MM Story Teller

Chapter 154

Viewers 32k

🌍Chapter 154

ကြက်ဆင်ကြီးအစစ်အမှန်ဂိမ်းကို၀င်ပြီးနောက် ကစားသမားများ ၄ကြိမ်တန်းစီခဲ့ရသည်။ နောက်ဆုံးအကြိမ်တွင်သူတို့သည် မှန်ကန်စွာတန်းစီနိုင်ခဲ့ပြီး ဂိမ်းမှာလည်း ရှင်းလင်းသွားခဲ့လေသည်။

ပထမအကြိမ်တွင်သူတို့သည် မည်သည့်သဲလွန်စမှမရှိပဲ သူတို့ဂိမ်းထဲ၀င်လာသည့်အစဥ်လိုက်အတိုင်း စီခဲ့သည်။ ထိုသိမ်းငှက်ကြီးမှ ကြက်ပေါက်ကလေးကို ဖမ်းသည့်ဂိမ်းတွင် ကြက်ဆင်ကြီးမှာ နင်းနင်းကိုအသည်းအသန်လိုက်ခဲ့ပြီး ဂိမ်း၏နောက်ဆုံးစက္ကန့်အထိသူမကိုလိုက်တိုက်ခိုက်ခဲ့ကာ နင်းနင်းမှာ မသေရုံတမယ်ပင်။ ကြက်ဆင်ကြီးမှာ နင်းနင်းကိုသတ်လိုစိတ်အား ဖုံးကွယ်မထားခဲ့ချေ။ သို့နှင့် ထန်မော့မှာ တန်းစီးသည့်အစဥ်လိုက်မှာ အခြားတစ်မျိုးဖြစ်ကာ နင်းနင်းမှာနောက်ဆုံးမှလူဖြစ်ကြောင်း ထန်မော့သတိထားမိခဲ့လေသည်။

ဆံပင်တိုနှင့်မိန်းကလေးမှာ ဥာဏ်သိပ်မကောင်းလှသော်လည်း အသည်းအသန်တော့စဥ်းစားခဲ့လေသည်။

"အဲဒီတုန်းက ကျွန်မမှတ်မိသလောက်ဆိုရင် မစ္စတာဗစ်တာနဲ့ ခေါင်းဆောင်ရှောင်းက အစ်မနင်းနင်းကို နောက်ဆုံးကလို့ထင်ကြတာမလား...ဒါပေမယ့်အခုကျ မစ္စတာထန်ချီကနောက်ဆုံးလူဆိုတာသိပြီလေ.. အဲဒီတုန်းက ကြက်ဆင်ကြီးက အစ်မနင်းနင်းကိုဘာလို့လိုက်ဖမ်းခဲ့တာလဲ..."

ဆံပင်တိုမိန်းကလေး၏မျက်လုံးများမှာတောက်ပသွားခဲ့သည်။

"ကျွန်မတို့ကို တမင်အထင်လွဲအောင်လား"

သိမ်းငှက်မှ ကြက်ပေါက်လေးများကိုဖမ်းသည့်ဂိမ်း ၃ချီရှိခဲ့သည်။ ပထမပစ်မှတ်မှာ နင်းနင်းဖြစ်ကာ ကျန်၂ချီတွင်တော့ ဖူ၀မ်သော်ဖြစ်သည်။ ကြီးမားသော ကြက်ဆင်ကြီး ကြက်ပေါက်များကိုအတတ်နိုင်ဆုံးဖမ်းဆီးရန်ကြိုးစားခဲ့သော်လည်း ကြက်ပေါက်တစ်ကောင်ကိုမှ မသတ်နိုင်ခဲ့ချေ။ ထို့ကြောင့် တမင်ကြုံရာလူကိုလိုက်ဖမ်းပြီး ကစားသမားများကို နားလည်မှုလွဲစေခဲ့ခြင်းလား...

ဆံပင်တိုမိန်းကလေးမှာ သူမ၏အတွေးမှန်ကန်သည်ဟု ထင်ခဲ့သည်။

"ကြက်ဆင်ကြီးက အစ်မနင်းနင်းကို တမင်လိုက်ဖမ်းပြီး ကျွန်မတို့ကိုလုပ်ပြတာပဲ...အဆုံးမှာတော့ အစ်မနင်းနင်းကို မသတ်ခဲ့ဘူးလေ...ဒီလိုနဲ့ ကျွန်မတို့လည်း အစ်မနင်းနင်းကိုနောက်ဆုံးလူလို့ထင်သွားမယ်"

ရှောင်ကျီထုံးကဆိုသည်။

"မင်းအတွေးကမဖြစ်နိုင်တာတော့ မဟုတ်ပါဘူး..

၂၀ရာခိုင်နှုန်းလောက်တော့မှန်နိုင်ချေရှိပါတယ်"

ဆံပင်တိုမိန်းကလေးမှာတောင့်တင်းသွားခဲ့သည်။

ရှောင်ကျီထုံးကဆိုသည်။

"အရင်က ကစားသမား၁၀၀ကျော်ဒီဂိမ်းကိုဆော့ဖူးပေမယ့် ဘယ်သူမှမရှင်ခဲ့ဘူး..ကစားသမားအများစုက သိမ်းငှက်ကြက်ပေါက်ကလေးကို လိုက်ဖမ်းတဲ့ဂိမ်းရဲ့စည်းမျဥ်းကိုရှာမတွေ့ခဲ့ကြဘူး...ဘာလို့လဲဆိုတော့ဒီဂိမ်းက နန်ကျင်းက အစစ်အမှန်ဂိမ်းဖြစ်နေတာကိုး"

မိန်းကလေး၂ယောက်မှာ ရှုပ်ထွေးသွားစဥ် ထန်မော့နှင့် ဖူ၀မ်သော်က ရှောင်ကျီထုံးကိုမော့ကြည့်လိုက်ကြသည်။

ရှောင်ကျီထုံးမှာ'မိသားစုအတွင်းရေးကိုမပြောရ'ဟူသော စည်းမျဥ်းကိုဂရုစိုက်မနေပဲ ခံစားချက်မဲ့စွာဆိုလာသည်။

"ကမ္ဘာကြီးအွန်လိုင်းပေါ်တက်လာတာ ၄လရှိပြီ...ကျန်တဲ့မြို့နယ်တွေက ကစားသမားတွေရဲ့အဆင့်ကိုတော့မသိပေမယ့် နန်ကျင်းကကစားသမားတွေကတော့ တရုတ်မှာဆိုရင် အခြေခံထက်ကိုနိမ့်မှာပဲ... နန်ကျင်းအဖွဲ့နဲ့ နန်ကျင်းဗျူဟာအဖွဲ့ရှိနေတော့ ကစားသမားတွေက အသက်ရှင်ဖို့ ရုန်းကန်စရာမလိုဘူးလေ... ဂိမ်းအတွေ့အကြုံဆိုတာလည်းမရှိသလောက်ပဲ... အဲဒီလူအယောက်၁၀၀ကျော်မှာသာ တွေးနိုင်တဲ့ဦးနှောက်ရှိရင် ကျွန်တော်တို့ နန်ကျင်းဗျူဟာအဖွဲ့ဆိုတာ ရှိလာမှာမဟုတ်ဘူး"

ထိုကျောင်းသူကစားသမား၂ဦးမှာ နန်ကျင်းကစားသမားများဖြစ်၍ ရှောင်ကျီထုံးဆိုလိုသည်ကို နားလည်ကာ ရှက်ရွံ့စွာ ခေါင်းကိုငုံ့ထားလိုက်ကြသည်။

တကယ်တမ်းတွင် ရှက်စရာအကြောင်းမရှိသော်လည်း သူတို့မှာ ထိုသို့မခံစားမိပဲမနေနိုင်ခဲ့ချေ။ အထူးသဖြင့် နန်ကျင်းကစားသမားမဟုတ်သည်(ထန်မော့နှင့် ဖူ၀မ်သော်)ရှိနေ၍ပင်။

၃လအချိန်က မကြာခင်ပြည့်တော့မည်။ ထို့နောက်နန်ကျင်းမှ ကစားသမားတိုင်းမှာ မျှော်စင်တိုက်ခိုက်ဂိမ်းကိုတစ်ကြိမ်တော့စတင်ရင်ဆိုင်ရတော့မည်။ အနက်ရောင်မျှော်စင်မှ သူတို့အားလုံးကိုဆွဲသွင်းမည်ဖြစ်ကာ မည်သူကမျှ မကယ်နိုင်ချေ။ ထို့ကြောင့် ဤကျောင်းသူ၂ဦးမှာ မတိုင်ခင်က ဂိမ်းတစ်ခုကိုတိုက်ခိုက်ရန်ကြိုးစားခဲ့ခြင်းပင်။ သူတို့ပို၍ သန်မာလာလိုခဲ့သည်။

ရှောင်ကျီထုံးကဆက်၍ဆိုသည်။

"ဂိမ်းကစရုံပဲရှိသေးတယ် ကြက်ဆင်ကြီးကလည်း ကျွန်တော်တို့ဘယ်လောက် သန်မာလဲမသိခဲ့ဘူး...ပြီးတော့သူကအရမ်းလည်းယုံကြည်မှုရှိတယ်...သိမ်းငှက်က ကြက်ပေါက်လေးတွေကိုဖမ်းတဲ့ ပထမအချီမှာ ကြက်ဆင်ကြီးက ကျွန်တော်တို့ကို ပေါ့သေးသေးသဘောထားခဲ့တာ အဲဒါကြောင့်လည်းရှောင်ရှောင်းရဲ့ ထောင်ချောက်ကိုမိသွားတာပဲ... အဲဒါပြီးတော့ သူဘာထောင်ချောက်မှာမှ မမိတော့ဘူး...သူက ကျွန်တော်တို့ အဲဒီသိမ်းငှက် ကြက်ပေါက်ဖမ်းဂိမ်းရဲ့အမှန်တရားကို ရှာတွေ့သွားမယ်လို့ထင်မထားတာ..ဒါကြောင် သူပထမအချီမှာ နင်းနင်းကိုဖမ်းချင်ခဲ့တယ်ဆိုတာ ၇၀ရာခိုင်နှုန်းသေချာတယ်"

"၈၀ရာခိုင်နှုန်းပါ"

အမျိုးသားအသံတစ်ခုကြောင့်ရှောင်ကျီထုံးလှည့်ကြည့်လိုက်သည်။ ထန်မော့မှာ ကြက်ဆင်ကို ဂရုတစိုက်ကင်နေခဲ့သည်။ ထို့နောက်သူကဆိုသည်။

"သူက ကျွန်တော်တို့ သိမ်းငှက်ကြက်ပေါက်ဖမ်းဂိမ်းရဲ့ အမှန်တရားကို ရှာတွေ့မယ်လို့လုံး၀မထင်ဘူး..သူကကျွန်တော်တို့ရဲ့ ဥာဏ်ရည်ကိုရော ခွန်အားကိုပါ အထင်မကြီးတာ...သူကတကယ် နင်းနင်းကိုသတ်ဖို့ကြိုးစားခဲ့တာ"

ရှောင်ကျီထုံးမှာ ပြုံးလိုက်ပြီး ၄င်းကိုသဘောတူသည့်အလား ဆက်၍ပြောမလာခဲ့ချေ။

ဆံပင်တိုမိန်းကလေးမှာ ရှုပ်ထွေးသွားခဲ့သည်။

"ဒါဆိုသူက မစ်စတာထန်ချီကိုပဲဖမ်းသင့်တာလေ အစ်မနင်းနင်းကိုမှမဟုတ်တာ"

ထန်မော့မှာ ထိုအတည်ပေါက်နှင့်ဆိုနေသော မိန်းကလေးကိုကြည့်လိုက်သည်။ နန်ကျင်းကစားသမားများမှာ ခွန်အားကြီးကစားသမား၏ ကာကွယ်မှုကိုခံထားရကာ ဖန်လုံအိမ်ထဲနေနေရသည့်အတိုင်းပင်။ လေဒဏ်မိုးဒဏ်ကိုမခံဖူးပဲ အားလည်းနည်းလှသည်။ ဤမိန်းကလေး၂ဦးမှာ အတော်အဆင်ပြေသေးသည်ဟုဆိုနိုင်သည်။ သူတို့သည် ချက်ချင်းအားလျော့မသွားသလို ခွန်အားကြီးသူထံ ကယ်ပါယူပါဟု အသနားမခံခဲ့ကြချေ။ သို့တိုင်အောင် ရှန်ဟိုင်းမှ အရံကစားသမားများကိုရော မျက်တောင်မခတ်ပဲ လူသတ်နိုင်ကြသူများကိုပါ မယှဥ်နိုင်သေးချေ။

သို့တိုင်အောင် ထိုမိန်းကလေး၂ဦးက လက်မလျှော့ခဲ့ကြချေ။ ဆံပင်တိုမိန်းကလေးမှာ သူမ၏တွေးခေါ်နိုင်စွမ်းနှင့် ခွန်အားကိုတိုးလာရန်အတွက် အဖြေကိုသိလိုခဲ့သည်။

အနည်းဆုံးတော့ သူကမျှော်လင့်ချက်မမဲ့သေးချေ။

ထန်မော့ရှင်းပြလိုက်သည်။

"နဂို သိမ်းငှက်ကြက်ပေါက်ဖမ်းဂိမ်းက ကစားဖို့အနည်းဆုံး ၃ယောက်လိုတယ်..ပထမတစ်ယောက်က သိမ်းငှက်..ဒုတိယက ကြက်ပေါက်..နောက်ဆုံးကတော့ ကြက်အမေကြီး...ဒီဂိမ်းထဲမှာဆို ဘယ်သူက ကြက်အမေကြီးလို့မင်းထင်လဲ"

ဆံပင်ရှည်မိန်းကလေးမှာ အသေအချာစဥ်းစားလိုက်သည်။

"ရှေ့ဆုံးကလူက အမြဲကြက်အမေကြီးပဲလေ..ဒါဆိုရှင်ကကြက်အမေကြီးလား"

ထန်မော့ခေါင်းခါလိုက်သည်။

ဆံပင်တိုမိန်းကလေးမှာ တွေးလိုက်သည်။

"မစ်စတာထန်ဂျီလား...ကြက်ဆင်ကြီးက သူကို တိုက်ခိုက်ခဲ့တယ်ဆိုတော့"

ထန်မော့ကဆိုသည်။

"ကြက်အမေက ကြက်ဆင်ကြီးပေါ့"

"ဘယ်လို"

မည်သူကမျှထိုအဖြေကို မထင်ထားချေ။

"ကြက်ဆင်ကြီးက သိမ်းငှက်ဖြစ်သွားပေမယ့် သူဟာကြက်ပေါက်ကလေးတွေရဲ့ အမေဖြစ်နေတုန်းပဲလို့ အနက်ရောင်မျှော်စင်ကပြောခဲ့တယ်လေ..သူကစိတ်၂ခွဝေဒနာကြောင့် သိမ်းငှက်ဖြစ်လာတယ်..သူကကြက်အမေကြီးပဲ...သိမ်းငှက်အနေနဲ့ဆို သူကနောက်ဆုံးကြက်ပေါက်ကစဖမ်းရမှာ..ပထမအချီမှာအစဥ်လိုက်စီခဲ့တာက မင်း..သူ...ရှောင်ကျီထုံး...ရှောင်ရှောင်း.."

ထန်မော့၏အသံမှာ စူပါမားကပ်ထဲ ပဲ့တင်ထပ်နေခဲ့သည်။

“What?”

ဖူ၀မ်သော်နှင့် ရှောင်ကျီထုံးမှာ ဤဂိမ်း၏အမှန်တရားကို နားလည်ပြီးဖြစ်ကာ ကျန်၄ယောက်ကသာ ရှုပ်ထွေးနေခြင်းဖြစ်သည်။ မိန်းကလေး၂ယောက်မှာ အလွန်ဂရုတစိုက်နားထောင်နေစဥ် ရှောင်ရှောင်းကလည်း ထန်မော့ကိုကြည့်နေခဲ့သည်။ သူတို့အားလုံး အဖြေမှန်ကိုသိလိုကြလေသည်။

တကယ်တမ်းတွင် ၄င်းမှ အလွန်ရိုးရှင်းလှသည်။ မူလတွင် ကြက်ဆင်ကြီးမှာ နင်းနင်းကိုအရင်ဆုံးလိုက်ဖမ်းခဲ့၍ ထန်မော့နှင့် ဖူ၀မ်သော်မှာ သူမသည်နောက်ဆုံးကြက်ပေါက်ဟုထင်ခဲ့ကြသည်။ သိမ်းငှက်ကြက်ပေါက်ဖမ်းဂိမ်းတွင် ပထမဆုံးအဖမ်းခံရသူကနောက်ဆုံးကြက်ပေါက်ဖြစ်သည်။ ဤယူဆချက်တွင် မည်သည့်ပြစ်ချက်မှမရှိချေ။ သူတို့မှားယွင်းသွားသောတစ်ခုတည်းသော အရာမှာ ဂိမ်းထဲမှာ ကြက်အမေကြီး၏ ဇာတ်ရုပ်ပင်။

ကြက်ဆင်ကြီးမှာ သိမ်းငှက်အဖြစ်ပြောင်းသွားသော်လည်း ကြက်အမေကြီးဖြစ်နေဆဲပင်။ သူမသည်ကြက်ပေါက်ကလေးများကိုကာကွယ်လိုသော်လည်း ဂိမ်း၏စည်းမျဥ်းအရ စိတ်လွတ်သွားပြီး ကြက်ပေါက်လေးများကို စားချင်လာခဲ့သည်။ သို့ဆိုပါက ကြက်ပေါက်လေးများကို မည်သို့ကာကွယ်ပါမည်နည်း။

ပိုးကောင်စားရန် တန်းစီပါဆိုသည်က သူမကြက်အမေကြီးဖြစ်နေစဥ် ကြက်ပေါက်ကလေးများကိုပြောခဲ့ခြင်းဖြစ်သည်။ မှန်၏။ မှန်ကန်စွာတန်းစီသော ကြက်ပေါက်ကလေးများသာ ကြက်အမေကြီး၏ ကောင်းချီးကိုရမည်ဖြစ်သည်။ သူမ၏ စိတ်၂ခွအခြေအနေတွင် ကြက်အမေကြီးမှာ မှန်ကန်စွာတန်းစီသောကလေးများကို တိုက်ခိုက်မည်မဟုတ်ချေ။ တန်းစီခြင်းမမှန်သော ကလေးများကိုသာ သူမ၏ကြက်ပေါက်လေးများအဖြစ် အသိအမှတ်မပြုပဲ တိုက်ခိုက်မည်ဖြစ်သည်။

ဤသည်မှာ ထိုသိမ်းငှက်ကြက်ဆင်ဖမ်းဂိမ်း၏ ဖုံးကွယ်ထားသော စည်းမျဥ်းဖြစ်လေသည်။

အစဥ်လိုက်အဆုံးမှအစအထိ တန်းစီခြင်းမှားယွင်းသော ကလေးများကိုသာ သိမ်းငှက်ကဖမ်းခြင်းဖြစ်သည်။

ပထမအကြိမ်တန်းစီစဥ်က ဖူ၀မ်သော်မှာနောက်ဆုံးတွင်ဖြစ်ပြီး ထန်မော့မှာ ဒုတိယနောက်ဆုံးဖြစ်သည်။ ဖူ၀မ်သော်၏အစဥ်လိုက်မှာ မှန်ကန်ပြီး ဒုတိယနောက်ဆုံးမှာ နင်းနင်းဖြစ်သည်။ ထို့ကြောင့် ကြက်ဆင်ကြီးမှာ သူမ၏ကလေးကို မမှတ်မိပဲ နင်းနင်းကို အသည်းအသန်လိုက်ဖမ်းခြင်းဖြစ်သည်။ နောက်ထပ်ဂိမ်း၂ချီတွင် နင်းနင်းမှာနောက်ဆုံးဖြစ်ပြီး ဖူ၀မ်သော်မှာ ဒုတိယနောက်ဆုံးအဖြစ်စီခဲ့သည်။ သို့နှင့်ဖူ၀မ်သော်မှာ အစဥ်လိုက်မှားယွင်းသော ပထမဆုံးကစားသမားဖြစ်လာပြီး ကြက်ဆင်ကြီးမှာ သူ့ကိုလိုက်ဖမ်းခဲ့သည်။

ထန်မော့ကဆိုသည်။

"တကယ်တော့..ဒုတိယအချီတုန်းက အစဥ်လိုက်မှားလို့ ကြက်ဆင်ကြီးက ထန်ချီကိုလိုက်ဖမ်းကတည်းက သတိထားမိသင့်တာ..ဂိမ်းအပေါ်တို့တွေရဲ့အမြင်မှာ ယိုပေါက်ရှိနေတယ်...လိုက်ဖမ်းတဲ့အစဥ်လိုက်ကာ ရှေ့ကိုတစ်ယောက်စီတိုးသွားတယ်လို့ ပုံသေတွက်မထားခဲ့သင့်ဘူး"

ထိုစဥ်က ထန်မော့နှင့်ကျန်လူများမှာ အပေါ်ယံမျှသာ တွေးခဲ့ကြပြီး ဂိမ်း၏ ဖုံးကွယ်ထားသော ဒုတိယစည်းမျဥ်းကို ထည့်တွေးရန် သတိမရခဲ့ကြချေ။

"ကြက်ဆင်ကြီးက အစဥ်လိုက်မှာ အရင်ဆုံးမှားစီတဲ့ကြက်ပေါက်ကလေးကိုဖမ်းချင်ခဲ့တာ"

တရား၀င်ကစားသမား...အရံကစားသမား ခိုး၀င်သူ..

အနက်ရောင်မျှော်စင်မှ ဤအစဥ်လိုက်ကိုပြုလုပ်ခဲ့ခြင်းမှာ ကြက်ဆင်ကြီးအတွက် ခိုး၀င်သူကိုစားရ လွယ်ကူစေရန်ဖြစ်သည်။ ထိုအစဥ်လိုက်အရ သေနိုင်ချေအနည်းဆုံးမှာ တရား၀င်ကစားသမားများဖြစ်သည်။ အနက်ရောင်မျှော်စင်မှာ ခိုး၀င်သူများကို မုန်းတီးသည်။ သူတို့သည် အစဥ်လိုက်ကိုစတင် စဥ်းစားစဥ်က ထန်မော့နှင့် ရှောင်ကျီထုံးမှာ ထုတ်မပြောခဲ့သော်လည်း ထိုအချက်ကို စိတ်ထဲစွဲနေခဲ့ကြသည်။

အဘယ်ကြောင့်မူ အနက်ရောင်မျှော်စင်မှာ ခိုး၀င်သူများကို မုန်းတီးကာ တရား၀င်ကစားသမားများကို အသိအမှတ်ပြုပြီး ထိုသို့အစဥ်လိုက်ကိုပြုလုပ်ခဲ့၍ဖြစ်သည်။ အသက်ရှင်နိုင်ချေအနည်းဆုံးမှာ ခိုး၀င်သူများဖြစ်ကာ အသက်ရှင်နေချေအများဆုံးမှာ တရား၀င်ကစားသမားများဖြစ်သည်။ ဤကဲ့သို့အစဥ်လိုက်မှာ အနက်ရောင်မျှော်စင်၏ အကြိုက်နှင့်အလွန်ကိုက်ညီလေသည်။

ထန်မော့ပထမလူဖြစ်သည်က သူသည်မျှော်စင်ဒုတိယထပ်ကိုရှင်းထားပြီး ထိုကောင်လေးထက် သန်မာ၍ဖြစ်သည်။ သူသည်အနက်ရောင်မျှော်စင်ထံမှ အသိအမှတ်ပြုခံရပြီး ရှေ့ဆုံးလူဖြစ်လာသည်။ ရှောင်ကျီထုံးမှာ အရံကစားသမားများထဲတွင် ပထမလူဖြစ်ကာ မျှော်စင်ဒုတိယထပ်ကိုရှင်းခဲ့ပြီး တရား၀င်ကစားသမားဖြစ်လာခဲ့သည်။ သူသည်လည်းအနက်ရောင်မျှော်စင်ထံမှ အသိအမှတ်ပြုခံခဲ့ရသည်။

ကျန်မိန်းကလေး၂ဦးကိုအတိအကျမသိသော်လည်း သူတို့၏ အဓိကအမှားမှာ ဖူ၀မ်သော်နှင့် နင်းနင်းဖြစ်သည်။

နင်းနင်းနှင့်ဖူ၀မ်သော်၂ဦးစလုံးမှာ မျှော်စင်ဒုတိယထပ်ကိုရှင်းထားပြီး ခိုး၀င်သူများဖြစ်ကြသည်။ သူတို့၂ဦးကြားမှ အစဥ်လိုက်ကို ဆုံးဖြတ်ရန်ခက်လှသည်။ နင်းနင်းမှာ အလွန်သန်မာကာ အနက်ရောင်မျှော်စင်မှာ သူမကိုလိုက်ဖမ်းခဲ့ဖူးသည်။ သို့သော် ထန်မော့၏ရင်ထဲတွင်တော့ အနက်ရောင်မျှော်စင်မှာ နင်နင်းထက် ဖူ၀မ်သော်ကို ပိုသတ်လိုကြောင်း သိနေခဲ့သည်။ သို့သော် သူ၏ကိုယ်ပိုင်အတွေးအမြင်အပေါ် မျက်စိစုံမှိတ်လည်း မယုံရဲခဲ့ချေ။ သူ၏အယူစွဲအရ သိမ်းငှက်ကြက်ပေါက်ဖမ်းဂိမ်း၏စည်းမျဥ်းကို ၂ခါလွဲချော်ခဲ့သည်။

ကံကောင်းစွာဖြင့် သူတို့၏ နောက်ဆုံးအစဥ်လိုက်မှာ မှန်ကန်ခဲ့သည်။

ထန်မော့နှင့် ရှောင်ကျီထုံးတို့ရှင်းပြပြီးနောက် မိန်းကလေး၂ဦးမှာ အဆုံးတွင် ဂိမ်း၏ အမှန်တရားကိုနားလည်သွားခဲ့သည်။ ရှောင်ရှောင်းမှာတစ်စုံတစ်ခုကို ရုတ်ချည်းနားလည်သွားလျက် ထိတ်လန့်သွားခဲ့သည်။

"နေဦး ဒါဆို ဂိမ်းတတိယအချီတုန်းက ကျွန်တော်၂ယောက်မြောက် ဒီအစ်မက ၅ယောက်မြောက်လို့ပြောတာ မှန်နေတာပေါ့"

ထိုကောင်လေးမှာ နောက်ဆုံးတွင် နားလည်သွားခဲ့သည်။

"ကြက်ဆင်ကြီးက ဂိမ်းကိုကလိမ်ကျနေတာလား"

ဂိမ်း၏ ပထမ၂ချီတွင် ကြက်ဆင်ကြီးမှာ အဖြေမှန်၁ခုစီသာပေးခဲ့သည်။ သို့နှင့် တတိယအချီမေးခွန်းမှာလည်း ကြက်ဆင်ကြီးမှာ တစ်ခုကိုသာ မှန်ကန်စွာဖြေလိမ့်မည်ဟု ယူဆလိုက်ကြတော့သည်။ သို့နှင့် ကြက်ဆင်ကြီး၏ ရည်ရွယ်ချက်မှာ အောင်မြင်သွားခဲ့သည်။ ကြက်ဆင်ကြီးသည် ထန်မော့နှင့်ရှောင်ကျီထုံးတို့ကိုအထင်လွဲစေခဲ့သည်။

လူ၇ယောက် မီးပုံဘေးတွင် ၀ိုင်းထိုင်နေခဲ့ကြသည်။ ကြက်ဆင်ကြီးမှာလည်း သေဆုံးသွားပြီဖြစ်ကာ လေထုမှာ အလွန်အေးဆေးနေခဲ့လေသည်။

ရှောင်ကျီထုံးကဆိုသည်။

"ခင်များက အကြောင်းပြချက်တွေအကုန်လုံးကိုရှင်းပြခဲ့ပေမယ့်..ကျွန်တော်မရှင်းတာတစ်ခုရှိသေးတယ်"

ရှောင်ကျီထုံးမှာ ထန်မော့ကို ပြုံးပြသည်။

"မစ်စတာဗစ်တာ ဒီမိန်းကလေး၂ယောက်ရဲ့ အစဥ်လိုက်နဲ့ ပတ်သက်ပြီး ဘာသံလွန်စရော အာမခံချက်မှရောမရှိခဲ့ဘူးနော်...ကျွန်တော်သိချင်မိတယ်..ခင်များ သူတို့အစဥ်လိုက်ကို ဘယ်လိုသိခဲ့တာလဲ"

လူတိုင်း ထန်မော့ကို ကြည့်လိုက်ကြသည်။

မိန်းကလေး၂ဦး သူ့အား စိတ်၀င်စားစွာစိုက်ကြည့်လျက် ဤကစားသမားမှာ သူတို့၏ အစဥ်လိုက်ကို မည်သို့မှော်ဆန်စွာခန့်မှန်းနိုင်ခဲ့သည်ကို သိလိုခဲ့သည်။

ထန်မော့က ဒုတိယထပ်ကိုရှင်းထား၍ ရှောင်ရှောင်းရှေ့တွင်ဖြစ်သည်။ ရှောင်ကျီထုံးမှာ တရား၀င်ကစားသမားဖြစ်လာ၍ ထိုမိန်းကလေး၂ဦး၏ ရှေ့သို့ရောက်ခဲ့သည်။ ဖူ၀မ်သော်နှင့် နင်းနင်း၏ အစဥ်လိုက်မှာ သိမ်းငှက်ကြက်ပေါက်ဖမ်းဂိမ်း၏ တတိယအချီတွင် သိခဲ့ရသည်။

သူတို့ကရော...

🪩

Prev Next