MM Story Teller

Chapter 180

Viewers 33k

🌍Chapter 180

ရှုပ်ထွေးနေသော ဖူ၀မ်ရှန်းမှာ သူတို့ကိုကြည့်လျက်

"ဘာဖြစ်တာလဲ ရွမ်၀မ်ရှုကဘယ်သူလဲ၊ Ge အစ်ကိုထန်"

ထန်မော့၏နှုတ်ခမ်းတို့မှာ တဖြည်းဖြည်း ဖြောင့်တန်းသွားခဲ့သည်။ သူသည်ကျောက်တုံးကို ဓါတ်ဆီထဲတဖန်နှစ်လျက် ကြမ်းပြင်ပေါ်တွင် ချရေးလိုက်သည်။ ထို့နောက် သူကခတ္တမျှရပ်တန့်သွားပြီး ဆက်၍ရေးလိုက်ပြန်သည်။ ဖူ၀မ်ရှန်းက ရွမ်၀မ်ရှူဆိုသူကို မသိသော်လည်း ထန်မော့၏ နောက်ဆုံးစကားလုံးများကိုမြင်လျှင် အံ့အားသင့်စွာ အော်ဟစ်လာခဲ့သည်။

"လျန်ယွီကျန်းလား၊ အစ်ကိုထန် သူ့နာမည်ကိုဘာလို့ရေးတာလဲ"

ထန်မော့၏ အမူအယာမှာ သိပ်မကောင်းလှချေ။

သူကကလေးကိုကြည့်လျက် ရှင်းပြလိုက်သည်။

"ဘာလို့လဲဆိုတော့ လွန်ခဲ့တဲ့ ၃၀စက္ကန့်က အနက်ရောင်မျှော်စင်က တစ်ခုကြေညာလာလို့၊ တရုတ်ပြည်ခရိုင်ဆ ခိုး၀င်သူ ရွမ်၀မ်ရှုနဲ့ လျန်ယွီကျန်းက မျှော်စင်ဒုတိယထပ် ခက်ခဲမှုအဆင့်ကို ရှင်းလိုက်ပြီတဲ့"

ဖူ၀မ်ရှန်း၏ မျက်လုံးများမှာ ပြူးကျယ်သွားခဲ့သည်။

"လျန်ယွီကျန်း ဟုတ်လား၊ အဲဒီ နာမည်ကြီးအဆိုတော် လျန်ယွီကျန်းလေ"

နန်ကျင်းမြို့ နန်ကျင်းအဖွဲသစ်တွင်

ချိုင်ရုန်ထိုကြေညာသံကို ကြားရစဥ်တွင် လက်ဝှေ့ထိုးလေ့ကျင့်နေခဲ့ခြင်းဖြစ်သည်။ သူသည် လန့်သွား၍ သဲအိတ်ကိုပင် ခွဲမိမတတ်ပင်။

ရှန်ဟိုင်း တိုက်အဖွဲ့ အစည်းတွင်

တိုက်အဖွဲ့အစည်းတွင် ဂျက်က ထိုကြေညာချက်ကို ကြားခဲ့သော တစ်ဦးတည်းသောသူပင်။ သူလည်း တန့်သွားပြီးနောက် လော့ဖုန်းချန်း၏ရုံးခန်းဆီသို့ အမြန်ပြေးထွက်သွားခဲ့လေသည်။ လော့ဖုန်းချန်း၏လက်ထဲတွင် ဖိုင်ထူထူအထပ်လိုက်ကိုကိုင်ထားလျက် ရှေ့ဆုံးတွင် စာကြောင်း၂ကြောင်းရေးထားခဲ့သည်။ ထိပ်ဆုံးမှအမည်မှာ ပိုင်ရို့ယောင် ယွီကျုံး ခရိုင် ချုံချင်...အစရှိသဖြင့် စာလုံးများဖြစ်သည်။

ထိုကဲ့သို့အခြေအနေများ ကမ္ဘာအနှံ့နေရာအနှံ့အပြားတွင် ဖြစ်ပေါ်နေခဲ့သည်။

တချို့ကစားသမားများမှာ ခက်ခဲမှုအဆင့်ကို ယခုမှ ကြားဖူးသဖြင့် အံ့အားသင့်နေခဲ့ကြသည်။

"အာ ခက်ခဲမှုအဆင့်ဟုတ်လား၊ အဲဒီတရုတ်က၂ယောက်ကဘယ်သူတွေလဲ ခက်ခဲမှုအဆင့်ကို ဘယ်လိုတောင်ရှင်းလိုက်တာလဲ"

တချို့ကစားသမားများမှာတော့ ၄င်းကိုရိုးနေပြီးဖြစ်ပုံရကာ ထိုထူးဆန်းသောအမည်၂ခုကိုရေရွတ်ပြီးနောက် ထွေထွေထူးထူးအံ့သြမနေကြတော့ချေ။

ကမ္ဘာပေါ်ရှိ ကစားသမား၃၆၄ဦးထံ ကျယ်လောင်သော ကလေးသံက ကြေညာပေးခဲ့သည်။

"တင်းတောင်~ တရုတ်ပြည် ခရိုင်၁ တရား၀င်ကစားသမား လျန်ယွီကျန်းဟာ အနက်ရောင်မျှော်စင်ဒုတိယအထပ် ခက်ခဲမှုအဆင့်ကို အောင်မြင်စွာရှင်းလင်းလိုက်ပါပြီ"

"တင်းတောင်~ တရုတ်ပြည် ခရိုင် ၁ ခိုး၀င်သူ..."

အနက်ရောင်မျှော်စင်မှာ ကမ္ဘာလုံးဆိုင်ရာကြေညာမှုကို သုံးကြိမ်တိုင်တိုင် ထုတ်လွှင့်ပေးခဲ့လေသည်။

ရွမ်၀မ်ရှုကိုတစ်ခါမှမကြားဖူးကြသော်လည်း လန်ယွီကျန်းမှာ ကမ္ဘာကြီးအွန်လိုင်းပေါ်မတက်စဥ်က နာမည်ကြီး အဆိုတော်တစ်ဦးပင်။ နိုင်ငံခြားအထိပါ ပေါ်ပြူလာဖြစ်သူဖြစ်သည်။

လွန်ခဲ့သော ၁မိနစ်ခန့်အထိ ထန်မော့သည် ထျန်းရွှမ်အဖွဲ့ခေါင်းဆောင်မှာ တတိယထပ်ကို ရှင်းရန်ကြိုးစားခဲ့သော ၂ဦးထဲမှ တစ်ဦးဖြစ်မည်ဟု တွေးတောနေခဲ့ဆဲပင်။ ထိုစဥ် အနက်ရောင်မျှော်စင်မှ သူ့အား'သူငယ်ချင်းလေး အတွေးလွန်နေပြီ' ဟု သတိပေးလာသည့်နှယ်။

ထန်မော့အတော်ကြာနှုတ်ဆိတ်နေမိပြီးမှ ဖူ၀မ်ရှန်းကို ကြည့်လိုက်ကာ

"မင်းအခုလေးတင်ကြေညာသံကို မကြားလိုက်ဘူးလား"

ဖူ၀မ်ရှန်းက ခေါင်းညိတ်လိုက်ကာ

"အင်း ကျွန်တော် ဘာမှ မကြားလိုက်ဘူး"

ထန်မော့ကဆိုလိုက်သည်။

"ရွမ်၀မ်ရှုနဲ့ လျန်ယွီကျန်း အဲဒီ၂ယောက် မျှော်စင်ဒုတိယထပ်ကို ခက်ခဲမှုအဆင့်နဲ့ရှင်းခဲ့တာ။ သူတို့၂ယောက် အသင်းဖွဲ့ခဲ့တာဖြစ်မယ်။ မျှော်စင်က ဒီအကြောင်းကို ကြေညာပေးပေမဲ့ မင်းကမကြားရဘူး။"

ထန်မော့ကျောက်တုံးကို ကောက်ယူလျက် ကြမ်းပြင်ပေည် ဖြည်းညှင်းစွာ ရေးဆွဲနေပြီး မျက်လုံးများကလည်း ကျဥ်းမြောင်းသွားခဲ့သည်။

"ဒုတိယထပ်ကို ရှင်းထားတဲ့ ကစားသမားတွေကပဲ ဒီသတင်းကို ကြားနိုင်တာလား"

ထန်မော့နှင့် ဖူ၀မ်သော်၂ဦးစလုံးမှာ ဒုတိယထပ်မှ ကစားသမားများဖြစ်ပြီး ဖူ၀မ်ရှန်းတစ်ဦးတည်းကသာ ပထမထပ်မှဖြစ်သည်။ သူတို့ကြားထဲ ကွဲပြားမှုဟူ၍ ဤသည်သာရှိလေသည်။

လွန်ခဲ့သော ၃လထန်မော့အနက်ရောင်မျှော်စင်ပထမထပ် ခက်ခဲမှုအဆင့်ကိုရှင်းလင်းခဲ့စဥ်က ဖူ၀မ်သော်တစ်ယောက်သာ ကြေညာမှုကိုကြားခဲ့ရပြီး လော့ဖုန်းချန်းနှင့် ကျန်လူများကမသိခဲ့ကြချေ။ ထိုစဥ်ကပင် ဖူ၀မ်သော်သည် မျှော်စင်တိုက်ခိုက်ခြင်းဂိမ်းကို အောင်မြင်ပြီးသူများကသာ ၄င်းနှင့်ပတ်သက်သော သတင်းကို ကြားနိုင်သည်ဟု ခန့်မှန်းမိပြီးဖြစ်သည်။

၃ယောက်သား ထိုယူဆချက်ကို လက်ခံလိုက်ကြသည်။

မျှော်စင်တတိယထပ်ကို ကြိုးစားခဲ့သူများမှာ လျို့၀ှက်ပြီး အင်အားကြီးသော ထျန်းရွှမ်အဖွဲ့အစည်းနှင့် ဘာမျှမဆိုင်၍ သူတို့အနေနှင့် ထိုအကြောင်းကိုလောလောဆယ် ဆွေးနွေးနေစရာမလိုတော့ချေ။

ထို့နောက် ဖူ၀မ်သော်က ပေကျင်းတွင် ဖြစ်ပျက်ခဲ့သမျှကို အသေးစိတ်ပြောပြလာခဲ့သည်၊

"ပေကျင်းက ကစားသမားအများစုက အမှီအခိုလည်းကင်းတယ် အဖွဲ့အစည်းတွေအများကြီးလည်းမထောင်ထားဘူး။ ရှိတဲ့အထဲမှတော့ ထျန်းရွှမ်က အသန်မာဆုံးပဲ၊ ကိုယ်လွန်ခဲ့တဲ့ လေးလ ပေကျင်းကထွက်လာတုန်းကတော့ သူတို့ဆီမှာ တရား၀င် ကစားသမားအဖွဲ့၀င်မရှိသေးဘူး။ အားလုံးကခိုး၀င်သူတွေပဲ"

ဖူ၀မ်သော် လေသံနိမ်နိမ့်ဖြင့်ဆိုလိုက်သည်။

၄င်းကိုနားထောင်ပြီးနောက် ထန်မော့ တွေးတောလိုက်ပြီး

"လျန်ယွီကျန်းကတော့ တရား၀င်ကစားသမားပဲ ခိုး၀င်သူမဟုတ်ဘူး"

ထန်မော့နှင့် ဖူ၀မ်သော်မှာ အချင်းချင်းကြည့်လျက် ဆိုလိုရင်းကို နားလည်သွားခဲ့ကြသည်။

လွန်ခဲ့သော ၄လအတွင်း ထျန်းရွှမ်အဖွဲ့အစည်းမှာ အလွန်လျင်မြန်သော အရှိန်ဖြင့် ကြီးထွားလာခဲ့သည်။

မှောင်မည်းသော ကားပါကင်ထဲတွင် ထန်မော့တို့၃ဦးမှာ ပေကျင်းမြေပုံအကြမ်းကိုကြည့်လျက် အစီအစဥ်များ ချမှတ်နေခဲ့ကြသည်။ သူတို့အနေနှင့် ထျန်းရွှမ် အဖွဲ့အစည်းနှင့် ထိပ်တိုက်မတွေ့လိုချေ။

ပေကျင်းမှာကျယ်၀န်းပြီး ဖူ၀မ်သော်က အနက်ရောင်မျှော်စင်နှင့်ပါတ်သတ်သော အချက်အလက်များကို ရှာဖွေလိုကာ ထန်မော့ကမူ သူ၏သူငယ်ချင်းကို ရှာဖွေလိုသည်။

အစီအစဥ်များချမှတ်မိပြီးနောက် ထိုတစ်ညအနားယူခဲ့ပြီး နောက်တစ်နေ့မနက်စောစောတွင် ပြန်လည်ထွက်ခွာလာကြလေသည်။

အနက်ရောင်ကားကလေးသည် မြောက်အရပ်သို့လျင်မြန်စွာ ရွေ့လျားနေပြီး ကောင်းကင်မှာ တဖြည်းဖြည်း မှောင်မည်းလာခဲ့သည်။ ပေကျင်းသို့ရောက်ခါနီးတွင်ပင် ကောင်းကင်ကြီးမှာ လုံး၀မှောင်မည်းသွားတော့သည်။ ထို့နောက် မိုးမှာ သည်းကြီးမဲကြီး ရွာချလာခဲ့သည်။

မိုးသည်းပေါက်များမှာ ကားခေါင်မိုးပေါ် ဆူညံသော အသံများထွက်လာစေသည်။

ဖူ၀မ်သော် wiperကို ဖွင့်လိုက်သော်လည်း သည်းထန်သောမိုးက ကားမှန်ပေါ် ရေတံခွန်သဖွယ်စီးကျနေဆဲပင်။ ပတ်၀န်းကျင်တစ်ခုလုံးမှာ မိုးသည်းသည်းကြောင့် မြူများနှယ် အုပ်ဆိုင်းလျက် ရှေ့မီတာ၁၀၀ထက် ပိုမမြင်နိုင်ချေ၊ ဖူ၀မ်သော် စတီရင်ယာကို လှည့်ချလိုက်ပြီး ဘယ်ဘက်ရှိ နယ်ခံ စူပါမားကတ်လေးတစ်ခုထံ၌ ကားကိုထိုးလိုက်သည်။

ဖူ၀မ်သော်ကမေးလိုက်သည်။

"မိုးအရင်ခိုကြမလား"

လက်ရှိရာသီဥတုအခြေအနေနှင့် ပေကျင်းကိုဆက်မောာင်းသွားရန်မှာ အမှန်တကယ်ကို မသင့်လျော်ချေ။ ထန်မော့ခေါင်းညိတ်လိုက်ကာ

"အင်း မိုးတိတ်တဲ့ထိစောင့်ကြတာပေါ့"

၃ယောက်သား ထိုစူပါမားကတ်တွင် ၀င်နားရန်ပြင်လိုက်ကြသည်။

၄င်းမှာ ဒေသထွက်ပစ္စည်းများ အဓိကရောင်းသော စူပါမားကတ်ဖြစ်သော်လည်း အတွင်းမှ စားစရာများမှာ ခိုးယူသွားခံရပြီးဖြစ်သည်။ အများမလိုချင်တော့သော ကြွေထည်များ ကျောက်စိမ်းရုပ်ထုများက နေရာအနှံ့ပျံ့ကျဲနေကြသည်။ လက်ရှိကမ္ဘာကြီးတွင် ဤစျေးကြီးသောပစ္စည်းများထက် အစားအသောက်နှင့် ရေကသာ ပို၍အဖိုးတန်နေခဲ့လေပြီ။

သူတို့၂နာရီခန့်စောင့်ပြီးနောက်တွင် မိုးလည်း တဖြည်းဖြည်း စဲလာခဲ့လေသည်။ ထို့နောက် ပေကျင်းသို့ခရီးဆက်လာခဲ့ကြတော့သည်။

ထို့နောက်လမ်းခုလတ်တွင် ဖူ၀မ်သော် ဆီဖြည့်ရန်နားခဲ့သည်။ ထန်မော့လည်း ကားပေါ်မှ ဆင်းလာပြီး ဖူ၀မ်သော်မှာလည်း ဓါတ်ဆီဆိုင်ထဲသို့ ၀င်သွားလျက် ဓါတ်ဆီတချို့ရှိမရှိရှာဖွေနေခဲ့သည်။

ထန်မော့ ထိုဓါတ်ဆီဆိုင်ဘေးတွင် သတင်းစာတင်သည့်စင်နှင့် ၄င်း၏ ဘေးတွင် နားခိုရန်အမိုးနှင့် နေရာတချို့ကို တွေ့ခဲ့ရသည်။

ထန်မော့အော်ပြောလိုက်သည်။

"ကျွန်တော် ဟိုနားမှာ စားစရာရှိမရှိသွားကြည့်ကြည့်လိုက်မယ်။ ကျွန်တော်တို့မှာစားစရာသိပ်မရှိတော့ဘူး ပြီးတော့ အဲဒီသတင်းစာကနေ ပေကျင်းအကြောင်း နည်းနည်းပိုသိရအောင်လို့လေ"

ဖူ၀မ်သော်သည် ဓါတ်ဆီဆိုင်ထဲသို့ ၀င်နှင့်ပြီဖြစ်ကာ ၄င်းကိုကြားလျှင် သူ့ကိုလှမ်းကြည့်လျက် မှန်ချပ်များမှ တဆင့်ဖြတ်၍ဆိုလာခဲ့သည်။

"အိုကေ"

ဖူ၀မ်ရှန်းက ကားပေါ်တွင် ထိုင်လျက် ထန်မော့ နားနေဆောင်အသေးလေးထံလျှောက်သွားသည်အား ကြည့်နေခဲ့လေသည်။

ထန်မော့အတွင်းဘက်ကို လှည့်ပါတ်၍ကြည့်နေခဲ့သည်။ ကံကောင်းစွာပင် ထိုနေရာတွင် ဘီစကစ်နှင့် တခြားစားစရာအနည်းငယ်ရှိနေခဲ့လေသည်။ စတိုးဆိုင်များတွင် ထိုရိက္ခာများကိုရှာမရနိုင်တော့ ။ လူနေအိမ်များ နားနေဆောင်များတွင်သာ စားစရာတချို့ကို ရှာတွေ့နိုင်တော့သည်ပင်။ ထန်မော့နားနေဆောင်၏ အခန်းတိုင်းကိုရှာဖွေပြီးနောက် ချောကလက်တစ်ခုနှင့် ဘီစကစ်များ အစသဖြင့် စားစရာအများအပြားကိုရှာတွေ့ခဲ့သည်။

ထန်မော့လည်း ချောကလက်ပြားကို သူ၏အိတ်ထဲတွင်ထည့်လျက် ထိုနားနေဆောင်မှ ထွက်လာခဲ့လေသည်။ သူကလမ်းအစွန်သို့လျှောက်လာခဲ့ပြီးနောက် ဖူ၀မ်သော်မှာ ဓါတ်ဆီ ရှာဖွေနေဆဲဖြစ်ကြောင်း တွေ့လိုက်ရသည်။ ဖူ၀မ်ရှန်းသည်လည်း ကူရှာပေးရန် ထိုဓါတ်ဆီဆိုင်ထဲသို့၀င်သွားခဲ့သည်။ ထို၂ယောက်က ထန်မော့ဘယ်ရောက်နေမှန်း မသိကြပုံပင်။

ထန်မော့ သတင်းစာစင်ဆီလျှောက်သွားလိုက်သည်။ ထိုစဥ် ကောင်းကင်ပေါ်မှ ရေစက်တချို့ ပေါက်ခနဲပြုတ်ကျလာခဲ့သည်။

ထန်မော့သည် ထိုသတင်းစာစင်ဆီလျှောက်သွားနေရင်း သူ့ဆံပင်တို့ လျှင်မြန်စွာ စိုစွတ်သွားခဲ့၏။ သူ၏ခေါင်းထဲမှလည်း သူငယ်ချင်းဖြစ်သူ၏ အိမ်လိပ်စာကို ဆွေးတောနေမိလျက်ပင်။

လွန်ခဲ့သည့်တစ်ခေါက် ပေကျင်းကိုလာခဲ့စဥ်က သူ၏သူငယ်ချင်းကသာ ဦးဆောင်ခေါ်လာပေးခြင်းဖြစ်ကာ သူက လမ်းများကိုလည်းမမှတ်မိချေ။

"သူ့အိမ်နားမှာ စတိုးဆိုင်လေးတစ်ဆိုင်ရှိသလိုပဲ။ ပြီးတော့ ရင်ပြင်တစ်ခု..."

ထို့နောက် ထန်မော့ ရုတ်ချည်း မီးတောက်တစ်ခုက သူ၏ကိုယ်ကိုဖြတ်သန်းသွားသည့်နှယ် ရုတ်ချည်း ပူတက်လာခဲ့သည်။ ထန်မော့၏ အမူအယာမှာ ထူးဆန်းလာခဲ့ပြီး သူအောက်သို့အသာ ကြည့်လိုက်မိသည်။ သို့သော် ပုံမှန်မဟုတ်သည်က ဘာတစ်ခုမှရှိမနေချေ။

ဘာကြီးလဲ...

ထန်မော့ ချောင်းတစ်ဟွတ်ဟွတ်ဆိုးလျက် ထိုအပူမီးကို ငြိမ်သက်စေရန် ကြိုးစားလိုက်သည်။ ထန်မော့ သူ၏ဖိနပ်တို့က စိုစွတ်နေသည်ကို တွေ့လိုက်ရသည်။ သူကမျက်မှောင်ကျုံ့လျက် သူ၏ခြေထောက်အား ရေအိုင်ငယ်ထံမှ ဖယ်ရန်ပြင်လိုက်စဥ်တွင် ရုတ်ချည်း အေးခဲသွားမိလေသည်။

ထန်မော့တမဟုတ်ချည်း ဘေးသို့ရှောင်လိုက်လျှင် ငွေရောင်ဓါးတစ်ချောင်းမှာ သူ၏မျက်စိရှေ့မှ ဖြတ်သွားခဲ့လေသည်။

"သောက်ပဲ သူဘယ်လိုသိသွားတာလဲ။ အချိန်မရှိဘူး၊ သူ့ကိုသတ်လိုက်တော့"

ထန်မော့မျက်လုံးများပြူးကျယ်သွားလျက် တစ်ခုခုမှားယွင်းနေမှန်း ခံစားလိုက်ရသည်။

သို့သော် တဖက်ရန်သူများမှာ သူ့အား တွေးတောနေရန်အချိန်မပေးခဲ့ချေ။

နောက်ထပ်ဓါးတစ်ချောင်းက တရှိန်ထိုးပြေး၀င်လာပြီး ထန်မော့၏ မျက်တောင်များကို သီသီကလေးဖြတ်သွားခဲ့သည်။ သူသည်နောက်သို့လက်ထောက်၍ ရှောင်လိုက်ရခြင်းပင်။ သူသည် သတင်းစာစင်နှင့်အလွန်နီးကပ်နေပြီး ပြန်လည်တိုက်ခိုက်ရန် ကြိုးစားလိုက်သည်။ အရာအားလုံးမှာ လျင်မြန်စွာဖြစ်ပျက်သွားခဲ့ခြင်းပင်။ ဓါး၂ချောင်းနှင့် အရိပ်တစ်ခုမှာ သာမာန်မျက်စိဖြင့် မမြင်နိုင်သောအလျင်ဖြင့် သူ၏နောက်မှ ပြေး၀င်လာခဲ့လေသည်။

ထန်မော့မှာ ထီးကလေးကိုဖွင့်လျက်ခုခံလိုသော်လည်း သူကျောဘက်သို့လှမ်းလိုက်မိစဥ်မှာပင် ၄င်းမှာ ကားထဲတွင် ကျန်နေခဲ့ပြီဖြစ်ကြောင်း သတိရမိသွားခဲ့သည်။

သေစမ်း...

ထိုအနက်ရောင်အရိပ်မှာ သူ၏ရှေ့သို့ မျက်တောင်တစ်ခတ်အတွင်းပင်ရောက်လာခဲ့သည်။ ထန်မော့တံတောင်ဆစ်မြှောက်လျက် ခေါင်းကိုကာလိုက်လျှင် သန်မာသော လက်သီးချက်မှာ သူ၏လက်သို့ထိုးမိသွားခဲ့သည်။

ထန်မော့ညည်းညူသံတစ်ချက်ဖြင့် ၃မီတာခန့် ဆုတ်သွားခဲ့ရသည်။ သူသည်ခေါင်းကိုမော့လျက် ရန်သူ၏ပုံစံကိုပင် မမြင်လိုက်ရခင်တွင် နောက်ထပ်အရိပ်တစ်ခုက နားနေဆောင်နောက်မှ ပြေးထွက်လာခဲ့လေသည်။ ချွန်ထက်သောဓါးမြှောင်မှာ ထန်မော့၏ ခေါင်းတည့်တည့်သို့ပြေး၀င်လာပြီး ထန်မော့မီးခြစ်ဆံကြီးကိုထုတ်လိုက်ရသည်။ ဓါးသွားမှာ မီးခြစ်ဆံကြီးနှင့် ထိခတ်သွားပြီး အဖြူရောင်အမှတ်တစ်ခုကို ကျန်ရစ်စေသည်။

ထန်မော့အံ့အားသင့်မိသွားလျက် တဖက်လူအား သတိအပြည့်ဖြင့်ကြည့်လိုက်မိသည်။

ထိုစဥ်မှာပင် နောက်ထပ်အရိပ်၂ခုက နားနေဆောင်နောက်မှ ထွက်လာခဲ့ပြန်သည်။ စုစုပေါင်း လူ၄ဦးမှာ ထန်မော့အား အရပ်လေးမျက်နှာမှ ၀ိုင်းရံတိုက်ခိုက်လာခဲ့ကြသည်။ ထိုထဲမှ တစ်ဦးမှာ သေနတ်ကိုမြှောက်လျက် ထန်မော့၏ နဖူးတည့်တည့်ကို ပစ်ခတ်လာခဲ့သည်။ ကျယ်လောင်သောသေနတ်သံမှာ တိတ်ဆိတ်သော ပတ်၀န်းကျင်တွင် ပဲ့တင်ထပ်သွားလေသည်။

ဓါတ်ဆီဆိုင်အတွင်းမှဖူ၀မ်သော် ခေါင်းကိုဆတ်ခနဲမော့လျက် အဝေးမှအသံလာရာသို့ ကြည့်လိုက်မိလေသည်။

ဖူ၀မ်ရှန်းမှာလည်း ကြောက်လန့်နေသောအမူအယာဖြင့် အော်ဟစ်လာခဲ့သည်။

"ဘာတွေဖြစ်နေတာလဲ"

သူ့စကားမဆုံးခင်မှာပင် ဖူ၀မ်သော်က မိုးကြိုးတစ်ခုနှယ် ၀ှစ်ခနဲပြေးထွက်သွားတော့သည်။

ထိုလူ၄ဦးမှာ ထန်မော့ထင်ထားသည်ထက် သန်မာလွန်းနေခဲ့သည်။ ထိုသူတို့ကို ဦးဆောင်နေသော လူလတ်ပိုင်းမှာ အလွန်သန်မာလှသည်။ သူ၏လက်သီးဖြင့် ထိုးချလိုက်သော နေရာတွင်းမှ အသံကျယ်ကြီးများထွက်ပေါ်လာစေပြီး ထန်မော့ ဆက်တိုက်ပင် ရှောင်ရှားနေခဲ့ရသည်။ ကျန်တစ်ယောက်မှာလည်း ဓါးရှည်တစ်ချောင်းဖြင့် ထန်မော့၏လွတ်လမ်းမှန်သမျှကို လိုက်ပိတ်လျက် ရှောင်ပြေးစရာမရှိအောင် လုပ်နေခဲ့သည်၊

ကျန်တစ်ယောက်မှာလည်း ဓါးပျံဖြင့် တိုက်ခိုက်လာပြီး ဘေးမှတစ်ဦးမှာလည်း သေနတ်ဖြင့် ဆက်တိုက်ပစ်ခတ်နေခဲ့သည်။

လူ၄ယောက်ပူးပေါင်းလျက် ထန်မော့၏ လစ်ဟာမှုကို ရှာဖွေနေခဲ့ကြလေသည်။ သူတို့မှာ ထန်မော့၏လှုပ်ရှားမှုမှန်သမျှကို သိနေသည့်နှယ်၊ ထန်မော့ပြန်လည်တိုက်ခိုက်ရန်အခွင့်အရေးရလာတိုင်း ထိုလူမှာ ချက်ချင်းရှောင်ထွက်သွားတတ်သည်။

သန်မာသော လူကအော်လိုက်သည်။

"ဖူ၀မ်သော်လာနေပြီ။ ငါတို့သူ့ကိုတားထားလိုက်မယ်၊ လျိုကြီး ဒီလူကိုမင်းရှင်းလိုက်"

ထိုစကားကိုကြားသည့်အချိန် ထန်မော့၏ မျက်တောင်များပင် တွန့်သွားခဲ့သည်။ သူ၏ဦးနှောက်က လျင်မြန်စွာလှုပ်ရှားနေပြီး လူ၃ယောက်မှာ ဖူ၀မ်သော်ဘက်သို့လှည့်သွားချိန်တွင် တဖက်လူသတိမထားမိခင်မှာပင် ထန်မော့သူ၏ ညာလက်ကို လှုပ်ရှားလိုက်သည်။ သူ၏လက်ဖ၀ါးမှ မီးတောက်များထွက်ပေါ်လာပြီး သူ၏အနီးဆုံးမှ လျိုကြီးဆိုသူထံ ကျရောက်သွားခဲ့သည်။ သို့သော်မထင်မှတ်ထားသည်က ထိုလူမှာ ဤလှုပ်ရှားမှုကို ကြိုသိနေသည့်နှယ် ၄င်းကိုရှောင်လိုက်ပြီး သူ၏ခြေထောက်ကို မြှောက်ကာ ထန်မော့၏ ပုခုံးကို ထန်ထည့်လိုက်လေသည်။

ထန်မော့၏ကိုယ်မှာ သတင်းစာစင်အနီးမှနံရံသို့ လွင့်ထွက်သွားခဲ့သည်။

ရုပ်ဆိုးဆိုး လူအိုကြီးက ထန်မော့ကို ကြည့်လျက် လှောင်ပြုံးတစ်ခုကိုလှစ်ဟလာခဲ့သည်။ သူ၏အပေါင်းအပါများမှာ ဖူ၀မ်သော်အား တားဆီးနေကြပြီး လျိုကြီးမှာအချိန်မဖြုန်းချင်တော့ပုံပင်။ သူကထန်မော့ကို လှောင်ရယ်လျက် တိုက်ခိုက်ရင်း ထေ့ငေါ့လိုက်သည်။

"မင်းဘာတတ်နိုင်သေးလဲ"

🌍

Prev Next