MM Story Teller

Chapter 198

Viewers 32k

🌍Chapter 198

အဆုံးတွင် ၃မိနစ်ကုန်လွန်သွားပြီးနောက် အနက်ရောင်တွင်းပေါက်ကြီးမှာလည်း ပျောက်ကွယ်သွားတော့သည်။

ထန်မော့ ခပ်တည်တည်ဖြင့် ဘောင်းဘီကိုဆွဲတင်လိုက်ပြီး တစ်ဖက်ကိုကြည့်လိုက်သည်။

ယုန်နက်က အလွန်ပင်ပန်းနေပုံဖြင့် ကြမ်းပြင်ပေါ်ငြိမ်သက်စွာလဲလျောင်းနေခဲ့သည်။

ဤတစ်ကြိမ်တွင် ထန်မော့ ယနေ့၀တ်လာမိသော အတွင်းခံမှာ တင်းကြပ်နေပြီး ကျွတ်ကျမသွားသည်ကို လွန်စွာကျေးဇူးတင်နေမိလေသည်။ ထို့အပြင် မျှော်စင်ကိုတစ်ယောက်တည်းတိုက်ခိုက်ရန် ရွေးချယ်မိခဲ့သည့်အတွက်လည်း အလွန်ကျေးဇူးတင်မိသည်။ အကယ်၍ ဖူ၀မ်သော်၊ဖူ၀မ်ရှန်းတို့နှင့် အတူရှိနေခဲ့ပါလျှင်...

ထန်မော့ချောင်းဟန့်လျက် သူ၏အတွေးများကို ဖိနှိပ်လိုက်သည်။

ဤတစ်လှည့်တွင် ထန်မော့က နှစ်ကွက်ဆုတ်ရပြီး ယုန်နက် ၄လှမ်းခန့်ဆုတ်လိုက်ရသည်။ ၂ဦးစလုံးဆုတ်ရသော်လည်း ထန်မော့က ယုန်နက်လောက် နောက်မရောက်ချေ။ ထန်မော့ကဆိုလိုက်သည်။

"အာ... ငါတို့ရုတ်တရက်ကြီး ဘယ်လိုဝေးသွားတာလဲ"

ယုန်နက်ကြီးက ထန်မော့ကို စိုက်ကြည့်နေခဲ့လေသည်။

ထန်မော့၏ နှုတ်ခမ်းတို့မှာတွန့်ကွေးသွားခဲ့သည်။

"ကြည့်ရတာ ငါတို့တွေစမှတ်ကိုပြန်ရောက်သွားပြီထင်တယ်"

ထန်မော့မှာ ၃၃ကွက်တွင် ရပ်နေပြီး ယုန်နက်မှာတတိယအကွက်တွင်ရပ်နေခဲ့သည်။ သူတို့၂ဦးကြားမှ အကွာအဝေးမှာ အကွက်၃၀ပြန်ဖြစ်သွားခဲ့သည်။

အမှန်တရားနာရီဂိမ်းစတင်ပြီးမိနစ်၂၀ကြာခဲ့ချေပြီ။

ပထမမိနစ်၂၀တွင် ယုန်နက်မှာ သူတို့၂ဦးကြားမှ အကွာအဝေးကို ချုံ့လျက် အမီလိုက်လာနိုင်ခဲ့သည်။ ယခုမူသူတို့၂ဦးကြားမှ အကွာအဝေးက အကွက်၃၀ပြန်ဖြစ်သွားလေပြီ။

အမှန်တရားနာရီမှာ အကွက် ၁~၆၀အထိ ပိုင်းခြားနိုင်သော စက်၀ိုင်းတစ်ခုဖြစ်ကာ အစနှင့်အဆုံးဆက်စပ်နေလေသည်။

နာရီပြောင်းပြန်လားရာမှာ ရှေ့တိုးခြင်းဖြစ်ကာ နာရီအတည့်လားရာမှာ ပြန်ဆုတ်ခြင်းဖြစ်သည်။

ဤဂိမ်းတွင် တိုးသွားခြင်းမရှိပါက ဆုတ်သွားမည်ဖြစ်သည်။ အကယ်၍အလှည့်အနည်းငယ်ပြီးသွားပြီးနောက် ထန်မော့က ၁၅ကွက်တိုးသွားပြီး ယုန်နက်မှာမူ ၁၅ကွက်ဆုတ်ထားရပါက သူသည် ယုန်နက်အားဖမ်းမိသွားပြီဟုဆိုနိုင်ကာ ထိုယုန်နက်မှာ အမှန်တရား၏ ထာ၀ရတွင်းနက်ကြီးထဲ ပြုတ်ကျသွားမည်ဖြစ်သည်။

ထန်မော့ ကြမ်းပြင်ပေါ်တွင် တင်ပလ္လင်ခွေထိုင်နေလိုက်သည်။ သူ၏မျက်လုံးများကို ကျဥ်းမြောင်းလျက် ယခင်က ထိုယုန်ရပ်နေသော ၅၉ကွက်နှင့် ယခုရပ်နေသော ၃ကွက်ကို ကြည့်နေခဲ့လေသည်။

"အခုအလှည့်မှာ ပစ္စည်း၁၆ခုတောင်ရှိတယ်...အကယ်၍ အကုန်လုံးကိုဖယ်ထုတ်နိုင်ခဲ့ရင် ၈စုံဆိုတော့ ၈မှတ်ရမှာပဲ...သူက၄ကွက်ပြန်ဆုတ်ရတာဆိုတော့ ၆စုံမှားပြီး ၂စုံပဲမှန်တာပေါ့... ဒါကြောင့်လေးကွက်ဆုတ်သွားတယ်"

ထန်မော့၏ အမူအယာမှာတည်ငြိမ်နေသော်လည်း အတွေးထဲမှာမူ တွက်ချက်နေခဲ့သည်။

"၁၆ခုထဲမှာ ၃စုံက လွယ်တယ်...အဖြေကလည်း သိသာတယ်... အဲဒါတွေကို မှားစရာအကြောင်းမရှိဘူး...ဒီတော့ ..."

ယုန်နက်မှာလည်း ထန်မော့ကဲ့သို့ အဖြေကိုပေးရန်လက်လျှော့ခဲ့ခြင်းဖြစ်သည်။

၆ချက်မြောက်စည်းမျဥ်းအရ ရှိုးဒင်းဂါးသေတ္တာကိုဖွင့်လိုက်ချိန်တွင် မထုတ်ပယ်ရသေးသော ပစ္စည်းများရှိပါက ၂ကွက်ဆုတ်ရမည်ဟုပင်။

မှန်၏။ ဦးဦးယုန်၏ အမှန်တရားနာရီဂိမ်းတွင် အလွန်ဆုံးပစ္စည်း ၅၈ခုနှင့် အနည်းဆုံး ၂ခုတော့ပါရှိမည်သာ။ မှားယွင်းထုတ်ပယ်မိပါက နောက်သို့ ၁ကွက်ဆုတ်ရမည်ဖြစ်ကာ ထုတ်ပယ်ခြင်းမှန်ကန်ပါက ရှေ့သို့တစ်ကွက်တိုးရမည်ပင်။

အမှန်တရားမှားယွင်းထုတ်ပယ်မှုအပေါ်မူတည်၍ အပြစ်ဒဏ်အဆင့် ၄ခုရှိလေသည်။ ကစားသမားတစ်ဦးက ပစ္စည်း၂ခုကြားမှ အမှန်တရားကို ရှာမတွေ့ခဲ့လျှင် သူတို့ကထင်သည့်အမှန်တရားကို ပြောနိုင်သလို အမှန်တရားကိုပြောရန်လည်း လက်လျှော့နိုင်လေသည်။

အဖြေကိုမသိပဲ ရမ်းသမ်းပြောခြင်းဖြင့် မှန်ကန်နိုင်နှုန်းကား သုညသာဖြစ်သည်။ ၁ကွက်ပြန်ဆုတ်ရသည့်အပြင် အပြစ်ဒဏ်ကိုလည်း အသက်သွင်းမိနိုင်သည်။

အဖြေကိုပေးရန်လက်လျှော့လိုက်ခြင်းက အပြစ်ဒဏ်ကို အသက်မသွင်းမိပဲ ၂ကွက်သာဆုတ်ရမည်ဖြစ်သည်။

ထိုပေါ်လာခဲ့သော ပစ္စည်း ၁၆မျိုးတွင် ထန်မော့မမြင်ဖူးသော အရာ၃ခုရှိလေသည်။ သူအသေအချာစဥ်းစားပြီးမှ အဖြေပေးရန် လက်လျှော့ခဲ့ခြင်းဖြစ်သည်။ အမည်မသိအပြစ်ဒဏ်ကိုခံရမည်ထက် သူနောက်သို့ ၄ကွက်ဆုတ်ရန်ပိုလိုလားသည်။ သူ့အားအံ့အားသင့်စေသည်မှာ ယုန်နက်က အကွက်အများကြီးဆုတ်သွားခြင်းပင်။ ယုန်နက်မှာလည်း ပစ္စည်းများအားလုံးကို မထုတ်ပယ်လိုက်ခြင်းဖြစ်နိုင်သည်။

"ဒါဖြင့်ရင် သူကဘာလို့သိပ်ပျော်နေခဲ့သေးလဲ"

ထန်မော့တိတ်တဆိတ်ရေရွတ်လိုက်သည်။

ပစ္စည်းများကြားမှ ကြာချိန်မှာ ၁၀မိနစ်ဖြစ်သည်။

ပြီးခဲ့သောအလှည့်တွင် ထန်မော့ရော ယုန်နက်ပါ အဆင့်၃ မီးခိုးရောင် အမှားအပြစ်ကို အသက်သွင်းမိခဲ့သည်။ တွင်းနက်ကြီးအား ရင်ဆိုင်ရသည်မှာ ခြေကုန်လက်ပန်းကျလွန်း၍ ၂ဦးလုံးမှာ မည်သည့်စကားမျှထပ်မဆိုဖြစ်ကြချေ၊ ထန်မော့သည် အတွေးတွင် နစ်မြောနေခဲ့၏။ သူသည် ထိုပစ္စည်း၁၆ခုနှင့် ပထမအလှည့်မှ ပစ္စည်း၄ခုကိုပြန်လည်တွေးတောနေခဲ့သည်။

ထိုပစ္စည်းများမှာ နောက်အလှည့်များတွင် ပေါ်မလာနိုင်တော့သော်လည်း ၄င်းတို့ထံမှ အမှန်တရားသဲလွန်စတချို့ကို ရှာဖွေလိုခြင်းပင်။

ဥပမာ ဤတစ်ကြိမ်တွင် ထန်မော့နောက်သို့၂ကွက်ဆုတ်ခဲ့ရသည်။ ဆိုလိုသည်မှာ သူပစ္စည်း၄ခုကို လက်လျှော့လိုက်ခြင်းက သူ့အား ၄ကွက်ဆုတ်စေရမည်ဆိုလျှင် ကျန်၆စုံအား ၆မှတ်အဖြစ် သတ်မှတ်နိုင်သည်။ ထို၆စုံတွင် ထန်မော့သည် ၄စုံကို မှန်အောင်ခန့်မှန်းနိုင်ခဲ့ပြီး ၂စုံကိုမှားယွင်းခဲ့သည်။ ထို့ကြောင့် သူ၂ကွက်ဆုတ်သွားခဲ့သည်။

(0 + 4(အမှန်) – 2(အမှား) – 4(လက်လျှော့) = -2)

(Editor /N ပစ္စည်းက ၁၆ခုဆိုတော့ ၈စုံစာ၊ သူမသိတာက ၃ခု ဆိုတော့ ၂စုံစာ ဖြေဖို့လက်လျော့လိုက်တယ် အဲဒါက ၂ကွက်စာမဟုတ်ဘဲ ၄ကွက်စာ နောက်ထပ် ၆စုံမှာ ၄စုံမှန်တော့ ခုဏ ၄ကွက်နဲ့ကျေ၊ မှားတဲ့ ၂စုံစာတွက် နောက်ဆုတ်ရတာ ..ဟူး မှန်လားတော့မသိဘူး မူးသွားတာပဲ )

သူမှားယွင်းသွားသည့်အရာများကို ရှာဖွေခြင်းက ကျန်အလှည့်များ၌ အမှန်တရားကိုရှာဖွေရာတွင် ပိုမိုလွယ်ကူလာမည်ဟုဆိုလိုခြင်းပင်။

ထန်မော့ လက်ကိုဆန့်လျက် နာရီပေါ်တွင် တစ်ခုခုရေးဆွဲလိုက်သည်။ သူ၏လက်လှုပ်ရှားမှုအောက်တွင် နာရီမှာ အပြာရောင်အလင်းတစ်ခုခပ်ဖျော့ဖျော့လင်းနေခဲ့လေသည်။

ဆန့်ကျင်ဘက်တွင်ရပ်နေသော ယုန်နက်က ထန်မော့အား ဒေါသတကြီးကြည့်နေခဲ့လေသည်။

ထန်မော့က ခေါင်းကိုငုံ့လျက် သူ့အား လျစ်လျူရှူထားသည်ကိုမြင်လျှင် ထူးဆန်းသော အကြည့်တစ်ခု သူ၏မျက်လုံးတို့တွင်ဖြတ်ပြေးသွားခဲ့သည်။

ထန်မော့ကြည့်မနေစဥ်တွင် ယုန်နက်မှာ သက်ပြင်းချလျက် သူ၏ရုပ်ဆိုးဆိုးမျက်နှာပေါ်တွင် ပင်ပန်းသောအမူအရာတစ်ခုဖြတ်ပြေးသွားခဲ့သည်။

စက္ကန့်ပိုင်းအတွင်း ထန်မော့ရုတ်ချည်းမော့ကြည့်လာခဲ့သည်။ ယုန်နက်မှာ ထိတ်လန့်သွားပြီး သူ၏အမူအရာကပျက်ယွင်းသွားခဲ့လေသည်။ ထို့နောက် ပါးစပ်ကိုဖွင့်လျက် ဒေါသတကြီးဟိန်းဟောက်လာခဲ့သည်။

"မင်း မင်း ငတုံးလူသား...ငါမင်းနားကိုလာပြီး မစားနိုင်ဘူးမထင်နဲ့...မင်းနားကိုရောက်တာနဲ့ မျက်လုံးတွေကို ဆွဲထုတ်ပြီး ၀ိုင်နဲ့တို့စားပစ်မယ်"

ထန်မော့မှာ အော်ဟစ်နေသော ယုန်ကြီးကို ကြည့်နေခဲ့လေသည်။ ၄င်းမောပန်းသွားသည်နှင့် ထန်မော့ကတည်ငြိမ်စွာဆိုလိုက်သည်။

"အချိန်ကုန်ခါနီးပြီ"

ယုန်နက်ကြီးမှာ ခတ္တမျှတန့်သွားခဲ့သည်။

"ငါ့ကိုအဲဒါပြောဖို့ကြည့်နေတာလား"

ထန်မော့ကပြန်မဖြေခဲ့ချေ။ အမှန်တရားနာရီ၏အလယ်တွင် အလင်းတန်း၁၂ခုတောက်ပလာခဲ့သည်။ ထန်မော့နှင့် ယုန်နက်တို့ နာရီအလယ်သို့ကြည့်လိုက်ကြပြန်သည်။

တတိယအလှည့်တွင် အမှန်တရားနာရီပေါ်တွင် ပစ္စည်း၁၂ခုပေါ်လာခဲ့သည်။ ထန်မော့ ရှေ့သို့၂ကွက်တိုးလျက် ယုန်နက်မှာ ၃ကွက်တိုးလာခဲ့သည်။ ဤတစ်ကြိမ်တွင် ယုန်နက်က သူ့ထက် ၁ကွက်သာသွားပြီး ထန်မော့နှင့်၄င်းကြားမှ အကွာအဝေးမှာ ၂၉ကွက်သာရှိတော့သည်။

ယုန်နက်ကြီးမှာ သွားဖြဲလျက်ရယ်လိုက်သည်။

"ဟိတ် ငါမင်းကို အမီလိုက်လာပြန်ပြီနော်"

ထန်မော့ ဂရုမစိုက်ချေ။ သူသည်ကြမ်းပြင်ကိုစိုက်ကြည့်လျက် သူထုတ်ပယ်ခဲ့သော ပစ္စည်း၆ခု၏ အမှန်တရားကို တွေးတောနေခဲ့လေသည်။ သူသည်၄ခုကိုမှန်ခဲ့ပြီး ၂ခုကိုမှားခဲ့သည်။ ၄မှတ်ရပြီး ၂မှတ်လျော့ခြင်းပင်။

"ဘယ် ၂စုံကမှားသွားတာလဲ"

ထန်မော့ ထိုယုန်နက်အား ဒေါသထွက်အောင် ဆွခြင်းက အကျိုးသက်ရောက်မှုအနည်းငယ်ရှိကြောင်း တွေ့ရှိခဲ့ပြီးဖြစ်သည်။ ထိုယုန်မှာမြင်ရသလောက် တုံးအပုံမပေါ်ချေ။ အရေးကြီးသောအချိန်တွင် ၄င်းမှာပြဿနာကို တည်တည်ငြိမ်ငြိမ်နှင့်တွေးခေါ်ကာ ဂိမ်းကိုဖြေရှင်းနိုင်သည်။ ထန်မော့အသာစီးယူနိုင်သော တစ်ခုတည်းသော စည်းမျဥ်းမှာ အမှန်တရားကို အနက်ရောင်မျှော်စင်မှ အသိအမှတ်ပြုထားခြင်းနှင့် အမှန်တရားနာရီတွင် အနိုင်ရရှိသူ တစ်ယောက်သာရှိရခြင်းပင်ဖြစ်သည်။

အကယ်၍ အနက်ရောင်ယုန်သေသွားခဲ့လျှင် သူသည်ဤဂိမ်းကိုရှင်းနိုင်ပြီဖြစ်သည်။

ထန်မော့၄င်းကိုတွေးလျက် ယုန်နက်အားကြည့်လိုက်သည်။ ထိုယုန်နက် မည်သည်ကိုတွေးနေသည်အား သူမသိချေ။

ထန်မော့ ရုတ်တရက်မော့ကြည့်လာသည်ကိုမြင်၍ လန့်သွားခြင်းလည်းဖြစ်နိုင်သည်။ တစ်လှည့်နှင့်တစ်လှည့် ၁၀မိိနစ်စီနားတိုင်းတွင် ၄င်းမှာထန်မော့အား ဒေါသတကြီးစိုက်ကြည့်နေပြီး ၄င်း၏အတွေးတို့ကိုမသိသာစေရန် ကြိုးစားနေခဲ့သည်။

လူတစ်ယောက်နှင့် ယုန်တစ်ကောင်မှာ တစ်ယောက်ကိုတစ်ယောက်စိုက်ကြည့်နေခဲ့ကြလေသည်။ ၁၀မိနစ်ကျော်လွန်သွားပြီးနောက် မရေတွက်နိုင်သော အလင်းတန်းများက နာရီပေါ်တွင်ပေါ်လာခဲ့လေသည်။ ထန်မော့မှာ နာရီပေါ်မှ ပစ္စည်းများကို မြင်လျှင် အံ့အားသင့်သွားခဲ့ရသည်။ ထို့နောက် အမှန်တရား၏ နာရီမှ ခံစားချက်မဲ့သော လေသံဖြင့်ဆိုလာခဲ့သည်။

"အချိန် သုညနာရီ ၄၀မိနစ် တည်နေရာ အမှန်တရားနာရီ အမှန်တရားကြွယ်၀သော ပစ္စည်း၄၈ခုပေါ်ထွက်လာပါပြီ"

"တစ်မိနစ်ပြီးနောက် သုညကစားသမားနှင့် ကစားသမား၆ ကျေးဇူးပြုပြီး အမှန်တရားများကို ပယ်ထုတ်ပေးပါ"

ထန်မော့"..."

ယုန်နက်"..."

သေစမ်း...

ရှည်လျားသော စက္ကန့်လက်တံမှာရွေ့လျားသွားလျက် ထန်မော့မှာ အချိန်မဖြုန်းတော့ပဲ နာရီပေါ်မှပစ္စည်းများကို အလျှင်အမြန်ကြည့်လိုက်တော့သည်။

စည်းမျဥ်းတွင်ဖော်ပြထားခဲ့သလိုပင် ၂~၅၈ အထိရှိသော ပစ္စည်းများမှာ နာရီပေါ်တွင်ပေါ်လာနိုင်လေသည်။ ထန်မော့မှာ ပစ္စည်း၅၈ခုလုံးအား ကစားသမားအနေနှင့် ထိုပစ္စည်းများကြားမှ ဆက်နွယ်မှုကို ဖော်ထုတ်နိုင်လိမ့်မည်မဟုတ်ဟု ထင်ခဲ့သည်။ သူသည်ဤမျှများပြားသော ပစ္စည်းများကို ရုတ်ချည်းရင်ဆိုင်ရမည်ဟု မထင်ထားမိချေ။ ထို့အပြင် သူတို့မှာ အချိန်၁မိနစ်သာရသည်။

ထန်မော့၏ ဦးနှောက်မှာ အခိုးထွက်မတက် လည်ပတ်နေပြီး နဖူးတွင် အပြာရောင်သွေးကြောများထင်လာခဲ့သည်။ သူ၏မျက်နှာ နီရဲလာပြီး သူ၏ဦးနှောက်ထဲမှ အာရုံကြောများ တဒုတ်ဒုတ်ခုန်နေသည်ကိုပင် ခံစားမိသည်။ အချိန်ပြည့်သွားသည်နှင့် ထန်မော့၏နှုတ်ခမ်းတို့မှာတုန်ရီလျက် အက်ကွဲနေသော အသံဖြင့်ဆိုလိုက်သည်။

"ပထမအတွဲက ရာဘာကြိုးနဲ့ တာယာ သူတို့၂ခုလုံးက ရာဘာပစ္စည်းတွေ...သူတို့၂ခုကလွဲရင်ကျန်တဲ့ ၄၆ခုလုံး ရာဘာနဲ့လုပ်ထားတာမပါဘူး"

သူ၏ရှတသောအသံမှာ ခြောက်သွေ့အက်ကွဲနေခဲ့ပြီး ထန်မော့မှာ ဦးနှောက်၏လုပ်ဆောင်ချက် အဆုံးအထိ ရောက်ရှိသွားသလိုခံစားရလေသည်။

သူအလွန်ပင်ပန်းနေခဲ့သည်။

အမှန်တရားနာရီတွင် သူသည် Aနှင့် Bကြားမှ အမှန်တရားကိုရှာဖွေပြီးမှ ၄င်းကိုထုတ်ပယ်နိုင်မည်ဖြစ်သည်။ ဥပမာ ရာဘာကြိုးနှင့်တာရာတို့မှာ ၄၈ခုသော ပစ္စည်းများထဲတွင် ၂ခုတည်းသော ရာဘာပစ္စည်းများဖြစ်လေသည်။ သို့သော်ကျန်၄၆ခုသော ပစ္စည်းများထဲတွင် ရာဘာကြိုးနှင့် ကြိုးခွေမှာ ၂ခုလုံး ကြိုးများဖြစ်သည်ဟူသော အချက်ဖြင့် ပယ်ထုတ်နိုင်သေးသည်။ တာယာနှင့် စတီရင်ယာတိုင်မှာ၄င်း ၂ခုလုံးမှ ကားအစိတ်အပိုင်းများဖြစ်သည်ဟူသော အချက်ဖြင့်ပယ်ထုတ်နိုင်လေသည်။

ထန်မော့မှာ ရာဘာနှင့် တာယာကိုဖယ်ထုတ်လိုက်ပြီးနောက် ကြိုးခွေနှင့် စတီရင်ယာတိုင်တို့ကိုထုတ်ပယ်၍မရတော့ချေ။ ထိုနှစ်ခုကို ထုတ်ပယ်မရတော့၍ ထန်မော့ ၂ကွက်ဆုံးရှုံးရပေမည်။

ထန်မော့မှာ အချိန်၁မိနစ်အတွင်း စဥ်းစားရန်လိုအပ်သည်တို့ အလွန်များပြားနေခဲ့သည်။ ပစ္စည်းတစ်ခုကိုကြည့်လျက် ကျန်ပစ္စည်းများနှင့် နှိုင်းယှဥ်ရသည်။ ထန်မော့မှာ ရာဘာကြိုးကိုမြင်လျှင် တာယာတင်မကပဲ ကျန်ပစ္စည်းများနှင့်လည်း တွဲ၍စဥ်းစားရသည်ပင်။

"၂၂စုံမြောက်အတွက်က ဖန်စတွေရယ် မှန်ရယ်... ဖန်စတွေက မှန်နဲ့အတူတူပဲ ဒီ၂ခုကလွဲရင် ကျန်တဲ့ပစ္စည်းတွေမှာ မှန်နဲ့တူတဲ့ ပစ္စည်းမပါဘူး...ကျန်တဲ့ပစ္စည်း၄ခုကိုတော့ လက်လျှော့မယ်"

အပြာရောင်နံရံ တဖြည်းဖြည်းမြောက်တက်သွားပြီး နောက် သူ ဆန့်ကျင်ဘက်မှ ယုန်နက်ကြီးကို ကြည့်လိုက်လေသည်။ ယုန်နက်ကြီး၏ အခြေအနေမှာလည်း သိပ်မကောင်းလှချေ။

ယုန်နက်ကြီး၏ မျက်လုံးများမှာ နီရဲနေပြီး အသက်ကို ပြင်းစွာရှူနေခဲ့သည်။ ၂ဦးသား နာရီ၏အစွန်း၂ဖက်ကိုဖြတ်လျက် ၁ဦးကို၁ဦးကြည့်နေခဲ့ကြလေသည်။ ထို့နောက် ကြေညာသံကို ကြားလိုက်ရလေသည်။

"သုညကစားသမားက အဆင့်၂ တစ်ပါတ်ရိုက်ခြင်း အမှားကို အသက်သွင်းမိပြီး ကစားသမား၆ကတော့ အဆင့်၃ မီးခိုးရောင်အမှားအပြစ်ကို အသက်သွင်းမိပါသည်"

"သုညကစားသမား ကျေးဇူးပြု၍ ၁၀ကွက်ဆုတ်ပြီး ကစားသမား၆က ရှေ့ကို ၇ကွက်တိုးပေးပါ"

ထန်မော့၏ မျက်လုံးတို့ တဖြည်းဖြည်း ၀ိုင်းစက်သွားခဲ့သည်။ သူ၏ခြေထောက်အောက်မှ နာရီလက်တံမှာ ရွေ့လျားသွားပြီး ၂၄ကွက်တွင်ရပ်တန့်သွားခဲ့သည်။ ယုန်နက်ကြီး၏ ခြေထောက်အောက်မှ မိနစ်လက်တံမှာလည်း ရွေ့လျားသွားလျက် ၁၀ကွက်မြောက်တွင် ရပ်တန့်သွားခဲ့လေသည်။

ယုန်နက်ကြီး၏ အမူအရာ လွန်စွာပျက်ယွင်းသွားခဲ့သည်။ ၄င်းက ထန်မော့ကို ထိတ်လန့်မှုတစ်၀က် တုန်လှုပ်မှုတစ်၀က်ဖြင့်ကြည့်လာခဲ့ပြီး ခန့်မှန်းရခက်သော အမူအရာမျိုးကိုပြုလုပ်လာခဲ့လေသည်။

ယုန်က အံကိုကြိတ်လျက် ကြမ်းပြင်ကိုဆောင့်ကာ ဆယ်ကွက်သို့ ရွေ့သွားခဲ့သည်။

ထန်မော့ အတွေးများဖြင့် ၂၄ကွက်သို့လျှောက်သွားလိုက်လေသည်။

သူတို့၂ဦးသား ပြစ်ဒဏ်ကိုယ်စီ လက်ခံလိုက်ရသည်။

ကြားမှ အကွာအဝေးမှာလည်း ၁၄ကွက်သို့ တစ်ခါတည်း လျော့ကျသွားခဲ့လေသည်။

နောက်ထပ် ၂လှည့်တွင်မူ နာရီပေါ်၌ ပစ္စည်းများစွာပေါ်မလာတော့ချေ။ ယုန်နက်မှာလည်း ယခင်တစ်ခေါက်ကလို ၁၀ကွက်မဆုတ်ရတော့ချေ။ ထိုအစား ထန်မော့နှင့် သူ့ကြားမှ အကွာအဝေးမှာ ၁၉ကွက်အထိပြန်တိုးသွားခဲ့သည်။ ၆လှည့်မြောက် ပစ္စည်းများပေါ်လာချိန်တွင် ထန်မော့အကွက်၂၀ပေါ်တွင် ရပ်နေပြီး ယုန်နက်က ပထမကွက်တွင်ရပ်နေခဲ့သည်။

အမှန်တရား၏ နာရီမှ ကြေညာလာခဲ့သည်။

" အချိန် ၁နာရီ သုညမိနစ် တည်နေရာ အမှန်တရားနာရီ အမှန်တရားကြွယ်၀သော ပစ္စည်း၄ခုပေါ်ထွက်လာပါပြီ"

"တစ်မိနစ်ပြီးတာနဲ့ သုညကစားသမားနဲ့ ကစားသမား၆ ကျေးဇူးပြုပြီး အမှန်တရားကို ပယ်ထုတ်ပေးကြပါ"

ဤတစ်ကြိမ်ပေါ်ထွက်လာသော ပစ္စည်းများမှာ ခက်ခဲသောအမှန်တရားများကြွယ်၀ပြီး တစ်ခုချင်းစီကြားမှ ကွဲပြားသော အမှန်တရားကိုရှာရန် ပို၍ခက်ခဲမည်ပင်။ ထန်မော့ ထိုပစ္စည်း၄ခုကို တည်ငြိမ်စွာကြည့်လျက် စူးစမ်းရန်အသင့်ဖြစ်နေခဲ့သည်။ ထိုစဥ် တဖက်ခြမ်းမှ အသံတစ်ခုကိုကြားလိုက်ရလေသည်။

"အိုး...ဒီဟာက မြေအောက်ကမ္ဘာမှာ ရောင်းအကောင်းဆုံး ခိုး၀င်သူသား ပေါင်မုန်မီးကင်ပဲ"

ယုန်နက်၏အသံ ရုတ်တရက်တန့်သွားလျက် ၄င်းမှာတောင့်တင်းသွားပုံပင်။

ထန်မော့မျက်ခုံးအသာပင့်လိုက်မိသည်။ သူက ထိုယုန်နက်မှာ ထိုအချက်အလက်ကိုထုတ်ဖော်လာလိမ့်မည်မထင်ထားချေ။

သူ ယုန်နက်ကို တိတ်တဆိတ်ကြည့်နေခဲ့လေသည်။ ယုန်နက်ကြီး၏မျက်နှာတွင် အမူအရာမျိုးစုံ ဖြတ်ပြေးသွားလျက် အဆုံးတွင် နံရံကို ဒေါသတကြီး ၀င်တိုက်လိုက်သည်။

"အား ငါမင်းကို စားချင်တယ်...စားပစ်မယ်"

၄င်းက ဒေါသူပုန်ထနေသော ယုန်တစ်ကောင်၏ ပုံစံပင်။

🌍

Prev Next