထားသည်။

လက်ပတ်ကွန်ပျူတာမှ ဆက်တိုက်အသံမြည်နေခဲ့ပြီး တစ်စုံတစ်ယောက်မှာ သူ့အားခေါ်နေသည်။

"တောင်းပန်ပါတယ်...ဟဲလို ဘယ်သူပါလဲ..."

ကုယွီမြန်က အိပ်ယာမှထပြီး သူ၏ဆံပင်အားသပ်ကာ ခေါ်ဆိုမှုအား ကိုင်လိုက်သည်။

ဖော်ပြထားသောနံပါတ်က စတားလိုက်ခ်ပလက်ဖောင်း၏ တရားဝင်နံပါတ်ဖြစ်သည်။

"ဟဲလို မစ္စတာကု… ကျွန်တော်က စတားလိုက်ဖ်က ဝန်ထမ်းတစ်ယောက်ပါ... မနေ့က မင်းနဲ့ဆက်သွယ်မရလို့ပါ..."

ယနေ့ညက လူသစ်ဂုဏ်ပုဒ် အားဆုံးဖြတ်မည့် နောက်ဆုံးအကြိမ်ဖြစ်ကြောင်း ကုယွီမြန်အား ရှင်းပြခဲ့သည်။

ဤရက်ပိုင်းအတွင်းတွင် ပြီးပြည့်စုံသောကျော်ကြားမှုရှိသည့် တစ်ယောက်ကသာ လူသစ်ထောက်ပံ့ရေးအစီအစဥ်၏ နေရာအား ရရှိလိမ့်မည်ဖြစ်သည်။ စာရင်းဇယားအရ နောက်ဆုံးအချိန်မှာ ယနေ့ညသန်းခေါင်ယံအထိ ဖြစ်သည်။ ဝန်ထမ်းက နွေးထွေးသော လေထုအားဖန်တီးပြီး ကြော်ငြာတစ်ခု ပြုလုပ်ချင်သည်။ ထို့ကြောင့် ယနေ့ သူက တရားဝင်အထူးတိုက်ရိုက်ထုတ်လွှင့်မှုအား စတင်ဆောင်ရွက်ရလိမ့်မည်ဖြစ်သည်။ ယနေ့ည တိုက်ရိုက်ထုတ်လွှင့်မှုအတွက် အမျိုးမျိုးသောကြိုတင်ပြင်ဆင်မှုများမှာ စာရင်းထဲတွင်ပါသည့် တင်ဆက်သူများ၏ ကြွားဝါစရာဖြစ်ပြီး သူတို့၏ခံစားချက်များအား ပြောပြသင့်သည်။

"မင်း ပါဝင်မလား... မပါဘူးလားဆိုတာ ရွေးချယ်လို့ရပါတယ်...ဒါပေမယ့် အကြံပေးရမယ်ဆိုရင် ပါဝင်သင့်ပါတယ်လို့ထင်တယ်..."

ဝန်ထမ်းမှ ပြောသည်။

အမှန်တကယ်တွင် ၎င်းက တရားဝင်တိုက်ရိုက်ထုတ်လွှင့်မှုတစ်ခုဖြစ်ပြီး စတူဒီယိုထံ ကြည့်ရှုသူအသစ်များနှင့် ကျော်ကြားမှုကို ယူလာပေးသည်။ ယေဘုယျအားဖြင့် မည်သူမှ မငြင်းပယ်ကြပေ။

ကုယွီမြန်က စဥ်းစားပြီးနောက် ပြန်ပြောလိုက်သည်။

"ကောင်းပါပြီ ဘယ်အချိန်လဲ..."

ဝန်ထမ်းမှာ စိတ်သက်သာရာရသွားခဲ့သည်။

"တစ်နာရီအတွင်းပါပဲ... မင်းရဲ့အိမ်ကို အစီအစဥ်မှူး ပို့လိုက်ပါ့မယ်... အဆင်ပြေရင် လိပ်စာချန်ထားခဲ့ပါ့လား..."

"ဟိုင်ယိယွဲ့ကျွီ.. နယ်မြေ ၂.. အဆောက်အအုံ ၃..."

ကုယွီမြန် : "ကောင်းပါပြီ..."

ဝန်ထမ်း : "ဟိုင်ယိယွဲ့ကျွီ ..."

သူဖုန်းချပြီးနောက် ရုတ်တရက် တုံ့ပြန်မိသွားသည်။

ဟိုင်ယိယွဲ့ကျွီ နယ်မြေ ၂တဲ့လား... ငွေနဲ့တောင် ဝယ်လို့မရတဲ့ ပင်လယ်ရှုခင်းပါတဲ့ ၂လွှာတိုက်ခန်းလား...

တစ်နာရီအတွင်း။

ကြယ်တာရာကောင်းကင်မြို့မှ တရားဝင်တိုက်ရိုက်ထုတ်လွှင့်မှု၏ တင်ဆက်သူလုလုက သူမ၏ပစ္စည်းကိရိယာများဖြင့် ဟိုင်ယိယွဲ့ကျွီသို့ ရောက်လာခဲ့သည်။

ရိုးရိုးသားသားဆိုရလျှင် ယခုကဲ့သို့ အဆင့်မြင့် လူနေမှုဧရိယာသို့ ပထမဆုံးအကြိမ် ရောက်ဖူးခြင်းဖြစ်သောကြောင့် စိုးရိမ်ပူပန်၍ စိတ်လှုပ်ရှားနေရသည်။ ယခုအချိန်တွင် တရားဝင်တိုက်ရိုက်ထုတ်လွှင့်မှု စတင်သည်မှာ အချိန်အနည်းငယ်ရှိပြီဖြစ်ပြီး ကုယွီမြန်မှာ ပထမဆုံးအင်တာဗျူးရမည့် တင်ဆက်သူဖြစ်သည်။

"ဟဲလို ကျွန်မက လုလု ပါ..."

သူမက ကင်မရာကိုကြည့်ပြီး ပြောသည်။

"အခု ကျွန်မတို့က မစ္စတာကုယွီမြန်ရဲ့ အိမ်ကို ရောက်နေတာ ဖြစ်ပါတယ်... တံခါးဘဲလ် တီးလိုက်ရအောင်... တကယ်တော့ ကျွန်မ နည်းနည်းစိတ်လှုပ်ရှားနေတယ်..."

【ကံကောင်းစေတဲ့အပင်လေး: ကုယွီမြန်လား... သိပ် မကြာသေးခင်ကမှ မကောင်းပြောခံထားရတဲ့သူ မလား

... သူ ရေတပ်ဝယ်လိုက်တာလား... ကျော်ကြားလာဖို့ဆိုတာက ထူးဆန်းတယ်... 】

【 ကြောင်လေးရဲ့အော်သံ: မြန်မြန် ဘယ်မှာလဲ ငါဒီမှာ... အာအာ... မြန်မြန်ရဲ့အိမ်ကို သွားချင်တယ် ငါအရမ်းမျှော်လင့်နေမိပြီ…】

【သံပုရာသီးလေး: ဒီနေ့ညက ပြိုင်ပွဲအတွက် နောက်ဆုံးညလို့ ပြောတယ်... နည်းနည်း စိတ်လှုပ်ရှားစရာကောင်းတယ်… 】

【ကောင်းကင်ပေါ်ကငှက်: လူသားတစ်ယောက်ရဲ့ အိမ်မှာ ထူးဆန်းတာတွေ ရှိနိုင်လား... ရုတ်တရက်ကြီး ငါနည်းနည်းကြောက်လာပြီ…】

စတားလိုက်ဖ်၏ အမှုဆောင်နှင့် ကုယွီမြန်၏ ပရိသတ်များမှာ ရင်သပ်ရှုမောသွားရသည်။ ထိုအချိန်တွင် တိုက်ရိုက်ထုတ်လွှင့်မှုက စတင်နေပြီဖြစ်သည်။ ပထမဆုံးအကြိမ် ဝင်လာသည့် ကြည့်ရှုသူများမှာ ကုယွီမြန်၏ နာမည်ကိုသာသိပြီး ဘာမှမသိပေ။ ထို့ကြောင့် အမျိုးမျိုးသော သဘောထားများ ပြသလိမ့်မည်။

အစီအစဥ်မှူးက တံခါးရှေ့တွင် ဆယ်စက္ကန့်မက စောင့်ပြီးနောက် တံခါးပွင့်လာသည်။

"ဟဲလို... ကျွန်တော် စောင့်နေတာ အထဲဝင်ပါ..."

ကုယွီမြန်က ပြုံး၍ လုလုနှင့် လက်ဆွဲနှုတ်ဆက်သည်။

သူက အိပ်ချင်မူးတူးဖြစ်နေသော နှင်းကျားသစ်လေးအား သူ့ရင်ခွင်ထဲတွင် ပွေ့ဖက်ထားသည်။ နှင်းကျားသစ်လေးက လုလုအားမျက်စိလှန်ကြည့်ပြီး ပျင်းရိစွာဖြင့် အကြည့်လွှဲသွားခဲ့သည်။

ရိုရိုးသားသားပြောရလျှင် ကြည့်ရှုသူများကဲ့သို့ပင် လုလုသည်လည်း သူမ ဝင်လာသောအခါ အနည်းငယ် စိုးရိမ်ပူပန်နေခဲ့သည်။

၎င်းမှာ အဆင့်မြင့်အိမ်တစ်လုံးဖြစ်နေသည့်အတွက်သာမက လူသားတစ်ယောက်၏ အိမ်ဖြစ်နေသောကြောင့်ပင်။ သူမ၏ရင်ထဲတွင် လူသားဟူသည့် စကားလုံးနှင့် ပတ်သက်၍ ပိုင်းခြားဝေဖန်တတ်သော တုံ့ပြန်မှုရှိနေပြီး အိမ်ထဲတွင် သူမအား သက်သောင့်သက်သာမဖြစ်စေမည့် တစ်စုံတစ်ခုအား မြင်ရမည်ကို ကြောက်ရွံ့နေခဲ့သည်။

သို့သော် ကုယွီမြန်အား မြင်လိုက်ရသည့်အချိန်တွင် ထိုကဲ့သို့ အတွေးအားလုံး ပျောက်ကွယ်သွားခဲ့သည်။

ဤလူသားမှာ သူမကို သူ့အနား နီးကပ်ချင်အောင် ပြုလုပ်နေသည်။

လုလုက သမင်တစ်ကောင်ဖြစ်သည်။ ယခုအချိန်တွင် သူမ၏ တိရစ္ဆာန်အသွင်သို့ပြောင်းရန် လှုံ့ဆော်ခံရပြီး ကုယွီမြန်မှ သူမအား အရွက်နုလေးများ ကျွေးစေချင်သည်။ သူမကို ချော့သိပ်စေချင်သည်။

သူမက စိတ်ကူးယဥ်လျက်ဖြင့် ကုယွီမြန်၏အိမ်ထဲသို့ ဝင်သွားသည်။

"ထိုင်ခုံမှာထိုင်ပါဦး... ရေနွေး သောက်ချင်လား... တခြားတစ်ခုခု သောက်ချင်လား..."

ကုယွီမြန်က ပြောလိုက်သည်။

"ရေပဲ သောက်ပါတော့မယ်..."

လုလု လျင်မြန်စွာပြောလိုက်သည်။

ကုယွီမြန်က ခေါင်းညိတ်ပြပြီး သူမအား ရေတစ်ခွက် ထည့်ပေးကာ လုလုနှင့် မျက်နှာချင်းဆိုင် ဆိုဖာပေါ်တွင်ထိုင်၍ မေးသည်။

"မင်း မေးချင်တာ တစ်ခုခုများ ရှိလား..."

ထိုအခါမှ လုလုသည် အသိစိတ်ပြန်ကပ်သွားပြီး ယနေ့၏ တာဝန်အား သတိရသွားသည်။

"ရှင် လုပ်နေကျ အရာတွေကို လုပ်နိုင်ပါတယ်..."

သူမ ရှင်းပြလိုက်သည်။

"ကျွန်မတို့က ရှင်ရဲ့ နေ့စဥ်ဘဝက ပုံတွေကို အဓိကထား ရိုက်ကူးချင်လို့ပါ..."

ကြည့်ရှုသူ၏အမြင်နှင့် ဆွေးနွေးချက်များ ထည့်ချင်သည့်အတွက် တာဝန်ရှိသူများမှာ *မီးရှို့ချင်နေကြသည်။

[T/N - မီးရှို့ချင်တယ် ဆိုတာ တကယ့်မီးကိုပြောတာ မဟုတ်ဘဲ လူစိတ်ဝင်စားအောင်လို့ ကိစ္စလေးတွေ ဖန်တီးချင်တာကို ဆိုလိုတာပါ]

တင်ဆက်သူများ တစ်ယောက်နှင့်တစ်ယောက် ဆန့်ကျင်ကြသည်ကို ကြည့်ရခြင်း သို့မဟုတ် တင်ဆက်သူ၏ စိတ်လှုပ်ရှားနေသော လုပ်ဆောင်ချက်များကို ကြည့်ရခြင်းက အလွန်ကောင်းသည်။ အစီအစဥ်မှူးအနေဖြင့် လုလုက ပထမဆုံး တင်ဆက်သူ၏ဘဝကို ရိုက်ကူးမည်ဖြစ်ပြီး မမျှော်လင့်သည့် အချိန်တွင် ထက်ရှသောမေးခွန်းများ မေးမည်ဖြစ်သည်။

လုလုက ကုယွီမြန် ယနေ့ကဲ့သို့ အရေးကြီးသည့် တိုက်ရိုက်ထုတ်လွှင့်မှုတွင် ပြုလုပ်မည့်အရာအား မျှော်လင့်နေမိသည်။ ပြင်ဆင်ထားသော စာကြောင်းများအား အလွတ်ရွတ်ပြခြင်း၊ အစားအစာနှင့် မီးဖိုချောင်သုံးပစ္စည်းများအား ပြင်ဆင်ထားခြင်း၊ လူထု၏အမြင်အတွက် မိမိကိုယ်ကိုယ် ကြော်ငြာခြင်း အစရှိသည်တို့ ဖြစ်နိုင်ပေသည်။

တရားဝင်လိုက်ဖ်အခန်းထဲတွင် စာအရေးအသားအတွက် အထူးတာဝန်ခံရှိပြီး တိုက်ရိုက်ထုတ်လွှင့်မှုနှင့် အချိန်တပြေးညီဖြစ်သည်။ ဥပမာအားဖြင့် ယခုအချိန်တွင်ခေါင်းစဥ်မှာ "အသစ်လေးတွေ ပြိုင်ပွဲကလာပြီ... ဒီနေ့ည ဗိုလ်လုပွဲအတွက် တင်ဆက်သူအသစ် ဆယ်ယောက်ရဲ့ ပြင်ဆင်မှုတွေက ဘယ်လိုများဖြစ်မလဲ" ခေါင်းစဥ်က နာမည်ကြီးပြီး ကြည့်ရှုသူများ၏ စိတ်ဝင်စားခြင်းခံရကာ စိုးရိမ်ပူပန်မှုနှင့် အတင်းအဖျင်းလေထုအား ကြည့်ချင်နေကြသည်။

ထို့နောက်...

ကြည့်ရှုသူများနှင့် အစီအစဥ်မှူး လုလုက ကုယွီမြန် တူရွင်းအားယူပြီး အပေါ်ထပ်ဥယျာဥ်ပေါ်သို့ တက်သွားသည်အား လိုက်ကြည့်နေခဲ့သည်။ သို့သော် နှင်းကျားသစ်လေးမှာ လေးနက်သောအကြည့်ဖြင့် ရေပုံးအား ကုယွီမြန်ဘက်သို့ တွန်းပို့လိုက်ပြီး အပြန်အလှန်အနေဖြင့် ကုယွီမြန်၏ အထိအတွေ့နှင့် ချီးမွန်းစကား အနည်းငယ်အား လဲလှယ်လိုက်သည်။

လုလုနှင့် ကြည့်ရှုသူများ : "...."

"မစ္စတာကု ဘာတွေလုပ်နေတာလဲ..."

သူမ မနေနိုင်ဘဲ မေးလိုက်မိသည်။

"ကျွန်တော့်ရဲ့ အပင်တွေကို မနေ့က ကြောင်တွေ ဖျက်ဆီးသွားလို့ပါ... ကျွန်တော် သူတို့ကို ပြန်စိုက်ချင်လို့... စိတ်မရှိဘူးမလား..."

ကုယွီမြန်က ရှင်းပြလိုက်သည်။

အခြားစကားလုံးဖြင့်ဆိုရလျှင် စိုက်ပျိုးရေးလုပ်ချင်နေခြင်းဖြစ်သည်။

လုလုနှင့် မှတ်ချက်ပေးသူများ "....."

ပထမတွင် သူတို့ပ ကုယွီမြန်မှာ ဟာသပြောခြင်းသာ ဖြစ်လိမ့်မည်ဟု ထင်ခဲ့ကြသည်။ မမျှော်လင့်စွာဖြင့် ကုယွီမြန်က သူ့ခေါင်းအားငုံ့၍ မြေကြီးကို ဆွလေသည်။ ပထမဆုံး သူက မြေသြဇာကောင်းမွန်သော သဲနှင့်ရွှံ့စေးကို ထည့်ကာ ကိုယ်တိုင်လုပ်ပေတံဖြင့် အပင်စိုက်မည့် အပေါက်အား တိုင်းတာပြီးနောက် ကြောင်ဆေးပင်အမြစ်၏ နှစ်ဆရှိသော ကျင်းကိုတူးလိုက်သည်။

ထို့နောက် အမြစ်အား ရေထဲတွင်ထားလိုက်ပြီး ပူဖောင်းလေးများ ထွက်မလာတော့သည့် အချိန်တွင် အပင်စိုက်မည့် အပေါက်ထဲသို့ မြေကြီးနှင့်အတူထည့်ကာ တင်းတင်းကြပ်ကြပ် ဖိလိုက်သည်။

နှင်းကျားသစ်လေးက ကုယွီမြန်၏ ပခုံးပေါ်တွင်ထိုင်ပြီး ဂရုတစိုက်နှင့် သူ၏အလုပ်အား လေးနက်စွာ ကြီးကြပ်ပေးနေခဲ့ပြီး ကိရိယာများလှမ်းယူသည့် အခါတွင်လည်း ကူညီပေးသည်။

နေရောင်က ကြည်လင်ရှင်းလင်းပြီး ပင်လယ်လေပြေလေး တိုက်နေ၍ အရာအားလုံးမှာ အစီအစဥ်တကျပင်။

လုလု : "..."

သူမ အစပိုင်းတွင် ဆွံ့အသွားပြီးနောက် ကုယွီမြန်၏ လှုပ်ရှားမှုအားကြည့်ပြီး ဆွဲဆောင်ခံလိုက်ရသည်။ ၎င်းက ဘဝအား တိတ်ဆိတ်သွားစေပြီး ရင်ထဲတွင် ငြိမ်းချမ်း၊ နှစ်သိမ့်မှုရစေကာ ပျင်းသည်ဟုပင် မခံစားရပေ။

သူမ တစ်နေကုန် ထိုင်ကြည့်နေနိုင်သည်ဟုပင် ခံစားရသည်။

"ကျွန်တော့်ကို တူရွင်းလေး လှမ်းပေးပါ့လား..."

ကုယွီမြန် သူမအား ကြည့်လိုက်သည်။

"အို ဟုတ်..."

လုလု မသိစိတ်မှ တူရွင်းယူပေးလိုက်သည်။

"ကျေးဇူးတင်ပါတယ်..."

ကုယွီမြန်က သူမအား ပြုံးပြလိုက်ပြီးနောက် လုလုက စိတ်ကျေနပ်ပျော်ရွှင်မှုကို ခံစားလိုက်ရပြီး သူမ၏သမင်ချိုများ ထွက်ချင်လာသည်။ သူမ လျင်မြန်စွာ ခေါင်းကိုရှေ့နောက်ခါ၍ စိတ်ထဲတွင် 'မကောင်းတော့ဘူး'ဟု အော်လိုက်မိသည်။

ယခုလေးတင် အရာအားလုံး ထိန်းချုပ်မှု လွတ်သွားရသည်။

ငါ ဘာလုပ်သင့်တုန်း...

၎င်းက လူထုအားဖော်ပြထားသည့် ခေါင်းစဥ်နှင့် လုံးဝကွဲပြားနေသည်။ ၎င်းက ကြည့်ရှုသူများ၏ စိတ်ပျက်မှုအားဖြစ်စေနိုင်ပြီး ကြည့်ရှုသူအရေအတွက် ကျသွားနိုင်သည်။

ပယ်ချခံရမှာများလား...

လုလုက တွေးတောနေပြီး ကြည့်ရှုသူအရေအတွက်အား တစ်ချက်ကြည့်လိုက်သည်။

ကြည့်ရှုသူ တစ်သိန်း နှင့် ရှစ်သောင်း...

ကုယွီမြန် စိုက်ပျိုးခြင်း စတင်ပြီးနောက် ဆယ်မိနစ်တွင် ကြည့်ရှုသူအရေအတွက် ငါးသောင်းတိုးလာပြီး အရေအတွက်က နိမ့်ဆင်းသွားခြင်းမရှိဘဲ တဖြည်းဖြည်းပို၍ တိုးလာခဲ့သည်။ အစပိုင်း၌ ကြည့်ရှုသူများက တိုက်ရိုက်ထုတ်လွှင့်မှုအား ငေးကြောင်ကာ ကြည့်နေမိကြသည်။

သူတို့က ပြင်းထန်သောခေါင်းစဥ်မှ ဆွဲဆောင်ခံခဲ့ရသော်လည်း ဥယျာဥ်ထဲမှ ကုယွီမြန်အား တွေ့လိုက်ရသည်။ ရုတ်တရက် သူတို့က ထုတ်လွှင့်မှုအမှားကြီးဖြင့် အလိမ်ခံလိုက်ရပြီဟု ခံစားမိချေသည်။ သို့သော် ဆဲဆိုရန်ပြင်ဆင်လိုက်ပြီးနောက် ပြန်လည်ရပ်တန့်မိသည်။

ယခုအချိန်တွင် ထွက်သွားစရာအကြောင်း မရှိပေ။

ဥယျာဥ်စိုက်ပျိုးခြင်းက လူသိများသောလုပ်ဆောင်မှုဖြစ်ပြီး လူများအားပျင်းရိစေသော ခံစားချက် မဖြစ်စေဘဲ ရှင်းပြမနိုင်သည့် ဆွဲဆောင်မှုတစ်မျိုးအား ခံစားမိစေသည်။ ပထမရှုထောင့်မြင်ကွင်းက အစီအစဥ်မှူးလုလုထံမှဖြစ်၍ သူတို့က ပင်လယ်လေညင်းလေးနှင့်အတူ ကြောင်ဆေးပင်အနံ့သင်သင်းလေးအားရပြီး အရာအားလုံးအား အစီစဥ်တကျ လုပ်ဆောင်နေသော အမျိုးသားကိုစောင့်ကြည့်နေကြသည်။ သူတို့နှလုံးသားမှာ ရှင်းမပြနိုင်စွာ ငြိမ်သက်နေခဲ့သည်။

အထူးသဖြင့် ယခုအချိန်တွင် ကုယွီမြန်မှ လုလုအား ပြုံးပြပြီး ကျေးဇူးတင်လိုက်သောအခါ သူတို့သည်လည်း တူညီသော စိတ်ကျေနပ်မှုကို ခံစားရကာ သူတို့ကိုယ်တိုင် ကုယွီမြန်အား ကူညီခဲ့ပြီး သူ၏အသိမှတ်ပြုခြင်းအား ရလိုက်သကဲ့သို့ပင်။

【 သံပုရာသီးလေး : ဘာတွေဖြစ်နေတာလဲ... ငါ ဘာလို့ လူသားတင်ဆက်သူတစ်ယောက်ရဲ့ စိုက်ပျိုးရေးလုပ်နေတာကို စောင့်ကြည့်နေမိတာလဲ...】

【ကံကောင်းစေတဲ့သစ်ရွက်လေး : ရဲကို အကြောင်းကြားပေးဦး... ငါ ဒီထုတ်လွှင့်မှုကနေ ထွက်သွားချင်ပေမယ့် မထွက်နိုင်ဘူး... ငါ့ရဲ့လက်တွေမှာ သူတို့ကိုယ်ပိုင်စိတ်ကူးတွေ ရှိနေတယ်...】

【လင်းပိုင်တိမ်လေး: သူကိုကြည့်နေရရုံနဲ့တင် ဘာလို့သက်သောင့်သက်သာဖြစ်တယ်လို့ ခံစားနေရတာလဲ… 】

【 ကတ် : သက်သောင့်သက်သာရှိတယ်+1】

အစီအစဥ်မှူး လုလုသည်လည်း စိတ်ရှုပ်ထွေးနေရကာ မည်သို့ဆက်လုပ်လုပ်ရမည်ကိုပင် မသိတော့ချေ။

၎င်းက အကြိုဇာတ်ညွှန်းနှင့် လုံးဝကွဲပြားနေသော်လည်း အခြေအနေမှာ အလွန်ကောင်းသည်။

တစ်ချိန်တည်းမှာပင် စာအရေးအသားအတွက် တာဝန်ရှိသူက ကောင်းစွာနားလည်ကာ မူရင်းခေါင်းစဥ်အား ပြောင်းလိုက်သည်။

[ဒင်… ကိုလူချောက ချွေးတွေအရမ်းထွက်နေလွန်းလိုါ သူက ...]

ထိုခေါင်းစဥ်ဖြင့် များပြားသော ကြည့်ရှုသူအရေအတွက်အား ရရှိခဲ့သည်။ အမှန်တကယ် ထုတ်လွှင့်မှုအားကြည့်ပြီး သူတို့၏ဘဝကိုပင် သံသယဝင်သွားသည်။ သူတို့ ဆဲဆိုပြီး ထွက်သွားချင်သော်လည်း အထွက်ခလုတ်အား မနှိပ်နိုင်ပေ။

၎င်းက ပြီးဆုံးရန် ဝေးနေသေးသည်။

ကုယွီမြန်က မိနစ်၂၀ခန့် သန့်ရှင်းရေးလုပ်ပြီးနောက် လက်ဆေးကာ လုလုကိုမေးလိုက်သည်။

"ကျွန်တော် မေ့သွားတယ်... မင်း စတော်ဘယ်ရီ ဖျော်ရည် သောက်မလား..."

လုလု မသိစိတ်မှ ပြောလိုက်မိသည်။

"ဟုတ် သောက်မယ်..."

ဒုတိယထပ်တွင် ဖျော်ရည်စက်ရှိပြီး လုလုနှင့် ကြည့်ရှုသူများမှာ ကုယွီမြန် စတော်ဘယ်ရီသီးများအား တစ်လုံးပြီးတစ်လုံးထုတ်၍ ဆေးကြောပြိီး ဖျော်စက်ထဲထည့်ကာ ခလုတ်နှိပ်ပြီးနောက် ချစ်စဖွယ်အရည်သွေးမြင့် ဖျော်ရည်တစ်ခွက် လုပ်နေသည်အား ကြည့်နေကြလေသည်။

ထို့နောက် အမျိုးသား၏ ရှည်လျားသွယ်လျသော လက်ချောင်းဖြူဖြူများက ဓါးကိုကိုင်ပြီး စတော်ဘယ်ရီနှစ်လုံးကို လှီးဖြတ်၍ ခွက်ထဲထည့်ကာ အသဲပုံစံရှိသော ပိုက်အားထည့်လိုက်သည်။

"မင်း အေးတာသောက်နိုင်လား..."

ကုယွီမြန် သူမအား ကြည့်လိုက်သည်။

လုလု ခေါင်းညိတ်ပြသည့်အခါ ကုယွီမြန်က ဖန်ခွက်ထဲသို့ ရေခဲတုံး ၃တုံး ထည့်လိုက်သည်။ ဖောက်မြင်နိုင်သောဖန်ခွက်ထဲတွင် စတောင်ဘယ်ရီဖတ်လေးများဖြင့် ပန်းရောင်စတော်ဘယ်ရီဖျော်ရည်က အစောပိုင်းနွေဦး၏ နေရောင်တွင် ရောင်ပြန်ဟပ်နေသည်။ ၎င်းက အနုပညာတစ်ရပ် ကဲ့သို့ပင်။ နှာခေါင်းထိပ်လေးဖြင့်ပင် စတော်ဘယ်ရီ၏ ချိုချိုချဥ်ချဥ်အနံ့အား ခံစားမိပြီး လူတိုင်းကို မြည်းကြည့်ချင်စိတ် ဖြစ်ပေါ်စေသည်။

ဖန်ခွက်ကိုချပြီးနောက် ကုယွီမြန်က ကိုယ်တိုင်လုပ်ထားသော စတော်ဘယ်ရီယိုနှင့် ချိစ့်ဖြင့် ပြုလုပ်ထားသည့် စတော်ဘယ်ရီချိစ့်ကိတ်အား ထုတ်ပေးသည်။

ခေါင်းစဥ်အမှားဖြင့် ဆွဲဆောင်ခံခဲ့ရသော ကြည့်ရှုသူများမှာ ဆဲဆိုရန်အတွက် စဥ်းစားရန် အချိန်မရှိပေ။ လုလုကဲ့သို့ပင် သူတို့က အသက်အောင့်ထားမိပြီး လုံးဝ ဆွဲဆောင်ခံလိုက်ရသည်။

သူမ ခွက်ကိုယူ၍ ဂရုတစိုက်ဖြင့် အရသာခံလိုက်သည်။

စတော်ဘယ်ရီ၏ လတ်ဆတ်သော ချိုချိုချဥ်ချဥ်အရသာလေးကြောင့် အရသာခံဖုလေးများကို အံ့အားသင့်သွားစေခဲ့သည်။

🐯🐯🐯

Prev Next