MM Story Teller

Chapter 185

Viewers 33k

🌍Chapter 185

၃ယောက်သား ထိုအလောင်းများကို ရှာဖွေခြင်းပြီးဆုံးသွားခဲ့သည်။ လက်နက်နှင့် အကူပစ္စည်းအနည်းငယ်မှလွဲလျှင် ပေါင်မုန့်ဟုရေးထားသော ထူးဆန်းသည့်စာရွက်တစ်ရွက်ကိုသာ သူတို့ရှာတွေ့ခဲ့လေသည်။

ဖူ၀မ်သော် အဆုံးတွင် ဓါတ်ဆီဆိုင်၏ ထောင့်တစ်ထောင့်မှ ဓါတ်ဆီတစ်ဘူးကိုရှာတွေ့ခဲ့ပြီး ကားထဲဖြည့်လိုက်လေသည်။

အပြင်ဘက်တွင် မိုးစက်များတဖန်ကျလာပြီး မှန်မျက်နှာပြင်ကို လာရောက်ရိုက်ခတ်နေကြသည်။ ထန်မော့ပြတင်းပေါက်အနီးသို့သွားလျက် ပတ်၀န်းကျင်ကို ဂရုတစိုက်ကြည့်လိုက်လေသည်။ အပြင်ဘက်တွင်မည်သူမျှမရှိဟု အတည်ပြုပြီးနောက် သူ လိုက်ကာကို ဆွဲချလိုက်တော့သည်။

ဖူ၀မ်သော်သည် ဆော့ပင်တစ်ချောင်းဖြင့် ပေကျင်း၏မြေပုံအကြမ်းကို white broadပေါ်တွင် ရေးဆွဲလိုက်သည်။ ထို့နောက် အထင်ကရအဆောက်အဦးတချို့ကို အမှတ်အသားပြုလုပ်ထားခဲ့လေသည်။ သူသည်တားမြစ်မြို့တော်နေရာတွင် တြိဂံတစ်ခုကိုရေးဆွဲလိုက်ပြီး အနောက်မြောက်ထောင့်ချိုးတွင်လည်း တြိဂံတစ်ခုကိုထပ်မံရေးဆွဲလိုက်သည်။ ထိုတြိဂံ၏ဘေးတွင် သူကစာလုံးတချို့ကို ရေးဆွဲထားခဲ့သည်။

ယန်ရှင်း ခရိူင်

"ပုံမှန်ဆို စတုရန်း ၁၀၀၀၀ကီလိုမီတာစီတိုင်း အနက်ရောင်မျှော်စင်တစ်ခုရှိတယ်။ ပေကျင်းမှာ အနက်ရောင်မျှော်စင်၂ခုရှိတယ်။ တစ်ခုက တားမြစ်မြို့တော်မှာ နောက်တစ်ခုက ပေကျင်းရဲ့အနောက်မြောက်ဘက် ယန်ရှင်းခရိုင်မှာ"

ဖူ၀မ်သော်ကဆိုသည်။

"ကိုယ်တို့အခုရောက်နေတာက တောင်ပိုင်းသာ့ရှင်း ခရိုင် ပေကျင်းရဲ့ ၁၇လမ်းမှာပဲ။ ကိုယ့်အိမ်က တားမြစ်မြို့တော်ဘေးမှာ ရှောင်ရှန်းကတော့ သုန်ချန်းခရိုင်မှာနေတယ်။ လွန်ခဲ့တဲ့၅လက ကိုယ်သူ့အိမ်ကိုသွားခဲ့ပေမယ့် ဘယ်သူ့ကိုမှ မတွေ့ခဲ့ရဘူး။ ဒါကြောင့် ကိုယ်သေချာမရှာခဲ့တော့ဘူး။ ဒီဟာကကိုယ်တို့သွားမယ့်နေရာ"

ဖူ၀မ်သော်သည် သုန်ချန်းခရိုင်ထဲတွင် စက်၀ိုင်းလေးတစ်ခုကို ရေးဆွဲ လိုက်သည်။

ကမ္ဘာကြီးအွန်လိုင်းပေါ်မတက်မီက ထန်မော့သည် တားမြစ်မြို့တော်၏အပေါ်မှ ပေကျင်း၏ အနက်ရောင်မျှော်စင်ကို တီဗွီထဲမှ တဆင့်မြင်ဖူးခဲ့သည်။ ပေကျင်းမှာ စတုရန်း ကီလိုမီတာ ၁၀၀၀၀ထက် ကျယ်၀န်းသည်မို့ အနက်ရောင်မျှော်စင် ၂ခုရှိလေသည်။

ထန်မော့၏ အကြည့်များမှာ ဖူ၀မ်သော် ရေးဆွဲလိုက်သော စက်၀ိုင်းလေးပေါ် အာရုံစူးစိုက်နေခဲ့သည်။

ဖူ၀မ်ရှန်းကမပြောပဲမနေနိုင်ခဲ့။

"ထျန်းရွှမ်အဖွဲ့က အစ်ကိုထန်မော့ကို ပစ်မှတ်ထားပြီး ကျွန်တော်တို့ကို သတ်ချင်နေမှတော့ ကျွန်တော်တို့မြို့ထဲကို ၀င်စရာမလိုဘူးလေ။ သူတို့က သုန်ချန်းနဲ့အရမ်းနီးတဲ့ ချောင်းယန်ခရိုင်ထဲမှာပဲ။ ကျွန်တော်ကတော့ ကျွန်တော့်မိဘတွေသာ အသက်ရှိသေးရင် Geကိုကျိန်းသေလာရှာမှာလို့ထင်တာပဲ၊ အခုတော့ ဘာသတင်းမှလည်း မကြားရဘူးလေ။ ဒါကြောင့်ပေကျင်းကိုသွားစရာမလိုပါဘူး"

ဖူ၀မ်သော်က ထိုကလေးကို ငုံ့ကြည့်လိုက်သည်။

"မင်းအိမ်ကိုသွားမကြည့်ချင်ဘူးလား"

ဖူ၀မ်ရှန်းခေါင်းကိုခါယမ်းလိုက်သည်။

"ဟင့်အင်း အချိန်တွေလည်းကြာလှပြီ ကျွန်တော့်အဖေနဲ့အမေမရှိတော့ဘူးဆိုတာ ကျွန်တော်သိပါတယ်"

ဤကလေးမှာ ထန်မော့နှင့်ဖူ၀မ်သော်နှင့်အတူ ပေကျင်းကို လိုက်လာခဲ့သည်။ သူ၏အမျိုးနောက်ကိုလိုက်လာသည်လည်းပါသလို သူ၏အိမ်ကိုလည်း သွားကြည့်ချင်ခဲ့သည်။ ဖူ၀မ်သော်မှာ အလျင်လိုနေခဲ့သည်ဖြစ်၍ အသေအချာရှာမကြည့်ခဲ့ရချေ။ ဖူ၀မ်ရှန်းမှာ သူကိုယ်တိုင်ရှာမကြည့်ရသေးသ၍ လက်မလျှော့ချင်ခဲ့ပေ။ ၄င်းမှာ ၈၀မှ ၉၀ရာခိုင်နှုန်းအထိ မိမိ၏သူငယ်ချင်းမရှိတော့သည်မှာ သေချာသော်လည်း ထန်မော့ပေကျင်းကို ရောက်လာခဲ့သလိုမျိုးပင် ။

ထျန်းရွှမ်မှာ ပေကျင်းတွင် အသန်မာဆုံးအဖွဲ့အစည်းဖြစ်သည်။ ထန်မော့ကို သတ်လိုသောအကြောင်းပြချက်က ဘာကြီးပင်ဖြစ်နေဖြစ်နေ ပေကျင်းမှာ အလွန်အန္တရာယ်များသောနေရာပင်။

ဓါတ်ဆီဆိုင်၏ white boardမှာ ယခင်က နေ့စဥ် ဓါတ်ဆီစျေးများကိုရေးသားဖော်ပြထားခြင်းပင်။ ဖူ၀မ်သော်က ၄င်းကိုအသုံးပြုလို၍ ဖူ၀မ်ရှန်းက ထိုအပေါ်မှ စာလုံးများကို ဖျက်ပစ်ခဲ့သည်။ ယခုစာလုံးများထပ်မဆန့်တော့သည်မို့ ဖူ၀မ်ရှန်းမှာ ဘောဖျက်တစ်ခုဖြင့် ထပ်ဖျက်တော့သည်။

ထန်မော့ ထိုကလေး၏ကျောပြင်ကိုကြည့်လျက် ဆိုလိုက်သည်။

"ငါတို့ပေကျင်းကိုဆက်သွားရမှာပဲ"

ဖူ၀မ်ရှန်းမှာ အံ့အားသင့်လျက် လှည့်ကြည့်လာခဲ့သည်။

"Geပြောတာက ထျန်းရွှမ်က ဒီ၄လအတွင်း အများကြီး အင်အားကြီးလာလောက်တယ်တဲဲ့။ သူတို့ရဲ့ခေါင်းဆောင်ကလည်း ဒုတိယထပ်ကို ခက်ခဲမှုအဆင့်နဲ့ရှင်းထားတာလေ"

သူတို့မှာ အမှန်တကယ်သန်မာလွန်းလှသည်။

ထန်မော့ ဖူ၀မ်ရှန်းကိုကြည့်လိုက်ကာ

"မင်းကမင်းရဲ့ဆွေမျိုးတွေကိုရှာရုံတင်မဟုတ်ဘူး၊ ဘယ်နေရာမှာလည်းဆိုတာကို အတည်ပြုချင်ခဲ့တယ်မလား၊ ငါလည်းငါ့သူငယ်ချင်းကိုရှာနေတာ၊ အဲဒါကြောင့်လည်းပေကျင်းကိုလာခဲ့တာ။ သူတို့ကငါ့ကိုအလစ်တိုက်နိုင်တယ်ဆိုမှတော့ ငါ့ကိုခြေရာခံနိုင်တဲ့နည်းတစ်နည်းရှိနေမှာပဲ။ ငါဘယ်ကိုသွားသွား သူတို့လိုက်နိုင်မှာပဲ။ ဒါပေမယ့် သူတို့အသာစီးရလိမ့်မယ်လို့လည်း မသေချာဘူးလေ၊ သူတို့က ဖူ၀မ်သော်က ငါ့အသင်းဖော်လို့မှ မသိကြတာ၊ ပြီးတော့ဖူ၀မ်ရှန်းလည်းရှိသေးတာပဲ"

လွန်ခဲ့သည့်လေးလက ဖူ၀မ်သော်မှာ ထျန်းရွှမ်အဖွဲ့ခေါင်းဆောင်နှင့် ထိပ်တိုက်တွေ့ခဲ့ပြီး သဘောတူညီမှုတစ်ခုထားခဲ့သည်။ အကယ်၍ ဖူ၀မ်သော်နှင့်ရင်ဆိုင်ရမည်ဟု ကြိုသိခဲ့ပါ ထိုလေးယောက်ကို လွှတ်ခဲ့မည်မဟုတ်ချေ။ ထိုခိုး၀င်သူလေးယောက်တွင် အချိန်နောက်ပြန်လှည့်နိုင်သော စွမ်းရည်ရှိပြီး လွတ်လွတ်ကျွတ်ကျွတ်ပြန်ဆုတ်ကောင်းဆုတ်နိုင်လိမ့်မည်။ သို့သော် ၄င်းမှာ ထန်မော့၁ဦးတည်းအပေါ်သာမူတည်၍ တွက်ချက်ထားခြင်းဖြစ်လေသည်။ အကယ်၍ သူ၏အသင်းဖော်မှာ ဖူ၀မ်သော်ဖြစ်ကြောင်း သိခဲ့ပါက ထိုမျှ လွယ်လွယ်ကူကူလှုပ်ရှားခဲ့လိမ့်မည်မဟုတ်ချေ။

သူသည်ပေကျင်းမှ ပြန်မဆုတ်ပဲ မြို့ထဲ၀င်ရန်ဆုံးဖြတ်လိုက်သည်ဖြစ်၍ ၃ယောက်သား လမ်းကြောင်းကိုစတင်ဆွေးနွေးရတော့သည်။

"ချောင်းယန်ခရိုင်က သူတို့ရဲ့နယ်မြေပဲ အဲဒါကြောင့်ရှောင်သွားရမယ်။ အဲဒီအစားသုန်ချန်းခရိုင်ကိုအနောက်ကနေ၀င်မယ်"

ဖူ၀မ်သော်၏ သံလိုက်နှယ်ဆွဲငင်အားကောင်းလှသော အသံမှာ ဓါတ်ဆီဆိုင်ထဲတွင် ညင်သာစွာ ပဲ့တငွထပ်နေခဲ့သည်။

တဖြည်းဖြည်းမှောင်လာပြီး မိုးမှာလည်း အခုချိန်မှ ရပ်တန်သွားလေသည်။ သူတို့နောက်တစ်နေ့မှ ခရီးဆက်ရန် ဆုံးဖြတ်လိုက်သည်။ ဖူ၀မ်ရှန်းလည်း ရေသန့်ဘူးအလွတ်တချို့ကိုယူလျက် တဖက်သို့ပြေးသွားလိုက်သည်။ ဖူ၀မ်သော်မှာတော့ ပေကျင်းကိုရောက်ရှိပြီးနောက် ကြုံတွေ့ရမည့် အခြေအနေတို့ကို တွေးတောနေခဲ့လေသည်။ သူသည်ကြမ်းပြင်သို့ငုံ့ကြည့်နေရာမှာ သူ၏ရှေ့မှ အလင်းရောင်ကို တစ်စုံတစ်ယောက်က ကွယ်ရပ်လိုက်သည်။ ဖူ၀မ်သော်မော့ကြည့်လိုက်မိသည်။

ထန်မော့မှာ ထိုအမျိုးသား၏ရှေ့တွင် ရပ်လျက် သူ၏ညာဘက်လက်မှာ အိတ်ကပ်ထဲထိုးထဲထားရင်း ပတ္တမြားခဲကို ပွတ်သပ်နေမိသည်။

ဖူ၀မ်သော် မျက်ခုံးအသာပင့်လိုက်သည်။

"မင်းတစ်ခုခုလုပ်ဖို့ အပြင်ကိုသွားရမယ်ဟုတ်"

သူ၏လေသံမှာ အလွန်သေချာနေမှုနှင့် ရယ်မြူးရိပ်တချို့ ရောယှက်နေခဲ့သည်။

ထန်မော့သူ၏ပတ္တမြားခဲကို ထိနေရင်း ဖူ၀မ်သော်အား မည်သို့ပြောရမလဲဟုစဥ်းစားနေစဥ် ထိုလူ၏မှတ်ချက်ကိုကြားလိုက်ရပြီး စကားမဲ့သွားမိသည်။

"..."

ခတ္တမျှကြာပြီးနောက် ထန်မော့တည်ငြိမ်စွာဆိုလိုက်သည်။

"အပြင်ကိုအတူသွားရအောင်"

ဖူ၀မ်သော် "?"

"ခင်များကို ပြောစရာတစ်ခုရှိတယ်"

ဖူ၀မ်သော်၏မျက်နှာတွင် အံ့အားသင့်သောအမူအယာလေးတစ်ခုဖြတ်ပြေးသွားပြီးနောက် သူ၏နှုတ်ခမ်းတို့တွန့်ကွေးသွားခဲ့သည်။ ထို့နောက် သူတို့အတူ ဓါတ်ဆီဆိုင်ဘေးမှ ဂိုထောင်လေးတစ်ခုဆီ ၀င်ရောက်လာခဲ့ကြသည်။

ဤသည်မှာ တိုင်ကီအလွတ်များသိမ်းဆည်းထားသောနေရာဖြစ်ပုံပင်။ ပုံးများနှင့်ပြည့်နှက်နေပြီး လူ၂ဦးအတွက် ရပ်နေစရာ စတုရန် ၂မီတာအပြင်မရှိချေ။ နံရံပေါ်တွင် ပြတင်းပေါက်လေးတစ်ခုရှိပြီး လရောင်မှာ ထိုပြတင်းပေါက်မှတဆင့် ဖြာကျလျက် ကြမ်းပြင်ပေါ်တွင် အဖြူရောင်အလင်းကွက်တစ်ခုကို ထင်ဟပ်နေစေခဲ့သည်။

ဖူ၀မ်သော် ထန်မော့အားကြည့်လိုက်သည်။

"ဘာပြောမလို့လဲ"

ထန်မော့လိုရင်းကိုတန်း၍ဆိုလိုက်သည်။

"ခင်များပေကျင်းကိုဘာလို့သွားတာလဲ"

ဖူ၀မ်သော် ခတ္တမျှတိတ်ဆိတ်နေပြီးမှ

"ကိုယ်ကနက်ရောင်မျှော်စင်ရဲ့သဲလွန်စတွေကိုရှာနေတာလေ"

ထန်မော့မှာ ၄င်းကိုခန့်မှန်းမိပြီးသားပင်။ လွန်ခဲ့သည့်၃လက ဖူ၀မ်သော်မှ ပေကျင်းမှ ရှန်ဟိုင်းအထိ တကူးတကလာခဲ့သည်။ သူသည်မိုင်ပေါင်းထောင်ချီ ခရီးဆက်လာခဲ့သည်ဖြစ်၍ အပျော်လာရုံသက်သက်တော့မဟုတ်နိုင်ချေ။ ရှန်ဟိုင်းကိုရောက်ရှိပြီးနောက်သူ တစ်ခုကိုသာ လုပ်ခဲ့သည်။ ၄င်းမှာ တိုက်အဖွဲ့အစည်းကိုရှာဖွေပြီး လော့ဖုန်းချန်းကိုတွေ့ခဲ့ခြင်းပင်။ ထို့နောက်၂ဦးသားသတင်းများဖလှယ်ခဲ့ကြသည်။

သူတို့(ဖူ၀မ်သော်နှင့်လော့ဖုန်းချန်း)ထိုသို့ပြောနေစဥ်အတွင်း ထန်မော့မှာ တံခါးအပြင်ဘက်တွင်ရပ်နေခြင်းဖြစ်သည်။ သူသည်အတွင်းမှ ပြောနေသည်တို့ကို မကြားနိုင်သော်လည်း ဖူ၀မ်သော်၏ ရှန်ဟိုင်းသို့ရောက်လာသော ရည်ရွယ်ချက်မှာ အနက်ရောင်မျှော်စင်၏ ဆန်းကြယ်မှုနှင့်ပါတ်သတ်နေမှန်း ခန့်မှန်းမိပြီးသားဖြစ်သည်။

"လွန်ခဲ့တဲ့ ၄လက အနက်ရောင်မျှော်စင် ပေကျင်းသုတေသနစင်တာမှာ ကိုယ် e mailတစ်ခုကိုတွေ့ခဲ့တယ်လေ နို၀င်ဘာ ၁၇ရက် ညနေမှာ ရှန်ဟိုင်း စင်တာ ထူးဆန်းတဲ့အခြေအနေနဲ့ လူနာတွေကိုတွေ့ထားတယ်လို့ emailပို့ခဲ့တယ်လေ။ အဲဒလူနာလေးယောက်က နှလုံးခုန်အရမ်းမြန်တဲ့အပြင် စိတ်အခြေအနေလည်းမတည်ငြိမ်ပဲ ကိုယ့်ကိုယ်ကိုယ်လည်းထိခိုက်အောင် လုပ်တယ်ဆိုတာပေါ့။"

ဖူ၀မ်သော် ထန်မော့အား ကြည့်လိုက်သည်။

"ရှန်ဟိုင်း သုတေသနစင်တာက ပေကျင်းထက် ပိုအဓိကကျတယ်။ ပေကျင်းမှာရှိတဲ့ dataအများစုကရှန်ဟိုင်းကပို့ထားတာတွေပဲ။ ဒါကြောင့် ကိုယ်သဲလွန်စရှာဖို့ ရှန်ဟိုင်းကိုသွားခဲ့တာ"

သို့ဆိုပါက ဤလူမှာအီးမေးတစ်စောင်ကြောင့်ရှန်ဟိုင်းကိုရောက်လာခြင်းပင်။ ထန်မော့ကမေးလိုက်သည်။

"ဒါဆို အခုဘာလို့ ပေကျင်းကိုပြန်သွားတာလဲ"

"ဒေါက်တာလော့က သူသိသမျှdataအကုန် ကိုယ့်ကိုပြောခဲ့တယ်။ ဘာမှအရေးကြီးတာတွေမပါဘူး အရေးကြီးတာတွေကိုတော့ မင်းလည်းသိပါတယ်။ ဒါပေမယ့် အရေးကြီးတဲ့ တခြားတစ်ချက်ကိုလည်း သူပြောခဲ့ပါသေးတယ်။ နို၀င်ဘာ၁၅ရက်တုန်းက အိမ်ဖြူတော်က ပေကျင်းစင်တာကို အရေးကြီး သတင်းတစ်ခုပို့ခဲ့တယ်။ ၁၇ရက်နေ့မှ အမေရိကက ပညာရှင်၂ယောက်က သတင်းဖလှယ်ဖို့လာကြမှာ။ ဒီသတင်းရဲ့လျို့၀ှက်မှုကမြင့်လွန်းလို့ လော့ဖုန်းချန်းမှာတောင် တိုက်ရိုက်လက်ခံခွင့်မရှိဘူး။ ဒါပေမယ့်လည်း အဲဒီ researcher၂ယောက် ဘယ်မှာနေလဲဆိုတာတော့သူသိတယ်"

ထန်မော့ချက်ချင်းနားလည်သွားခဲ့သည်။

"ဒါဆို ခင်များက ဒီသတင်းကိုလိုက်ရှာနေတာပေါ့"

ဖူ၀မ်သော် ပြန်မဖြေခဲ့ချေ။ သူကကျဥ်းမြောင်းသော တံခါးဘက်ကိုလှည့်လျက် အဝေးမှ အနက်ရောင်မျှော်စင်ကြီးကို ငေးကြည့်နေခဲ့သည်။

"၁၇ရက်နေ့မှာ ကိုယ်က အထူးအဆင့် အစည်အဝေးကိုတက်ခဲ့ရတယ်။ အဲဒီအမေရိကက ရောက်လာတဲ့ dataတွေကို အဲဒီအစည်းအဝေးမှာရှိနေခဲ့တဲ့ အစိုးရပုဂ္ဂိုလ်တွေလည်းမသိခဲ့ဘူးဆိုတာ သေချာတယ်။ အနည်းဆုံးတော့ အဲဒီအစည်းအဝေးမှာအထိ နိုင်ငံတော်ကို တိုက်ရိုက်တင်ပြမထားခဲ့ဘူး။ ဖြစ်နိုင်ချေက၂ခုပဲရှိတယ်၊ အဲဒီ သတင်းကမှားနေပြီး ဘာတန်ဖိုးမှမရှိလို့၊ ဒါကြောင့် သတင်းပို့နေစရာမလိုဘူး။ နောက်တစ်ခုက ဒီသတင်းကသိပ်အရေးကြီးလွန်းလို့ စင်တာက ဒီအတိုင်းမတင်ပြလိုက်နိုင်တာ၊ သူတို့အရင်ဆုံးအတည်ပြုဖို့လိုလို့လေ"

"ဘယ်ဖြစ်နိုင်ချေအတွက်ပဲဖြစ်ဖြစ် ကိုယ်အတည်ပြုဖို့လိုတယ်"

ဖူ၀မ်သော်မှာ သူပေကျင်းကိုပြန်ရန်လိုအပ်သည့် အကြောင်းပြချက်ကို တည်ငြိမ်စွာ ပြောပြခဲ့သည်။ ဤကျဥ်းကြပ်လှသော ဂိုထောင်ထဲတွင်ရပ်နေလျက်နှင့်တောင် သူ၏ကျောမှာ ထင်းရူးပင်နှယ် ဖြောင့်တန်းလျက်။ သူသည်အလွန်ခိုင်မာစွာဖြင့် အဝေးမှ အနက်ရောင်မျှော်စင်ကို စိုက်ကြည့်နေခဲ့သည်။ ထိုစဥ်သူက ရုတ်တရက်လှည့်ကြည့်လာလျှင် ထန်မော့မှာငေးကြည့်နေမိသည်ကို အမိခံလိုက်ရပြီး အနည်းငယ် တုန့်ပြန်ရခက်ခဲသွားခဲ့သည်။

သူတို့၂ဦးလုံး တန့်သွားခဲ့မိလေသည်။

စက္ကန့်ပိုင်းအတွင်း ထန်မော့အကြောင်းအရာခေါင်းစဥ်ကို ပြောင်းလဲလိုက်သည်။

"ထျန်းရွှမ်ကအခုဆို ရန်သူလို့ သတ်မှတ်ရတော့မယ်။ သူတို့ကတကယ်သန်မာလို့ပဲ အနက်ရောင်မျှော်စင်ဒုတိယထပ်ရဲ့ ခက်ခဲမှုအဆင့်ကိုရှင်းနိုင်တာ။ သူတို့ကို လုံး၀လျှော့တွက်လို့်ရဘူး။ သူတို့ကျွန်တော့်ကို ဘာလို့သတ်ချင်နေတာလဲဆိုတာရော အနက်ရောင်မျှော်စင်က သူတို့ကိုဘာလို့ ကျွန်တော့်သတင်းကို ပြောပြရတာလဲဆိုတာကိုရော မသိဘူး။ ဒီခိုး၀င်သူ၄ယောက်က ကျွန်တော့်ကို အလစ်တိုက်တာက အဖွဲ့အစည်းနဲ့ မဆိုင်ဘူးဆိုရင်တော့ အကောင်းဆုံးပေါ့။ အဆိုးဆုံးအခြေအနေကတော့ ထျန်းရွှမ်အဖွဲ့ကကျွန်တော့်ကိုရှင်းပစ်ချင်နေတာ၊ ပြီးတော့ ကျွန်တော့်တည်နေရာကိုလည်း အမြဲသိနေတာပေါ့၊ ဒီလိုဆိုဘယ်ကိုပဲပြေးပြေး အလုပ်ဖြစ်မှာ မဟုတ်ဘူး"

ထန်မော့မှာ ဖူ၀မ်သော်နှင့် ဖူ၀မ်ရှန်း၏ လုံခြုံရေးအတွက် သူတို့လူချင်းခွဲသွားသင့်သည်ကို ဆိုလို၍ ဤသည်တို့ကိုပြောပြနေခြင်းမျိုးမဟုတ်ချေ။ ယခုသူတို့မှာ အသင်းဖော်များဖြစ်နေကြချေပြီ။ ထန်မော့သည် မိမိ၏အသင်းဖော်ကို အလွယ်တကူလက်လျှော့လိမ့်မည်မဟုတ်။ ဖူ၀မ်သော်လည်း ထပ်တူဖြစ်လိမ့်မည်ဟု သူယုံကြည်သည်။ ထျန်းရွှမ်းအဖွဲ့အစည်းကြောင့်နှင့် မိမိအသင်းဖော်ကို စွန့်လွှတ်ရန်မဖြစ်နိုင်ချေ။

ဖူ၀မ်သော်မှာ ထန်မော့၏ ဆိုလိုရင်းကို နားလည်စွာဖြင့် သူ့အားနက်နဲစွာစိုက်ကြည့်လျက် ရှေ့ဆက်စကားလုံးများကို စောင့်ဆိုင်းနေခဲ့သည်။

ထူးဆန်းသောခံစားချက်များ ရင်ထဲပြည့်နှက်လာမှုနှင့်အတူ ထန်မော့အံကိုကြိတ်လိုက်မိသည်။ အဆုံးတွင် သူကဆုံးဖြတ်ချက်ချလိုက်လေသည်။ ထို့နောက်သူသည် ခေါင်းကိုမော့လျက် ဖူ၀မ်သော်အား တည်ငြိမ်စွာကြည့်လိုက်သည်။

"အမှိုက်ရှင်းလင်းရေးဂိမ်းကနေ အခုအထိ ကျွန်တော်ခင်များရဲ့ စွမ်းရည်ကို မသိရသေးဘူး။ ဖူ...ဗိုလ်ချုပ် ကျွန်တော်တို့ ဒီနေ့ခင်များစွမ်းရည်ကိုစစ်ကြည့်ကြရအောင်။ ခင်များရဲ့ စွမ်းရည်အသုံးပြုပုံနဲ့ တားမြစ်ချက်တွေကို သိထားရင် ထျန်းရွှမ်နဲ့ရင်ဆိုင်တဲ့အချိန် ပိုအဆင်ပြေမှာပဲ။ ပြီးတော့ကျွန်တော်လည်း ခင်များရဲ့စွမ်းရည်ကိုပွားယူပြီး သုံးလို့ရမယ်"

ဖူ၀မ်သော်မှာ ထန်မော့မှ သူ့ကို ဤကိစ္စကြောင့် ဂိုထောင်လေးကိုခေါ်လာသည်ဟု မထင်ထားခဲ့ချေ။ သူကခတ္တမျှ အံ့အားသင့်နေပြီးနောက် ပြုံးလျက် လက်ကို ဆန့်ထုတ်ပေးလာခဲ့သည်။

"ကောင်းပြီ ကိုယ့်ရဲ့စွမ်းရည်ကို သိသင့်တဲ့ အချိန်လည်းရောက်နေပြီပဲ"

သို့သော် ထန်မော့က သူ့လက်ကို လက်မခံပဲနေလိမ့်မည်ဟု မည်သူထင်ထားလိမ့်မည်နည်း။ ၂စက္ကန့်ကျော်လွန်သွားပြီးနောက် ဖူ၀မ်သော်လည်း တစ်ခုခုမှားယွင်းနေကြောင်း သတိထားမိသွားခဲ့သည်။ သူကမျက်မှောင်ကျုံ့လျက် နှုတ်ခမ်းကိုဟလိုက်စဥ်မှာပင် ထန်မော့မှာ လက်ကိုဆန့်လျက် သူ၏ပါးပြင်ကို ထိကပ်လာခဲ့သည်။

ဖူ၀မ်သော်အေးခဲသွားခဲ့လေသည်။ သူ၏မျက်လုံးများ ၀ိုင်းစက်လျက် အပြုံးမှာလည်း တောင့်တင်းသွားခဲ့သည်။

ထန်မော့မှာ ဤအမျိုးသား ဤမျှ ထိတ်လန့်နေသည်ကိုတစ်ခါမျှမမြင်ဖူးခဲ့ချေ။ တဖက်လူ၏ အမူအယာကိုမြင်လျှင် ထန်မော့ ပို၍ တည်ငြိမ်လာသလို ခံစားလိုက်ရသည်။

ကြည့်ရသည်မှာ သူ၏စွမ်းရည်၏ အမှန်တကယ် အသုံးပြုပုံအစစ်ကို ခန့်မှန်းမိသည်အထိ ဤ လူ၏ဦးနှောက်က မကြီးမားသေးပုံပေါ်သည်။

ထန်မော့ပြုံးလျက် ဆိုလိုက်သည်။

"အမ်း... ဒီတစ်ကြိမ်တော့ ကျွန်တော် ခင်များမျက်နှာကို ထိလိုက်မယ်"

ဖူ၀မ်သော်"...?!!"

🌍

Prev Next